Достапни линкови

Вести

Германија - Лицата под 60 години вакцинирани со АстраЗенека, втора доза да добијат од друга вакцина

Илустрација

Германската комисија за вакцини - СТИКО, вчера препорача луѓето под 60-годишна возраст кои се вакцинирале со првата доза на вакцината на АстраЗенека, дека треба да добијат втора доза од некоја од другите вакцини. објави Ројтерс.

Претходно во текот на неделата, Германија објави дека само на луѓе на возраст од 60 години и повеќе треба да се администрира вакцината АстраЗенека поради ретката, но сериозна појава на тромбоемболиски несакани ефекти. Во неа се вели дека подоцна ќе даде посебна препорака за помладите луѓе кои веќе добиле прв истрел.


Во ажурираната препорака на својата веб-страница, СТИКО рече дека нема научни докази за безбедноста на мешаната серија вакцини.

„Додека не бидат достапни соодветните податоци, СТИКО препорачува на лица под 60 години наместо втората доза АстраЗенека, да се даде доза на mRNA-вакцина 12 недели по првата вакцина“, рече СТИКО.

Вакцинациите за Messenger RNA (mRNA) ги вклучуваат оние направени од Фајзер, Бионтек и Модерна.

види ги сите денешни вести

Мицкоски: Ако имало притисоци, оставки да поднесат и другите членови на историската Комисија

Лидерот на ВМРО-ДПМНЕ Христијан Мицкоски.

Лидерот на ВМРО-ДПМНЕ Христијан Мицкоски ги повика и останатите членови на македонскиот дел од Заедничката мултидисциплинарна експертска комисија за историски и образовни прашања меѓу Северна Македонија и Бугарија „да ја следат постапката“ на професорот Ванчо Ѓорѓиев, кој денеска поднесе оставка од Комисијата.

„Ако е вистина тоа дека некој помеѓу двата изборни круга одлучува да распродава дел од македонскиот идентитет и да ја продава Македонија на сметка на тоа да опстане политички, јас сум шокиран и веднаш повикувам, не само до тие политичари коишто вршат притисок, туку и до останатите членови на Комисијата која преговара, да ја следат постапката на професорот Ванчо Ѓорѓиев“, рече Мицкоски.

Членот на македонскиот дел од Заедничката мултидисциплинарна експертска комисија за историски и образовни прашања меѓу Северна Македонија и Бугарија, професор Ванчо Ѓорѓиев, денеска поднесе оставка од Комисијата.

Тој образложи дека оставката ја поднел поради тоа што во последно време имало отворени обиди за политичко влијание врз работата на комисијата што на вчерашната средба кулминирало преку директно мешање во стручната работа од страна на висок функционер во Министерството за надворешни работи (МНР).

Македонскиот дел од Комисијата излезе со реакција во која се наведува дека членовите се „крајно изненадени од тврдењата“ во соопштението на Ѓорѓиев и дека во нив не постои никаква основа дека имало политички притисок од МНР, Владата или политичките партии“, се вели во реакцијата.

На повикот на Мицкоски реагиреше владејачката СДСМ. Преку партиско соопштение генералниот секретар на партијата и вицепремиер во Владата, Љупчо Николовски, вели дека Мицкоски со изјавата признал дека оставката на Ѓорѓиев е политички потег инициран од ВМРО-ДПМНЕ.

„Значи Мицкоски признал дека е тесно политички потег инициран токму од ВМРО-ДПМНЕ на една недела пред изборите и мешање во работата на Комисијата којашто е стручна“, рече Николовски.

На тврдењата на Ѓорѓиев, со деманд денеска излезе и македонската Влада која соопшти дека во ниту еден момент ниту се мешала, ниту имала какво било политичко влијание во работата на Комисијата.

Нема решенија од последната средба на македонско-бугарската историска комисија

Архива - Билатерална мултидисциплинарна комисија за историски и образовни прашања помеѓу Република Северна Македонија и Република Бугарија.

Не се усвоени никакви решенија и препораки на 15-та редовна средба на Заедничката мултидисциплинарна експертска комисија за историски и образовни прашања меѓу Северна Македонија и Бугарија. Состанокот се одржуваше вчера и денеска преку онлајн врска.

Членовите на Комисијата од македонската страна за МИА брифираат дека не биле усвоени решенија и препораки поради „исклучивиот пристап на колегите од Софија и нивното инсистирање да се наметне нивното гледање на минатото“.

Мешовитата македонско-бугарска комисија беше формирана согласно Договорот за пријателство, добрососедство и соработка што во 2017 година го потпишаа Скопје и Софија.

Членовите на македонската страна по последниот состанок информираат дека на Комисијата биле дискутирани неколку прашања важни за работата на Комисијата.

Во првиот ден, биле дадени предлози и идеи за препораки за учебниците по историја за да се подобри историското образование во двете држави, велат тие.

„По исцрпна дискусија вториот ден покажа дека двете страни се сè уште далеку од решение кое би довело до подобрување на образовниот процес и остварување на заедничката цел–градење добрососедски односи и пријателство во кое минатото и различните толкувања на историјата нема да бидат пречка“, велат членови на македонскиот тим.

