Вести
Беит Ханун: Израелските трупи се повлекоа од градот
види ги сите денешни вести
Шаленберг: Ги разбирам украинските пријатели што го бојкотираа состанокот, но ОБСЕ ни е потребна за дијалог
ОБСЕ е Организација со 57 земји членки на еднакво рамниште и верувам дека сме добро советувани да ги чуваме правилата, договорени пред повеќе декади и да се однесуваме еднакво кон сите, изјави австрискиот министер за надворешни работи Александер Шаленберг, на пристигнувањето на Министерскиот совет на ОБСЕ во Скопје.
Во однос на откажаните присуства на некои од делегациите поради рускиот министер Сергеј Лавров, Шаленберг рече дека целосно ги разбира, но и дека верува дека ова е организација што ни е потребна за дијалог.
„Целосно ги разбирам, особено украинските пријатели кои одлучија да не присуствуваат, но верувам дека ова е се уште Организација што ни е потребна, не само за односите кои се особено тешки со Русија, но и за централна Азија и Јужен Кавказ. Затоа, потреба ни е оваа платформа за дијалог и ако ја гледате состојбата на глобалните односи верувам дека во иднина, потребата од ОБСЕ ќе биде се поголема, а не помала“, изјави Шаленберг пред почетокот на состанокот.
Шаленберг, во изјава за австриските медиуми пред денешниот Министерски совет на ОБСЕ во Скопје, апелираше до сите држави членки да дадат конкретен придонеси за зајакнување на Организацијата, оценувајќи дека ОБСЕ во моментов е на „апарати за преживување“ и затоа очекува поголема посветеност од сите држави за одржување на ОБСЕ.
Учеството на рускиот министер за надворешни работи Сергеј Лавров на Министерскиот совет во Скопје, за Шаленберг е можност за соочување со агресорот наместо да се избегнува конфронтација. Западните земји, според него, не треба да се плашат од интеракција со Русија.
Тринаесет загинати во пожар во хостел во Казахстан
Во пожар во хостел во центарот на Алмати, во Казахстан, загинаа 13 лица, соопштија властите во четвртокот.
Полицијата во Алмати соопшти дека девет жртви се државјани на Казахстан, додека другите четворица се странци - двајца руски државјани и двајца државјани на Узбекистан, јави казахстанската служба на РСЕ.
Службата за итна помош соопшти дека во хостелот кој се наоѓал на приземјето и подрумот на трикатницата имало 72 лица, од кои голем дел странци.
Причина за смртта е труење со јаглерод моноксид, соопштија властите и додадоа дека е формирана комисија која ќе ги испита причините за пожарот.
Градоначалникот на Алмати, Ерболат Досаев изјави дека според прописите на Министерството за здравство, забрането е сместување на гости во подруми.
Одделот за итни случаи на Алмати соопшти дека хостелот, кој наводно бил отворен пред месец и половина, не добил дозвола за работа. Хостелот бил опремен со аларм за пожар кој се вклучил, но зградата ги немала задолжителните противпожарни апарати.
Еден од луѓето кои престојувале во хостелот, Казахстан од јужниот регион Жамбил, го опишал инцидентот за казахстанскиот информативен портал Тенгрињуз.
„Кога избувна пожарот се вклучи алармот, наоколу имаше чад. Сите трчаа во собите за да ги разбудат другите. Сите трчаа на улица, но јас не можев да го видам пожарот. Имаше седум соби на прв кат, по седум луѓе. Таму живееле главно Казахстанци“, рекол човекот.
Алмати, град со 1,8 милиони жители, беше главен град на Казахстан до 1997 година, но останува главен трговски и културен центар на централноазиската земја.
Примирјето меѓу Израел и Хамас продолжено за уште еден ден
Посредникот Катар соопшти дека Израел и екстремистичката група Хамас се договориле за уште еден ден привремено олеснување.
