Достапни линкови

Вести

Починати 7, заболени 383 и оздравени 95 лица од коронавирус

Клиника за инфективни болести во Скопје

Во последните 24 часа се направени 1648 тестирања, а регистрирани се 383 нови случаи на ковид-19. Најмногу заболени има во Скопје, односно 201 лице.

Во болнички услови починати се 7 лица, 63 годишен пациент од Куманово, 69 годишен од Тетово, потоа пациент на возраст од 67 години од Гевгелија, 51 годишен од Скопје, 60 годишен од Кавадарци и двајца пациенти од Битола на 60 годишна и 79 годишна возраст. Институтот за јавно здравје денеска регистрира 95 оздравени пациенти.

Досега во земјата се направени вкупно 207.891 тестирања на Ковид-19. Нема тестирања во рамките на скринингот.

Вкупната бројка на ковид дијагностицирани во нашата земја од почетокот на епидемијата изнесува 20937, бројката на оздравени пациенти е 16194, на починати е 792, а во моментов бројот на активни случаи во земјата изнесува 3951.

види ги сите денешни вести

Меѓународен ден на жената - „Еднаква иднина во светот со ковид-19“

илустрација

„Жените во лидерство: Постигнување еднаква иднина во светот со ковид-19“ е темата на годинашното одбележување темата за Меѓународниот ден на жената, 8 март поставена од Обединетите нации. Темата ги слави огромните напори на жените и девојките ширум светот во обликувањето на порамноправна иднина и закрепнување од пандемијата ковид-19. Исто така е усогласена со приоритетната тема на 65-та седница на Комисијата за статусот на жените, „Целосно и ефективно учество на жените во донесување одлуки во јавниот живот, како и елиминирање на насилството, за постигнување на родова еднаквост и зајакнување на сите жени и девојки во сите области на животот, еднаква плата, еднакво споделување на неплатена грижа и домашна работа, да се стави крај на сите форми на насилство врз жените и девојчиња и здравствени услуги кои одговараат на нивните потреби.

ССМ: Не смее да има јаз меѓу платите на мажите и жените


Жените стојат на првите редови на кризата со ковид-19, како здравствени работници, негувателки, организатори на заедницата и како едни од и најефикасните лидери во борбата против пандемијата. Жените лидери и организациите на жените ги демонстрираа своите вештини, знаење и мрежи за ефикасно водење во напорите за одговор и обновување од ковид-19, наведуваат ОН по повод денешниот Меѓународен ден на жената.

Времето денеска: претпладне сончево, попладне можен дожд

Претпладне ќе биде сончево со мала до умерена облачност и со слаба магла по одделни котлини. Попладне облачноста ќе се зголеми и на места ќе има услови за слаб дожд. Ќе дува слаб до умерен ветер од западен и северозападен правец. Дневната температура ќе биде од 4 до 15 степени. Во Скопје и околината слично време. Дневната температура ќе биде 12 степени.

Нови 333 случаи на ковид-19, 268 оздравени и 10 починати

Регистрирани се 333 нови случаи на ковид-19 од направени 2.259 тестирања, соопшти Министерството за здравство согласно податоците од Институтот за јавно здравје.

Во Скопје има 182 нови случаи, Кавадарци – 22, Куманово и Охрид – по 20, Тетово – 15, Битола – 11, Прилеп – 9, Неготино – 8, Велес и Ресен – по 7, Гостивар – 6, Гевгелија – 4, Струмица – 3, Струга, Кичево, Свети Николе, Крива Паланка и Кратово – по 2, Штип, Кочани, Дебар, Радовиш, Берово, Виница, Богданци, Демир Хисар и Македонски Брод – по 1.

Регистрирани се 268 оздравени пациенти. Пријавени се вкупно 10 починати лица. Починати се по 3 пациенти од Скопје (85г,70г,70г) 2 пациенти од Кавадарци (90г, 59г) и по 1 пациент од Штип (47г), Велес (59г), Кочани (79г), Куманово (82г), и Охрид (68г). Девет пациенти се починати во болнички услови, еден пациент во домашни услови.

Досега во земјата се направени вкупно 543.254 тестирања на Ковид-19. Вкупната бројка на КОВИД-дијагностицирани лица во нашата земја од почетокот на епидемијата изнесува 107.163, бројката на оздравени пациенти е 94.729, на починати е 3.195, а бројот на активни случаи изнесува 9.239.

Во земјава во последните три недели расте бројот на новозаразени, пред се поради таканаречениот британски сој на вирусот кој е позаразен, велат здравствените власти.

МВР заплени над пола тон марихуана во две акции

Запленетата дрога.

Полицијата запленила околу 500 килограми марихуана и привела три лица, откако вчера во две оддели акции на југот од земјата се пресечени канали за меѓународен транспорт на дрога, соопштија од Министерството за внатрешни работи (МВР).

Со една од акциите е пресечен меѓународен канал за транспорт на марихуана од Косово преку Северна Македонија и Грција за Турција. Во оваа акција се запленети најмалку 424 килограми марихуана и е приведено едно лице од Скопје на возраст од 47 години.

