Достапни линкови

Вести

Претреси за случајот „Рекет“, одземени компјутери, оружје и брендирана стока

Основно јавно обвинителство во Скопје

ОЈО денеска соопшти дека персонални компјутери, документација, мобилни телефони, УСБ стикови и мемориски картички, оружје и муниција, како и поголемо количество на брендирана гардероба, накит, часовници и уметнички дела, се одземени при претресите со цел обезбедување материјални докази поврзани со осомничените во случајот „Примање награда за противзаконито влијание“, познат во јавноста како „Рекет“.

Од ОЈО информираат и дека извршени се претреси во домот на родителите на првоосомничениот, менаџерот на 1ТВ, Бојан Јовановски, како и во станот каде што престојувал и во просторијата што ја користел во едно правно лице, воедно извршен е претрес и во домот на второосомничениот, бизнисменот Зоран Милевски-Кичеец, како и во возилата што ги управувале.

Обвинителството посочува и дека до овој момент надлежниот обвинител нема извршено разговори со други лица, за кои излегоа шпекулации во јавноста дека се повикани на информативен разговор во насока на расветлување на случајот.

види ги сите денешни вести

ЕСМ и АДОРА постигнаа договор за закуп на топланите

Парно

Електрани на Северна Македонија (ЕСМ) и компанијата „АДОРА“ постигнаа договор за закуп на топланите во сопственост на „АДОРА“, кои ќе се користат од страна на ЕСМ во процесот на обезбедување парно греење за градот Скопје, информираат од ЕСМ.

Договорот за закуп е со трајност за времетраење на грејната сезона 2022/23 година. Закупнината е дефинирана според постоечката цена утврдена од Регулаторната комисија за енергетика и водни услуги (РКЕ), соопшти попладнево ЕСМ.

Адора Инженеринг: Закупот на топланите е штетен за компанијата

Двете компании, се вели во соопштението, покажале општествена одговорност и свесност за моментот во однос на потребите на граѓаните на Скопје и постигнат е договор сите прашања кои претставуваа предмет на дискусија да се апсолвираат во следниот период.

Од компанијата „Адора Инженеринг“ пак велат дека во интерес на граѓаните склучиле краткорочен договор за закуп на топланите Исток и Запад со ЕСМ, кој важи од денеска до 30 април 2023 година, но додаваат дека истовремено добиле гаранции дека во најбрз рок ќе почне и постапката за купопродажба на топланите.

„Менаџментот на Адора инженеринг доби цврсти гаранции од ЕСМ АД дека во најбрз можен рок, според сите домашни законски прописи ќе почне постапката за купопродажба на топланите Исток и Запад и дека на компанијата ќе и бидат исплатени долговите настанати во изминатата година по основ на закуп и амортизација на топланите“, се вели во соопштението од компанијата.

Топланите кои се во сопственост на „Адора“ ќе се користат од страна на ЕСМ во процесот на обезбедување греење за градот Скопје во претстојната грејна сезона која започнува на 15 октомври.

Мицкоски пристигна во Владата да го претстави планот за справување со енергетската криза

Лидерот на ВМРО-ДПМНЕ Христијан Мицкоски пристигна во Владата каде ќе се сретне со премиерот Димитар Ковачевски

Лидерот на ВМРО-ДПМНЕ Христијан Мицкоски пристигна во Владата каде ќе се сретне со премиерот Димитар Ковачевски.

На средбата ќе се разговара за ублажување на ефектите од енергетската криза.

Мицкоски пред средбата изјави дека како партија се подготвени да понудат решенија за тешката состојба во енегретиката и кризата што ги погодува граѓаните.

„Цениме дека како ВМРО-ДПМНЕ во овие тешки моменти треба да се помогне. Побаравме и официјална средба и еве конечно дали беше од суета или од други причини, вчера добивме потврден одговор од страна на Ковачевски дека ќе најде време да не прими и слушне нашите предлози, нашиот концепт којшто не се однесува само за оваа есен и зима, туку се однесува и за следната година. Цениме дека во овие тешки моменти, потребно е да помогнеме на граѓаните на Македонија, и тоа е момент кога треба да покажеме државност, а не да собираме политички поени. Тоа е суштината“, рече лидерот на ВМРО-ДПМНЕ.

