Американскиот претседател Доналд Трамп потврди дека американската војска започнала напади врз Иран.
На социјалната мрежа Truth Social во кратка порака соопшти дека „пред кратко време Соединетите Американски Држави започнаа големи воени операции во Иран“.
„Нашата цел е да ги заштитиме Американците со елиминирање на заканата од иранскиот режим, група сурови и опасни луѓе“, изјави Трамп во видео-порака објавена на таа мрежа.
Тој наведе дека нападите уследиле откако САД повеќепати се обидувале да постигнат договор со Иран.
Додаде дека сега „ќе ги уништат нивните ракети и нивната ракетна индустрија. Целосно ќе исчезнат“.
Израел изврши, како што го опиша, „превентивен напад“ врз Иран на 28 февруари, нагло зголемувајќи ги тензиите на Блискиот Исток и намалувајќи ги надежите за дипломатско решение меѓу Техеран и Вашингтон во врска со иранската нуклеарна програма.
„Државата Израел започна превентивен напад врз Иран со цел да ги отстрани заканите кон државата Израел“, изјави министерот за одбрана Израел Кац.
Двајца високи американски претставници му потврдија на РСЕ/РЛ во Вашингтон дека „американски воени напади“ врз Иран се во тек, додека извештаи од повеќе ирански медиуми објавија за нови експлозии во иранските градови Табриз и Техеран.
Армија во движење: Американско распоредување поради тензиите со Иран
Експлозии најпрво беа пријавени во центарот на Техеран, а на социјалните мрежи се појавија фотографии и видеа на кои се гледаат облаци од чад што се издигаат над градот.
Новинската агенција Фарс, поврзана со Исламската револуционерна гарда (ИРГЦ), соопшти дека „неколку ракети“ ги погодиле улиците Данешгах (Универзитетска) и Џомхури (Република).
Засега нема информации за жртви. Агенцијата Тасним, која е блиска до ИРГЦ, објави дека иранскиот воздушен простор е затворен.
По нападот се огласија сирени низ Израел, а израелските одбранбени сили (ИДФ) соопштија дека им наложиле на жителите да останат во близина на заштитени простории.
Воените власти наведоа дека предупредувањето е превентивна мерка за да се подготви јавноста за можноста од одмазднички ракетен напад.
Нападот доаѓа неколку дена откако Иран и Соединетите Држави ја завршија третата рунда разговори насочени кон решавање на долгогодишниот спор околу нуклеарните активности на Техеран. Нов круг разговори е закажан за следната недела во Виена.
Во меѓувреме, Вашингтон го зголеми своето воено присуство во регионот. „УСС Џералд Р. Форд“, најголемиот носач на авиони во светот, се наоѓа во источниот Медитеран и се очекуваше да пристигне во Израел на 27 февруари.
Ројтерс, повикувајќи се на израелски одбранбен претставник, објави дека нападите биле координирани со Вашингтон.