Тие додаваат дека во текот на вториот ден било дискутирано и за можноста личноста на Гоце Делчев да биде заеднички чествувана од двете држави, но дека дискусијата го покажала различниот пристап и разбирање на историјата и нејзината улога во двете држави.

Денеска и копретседателот на бугарскиот дел од Комисијата професор Ангел Димитров, на брифинг со новинарите во бугарското Министерство за надворешни работи рече дека станува се потешко да ги информира за работата на заедничката Комисија, јавува дописникот на МИА од Софија.

Димитров вели дека до вчера напладне работите во разговорите на заедничката историска Комисија оделе добро, но дека нешто се сменило во последен момент.

Димитров рекол дека „постои политички притисок врз неговите колеги од македонскиот дел од Комисијата, потсетувајќи дека претстои втор круг од локалните избори во земјата.

Инаку, денеска членот на македонскиот дел професор Ванчо Ѓорѓиев поднесе оставка од Комисијата со образложение дека во последно време имало отворени обиди за политичко влијание врз работата на комисијата што на вчерашната средба кулминирало преку директно мешање во стручната работа од страна на висок функционер во Министерството за надворешни работи.

Со реакција излезе македонскиот дел од Комисијата, во која се наведува дека научните принципи во работата на Комисијата биле, се и ќе останат непроменети, а дека не постои никаква основа во тврдењата на Ѓорѓиев дека имало политички притисок од МНР, Владата или политичките партии“, се вели во реакцијата.

Со деманд на тврдењата на Ѓорѓиев излезе и македонската Влада која соопшти дека во ниту еден момент ниту се мешала, ниту имала какво било политичко влијание во работата на Комисијата.

411 позитивни на коронавирус, 7 починати

Илустративна фотографија.

Во изминатото деноноќие се регистрирани 411 нови случаи на коронавирус, а 4 луѓе починале сите во болнички услови, соопшти Министерството за здравство.

Според Регистарот на починати од ковид пријавени се уште 3 починати лица во период од 31 август до 16 октомври, се вели во соопштението.

Направени се 3.209 тестирања. Најмногу нови случаи има во Скопје – 198, Куманово 40, Штип 19, Велес 18, Кавадарци 16, Прилеп 15...

Регистрирани сe 271 оздравен пациент. Бројот на активни случаи во моментов е 7.019.

Вкупната бројка на ковид-дијагностицирани лица во Северна Македонија од почетокот на епидемијата изнесува 199.057, бројката на оздравени пациенти е 185.931, на починати 7.019.

Косово: Две лица од руската Канцеларија за врски прогласени за „персона нон грата“

Вјоса Османи Садриу - претседателката на Косово.

Косовската претседателка Вјоса Османи Садриу денеска соопшти дека две официјални службени лица од руската Канцеларија за врски на Косово се прогласени за непожелни (нон грата), поради наводни активности кои ја нарушиле „националната безбедност и уставниот поредок на Косово“.

„Министерството за надворешни работи денеска донесе одлука со која овие двe руски официјални службени лица ги прогласи за непожелни личности и истовремено ги информираше институциите за спроведување на законите и надлежните органи за нивно спроведување“, напиша косовската претседателка на својот Фејсбук профил.

Османи Садриу додаде дека „институциите на Косово нема да се двоумат да дејствуваат секогаш кога ќе се наруши безбедноста и уставниот поредок“.

„Косовските институции се борат против малигното влијание на Русија и нејзините сателити во регионот, кои имаат за цел да ги поткопаат нашите достигнувања и достигнувањата на САД, НАТО и ЕУ. Затоа, ние ќе продолжиме тесно да соработуваме со нашите американски и европски сојузници да се спречи Косово и нашиот регион да станат плен на деструктивните амбиции на Русија“, напиша Османи Садриу.

Вучиќ: Важно е да се отвори дијалог во БиХ, санкциите не решаваат проблеми

Српскиот претседател Александар Вучиќ.

Претседателот на Србија Александар Вучиќ најави дека на 23 октомври во Белград ќе се сретне со членот на Претседателството на Босна и Херцеговина Милорад Додик, а во наредните недели и со бошњачкиот лидер Бакир Изетбеговиќ.

На прашањето за можните санкции на САД против ентитетот Република Српска, тој рече дека секогаш бил против тоа.

„Никој не решил никаков проблем со санкциите, што се покажува низ историјата. Особено ги презирам оние во Белград, Бања Лука и Сараево кои мислат дека проблемот се решава со санкции. Разговорот е најважен метод за решавање на проблемите“, рече Вучиќ.

На 20 октомври, по одлуката на Народното собрание на Република Српска кое го усвои Законот за лекови и медицински помагала во Република Српска, американската амбасада во БиХ соопшти дека САД се подготвени да применат санкции .

Законот предвидува формирање агенција за лекови во ентитетот, што не е во согласност со Уставот на БиХ.

На 22 октомври, Вучиќ изјави дека смета оти е „многу важно да отвориме српско-бошњачк дијалог, за да зборуваме еден за друг со поголема почит, да се грижиме еден за друг и да видиме кои се интересите на едните и другите“.

„Ако во политиката очекувате да добиете некаква корист од санкциите за некој друг, таа придобивка е патетична и никогаш не трае доволно долго за навистина да ја имате“, додаде тој.

Нов дневен рекорд на ковид инфекции во Русија

Ситуацијата со ковид инфекции во Русија.

