Достапни линкови

Тројца пратеници во притвор, тројца во домашен притвор


На тројца пратеници од ВМРО-ДПМНЕ им е одреден притвор во траење од 30 дена. На други тројца пратеници им е одреден домашен притвор во врска со настаните од 27 април, објави Кривичниот суд.

На пратениците Крсто Мукоски, Сашо Василевски и Љубен Арнаудов, за кои во медиумите се пишуваше дека за време на настаните во Собранието на 27 април, ги отворија собраниските врати за да влезе толпата народ, Кривичниот суд по распитот кај судија им одреди мерка притвор во траење од 30 дена. На Јохан Тарчуловски, Жаклина Пешевска и Љупчо Димовски им е одреден домашен притвор, објави денеска Кривичниот суд.

Арнаудов, Мукоски и Василевски попладнето од задниот влез на судот со полициска придружба беа изнесени и ставени во полициските комбиња и сите со едно возило заминаа. По нив од судот излезе и пратеничката Жаклина Пешевска, која без полициска придружба замина со друго комбе.

Шестемина пратеници кои останаа без имунитет, како осомничени за тероризам и загрозување на уставниот поредок во врска со настаните од 27 април годинава во Собранието на Република Македонија, дојдоа во Кривичниот суд на распит кај судија на претходна постапка.

Распитот на пратениците траеше неколку часа. Тие одделно дојдоа во судот, а само пратеникот Крсто Мукоски пред влегување во судот даде кратка изјава за медиумите. Тој рече дека верува во судот и посочи дека нема правна основа да му биде определена мерка притвор.

„Јас и моите адвокати сметаме дека нема основа за притвор, но крајната одлука е на судот и ние веруваме во судот. Јас редовно се појавувам на суд и цело време сум достапен“, рече Мукоски.

Пратеникот Сашо Василевски, на прашањето на новинарите што очекува денеска, само кусо се заблагодари на поддршката од медиумите.

Пратеникот Јохан Тарчуловски пристигнува на распит во Кривичниот суд
Пратеникот Јохан Тарчуловски пристигнува на распит во Кривичниот суд

Пред судот шестемина пратеници ги пречекаа и неколкумина нивни колеги од пратеничката група на ВМРО-ДПМНЕ за да им изразат поддршка.

Шестемина пратеници на ВМРО ДПМНЕ кои се осомничени за учество во настаните во Собранието на 27 април беа изведени пред судија на претходна постапка во Кривичниот суд, откако во петокот Собранието им го симна имунитетот.

Тие се дел од 36-те лица кои Основното јавно обвинителство ги гони за „терористичко загрозување на уставниот поредок и безбедноста“, во врска со настаните од 27 април годинава во Собранието на Република Македонија.

Медиумите во изминатиов период информираа дека на снимките од видео камерите во парламентот се гледа како пратениците Сашо Василевски и Крсто Мукоски ги отвораат вратите со цел толпата да влезе внатре. За останатите четворица пратеници во јавноста се зборуваше дека ја насочувале толпата за време на случувањата од 27 април.

Пратеничката група на ВМРО-ДПМНЕ не присуствуваше на пленарната седница на која им беше одземен имунитетот на пратениците, оценувајќи дека тоа е „политичка фарса, чија единствена цел е реваншизам, сеење омраза и уништување на сите оние кои што мислат различно“.

Претседателот на Собранието Талат Џафери веднаш по завршувањето на пленарната седница ги потпиша одлуките за симнување на имунитетот на шестемина пратеници од коалицијата ВМРО-ДПМНЕ и тие беа проследени до Кривичниот суд.

  • 16x9 Image

    Мирјана Спасовска

    Родена е во Скопје 1971 година. Од 1996 та година работи во телевизиската кука А1. Од 1998 та година е во телевизијата Телма каде за централно информативната емисија известува за дневни социјално - општествени теми.  Во Радио Слободна Европа е од 2002 та година.  

XS
SM
MD
LG