Првоосомничениот за убиството на малолетното девојче Вања Ѓорчевска и велешанецот Панче Жежовски, вечерва (15 мај) со авионски лет е екстрадиран во Северна Македонија од Турција.

Од скопскиот аеродром, со полициска придружба, тој директно беше транспортиран во затворот „Скопје“ во Шуто Оризари бидејќи веќе има решение за 30-дневен притвор.

Ова следува откако на 30 април македонските власти добија официјално известување од турска страна дека е одобрена екстрадицијата.

По одобрувањето, екстрадицијата се спроведе во организација на Министерството за внатрешни работи.

Во притвор во „Шутка“ веќе се наоѓаат тројца осомничени соизвршители за грабнувањата и свирепите убиства на двете жртви.

Видете и ова:

Турција одобри екстрадиција на Љупчо Палески- Палчо

Од безбедносни причини, од затворската управа за Радио Слободна Европа посочија дека Палевски ќе биде издвоен од останатите притвореници во посебна ќелија. За него ќе бидат задолжени само одреден дел од затворските чувари што значи дека останатите припадници на затворската полиција ќе немаат пристап до него. Во тој дел од затворот, објаснуваат оттаму, може да се влегува само со електронска партичка.

Исто така, велат од затворот за РСЕ, за осомничениот ќе се определи посебно време кога ќе може сам да излегува во затворскиот двор, ќе посетува посебна бања со придружба на чувари, ќе се проверува храната што ќе ја добива итн.

Палевски, како првоосомничен, избега од Северна Македонија преку Србија и Бугарија и стигна до Турција. На 5 декември турската полиција го уапси во градот Балибекир.

Видете и ова:

Обвинителство не открива што покажала обдукцијата на Вања и Панче

Кривичните дела за кој е осомничен се „грабнување“ и „убиство на свиреп начин“. Предметот е се уште во фаза на истрага, но се очекува наскоро таа да заврши и да биде поднесено обвинение.

Двете жртви, 14-годишната Вања и велешкиот фризер Панче, беа пријавени за исчезнати на 24 и 27 ноември лани. Нивните беа пронајдени мртви во близина на Велес и Скопје на 3 декември.

Во овој случај како петоосомничен се јавува и таткото на Вања. Тој се гони за помагање во делото грабнување. Тој во моментов се наоѓа во домашен притвор.

За помагање во бегството на Палчо, пак, е осомничено едно лице кое се наоѓаше во притвор, но на 12 март по барање на обвинителството му беше укината оваа мерка и наместо неа му беа определени мерки на претпазливост – забрана за напуштање на живеалиште, одземање патна исправа и обврска за јавување во суд.

Без договор за прашањето за употребата на српскиот динар заврши и денешната (15 мај), седма по ред средба во Брисел меѓу главните преговарачи на Косово и Србија.

Косовскиот главен преговарач рече дека ќе нема повеќе средби во рамките на дијалогот на оваа тема. Европската унија потврди дека нема волја на страните да постигнат компромисно решение.

„Средбата пропадна затоа што немаше подготвеност од српската страна да се разговара за предлогот на (Мирослав) Лајчак [европскиот пратеник за дијалог]. Нивната позиција денес назадувала во споредба со претходните три состаноци“, изјави косовскиот преговарач Бесник Бислими на крајот од состанокот кој траеше повеќе од осум часа.

Видете и ова:

Средба меѓу Косово и Србија за динарот во среда во Брисел

Главниот преговарач на Србија, Петар Петковиќ, одговорноста за неуспехот на преговорите за динарот ја префрли на косовската страна.

Но, призна и дека Србија дошла со нови предлози.

„Иако нашата страна повторно беше конструктивна, иако излеговме со нови предлози, покажавме дека сакаме договор. Излеговме со шест нови предлози“, рече Петковиќ.

На средбата, Косово и Србија требаше да се договорат за компромисниот предлог што го даде европскиот претставник Мирослав Лајчак.

Петковиќ рече дека Белград не ја затворил вратата за понатамошни разговори, бидејќи Србија, како што посочи, сака решение зашто без него „на Србите на Косово им е потешко“.

Ова беше седма средба за динарот која пропадна бидејќи Приштина и Белград не успеаја да најдат заеднички јазик. Целта на овие состаноци беше да се постигне привремено решение за примена на регулативата на Централната банка на Косово, според која од 1 февруари годинава еврото е единствената валута за готовинско плаќање во Косово.