Преговорите за второто продолжување дојдоа во последните моменти пред крајот на примирјето, со несогласувања во последен момент околу заложниците што Хамас треба да ги ослободи.
„Привременото примирје е продолжено под истите услови како и првото продолжување“, соопшти катарското Министерство за надворешни работи.
Хамас ослободува 10 израелски заложници дневно во замена за 30 палестински затвореници, а Израел дозволува дополнителна помош за Газа.
Продолжувањето ќе им овозможи на преговарачите да продолжат да работат на договори за размена на заложници со затвореници.
Претходно и Хамас објави дека се согласил да го продолжи примирјето со Израел за уште еден, седми ден, пренесе Ројтерс.
Ова доаѓа откако израелските одбранбени сили соопштија дека прекинот на огнот ќе продолжи, без да прецизираат колку долго.
Израелската армија соопшти дека примирјето со Хамас ќе продолжи „во светло на напорите на посредниците да го продолжат процесот на ослободување на заложниците“.
„Ова ќе биде предмет на условите на договорот, се додава во соопштението од израелските одбранбени сили.
Почина американскиот дипломат Кисинџер
Познатиот американски дипломат и научник Хенри Кисинџер, кој остави неизбришлива трага во надворешната политика на САД, почина синоќа на 100-годишна возраст во својот дом во Конектикат, соопшти консултантската компанија „Кисинџер асосиејтс“.
Кисинџер беше дипломат, политиколог, геополитички консултант и политичар кој работеше како државен секретар и советник за национална безбедност во претседателските администрации на Ричард Никсон и Џералд Форд.
Тој беше награден со Нобеловата награда за мир во 1973 година за неговиот придонес во преговорите за прекин на огнот во Виетнам.
Тој е роден во Германија, во баварскиот град Фурт, по завршувањето на Првата светска војна. Неговите родители Евреи, сфаќајќи што може да се следи откако Хитлер дојде на власт, ја напуштија Германија во 1938 година. Пет години подоцна Кисинџер стана натурализиран Американец, веднаш се вклучи во американската армија и како разузнавачки офицер учествуваше во петнеделната Битка за Ардените.
По Втората светска војна, се запиша на Харвард, каде што дипломираше и докторираше и почна да го трасира патот во владините структури.
Почнува министерскиот состанок на ОБСЕ во Скопје
Во Скопје денеска започнува Триесеттиот министерски совет на Организацијата за безбедност и соработка во Европа - ОБСЕ, на кој учествуваат околу 1000 делегати од 57 земји членки на Организацијата и земји партнери.
На најголемиот меѓународно-политички настан организиран во земјава од независноста, присуствуваат шефовите на дипломатиите на најголем број од земјите-учеснички на ОБСЕ - САД, Канада, Велика Британија, министри од земјите-членки на ЕУ и на НАТО, од Медитеранот, Блискиот Исток и Централна Азија.
Состанокот започна со неформалната вечера синоќа (29 ноември) на која меѓу другите, присуствуваа и државниот секретар на САД Ентони Блинкен и потпретседателот на Европската комисија и висок претставник на ЕУ за надворешни работи и безбедносна политика, Жозеп Борел, кои си заминуваа непосредно по вечерата.
Тие се разминаа со шефот на руската дипломатија Сергеј Лавров кој во Скопје пристигна доцна синоќа. Средба на Блинкен со Лавров не беше најавена, а и Борел пред доаѓањето изјави дека нема да разговара со рускиот министер за надворешни работи.
Блинкен во Скопје го пречека премиерот Ковачевски, а имаше средба и со министерот за надворешни работи и претседавач со ОБСЕ, Бујар Османи. На двете средби Блинкен ја потврди американската поддршка за членство на земјава во ЕУ и го истакна придонесот на земјава како НАТО-сојузник.