Русија забележа уште еден дневен рекорд на инфекции со ковид-19 и смртни случаи додека властите се подготвуваат повторно да ги воведат ограничувањата.

Владиниот кризен центар објави 37.141 нови случаи на ковид-19 и 1.064 луѓе кои починале во изминатите 24 часа, што е втор последователен дневен рекорд на случаи и четврти ден по ред со рекордни смртни случаи.

Претседателот Владимир Путин нареди национална недела на „неработење“ која започнува на 30 октомври во обид да се запре порастот на инфекциите.

Московскиот градоначалник Сергеј Собјанин повторно воведе мерки за периодот помеѓу 28 октомври и 7 ноември со затворање на сите продавници, барови и ресторани, освен оние што продаваат основни стоки.

Русија има убедливо најголем број на смртни случаи во Европа, односно 228.453 лица или четврти највисок во светот. Само околу една третина од скоро 146 милиони луѓе се целосно вакцинирани во земјата.

Реакција на Комисијата за историски и образовни прашања за оставката на Ѓорѓиев

Архивска фотографија: Билатерална мултидисциплинарна комисија за историски и образовни прашања помеѓу Република Северна Македонија и Република Бугарија.

Македонскиот дел од Заедничката мултидисциплинарна експертска комисија за историски и образовни прашања меѓу Македонија и Бугарија објави реакција во врска со денешната оставка на членот на Комисијата – професорот Ванчо Ѓорѓиев, во која се наведува дека научните принципи во работата на Комисијата биле, се и ќе останат непроменети.

„Не постои никаква основа да се тврди дека постои нов принцип на работа, ниту политички притисок од МНР, Владата или политичките партии“, се вели во реакцијата.

Професор Ѓорѓиев денеска поднесе оставка од Комисијата наведувајќи дека одлуката ја донел раководејќи се од професионалниот интегритет и личните принципи, а дека во последно време имало отворени обиди за политичко влијание врз работата на Комисијата што кулминирало на вчерашната редовна средба преку, како што посочува, директно мешање во стручната работа од страна на висок функционер во МНР.

„При такви околности, под влијание на двојното водство во македонскиот дел од Комисијата, се отстапи од утврдените принципи за консензуално носење одлуки по сите прашања; при што не беше испочитувано договореното на координативниот состанок од 20.10.2021 година“, наведе меѓу другото Ѓорѓиев.

Ѓорѓиев исто така нагласи дека изготвените и разменети предлог-идеи, во текот на вчерашниот ден од страна на македонскиот дел од Комисијата за препораки за учебниците за VII одделение за македонските учебници, биле донесени и разменети без негова согласност“, вели Ѓорѓиев во соопштението кое го доби РСЕ.

Во реакцијата на Комисијата се наведува дека членовите се „крајно изненадени од тврдењата во неговото соопштение“, бидејќи, како што е соопштено, со Ѓорѓиев во изминатите три години се работело во Комисијата и биле донесени решенија за кои членовите сметаат дека се „добри“ и со кои сметаат дека „помагаме во надминување на спорот помеѓу двете држави, зачувувајќи ги националните интереси на македонската држава, Македонците и другите етнички заедници“, стои во реакцијата.

„Вчерашните и денешните разменети предлог-идеи во ништо не отстапуваат или, пак, се разликуваат од досега разменетите предлози и пристапот кој е усогласен од сите членови на македонскиот дел од Комисијата од самиот нејзин почеток и кои во ништо не ги нарушува или, пак, се спротивни на македонскиот идентитет, национални интереси и спомнатите во соопштението на колегата Ѓорѓиев црвени линии усвоени во Собранието“, стои во реакцијата.

Со деманд излезе и Владата која соопшти дека во ниту еден момент ниту се мешала, ниту имала какво било политичко влијание во работата на Комисијата.

„Категорично отфрламе каква било инсинуација дека имало какво било влијание на одлуката на професорот Ванчо Ѓорѓиев да го прекине својот ангажман како член на Комисијата од страна на Владата или која било нејзина институција“, се вели во соопштението на Владата.

Во соопштението на Владата се додава дека професорот Ванчо Ѓорѓиев пред една недела „го потпиша со слободна волја договорот за продолжување на неговиот ангажман како член на Комисијата“.

Османи - Одвојувањето на Албанија и Северна Македонија зависи од ЕУ

Macedonia - Bujar Osmani, minister of foreign affairs

Министерот за надворешни работи на Северна Македонија Бујар Османи денеска изјави дека одвојувањето на Северна Македонија и Албанија не зависи од нив, туку тоа e одлука на ЕУ. Тој порача дека никогаш не бил поборник на одвојувањето.

„Се сеќавате 2019 година беше обратна ситуацијата. Дали Северна Македонија треба да ги продолжи, а Албанија заостана затоа што ги немаше тогаш исполнето условите. Имаше и меѓу нас такви коишто лобираа Северна Македонија да се одвои. Отсекогаш сум предвидел дека овие процеси се циклични и може да се сменат во обратна насока“, изјави Османи, одговарајќи на новинарско прашање на заедничката прес-конферениција со генералната секретарка на ОБСЕ, Хелга Шмид.