„Запленетата марихуана на нарко-пазарот во Турција се проценува дека би достигнала цена од над милион евра, соопшти денеска портпаролот на МВР, Тони Ангеловски.

На граничниот премин Богородица била запленета дрогата во камион со скопски регистарски таблички регистриран на правно лице. Во приколката на камионот меѓу отпадната хартија што легално се пренесувала имало пакети дрога.

Во друга акција, пак, во близина на границата со Грција е пресечен канал за транспорт на дрога од нашата земја во Грција и запленети се околу 93 килограми марихуана. За овој случај приведени се двајца луѓе на возраст од 24 и 28 години.

Во врска со истрагата, постапува и полицијата на Грција со цел расчистување на случајот со овој канал за трговија со наркотици, посочи Ангеловски.

Иран ќе се врати на нуклеарниот договор ако САД ги тргнат санкциите

Иранскиот претседател Хасан Рохани.

Иран е подготвен да преземе чекори со кои ќе ги исполни мерките согласно нуклеарниот договор склучен со светските сили во 2015, веднаш штом САД ги укинат економските санкции кон земјата.

„Штом САД ќе ги укинат нелегалните санкции и ќе се откажат од политиката на закани и притисоци, Иран ќе ги исполни своите обврски“, рече денеска иранскиот претседател Хасан Рохани на средбата со ирскиот министер за надворешни работи Симон Ковени, за време на дипломатските напори за заживување на историскиот нуклеарен договор.

Ирска не учествуваше во договорот, но Даблин има улога на олеснувач во спроведувањето на нуклеарниот договор.

Рохани ги критикуваше европските потписнички на договорот - Велика Британија, Франција и Германија, за, како што рече, непостапување по нивните обврски од договорот. Според него Иран е единствената страна што платила цена за тоа.

Американскиот претседател Џо Бајден сигнализираше дека е подготвен да го оживее договорот, но инсистира на тоа Иран најпрво да се врати на обврските кои произлегуваат од договорот.

Поранешниот претседател на САД, Доналд Трамп, еднострано го повлече Вашингтон од договор што имаше за цел да ја ограничи нуклеарната програма на Иран во замена за ослободување од санкциите. По повлекувањето во 2018 година, САД повторно воведоа санкциите кон Иран. А, како одговор на тоа Иран почна да прави отстапки од договореното.

Пристигна првата пратка од руските вакцини

Министерот за здравство Венко Филипче и амбасадорот на Руската Федерација во земјава Сергеј Баздникин.

Пратка од 3000 вакцини од рускиот производител „Спутник Ве“, пристигна денеска на скопскиот аеродром. Тоа е правата пратка од руските вакцини што пристигна во државата. На аеродромот пратката ја дочекаа министерот за здравство Венко Филипче и амбасадорот на Руската Федерација во земјава Сергеј Баздникин.

Пратката пристигна со редовен лет на „Ер Србија“ од Белград , а е преземена преку службата на ДХЛ од Москва во Белград каде стигнале и одредени количини за Србија, заедно со овие 3000 за нас.

Вакцините се чуваат на температура од – 18 до -20 степени, а ќе се чуваат во фрижидерите во пунктот во „Јане Сандански“. Вакцинацијата со овие вакцини најверојатно ќе почне в среда во пунктовите во Здравствениот дом – Скопје, рече министерот. Согласно националниот план, први вакцина ќе примат најстарите граѓани со хронични болести и луѓето сместени во старечките домови, рече тој.

Во упатството на вакцината на „Спутник Ве“ има препорака за претпазливост само кај трудници и доилки. Не е наведена никаква друга контраиндикација, рече денеска министерот за здравство, Венко Филипче.

Според Филипче, од кинеската вакцина се очекуваат 200.000 дози од кои одредена количина може да дојде за кратко време, но се уште не е точно потврдено кога. Од руската вакцина исто така треба да пристигнат вкупно 200 илјади дози, а заедно со вакцините на АстраЗенека земјава треба да има 2,2 милиони дози од вакцините против ковид-19. Досега, пак, преку системот за пријавување за вакцинирање се пријавиле 120 илјади граѓани дека сакаат да се вакцинираат.

Рускиот амбасадор рече дека вакцината ќе придонесе за спасување човечки животи и за враќање на македонската економија на траекторијата на раст.

„Ние секогаш сме подготвени да им помогнеме на македонските граѓани со кои уживаме во вековните традиции на пријателство и споделуваме заеднички вредности“, рече рускиот амбасадор.

Вакцинацијата во земјата почна на 17 февруари со 8000 вакцини на Фајзер, кои земјава ги доби од Србија. Тие се наменети за медицинскиот персонал од ковид-центрите.

Заев најави кадровски промени во раководството на СДСМ

Зоран Заев

Премиерот и претседател на СДСМ Зоран Заев најави кадровски промени во раководството кои ќе следат по изборите за претседател на партијата, на кои кандидиран е само тој.

