Вести
ВМРО-ДПМНЕ бара истрага за Заев, реформи и ревизија на врховните судии
На протестот во организација на ВМРО-ДПМНЕ против неправдата, лидерот на партијата, Христијан Мицкоски испрати три барања. Тој побара истрага за доскорешниот премиер, лидерот на СДСМ, Зоран Заев за злоупотреба на службена положба, итна реформа на Советот за реформи во правосудството и ревизија на работата на врховните судии и нивните одлуки.
Протестот започна од пред зградата на Јавното обвинителство вечерва во 18:15 часот, по што поддржувачите на оваа партија и присутните граѓани се движеа по кејот на реката Вардар, се до Врховниот суд. На протестот присутните граѓани извикуваа „Сакаме правда“, „Никогаш Северна, само Македонија“, пееја патриотски песни, вееја македонски знамиња, а главниот транспарент беше „Заев е виновен“.
Мицкоски пред Судот во обраќањето пред насобраните граѓани рече дека протестираат оти неправдата станала неподнослива. Тој вели дека аудио материјалот, кој пред некој ден беше објавен на прес конференција на ВМРО-ДПМНЕ, покажува дека мафија владее со секоја власт која треба да биде независна.
Пратеникот на опозицијата Антонијо Милошоски на прес-конференција објави снимка, на која, како што рече се слуша гласот на порaнешниот премиер Зоран Заев како тој носел одлуки во име на Врховниот суд и на СЈО и оти бил во дослух со поранешната специјална обвинителка Катица Јанева за сите нејзини одлуки.
Мицкоски побара тим од обвинители да состават обвинение против Заев, по кое тој ќе одговора за попречување на правдата. Но обвинители, кои ќе бидат прифатени од експертската јавност. Што се однесува до реформите на Советот Мицкоски вели дека додека да се направат тие, работата на Советот треба да биде суспендирана, а побара и меѓународна експертска помош во реализирање на реформите. Доколку ревизијата на работата на врховниот судии покаже неправилности кај некого, Мицкоски рече дека од нив очекува оставки.
„Очекуваме брза реакција, а доколку ја нема, народот е тука и знае што треба да направи и каков одговор следи на 12 април“, рече Мицкоски.
Лидерот на ВМРО-ДПМНЕ вели дека има неколку виновни за тоа што неправдата ја победува правдата, но дека Заев е највиновен.
„Зоран Заев е виновен, затоа што во исто време е премиер, обвинител и судија. Виновен е затоа што е главен рекетар, главен забавувач кога се во прашање гафовите и трговец со виталните органи на нашата Македонија. Не му е тешко да украде, да изгуби, да се осрамоти, но не му барајте да биде чесен, затоа што е нечесен, а и најлесно му е да не ја говори вистината да излаже. Тој и пука право во чело на правдата со умисла и без каење“, рече Мицкоски.
Мицкоски вели дека ВМРО-ДПМНЕ беше казнето на локалните избори, но дека ја научиле лекцијата и дека сега на ред е да биде казнет и СДСМ, оти како што вели убивањето на правдата и отсуството на резултати, донеле апатија.
„Ја разбирам апатијата, тоа апатија ја посакува СДСМ. Но оваа енергија значи победа и обнова, шанса народот да си ја врати земјата во свои раце. По следните избори нема да биде исто како сега, ние го ветуваме тоа, а нашиот збор вреди повеќе од зборот на Заев“, рече Мицкоски.
Пред една недела за правда маршираше и СДСМ.
види ги сите денешни вести
Дел од српската опозиција ќе ги бојкотира изборите во Белград
Рокот за поднесување изборни листи за изборите во Белград на 2 јуни истече на полноќ, а дел од опозициските партии, обвинувајќи ја владејачката партија дека не создава фер изборни услови, решија да бојкотираат, што значително ги намалува шансите на опозицијата да ја победи владејачката Српска напредна партија (СНС).
