Вести
Русија тврди дека Украина ја нападнала резиденцијата на Путин
Рускиот министер за надворешни работи Сергеј Лавров тврди дека Украина нападнала една од резиденциите на претседателот, Владимир Путин. Лавров денеска (29 декември) изјави дека Москва ќе возврати и ќе го преиспита својот став во преговорите што се водат за ставање крај на руската инвазија врз Украина.
Украинскиот претседател, Володимир Зеленски за тврдењата дека Киев ја гаѓал резиденцијата во Новгородската област, северозападно од Москва, изјави дека станува збор за „лага“.
Тој рече дека Русија се обидува да ги поткопа разговорите меѓу САД и Украина за војната и дека „подготвува терен за изведување удари, најверојатно врз (украинската) престолнина и владините згради“.
Руското обвинување следува еден ден откако Зеленски и Трамп на состанок на Флорида претставија, како што наведоа, напредок. Американскиот претседател кој телефонски разговараше со Путин пред состанокот изјави дека мировниот договор за завршување на речиси четиригодишната инвазија би можел да биде „поблиску од кога било“.
Москва наведе дека не е подготвена да направи значајни отстапки.
Русија тврди дека Украина извела „терористички напад“
Во соопштение објавено на Телеграм на 29 декември, Лавров тврди дека Украина употребила 91 дрон во, како што наведе, „терористички напад“, но дека сите биле соборени и дека засега нема извештаи за причинета штета.
Лавров изјави дека Русија нема да остане без одговор и дека ги избрала „целите и времето“ за одмазда.
Тој додаде дека, откако украинската влада, која ја нарече „криминален киевски режим“, прибегнала кон „политика на државен тероризам“, руската „преговарачка позиција ќе биде преиспитана“. Тој не даде подетални информации.
Руските официјални претставници и во минатото користеа слични зборови за да ја опишат украинската влада, а Путин повеќепати тврдеше дека Зеленски не е легитимен лидер бидејќи во 2024 година не беа одржани избори.
Изборите во Украина се забранети поради вонредната состојба, која е на сила откако Русија ја започна инвазијата во февруари 2022 година.
Лавров не ја именуваше резиденцијата, но локацијата во Новгородската област сугерира дека станува збор за добро обезбеден комплекс во Валдај, град чија шумска околина, Путин ја претпочита во однос на другите државни резиденции откако ја започна инвазијата врз Украина во 2022 година - откри истрага на „Система“, руската истражувачка единица на РСЕ.
Зеленски во соопштение, тврдењата на Лавров ги нарече „уште една лага на Руската Федерација“.
„Силни“ безбедносни гаранции
Неколку часа пред објавата на Лавров, Зеленски изјави дека САД ѝ понудиле на Украина „силни“ безбедносни гаранции во траење од 15 години во рамки на договор за ставање крај на војната со Русија, но дека Киев бара подолго ветување од Вашингтон за држење на Москва под контрола.
„Му реков (на Трамп) дека веќе имаме војна и дека таа трае речиси 15 години. И затоа навистина сакав гаранциите да бидат подолготрајни“, им изјави Зеленски на новинарите во разговор преку WhatsApp, ден по состанокот со Трамп на Флорида.
Тој зборуваше за руската анексија на Крим во 2014 година, која ѝ претходеше на целосната инвазија на Москва во февруари 2022 година.
„Му реков дека навистина сакаме да ја разгледаме можноста за 30, 40, 50 години. Претседателот рече дека ќе размисли за тоа“, додаде Зеленски.
„Без безбедносни гаранции, оваа војна навистина не е завршена. Не можеме да признаеме дека е завршена, бидејќи може да постои ризик од обновување на агресијата од таков сосед“, изјави тој.
Двајцата лидери се сретнаа во неделата во одморалиштето на Трамп,
Мар-а-Лаго, во Палм Бич, Флорида, на разговори за договор за ставање крај на најдолгиот и најсмртоносен конфликт во Европа од Втората светска војна. Двајцата ја оценија средбата како „продуктивна“, иако не беше постигнат конкретен напредок.
Зеленски во разговор со новинарите изјави дека некои прашања од мировниот план од 20 точки остануваат нерешени и повика на состанок на советниците за национална безбедност од двете земји, како и од Европа, во „наредните денови“.
