Достапни линкови

„Позитивната иднина на регионот“ зависи од рускиот пораз во Украина


Ен Еплбаум е автор на неколку книги за Русија и Советскиот Сојуз, меѓу кои и Црвениот глад: Сталиновата војна против Украина. (фотографија од датотека)

Забрзувањето на помошта од Западот за Украина може да донесе побрз крај на руската инвазија, вели за РСЕ американската историчарка Ен Еплбаум, добитничка на Пулицерова награда. Дмитри Хурниевич

Евентуалната украинска воена победа над руските сили веројатно ќе одекне низ целиот регион, потенцијално воведувајќи „позитивна иднина“, предвидува Ен Еплбаум, авторка на неколку книги за Русија и Советскиот Сојуз, вклучувајќи го и Црвениот глад: Сталиновата војна против Украина и добитничка на американската Пулицерова награда.

Борел: Војната на Русија против Украина е напад врз темелите на ОН

„Позитивната иднина за регионот зависи од тоа Русија да биде поразена и Русите да сфатат дека се поразени“, наведува Еплбаум, наведувајќи дека е клучно, а можеби и одлучувачко, побрзо да се добие повеќе оружје за вооружените сили на Украина.

Украина бара зголемување на западното тешко вооружување откако Русија го пренесе најголемиот дел од својата огнена моќ во источниот регион Донбас.

На Украина ѝ се потребни 1.000 хаубици, 500 тенкови и 1.000 беспилотни летала, изјави на 13 јуни, Михајло Подољак, главен советник на Зеленски.

Западните земји ветија оружје според НАТО стандардите, вклучително и напредни американски ракети. Но, за нивното распоредување треба време, а експертите велат дека Украина ќе бара доследна поддршка од Запад за транзиција кон нови системи, бидејќи залихите на нивното оружје и муниција од советската ера се намалуваат.

Рускиот претседател Владимир Путин се обидува да го принуди Киев да ја отстапи целосната контрола врз Донбас и дел од јужна Украина. „Путин веројатно сè уште сака да заземе многу, ако не и цела Украина, но мораше да ги стесни своите тактички цели во војна“, оценува американскиот потсекретар за одбрана Колин Кал.

„Поразот на Путин во Украина не само што би бил „добар“ за Украина, туку и за соседна Белорусија, а на крајот и за Русија“, тврди Еплбаум, додавајќи:

„Победата за Украина и повлекувањето на руските трупи од Украина би било многу добро за белорускиот народ, затоа што тоа би ја покажало не само воената слабост на Русија, туку и празнината на руските идеи и идеологија, овој вид на чуден пост-Советскиот империјализам“.

Малку е веројатно дека западните санкции ќе го загрозат владеењето на Путин

Еплбаум го опишува Путин, поранешен службеник на КГБ, како „империјален носталгичар“, склон кон „повторно создавање на помала империја на руски јазик во границите на стариот Советски Сојуз“.

Неодамна, Путин ја изедначи војната против Украина со експанзионистичките војни на Петар Велики пред три века, велејќи дека рускиот цар „не зграпчи ништо, тој го врати назад!“

„Поразот на Русија во Украина ќе им овозможи на просечните Руси да гледаат напред кон „градење на својата иднина“, а не да се вратат кон „славата од минатото која не беше ни многу славна“, вели Еплбаум.

Во услови на постојани дезинформации, резултатите од државната анкетна агенција укажуваат на пораст на поддршката за Путин, иако многумина се прашуваат дали Русите не сакаат или дури се плашат да зборуваат искрено со анкетарите.

Украина предупредува на зголемени воени активности на Белорусија во близина на границата

За Белорусија, инвазијата на Путин ѝ нанесе можеби последен удар на независноста што земјата ја уживаше под авторитарниот лидер Алаксандар Лукашенко, вели Еплбаум, чиј сопруг е Радек Сикорски, поранешен полски министер за надворешни работи и актуелен член на Европскиот парламент.

„Мислам дека Белорусија сега е нешто како руска колонија или нација која ја изгубила способноста да прави своја надворешна политика“, додава таа.

Блискиот сојузник на Русија, Белорусија во март соопшти дека нејзините вооружени сили не учествуваат во, како што ја нарекува Москва, нејзината „специјална операција“ во Украина, но таа служеше како лансирно поле за Русија да испрати илјадници војници преку границата на 24 февруари.

Лукашенко се соочува со изолација и санкции поради задушувањето на продемократските противници по изборите во август 2020 година, за кои нашироко се верува дека биле лажирани и го продолжи неговото владеење за уште пет години.

„Лукашенко очигледно направи некаков договор, Путин да му помогне за да остане на власт. Тој се согласи да му помогне на Путин да ја нападне Украина. Мислам дека тоа е еден вид окупација“, додава Еплбаум.

Таа признава дека просечните Белоруси - многумина се противат на инвазијата на Путин на Украина - страдаат од санкциите, но додава дека тие се неопходни.

„Се разбира, не е фер што мнозинството Белоруси кои се против војната се принудени да ја платат цената за тоа. Но, тоа е посебно прашање за тоа дали треба да има или не санкции. Исто така, не е фер во Русија кон, кој и да е процент, 20 насто, 30 насто од Русите кои се против војната“, смета Еплбаум, додавајќи дека мерките се насочени кон казнување на Лукашенко и апаратот на неговиот режим.

Руските војници продаваат во Белорусија предмети ограбени во Украина

„Идејата е да се одврати белорускиот лидер, да се попречи неговата способност да заработува пари за да ја финансира сопствената војска и сопствените безбедносни служби. Поентата е да го натераме да плати висока цена за своите постапки. За жал, тоа значи дека и другите луѓе ќе платат цена за тоа“, вели Еплбаум која ги пофали оние во Белорусија кои активно се спротивставуваат на руската инвазија, вклучително и активисти кои се обидоа да саботираат делови од железничката мрежа за да ѝ отежнат на Русија да распореди сили во Украина.

„Веќе се случија многу импресивни акции. Мислам на белоруските „герилци“ кои ја саботираа железницата по која руските војници ја превезуваа својата опрема во Украина. Тоа беше многу голем придонес во војната што многу луѓе го забележаа“, рече Еплбаум, додавајќи дека во Украина се бореле и „стотици Белоруси“ против руските напаѓачки сили.

  • 16x9 Image

    Гоце Атанасов

    Со новинарство започна да се занимава за време на студиите по новинарство во Скопје. Работел во Млад борец, Нова Македонија, Македонската радио телевизија, А1 телевизијата и во Дојче Веле, а во Радио Слободна Европа е од започнувањето на емитувањето на македонски јазик.

XS
SM
MD
LG