Вести
Кремљ првпат го употреби зборот „војна“ за инвазијата на Украина
Русија сега е во „војна“ со Украина поради мешањето на Западот во она што Москва претходно го нарече „специјална воена операција“, изјави портпаролот на Кремљ Дмитриј Песков за медиумот „Аргументи и Факти“, кој е во сопственост на општинската влада во Москва.
„Ние сме во војна. Навистина, тоа започна како специјална воена операција, но штом се формираше клика и колективниот Запад се приклучи на страната на Украина, тоа се претвори во војна за нас“, рече Песков.
„Јас сум убеден во тоа. И секој треба да го разбере за да собереме внатрешна сила“, додаде портпаролот на Кремљ.
Откако ја започна својата инвазија на Украина во февруари 2022 година, Кремљ се трудеше да избегне конфликтот да го нарекува војна, а наместо тоа секогаш го нарекуваше „специјална воена операција“.
види ги сите денешни вести
Трамп ќе положи заклетва како 47-ми американски претседател
Американската церемонија на која новоизбраниот претседател Доналд Трамп и потпретседателот Џеј -Ди Венс ќе положат заклетва на 20 јануари започнува во 18:00 часот по средноевропско време.
Претходно, Трамп и Венс со своите семејства ќе присуствуваат на верска служба во црквата Свети Јован. Трамп потоа ќе и се обрати на јавноста со говор во кој се очекува да ги изнесе своите цели за следните четири години.
Неговиот последен инаугуративен говор траеше 17 минути. Според информациите на американскиот медиум „Волстрит журнал“, Трамп во своето обраќање ќе повика на „револуција на здравиот разум“.
По говорот, Трамп ќе оди во „претседателската соба“ во близина на Сенатот за да потпише неколку клучни документи.
Потоа следи ручек организиран од заеднички конгресен комитет, по што американскиот претседател ќе биде дел од маршот на парадата од Капитол до Белата куќа. Во текот на ноќта, Трамп ќе присуствува на три инаугуративни балови што ќе се одржат низ Вашингтон.
Инаугурацијата на американски претседател низ историјата симболизира мирен трансфер на власта.
Иранските власти „отворени“ за разговори со Трамп
Иранскиот врховен лидер Али Хамнеи во 2018 година ги прогласи преговорите со администрацијата на Трамп за „забранети“ откако републиканскиот претседател се повлече од нуклеарниот договор со Иран од 2015 година.
Но, на 20 јануари годинава, портпаролот на иранското Министерство за надворешни работи, Есмаил Бакаи, изрази надеж дека втората администрација на Трамп ќе усвои „реален пристап“ и ќе ги почитува интересите на земјите од Блискиот Исток, вклучително и Иран.
Мајк Волц, кој ќе служи како советник за национална безбедност на Трамп откако тој ќе ја преземе функцијата, рече дека владата ќе донесе „клучни одлуки“ за Техеран „во текот на следниот месец“.
Високи ирански функционери како претседателот Масуд Пезешкијан и министерот за надворешни работи Абас Аракчи навестија дека владата е отворена за разговори со Трамп.
Но, таа одлука на крајот лежи кај Хамнеи, па останува отворено прашањето дали Хамнеи ќе го преиспита својот став за преговарање со лидерот што некогаш го сметаше за несигурен.
Лула да Силва се надева дека САД под Трамп ќе остане „историски партнер“ на Бразил
Бразилскиот претседател Луис Инасио Лула да Силва изјави дека се надева оти Соединетите држави ќе останат „историски партнер“ на неговата земја по враќањето на Доналд Трамп во Белата куќа на 20 јануари, јавува новинската агенција Франс прес.
„Се надевам дека (Трамп) има успешна администрација и дека Американците ќе продолжат да бидат историски партнер на Бразил“, рече левичарскиот лидер Лула на министерскиот состанок.
За време на неговиот прв мандат, Трамп беше сојузник на екстремно десничарскиот претходник на Лула да Силва, Жаир Болсонаро.
Болсонаро се надеваше дека ќе присуствува на инаугурацијата на републиканецот на 20 јануари, но судот му го одзеде пасошот, поради ризик дека може да побегне, додека е во тек истрагата за наводниот обид за државен удар во 2022 година, откако ги загуби изборите од Лула да Силва.
Локализиран пожарот во старскиот дом во близина на Кавадарци, нема повредени
Локализиран е пожарот кој настана во старскиот дом „Доктор Јанески“ во кавадаречкото село Чемерско. Вкупно 30 луѓе кои се корисници на домот, се пренесени во болницата во Кавадарци и сите се во стабилна состојба, соопштија од домот. Пожарот настанал на покривот на зградата, и набрзо е локализиран.