Според него, важно е, поради многу причини и ќе даде поттик на целокупната регионална интеграција, доколку Албанија и Северна Македонија се држат заедно и започнат преговорите заедно сега при крајот на годината, во текот на словенечкото претседателство, а потоа, како што рече, секој со својата среќа и брзина што ќе ја наметне.

„Но, мислам дека почетокот е важен затоа што Комисијата потврдува дека двете држави ги исполнуваат условите. И навистина би било лоша пораки кога поради прашања коишто не се поврзани со ЕУ, едната држава не продолжи. Мислам дека тоа ќе создаде значителен удар на кредибилитетот на европските интеграции во државата и во регионот“, рече Османи.

Процесот на започнување на преговорите на Северна Македонија и Албанија со ЕУ е блокиран од 2019 година. Тогаш прво Франција побара да биде променета методологијата на Блокот за преговорите со земјите кандидатки. Методологијата беше променета, но потоа процесот за почнување на преговорите започна да го блокира Бугарија.

Ревакцинирани 46 отсто од полнолетните граѓани во државата

Министерството за здравство информира дека во текот на вчерашниот ден аплицирани се вкупно 4.933 дози вакцини, од кои 483 се аплицирани како прва доза, 1.150 се ревакцинирани, а 3.300 граѓани примиле трета доза вакцина. Заклучно со 21 октомври, според соопштението, вкупно се вакцинирани 800.718 граѓани, ревакцинирани се 767.800 а трета доза примиле 5.666 граѓани. 54% од граѓаните над 40 годишна возраст се ревакцинирани, а 33% од популацијата од 18 до 39 години примиле барем една доза вакцина.

Опфатот со вакцинација со една доза вакцина, на полнолетната популација е 57%, а со две дози опфатени се 46% од граѓаните над 18 години. Според бројот на аплицирани вакцини, 38% од целата популација во нашата земја е вакцинирана, а 35% од популацијата во државата примила две дози вакцина.

Македонија од 1 јануари влегува во тројката на претседавачи со ОБСЕ

Илустрација

Северна Македонија од 1 јануари влегува во тројката на претседавачи на ОБСЕ, заедно со овогодишниот претседавач Шведска и претседавачот во 2022 година Полска, додека веќе во 2021 година земјата ќе претседава со медитеранските партнери за соработка на ОБСЕ како генерална проба за обврските како претседавач со организацијата во 2023 година.

Министерот за надворешни работи Бујар Османи, посочи дека денешната работна средба со генералната секретарка на ОБСЕ, Хелга Шмид, била искористена генерално за прашања поврзани со процесот на организација и самото претседавање на нашата земја со ОБСЕ.

„Очекуваме исполнета и конструктивна агенда и успешно претседавање во 2023 година. Претседавањето со организацијата сериозно ќе придонесе кон зајакнато позиционирање на земјата во меѓународни рамки како конструктивен актер и сериозен придонесувач во зачувување на мирот, стабилноста и соработката“, изјави Османи.

Тој изрази уверување дека државата ќе вложи максимум процесот на претседавање да биде отворен, инклузивен и целисходен. Според него, државата ќе биде ориентирана кон креирање решенија кои ќе овозможат напредок и позитивни придвижувања на процесите во организација.

ОБСЕ, посочи Шмид, е единствена платформа за разговори за безбедносни прашања, како и дека прашањата кои се однесуваат на безбедноста мора да се разгледуваат и од гледна точка на животната средина, почитување на човековите права и владеењето на правото.

„Секако Северна Македонија придонесува кон безбедноста, веќе постигнавте голем напредок во последните години во реформирањето на вашето законодавство како дел од процесот на пристапување кон ЕУ, обезбедувајќи почитување на сите етнички заедници“, изјави Шмид, поздравувајќи го учеството на земјата во регионалниот проект за мониторинг, во борбата против корупцијата и организираниот криминал.

Шмид изјави и дека секогаш е важно да се спроведат препораките коишто се даваат пред и по изборите и очекува Северна Македонија да ги спроведе.

Соработничката на Навални не се чувствува безбедно по напуштањето на Русија

Љубов Собол

Руската опозициска политичарка Љубов Собол изјави дека не се чувствува „целосно безбедно“ откако неодамна побегна од Русија, но инсистира дека ќе продолжи да се бори против „криминалниот режим“ на претседателот Владимир Путин и широко распространетата корупција во нејзината земја.

Зборувајќи во интервју за РСЕ преку видео врска од непозната локација, Собол одби да открие каде се наоѓа. Собол, близок соработник на Алексеј Навални, побегна од Русија во август, откако и беше изречена казна слична на условна слобода. Запрашана за нејзините можни грижи во врска со нејзината безбедност, Собол рече дека се префрлила од „поопасна“ локација на „малку помалку опасна“.

„Но, дали се чувствувам целосно безбедно? Се разбира не. Мислам дека никој што се бори против криминалниот режим на Путин не може да се чувствува целосно безбеден. Клучното прашање е дали ќе продолжам да се занимавам со политички активности и да се борам против корупцијата, да ја зборувам вистината и да бидам глас на обичните луѓе и ќе продолжам да го правам сето тоа“, изјави таа.

Опозициската политичарка и адвокатка на Антикорупциската фондација на Навални побегна од Русија по неколку дена откако судот во Москва ја прогласи за виновна за јавно повикување на луѓето да присуствуваат на митинзи за поддршка на Навални, откако тој беше затворен по неговото враќање во Русија од Германија, каде што се лекуваше по отровниот напад за кој го обвинува Кремљ.