По двочасовните разговори, Трамп изјави дека мировните преговори „се движат во вистинска насока“.
Тој не ја спомена можноста да биде домаќин на лидерите во Вашингтон во јануари.
Трамп и Зеленски исто така остварија телефонски разговор со европски лидери, меѓу кои францускиот претседател Емануел Макрон, британскиот премиер Кир Стармер, германскиот канцелар Фридрих Мерц и генералниот секретар на НАТО, Марк Руте.
Зеленски им изјави на новинарите дека секој мировен план мора да биде потпишан од Украина, Европа, САД и Русија, додавајќи дека Киев се надева на „брз напредок“ и дека е „отворен“ за секој формат на средби.
Киев останува непоколеблив во барањето безбедносни гаранции особено од САД, но и од Европа и се спротивставува на тврдите барања на Кремљ, кои вклучуваат отстапување украинска територија на Русија.
Едно од клучните прашања во сржта на тековните преговори е судбината на источниот регион Донбас.
Поголем дел од таа територија е под руска контрола, а Москва бара Киев да ги предаде и деловите што Русија не ги контролира. Тоа вклучува два големи града – Краматорск и Славјанск, кои се клучни за украинската одбрана во тој регион.
Трамп им изјави на новинарите на Флорида, за време на заедничката прес-конференција, дека територијалните прашања вклучително и иднината на регионот Донбас остануваат нерешени и дека се покажале како „многу тешко прашање“.
Додека траат дипломатските активности и преговорите, Русија покажа мала подготвеност за компромис, дури и одбивајќи да го разгледа божиќното примирје што го предложи Зеленски.
Портпаролот на Кремљ, Дмитриј Песков, им изјави на новинарите во Москва во понеделникот дека се согласува со оценката оти разговорите се во завршна фаза, но истовремено го повтори ставот на Путин дека Украина треба да ги повлече своите трупи од Донбас за процесот да напредува.
Непосредно пред почетокот на разговорите на Флорида, Трамп и Путин ненадејно разговараа телефонски, за што Кремљ соопшти дека разговорот траел повеќе од еден час и дека бил остварен на барање на Трамп. Во објава на социјалните мрежи, Трамп го опиша разговорот како „добар и многу продуктивен“.
Песков изјави дека двајцата лидери ќе одржат уште еден разговор „многу скоро“.
Главниот помошник на Путин за надворешна политика, Јуриј Ушаков, изјави дека Путин и Трамп се согласиле да не ја поддржат иницијативата за привремен прекин на огнот пред да се постигне решение, за што Зеленски повторно се заложи во разговор со новинарите во понеделникот.
Зеленски изјави дека е потребен прекин на огнот од 60 дена за да се овозможи одржување референдум во Украина за мировниот план.
Русија не е заинтересирана за каков било вид прекин на огнот, „засега“, додаде Зеленски.
Минатиот месец, Белата куќа предложи план од 28 точки кој беше оценет како многу поволен за Русија.
види ги сите денешни вести
Шест фирми ги изгубија лиценците за одгледување канабис
На шест компании во Северна Македонија им се одземени лиценците за одгледување канабис за медицински цели, соопшти министерот за здравство, Азир Алиу, на прес-конференција во Владата на 24 февруари.
Владата донела ваква одлука бидејќи, како што посочи министерот, биле констатирани низа недоследности.
„Одлуките на Владата се засноваат на наодите од извршените контроли – несоодветно складирање на сувиот цвет, недоследни известувања до Комисијата, недоставена целосна документација за продажба и трансфер“, посочи Алиу.
Досега се спроведени контроли во 13 фирми, а надлежните најавуваат дека ќе ги проверуваат сите 43 кои во моментов имаат активни лиценци.
Поради пропустите и можностите за злоупотреби што ги констатирале надлежните, министерот најави и подготовка на нов закон. Но, за него ќе се почека додека да завршат контролите во сите фабрики.
Меѓу шесте фирми на кои е одземена лиценцата е и „Алфа фарм“ чиј косопственик е вмешан и осомничен со случајот со запленетите пет тони марихуана во Србија.