„Морам да ви кажам колку сме благодарни на вашето претседавање со ОБСЕ во многу тежок период. Завршивте исклучително добра работа, успеавте да ја проширите мисијата на ОБСЕ и покрај значителните пречки. Знам дека бевте подготвени да продолжите, но мило ми е што Малта ја преземе палката“, рече Блинкен.
Тој нагласи дека САД силно ја поддржуваат нашата европска интеграција, работата за зајакнување на демократските институции, за поголема енергетска диверзификација во регионот и пошироко.
„Во сето ова можете да сметате на САД како силен партнер и затоа една од причините поради кои сум тука оваа вечер не е само заради ОБСЕ туку и за Северна Македонија и да покажам колку го цениме партнерството кое го имаме“, нагласи Блинкен кој е првиот државен секретар на САД кој ја посетил земјава.
Борел пак на заедничката прес-конференција со Ковачевски порача дека Министерскиот состанок на ОБСЕ во Скопје ќе биде добра прилика министерот за надворешни работи на Русија Лавров, да чуе директно од учесниците зошто Русија е осудена и изолирана, а потоа ќе може да се врати во Кремљ и да пренесе дека ЕУ и ОБСЕ остануваат обединети во осудувањето на агресивното и незаконско однесување на Русија.
„Вашата одлука да дозволите Лавров да учествува е во согласност со нашата заедничка цел да го одржиме мултилатерализмот жив и Лавров треба повторно да слушне од сите зошто ја осудуваме Русија и зошто ја изолираме. Ова е добра прилика за него да чуе директно од учесниците на овој состанок зошто Русија е осудена и изолирана, а потоа ќе може да се врати во Кремљ и да му каже на господарот на Кремљ дека ЕУ и ОБСЕ остануваат обединети во осудувањето на агресивното и незаконско однесување на Русија. Тоа ќе биде навистина многу корисно од оваа гледна точка“, рече Борел по средбата со премиерот Ковачевски.
За доаѓањето на шефот на руската дипломатија Лавров, земјава и Бугарија времено ги суспендираа санкциите воведени од ЕУ за прелети на руски авиони поради руската агресија на Украина.
По потврденото присуството на Лавров, форумот решија да го бојкотираат министрите за надворешни работи на Украина Дмитри Кулеба и на балтичките земји - Естонија, Летонија и Литванија. Ним синоќа им се придружи и Полска.
Русија константно ја опструира работата на ОБСЕ во која се одлучува со консензус блокирајќи повеќе одлуки што беа од нејзин интерес. Досега неколку пати стави вето на кандидатурата на Естонија за претседавач во 2024 година, го блокираше буџетот на организацијата, стави вето и за теренските мисии во Украина.
Министерскиот совет во Скопје ќе го означи крајот на едногодишното претседавање на Северна Македонија со ОБСЕ. Нов претседавач ќе биде Mалта откако во понеделникот беше постигнат компромис меѓу земјите-членки по ветото од Русија и Белорусија за Естонија.
Министрите за надворешни работи во Скопје ќе разговараат и за прашањето на буџетот на Организацијата, како и за мандатите на четворица високи функционери на ОБСЕ, вклучително и германската дипломатка Хелга Шмид како генерален секретар. Нивните мандати истекуваат на 4 декември, а се уште нема договор дали и кој ќе ги наследи, поради забелешките на Русија и Белорусија.
Министерскиот совет на ОБСЕ ќе го следат над 300 новинари од земјава и од странство. Поради одржувањето на министерскиот состанок, со одлука на Владата, вработените во државната и јавната администрација на територијата на градот Скопје вчера работеа до 12 часот, а денеска е неработен ден како за државната и јавната администрација, и за основните и средните училишта на подрачјето на главниот град. Дел од сообраќајниците низ градот по кои ќе минуваат странските делегации и денеска ќе бидат затворени за сообраќај.