Мицкоски го повика Ковачевски на дебата за енергетската криза

На средбата, покрај Мицкоски, присуствува и економски тим на партијата кој, според претходните најави од ВМРО-ДПМНЕ, ќе го презентира нивниот план за надминување на последиците од кризата.

Се раскинуваат договорите за концесија за седум мали хидроцентрали на Шар Планина

Шар Планина, Попова Шапка.

Владата ги раскина договорите за концесија на седум мали хидроцентрали во Националниот парк Шар Планина.

Шест од малите хидроелектрани се во строго заштитеното подрачје на Националниот парк Шар Планија, а една е во зоната на одржливо користење, информираат од Министерството за животна средина и просторно планирање (МЖСП).

„Опфатени се шест мали хидро-електрични централи во строго заштитено подрачје, кои нема да се реализираат. Со спогодбено раскинување на договорите за концесија, предвидено е да се надоместат реално направените трошоци за реализација на договорите, и трошоците на име на концесијата. Покрај ова, доставен е предлог за спогодбено раскинување на договорот за концесија за уште една хидро-централа лоцирана на Шар планина, во зоната на одржливо користење, при што на концесионерот ќе му се врати уплатениот концесиски надоместок“, се вели во соопштението на МЖСП.

Малите хидроелектрани - Меѓу екологијата и профитот

Граѓанските организации за заштита на животната средина подолго време реагираат дека изградбата на малите хидроцентрали е закана за животната средина и дивиот свет.

Активисти за заштита на животната средина бараа со Законот за прогласување на Шар Планина за национален парк да биде забранета и изградбата на хидроцентрали и да не се продолжат концесиите за оние за кои би се утврдило дека негативно влијаат врз природата и биодиверзитетот и за водата на локалното население.

Спасовски: Македонија е подготвена за прифаќање на украински бегалци

Министерот за внатрешни работи Оливер Спасовски

Државата е целосно подготвена доколку има каква било потреба за прифаќање на украинските бегалци, изјави денеска министерот за внатрешни работи Оливер Спасовски.

Спасовски посочи дека државата има активирано Директива за привремена заштита и покрај тврдењата на Здружението на млади правници дека Македонија, заедно со Косово и Босна и Херцеговина ја немаат активирано оваа директива.

„Ние имаме активирано таков механизам како држава. Целосно сме подготвени. Имаме влез на околу 21 илјада украински државјани на територијата на државата, пред се, кои се во роднински или пријателски врски со наши државјани, а дел од нив работат во ИТ компании кои доаѓаат тука. Има мал број на лица коишто поднеле барање и им се издава престој од хуманитарни причини. Меѓутоа, како држава сме целосно подготвени доколку има каква било потреба за прифаќање на украинските бегалци“, тврди министерот.

Украинските бегалци оставени на хуманоста на македонските граѓани

Од здружението на млади правници пак посочуваат дека украинските државјани кои престојуваат во земјава се соочуваат со сериозни потешкотии и како што велат се оставени сами да се снаоѓаат со решенија во однос на нивниот статус.

„Еден дел од нив веќе аплицираа за привремена заштита, еден друг вид заштита кој се дава согласно Законот за странци, не е заштита од типот како за бегалци наменета, бидејќи со оваа заштита тие неможат да работат, да користат здравствено осигурување, освен ако не си плаќаат сами приватно, не можат да добиваат бесплатно образование итн“, рече Зоран Дранговски од Здружението на млади правници.

Според податоците на Црвениот крст, во Македонија се присутни околу 300 лица од Украина.

Нови 75 случаи на ковид-19, од нив 23 се реинфекции

Тестирање за Ковид-19

Нови 75 случаи на ковид-19 се регистрирани во изминативе 24 часа, од вкупно направени 745 тестови.

Од новодијагностицираните 23 се реинфекции.

Според информациите од Мој Термин, регистрирани се и две лица од Скопје и Кавадарци кои починале во домашни услови во периодот од 21 септември до 2 октомври. Оздравени се 94 пациенти.

