Ситуацијата со пожарите сè уште е најкритична во малешевско-пијанечкиот регион. Таму се сконцентрирани и најголем дел од пожарникарите и сите хеликоптери, македонски и српски, како и противпожарниот авион кој пристигна од Романија.
Центарот за управување со кризи информира дека пожарот сè уште е активен на потегот од селото Будинарци кон селото Разловци, и се шири со мала брзина во појас со ширина околу 200 метри и полесно се следи.
Поради дејствувањето на авионот, хеликоптерите се повлечени, а ангажираните екипи се дистанцираат на безбедно растојание, информира попладнево ЦУК.
„Авионот делуваше веќе два пати, останува да направи уште еден налет, а потоа ќе продолжат армиските хеликоптери. За рационализација на времето, за намалување на потребното време за гаснење од хеликоптерите, на лице место, односно на само неколку километри од пожарот однесовме цистерна со керозин, каде што хеликоптерите полнат гориво и нема потреба да летаат до Скопје, со што значително го скративме времето, и воедно на истото место полнат вода, односно во близина полнат вода од базен, за да не се губи време да се оди до вештачките акумулации коишто се малку подалеку. Ова е прво наше искуство со ваков авион, никојпат досега во Македонија не е гаснато со ваков авион, па сè уште е рано да ги кажеме нашите импресии. Се работи за авион Ц-27Ј Спартан којшто носи 6 тони вода“, рече попладнево директорот на ЦУК Стојанче Ангелов.
Пожарот денеска го гаснат пожарникари од Берово, Делчево, Македонска Каменица, Струмица, Штип и Скопје, како и противпожарни екипи кои дојдоа на помош од Бугарија, Словенија и Австрија.
Во гаснењето помагаат и припадници на Армијата, ЦУК, Дирекцијата за заштита и спасување, вработени во шумските стопанства во регионот, ЕВН, како и месното население.
Романски авион на помош за гаснење на пожарите
Центарот за управување со кризи попладнево информира дека во моментов има неколку активни пожари во земајва.
Пожарот кој започна на 2 август година во маалото Пасјак во атарот на делчевското село Нов Истевник е заобиколен од сите страни и се пази да не се прошири. ЦУК информира дека до овој момент опожарена е површина од 1100 хектари борова шума и нискостеблести растенија. Пожарот денеска го гаснеле и два армиски хеликоптери на местата на коишто е најкритично да не се прошири.
Волонтери од Црвениот крст Делчево се на терен и доставуваат вода за пиење на ангажираните во гаснењето на пожарот.
Изгаснат е пожарот на потег меѓу село Криви Дол и Кадрифаково на границата меѓу општините Свети Николе и Штип.
По контрола е ставен пожарот во атарот на селата Дрен – Смолани во прилепско.
Пожарот кај радовишкото село Дамјан е локализиран.
Пожарот кај велешкото село Џидимирци е активен.
Има пожар и во кавадаречкото село Манастирец, и во село Градманци на тромеѓето меѓу Петровец, Велес и Свети Николе.
Министерката за одбрана Радмила Шекеринска утринава соопшти дека хеликоптерите кои учествуваат во гасењето на пожарите во Малешевијата веќе нема да се враќаат во Скопје по гориво, туку полнат на импровизиран хелиодром во близина на Берово.
Компанијата Макпетрол претходно соопшти дека донира 16.500 литри млазно гориво и 8.000 литри дизел на Дирекцијата за заштита и спасување, со цел да помогне во гаснењето на пожарите што ја зафатија земјава. Донацијата е во вредност од 1,5 милиони денари, односно околу 25 илјади евра. Млазното гориво е за хеликоптерите, а нафтата за противпожарните камиони кои учествуват во гаснењето на пожарите.
Премиерот Зоран Заев го прекина годишниот одмор и утринава на Фејсбук објави фотографии од посета на беровското село Будинарци во чија близина има пожар. На фотографиите тој е во придружба на министрите за здравство Венко Филипче, за одбрана – Радмила Шекеринска, за труд и социјала Јагода Шахпаска, како и директорот на ЦУК Стојанче Ангелов.
Во јавноста имаше жестоки реакции зашто премиерот и неколку министри се на одмор додека десетици пожари беснеат низ Македонија, а на помош дојдоа пожарникари и опрема од Србија, Бугарија, Словенија, Австрија, а денеска и од Романија.
Будинарци денеска го посети и лидерот на опозициската ВМРО-ДПМНЕ Христијан Мицкоски. Тој изрази надеж дека во текот на денов пожарот ќе биде ставен под контрола.