Останатите пет компании кои останаа без дозвола се: „Грин лајф“, „ЦБД медплант“, „Лајф плант“, „Атафарм“, „Канабидоис“.
„Алфа фарм“, која е актуелна со последните случувања во земјава и во Србија, е фирма со седиште во Скопје. Еден од нејзините косопственици – српски државјанин беше приведени во акција на српските органи на 29 јануари кога во селото Коњух во централна Србија, беа запленети пет тони марихуана.
Српските органи тогаш излегоа со сомнежи дека тие потекнуваат од Северна Македонија, по што започна акција и во земјава. Од фабрики во Скопје и во струмичкиот регион беа запленети 40-тина тони.
Исто така, на 20 февруари Основното јавно обвинителство за гонење организиран криминал и корупција (ОЈО ГОКК) отвори и истрага за шест лица кои ги сомничи дека биле вклучени во шверцот на марихуаната во Србија.
Одгледувањето канабис за медицински потреби во Северна Македонија е легализирано повеќе од осум години.
Надзорот над компаниите со одобрение за одгледување на канабис за медицински цели го спроведува Комисија за одобрување на одгледување на канабис за медицински цели, која е под Министерството за здравство.
Одлуките за лиценците ги носи Владата. Покрај последните шест одземени лиценци, во текот на изминатите години од носењето на законот владите предводени и од СДСМ и од ВМРО-ДПМНЕ донеле одлуки за одземање на дозволите на уште 14 фирми.
По 13 години пауза, продуктоводот Солун-Скопје ставен во употреба
По 13 години, продуктоводот, преку кој ќе се транспортира дизел-гориво од рафинеријата во Солун до рафинеријата „Окта“ во Скопје, по 13 години, повторно се става во употреба. Министерството за енергетика денеска соопшти дека се извршени сите потребни проверки за функционалност на системот и оти ова е значаен чекор за зајакнување на сигурноста во снабдувањето со нафтени деривати.
Проверката била спроведена од страна на Бирото за метрологија со учество на претставници од Чешкиот метролошки институт (CMI) и лабораторијата „Метрон“ од Солун, во присуство и на претставници од Царинската служба.
„Заедно со овластените и стручни лица од Бирото тие ги проверуваа исправноста и метролошките карактеристики на системот, со цел да се потврди дека мерната опрема функционира прецизно, сигурно и во согласност со највисоките стандарди“, информираа од ресорното Министерство.
Според министерката за енергетика Сања Божиновска, техничката исправност и точноста на мерењето се клучни предуслови за безбедно и транспарентно функционирање на енергетската инфраструктура.
Продуктоводот беше пуштен во функција во 2002 година за пренос на сурова нафта. Во 2013 година беа преземени инвестиции за негова пренамена во инфраструктура за транспорт на дизел-гориво.
Станува збор за систем во должина од 213,5 километри.
Инфраструктурата располага со 15 блок-вентил станици за подобрено управување и високо ниво на безбедност, складишни капацитети од 80.000 м³ во Грција и 30.000 м³ во Северна Македонија, како и современ SCADA-систем за следење притисок, температура и проток во реално време, што гарантира долгорочна сигурност и ефикасност.
Иранската влада: Студентите мора да ги почитуваат „црвените линии“
Студентите имаат право да протестираат, но мора да „ги разберат црвените линии“, изјави портпаролката на иранската влада Фатеме Мохаџерани, во вторник, 24 февруари, во првата официјална реакција на обновените антивладини протести на кампусите.
Универзитетските студенти го започнаа новиот семестар со собири за време на викендот на кои ги оживеаја слоганите од националните протести против клерикалното раководство на земјата, кои достигнаа врв во јануари и беа пречекани со смртоносна репресија.
Вчера, на третиот ден по ред од протестите на кампусот, видеата геолоцирани од АФП покажаа студенти на универзитет во Техеран како го горат иранското знаме усвоено од Исламската република по револуцијата во 1979 година, со која беше соборена монархијата.
„Светите работи и знамето се два примери за овие црвени линии што мора да ги заштитиме, а не да ги преминуваме или да отстапуваме од нив, дури и во врвот на гневот“, изјави Мохаџерани.