Рускиот шеф на дипломатијата Лавров пристигна во Скопје
Руското министерство за надворешни работи соопшти дека, доцна синоќа (29 ноември) на Меѓународниот аеродром „Скопје“ слетал авионот на шефот на руската дипломатија Сергеј Лавров. Лавров бил пречекан од рускиот амбасадор во земјава Сергеј Баздникин.
Рускиот шеф на дипломатијата ќе присуствува на Триесеттиот министерски совет на Организацијата за безбедност и соработка во Европа - ОБСЕ, на кој учествуваат околу 1000 делегати од 57 земји членки на Организацијата и земји партнери.
На најголемиот меѓународно-политички настан организиран во земјава од независноста присуствуваат шефовите на дипломатиите на најголем број од земјите-учеснички на ОБСЕ - САД, Канада, Велика Британија, министри од земјите-членки на ЕУ и на НАТО, од Медитеранот, Блискиот Исток и Централна Азија.
Шефот на руската дипломатија пристигна во Скопје по завршувањето на неформалната вечера на министрите за надворешни работи и шефовите на делегации на земјите членки на ОБСE. На вечерата, меѓу другите, присуствуваше и американскиот државен секретар Ентони Блинкен, кој пристигна во Скопје во среда попладне. Веднаш по нејзиното завршување, околу 21 часот, шефот на американската дипломатија замина од земјава, во посета на Израел.
Неформална вечера на Министерскиот совет на ОБСЕ во Скопје
Во Скопје вечерва ( на 29 ноември ) почна неформалната вечера на министрите за надворешни работи кои учествуваат на 30. Министерски совет на Организацијата за безбедност и соработка во Европа - ОБСЕ. Домаќин е македонскиот шеф на дипломатијата и претседавач на ОБСЕ Бујар Османи.
Тема на која ќе разговараат шефовите на делегациите од земјите членки на ОБСЕ и држави партнери е воената агресија врз Украина и потребата од функционална Организација во време на конфликти и зголемени тензии.
На вечерата присуствуваат министри за надворешни работи на САД, на ЕУ, на земјите членки на ЕУ, Велика Британија, на земјите партнери од Медитеранот, Блискиот Исток и од Азија.
Американскиот државен секретар Антони Блинкен и потпретседателот на Европската комисија и висок претставник на ЕУ за надворешни работи и безбедносна политика, Жозеп Борел си заминуваат по оваа средба.
Рускиот министер за надворешни работи Сергеј Лавров, според најавите од дипломатски извори ќе пристигне подоцна вечерва во Скопје.
Блинкен и Борел нема да се сретнат со Лавров во Скопје. Претходно Борел од говорницата во македонската Влада порача дека добро е Лавров повторно да ги слушне пораките од учесниците на состанокот на ОБСЕ зошто Русија е санкционирана и изолирана.
„Ова е добра прилика за него да слушне од учесниците на овој состанок зошто Русија е осудена и изолирана а потоа ќе може да се врати во Кремљ, и да му каже на господарот на Кремљ дека ЕУ и ОБСЕ остануваат обединети во осудувањето на агресивното и незаконско однесување на Русија“, изјави Борел.
Северна Македонија привремено ја укина забраната за руски летови за да ѝ дозволи на руската делегација да присуствува на самитот на ОБСЕ, иако севкупните санкции за другите летови остануваат во сила.
Брисел го затвори воздушниот простор за руски летови неколку дена откако Москва ја започна својата војна против Украина во февруари 2022 година. Истото го направи и Северна Македонија која претендира да се приклучи на блокот. Но, Лавров беше поканет да учествува на Самитот на ОБСЕ откако тоа го дозволи македонското МНР, а Бугарија го отвори воздушниот простор за авионот на Лавров.
Борел очекува дека на 30-от Министерски самит на ОБСЕ во Скопје кој се одржува од 30 ноември до 1 декември ќе се донесат клучни одлуки за следниот претседавач и за буџетот на организацијата.
На најголемиот политичко-дипломатски настан што се случил во државава од осамостојувањето, ќе учествуваат 76 делегации од 57 земји членки и држави партнери на Организацијата.
