Достапни линкови

Медиумска, партиска и етничка поделеност и при катастрофи


Дел медиуми на прво место ги ставаат политичките агенди, наместо јавниот интерес. Тие во чекор ги следат политичарите, а поплавените паѓаат во втор план. Друг проблем е и поделеноста по етничка линија во известувањето.

Кој за што е виновен, кој вметнувал провокатори, кој стоел зад негативни извештаи дури и надвор од земјата...

Партиските препукувања се чини добиваат повеќе простор во дел медиуми, а за сметка на тоа катастрофалните последици и услови во кои се наоѓаат граѓаните од најпогодените подрачја паѓаат во втор план.

Место интересот на граѓаните и информирањето, медиумите останаа да ги следат политичките агенди, а место јавниот интерес и во оваа ситуација да го штитат партискиот, коментираат упатените.

„Ние ретко каде можеме да видиме и чуеме граѓанин кој има одредени потреби и сето ова повторно се сведува на одредени политички и партиски пресметки и добивање, за жал, на поени што се базирани на пи-ар, промоција, погрешна информација и спинување“, вели Жанета Трајкоска од Институтот за комуникациски студии.

Таа го потенцира и инцидентот во кој човек што го придружува претседателот на ВМРО-ДПМНЕ Никола Груевски физички нападна волонтер, но голем дел од камерите на македонските медиуми не се вртат за го снимаат настанот, а за него се дозна од бугарската телевизија Нова.

„Таа случка всушност е една многу јасна и трагична слика за тоа какво е македонското новинарство“, вели Трајкоска.

Дополнително застрашувачки и поразително за известувањето на медиумите е и поделбата по етничка линија, вели професорот Сефер Тахири. Па така за едните во втор план падна Арачиново кое е населено со Албанци, а другите ја истакнуваат катастрoфата во албанските етнички средини.

„Има етничка диоптрија во известувањето на медиумите, па така за жал и во дел медиуми на албански јазик имаше известувања дека жртви се десетина Албанци, значи се правеше и таква динстинкција што дополнително зборува за фактот дека медиумите се во тешка ситуација“, вели Тахири.

Работата на новинарите дополнително ја отежнува и не снаоѓањето на надлежните институции во контактите со јавноста односно немањето на кризен штаб кој континуирано ќе информира и ќе одржува прес конференции. Тоа покажува и дека партиските штабови за комуникации функционираат далеку подобро од државните, додаваат упатените.

  • 16x9 Image

    Фросина Димеска

    Родена е 1980 година во Скопје. Со новинарство се занимава од 2004 година кога почнува да работи како постојан дописник на Радио Слободна Европа од Скопје.
    Во периодот од 2008 година до почетокот на 2014 година работи прво како новинар во телевизијата Алсат М а потоа во дневниот весник Нова Македонија.

XS
SM
MD
LG