За ЕУ пандемијата на ковид-19 не е завршена

Досега во земјата се направени вкупно 2.164.862 тестирања на КОВИД-19. Вкупната бројка на дијагностицирани лица во нашата земја од почетокот на епидемијата изнесува 343.143, бројот на оздравени пациенти е 333.158, на починати е 9.539 а бројот на активни случаи изнесува 446.

Владата ќе прави пресметки за зголемување на платите во високото образование

Илустрација

Владата ќе направи анализи и пресметки дали ќе може да се зголемат платите во високото образование. Ова било заклучено на денешната средба со Синдикатот на УКИМ, кој бара потпишување Колективен договор и постепено покачување на платите, по 25 проценти на годишно ниво, за по четири години да стигнат на ниво од 100-процентно покачување.

Средба на Синдикатот на УКИМ во Владата за зголемување на платите

Како што информира владината прес-служба, од страна на премиерот и министрите истовремено било побарано од Синдикатот да се направи реорганизација на факултетите и воведување нови атрактивни студиски програми, кои ќе ги зголемат сопствените приходи на високообразовните установи.

Во изминатите четири години платите на вработените на универзитетите се зголемени за вкупно 20 отсто, односно 5 отсто од септември 2019 година, 8 отсто од септември 2021 година и 7 отсто од септември годинава.

ЕУ за бугарските културни центри-Не се занимаваме со историја

Џулијан Васало, заменик aмбасадорoт во делегација на ЕУ во Скопје

Заменик aмбасадорoт во делегација на ЕУ во Скопје, Џулијан Васало во врска со отворањето на вториот бугарски културен центар „Цар Борис Трети“ во Охрид денеска порача дека ЕУ не се занимава со историјата.

„Знаеме дека кога првиот клуб беше отворен тоа предизвика реакции во земјата. Знаеме дека Северна Македонија и Бугарија дискутираат меѓу себе за историјата. ЕУ не се занимава со историјата. Ние ја ставаме историјата зад себе и одиме напред. Во ЕУ сакаме да гледаме напред, а не да гледаме на работите од минатото“, рече Васало на брифинг со новинарите на прашање како ЕУ го коментира отворањето на бугарските културни центри и нивните имиња.

Отворањето на првиот бугарски културен клуб „Ванчо Михајлов“ во Битола, на кое присуствуваше бугарскиот државен врв, наиде на реакции и негодувања во македонската јавност. Михајлов, родум од Штип, бил соработник на фашистите во Втората светска војна и тврдел дека Македонците се Бугари.

На 7 октомври е најавено отворањето на вториот културен центар во Охрид. Тој ќе го носи името „Цар Борис Трети“, кој е бугарски цар за време на Втората светска војна, кога Бугарија е дел од оската со Нацистичка Германија и Фашистичка Италија. Еврејската заедница на Македонија најави и кривична пријава за името на овој културен центар и реагираше дека е згрозена заради „величање на фашизмот и ширење на говор на омраза“.

Во однос на уставните измени, односно внесување на Бугарите во Преамбулата, кои се потребни за Северна Македонија да започне со отворање на поглавјата на патот кон членството во ЕУ, Васало рече дека се работи за суверена одлука на државата, но Северна Македонија се обврзала дека тоа ќе го спроведе. Тој додаде дека се во постојан контакт со опозицијата и со ВМРО-ДПМНЕ која, како што рече, го поддржува европскиот пат на земјата.

„Во одреден момент ќе треба да преземат одговорност ако сакаат да ја видат земјата на тој пат“, посочи Васало и притоа повика на лидерство од опозицијата.

На прашањето дали во земјава има влијанија од Истокот, Васало одговори потврдно.

„Имате една политичка партија во парламентот која е отворено проруска и која ја поддржа руската инвазија во Украина и има одредени медиуми кои шират дезинформации за тоа што се случува во Украина и Русија“, додаде Васало.

Заменикот евоамбасадор информираше за скрининг процесот со ЕУ и што следи по неговото завршување. Според него, процесот се состои од објаснувачки и билатерален скрининг, кој нема за цел само да покаже до каде е земјата во нејзината подготвеност за членство во ЕУ, туку и Владата треба да презентира во детали што досега е направено и што планира да направи.

