Прекин на преговорите за името побараа неколку илјади граѓани кои денеска излегоа на протест на плоштадот Македонија во Скопје.
Организаторите од движењето „Нашето име е наше право“ велат дека се незадоволни од политиките што ги загрозуваат националните интереси на македонскиот народ.
Граѓаните што беа излезени на протестот велат дека не сакаат влез во НАТО и во ЕУ ако треба да се менува името.
„Не протестираме, туку само си го браниме името. Ние сме против промена на името, само тоа. Никој не го дал, никој не го создал, тоа име е вечно македонско и треба да остане како што е“, вели Борче Кимовски.
„Нашето име ние никој пат не го даваме. Една е Македонија и засекогаш ќе остане Македонија. Не си ја даваме нашата света земја, Македонија е големо име, си го носиме во срцето, си ја сакаме Македонија, ние сме Македонци, ја сакаме Македонија, не ја даваме, ако треба до смрт“, вели Илинка Мирчевска.
„Што ќе ни е НАТО ако немаме име? Ние тогаш безимени ќе бидеме. Џабе ЕУ и НАТО ако сме со друго име, тогаш веќе сме нова држава, нашата Македонија ја нема“, вели Крсте Јордановски.
„Никаква промена на македонското име и за слобода на патриотите од 27 април“, вели Марлена Ајановска.
Организаторите почочуваат дека на протестот излегле многу луѓе и покрај многубројните партиски опструкции и од власта и од опозицијата.
Дел од присутните бараат и ослободување на притворените за насилствата во Собранието на 27 април. Носеа транспаренти со ликовите на Горан Ангелов и Илија Славевски, членови на здружението Андон Јанев Лазов – Ќосето, кои се во притвор поради насилствата од 27 април.
Актерката Арна Шијак, која беше една од водителките на манифестацијата, рече дека името, идентитетот, јазикот, црквата, историјата, традицијата, културата и националниот интерес не може да бидат предмет на залог.
„Наметнатото лудачки брзо темпо по секоја цена да влеземе во клубот на веќе презрената европска криминогена бирократија и нималку нужните воени сојузи, само на наивниот или на злонамерниот може да му звучи добронамерно и исправно. Ниту ЕУ, ниту НАТО не се волшебен портал за пребег во друга димензија“, рече Шијак.
Актерката Камка Тоциновски рече дека власта треба да престане со пропагандата дека има национален консензус и дека преговорите се водат само за промена на името на државата.
„Од нас се бара нешто што никогаш никому не му се случило – да ја видиме смртта на својот народ во текот на нашиот живот“, рече таа.
Освен во Скопје, протести против промена на името се одржуваат во уште 14 градови од дијаспората. Демонстрантите во Скопје преку видео-бимови можеа да ги следат и протестите во другите градови во Европа, Америка, Австралија и во Нов Зеланд.
По завршувањето на говорите присутните почнаа да се разотидуваат, а дел од насобраните уживаа во културно-уметничката програма.