„Сите штитеници на домот во Чемерско се сега за сега стабилни. Ќе бидат згрижени сè до нивно понатамошно транспортирање дали до фамилиите или до другите домови. Чекаме уште две пациентки, и тие се во стабилна состојба и ќе бидат под надзор од нашите вработени и од вработените во Домот за стари лица“, изјави за новинската агенција МИА директорката на Општата болница Кавадарци.
Градоначалникот на Кавадарци, Митко Јанчев, изјави дека лицата биле пренесени од домот со возила на Итната медицинска помош од Свети Николе, Велес, Кавадарци и Неготино, противпожарната единица Кавадарци и ОВР Кавадарци. Тој истакна дека противпжарните служби реагирале брзо и соодветно. На терен излегле 10 пожарникари со три противпожарни возила.
ЕК очекува истрага за „инцидентите“ против демонстрантите во Србија
Европската комисија внимателно ја следи актуелната внатрешна политичка ситуација во Србија поврзана со масовните протести на студентите и други групи и ги охрабрува сите политички актери за враќање на дијалогот и за воздржување од ескалација на тензиите, изјави денеска (20 јануари) портпаролот на ЕК за проширување, меѓународни партнерства и Медитеранот, Гијом Мерсие.
„Изразуваме загриженост поради пријавените инциденти против демонстрантите, за кои очекуваме брза истрага“, рече Мерсие.
Тој нагласи дека слободата на собирање е меѓу основните права на ЕУ, што треба да се штити и почитува согласно принципите на владеење на правото и одржување на јавниот ред.
„Политичките чинители треба да се вклучат конструктивно во меѓупартиски политички дијалог, што ќе овозможи одново фокусирање на вниманието и на енергијата за комплетирање на реформите во сферата на владеењето на правото и во согласност со законодавството на ЕУ, со цел забрзување на пристапниот процес на Србија согласно декларираните определби на српското раководство и интересот на српските граѓани“, истакна Мерсие.
Во Белград, на 16 јануари, студентка беше повредена во една од акциите кога во неа удри автомобил за време на протестна блокада на раскрсница. Возачот побегна од местото на настанот, а полицијата и обвинителството соопштија дека е пронајден и му е одредена мерка притвор до 48 часа.
Тој е осомничен за тешко убиство во обид.
По инцидентот илјадници студенти и граѓани протестираа во повеќе градови во Србија.
Во акциите „Стоп, Србија“ кои речиси секојдневно се одржуваат низ земјава, студенти и граѓани 15 минути ги блокираат патиштата за да им оддадат почит на петнаесетте загинати во несреќата на Железничката станица во Нови Сад.
Акциите симболично започнуваат во 11:52 часот, време кога на 1 ноември се урна бетонската настрешница на Железничката станица.
Папата Франциск го нарече „срамен“ планот на Трамп за депортирање имигранти
Поглаварот на Римокатоличката црква ја критикуваше најавата на новоизбраниот американски претседател Доналд Трамп дека по преземањето на функцијата ќе иницира построго спроведување на антиимиграциските мерки, вклучително и депортации.
Во интервју за италијанскиот канал Канал 9, папата Франциск рече дека би било „срамота“ доколку Трамп продолжи со најавениот план, објави во понеделникот Ројтерс, додавајќи дека употребата на груби зборови е невообичаен начин на комуникација за поглавар на Римокатоличката црква.
Франциск, духовниот водач на 1,4 милијарди христијани, обично внимателно ги избира своите зборови кога зборува за политички прашања.
„Тоа не функционира. Така не се решава проблемот“, изјави папата.
Прифаќањето и пречекувањето на мигрантите е една од клучните теми на Папата во текот на неговиот 12-годишен понтификат.
Тој претходно ја критикуваше антиимигрантската политика на Трамп, а во 2016 година го обвини дека „не е христијанин“.
Администрацијата на САД најави голема рација во Чикаго за да се пронајдат и депортираат илегалните имигранти, но Трамп го преиспитува планот.
Католичкиот надбискуп, кардиналот Бласе Чупич, исто така, го критикуваше планот за депортирање илегални имигранти, велејќи дека тоа ќе биде „навреда на достоинството на сите луѓе и заедници“.
Сепак, критиките за антиимиграциските политики на Трамп не се единственото отстапување од воздржаноста на папата Франциско за чувствителните политички прашања.
Во март 2024 година, тој го повика Киев „да го подигне белото знаме и да преговара“ за завршување на војната „пред ситуацијата да се влоши“. Украина го обвини папата дека го „легализира правото на посилниот“ и го покани амбасадорот на Ватикан да зборува.
Во декември тој неколку пати ја осуди суровоста на израелските воздушни напади врз Газа и затоа беше критикуван од израелските власти за „двојни стандарди“. Израел одговори дека критиката треба да биде насочена кон терористите, а не кон демократијата што се бори против нив.