Во однос на наредниот извештај за напредокот на земјава кон членството во ЕУ, што треба да се објави овој месец, тој посочи дека очекува полоши оценки за правосудството. Васало информираше и дека очекува во наредните недели да се потпише Договорот со Фронтекс на македонски јазик без никакви фусноти.






ЕУ ја одобри реформата на полначите за телефони, принудувајќи го Apple да се прилагоди

Европскиот парламент денеска одобри нови правила со кои во Европската унија ќе се воведе единствен приклучок за полнач за мобилни телефони, таблети и камери до 2024 година, што се очекува да влијае врз производителот на iPhone, Apple отколку врз неговите ривали. Гласањето го потврдува претходниот договор меѓу институциите на ЕУ и ќе ги направи USB-C конекторите што ги користат уредите базирани на Android стандардни во ЕУ, принудувајќи го Apple да го промени својот приклучок за полнење за iPhone и другите уреди.

ЕУ воведува универзален полнач за мобилни, таблети и камери

Меѓу големите добавувачи на електронски уреди за европските клиенти, Apple се очекува да биде меѓу најпогодените, но аналитичарите очекуваат и можно позитивно влијание бидејќи тоа би можело да ги поттикне купувачите да ги купат најновите гаџети на компанијата наместо оние без USB-C. Apple во минатото предупредуваше дека предлогот ќе им наштети на иновациите и ќе создаде планина од електронски отпад.

Зеленски издаде декрет според кој разговори на Украина со Путин се „невозможни“

Украинскиот претседател Володимир Зеленски

Украинскиот претседател Володимир Зеленски потпиша декрет со кој официјално се прогласуваат за „невозможни“ какви било преговори меѓу Киев и рускиот претседател Владимир Путин. Уредбата ја спроведе одлуката на Советот за национална безбедност и одбрана на Украина и ги формализираше коментарите дадени од Зеленски на 30 септември, откако Путин прогласи четири региони на Украина делумно окупирани од Москва како дел од Русија, во како што Киев и Западот рекоа дека е нелегитимна фарса. „Тој (Путин) не знае што е достоинство и чесност. Затоа, ние сме подготвени за дијалог со Русија, но со друг претседател на Русија“, рече Зеленски на 30 септември.

Гневот по поразите на Русија на бојното поле - предизвик за Путин

Во декретот се наведува и дека Украина ќе користи воени средства за да ги врати под своја контрола териториите окупирани од Русија. Указот на Зеленски дојде откако силите на Киев, наводно, ја пробиле руската одбрана во јужна Украина и ја прошириле брзата офанзива на исток, заземајќи ја назад територијата во областите прогласени за анектирани од Русија. Путин, кој оваа недела наполни 70 години, би можел да се кандидира за функцијата уште два пати според уставните амандмани со кои тој претседаваше, потенцијално останувајќи на власт до 2036 година.

Нобеловата награда за физика доделена на научниците Аспект, Клаузер и Цајлингер

Нобеловата награда

Научниците Ален Аспект, Џон Клаузер и Антон Цајлингер ја добија Нобеловата награда за физика за 2022 година за „експерименти со заплеткани фотони, утврдување на прекршување на нееднаквостите на Бел и пионерска квантна информациска наука“, соопшти денеска телото кое ја доделува наградата. Наградата вредна 10 милиони шведски круни (902.315 долари), ја доделува Кралската шведска академија на науките.

Швеѓанецот Сванте Паабо ја доби Нобеловата награда за медицина за 2022 година

Наградата за физика е втора што се додели оваа недела, откако шведскиот генетичар Сванте Паабо вчера ја доби наградата за физиологија или медицина. Престижните награди за достигнувања во науката, литературата и мирот се создадени во тестаментот на Алфред Нобел, кој се збогатил со својот изум на динамит, а се доделуваат од 1901 година со одредени прекини, за двете светски војни. Наградата за физика често го зазема централното место меѓу наградите, со имиња на познати научници како Алберт Ајнштајн, Макс Планк, Пјер Кири и Марија Кири и наградни откритија кои го преобликуваа начинот на кој го гледаме светот.