ЕУ жали за исходот од состанокот

„ЕУ жали што денес не беше можно да се постигне договор. ЕУ оценува дека нема подготвеност да се најде компромисен договор во иднина“, се вели во изјавата на портпаролот на Унијата по средбата на преговарачите од Србија и Косово.

Во изјавата од ЕУ, се потврдува подготвеноста на Брисел да свика нова средба на оваа тема, „штом страните покажат волја за изнаоѓање заемно прифатливо решение“.

Како што се наведува во соопштението на ЕУ, меѓу предлозите што ги дала европската страна бил и договор за формирање на нов деловен субјект според косовскиот закон, кој би имал задача привремено да ја распределува финансиската помош за косовските Срби што ја дава Србија.

Видете и ова:

ЕУ: Поради недостаток на дијалог, Србија и Косово со ризик да останат без пари од Планот за раст

Сепак, како што соопшти прес-службата на ЕУ, и покрај тоа што Унијата доставила компромисен предлог, страните не можеле да се договорат за неколку клучни прашања, вклучувајќи го и вкупниот обем на активности што би ги имал тој нов субјект, опфатот на корисници на овој субјект и обемот на финансиска помош од Србија.

„Отсуството на договорен пат за напредок има негативни последици врз секојдневниот живот на косовските Срби и другите заедници низ Косово и е постојан извор на загриженост“, се заклучува во соопштението од ЕУ.

Меѓународната заедница претходно побара од Косово да го одложи спроведувањето на уредбата на Централната банка на Косово и да најде краткорочно преодно решение, бидејќи декретот има влијание врз локалното население на северот на Косово, кое со години прима исплати во динари од буџетот на соседна Србија.

Министрите за европски прашања и за финансии на земјите од регионот и претставниците на Европската комисија на 15 мај во Котор разговараа за спроведувањето на Планот за раст на Европската унија за Западен Балкан, „тежок“ шест милијарди евра.

Средбата беше организирана во пресрет на почетокот на Самитот на ЕУ и лидерите на земјите од регионот, што ќе се одржи во Котор утре (16 мај), а чиј домаќин ќе биде црногорскиот премиер Милојко Спајиќ.

Министрите разговараа и за пристапот до единствената зона за плаќање во евра (СЕПА), за подобрување на трговските и транспортните капацитети меѓу земјите од регионот и членките на ЕУ, како и за подобрување на снабдувањето со критични лекови и за Центарот за дигитални иновации, соопшти Министерството за европски прашања на Црна Гора.

Видете и ова:

Европскиот парламент го одобри Планот за раст за Западен Балкан

На министерскиот состанок учествуваше и генералниот директор за соседство и преговори за проширување на Европската комисија, Герт Јан Купман.

Црногорската министерка за европски прашања Маида Горчевиќ рече дека приоритет на нивната Влада во рамки на Планот за раст се 44 инфраструктурни проекти во областа на образованието, како и забрзување на развојот на инфраструктурата во областа на транспортот и енергетиката.

Нејзината колешка од Србија, Тања Мишчевиќ, посочи дека се благодарни на Брисел за сумата што ја издвојува преку Планот за раст, нагласувајќи дека „парите се помалку важни во споредба со тоа што ќе се забрзаат европските интеграции“.

„Западен Балкан оди во вистинска насока“, рече Мишчевиќ.

Албанскиот министер и главен преговарач, Мајлинда Дука, смета дека е важно граѓаните и економијата да ги разберат придобивките од овој процес, со цел да се зголеми поддршката за европската интеграција.

„Сакаме зборовите на хартија да се преточат во дело. Затоа ни е потребна синергија, на национално, регионално и ниво на ЕУ“, рече Дука.

Видете и ова:

Вархеји: Планот за раст може да ги удвои на економиите на Западен Балкан

За нејзиниот колега, министерот за финансии Ервин Мета, видлив е напредокот на земјите од регионот во процесот на донесување регулативи и приближување кон единствениот европски пазар.

Од Северна Македонија на состанокот учествуваа вицепремиерот за европски прашања Бојан Маричиќ и заменик-министерот за финансии Филип Николовски.

Маричиќ посочи дека смета оти постои високо ниво на посветеност на реформите.

„Планот за раст нема да биде само уште една убава идеја, туку ќе имаме реални придобивки, а граѓаните ќе ги почувствуваат придобивките уште пред формалното членство во ЕУ“, рече Маричиќ.