Заев вели дека за првпат ќе има внатрепартиски избори на кои секој член ќе може да гласа за нов претседател на СДСМ, и, според Заев, тоа е врвна демократска вредност.

По изборите ќе има Конгрес на партијата некаде во мај и Заев очекува тогаш да има ново политичко освежување. Тој вели дека ќе охрабруваат различни мислења.

„СДСМ е партија во која владее демократијата но сакаме да дадеме шанса за уште поголема присутност на различни мислења, за дополнително да ја зајакнеме демократијата. Многу важен елемент е да ги отвориме вратите и за сите оние кои не мора да имаат книшка од СДСМ, но веруваат во социјалдемократските вредности и проевропските политики“, посочи Заев во интервју за Слободен печат.

Заев вели дека демократизација на партиите е важен процес кој придонесува за демократизација на целото општество.

Изборите за претседател на СДСМ се закажани за 21 март. СДСМ соопшти дека ќе може да гласаат над 80 000 членови со право на глас.

Пандемијата ја намали популарноста на партијата на Ангела Меркел

Германската канцеларка Ангела Меркел.

По критиките поради справувањето со пандемијата на коронавирус, поддршката на јавноста за конзервативците на германската канцеларка Ангела Меркел падна на 32 отсто, што е помалку од нивниот резултат на последните парламентарни избори, покажува денеска објавената анкета.

Со падот од два процентни поени за една недела, поддршката на Христијанско-демократската унија (ЦДУ) и нејзиниот баварски сојузник Христијанско-социјалната унија (ЦСУ), достигна најниско ниво во последната година, покажува анкетата на весникот Билд.

Владата е мета на критики поради бавноста на вакцинацијата, пропустите во дистрибуцијата на ковид-тестови за населението и заморот на јавноста од рестриктивните мерки за сузбивање на епидемијата.

Германските конзервативци достигнаа поддршка од речиси 40 отсто на својот врв за време на првиот бран на пандемијата во пролетта минатата година, кога Германија изгледаше како добар пример во Европа во борбата против ковид-19.

Од слабеењето на поддршката на конзервативците профитираат две движења многу критични кон рестрикциите за населението поради пандемијата: националистичката АфД, која има 10 отсто поддршка, и либералната партија ФДП со 9 отсто, покажува анкетата.

Ваквите податоци се лоша вест за канцеларката, една недела пред регионалните избори во две сојузни држави: Баден-Виртемберг и Рајнската област - Пфалц, кои ќе послужат како тест, пред се во пресрет на парламентарните избори во Германија кон крајот на септември.

Резултатот од 32,9 отсто од гласовите кои двете сестрински партии ЦДУ/ЦСУ го постигнаа на изборите во 2017 година веќе се смета за слаб, иако Меркел повторно беше избрана за канцелар, по четврти пат.

Во ковид-центрите се лекуваат 825 пациенти

Во изминатите 24 часа во ковид-центрите во болниците во земјава се лекуваат вкупно 825 пациенти позитивни и суспектни на корона вирусот. Од нив 500 во внатрешноста, а 325 се лекуваат во главниот град, соопшти Министерството за здравство.

Според извештаите на болниците во внатрешноста, најмногу пациенти со ковид има во болницата во Прилеп-84, во Куманово 71 и во Охрид 60 пациенти.

Има околу 300 празни болнички кревети во ковид центрите.
Во тек на денот се прават и исписи на оздравени пациенти со што ќе се ослободат дополнителни легла.

Инаку, сите одделенија на клиничките болници располагаат со болнички места до кои има довод на кислород. Министерството има увид во состојбата со капацитети и доколку има потреба одделенијата ќе бидат дополнително проширени, соопштуваат од Министерството за здравство.

Во последните три неделни почна да се зголемува бројот на новозаразени, а со тоа и на хоспитализирани пациенти. Во земјава сега има повеќе од 9000 активни случаи.

Досега се попишале над 32 илјади иселеници

Досега се попишале 32.753 лица од дијаспората, соопштија од Државниот завод за статистика. Пописот за иселениците стартуваше на почетокот на месецов, преку онлајн апликација на Заводот за статистика. Од таму преку соопштение известуваат дека бројот на попишани расте секој ден. Иселениците можат да се самопопишат до 21 април.

„Државниот завод за статистика секојдневно го следи процесот и е во постојана комуникација со македонските иселеници. Проблемот со ненавременото добивање на повратна порака за влез во апликацијата е надминат и апликацијата беспрекорно
функционира. Самопопишувањето за едно лице трае само 10 минути и воопшто не е сложено. Ги охрабруваме и мотивираме иселениците да одвојат кусо време и да се самопопишат“, се наведува во соопштението од Државен завод за статистика.

Иселениците кои нема да се потпишат онлајн, тоа за нив ќе може да го стори некој близок од семејството кога ќе почне и теренскиот попис кој ќе започне на 1 април и ќе трае до 21 истиот месец.