Професорот Ѓорѓиев поднесе оставка од македонско-бугарската историска комисија

Професор Ванчо Ѓорѓиев

Професорот Ванчо Ѓорѓиев денеска поднесе оставка од заедничката мултидисциплинарна експертска комисија за историски и образовни прашања меѓу Македонија и Бугарија раководејќи се, како што наведе, од професионалниот интегритет и личните принципи. Според него, во последно време имало отворени обиди за политичко влијание врз работата на комисијата што кулминирало на вчерашната редовна средба преку, како што посочува, директно мешање во стручната работа од страна на висок функционер во МНР.

„При такви околности, под влијание на двојното водство во македонскиот дел од Комисијата, се отстапи од утврдените принципи за консензуално носење одлуки по сите прашања; при што не беше испочитувано договореното на координативниот состанок од 20.10.2021 година. Нагласувам дека изготвените и разменети предлог-идеи, донесени и разменети во текот на вчерашниот ден од страна на македонскиот дел од Комисијата за препораки за учебниците за VII одделение за македонските учебници, се без моја согласност“, наведува Ѓорѓиев во соопштението кое го доби РСЕ.

Тој притоа порачува дека демонстрираните ставови на последната средба од страна на другите членови на македонскиот дел од комисијата, не само што се во спротивност со Резолуцијата усвоена на 29.07.2021 година од македонското Собрание, со која се утврдуваат црвените линии во преговорите меѓу двете земји, туку и со македонските национални интереси.

Министерот за надворешни работи, Бујар Османи потврди дека еден член на комисијата се повлекол од нејзината работа. Тој изјави и дека никогаш не се мешале во работата на комисијата, ниту се правело притисок за одлуките кои се носеле.

Група интелектуалци против менување на историјата и за заштита на Македонците во Бугарија

Македонско знаме

Група македонски интелектуалци денеска во обраќање до јавноста реагираа дека
во изминатиов период земјата е соочена со постојаното ангажирано негирање на македонските идентитетски обележја- народот, нацијата, јазикот, културата, од страна на владините и на државните институции на Бугарија со цел, како што се наведува, да се прикаже дека македонската нација е вештачка креација на Коминитерната и на Јосип Броз Тито, која како таква постои од 1945 година, и дека преку присилна пропаганда од тогашните комунистички власти „Бугарите“ во Македонија биле принудувани да се запишуваат како Македонци.

„Уште повеќе, со Договорот за пријателство, добрососедство и соработка се бара и прифаќање на т.н. заедничка историја со Бугарија, а воедно и откажување од македонското малцинство, кое таму живее со векови. Самиот факт што бугарската држава не ги признава македонската нација и македонскиот јазик зборува, во основа, за каков „пријателски“ договор се работи и што, во суштина, се крие зад тоа –целосно обезличување на сето она што е македонско“, се наведува во писмото.

За жал, според нив, ова не е ништо ново. Тие порачуваат дека не треба да се заборави дека на пописот во 1956 година во Бугарија, тамошните Македонци за последен пат можеле официјално да се изјаснат за својата национална припадност. Од тогаш до денес, се посочува, дека се подложени на постојан притисок, на асимилација и денационализација.

„Не е подобра ситуацијата во овој поглед и во Грција. Оттука, не случајно во двата договора –во оној со Бугарија и во оној со Грција, од нашата држава се бара да признае дека нема македонско малцинство и дека какво било барање за заштита на неговите права ќе се смета за мешање во внатрешните работи на едната или на другата соседна земја. Сметаме дека тоа што матичната држава се откажува од своето малцинство и го остава без каква било заштита претставува чин без преседан во светски рамки, кој е во спротивност со сите декларации за правата на малцинствата и за човековите права воопшто. Во прилог на ова зборуваат и 14-те пресуди на судот во Стразбур во корист на македонското малцинство во Бугарија, кои бугарскиот парламент не ги ратификува, а ЕУ нема механизам со кој би ја принудила својата членка да го направи тоа“, се вели во писмото.

Тие воедно информираат дека ја поддржуваат Декларацијата на македонското малцинство во Бугарија.

„Со тоа како научни работници, професори, интелектуалци би сакале да порачаме дека историјата никој не може да ја менува по сопствено наоѓање заради остварување на политички цели, притоа оставајќи без заштита и поддршка дел од сопствениот народ кој се бори за основното човеково право да може слободно да се идентификува според сопственото убедување и да му се почитуваат сите малцински права во согласност со Конвенцијата за заштита на националните малцинства. Сметаме дека непреземањето никакви чекори од страна на матичната држава Македонија за заштита на малцинските права на Македонците во Бугарија е нецивилизациски чин и преседан без пример во светот. Се залагаме за примена на принципот на реципроцитет. Сметаме дека без преседан е во земја членка на ЕУ македонското малцинство да не може слободно да се изјасни за својата национална припадност. Тоа се коси со сите документи, политики и принципи врз основа на кои е формирана и функционира Унијата. Го осудуваме ставот на претседателот на Владата на Македонија дека интересот на македонската влада за состојбата на македонското малцинство во Бугарија е мешање во внатрешните работи на таа земја, а дека застапувањето на бугарската влада и на бугарскиот претседател за правата на бугарското малцинство во Македонија и барањето за негово вметнување во Уставот не е мешање во внатрешните работи на Македонија. Нагласуваме дека не постои држава во светот која не се грижи за правата на своето малцинство во друга држава. Малцинствата секогаш претставуваат мост за соработка и за меѓусебно разбирање на народите“, велат тие.