Таа додаде дека иранските студенти „имаат рани во срцата и виделе сцени што може да ги вознемират и налутат, дека овој гнев е разбирлив“.
Првичниот бран протести започна во декември, предизвикан од економските проблеми во земјата погодена од санкции, но набрзо прерасна во национални демонстрации кои кулминираа на 8 и 9 јануари, претставувајќи еден од најголемите предизвици за иранските лидери во последниве години.
Немирите предизвикаа насилна владина репресија во која загинаа илјадници луѓе.
Новинската агенција на активисти за човекови права (HRANA) со седиште во САД регистрираше повеќе од 7000 смртни случаи, додека предупредува дека вкупниот број на жртви е веројатно многу поголем.
Иранските власти признаваат повеќе од 3000 смртни случаи, но велат дека насилството е предизвикано од „терористички акти“ поттикнати од САД и Израел.
За време на протестите, владата се обиде да оди по линија помеѓу признавање на легитимните економски поплаки на демонстрантите и осудување на таканаречените „бунтовници“.
Мохаџерани во вторник рече дека мисија за утврдување факти ги истражува „причините и факторите“ на протестите и ќе обезбеди извештаи.
Репресијата во јануари го поттикна американскиот претседател Доналд Трамп да се закани дека ќе интервенира воено во име на демонстрантите, иако фокусот на неговите закани наскоро се префрли на спорната нуклеарна програма на Иран.
Оттогаш, САД спроведоа масовно воено засилување на Блискиот Исток со цел да извршат притисок врз Техеран да склучи договор, дури и додека двете страни водат индиректни преговори, кои треба да продолжат во четврток во Женева.
Иран инсистира дека неговата нуклеарна програма е за цивилна употреба, но Западот верува дека таа има за цел да изгради атомска бомба.
Руте повика на „ефикасни безбедносни гаранции“ за Украина
Генералниот секретар на НАТО, Марк Руте, вети континуирана поддршка од алијансата за Украина на четвртата годишнина од целосната инвазија на Русија на 24 февруари 2022 година.
„НАТО беше со Украина од самиот почеток. Ние сме со вас денес и ќе бидеме со вас во текот на предизвиците што претстојат. Императив е Украина да продолжи да ја добива воената, финансиската и хуманитарната помош што ѝ е потребна“, рече Руте во седиштето на алијансата во Брисел.
Руте додаде дека воената помош е „неопходна“.
„Бидејќи ветувањето за помош не ја завршува војната. На Украина ѝ е потребна муниција денес, и секој ден, сè додека не престане крвопролевањето.“
Шефот на НАТО, исто така, ги повика сојузниците да се обврзат да обезбедат мир во Украина откако ќе престанат борбите.
„Кога борбите конечно ќе престанат, мирот мора да се одржи“, рече тој. „Со силни украински сили подготвени да одвратат и да се бранат, и ефикасни безбедносни гаранции од партнерите на Украина: Европа, Канада и САД.“
Руте истакна дека украинскиот народ заслужува праведен и траен мир.
„Нивната безбедност е наша безбедност. Не може да има вистински мир во Европа без вистински мир во Украина“, рече првиот човек на НАТО.
Зеленски: Путин не успеа да ги постигне целите во Украина
Украинскиот претседател Володомир Зеленски го обвини рускиот колега Владимир Путин дека се обидува да ја преземе Украина, велејќи дека не успеал да ја постигне оваа и други воени цели.
Во видео обраќање по повод четиригодишнината од војната на кое беа прикажани Украинците како вршат отпор против руските војници во првите денови од конфликтот, Зеленски додаде дека Украина е подготвена да направи „сè“ што може за да обезбеди силен, траен мир.
Стотици илјади луѓе загинаа откако Русија го нападна својот сосед на 24 февруари 2022 година, започнувајќи ја најсмртоносната војна на европско тло од Втората светска војна.
Разговорите меѓу двете страни, обновени минатата година од страна на Соединетите Американски Држави, досега не успеаја да ги запрат борбите, кои ја опустошија земјата и ја оставија соочена со огромна задача за реконструкција.
„Путин не ги постигна своите цели. Тој не ги скрши Украинците. Тој не ја доби оваа војна. Ние ја зачувавме Украина и ќе направиме сè за да постигнеме мир - и да обезбедиме правда“, рече Зеленски во своето обраќање.
