Објавата дека во детската градинка „Павлина Велјанова“ во Кочани има деветмина позитивни на корона вирусот повторно ги предизвикало оние што не веруваат дека вирусот е тука да реагираат со коментари на нашата веб страница. Исни Салиу се чуди: „Не покажувале симптоми, а биле заразени со Ковид-19!!! Ало, лажни тестови имате или намерно го праите ова, каква држава е ова, од 2 милиона ќе праите 3 милиони заразени“. Горан Ордев, пак, му возвраќа: „Исни Салиу, изгледа намерно болни без симптоми од смртоносен вирус 90% се излечија дома, Господ нека ни е на помош од ненормални политичари“. Александар Говрик го подучува: „Па ако си негативен, денес-утре или за неколку дена може да си позитивен“.
Дел од граѓаните продолжуваат да реагираат на долгиот полициски час во Скопје и уште во некои градови и на информациите дека се разгледуваат следните чекори заради зголемениот број новозаразени: „Сѐ е под контрола“ – иронизира Ана Мравчето, а Дамен Карачи коментирал: „Брее, тешки чекори: 700 милиони кредитче, уште глуп народ да ги гласа...“ И Ефтим Ајтарски порачува до надлежните: „... Кој полициски час, беее, алооо, трева пасат луѓето веќе и тие што работиме нека нѐ стават пак заради други неспoсобни суштества“.
Али Ахмети најави дека е дојдено време Албанец да биде премиер, а Зоран Заев порача дека „доколку ДУИ има ваков услов за коалиција за Влада, тогаш нема да биде дел од идната Влада“.
Стевче Стојаноски заклучува: „Овој скроз забега“, а Јонче Солтиров вели: „Човек кој формира влада и растура влада - можно е и ова да се случи“. Но за Санде Трпезаноски „Зоран Заев зборува, се врти и за секунда, пу-пу не важи, најде кој да зборува... “ Виктор Поповски коментира: „Е затоа нема луѓе да излезат на избори“. Но, Никола Драгана Георгиеви со објаснување што е политиката на Ахмети и на Заев: „Овој као провоцира, а другиот као патриот пред избори изиграва...манипулација на луѓето, ама нема ни Албанец, ни Заев, ни Мицко, Јанко Бачев ќе ве тресе годинава....“
И пак некои си го бараат Путин, како Бисерка Молеровиќ, која смета дека „Путин треба да дојде во Македонија. Друго чаре нема“. И потоа одговор од Ремзи Нухиу: „Бисерка, пуста желба неостварлива. НАТО е меѓу нама, ти и Путин можете само во Карпатите“. Александар Гакидов се потсмева: „Што прави карантин и огледало. Све одлепило до даска“.
Владе Ѓоргиески се радува на вестите дека на грчките плажи веќе била дозволена музика и алкохол, па извикува: „Сузуки бузуки јаша илерии!“ И Ѓоле Лјапе Дејановиќ со слична реакција: „Тоооо“, ама Марија Маца Периќ го потсетува: „Ѓоле, тоо, ама непожелни станавме“. Рикардо Ричие ја обвинува власта за тоа, дека била „неспособна“, како што вели и изгледа му се гледа дека „цел Балкан се опоравил“, само ние сме отишле „бестрага“. Анита Сека Петрушевска го потсетува: „Не е до власта, до народот е кој не почитува ништо, власта изгледа требаше да земе стап и како во Индија, друго на културен начин не може“.