Николовски, пак, порача дека Планот за раст е значајна алатка и сите земји треба да вложат максимални напори да го искористат.

На средбата присуствуваа и заменик-министерот за финансии, труд и трансфер на Косово, Авни Зогиани и советникот на министерот за финансии и трезор на Босна и Херцеговина, Жељко Јањетовиќ.

Присутни беа и претставници на Секретаријатот на Централноевропскиот договор за слободна трговија, Транспортната заедница, Енергетската заедница, Светската банка, Европската банка за обнова и развој, Европската инвестициска банка…

Видете и ова:

Многу пари, но и многу услови во европскиот план за Западен Балкан

Планот за раст за Западен Балкан ќе биде тема на самитот на лидерите на земјите од регионот и претставниците на ЕУ и САД закажан за утре. Најавено е присуство на еврокомесарот за проширување Оливер Вархеји и помошникот државен секретар на САД за европски и евроазиски прашања, Џејмс О’Брајан.

Претходно овој месец, Советот на ЕУ одобри план вреден шест милијарди евра за поддршка на земјите од Западен Балкан, чија цел е да се забрзаат реформите и економскиот раст во регионот.

Од таа сума, две милијарди евра ќе бидат во форма грантови, а четири милијарди како поволни заеми гарантирани од ЕУ.

Претходните самити на лидерите од Западен Балкан и ЕУ се одржаа во Скопје и Тирана.

Соединетите Американски Држави (САД) го осудуваат нападот врз словачкиот премиер Роберт Фицо, изјави американскиот претседател Џо Бајден.

Тој порача дека нивната амбасада во Братислава е подготвена да и помогне на Владата на Словачка.

Бајден во изјавата објавена на веб-страницата на Стејт департментот наведува дека е вознемирен од веста за нападот.

Видете и ова:

Загриженост и осуда од европските лидери по пукањето кон Фицо

„(Првата дама на САД) Џил и јас се молиме за негово брзо закрепнување, а нашите мисли се со неговото семејство и народот на Словачка. Го осудуваме овој ужасен чин на насилство“, рече Бајден.

„Американската амбасада е во близок контакт со Владата на Словачка и тие се подготвени да помогнат“, додава американскиот претседател.

Покрај од САД, реакции со осуди стигнаа и од лидерите на НАТО и ЕУ, како и бројни европски држави.

Видете и ова:

Словачкиот премиер сè уште е на операција по обидот за атентат

Животот на Фичо е во опасност откако беше застрелан со огнено оружје.

Инцидентот се случи во градот Хандлова, пред тамошниот Дом на културата, каде Фицо имаше закажано средба со симпатизери.

Полицијата го приведе осомничениот.

САД брзаат да стигне воена помош од 2 милијарди долари за украинските сили додека тие се борат да го запрат рускиот напредок во севоисточкиот регион Харкив, вели американскиот државен секретар Ентони Блинкен.

Блинкен, кој ова го изјави на заедничка прес-конференција украинскиот министер за надворешни работи на Украина Дмитро Кулеб на 15 мај во Киев, рече дека средствата се наменети за обезбедување оружје за украински војници. Тие се дел од неодамна одобрениот пакет американска воена помош за Киев од 61 милијарда долари.

Пакетот беше одобрен пред неколку недели по повеќемесечни одложувања поради политичките расправии во американскиот Конгрес.

Видете и ова:

Како украински функционери од ерата на Јанукович истурија милиони во недвижности во Дубаи

Најавата на Блинкен дојде откако претходниот ден украинскиот претседател Володимир Зеленски повика да се забрза испораката на очајно потребните системи за воздушна одбрана Патриот, особено во и околу Харкив.

„Ние брзаме со муниција, оклопни возила, проектили и противвоздушна одбрана со цел тие да стигнат до првите борбени линии“, рече Блинкен, додавајќи: „За секој кој е во искушение да се обложи против Украина, немојте. Тоа ќе биде голема грешка“.

Блинкен, кој посети локална пицерија и настапуваше како гитарист во подрумски бар во главниот град, рече дека билатералниот безбедносен договор со Украина би можел да биде потпишан во наредните недели бидејќи повеќето од, како што рече, „напорната работа“ во преговорите веќе била завршена.

„Заедно поминавме низ времиња на искушенија, целосно сум уверен дека заедно ќе ги надминеме и овие тешки моменти“, рече Блинкен.