Во декември минатата година се одржаа избори во Белград, но тие ќе бидат повторени откако владејачката СНС не успеа да формира мнозинство од советниците во градското собрание и со тврдењата на опозицијата дека изборите биле украдени, меѓу другото, со миграција и носење гласачи надвор од Белград.
На предлог на дел од парламентарната опозиција изменет е Законот за единствен избирачки список, со кој се предвидува граѓаните кои го промениле местото на живеење во изминатите 11 месеци да не можат да гласаат на својата нова адреса, а ограничувањето важи за периодот од 3 јуни 2023 година до 3 јуни годинава.
Но, не успеа кампањата на граѓанските организации и опозицијата за отстранување на името на српскиот претседател од избирачкиот список на СНС, кој формално поднесе оставка од партијата во мај минатата година.
Името на Вучиќ беше на списокот на декемвриските парламентарни избори и на претстојните белградски и локални избори, иако тој не бил и не е кандидат за ниту една функција, што опозицијата и експертската јавност го сметаат за прекршување на уставните и законските норми.
Градскиот изборен комитет во Белград уште еднаш ја прифати листата на СНС со името на Вучиќ, а такви листи се поднесени и за локалните избори што ќе се одржат на 2 јуни во уште 64 општини и градови низ Србија.
Германскиот суд ја потврди екстремистичката класификација за екстремно десничарската АфД
Највисокиот германски суд денеска (13 мај) пресуди дека домашните безбедносни служби можат да продолжат да ја третираат екстремно десничарската Алтернатива за Германија (АфД) како потенцијално екстремистичка партија.
Одлуката на судот значи дека разузнавачките служби го задржуваат правото да ја држат АфД под надзор, вклучително и прислушувањето.
Германското разузнавање ги класифицираше и АфД и нејзината младинска организација Јунге Алтернатива (ЈА) како можни десничарски екстремистички групи.
АфД, која продолжува да е на врвот на анкетите во неколку источни држави кои ќе одат на избори подоцна оваа година, е под зголемена контрола поради наводните расистички изјави на нејзините членови, како и наводите дека во нејзините редови има руски и кинески шпиони и агенти.
Пресудата на повисокиот управен суд во Минстер ја потврдува претходната одлука на понискиот суд во Келн.
Главната политика на АфД е тврдокорниот антиимиграциски став, додека партијата профитира од зголемената загриженост на многу германски гласачи за зголемениот број на баратели на азил.
„Пресудата го потврдува она што го кажуваме со години: АфД е крајно десничарска партија која сака да ја ослабне нашата демократија и владеењето на правото“, рече во изјавата Феликс Колб, шеф на антиекстремистичката група „Кампакт“.
АфД има околу 20 отсто од гласовите на националните анкети, во услови на големо незадоволство од трипартиската коалиција на канцеларот Олаф Шолц.
Првата дама и шефот на украинската дипломатија во прва посета на Србија од руската инвазија
Сопругата на претседателот на Украина, Олена Зеленска и украинскиот министер за надворешни работи, Дмитро Кулеба, од неделата (12 мај) се во билатерална посета на Белград.
Тоа е прва посета на високи украински достоинственици на Србија од почетокот на руската инвазија на Украина во 2022 година.
Кулеба во понеделник треба да се сретне со премиерот на Србија, Милош Вучевиќ, како и со претседателката на Собранието, Ана Брнабиќ.
Посетата започна со обиколка на градската библиотека во Белград во друштво на сопругата на претседателот на Србија, Тамара Вучиќ, а Зеленска го обиколи градот и неговата средновековна тврдина Калемегдан, јави агенцијата Танјуг. Другите медиуми не беа информирани за овој настан.
Како што е најавено на Инстаграм профилот на Зеленска, таа го посети археолошкиот локалитет со изложбата „Римска сала“ во градската библиотека во Белград, како и „украинската полица“, катче од библиотеката со украински книги што е основана под нејзино покровителство.
Таа присуствувала и на потпишувањето на договорот за соработка меѓу универзитетите во Белград и Киев.