Папата ги посети деловите од Ирак што беа под контрола на Исламската држава

Молитва на Папата Франциск во дворот на црквата Ал-Тахера во Мосул

Папата Франциск се помоли за ирачките воени жртви пред векови старата црква во градот Мосул во северен Ирак, каде што милитантите на Исламската држава ја опустошија една од најстарите христијански заедници пред поразот на оваа џихадистичка организација пред три години.

Верниците денеска се собраа во дворот на црквата Ал-Тахера, една од најстарите од најмалку 14 цркви во провинцијата Нинива, кои беа уништени од Исламската држава.

Папата, кој има 84 години, ги замоли христијаните во Ирак и на Блискиот Исток, да останат во своите татковини, велејќи дека „трагичниот“ егзодус на христијаните прави огромна штета „не само врз засегнатите поединци и заедници, туку и врз општеството кое го напуштаат“.

За Ватикан, континуираното присуство на христијани во Ирак е од витално значење за одржување во живот на верските заедници кои постојат таму уште од времето на Исус Христос.

Нападите од Исламската држава, која го окупираше Мосул од 2014 до 2017 година, принуди стотици илјади христијани од северен Ирак да избегаат.
Папата денеска слета на аеродромот во регионалната курдската престолнина Ербил, на последниот ден од неговата историска четиридневна посета на Ирак. Тој одржа куса средба со регионалниот претседател Нечирван Барзани и неговиот братучед, премиерот Масрур Барзани.

Папата требаше да ја посети најголемата црква во Ирак, која беше делумно уништена од Исламската држава во блискиот Каракош, каде што христијаните се вратија по поразот на џихадистите. Тој ја заврши посетата со миса на стадионот во Ербил, каде што се очекуваа 10 илјади присутни.

Папата вчера се сретна со еден од највисоките шиитски свештеници, Големиот ајатолах Али ал-Систани во светиот град Наџаф, од каде што испратија пораки за мирен соживот меѓу христијанското малцинство и муслиманите.

Ова е прва посета на еден папа на Ирак.

Ирачките христијани, меѓу кои православни, халдејски католици и други, некогаш претставуваа значително малцинство во Ирак, а нивната бројка се проценуваше на околу 1,4 милиони луѓе, но тој број почна да опаѓа по американската инвазија од 2003 година, кога во повоените превирања сунитските милиции често ги напаѓаа христијаните.

Филипче апелира опозицијата да не ја кочи изградбата на Клинички Центар

Возила на брза помош во постоечкиот Клинички центар Скопје

Министерот за здравство Венко Филипче денеска ја повикува опозицијата во Собранието да ги повлече 2.000 амандмани со кои е блокиран Законот за изградба на нов Универзитетски Клинички Центар.

Како што соопшти Министерството за здравство, во повеќе наврати досега и за време на собраниските комисии и на седниците за пратенички прашања Филипче и Владата и понудија на опозицијата собраниска комисија којашто ќе ја водат опозициски пратеници и ќе го контролираат процесот на градење, изведба и секој аспект од проектот за Клинички центар.

„Доколку опозицијата не ги прифати овие предлози ќе биде јасно дека воопшто не станува збор за нивна недоверба или желба за унапредување на проектот, туку едноставно стратегија за блокади и некоструктивност која веќе предолго трае“, смета Филипче.

Од ВМРО-ДПМНЕ велат дека нема да го поддржат, како што велат, контроверзниот закон за Клинички Центар. Според партијата зајакнувањето на капацитетите на здравствениот систем е приоритет за сите, но тоа не треба да се изведе со нетранспарентен процес и закон од само 9 членови, кој не обезбедува никакви детали за тоа што ќе се добие на крајот од проектот.

Нов клинички центар e партиско ветување пред секои избори.

Процесот за изградба на Клинички центар во Ѓорче Петров почна пред две години, втората фаза се одолговлечи поради ковид кризата.

ВМРО-ДПМНЕ - Пакт со мафија не правиме

Владо Мисајловски, ВМРО-ДПМНЕ

„Пактови со мафија не правиме, прво ќе ве поразиме, а потоа ќе одговарате“, реагираат денеска од ВМРО-ДПМНЕ, еден ден по понудата од премиерот Зоран Заев до опозицијата заедно да прават Влада, на што потоа од ВМРО-ДПМНЕ се согласија на експертска влада предводена од натпартиски човек.

Денеска од опозициската партија велат дека Зоран Заев водел провидна игра, а предлогот за широка влада во која тој ќе одбира кој ќе раководи со ВМРО-ДПМНЕ е, како што велат, најдобриот показател дека владата на Зоран Заев е разнишана.

„И Заев и СДСМ и сета јавност треба да знаат дека пактови со мафија нема, ниту пак ќе поддржиме. Прво ќе ве поразиме, а потоа ќе следува одговорност“, рече денеска на прес-конференција Владо Мисајловски од ВМРО-ДПМНЕ.


Од СДСМ, пак, велат дека лидерот на ВМРО-ДПМНЕ, Христијан Мицкоски со месеци ја лажел јавноста дека станува премиер и дека имаат парламентарно мнозинство. Од владејачката партија велат дека „пратениците од ВМРО-ДПМНЕ имаат шанса да се вразумат и конечно да се престројат на страната на граѓаните и државата, но дека и со нив и без нивна поддршка, реформите во интерес на граѓаните продолжуваат, ќе продолжи и напредокот на државата“.