„Сакаме мир. Силен, достоинствен и траен мир“, рече Зеленски, додавајќи дека секој договор „не смее едноставно да се потпише, туку мора да биде прифатен од Украинците“.
Лидерите на сојузниците на Украина, вклучувајќи го финскиот претседател Александар Стаб и шведскиот премиер Улф Кристерсон, се во земјата во вторник, 24 февруари за да ја одбележат годишнината.
Шефицата на Европската комисија, Урсула фон дер Лајен, исто така е таму, велејќи дека сака да потврди дека Европа „непоколебливо стои со Украина, финансиски, воено и низ оваа сурова зима“.
„И да испрати јасна порака до украинскиот народ и до агресорот: нема да попуштиме додека не се воспостави мир. Мир под условите на Украина“, рече таа во видео објавено на социјалните медиуми.
Се очекува таа да присуствува на „церемонија на комеморација“ и да посети украински енергетски објект оштетен од руските напади пред да се сретне со Зеленски и да учествува на видеоконференција со сојузниците на Киев, вклучувајќи ги Велика Британија, Франција и Германија.
Пратениците ќе расправаат за предлог-законот за минимална плата
Предлог на закон за изменување и дополнување на Законот за минимална плата во Република Северна Македонија во прво читање денеска е на дневен ред на седницата на собраниската Комисија за економски прашања, труд и енергетска политика.
Со предлог-законот се предлага минималната плата во државава да изнесува 600 евра.
Овластен предлагач е претседателот на СДСМ, Венко Филипче заедно со уште неколкумина пратеници од опозициската партија. Овој предлог-закон потоа е ставен и на дневен ред на Законодавно-правната комисија.
Неодамна се одржаа неколку протести во организација на Сојузот на синдикати чие главно барање беше зголемување на минималната плата на 600 евра, но и на сите плати за 6000 денари. Синдикалците организираа блокади пред Собранието, Стопанските комори и Владата.
Блокадите на ССМ се одржаа и покрај договорот кој вчера го постигнаа Владата и синдикалните претставници, а со кој над 10.000 административци ќе потпишат индивидуални договори за процентуално зголемување на платите секоја година. Меѓу нив, на пример, се и службениците во судовите и обвинителствата.
Според ова, нивните плати до 2028 година треба да се покачат за речиси 40 отсто од тековната сума.
Премиерот Христијан Мицкоски рече дека е неприфатлив предлогот државата одреден период да ги финансира придонесите на работодавачите за тие да го зголемат минималецот.
Неколку дена претходно, лидерот на опозицискиот СДСМ, Венко Филипче оцени дека барањето на ССМ за повисока минимална плата е „сосема на место и се темели на реалните потреби на работниците“. Токму затоа рече тој, СДСМ го поднел законот за 600 евра минимална плата.
Ова е вторпат да го поднесуваат овој закон до Собранието. Првиот пат беше на крајот на 2024 година, но тогаш власта го одби. Според Филипче преку ребаланс на Буџетот, може да се обезбедат и до 200 милиони евра за плати.
Ирански студенти протестираат против владата трет ден по ред
Иранските студенти одржаа антивладини протести на неколку универзитети во понеделник, 23 февруари, трет ден по ред, според видеа објавени на интернет и потврдени од Радио Слободна Европа (РСЕ).
Новите протести се први откако властите убија илјадници луѓе при задушување на демонстрациите против иранските свештенички власти минатиот месец.
Протестите се одржуваат додека Иран се подготвува за можна воена акција од страна на Соединетите Американски Држави (САД).
Американскиот претседател Доналд Трамп го предупреди Техеран да не користи повеќе насилство против демонстрантите и се закани дека ќе ја нападне Исламска Република поради нејзиното одбивање да се откаже од својата нуклеарна програма.
Десетици студенти организираа протести на најмалку четири универзитети во главниот град Техеран, вклучувајќи го универзитетот Ал-Захра, универзитетот во Техеран, технолошкиот универзитет Шариф и технолошкиот универзитет Амиркабир.
