Руската затворска служба соопшти на 29 ноември дека американски државјанин, Пол Вилан, кој отслужува 16-годишна затворска казна за шпионажа во руска казнена колонија, бил нападнат од друг затвореник. Во руското соопштение е наведено дека нападот бил предизвикан од „политички разлики“, но семејството на Вилан тврди дека најверојатно е поттикнато од антиамериканските чувства.

Руските служби соопштија дека била спречена понатамошна ескалација на конфликтот на 28 ноември, како и дека на поранешниот американски маринец Вилан, кој се здобил со гребнатинка под окото, му била укажана медицинска помош во озлогласената казнена колонија во Мордовија, каде што е затворен.

Поранешниот американски маринец е уапсен во 2018 година во Русија, по што беше осуден по обвиненијата за шпионирање во 2020 година. И тој и американската влада негираат дека 53-годишниот поранешен маринец е шпион.

Администрацијата на Бајден го означи Вилан како „погрешно притворен“, тоа е термин кој фактички вели дека случаите против нив се политички мотивирани, и повика на негово итно ослободување.

Видете и ова:

Блинкен разговарал со поранешниот американски маринец затворен во Русија

Семејството на Вилан, вели дека тој го опишал нападот како „релативно помал“, но дека е „загрижен оти ваквите напади може да се случат во секое време и тоа да ескалира во многу посериозен напад“.

„Пол е цел затоа што е американско и антиамериканското чувство не е невообичаено меѓу другите затвореници“, рекоа тие во соопштението, додавајќи дека Вилан верува дека затворските службеници ја сфаќаат работата „сериозно“.

Вилан, директор за корпоративно обезбедување со седиште во Мичиген, беше уапсен во декември 2018 година додека беше во посета на Москва на свадба на пријател. Русија тврдеше дека Вилан бил фатен со компјутерско УСБ кое содржело доверливи информации.

Вилан, кој има американско, британско, канадско и ирско државјанство, тогаш изјави дека бил „наместен“ затоа што мислел дека УСБ-то што му го дал рускиот познаник содржи фотографии од одмор.

Притворите на Вилан и други Американци доаѓаат во време кога односите меѓу Москва и Вашингтон се на најниска точка од крајот на Студената војна поради целосната инвазија на Кремљ на Украина.

САД ја обвинува Русија дека приведува Американци за да ги користат како опција во пазарење за размена на Руси затворени во Соединетите држави.

Американскиот репортер на Волстрит журнал, Еван Гершкович, беше уапсен за наводно шпионирање, обвинение што тој и весникот жестоко го негираат во март и се уште е во истражен притвор.

Меѓу приведените е и американската новинарка Алсу Курмашева, која работеше за Татарско-башкирскиот сервис на Радио Слободна Европа во седиштето во Прага, која присуствувала на семеен итен случај во нејзиниот роден Татарстан. Таа беше привремено приведена додека го чекаше нејзиниот лет за враќање на 2 јуни каде и беа одземени и двата пасоши и телефонот.

По пет месеци поминати во чекање за одлука за нејзиниот случај, Курмашева беше казнета со парична казна во вредност од 103 долари затоа што не го регистрирала американскиот пасош кај руските власти. Откако ја платила казната, додека чекала да ѝ ги вратат патните исправи, Курмашева била повторно приведена на 18 октомври. Овој пат таа била обвинета за нерегистрација како странски агент, законска ознака што Русија ја користи од 2012 година за да ги етикетира и казнува критичарите на владините политики. Таа се уште е во истражен затвор.

Руската Федерална служба за безбедност (ФСБ) на 29 ноември соопшти дека нејзините службеници привеле жител на северозападниот град Печори под сомнение дека шпионирал за Латвија.

Според разузнавачките служби, осомничениот, чиј идентитет не е откриен, собирал информации за руските вооружени сили лоцирани во областа и имал намера да ги предаде на латвиската амбасада во Москва во замена за латвиско државјанство.

Видете и ова:

Истражување: Руси поврзани со Кремљ вработени во највисокото европско безбедносно тело

Претходно овој месец, судот во Латвија го осуди поранешниот министер за внатрешни работи и поранешен пратеник Јанис Адамсонс на 8 и пол години затвор за шпионирање за Русија.

Украинскиот претседател Володимир Зеленски на 29 ноември се состана со цивилните и воените власти во јужниот украински регион Одеса, кој беше редовна цел на руските напади насочени кон нејзините пристаништа кои се критични за извоз на храна.

„Многу важни прашања се отворени, ситуацијата во Црното Море, противмерките од мините и обезбедувањето на безбедноста на „житниот коридор“. Работата на воздушната одбрана, заштита на Одеса, инфраструктурата на „житниот коридор“ и нашите бригади“, напиша Зеленски на социјалната платформа „Телеграм“.