Средба на Ахмети со таканаречената „Огнена група“

Седиштето на ДУИ во Мала Речица

Во седиштето на Демократската унија за интеграција (ДУИ) пристигнаа претседателот Али Ахмети како и членовите на таканаречената Огнена група. На средбата од групата се Муса Џафери, Блерим Беџети, Изет Меџити. Ќе разговараме како и секогаш, рече кратко Меџити, кој на прашањето дали очекува примирје истакна дека новинарите ќе бидат известени. Ова е втора ваква средба откако во минатиот четврток Ахмети имаше состаноци со ограноците од Чаир и Сарај, а меѓу нив беа и Изет Меџити и Блерим Беџети.

Ахмети: Во ДУИ има меѓучовечки односи кои не се добри

На 24 септември медиумите за прв пат го објавија писмото со кое функционери на ДУИ, кои се нарекоа „Огнена група“, до раководството на партијата, побараа да запре „војната“ во партијата, а одредени функционери од извршната власт да понесат одговорност. Меѓу потписниците на тоа писмо се Изет Меџити, пратеник и потпретседател на ДУИ, Блерим Беџети актуелен градоначалник на Сарај, Висар Ганиу градоначалник на Чаир, Мерита Коџаџику пратеничка, Невзат Бејта поранешен министер и градоначалник на Гостивар, Муса Џафери поранешен вицепремиер како и актуелниот заменик-министер за одбрана, Башким Хасани.

Борисов бара разговори за коалиција по победата на изборите

Бојко Борисов

Бугарската централно-десничарска партија ГЕРБ ќе бара разговори со своите политички ривали за да се обиде да формира влада по победата на националните избори во текот на викендот, изјави денеска нејзиниот лидер, поранешниот долгогодишен премиер Бојко Борисов.

Слаби изгледи за влада во Бугарија откако ГЕРБ победи на изборите

Тој рече дека би бил подготвен и да не стане премиер доколку тоа е она што е потребно за да се договори функционална коалиција и додаде дека нови предвремени избори - по четирите во последните две години - нема да даде различни резултати. ГЕРБ победи на изборите на 2 октомври со 25,3 насто од гласовите, но се соочува со предизвик да формира владејачка коалиција. Предвремените избори дојдоа откако кревката коалиција предводена од Кирил Петков од реформската антикорупциска партија Продолжуваме со промените го загуби гласањето за недоверба во јуни. Бугарија со речиси 7 милиони жители е зафатена од политички ќор-сокак од 2020 година, кога беше потресена од протести низ целата земја. Голем дел од гневот беше насочен кон Борисов и неговата партија ГЕРБ.

Највисоки претставници на ЕУ повикуваат на заедничко задолжување за справување со енергетската криза

Знамињата на Европската унија се веат пред седиштето на Комисијата на ЕУ во Брисел

Двајца високи функционери на Европската комисија повикаа денеска на заедничко задолжување од 27-члената Европска унија за финансирање на одговор на кризата со цените на енергијата која се заканува да ја втурне Унијата во рецесија. Во авторски текст во „Irish Times“, европскиот економски комесар Паоло Џентилони и комесарот за внатрешен пазар Тиери Бретон рекоа дека новото задолжување може да се моделира на заедничкиот долг издаден за време на пандемијата ковид-19 за субвенционирање на работни места што инаку би биле изгубени. Нивниот предлог доаѓа бидејќи огромниот пакет за поддршка на Германија од 200 милијарди евра за домаќинствата и компаниите предизвикува загриженост кај другите влади на ЕУ, кои не можат да ја изедначат таа поддршка, за правичноста на конкуренцијата на единствениот пазар.

Може ли Европа да живее без руски гас?

„Поважно е од кога и да е да избегнеме фрагментација на внатрешниот пазар, да организираме трка за субвенции и да ги доведеме во прашање принципите на солидарност и единство што го засноваат нашиот европски проект“, напишаа двајцата комесари. „Соочени со колосалните предизвици пред нас, постои само еден можен одговор: оној на Европа на солидарност. За да се надминат грешките предизвикани од различните маргини на маневрирање на националните буџети, мораме да размислуваме за меѓусебните алатки на Европската ниво“, велат тие. За време на пандемијата, ЕУ заеднички позајми 100 милијарди евра по многу ниска цена и ги позајми парите на владите за субвенционирање на платите на работниците за време на економскиот пад.