На самиот крај на својот мандат, претседателот Џо Бајден, кој е католик, го одликуваше папата Франциск со Претседателскиот медал на слободата со одлика.
Намалена е испораката на топлинска енергија во делови од Скопје
Во повеќе делови од Скопје денеска (20 јануари) жителите се без парно греење.
Од ЕСМ Снабдување информираат дека поради зголемени загуби на вода во топлификациската мрежа е намалена испораката на топлинска енергија.
„Екипите на Дистрибуција на топлина се на терен и активно работат на изолирање на проблемот, со цел воспоставување стабилен хидрауличен режим во системот и нормализација на снабдувањето со топлинска енергија“, стои во информацијата од ЕСМ Снабдување.
Парно греење нема во делови од скопските населби Кисела Вода, Капиштец, Ново Лисиче, Аеродром, но и во други населени места.
Од ЕСМ Снабдување додаваат дека се користат сите расположливи ресурси, а екипите преземаат засилени мерки и вложуваат максимални напори за што побрзо воспоставување на редовно снабдување со топлина до потрошувачите.
Очекувањата се дека снабдувањето брзо ќе биде нормализирано.
Коцевски: Постапката за Груби продолжува, иако е во бегство
Без разлика што е во бегство, и за Артан Груби и за другиот осомничен, постапката и натаму продолжува и јавноста ќе биде известена, изјави државниот јавен обвинител Љупчо Коцевски за медиумите прашан дали има напредок во истрагата за поранешниот вицепремиер, додавајќи дека и покрај меѓународната потерница, јавните обвинители и „понатаму преземаат дејствија во однос на постапката“.
Коцевски пред почетокот на 14-тата седница на Советот на јавни обвинители прашан дали има предистрага за судијата Енвер Беџети, ставен на „црната листа“ на САД, одговори дека „заедно со тој предмет што се однесува и за судијата, и за Артан Груби и, евентуално, за друг сторител, се води предистражна постапка и понатаму ќе се види како ќе се одвива.
Соопшти дека не е почната истрага за ставањето во фиока на предметот за поранешниот директор на УБК, Сашо Мијалков.
„Истрага не, се уште се работи за предистрага, се прибираат докази и за тој предмет јавноста ќе биде известена, а во моментот за оние дејствија што се преземени од наша страна, јавноста е известена“, изјави Коцевски.
За случајот со ЕСМ, јавниот обвинител посочи дека Основното јавно обвинителство Битола води постапки за шест јавни тендери.
„Можам да истакнам сега дека интензивно се работи и плус е вклучена Финансиската полиција. Се надеваме на брзо доаѓање до евентуални докази“, рече Коцевски.
На прашање дали Обвинителството го истражува сертификатот за англиски јазик на директорот на Агенцијата за национална безбедност Бојан Христовски, како и за голем број други спорни сертификати за кои се зборуваше во јавноста, обвинителот одговори дека за предметот со Христовски чекаат одговор на барањето што е доставено до Бугарија за меѓународна правна помош.
Како што појасни, барањето до колегите од Бугарија е дали сертификатот е издаден од надлежен орган односно школа, институција или некоја установа која во моментот давала такви сертификати и била регистрирана.
„Во однос на сертификатите, и министерот за внатрешни работи изјави дека по негово сознание има околу 500 сертификати кои наводно биле фалсификувани. Што се однесува за лицето што го спомнавте, и за тој предмет до бугарските надлежни органи доставено е барање за меѓународна правна помош, штом го добиеме, ќе постапиме и ќе се донесе јавнообвинителска одлука“, изјави Коцевски.
На прашање како го коментира тоа што на собраниска комисија е негативно оценет Годишниот извештај на Советот за јавни обвинители и дали смета дека петтемина членови во Советот кои ги избира Собранието треба да поднесат оставка од морални причини, Коцевски одговори дека тоа не може да го коментира зашто тоа, рече, е став на Советот и е нивна морална обврска дали ќе поднесат оставка.
Сменетиот јужнокорејски претседател Јун Сук Јеол одби сослушување
Соборениот претседател на Јужна Кореја, Јун Сук Јеол, во понеделник (20 јануари) одби да биде сослушан како дел од истрагата за тоа дали извршил бунт, додека десетици негови поддржувачи се соочуваат со обвиненија за насилен напад на судска зграда.
Одбивањето на Јун да се појави на сослушувањето во Канцеларијата за истраги за корупција (ЦИО), која ја води кривичната истрага, уследи по неговото постојано одбивање да соработува во истрагата.
Неговите адвокати тврдеа дека наредбата за апсење и притвор во средата биле незаконски, бидејќи тие биле потврдени од суд без јурисдикција и самиот ЦИО нема законско овластување да спроведе истрага.
Бунтот, делото за кое може да биде обвинет Јун, е едно од ретките за кои јужнокорејскиот претседател нема имунитет и технички е казнив со смрт. Сепак, Јужна Кореја не извршила ниту една смртна казна во последните 30 години.