Високиот американски дипломат рече дека претседателот Џо Бајден би можел да се сретне со Зеленски за неколку недели и изрази силна американска поддршка за мировната конференција во Швајцарија што треба да се одржи следниот месец.

Блинкен рече дека иако САД не се за тоа Украина да користи американско оружје за напади внатре во Русија, тоа на крај од денот е одлука на Киев.

Ние не охрабрувавме ниту овозможивме напади надвор од Украина, но на крајот Украина треба да донесе одлуки за тоа како да се бори“, рече Блинкен.

Поради тешкотиите со кои се соочуваат украинските сили на бојното поле поради недостаток на оружје и муниција, Зеленски ги одложи сите свои закажани патувања во странство.

Видете и ова:

Зеленски ги одложи патувањата во странство поради „тешката“ ситуација на фронтот

Тој требаше да ги посети Шпанија и Португалија и да потпише билатерален безбедносен договор во Мадрид со шпанскиот премиер Педро Санчез на 17 мај. Требаше да се сретне и со шпанскиот крал Фелипе.

На бојното поле, пак, Русија се пробива кон северот на регионот Харкив, а украинската војска на 15 мај соопшти дека презема чекори за да ги спречи руските сили да влезат во северниот дел на градот Вовчанск, кој е на само 5 километри од руската граница.

Вовчанск стана фокус на најновата руска офанзива додека силите на Кремљ се обидуваат да заземат квартови источно од Харкив, вториот по големина град во Украина, со население кое пред војната броеше околу 1,4 милиони.

Московските трупи влегоа во регионот Харкив на 10 мај, отворајќи нов североисточен фронт. Напредокот на руските сили може да доведе до повлекување на дел од ослабените сили на Киев од исток, каде што Русија полека напредува.

Аналитичарите велат дека Русија се обидува да добие максимален импулс на бојното поле пред да пристигне новиот бран воена помош за Киев од САД и европските сојузници.

Градоначалникот на Харкив, Ихор Терехов, на 15 мај за украинската телевизија изјави дека и покрај постојаното руско гранатирање, во моментов нема планови за евакуација на градот.

Сепак, Министерството за вонредни ситуации на Украина објави дека околу 8.000 луѓе се евакуирани од областа.

Во меѓувреме, две лица загинаа во руски напад на градот Днипро во Днепропетровската област 15 мај, објави на Телеграм шефот на регионалната администрација Серхиј Лисак.

Исто така, Михаил Развозаев, гувернер на Крим, назначен од Русија, рече дека бил одбиен „масовен“ украински ракетен напад над градот Севастопол рано наутро на 15 мај.

Видете и ова:

Русија тврди дека одбила „масовен“ украински напад врз Крим

Развозаев посочи дека неколку проектили биле соборени над морето и во областа на аеродромот Белбек. Нема податоци за жртви.

Руското Министерство за одбрана соопшти дека воздушната одбрана соборила 10 ракети со долг дострел над Крим.

Ваквите тврдења, засега не може да се потврдат од независни избори.

Во последните недели, Москва без да посочи докази ја обвинува Украина, дека почнала да користи американски тактички ракетни системи.

Бројни реакции на загриженост и осуда за вооружениот напад врз словачкиот премиер Роберт Фицо, стигнаа од европските лидери.

Фицо денеска (14 мај) попладне беше застрелан со неколку куршуми во словачкиот град Хандлова, каде имаше средба со симпатизери. Тој во моментов се бори за живот, а Министерството за внатрешни работи нападот го квалификуваше како „обид за атендат“.

Меѓу првите кои реагираа беа претседателот на Европскиот совет Шарл Мишел и претседателката на Европската комисија Урсула фон дер Лајен.

„Ништо никогаш не може да го оправда насилството или вакви напади“, напиша Мишел на мрежата Икс кој посочи дека е шокиран од веста.

„Моите мисли се со премиерот и неговото семејство“, додаде претседателот на Европскиот совет.

Видете и ова:

Словачкиот премиер сè уште е на операција по обидот за атентат

Фон дер Лајен порача дека силно го осудува напад.

„Ваквите акти на насилство немаат место во нашето општество и ја поткопуваат демократијата, нашето најскапоцено општо добро“, наведе претседателката на ЕК.

Генералниот секретар на НАТО, Јенс Столтенберг, исто така, рече оти е шокиран и згрозен од нападот.