Вчера премиерот отвори можност за влада со опозицијата, а потоа од ВМРО-ДПМНЕ прифатија експертска влада што би ја водела натпартиска личност. Заев рече дека дел од причините за таквата понуда се надминување на поделеноста во општеството и департизација на администрацијата. Потоа од СДСМ потоа рекоа дека понудата за нормализирање на општеството не е насочена кон Мицкоски, оти со него не можело да се разговара, туку дека понудата е до членовите на ВМРО-ДПМНЕ. На што Мицкоски преку објава на Фејсбук рече дека нема шанса за пакт со криминал и криминалци, дека ќе се бори со власта и дека таа ќе биде победена.

Поранешни војници обвинуваат дека се изманипулирани, Министерството тврди дека сите ќе бидат згрижени

Поранешни војници со наполнети 45 години обвинуваат дека се изманипулирани од страна на Министерството за одбрана, и дека иако им било ветено прераспределување во други институции со повисока плата и бенефиции, тие, како што тврдат, останале на недостоинствени позиции со минимална плата.

Марковски Петко, поранешен војник со наполнети 45 години денеска изјави дека минатата година, во јануари, им било ветено од страна на министерката за одбрана Радмила Шеќеринска и секретарот Драган Николиќ дека ќе бидат прераспределени во пожарна, затворска, судска полиција или други институции со повисока плата и бенефиции, но тоа не се случило.

Тој посочи дека доколку не се реши во најбрзо време нивниот статус, ќе бидат приморани да продолжат со протест.

Државниот секретар во Министерството за одбрана Драган Николиќ изјави дека Министерството за одбрана останува посветено на својот приоритет за решавање на прашањето на професионалните војници со наполнети 45 години. Тој потенцира дека ниту еден професионален војник со наполнети 45 години нема да остане незгрижен, а неговиот статус нерешен.


Тој потсети дека на 1 февруари 2021 година беше објавен проектот за решавањето на професионалните војници.

Николиќ потсети и на законските измени кои се во завршна фаза во Собранието, со кои и професионалните војници откако ќе наполнат 45 години имаат избор – дали да земат отпремнината или ќе продолжат со кариерата во некој од органите на државна управа и органите на локална самоуправа.

Тој апелираше Собранието поскоро да ги изгласа овие законски измени и со тоа да им се овозможи на професионалните војници да можат да имаат и дополнителна опција.

Министерот за надворешни Османи ќе ги посети Рим и Ватикан

Бујар Османи, министер за надворешни работи.

Министерот за надворешни работи Бујар Османи, од утре ќе биде во работна посета на Италија и на Ватикан. Предвидено е тој да се сретне со неговиот домаќин, министерот за надворешни работи и меѓународна соработка на Италијанската Република, Луиџи Ди Мајо, а во агендата е предвиден и состанок со членовите на Комисијата за надворешни работи при Долниот Дом на Парламентот, предводени од претседателот на Комисијата, Пиеро Фасино.

На средбите, како што соопшти денеска МНР, се очекува да се разговара за билатералните односи и за поддршката од страна на Италија за почеток на преговорите на Северна Македонија. Освен за политика, ќе се разговара и за продлабочување на економските односи.

Османи во рамки на посетата на Ватикан ќе се сретне со ватиканскиот секретар за односи со државите, монсињор Пол Ричард Галагер.
Министерот за време на посета на Италија ќе се сретне и со претставници на здруженијата на македонската дијаспора. Во фокусот на овие средби ќе биде и пописот.

Вучиќ - Одговорот на криминалните групи ќе биде безмилосен

Александар Вучиќ

Претседателот на Србија Александар Вучиќ синоќа по Седницата на Советот за национална безбедност, со која претседаваше изјави дека надлежните органи ја прошируваат истрагата за уште едно, четврто убиство за кое се товари криминалната организација на неодамна уапсениот Вељко Беливук.

Вучуќ вели дека оваа група имала фотографии и обележани лица на луѓе од Министерството за внатрешни работи, за кои сметале дека им се непријатели. Но тоа не биле челници на Министерството, ниту на Безбедносно-информативната агенција, туку фотографии од оперативци кои директно се бореле против криминалната група.

На седницата се разговарало и за ситуацијата на Косово, забрзување на вакцинацијата, борбата против организираниот криминал и набавката на опрема на безбедносните агенции и војската.

Што се однесува до организираниот криминал Вучиќ изјави дека „Србија успеала во последниот период да се пресмета со неколку криминални групи, кои извршиле голем број убиства“. Одговорот на криминалните групи ќе биде, како што рече, безмилосен и во согласност со законот и моралот.

На прес-конференцијата беа покажани фотографии, кои ги докажуваат злосторства за кои е осомничена криминална група предводена од Вељко Беливук (Веља Невоља) на кои се гледаат телата на убиените, како и снајперски пушки.