Ковачевски: Лидерска средба в понеделник
Лидерска средба за договор за изборите закажа премиерот Димитар Ковачевски за в понеделник, 4 декември. На лидерската треба да учествуваат претставници на сите парламентарни политички партии и претседателот на Парламентот Талат Џафери. Ковачевски ја најави лидерската на заедничката – прес конференција на 29 ноември со шефот за надворешна политика на Европската унија, Жозеп Борел, кој е во Скопје.
Поканата за учество на лидерската средба Ковачевски ќе ја испрати утре.
„Ќе се разговара за евроатланските интеграции на земјата, за одржување на редовни претседателски и парламентарни избори и за измените на Изборниот законик“, изјави премиерот Димитар Ковачевски.
Борел на оваа прес конференција меѓу другото порача дека европскиот пат на земјата треба да биде пред и над партиските превирања.
„ Ако сакате да одите по патот на ЕУ мора да го завршите процесот на усвојување на уставните измени и да напредувате во клучните реформи, тоа е во интерес на сите граѓани на оваа земја. Тоа не е нешто што ќе донесе корист на една политичка партија, туку корист за целиот народи и за Северна Македонија како земја. Се надевам дека со носењето на новиот деловник за работа, со меупартиска поддршка, тоа е добар преседан, и се надевам дека ќе следат понатамошни позитивни чекори за ова Собрание и за наредното Собрание по изборите секако, кога и да се оддржат тие“ изјави Борел.
Власта и опозицијата имаа различни мислења за терминот за одржување на претседателските и на парламентарните избори, кои треба да се одржат следната година. Опозицијата бара тие да се одржат во ист термин, а власта беше на став да бидат одвоени. Но во изминатите недели има најави дека можно е да бидат во исто време.
Претседателот на Собранието, Талат Џафери на 27 ноември изјави дека според најавите и претпоставената динамика, ако парламентарните и претседателските избори би се одржале заедно на 8 мај, распишувањето треба да се направи 70 дена пред изборите, а тоа е на 27 или 28 февруари.
Ако изборите се одржат споено, тогаш според Пржинскиот договор треба претходно да биде формирана и техничка Влада на 100 дена пред изборите, а тоа е на 27 или 28 јануари.
Следните парламентарни избори треба да бидат 11 по ред од осамостојувањето на земјата од поранешна Југославија и воведувањето на политички плурализам.
Досега се одржани и шест избори за Претседател на државата. Првиот мандат на Киро Глигоров бил даден врз основа на избор од страна на Собранието, согласно тогашните уставни решенија.
Борел- Добро е Лавров да слушне зошто е Русија изолирана и санкционирана
Рускиот министер за надворешни работи Сергеј Лавров на министерскиот состанок на ОБСЕ треба да слушне од учесниците на министерскиот состанок на ОБСЕ во Скопје зошто Русија и изолирана и санкционирана и тоа да му го пренесе на господарот во Кремљ. Ова го порача потпретседателот на Европската комисија и висок претставник на ЕУ за надворешни работи и безбедносна политика, Жозеп Борел, на заедничката прес конференција со неговиот домаќин македонскиот премиер Димитар Ковачевски.
„ Јас сфаќам дека некои земји учеснички не беа одушевени од вашата одлука да присуствува министерот Лавров, ги сфаќам, затоа што со незаконската војна на Русија против Украина таа ги поткопува истите начела на ОБСЕ и ги нарушува законите и поради тоа се соочува со меѓународни санкции и меѓународна изолација. Сепак, вашата одлука да дозволите Лавров да учествува е во согласност со наша заедничка цел, да го одржиме мултилатеризмот жив. Ова е добра прилика за него да слушне од учесниците на овој состанок зошто Русија е осудена и изолирана а потоа ќе може да се врати во Кремљ, и да му каже на господарот на Кремљ дека ЕУ и ОБСЕ остануваат обединети во осудувањето на агресивното и незаконско однесување на Русија“, изјави Борел.