„Му посакувам сила за брзо закрепнување. Моите мисли се со Роберт Фицо, неговите сакани и народот во Словачка“, напиша Столтенберг на мрежата Икс.

Германскиот канцелар Олаф Шолц во реакција на мрежата Икс рече дека е „длабоко шокиран од веста за кукавичкиот напад“.

„Насилството не смее да постои во европската политика. Во овие часови моите мисли се со Роберт Фицо, неговото семејство и граѓаните на Словачка“, напиша германскиот канцелар.

Видете и ова:

Кој е Роберт Фицо?

Украинскиот претседател Володимир Зеленски порача дека Украина силно го осудува чинот на насилство против шефот на соседната партнерска држава.

„Треба да се нарпави сè за да се осигура дека насилството нема да стане правило во ниту една држава или област“, рече Зеленски.

И премиерот на Полска, Доналд Туск рече дека веста е „шокантна“ и неговите мисли се со Фицо.

Шефот на унгарската влада, Виктор Орбан, исто така, е меѓу првите кои реагираа.

„Длабоко сум шокиран од грозоморниот напад врз мојот пријател, премиерот Роберт Фицо. Се молиме за неговото здравје и брзо закрепнување! Бог да го благослови него и неговата земја!“, напиша унгарскиот премиер Виктор Орбан.

Словачкиот популистички премиер Роберт Фицо беше ранет во пукање на 15 мај и пренесен во болница. Инцидентот се случил во градот Хандлова, на околу 150 километри североисточно од главниот град, јавија словачките медиуми.

Како шокантна, веста за пукањето ја оцени и чешкиот премиер Петр Фиала.

„Посакувам премиерот да оздрави што побрзо. Не смееме да толерираме насилство, тоа не смее да има место во општеството“, изјави Фиала.

Шпанија е згрозена и огорчена поради нападот на Фицо, рече и шпанскиот премиер Педро Санчез.

„Шпанија е со Роберт Фицо, неговото семејство и словачкиот народ во ова исклучително тешко време. Ништо не може да го оправда насилство“, напиша Санчез на мрежата Икс.

Реакции и од Западен Балкан

Осуда стигна и од земјите од регионот на Западен Балкан.

Српскиот претседател Александар Вучиќ наведе дека е шокиран од атентатот над Фицо. Тој додаде дека станува збор за негов, но и голем пријател на Србија.

Брзо закрепнување посака и косовскиот премиер Албин Курти.

„Мислите ни се со неговото семејство и народот на Словачка. Нема место за насилство во демократијата“, вели Курти.

Од Северна Македонија засега се огласи лидерот на ВМРО-ДПМНЕ и извесен мандатар за формирање на новата влада Христијан Мицкоски, кој порача дека „силно го осудува ужасниот обид за атентат“.

„Ваквите акти на насилство се напад врз демократските вредности што ги негуваме и никогаш не смеат да бидат толерирани“, порача Мицкоски.

Премиерот Фицо веднаш по пукањето беше однесен во болницата во Хандлова од каде со хеликоптер е пренесен во болница во Банска Бистрица, град во централна Словачка. Во објава на неговиот официјален профил на Фејсбук беше посочено дека животот му е во опасност откако бил погоден со неколку куршуми.

Израелската влада едногласно ја отфрли одлуката на Генералното собрание на Обединетите нации за признавање на палестинската држава, соопшти кабинетот на израелскиот премиер Бенјамин Нетанјаху.

„Нема да им дозволиме да формираат терористичка држава од која ќе можат да не нападнат уште повеќе“, рече Нетанјаху.

Како што јави Ројтерс, тој порачува дека никој нема да го спречи Израел да го искористи своето основно право да се брани.

„Ниту Генералното собрание на ОН, ниту кој било друг ентитет“, додаде израелскиот премиер.

Видете и ова:

Генералното собрание на ОН ја поддржа палестинската кандидатура за членство

На 10 мај, Генералното собрание на Обединетите нации (ОН) со 143 гласа „за“, девет „против“ и 25 „воздржани“, гласаше дека Палестина е подобна за членство и му препорача на Советот за безбедност „поволно повторно да го разгледа ова прашање“.

Гласањето беше глобален тест за поддршката на палестинскиот обид за полноправно членство во ОН – тоа би значело и признавање на палестинската држава откако САД ставија вето за истото прашање во Советот за безбедност на ОН минатиот месец.