На писмото се потпишани 85 интелектуалци.

Димитров: Наодите од извештајот на ЕК референтна точка за реформите

Вицепремиерот за европски прашања Никола Димитров

Вицепремиерот за европски прашања Никола Димитров денеска заедно со Михаела Матуела од Генералниот директорат на Европската комисија за соседство и проширување, надлежна за Северна Македонија и Албанија, копретседаваше со годишниот состанок на Заедничкиот мониторинг комитет, како највисоко тело во рамки на користењето на ИПА фондовите.

Како што соопшти СЕП, со цел да се направи преглед на спроведувањето на средствата алоцирани преку ИПА, вицепремиерот Димитров нагласи дека наодите од Извештајот на ЕК за Северна Македонија ќе се користат како референтна точка за рационализирање и управување со реформите кои произлегуваат од европската агенда со цел да се обезбедат европски стандарди за граѓаните преку ЕУ фондовите.

„Потребен ни е фокус и акција, досегашното искуство и предизвиците да ги искористиме како катализатор за да создадеме појасна слика за нашите следни чекори и да одиме одлучно напред. Искрениот, партнерски пристап и подобрувањето на координацијата во спроведувањето на ИПА се клучните предуслови за постигнување на заедничките цели“, рече Димитров.

Покрај прегледот на генералното спроведување на ИПА, на состанокот се дискутирале и конкретните проекти со посебен акцент на областите како заштита на животната средина, транспортната инфраструктура кои бараат значителни инвестиции, како и регионалните политики и координацијата на структурните инструменти во рамки на Поглавјето 22.

ЕК извештај-Северна Македонија умерено реформски посветена

На шестиот по ред состанок присуствуваа претставници од државните институции кои спроведуваат ИПА фондови, претставници на Делегацијата на ЕУ, претставници на секторските работни групи и на донаторите кои се активни во земјата и граѓански организации. Претставниците на Европската комисија, според соопштението, притоа ја поздравиле посветеноста за соодветно искористување на ИПА средствата со цел постигнување на суштински реформи во интерес на граѓаните.

Од починатите од ковид 17 отсто биле вакцинирани

Илустрација

Министерството за здравство соопшти денеска дека во период од 06 август заклучно со 21 октомври на територија на државата 42.945 граѓанин биле позитивни на Ковид- 19, од нив 26 отсто биле целосно вакцинирани, односно 11.253 лица. Според соопштението, голем е бројот на невакцинирани граѓани кои се заразиле со Ковид- 19.

Според статистика за изминатиов период 31.692 граѓани, односно 74 отсто од позитивните на Ковид -19 не биле вакцинирани. Процентот на хоспитализирани лица кои се невакцинирани изнесува 76 проценти, додека само 24 отсто од сите моментално хоспитализирани пациенти се целосно вакцинирани.

Од министерството посочуваат дека анализата покажува дека смртноста кај невакцинираните е драстично поголема. Во посочениот период на територијата на државата починале 1506 лица со Ковид- 19, 1246 пациенти, односно 83 отсто од починатите не биле вакцинирани, а само 260, односно 17 проценти примиле вакцина.

Според анализите починатите имале повеќе комбинирани хронични заболувања. Пациентите биле вакцинирани со сите типови вакцини кои ги има на располагање во државата.

Во експлозија во погон за барут во Русија загинале 16 лица

Пожарот во

Најмалку 16 лица загинаа во пожар предизвикан од експлозија во погон за барут во руската област Ријазан. Според извештаите на локалните медиуми, експлозијата во работилницата за барут во фабриката за синтетички влакна Еластик се случила рано утрината. Локалните власти соопштија дека вкупно 17 лица имало во работилницата кога се случила експлозијата.

На местото на настанот пристигнале и заменик-гувернерот на регионот Ријазан, Дмитриј Филипов, и вршителот на должноста министер за вонредни состојби, Александар Чупријан. Министерството за вонредни состојби соопшти дека „прекршувањето на технолошкиот процес“ можеби ја предизвикало експлозијата. Истражниот комитет соопшти дека покренал истрага за случајот.

До Државен завод за ревизија 64 учесници во изборите не доставиле финансиски извештај

Локални избори. Илустрација.

Државниот завод за ревизија соопшти денеска дека согласно законот донел Одлука за запирање на исплатата на средствата кои се исплаќаат од Буџетот за надомест на трошоците за финансирање на изборната кампања за учесниците во изборната кампања за локалните избори.

Предлогот, според соопштението, се однесува на оние учесници во изборната кампања кои до Државниот завод за ревизија го немаат доставено во законски пропишаниот рок или не го доставиле со пропишана содржина Извештајот со образецот за примените донации.

Предлогот, како што се наведува, содржи податоци и информации за непостапување согласно законските обврски за 84 од вкупно 122 учесници во изборната кампања, од кои 64 не го доставиле извештајот во законски пропишаниот рок, а 20 учесници не го доставиле со законски пропишана содржина.

