Достапни линкови

„Прекинете со мерките и сѐ ќе биде добро” - вие коментирате


Луѓе со заштитни маски, Скопје, март 2020 година

Информациите поврзани со македонско - бугарските односи, како и оние за коронавирусот беа во фокусот на вашите коментари на социјалните мрежи на РСЕ. Овај пат не ги „поштедивте“ ни новинарите.

Изјавата на шефицата на бугарската дипломатија, Екатерина Захариева, за една приватна бугарска телевизија дека од заеднички интерес е што Бугарија ја признава реалноста, а Македонија треба „да ја признае историјата” ги разлутила посетителите на нашата веб страница. „Да не ја поделеа Македонија вие ќе јадевте камења и песок” – коментира Зоран Младеновски, а Љупчо Јоксимовски напишал: „Ова ко на пазар... дај ми да ти дадам”, и постирал еден смешко со заби. Постот на Ахмед Ибраимов гласи: „Ој па ја разбери”. Мирче Дисоски е поостар: „Време е, а и од заеднички интерес е да му се извините официјално на македонскиот народ за сите злодела извршени за време на бугарската фашистичка окупација на Македонија”.

И по последниот извештај на Министерството за здравство дека во земјава има 5 новозаразени и 95 оздравени пациенти од коронавирусот покажува дека дел од нашите граѓани продолжуваат да не веруваат дека Ковид-19 навистина постои и дека луѓето умираат од компликации од вирусот, па за Лилјана Томовска е „дегутантно” што „овие месеци”, вели, „само од корона се умира. Што е со починатите од карцином, кардиоваскуларни заболувања, од сообраќајни несреќи...” Има и повеќе коментари за починатиот 95-годишен пациент од Куманово кои отсликуваат малку или никаква почит кон него за сметка на неговите години и тие постови нема да ги објавиме.

Непослушни колку и заразени со коронавирусот

Полицијата бележи 4 самоубиства откако почнаа рестриктивните мерки во земјава поради коронавирусот, од кои, засега, само еден е поврзан со Ковид-19, и тоа ги предизвикало посетителите на веб страницата на РСЕ да го искажат, најблаго речено, несогласувањето со нив. Потпишан со Дарко Хиохи постирал: „Еве ви го резултатот од мерките ваши!”, но Кире Ц. Нестороски му реплицира: „Малце е за нас”. Бекир Кадриески со хиперреалистичен пост: „Се знаеше дека ќе дојде до овој степен, сите пратете ги во лудница на терапија”. Тони Адамчески препорачува: „Прекинете со мерките и сѐ ќе биде добро”.

Барем според постовите и коментарите на нашава веб страница, граѓаните изгубиле верба и во новинарската фела. Повикот на Здружението на новинарите и Независниот синдикат на медиумски работници за солидарност и поддршка за нив кои, како што се вели во апелот, „во последниве два месеца се соочуваат со големи здравствени, безбедносни, финансиски и етички предизвици во обидот правилно и навремено да ја информираат јавноста за случувањата во врска со пандемијата” наишол на повеќе негативни реакции. За Крешимир Крешо Здравески сите новинари се „корумпирани”, а Тоше Алексоски револтирано извикува: „Ма какви новинари, бре! Платена багра!” Горан Сретенoвиќ со совет: „Треба да се потрудите многу повеќе, и повеќе објективност, за да добиете поддршка од народот! Така и јас можам да бидам ʼновинарʻ кога ќе ми напишат/кажат што да презентирам! Вие треба да сте темелот на една држава, а не кровот!”

  • 16x9 Image

    Горица Попова

    Родена е во Кочани, дипломирала во 1976 год. на Филозофскиот факултет во Скопје. Како новинар работи над 30 години. Почнала во Македонско радио- Радио Скопје во 1978 год. Од јуни 2009 год. е соработник на Радио Слободна Европа.

XS
SM
MD
LG