Зеленски се сретна со украинските војници во областа и им врачи медали и награди за храброст. Тој дополнително се состана со цивилните власти за да разговара за мерките за враќање на животот во Одеса и другите јужни региони во нормала по лошите временски услови кои ја погодија областа, оставајќи најмалку 12 мртви и 23 повредени.

Во меѓувреме, украинскиот министер за надворешни работи Дмитро Кулеба ги повика сојузниците на Киев да ги засилат напорите за зголемување на вооружувањето и муницијата за одбранбената војна на Украина против неиспровоцираната инвазија на Русија.

„За да се осигура стабилноста и безбедноста на целиот европски регион, нејзината одбранбена индустрија мора да го зголеми производството, да се координира и да работи како еден интегрален одбранбен индустриски комплекс на евроатлантската заедница“, истакна Кулеба во воведниот збор на првиот состанок на Советот НАТО-Украина во Брисел на 29 ноември.

Видете и ова:

Истражување: Руси поврзани со Кремљ вработени во највисокото европско безбедносно тело

Советот НАТО-Украина, заедничкото тело во кое Киев и неговите сојузници седат како рамноправни учесници, беше основан на самитот на НАТО во Вилнус во јули.

Претходно овој месец, европските дипломати за Радио Слободна Европа под услов да останат анонимни изразија загриженост на Европската унија дека нема да може да ѝ снабди на Украина милион артилериски куршуми до март следната година, како што вети во пролетта висок претставник на ЕУ за надворешни работи и безбедносна политика, Жозеп Борел.

Претходно, на 29 ноември, руското гранатирање на украинските региони Доњецк и Харкив предизвикаа жртви меѓу цивилите и штета на инфраструктурата, и покрај тоа што украинската воздушна одбрана одби голем напад со беспилотни летала на неколку делови на Украина.

Седум цивили беа ранети во Доњецк во текот на ноќта, изјави вршителот на должноста шеф на регионот Ихор Мороз на 29 ноември. Во регионот Харкив, руското гранатирање предизвика голема штета во текот на ноќта на инфраструктурата, станбените области, административните згради, деловните објекти и образовните објекти, изјави гувернерот на Харкив.

Русија, исто така, лансираше нов бран беспилотни летала врз Украина во текот на ноќта, лансирајќи 21 беспилотно летало од иранско производство и три наведувани ракети КХ-59, се вели во соопштението на украинските воздухопловни сили на почетокот на 29 ноември.

На бојното поле, украинските сили беа ангажирани во 87 блиски битки во изминатите 24 часа, соопшти Генералштабот на војската на Украина во својот дневен извештај на 29 ноември.

Американскиот државен секретар Ентони Блинкен изјави дека никој не сака враќање на конфликтите во регионот на Западен Балкан.

„Кога ја презедов функцијата пред три години, центарот на нашата грижа беше Балканот: Босна и Косово. Едно нешто што не ни треба е враќање на конфликтот на Балканот“, рече Блинкен во Брисел, каде што учествуваше на состанок на министрите за надворешни работи на земјите на НАТО.

Тој нагласи дека Алијансата има клучна улога во помагањето на земјите во регионот да напредуваат на нивниот пат кон членство во Европската Унија (ЕУ) и поширока европска стабилност.

„НАТО долго време го претставуваше столбот на безбедноста на Западен Балкан. Алијансата решително одговори на актерите кои се обидуваат да го дестабилизираат северот на Косово. Како што видовме на почетокот на оваа година, со распоредување дополнителни трупи во КФОР, ја продлабочуваме соработката со силите предводени од ЕУ во Босна и Херцеговина“, изјави американскиот државен секретар.

Видете и ова:

Американскиот државен секретар Блинкен попладне во Скопје

Како „критичен дел од целата дискусија“ за време на дводневниот министерски состанок, тој ја оцени дискусијата за состојбите во Западен Балкан, што се одржа вечерта на 28 ноември.

На 28 ноември, генералниот секретар на НАТО, Јенс Столтенберг, изрази загриженост за растечките тензии во регионот на Западен Балкан и ја потврди подготвеноста на Алијансата да направи се, за да се обезбеди безбедност во регионот.

Неговите изјави доаѓаат по посетата на Западен Балкан, каде што се сретна со највисоките претставници и изрази загриженост за руското влијание во регионот.

Во војната во Украина досега настрадале повеќе од 300 илјади руски војници, соопшти денеска генералниот секретар на НАТО Јенс Столтенберг на прес-конференција по дводневниот состанок на министрите за надворешни работи од Алијансата во Брисел.