Имајќи предвид дека согласно Изборниот законик, Државната изборна комисија ги исплаќа трошоците за објавеното платено политичко рекламирање врз основа на доставена фактура од страна на радиодифузерите, печатените медиуми и електронските медиуми (интернет портали) во рок од 30 дена од објавување на конечните резултати, Државниот завод за ревизија укажува на потребата сите учесници во изборната кампања за локалните избори кои до сега не ги поднеле извештаите а биле должни, истото да го сторат во најкус можен рок.

Отворен Балкан за Рама е вистинска идеја во вистинско време

Албанскиот премиер Еди Рама

Албанскиот премиер Еди Рама изјави дека е убеден оти сите земји од регионот ќе станат дел од иницијативата „Отворен Балкан“. Според него, не постои друг начин освен иницијативата.

„Отворениот Балкан е вистинската идеја во вистинско време, и без сомнение секој ќе ја прифати идејата чекор по чекор. Немаме време за губење. Треба да бидеме целосно отворени еден со друг за да создадеме слика за тоа што сакаме да бидеме. Така добиваме време од иднината. Тоа е иднината, нема друга опција освен да се отвориме еден кон друг“, истакна Рама на церемонијата по повод годишнината од германската фондација Фридрих Еберт во Албанија.

Тој го нарече процесот на европска интеграција непредвидлив поради пречките што може да се сретнат „на патот“, наведувајќи го ветото наметнато од Бугарија за Македонија.

НАТО ги усвои целите на способности за С.Македонија

Министрите за одбрана на земјите членки на НАТО ги усвоија целите на способности за Северна Македонија, за прв пат по членството на нашата земја во Алијансата. Министерството за одбрана соопшти дека целите на способности кои биле усвоени на дводневните состаноци на Северноатлантскиот совет го покажуваат правецот во кој ќе се развиваат силите и капацитетите на НАТО-армиите.

„Овој процес овозможува земјите – членки меѓусебно да се поддржуваат и помагаат во справувањето со идните предизвици, особено имајќи предвид дека секоја земја развива специфични капацитети, кои заедно ја прават Алијансата поцврста и поспремна да ја гарантира безбедноста и стабилноста на евроатлантската област“, наведуваат од Министерството.

Министрите за одбрана, според соопштението, на состаноците разговарале и за Авганистан, и потребата никогаш повторно да не се дозволи оваа земја да биде упориште на тероризмот. На маргините на овие состаноци, министерката за одбрана Радмила Шекеринска се сретнала и со генералниот секретар на Европската служба за надворешно дејствување, Стефано Санино каде ја пренела пораката дека Северна Македонија испорачала резултати и дека е потребно ЕУ час поскоро да го отвори патот кон полноправно членство.

Во Париз разговори меѓу претставници на САД и на Европа за Иран

три верзии на ирански центрифуги се прикажани во ТВ програма во живо од Натанц, 6 јуни 2018 година

Специјалниот пратеник на САД за Иран Роб Мали денеска во Париз ќе се сретне со британски, француски и германски дипломати на разговори за застојот во напорите Иран да ја продолжи усогласеноста со иранскиот нуклеарен договор од 2015 година, изјавија три дипломатски извори. Иако со недели велеше дека ќе се врати на преговори „наскоро“, Иран допрва треба да објави датум за продолжување на дискусиите во Виена за заживување на пактот според кој ја ограничи својата нуклеарна програма во замена за ослободување од економските санкции на САД, ЕУ и ОН.

Координаторот на ЕУ за нуклеарни преговори во посета на Иран

Тогашниот претседател на САД Доналд Трамп го напушти пактот во 2018 година и повторно воведе строги санкции од САД. Околу една година подоцна, Иран почна да крши некои од границите на договорот за збогатување ураниум. Збогатувањето ураниум може да обезбеди пат до добивање материјал за атомска бомба, амбиција која Иран ја негира. Дипломатските извори, кои сакаа да останат анонимни, рекоа дека специјалниот пратеник на САД за Иран Роб Мали ќе се сретне со политичките директори на британското, француското и германското министерство за надворешни работи, група позната како Е3.

Израелскиот премиер во ОН: Иран е закана за светската безбедност

Еден од изворите за новинската агенција Ројтерс изрази надеж дека состанокот ќе даде одредена јасност за тоа како би можеле да дејствуваат светските сили во следните недели, доколку Иран продолжи да „купува време“ и да го одложи враќањето во Виена. Американските власти рекоа дека истекува времето за заживување на договорот.

Бајден: САД ќе го бранат Тајван

американскиот претседател Џо Бајден

САД ќе застанат во одбрана на Тајван и имаат обврска да го бранат островот што Кина го смета за своја територија, изјави американскиот претседател Џо Бајден на прашањето дали САД ќе го бранат Тајван, кој се жали на зголемениот воен и политички притисок од Пекинг да го прифати кинескиот суверенитет. Бајден рече дека луѓето не треба да се грижат за воената сила на Вашингтон, бидејќи Кина, Русија и остатокот од светот знаат дека САД ја имаат најмоќната армија во историјата на светот.