Вељко Беливук е водач на навивачите на фудбалскиот клуб „Партизан“. Тој заедно со уште 18 други луѓе е уапсен на 4 февруари. Полицијата ги сомничи за најбрутални дела – киднапирање, убиства, трговија со дрога. Вучиќ рече дека ова е јасна порака до криминалните групи кои планираат да го заземат местото на Беливук.

Вучиќ соопшти и дека пред два дена во областа меѓу Шабац и Лозница е запленет досега најголем арсенал на оружје, а допрва треба да се види со која криминална група тоа е поврзано.

Српскиот министер за полиција Александар Вулин на прес-конференцијата изјави дека полицијата го предала материјалот на Обвинителството за организиран криминал за прислушувањето на претседателот Александар Вучиќ и неговото семејство. Вучиќ и неговото семејство биле прислушувани 1572 пати без основ, а транскриптите од разговорите биле носени кај одредени функционери во Министерството за внатрешни работи.

Што се однесува до Косово, од официјален Белград се бара да ја признае независноста на Косово, рече Вучиќ. Тој вели дека на почетокот на мај треба да продолжи дијалогот и дека претставниците на Србија ќе бидат подготвени за тој дијалог.

„Ќе ги штитиме државните и националните интереси и ќе го чуваме она што можеме да го сочуваме и она што не успеавме да го изгубиме со неодговорните политики во претходните децении“, вели српскиот претседател.

За вакцините Вучиќ ги повика луѓето да се вакцинираат и да не ги слушаат приказните на како што рече неодговорните луѓе дека вакцините се штетни.

Руските вакцини пристигнуваат попладне

Првата пратка од руските вакцини против ковид -19 треба да пристигне во земјава попладне. Пратката вакцини кои Министерството за здравство ги купи од рускиот производител „Спутник V“ ќе биде доставена со специјален транспорт преку компанијата „ДХЛ“. Вакцините ќе ги пречекаат министерот за здравство Венко Филипче и амбасадорот на Руската Федерација во земјава Сергеј Баздникин на меѓународниот аеродром Скопје.

Вакцините, кои се наменети за три илјади граѓани, се во соодветно пакување, ладен ланец, со запазување на температурите.

„Ова е вакцина која што за разлика од Фајзеровата се чува на температура од – 18 до -20 степени, за што нашата инфраструктура е спремна. По преземањето ќе се смести во нашите фрижидери, ќе се организира процесот на вакцинацијата во пунктовите во Здравствениот дом во Скопје“, изјави министерот Филипче.

Од кинеската вакцина, пак, се очекуваат 200.000 дози од кои одредена количина може да дојде за кратко време, но се уште нема потврда кога. Од „Спутник V“ се очекуваат 200.000 дози или со оние од „Астра Зенека“ вкупно 2.200.000 вакцини треба да стигнат во земјава. Вакцинацијата со руската вакцина веројатно ќе почне в среда, најави министерот Филипче.

Засега вакцинацијата се врши со вакцини од Фајзер што Србија и ги достави на Македонија. Станува збор за 8000 дози наменети за вакцинација на медицинските лица.

Во земјава бројот на пациенти заразени со ковид-19 и натаму е во пораст. Бројот на активни случаи изнесува 9186.

Почувствуван земјотрес во Дебар, Гостивар и Маврово

Илустрација

Земјотрес со интензитет од три степени според Европската макросеизмичка скала синоќа во 22:43 часот е почувствуван во Дебар, Гостивар и Маврово, соопшти денеска Сеизмолошката опсерваторија при Природно-математичкиот факултет во Скопје.

Земјотресот бил со Рихтерова магнитуда од 2,9 степени, од епицентралното подрачје Гостивар-Тетово, со епицентар на 60 километри југозападно од Скопје.

Временска прогноза – Постудено време, од среда пообилни врнежи од дожд

Скопје

Времето во земјава ќе биде сончево со мала до умерена локална облачност. Ќе дува слаб до умерен ветер од југоисточен правец. Максималната температура ќе достигне од 8 до 13 степени.

Во Скопје ќе биде претежно сончево со слаб до умерен југоисточен ветер. Максималната температура ќе достигне до 11 степени.

Од понеделник ќе преовладува променливо облачно време со услови за повремен локален дожд. Пообилни врнежи од дожд, а на планините и на некои повисоки места од снег се очекуваат во среда.

Мицкоски - Сметот мора да се измете, ама најпрвин од сопствениот двор

Христијан Мицкоски

„Ќе бидете победени, тоа ви го ветувам. Македонската пролет доаѓа!“, напиша на Фејсбук претседателот на ВМРО-ДПМНЕ, Христијан Мицкоски, откако денеска премиерот Зоран Заев и понуди на опозицијата заедно да прават Влада, на што од ВМРО-ДПМНЕ одговорија дека се подготвени да разговараат за експертска влада, но да ја предводи заеднички прифатлива натпартиска.

Заев рече дека сака да отвори дебата за заедничка власт и Влада со опозицијата, но како што рече да има човек со кога да разговара.