Палестинскиот притисок за полноправно членство во ОН доаѓа по седум месеци војна во Појасот Газа меѓу Израел и палестинските милитанти од Хамас, кои САД, ЕУ и некои други земји го сметаат за терористичка организација, како и во период кога Израел ги проширува населбите на окупираниот Западен Брег, што ОН ги сметаат за незаконски.

Резолуцијата која на 10 мај беше усвоена во Генералното собрание им дава на Палестинците некои дополнителни права и привилегии од септември 2024 година, како што е место меѓу членките на ОН во собраниската сала, но не и право на глас.

Палестинците во моментов се „држава набљудувач што не е членка“, што е де факто признавање на државноста доделена од Генералното собрание на ОН во 2012 година, пишуваше АП.

Еден ден пред гласањето, Палестинската мисија во ОН во Њујорк во писмо до земјите-членки на ОН наведе дека усвојувањето на Резолуцијата за поддршка на полноправното членство во ОН ќе биде инвестиција во зачувување на долго бараното решение за две држави.

Видете и ова:

Блинкен со остра критика за воените планови на Израел

Со мисијата во ОН раководи палестинската власт, која има ограничена самоуправа на Западниот Брег.

Хамас, кој е прогласен за терористичка организација од САД и ЕУ, ја собори палестинската власт во Газа во 2007 година и усвои своја повелба која повикува на уништување на Израел.

Оваа милитантна група, изврши напад врз Израел на 7 октомври по што следуваше израелската офанзива врз Газа.

Обединетите нации долго време ја поддржуваат визијата за две држави кои опстојуваат една до друга во безбедни и признати граници.

Палестинците сакаат своја држава на Западниот Брег, Источен Ерусалим и Појасот Газа, сите територии што Израел ги освои во војната со соседните арапски држави во 1967 година.

Мисијата на САД во Обединетите нации, пак, претходно соопшти дека „останува ставот дека патот до државност за палестинскиот народ е преку директни преговори“.

Импровизиран кревет и забоден нож биле пронајдени во подземна гаража кај паркинг местото на претседателката на Уставниот суд Добрила Кацарска.

Случајот е пријавен во полициска станица, а потврда стигна и од Уставен.

„На 14.05.2024 во СВР Скопје од страна на Д.К. било пријавено дека на подрачјето на Центар во подземни гаражи, во нејзино гаражно место, биле пронајдени импровизиран кревет и кујнски нож кој бил забоден на прекинувачот за светло“, велат од МВР.

За случајот известен е и јавен обвинител, а подигнати се и предмети за вештачење.

Портпаролката на Уставниот суд, Христина Беловска, попладнето на 15 мај посочи дека Кацарска вчера пријавила евентуално загрозување на сигурноста, но дали станува збор за закана или нешто друго, рече, треба да утврдат надлежните.

„Она што можам да го потврдам е нејзината пријава со оглед дека на нејзиното паркинг место во подземна гаража од затворен тип, во која има околу 50 други автомобили наоколу, е пронајден забоден нож во прекинувачот за струја кој се употребува за да се осветли делот над нејзиниот автомобил“, рече Беловска.

Видете и ова:

Агелер - Мора да престанат притисоците врз судството

Ова не била единствената закана за Кацарска. Беловска посочи дека досега имало повеќе непријатности во континуитет или како што рече, „некои ситни инциденти и закани на социјалните мрежи упатени лично кон судијката коишто закани сè уште се достапни“.

„Меѓутоа, претседателката не сакаше да се реагира за ниту еден од тие инциденти се до моментот од вчера кога беше пронајден нож на нејзиниот личен имот“, рече портпаролката на Уставен.

Во изминатите 24 часа, полицијата регистрираше уште еден инцидент на паркинг место во Скопје. Во текот на ноќта било запалено возило во сопственост на затворот „Идризово“ што го користел директорот на установата, Зоран Јовановски.

„На 15.05.2024 околу 03.35 часот во полициска станица било пријавено дека на подрачје на Кисела Вода било опожарено паркирано патничко возило ’фолксваген пасат‘, сопственост на Казнено – поправната установа Затвор Идризово, кое било паркирано од З.Ј. Од пожарот бил зафатен и дел од фасада на зграда и предмети на балкони на долните катови од зградата. Пожарот бил изгаснат од противпожарна екипа, а повредени лица нема. Се преземаат мерки за расчистување на случајот“, соопштија од МВР.