Видеа на социјалните мрежи покажаа студентки на Универзитетот Ал-Захра како скандираат „Ова е година на крв. Сајед Али ќе биде соборен“, алудирајќи на врховниот лидер ајатолах Али Хамнеи.
Друго видео покажа студентки на универзитетот во Техеран како скандираат „Жени, живот, слобода“, осврнувајќи се на протестите од 2022 година предизвикани од смртта во притвор на млада жена обвинета за кршење на законот за хиџаб.
Новите демонстрации се совпаднаа со почетокот на новиот универзитетски семестар и со стотиците церемонии одржани низ целата земја минатата недела во спомен на жртвите убиени за време на задушувањето на масовните протести во јануари.
Најмалку 7.000 луѓе беа убиени за време на протестите што избувнаа кон крајот на декември 2025 година, според групите за човекови права, иако се верува дека вистинскиот број на жртви е многу поголем.
Повеќето од убиствата наводно се случиле помеѓу 8 и 10 јануари, кулминација на задушувањето на протестите.
Овие протести беа меѓу најголемите во Иран од Исламската револуција во 1979 година.
Обновените протести во Техеран доаѓаат во време кога САД продолжуваат да се закануваат дека ќе го нападнат Иран поради неговата спорна нуклеарна програма и покрај неколкуте рунди индиректни разговори.
Во најголемиот протест во главниот град по смртоносното задушување на демонстрациите минатиот месец, иранските студенти кои извикуваа антивладини слогани се судрија со безбедносните сили пред технолошкиот универзитет „Шариф“ во саботата. Слични собири беа пријавени и на други универзитети.
Студентите пред технолошкиот универзитет „Амир Кабир“ во неделата се судрија со членови на „Басиџ“, доброволна паравоена сила која одигра значајна улога во задушувањето на минатите демонстрации. Според видеата на социјалните медиуми, студентите извикуваа антивладини слогани.
Универзитетите во Техеран честопати беа сцена на студентски протести што се одржаа по револуцијата во 1979 година и резултираа со брутална репресија од страна на безбедносните сили.
ЕУ не успеа да го усвои 20-тиот пакет санкции против Русија на четвртата годишнина од војната во Украина
Европската унија(ЕУ) не успеа да го усвои 20-тиот пакет санкции против Русија, кој требаше да биде воведен на четвртата годишнина од војната во Украина.
Унгарија го блокираше усвојувањето на одлуката.
„За жал, не постигнавме договор за 20-тиот пакет санкции. Ова е чекор назад и порака што не сакавме да ја испратиме денес. Сите разбираат дека дипломатијата е пожелна алатка, но по една година разговори сè уште немаме прекин на огнот. Не е Украина пречка за мирот, туку Русија“, изјави шефицата на европската дипломатија, Каја Калас, на крајот од министерскиот состанок на 23 февруари.
Усвојувањето на најновиот пакет санкции против Русија не беше сигурно бидејќи амбасадорите на земјите-членки на ЕУ не постигнаа договор во текот на викендот.
ЕУ сакаше усвојувањето на 20-тиот пакет санкции како одговор на руската агресија врз Украина да се совпадне со четвртата годишнина од почетокот на војната, која се одбележува на 24 февруари.
Претседателката на Европската комисија, Урсула фон дер Лајен, и претседателот на Европскиот совет, Антонио Коста, ќе бидат во Киев, главниот град на Украина, за годишнината.
Според дипломатски извори, камен на сопнување е предлогот за целосна забрана на поморските услуги за руските танкери за нафта, кој, доколку биде усвоен, би го укинал ограничувањето на цените што го воспостави Групата 7 на крајот од 2022 година.
Унгарија претставува посебен проблем бидејќи усвојувањето на санкциите бара од Украина да го поправи нафтоводот „Дружба“, оштетен во рускиот напад и да продолжи да испорачува нафта во Унгарија.
Блокирањето на пакетот санкции веќе го најави министерот за надворешни работи на Унгарија, Петер Сијарто.
Блокирањето на пакетот санкции веќе го најави министерот за надворешни работи на Унгарија, Петер Сијарто.
Унгарија, исто така, блокираше заем од 90 милијарди евра што ЕУ го одобри токму поради проблеми со испораките на нафта.