„Со господинот Мицкоски не се разговара“, рече Заев.

Потоа од СДСМ соопштија дека идејата за национално помирување не е упатена до Мицкоски, туку, како што наведуваат, до чесните членови на ВМРО-ДПМНЕ, кои ги врзува желбата за просперитет на државата и до сите оние кои ја препознаваат големината и визијата на новиот политички концепт за ресетирање на македонското општество.

Мицкоски, кој е заразен со ковид-19, и според пишувањето се наоѓа на лекување во Инфективната клиника, за тоа дека не бил добар соговорник и дека со него немало договор, пишува дека за тоа се согласува со Заев.

„Јас немам концесија и не должам никому ништо. Има начин да се спасите од мене, да не се разбудам утре или денот потоа и тогаш можеби ќе ви биде полесно да пронајдете соодветен соговорник. Но, тој филм нема да го гледате“, пишува Мицкоски.
Тој додава дека освен што се бори со болеста, има енергија, мотив и волја и за борба со власта.

„Не чека многу работа… Сметот мора да се измете, ама најпрвин од сопствениот двор! Ако власта мисли дека има најмали шанси за пакт со криминал и криминалци, тоа нема да се случи“, пишува Мицкоски.

Понудата на Заев доаѓа на само неколку дена откако на негово барање Собранието гласаше за доверба на Владата. Мицкоски неколкупати досега побара оставка од Владата и предвремени парламентарни избори, но Заев тоа го одби.

Водата во селските водоводи во Дебар и Центар Жупа и во пандемија не се хлорира

Селска чешма во село Мелничани, Центар Жупа.

Во општините Дебар и Центар Жупа и во состојба на пандемија водата во селските водоводи не се хлорира. Неопходни се брзи мерки со цел проблемот да се надмине . Оваа го изјави за Радио Слободна Европа раководителот на единицата на Заводот за јавно здравје во Дебар , епидемилологот Ментор Мела, јавува нашиот дописник од Дебар, Кенан Мимидиновски.

Мела нагласува дека проблемот со нехлорирањето на водата во овие водоводи е присутен повеќе од три декади, но додава дека тоа се случува и сега кога сме во состојба на пандемија.

„Во 17 селски населби во двете општини од најзападниот регион на Македонија, водата во селските водоводи не се хлорира. Оваа го покажуваат анализите и притоа се издаваат и решенија кои се доставуваат до надлежните институции“, вели Мела и додава дека хлорирањето и понатаму изостанува.

Од друга страна во селските Месни заедници велат дека тие немаат средства за хлорирање на водата. Исто така, според нив, тие немаат ниту средства за одржување на водоводите бидејќи Месните заедници пред неколку години со закон немаат свои жиро сметки. Тие се свесни дека водата не е исправна за пиење, но, велат за среќа, кај населението досега нема некои поголеми проблеми во однос на здравјето.

Епидемиологот Ментор Мела пак потенцира дека во летниот период кај помал дел од населението во руралните средини има појава на одредени заразни заболувања, кои до сега се лекувани без некои поголеми проблеми.

„Добро е тоа што во една ваква состојба населението има развиено имунитет и е отпорно на квалитетот на водата“, вели дебарскиот епидемиолог.

Почина академик Момир Поленаковиќ

Академик Момир Поленаковиќ

На 81-годишна возраст денеска почина академик Момир Харалампие Поленаковиќ, редовен член на Македонската академија на науките и уметностите (МАНУ).

По повод неговата смрт, Македонската академија на науките и уметностите и Медицинскиот факултет при УКИМ ќе одржат комеморативна седница преку видеоконференциска врска.

Академик Момир Харалампие Поленаковиќ е роден на 26 април 1939 година во Скопје. Медицински факултет завршил во Скопје во 1963 година, кога бил прогласен и награден како најдобар студент – првенец на Универзитетот „Кирил и Методиј“ во Скопје. Специјализација по интерна медицина завршил во 1969 година. Во 1977 година ја одбранил докторската дисертација на тема „Клиничко-имунолошка процена на патолошките настанувања во бубрежните гломерули“. За редовен професор е избран во 1988 година. Работел на Клиниката за нефрологија при Медицинскиот факултет во Скопје, а во периодот од 1990 до 1997 година бил директор на Клиниката за нефрологија. Од 2005 година, во пензија, неуморно продолжил да работи во областа на медицината и со своите трудови и научноистражувачката работа да придонесува во оваа област.

Од МАНУ потсетуваат дека Поленаковиќ нашите сознанија и достигнувања ги соопштувал во земјава и во странство во над 550 отпечатени научни и стручни трудови, од кои над 200 труда се на „Pub Med“, како и во 250 апстракти со кои учествувал на научно-стручните состаноци во земјата и во светот. Редактирал и издал пет книги со реферати од конгреси и научни состаноци. Автор е на книгата со наслов „Исхрана кај болните со бубрежна инсуфициенција и на дијализа“, публикувана во 1997 г., како и коавтор (со академик И. Дејанов и П. Дејанов) на книгата со наслов „Инфекции, хемостатски нарушувања и антибиотичка терапија кај болни на хемодијализа“, објавена во 2004 г., уредник на книгата со наслов „Renal Failure – The Facts“, InTech, 2012.