Видете и ова:

Одбраната на осудените за „27 април“ бара да се укине пресудата

Кацарска пред да стане судијка и претседателка на Уставен, беше судијка во Основниот кривичен суд Скопје каде судеше неколку предмети кои изминатите години беа во фокусот на јавноста. Меѓу нив, неколку иницирани од поранешното Специјално јавно обвинителство (СЈО), како и најмасовниот случај со упадот во Собранието на 27 април 2017 година во кој за терористичко загрозување на уставниот поредок и безбедноста беше донесена осудителна пресуда за 16 лица – повеќето осудени над 10 години затвор.

Јовановски, пак, пред да стане директор, беше судија поротник, а „27 април“ е еден од предметите во кои тој беше дел од поротата.

На новинарско прашање до Уставен, дали има индиции дека заканите кон Кацарска и запалениот автомобил на Јовановски се поврзани, портпаролката на судот рече дека од нејзината позиција „не може да даде таква паралела“ и „прашањето треба да се упати на друга адреса“.

Украинскиот претседател Володимир Зеленски ги одложи сите претстојни патувања во странство, што е знак за тешкотиите со кои се соочуваат украинските сили додека се борат да го спречат рускиот напредок во североисточниот регион Харкив.

Зеленски требаше да ги посети Шпанија и Португалија во наредните денови и да потпише билатерален безбедносен договор во Мадрид со шпанскиот премиер Педро Санчез на 17 мај. Тој требаше да се сретне и со шпанскиот крал Фелипе.

„Володимир Зеленски наложи да се одложат сите меѓународни настани со него, закажани за наредните денови и да се координираат новите датуми. Благодарни сме на нашите партнери за нивното разбирање“, напиша на 15 мај на Фејсбук секретарот за печат на Зеленски, Серхи Никифоров.

Не беше наведена конкретна причина за одложувањето, но Никифоров напиша дека Зеленски на 15 мај одржал состанок со неговите воени команданти, вклучително и главниот командант, генерал полковник Олександар Сирски, на кој се разговарало за ситуацијата во регионот Харкив.

Русија притиска напред кон северот на регионот Харкив, а украинската војска на 15 мај соопшти дека презема чекори за да ги спречи руските сили да се движат во северниот дел на спорниот град Вовчанск, кој се наоѓа на само 5 километри од руската граница.

Вовчанск стана фокусна точка на најновата руска офанзива бидејќи силите на Кремљ се обидуваат да заземат населби источно од Харкив - вториот по големина град во Украина, со население од околу 1,4 милиони луѓе пред војната.

Московските трупи влегоа во регионот Харкив на 10 мај, отворајќи нов североисточен фронт.

Видете и ова:

Во напад на Харкив двајца повредени, изгорени неколку куќи

Напредокот може да повлече дел од исцрпените сили на Киев од исток, каде што Русија полека напредува.

Аналитичарите велат дека Русија се обидува да добие максимален импулс на бојното поле пред да пристигне новиот бран воена помош за Киев од САД и европските сојузници на Киев во наредните недели.

Руското Министерство за одбрана на 14 мај соопшти дека го зазело пограничното село Бухруватка, но тврдењето не може да биде независно потврдено. Градоначалникот на Харкив, Ихор Терехов, на 15 мај изјави дека и покрај постојаното руско гранатирање, во моментов нема планови за евакуација на градот.

Судскиот совет ги утврди кандидатските листи за членови на судски совет од Врховниот суд и од Апелационото подрачје Битола. На двете листи има вкупно пет судии.

Со шест гласа за и 5 против, Судскиот совет ја утврди кандидатската листа за член од Врховниот суд на која се кандидатите Цветанка Периќ и Исамедин Лимани.

На кандидатската листа за избор на член на Советот од апелационо подрачје Битола беа утврдени кандидатите Александар Камбовски, Александра Поп Стефанија и Татјана Сусулеска.

Видете и ова:

Судски совет најавува спроведување на препораките на оценската мисија на ЕУ

Советот на денешната седница расправаше за уставноста за утврдувањето и потенцијалниот избор на кандидатот Лимани. Според дел од членовите, постои уставна пречка тој да биде член на Советот бидејќи ќе се наруши правичната застапеност во Судскиот совет.

Според оние кои гласаа за, националната припадност не е пречка за кандидатите да се кандидираат на огласот и со одбивање на истите се дава пример за поделби и директна дискриминација.