Премиерот на Унгарија, Виктор Орбан, минатиот викенд објави дека на Украина не може да ѝ бидат доделени никакви заеми од ЕУ, ниту пак ќе бидат усвоени санкции додека не продолжат испораките на нафта во Унгарија.
Иако Европската Унија воведе забрана за увоз на руска нафта преку цевковод поради војната во Украина, Унгарија и Словачка обезбедија исклучоци од тие санкции со користење на цевководот „Дружба“, кој транспортира руска нафта до централна Европа преку Украина.
Сепак, испораките од овој гасовод беа прекинати на 27 јануари. Киев тврди дека руски дрон е одговорен за оштетувањето на енергетската инфраструктура.
И Унгарија и Словачка ја обвинија Украина за бавното рестартирање на протокот на нафта, а словачкиот премиер Роберт Фицо дури го обвини Киев дека го прави тоа за да изврши притисок врз Унгарија да го отфрли ветото за идното членство на Украина во Европската Унија.
На 18 февруари, двете земји исто така изјавија дека го запираат извозот на дизел во Украина сè додека протокот на нафта не се рестартира.
Европската комисија оттогаш контактираше со Киев во врска со ситуацијата, а Унгарија официјално побара од Хрватска да пумпа руска нафта наместо тоа, користејќи ја својата цевководна мрежа.
Хрватска објави дека ќе го исполни барањето, под услов тоа да е компатибилно со законите за санкции на ЕУ и САД.
Украински „Нафтогас“ ја обезбеди првата испорака на течен природен гас од САД преку Германија
Украинската државна компанија за нафта и гас „Нафтогас“ ја обезбеди испораката на американски течен природен гас (ЛНГ) преку терминал во Германија, соопшти компанијата, јави Ројтерс.
Гасот ќе се набавува од САД и ќе се испорачува во Германија од „ТоталЕнерџис“, соопшти „Нафтогас“.
Откако ќе биде регасифициран од „Дојче РеГас“, потоа ќе се испорачува преку цевководи низ Полска до Украина, соопштија од компанијата.
„Ова ново партнерство отвора нова сигурна рута за увоз за Украина за тековната година“, изјави извршниот директор Сергеј Коретски.
Во јануари 2026, новиот министер за енергетика на Украина им нареди на државните компании да го зголемат увозот од странство, посочувајќи ги проблемите што ја мачат електричната мрежа по систематската кампања за бомбардирање од страна на Русија.
„Државните компании, првенствено „Украински железници“ и „Нафтогас“, мора итно да обезбедат набавка на увезена електрична енергија за време на грејната сезона 2025/26 година, во износ од најмалку 50 отсто од вкупната потрошувачка“, изјави тогаш министерот за енергетика, Денис Шмигал.
Тој не кажа колку електрична енергија Украина моментално произведува или увезува, информации што властите ги кријат поради чувствителноста на случувањата во војната.
Во текот на зимата, руски напади предизвикуваа постојани прекини на електричната енергија погодувајќи ги украинските енергетски објекти, чија цел, според Украина, е дел од поширока кампања на Москва со цел да ги лиши цивилите од греење за време на ниските зимски температури.
Лажни дојави за бомби во училишта во Скопје и Тетово
Во неколку училишта во Скопје и во Тетово денеска, 23 февруари имало дојави за поставени експлозивни направи, но по преземените мерки од страна на полицијата, било утврдено дека се работи за лажни дојави.
„Веднаш по добиените пријави преземени се соодветни мерки и активности од страна на полициски службеници и утврдено е дека станува збор за лажни пријави“, информираат од Министерството за внатрешни работи.
Ова не е прв пат да има лажни дојави во училиштата во земјава. Во истиот период лани полицијата евидентираше над 240 дојави за поставени бомби во училиштата низ земјава и за сите беше утврдено дека се лажни.
Министерството за образование тогаш формираше и меѓуресорска група за поефикасно справување со ситуацијата, а министерката Весна Јаневска ги повика раководствата на училиштата дојавите да ги пријавуваат во МВР и да ги следат протоколите на полицијата. Таа апелираше до наставниците и директорите на училиштата за комуникација да ги користат исклучиво службените електронски адреси креирани од МОН.