САД се загрижени поради кинеските хиперсонични ракети


„Не сакам студена војна со Кина. Само сакам Кина да разбере дека нема да се повлечеме, дека нема да промениме ниту еден од нашите ставови“, рече Бајден.
Тајван вели дека е независна држава и дека ќе ги брани своите слободи и демократија. Кина, од друга страна, смета дека Тајван е најчувствително и најважно прашање во односите со САД и го осудува, како што го нарекува, „заговорот“ меѓу Вашингтон и Тајпеј.

СЗО: Помеѓу 80.000 и 180.000 здравствени работници починале од коронавирус

Болница во Романија, архивска фотографија

Светската здравствена организација објави дека меѓу 80.000 и 180.000 здравствени работници починале од коронавирус помеѓу јануари 2020 и мај 2021 година. „Од 135 милиони здравствени работници ширум светот, меѓу 80.000 и 180.000 починале од коронавирус од почетокот на пандемијата до мај 2021 година“, се вели во соопштението на СЗО, во кое се додава дека бројот на загинати е веројатно многу поголем.

СЗО со список од 25 експерти кои ќе го истражуваат потеклото на коронавирусот

Генералниот директор на СЗО, Тедрос Аданом Гебрејезус, рече дека е од суштинско значење здравствените работници да се вакцинираат против коронавирусот. Тој ги повика сите земји да се погрижат здравствените работници да бидат во приоритетните групи за примање на вакцината.

Израел ќе ги ги отвори границите за вакцинирани туристи

Илустрација

Израелските власти најавија дека од 1-ви ноември ќе дозволи влез во земјата за вакцинирани туристи. Изралеските граници за странците беа затворени повеќе од една година поради пандемијата со коронавирусот.

Оваа препорака која формано се уште не е донесена во владата, доаѓа во период кога Израел излегува од четвртиот бран на пандемијата.

Во Израел во јули започна масовна кампања за трета доза на вакцина на сите граѓани посари од 16 години со Фајзер/Бионтек. Според соопштениот од премиерскиот кабинет во земјата ќе биде дозволен влез за странски туристи кои пре помалку 6 месеци биле целосно вакцинирани со две дози, потоа за оние кои примиле трета доза вакцина, како и за странците кои оздравеле од заразата со ковид-19 пред помалку од 6 месеци.

Во однос на тоа со кои примени вакцини ќе биде дозволен влез во Израел, во соопштението се наведени Фајзер, Модерна, Џонсон и Џонсон, Астразенека, Синовак и Синофарм, но не и Спутник.

Се очекува оваа одлука да го поттикне развојот на туризмот кој беше еден од најпогодените сектори во екот на пандемијата. Одлуката доаѓа во пресрет на божиќните празници кои на илјадници странски туристи им ги отвара вратите кон светите христијански места во Израел и Витлеем.

Навални им ја посвети наградата Сахаров на антикорупционерите

Рускиот опозициски лидер Алексеј Навални

Рускиот опозициски лидер Алексеј Навални, кој е во затвор и ја доби наградата Сахаров за 2021 година изјави дека е почестен и оти признанието им го посветува на сите борци против корупцијата. „Ја посветувам мојата награда на борците против корупцијата од секаков вид ширум светот - од новинари до адвокати, од политичари (кои постојат) до пратеници и оние кои излегуваат на улица за да ја поддржат оваа борба“, напиша Навални на Твитер. Европскиот парламент, кој ја доделува наградата Сахаров за ангажман за човекови права соопшти дека Навални „конзистентно водел кампања против корумпираниот режим на рускиот претседател Владимир Путин“.

Русија распиша потерница по Љубов Совол, соработничка на Навални

Кремљ соопшти дека нема „почитување“ за одлуката на европратениците да му ја доделат наградата Сахаров на Навални. Многу набљудувачи велат дека наградата испраќа силна порака до Путин дека неговиот најжесток непријател сега е глобална личност, а не само локален руски феномен што Кремљ го прикажува како криминалец кој водел екстремистичка организација. „Ние го почитуваме ова тело (Европскиот парламент), но никој не може да нѐ присили да ги почитуваме таквите одлуки“, изјави портпаролот на Кремљ Дмитриј Песков.

Доминацијата на Путин води кон дестабилизација

Наградата Сахаров за слобода на мислење првпат им беше доделена на Нелсон Мандела и Анатолиј Марченко во 1988 година. Се доделува на поединци, групи и организации кои придонеле за заштита на слободата на мислење и човековите права. Наградата Сахаров, основана во 1988 година, е придружена со сума од 50.000 евра. Наградата го доби името по рускиот научник и дисидент Андреј Сахаров (1921-1989).

Актерот Алек Болдвин на снимање на филм убил едно лице, а друго ранил

Алек Болдвин

Американскиот актер Алек Болдвин пукал од пиштол реквизит додека снимал вестерн филм во САД. Притоа уби едно лице, а друго рани, соопшти локалната полиција. Директорката за фотографија Халина Хачинс и режисерот Џел Суза беа застрелани од пиштол што се користел во филмот. Шерифот на градот Санта Фе, во сојузната држава Ново Мексико, потврди дека жената им подлегнала на повредите. Екипата работеше на снимањето на филмот „Rust“. Во тек е полициска истрага и нема обвиненија во врска со инцидентот, јавуваат медиумите.

Вчитај повеќе

XS
SM
MD
LG