Србија го поддржува територијалниот интегритет на Украина, која го вклучува и полуостровот Крим, кој беше анектиран од Русија во 2014 година. Сепак, иако Србија е кандидат за членство во Европската Унија (ЕУ) од 2012 година, Србија не ја усогласи својата надворешна политика со онаа на Брисел, ниту ги усвои санкциите што нејзините западни партнери и ги воведоа на Русија по инвазијата на соседна Украина.
Зеленска и Кулеба допатуваа во посета на Србија десет дена по изборот на новата влада, која ја следат контроверзии поради имињата на двајца министри блиски до Русија, поради што Белград претходно беше изложен на критики од ЕУ и од САД.
Се работи за Александар Вулин, прорускиот вицепремиер и поранешен шеф на разузнавањето кој е под санкции на Соединетите Држави и за Ненад Поповиќ, министер без ресор, со политички и деловни врски во Русија, кој исто така е санкциониран од САД.
Што се однесува до претседателот Александар Вучиќ, тој се сретна со украинскиот лидер Володимир Зеленски три пати од февруари 2022 година, кога започна руската инвазија, за време на меѓународни форуми во странство, а последен пат на регионален состанок во Тирана во февруари.
Од 2022 година, Србија прифати илјадници украински бегалци, испрати хуманитарна помош во Украина и вети помош во деминирањето на земјата и во нејзините повоени напори за обнова.
Официјална Софија по инаугурацијата на Сиљановска-Давкова: Договорите мора строго да се спроведуваат
Бугарија не прифаќа изјави и однесување кои се во спротивност, како со Договорот за пријателство, добрососедство и соработка од 2017 година, така и со договорите меѓу Европската Унија и Република Северна Македонија (РСМ). Ова се вели во ставот на бугарскиот в.д. премиер Димитар Главчев, по повод инаугурацијата на Гордана Сиљановска-Давкова.
Ова, како што пренесува БТА, е и ставот на бугарскиот претседател Румен Радев, кој претходно денеска го пренесе, прес-службата на неговиот кабинет.
„Бугарија постојано и јасно го кажа својот став дека договорите мора строго да се спроведуваат. Убедени сме дека европската перспектива на Република Северна Македонија целосно зависи од имплементацијата на меѓународните договори во кои е членка, како и од одобрениот од Европскиот совет во јули 2022 година“, се посочува во соопштенијата од кабинетите на Главчев и Радев.
Двајцата, исто така, потсетуваат дека Република Северна Македонија е членка на НАТО, од кое што произлегуваат соодветните обврски и одговорности.
Новоизбраната претседателка Гордана Сиљановска-Давкова, вчера ја презеде функцијата откако положи заклетва пред Собранието, при што во името на државата ја изостави придавката „Северна“, што предизвика низа реакции од Грција и ЕУ за почитување на Договорот од Преспа од 2018 година.
МНР: Избраните државни функционери да бидат внимателни кон меѓународно преземените обврски
Министерството за надворешни работи денеска (13 мај) соопшти дека ја потврдува цврстата определба на земјата кон недвојбено почитување на уставните одредби и на сите меѓународно преземени обврски како што е целосното почитување на Договорот за стратешко партнерство меѓу Република Северна Македонија и Република Грција, познат како Договорот од Преспа.
МНР повикува на внимателност од страна на политичките чинители, особено, како што наведува, од избраните државни функционери.
„Изминативе седум години, двете соседни земји развија исклучително високо ниво на политички дијалог, кое резултираше и со неколкукратно зголемување на економската соработка и изградбата на позитивни врски меѓу луѓето. Овие придобивки резултираа со членството на земјата во НАТО, отворање на преговорите со Европската Унија, како и со надградба на стратешкото партнерство во стратешки дијалог со САД. Повикуваме на внимателност од страна на сите политички чинители, особено на избраните државни функционери. Задржувањето на евроатлантскиот курс на земјава претставува основен стратешки интерес и гарант за долгорочната безбедност и стабилност на земјата“, нагласува МНР.