Северна Македонија привремено ја укина забраната за руски летови за да ѝ дозволи на руската делегација да присуствува на самитот на ОБСЕ, иако севкупните санкции за другите летови остануваат во сила.
Брисел го затвори воздушниот простор за руски летови неколку дена откако Москва ја започна својата војна против Украина во февруари 2022 година. Истото го направи и Северна Македонија која претендира да се приклучи на блокот. Но, Лавров беше поканет да учествува на Самитот на ОБСЕ откако тоа го дозволи македонското МНР, а Бугарија го отвори воздушниот простор за авионот на Лавров.
Борел додаде дека очекува на 30-от Министерски самит на ОБСЕ во Скопје се одржува од 30 ноември до 1 декември ќе се донеса клучни одлуки за следниот претседавач и за буџетот на организацијата.
„ Од друга страна од суштинско значење е министерскиот состанок да се осигури дека ОБСЕ ги има сите потребни средства на свое располагање за да функционира ефективно. Ние не сакаме да ја изгубиме работната способност на ОБСЕ. Ние сакаме да ви честитаме Вам на Северна Македонија за работата што ја завршивте во овие тешки времиња. Го поздравувам предлогот Малта да биде претседавач за следната 2024 година и се надевам дека оваа одлука ќе се донесе на состанокот во Скопје“, посочи Борел.
Тој додаде дека ЕУ ја поддржува Украина во нејзината борба за сочувување на својот интегритет, како и за мир и стабилност на Европа, вклучувајќи го и Западниот Балкан.
Борел си заминува од Скопје по вечерашната средба и нема да се сретне со Лавров на министерскиот состанок на ОБСЕ.
Солзавец и приведени демонстранти во Приштина поради посетата на претседателот на Специјалниот суд
Косовската полиција уапси неколку луѓе на протестот во Приштина на 29 ноември, организиран поради посетата на претседателка на Специјалниот суд, Екатерина Трендафилова, кој ги истражува наводните злосторства на Ослободителната војска на Косово.
Демонстрантите фрлија солзавец во близина на хотелот каде што требаше да се одржи средба со граѓанскиот сектор. Протестот го организираше вонпарламентарната Социјалдемократска партија на Косово.
Според информациите од Социјалдемократската партија, полицијата уапсила шест нивни членови, меѓу кои и лидерот на таа партија Дардан Молиќај. Косовската полиција не ги коментираше овие наводи.
Демонстрантите носеа транспаренти со натписи „На ОВК не може да ѝ се суди“, „Трендафилова надвор“, а тие извикуваа „Долу Специјалниот суд“. Трендафилова денеска допатува во работна посета на косовскиот главен град на средба со претставници на граѓанското општество, во рамки на Програмата на меѓународниот трибунал за комуникација и подигнување на јавната свест.
Претседателот на Социјалдемократската партија Дардан Молиќај на протестот, пред да ескалира, изјави дека целта на собирот е да се спротивстави на посетата на Трендафилова на Косово.
„Секогаш кога бевме поблиску до Србија и лоши договори со Србија, имаше прогон на ОВК (Ослободителната војска на Косово). Судот има мандат да ја гони само ОВК. Мораме и ќе ја спречиме оваа средба“, изјави Молиќај.
Ова не е првпат активисти на Социјалдемократската партија да се спротивстават на престојот на Трендафилова на Косово. Тие и претходно се обидуваат да ги нарушат или спречат нејзините средби и прес-конференции.
Специјализираниот Суд ги истражува наводните злосторства извршени од припадници на Ослободителната војска на Косово против етничките малцинства и политичките ривали од јануари 1998 година до декември 2000 година. Седиштето на овој суд е во Хаг, но работи во согласност со законите на Косово.
Мултимедија
Најпосетени
Што треба да знаете