Советот на Федерацијата на Русија ја ратификуваше анексијата на четирите украински региони

Горниот дом на рускиот парламент

Горниот дом на рускиот парламент денеска гласаше за одобрување на инкорпорирање на четири украински региони во Русија, додека Москва се подготвува за формално анексија на територијата што ѝ припаѓаше на Киев за време на нејзиниот седуммесечен конфликт. На седницата, Советот на Федерацијата едногласно го ратификуваше законодавството за анексија на регионите Доњецк, Луганск, Керсон и Запорожје во Украина, по слично гласање во Државната дума, долниот дом на Русија, вчера.

Путин потпиша анексија на четири украински региони, осуди од Киев и од Западот

Документите сега се враќаат во Кремљ за конечниот потпис на претседателот Владимир Путин за да се заврши процесот на формално припојување на четирите региони, кои претставуваат околу 18 отсто од меѓународно признатата територија на Украина. Русија ги прогласи анексиите откако одржа лажни референдуми во окупираните области на Украина. Западните влади и Киев рекоа дека гласовите го прекршуваат меѓународното право и дека се принудни и нерепрезентативни.

И покрај тоа што анексијата помина низ рускиот парламент , Кремљ допрва треба официјално да ги одреди границите на новите региони - чии големи делови се под контрола на украинските сили. Сè уште не е јасно каде Русија ќе ги одреди своите меѓународни граници откако ќе заврши анексијата.

Во понеделникот, портпаролот на Кремљ, Дмитриј Песков, рече дека консултациите се во тек во врска со границите на регионите Запорожје и Керсон.

Русија нема целосна контрола врз ниту еден од четирите региони.

Украинските сили продолжуваат да напредуваат во областа Лиман

Според извештаите на властите инсталирани од Русија, Украина оствари повеќе придобивки на бојното поле во понеделникот, заземајќи територии десетици километри зад претходните фронтови во јужниот регион Керсон.

Во меѓувреме, нејзините сили контролираат само околу 60% од регионот Доњецк и 70% од Запорожје, додека неодамнешниот украински напредок, исто така, ги турна првите линии во Луганск, регион за кој руските сили тврдеа дека имаат целосна контрола во јули.

Севернокорејска балистичка ракета прелета над Јапонија и падна во Тихиот Океан

проектилот поминал над североисточниот јапонски регион Тохоку

Севернокорејска балистичка ракета денеска прелетала над североисточна Јапонија пред да падне во Тихиот Океан, соопшти јапонската влада, наведувајќи дека немало жртви или материјална штета. Ракетата доведе до ретко активирање на алармниот систем, а предупредување беше објавено и на националната телевизија NHK, која ги повика жителите на северниот и североисточниот дел на Јапонија да одат во засолништа. „Околу 7:22 часот, Северна Кореја ... лансираше балистичка ракета на исток“, изјави владиниот портпарол Хироказу Мацуно.

Северна Кореја го направи четвртиот тест на балистичка ракета во една недела

Тој рече дека деталите се анализираат, но дека проектилот поминал над североисточниот јапонски регион Тохоку и потоа паднал „во Тихиот Океан надвор од јапонската ексклузивна економска зона“. Јапонскиот премиер Фумио Кишида ја нарече акцијата „акт на насилство“ и остро ја осуди. Тоа е прв пат од 2017 година, а вкупно седми пат Северна Кореја да истрела проектил низ јапонскиот воздушен простор при нејзините ракетни тестови со среден и долг дострел.

САД и Јужна Кореја започнаа заеднички поморски вежби

Јужнокорејските медиуми јавуваат дека армијата на земјата проценува дека се работи за проектил од типот „Хвасонг 12“, кој летал со брзина од околу 17 маха и прелетал повеќе од 4.500 километри. Покрај целата територија на Јапонија (каде се наоѓаат воените бази на американската армија), таа ракета може да го погоди и американскиот остров Гуам во западниот Пацифик.

Вчитај повеќе

XS
SM
MD
LG