Реакцијата на МНР следува откако вчера на инаугуративната седница во македонското Собрание, новата претседателка Гордана Сиљановска-Давкова не го употребуваше уставното име на државата Северна Македонија, туку името Македонија.
Литванскиот претседател и премиерката одат во вториот круг од претседателските избори
Литванскиот претседател Гитанас Наузеда освои најмногу гласови во првиот круг од претседателските избори, објавија официјални извори во понеделник (13 мај).
На изборите во неделата, Наузеда освои 44 отсто од гласовите, додека премиерката Ингрида Шимонита речиси 20 отсто, според прелиминарните резултати објавени од Централната изборна комисија на Литванија.
Во првиот круг учествуваа осум кандидати, што направи да биде тешко некој да добие 50 проценти од гласовите потребни за целосна победа во првиот круг. Вториот круг на гласање е закажан за 26 мај.
Изборите се во време кога руските придобивки во Украина ги подгреваат стравувањата за намерите на Москва, особено во стратешки важниот балтички регион.
Главните задачи на претседателот во политичкиот систем на Литванија, која е членка на НАТО, се да ја надгледува надворешната и одбранбената политика, заедно со функцијата врховен командант на вооружените сили.
Имајќи предвид дека Литванија е стратешки лоцирана на источното крило на НАТО, на претседавањето со релативно мала нација му се придава дополнителна важност, бидејќи тензиите меѓу Русија и Западот се зголемуваат поради војната во Украина.
И Наузеда и Шимоните ја изразија својата поддршка за Украина.
Двајцата беа ривали и во вториот круг од претседателските избори во 2019 година, кога Наузеда победи со 66 отсто од гласовите.
Русија соборила 16 проектили и 31 беспилотно летало по украинскиот напад во Белгород
Русија во понеделник (13 мај) соопшти дека уништила 16 ракети и 31 беспилотно летало лансирани од Украина во текот на ноќта на руска територија, вклучително и 12 над пограничниот регион Белгород, по нападот претходниот ден каде загинаа 15 лица.
„Оштетени се пет куќи во Белгород, но според првичните информации нема повредени“, напиша на Телеграм гувернерот Вјачеслав Гладков.
Инаку ден претходно, 15 лица загинаа во Белгород кога дел од станбен блок се урна откако беше погоден од фрагменти од соборената ракета од советската ера, лансирана од Украина и соборена од руските сили, соопшти Русија.
Руското Министерство за одбрана во понеделникот соопшти дека 12 наведувани проектили биле лансирани од украинскиот повеќецевни ракетен фрлач Вилха.
Министерството исто така соопшти дека над Крим биле соборени четири водени ракети „Олуја сенка“ и седум беспилотни летала, уништени се осум беспилотни летала над регионот Курск и четири биле пресретнати над Липецк.
Во Украина немаше изјави за напади на руска територија. Киев тврди дека нападите врз руската воена, транспортна и енергетска инфраструктура ги поткопуваат воените напори на Москва и се одговор на безбројните смртоносни напади на Русија.
По силното гранатирање на североисточниот украински регион Харкив, руските сили во последниве денови ја пробија границата и велат дека ги потиснале украинските сили од најмалку девет села во областа.
Овој потег се заканува да отвори нов фронт и ја принуди Украина да ангажира дополнителни трупи во областа додека руските сили напредуваат на клучните точки долж фронтот на југ и на исток.
Руските трупи во неделата објавија дека зазеле уште четири села - Катишче, Красне, Мороховец и Олиников во украинската област Харкив.
Руските воени блогери тврдат дека Русија користи нумеричка супериорност за да навлезе во релативно небранети области со мали, но многу мобилни единици кои ги опколија украинските позиции. Началникот на украинската армија рече дека силите на неговата земја се соочуваат со тешка ситуација во борбите во областа Харкив, но дека прават се што можат за да ја задржат линијата.
Во грузискиот парламент последно читање на предлог-законот за странски агенти
Во грузискиот Парламент денеска ќе започне последното читање на предлог-законот за странски агенти, што предизвика масовни протести во Грузија, јави ДПА.