За редовен член на Македонската академија на науките и уметностите беше избран на 26 јуни 1997 година, а во периодот 2004 – 2007 година беше нејзин потпретседател. Во периодот 2011 – 2017 год., Поленаковиќ беше раководител на Истражувачкиот центар за генетско инженерство и биотехнологија „Георги Д. Ефремов“ на МАНУ.

Нови 722 случаи на заразени со ковид 19

Регистрирани се нови 722 случаи на заразени со ковид 19 од направени 3.701 тестирања, односно 19 отсто од тестираните се позитивни на коронавирусот, соопшти Министерството за здравство повикувајќи се на податоците од Институтот за јавно здравје.

Во Скопје се регистриран 375 нови случаи, Прилеп – 44, Кавадарци – 35, Гевгелија – 29, Битола – 25, Гостивар – 23, Тетово – 22, Куманово – 20, Охрид – 16, Штип – 15, Крива Паланка – 14, Неготино – 13, Велес – 11, Струмица, Струга и Кочани – по 10, Богданци – 9, Кичево, Свети Николе, Ресен, Радовиш, Берово и Крушево – по 5, Валандово – 3, Делчево, Пробиштип и Демир Капија – по 2, Кратово и Демир Хисар – по 1.

Регистрирани се 186 оздравени пациенти. Пријавени се вкупно 9 починати лица. Починати се по 4 пациенти од Скопје (81г,75г,74г,73г) и по 1 пациент од Пробиштип (88г), Струмица (88г), Кичево (72г), Куманово (70г), и Битола (61г). Сите пациенти се починати во болнички услови.

Досега во земјата се направени вкупно 540.725 тестирања на Ковид-19. Вкупната бројка на ковид-дијагностицирани лица во нашата земја од почетокот на епидемијата изнесува 106.832, бројката на оздравени пациенти е 94.461, на починати е 3.185, а бројот на активни случаи изнесува 9.186.

Во последните денови е забележан раст на бројот на новозаразени. Министерот за здравство Венко Филипче вели дека 70 проценти од новите случаи го имаат таканаречениот британски сој, кој е позаразен. Филипче вели дека засега нема потреба од построги ограничувања на движењето на граѓаните со цел запирање на ширењето на вирусот, но следната недела ќе се знае дали ќе има нови рестриктивни мерки.

СДСМ - Идејата за национално помирување не е упатена до Мицкоски

Седиштето на СДСМ во Скопје

„Идејата за заедничка дејствување за напредокот на државата е визионерство и шанса за демократизација и промени во самите политичките партии, а најмногу во ВМРО-ДПМНЕ“, наведуваат во соопштение од владејачката партија.

Во соопштението на СДСМ се наведува дека Зоран Заев, на почетокот на нов четиригодишен мандат како Премиер, само неколку дена после изгласана доверба во Парламентот, подава рака за дебата за национално помирување. Од партијата велат дека Заев ја ужива довербата од граѓаните.

СДСМ соопштува дека идејата за национално помирување не е упатена до Мицкоски, туку, како што наведуваат, до чесните членови на ВМРО-ДПМНЕ, кои ги врзува желбата за просперитет на државата и до сите оние кои ја препознаваат големината и визијата на новиот политички концепт за ресетирање на македонското општество и отстранување на сите аномалии кои како тег го успоруваат развојот и подобрата иднина на земјата.

Премиерот Зоран Заев денеска и понуди на опозицијата заедно да прават Влада, на што од ВМРО-ДПМНЕ одговорија дека се подготвени да разговараат за експертска влада, но да ја предводи заеднички прифатлива натпартиска личност.

Коалициониот партнер во Владата, ДУИ, пак, вели дека ова се некои настани кои произлегуват од дневна политика и дека нема некои дијалози или слично за создавање некое партнерство за коалиција.

Авион на „Ер Франс“ принудно слета во Софија, откако патник се обидел да влезе во пилотската кабина

Илустрација, авион на софискиот аеродром

Авион на „Ер Франс“ кој летал од Париз до Њу Делхи принудно слета во Бугарија, откако патник се обидел да влезе во пилотската кабина. На аеродромот во Софија е уапсен Индиец, кој се обидел да влезе во пилотската кабина, но бил неутрализиран уште во авионот. Мотивите за неговото однесување се уште не се познати, јави дописникот на МИА од Софија.

Обвинителката на Софија, Илијана Кирилова изјави дека патникот уште на почеток од летот се однесувал агресивно, се расправал со другите патници во авионот и нападнал член на екипажот, поради што авионот принудно слета во Софија.

На уапсениот патник му е одреден 72-часовен притвор и е известена Амбасадата на Индија во Софија.
Од Националната истражна служба на Бугарија рекоа дека не може ниту да потврдат, ниту категорично да отфрлат дали случајот е поврзан со тероризам.

Вчитај повеќе

XS
SM
MD
LG