„Русија денес е послаба на економски, политички и воен план. Политички, Русија го губи влијанието, не само во Украина, туку и во Кавказ и Централна Азија, станувајќи се позависна од Кина и ставајќи ја својата иднина во рацете на Пекинг. Воено, Русија загуби значителен дел од своите сили - стотици авиони, илјадници тенкови и над 300 илјади жртви. Истовремено, Москва губи економски поради падот на приходите од продажба на горива, поради запленувањето на имотот на руските банки, со прекинот на активностите на повеќе од 1000 компании во земјата, со заминувањето на 1,3 милиони луѓе минатата година“, изјави генералниот секретар.

Видете и ова:

„Триумфот“ на Русија на министерскиот совет на ОБСЕ во Скопје

Сепак според него не треба да се потценува Русија, која ја доведе својата економија во режим на војна.

„Путин има висока толеранција за жртви и Русија не ги променила своите цели во Украина. Во пресрет на зимата, руската страна акумулираше значителни залихи ракети. Гледаме нови руски обиди да ја погоди украинската инфраструктура за да ја задржи Украина во мрак и студ“, додаде Столтенберг.

Во исто време, тој рече дека од почетокот на војната, Украина ги добила битките за Киев, Харков и Херсон. Тој истакна дека во Црното Море, Украинците ја одбиле руската флота и поставиле коридори за извоз на жито.

Според него, НАТО подготвува долгорочна програма за да му помогне на Киев да премине на воена опрема според стандардите на алијансата и целосна компатибилност со сојузничките сили.

Русија објави дека западните земји се обиделе да ги спречат нејзините претставници да присуствуваат на годишната министерска конференција на Организацијата за безбедност и соработка во Европа (ОБСЕ).

Рускиот министер за надворешни работи Сергеј Лавров, поради европските санкции, мораше да побара дозвола за прелетување на воздушниот простор на ЕУ за да присуствува на дводневниот состанок што започнува на 30 ноември во Скопје.

Украина и балтичките земји најавија дека ќе го прескокнат состанокот поради присуството на Лавров, тврдејќи дека Русија треба да биде исклучена поради нејзината офанзива во Украина.

„Гледаме обиди на Западот да стори сé што е можно за да го спречи нормалното учество на нашата земја на оваа средба“, изјави портпаролката на руското Министерство за надворешни работи, Марија Захарова на 29 ноември.

Видете и ова:

Скопје под делумна блокада - Ќе пречека 76 делегации на ОБСЕ

Таа обвини некои земји, без да прецизира кои од нив, дека го загрозуваат „самото постоење на организацијата, само за да ги задоволат нивните амбиции“.

Кога Полска беше домаќин на годишниот состанок минатата година, не му дозволи на Лавров да влезе во земјата, што предизвика реакција од Москва.

Но, Бугарија најави дека ќе го отвори својот воздушен простор за рускиот министер со тоа што ќе направи дипломатски исклучок, што пак предизвика бурни реакции од Украина, Естонија, Летонија и Литванија.

Високиот претставник на ЕУ за надворешна политика и безбедност, Жозеп Борел изјави дека ќе присуствува на состанокот во Скопје, но нема директно да се сретне со Лавров.

Еден член на екипажот загинал, а петмина се водат за исчезнати во несреќата што се случи на 29 ноември во Јапонија, кога се урнал американски воен авион „Оспреј“ во кој имало шест лица, соопшти крајбрежната стража на земјата.

„Крајбрежната стража примила итен повик од рибарски брод во близина на местото на несреќата кај Јакушима, остров јужно од Јапонија“, се вели во соопштението.

Службеник за управување со вонредни ситуации во јапонскиот регион Кагошима, каде што се случи несреќата, изјави дека полицијата добила информација дека леталото „пукало од левиот мотор“.

Оспреј е хибриден авион кој полетува и слетува како хеликоптер, но во лет може да ги ротира своите пропелери и да лета како авион.

Претходно беше објавено дека авионот полетал од воздухопловната станица на американскиот маринци Ивакуни во префектурата Јамагучи и се урнал на пат кон воздухопловната база Кадена во Окинава. Се чини дека Оспреј се обидел принудно да слета на аеродромот Јакушима пред да се урне, рече тој.

Видете и ова:

САД: воен авион се урна врз станбени згради во Вирџинија

Американските и јапонските власти соопштија дека авионот припаѓал на воздухопловната база Јокота во западниот дел на Токио. Претставници на американските воздухопловни сили во Јокота рекоа дека се уште ја потврдуваат информацијата и засега немаат коментар.

Во август, американски Оспреј се урна во близина на брегот на северна Австралија додека превезуваше војници за време на рутинска воена вежба. Во инцидентот загинаа тројца американски маринци.

Друг таков авион се урна во океанот кај јужниот јапонски остров Окинава во декември 2016 година, што ја натера американската војска привремено да ги приземји тие авиони.