„Третото и последно читање на законот ќе започне денеска во Тбилиси, а пленарното гласање е закажано за утре“, изјави претседателот на парламентот Шалва Папуашвили.
Партијата на владејачкото мнозинство Грузиски сон вели дека сака да донесе поголема транспарентност во однос на странското финансирање на невладините организации.
Десетици илјади луѓе во поранешната советска република демонстрираа против законот во главниот град Тбилиси. Критичарите на законот велат дека владата го моделирала според законот за странски агенти на Русија и дека новата легислатива има за цел да ја попречи работата на независните здруженија и медиуми.
Во Русија, многу организации и поединци се означени како странски агенти, што често им создава сериозни правни проблеми, јави ДПА.
Опозициските партии во Грузија ја повикуваат владата да се откаже од предлог-законот.
Во Косово од денеска ќе се користат само евра
Од денеска сите готовински трансакции каде било во Косово ќе мора да се вршат во евра, откако вчера измина преодниот период на Централната банка на Косово (ЦБК) во однос на користењето на динарите, јавија српските медиуми.
Во Приштина сметаат дека граѓаните имале доволно време да се информираат за Уредбата на ЦБК за забрана за користење на динари во готовински трансакции, а од денеска ќе се преземаат мерки против сите оние кои користат валути различни од евра за готовински трансакции во Косово, пренесе РТК.
Во периодот од 1 февруари, кога стапи на сила Уредбата на ЦКБ, досега не се изречени казнени мерки, а граѓаните се информирани за примената на новите правила за готовинско плаќање. ЦБК соопшти дека после 12 мај – сите трансакции ќе се извршуваат во евра.
Во меѓувреме, комерцијалните банки кои работат во Косово добија инструкции да отворат нови филијали на северот.
Во Брисел ќе се одржи седмата рунда од дијалогот меѓу Белград и Приштина, на која, како што најави директорот на српската Канцеларија за Косово и Метохија, Петар Петковиќ, главна тема повторно ќе биде „едностраната и незаконска одлука на Приштина да се укине динарот и платниот промет во динари во Косово и Метохија“.
Путин го назначи Андреј Белоусов за нов министер за одбрана
Рускиот претседател Владимир Путин го предложи Андреј Белоусов за нов министер за одбрана на местото на Сергеј Шојгу. Белоусов, кој досега беше прв вицепремиер, по образование е цивил и економист.
Идниот руски министер за одбрана важи за близок до претседателот, јавија британски медиуми.
Портпаролот на Кремљ Дмитриј Песков синоќа(12 мај) изјави дека рускиот претседател Владимир Путин го предложил Андреј Белоусов за функцијата министер за одбрана бидејќи тој ресор треба да биде апсолутно отворен за иновации, воведување на сите напредни идеи и создавање услови за економска конкурентност.
„Многу е важно економијата на блокот да се вклопи во економијата на земјата и да биде во согласност со динамиката на сегашниот момент“, нагласи тој.
Песков објасни и дека поранешниот министер за одбрана Сергеј Шојгу, како секретар на Советот за безбедност, истовремено ќе биде и заменик шеф на државата во Комисијата за воено-индустриски комплекс и ќе ги надгледува активностите на Федералната служба за воено-техничка соработка.
Во 2000 година Белоусов беше назначен за хонорарен советник на рускиот премиер, а шест години подоцна стана заменик министер за економија. Од 2008 до 2012 година - во периодот кога Путин беше премиер - тој беше директор на одделот за економија и финансии во владиниот апарат. Во 2012 година беше министер за економија.
Од 2013 до 2020 година Белоусов беше советник на рускиот претседател, а од 2020 година ја извршува функцијата прв вицепремиер. Во истата година, тој накратко го замени премиерот Михаил Мишустин, кога се разболе од Ковид-19.
Во 2017 година, РБК напиша дека Белоусов е еден од луѓето кои го убедиле Путин дека дигиталната економија и блокчејн технологијата се клучни за иднината.
Мултимедија
Најпосетени
Што треба да знаете