Властите соопштија дека е засилено обезбедувањето во Притворниот центар во Сеул, каде што Јун се наоѓа како притвореник пред судење, и во Уставниот суд, кој води постапка за импичмент, за да одлучи дали трајно ќе го отстрани од функцијата.
Јун стана првиот актуелен претседател на Јужна Кореја кој беше уапсен минатата недела поради краткотрајното прогласување на вонредна состојба на 3 декември. Тој беше формално процесуиран во притвор вчера, откако судот го одобри налогот, наведувајќи ја загриженоста дека осомничениот може да уништи докази.
По полноќната пресуда, гневните поддржувачи на Јун упаднаа во зградата на Окружниот суд во западниот дел на Сеул рано во неделата, уништувајќи имот и предизвикувајќи судири со полицијата.
Преку своите адвокати, Јун рече дека нападот во неделата на судот бил „шокантен и несреќен“, повикувајќи ги луѓето мирно да го изразат своето мислење.
Во изјавата, Јун исто така рече дека разбира дека многумина чувствуваат „лутина и неправда“, барајќи од полицијата да заземе толерантен став.
Од 90-те лица приведени по судирот, полицијата планира да приведе 66 под обвинение за прекршување, попречување на службената должност и напад на полицајци, објави новинската агенција Јонхап.
„Останатите сторители сè уште се идентификуваат, а полицијата исто така ќе преземе правни мерки против нив“, изјави в.д. министер за правда Ким Сеок-ву пред парламентарната комисија за правда.
Вршителот на должноста претседател Чои Санг-мок изрази длабоко жалење за „незаконското насилство“ во судот и исто така ја повика полицијата строго да го спроведе законот за да спречи повторување на она што се случи во неделата.
Прогласувањето вонредна состојба од страна на Јун ги шокираше Јужнокорејците, ја потресе четвртата по големина азиска економија и воведе невиден период на политички превирања.
На 14 декември пратениците гласаа за негово отповикување и оттогаш тој е суспендиран од функцијата.
Во меѓувреме, Уставниот суд размислува дали да го потврди тој импичмент и да го отстрани трајно или да му ги врати претседателските овластувања.
Одбиено е барањето на Палевски за изземање на судијата
Претседателот на Основниот кривичен суд Скопје, Иван Џолев не го прифатил барањето на првообвинетиот за случајот со двојното убиство на Вања и Панче, Љупчо Палевски Палчо за изземање на судијата Ивица Стефановски. Џолев одлучил дека барањето не е основано.
Обвинетиот Палевски на претходното рочиште на 20 декември побара да се изземе претседателот на судечкиот совет Ивица Стефановски, затоа што, како што рече, тој бил необјективен, пристрасен и не му дозволил правична одбрана, како и дека не го барал оружјето со кое се извршени убиствата кај другите обвинети.
Одлуката за неизземање на судијата, претседателот на Кривичен ја донел на 25 декември.
Инаку, доколку беше прифатено барањето за изземање на судијата Стефановски, судскиот процес ќе требаше да започне од почеток.
Во меѓувреме еден од клучните сведоци во случајот Гоце Трајковски, кој со таткото на Вања, Александар Ѓорчевски, воделе паралелна истрага по исчезнувањето на девојчето, и понатаму останува недостапен за органите на прогонот.
Тој, како што информираше судијата, не бил пронајден на неговата адреса од страна на полицијата.
Трајковски е во бегство откако беше осомничен за палење на угостителски објект во скопската населба Кисела Вода.
Денешното рочиште (20 јануари) продолжи со изведување на преостанатите материјални докази, кои останаа неизведени на минатото рочиште. Станува збор за форензички анализи на мобилни телефони.
Покрај Палевски, обвинети во овој случај се и Боре Видевски, Велибор Манев и Влатко Кешишов. На обвинителна клупа седи и таткото на Вања, Александар Ѓорчевски, кој се сомничи дека давал информации за движењето на девојчето.
Сите се изјаснија дека не се чувствуваат за виновни.
Според обвинението, тие испланирале грабнување на 14-годишното девојче со цел да присилат член на нејзиното потесно семејство да даде пари за откуп. Додека, грабнувањето на оштетениот Панче Жежовски во Велес било со намера да го присилат да им го даде неговото возило „цитроен“ за да го користат за грабнување на детето во Скопје.
Малолетната Вања и велешанецот Панче, кои беа пријавени за исчезнати на 27 и 24 ноември, беа пронајдени мртви во близина на Скопје и Велес на 3 декември 2023 година.
Палевски, како првоосомничен беше уапсен во Турција на 5 декември лани, а турските власти и го екстрадираа на Северна Македонија на 15 мај годинава.
Мултимедија
Најпосетени
Што треба да знаете