Праќањето на авионот Оспреј во Јапонија е контроверзно, бидејќи критичарите велат дека хибридниот авион е подложен на несреќи. Американската војска и Јапонија тврдат дека е безбедно.

Русите на кои им е забрането да патуваат во странство мора да ги предадат своите пасоши во рок од пет дена откако ќе бидат известени за забраната за патување, стои во владиниот декрет од 22 ноември објавен на порталот за официјални правни документи.

Таа мерка треба да стапи на сила на 11 декември, објави Current Time, медиумски проект на руски јазик што го води РСЕ во соработка со Гласот на Америка.

Властите можат да забранат патување во странство на регрути, вработени во Федералната служба за безбедност, лица со пристап до државни тајни и „информации од посебно значење“, како и осудени лица.

Според уредбата, пасошот ќе му биде вратен на регрутот само кога ќе приложи доказ дека го завршил воениот рок или алтернативна служба.

Ревизорката Татјана Димитровска е предложена за претседателка на новиот состав на Државната комисија за спречување на корупцијата.

Собранието ја објави ранг листата за избор на нови членови на ова тело, откако претходните три дена траеше процедурата со интервјуа и бодувањето на кандидатите.

За членови се предложени ревизорите Цвета Ристовска и Зоран Богоевски, вработените во ДКСК Билјана Каракашова-Шулев и Бесник Џемаиљи, судијката Софија Спасова-Медарска и Сервет Демири од ревизијата на претпристапната помош за ЕУ.

Видете и ова:

Сопки на патот до новите „антикорупционери“

Предложените антикорупционери треба да ги изгласаат пратениците на пленарна седница. На должност стапуваат од 8 февруари, бидејќи мандатот на сегашниот состав завршува на 7 февруари.

За новиот состав на ДКСК конкурираа помалку кандидати во споредба со претходниот избор. Интервјуирани беа 41 кандидат.

Државната комисија за спречување на корупција е независно тело кое има за цел да креира антикорупциски политики и мерки, да применува и иницира примена на законите и поттикнува нормативно и институционално јакнење на институциите.

Инаку во последниот извештај на Европската комисија за напредокот на земјава во евроинтегративните процеси, се вели дека Државната комисија за спречување на корупцијата отвори неколку предмети, вклучително и предмети против високи функционери. Комисијата наложи заклучоците од нејзините редовни извештаи целосно да се разгледаат.

Екстремистичката група Хамас е подготвена да го продолжи примирјето за уште четири дена и да ослободи дополнителни заложници заробени во нападот врз Израел во замена за ослободување на Палестинците од израелските затвори, изјави во средата извор близок до оваа организација.

Во исто време, меѓународните посредници работат на продолжување на примирјето во Газа, надевајќи се дека Хамас ќе продолжи да ослободува заложници во замена за ослободување на палестинските затвореници и дополнително одложување во воздушната и копнената офанзива на Израел.

Привременото примирје треба да истече рано наутро во четврток по шестдневното затишје во конфликтот што избувна откако Хамас го нападна јужен Израел на 7 октомври, на што израелските сили одговорија со разорна офанзива во Појасот Газа.

Шеесет израелски заложници и 180 палестински затвореници веќе се ослободени, а повеќе треба да бидат ослободени во среда според договорот.

Во средата Хамас „ги информираше посредниците дека е подготвен да го продолжи примирјето за четири дена“, изјави за АФП извор близок до милитантната група, кој сакаше да остане анонимен.

Според тој аранжман, „движењето би можело да ги ослободи израелските затвореници што ги држат, другите движења на отпорот и другите партии, според условите на постојниот прекин на огнот“, додаде изворот.

Видете и ова:

Клучната дипломатија на Катар во војната меѓу Израел и Хамас

Портпаролот на катарското Министерство за надворешни работи, Мајед Ал Ансари, на прес-конференција во Доха во вторникот изјави дека преговарачите работат на „одржлив прекин на огнот што ќе доведе до понатамошни преговори и конечно до крајот на оваа војна“.

Извор запознаен со разговорите за АФП изјави во средата дека разговорите биле „фокусирани на градење на напредокот на договорот за продолжената хуманитарна пауза и на иницирање понатамошни дискусии за следната фаза од потенцијалниот договор“.

Договорот за прекин на огнот привремено ги прекина борбите што започнаа на 7 октомври, кога милитантите на Хамас во Израел убија 1200 луѓе, главно цивили и киднапираа околу 240 лица. Во следните израелски воздушни и копнени напади, според здравствените власти во Газа под контрола на Хамас, повеќе од 14 500 луѓе беа убиени.

Израел го поздрави ослободувањето на десетици заложници во последните денови и вели дека ќе поддржи продолжување на прекинот на огнот доколку Хамас продолжи да ослободува затвореници.