Достапни линкови

Вести

ИВЗ обвинува за полициски притисок, МВР демантира

Архивска фотографија - Молитва во Мустафа паша џамија во Скопје во време на коронавирус пандемија, 12 мај 2020 година

Во интерес на вистината, на објективното информирање на јавноста, а особеново интерес на интегритетот на институцијата, МВР категорично ги отфрла како паушални и неточни изесените тврдења во денешната реакција на Исламската верска заедница околу наводен полициски притисок врз претставниците на оваа верска заедница, а по повод чествувањето на престојниот верски празник Фитр Бајрам, соопшти денеска Министерството за внатрешни работи.

Претхнодно, поглаварот на ИВЗ, реисот Сулејман Реџепи, на својот официјален фејсбук профил објави дека врз свештени лица од ИВЗ бил вршен притисок од полиција за да нема молитви во џамиите за претстојниот муслимански празник.

„Денес, Претседателството е преплавено со извештаи од нашите муфтии и имами дека полицијата ги повикува нашите имами и влијае врз нив да не се молат за молитвата, а во други случаи, полицијата влезе низ нашите џамии со цел да изврши притисок. Имаме писмени изјави на имамите и на верските работници. Ова се забележува низ целата земја, но особено во Скопје и околината“, објави реисот Реџепи.

На тоа од МВР излегоа со демант.

„Полицијата, односно МВР, ниту има надлежност ниту па ксе обидувало да наметне влјание врз верски старешини во верски установи, туку своето работење го темели исклучиво врз пропишаните законски норми и Уставот. Притоа јавноста веќе знае дека во рамки на низата законски надлежности и активности на министерството влегува и превентивното делување во различни области од значење за сите граѓани на државно и на локално ниво“, реагираше денеска МВР.

види ги сите денешни вести

Српската централна банка ќе се обрати до ЕУ за хрватското евро со ликот на Тесла

Илустрациите на хрватското евро со Никола Тесла, научникот роден во Хрватска

Планот на Хрватска да го стави познатиот научник Никола Тесла на евро монетите предизвика критики во Србија чија централна банка денеска одлучи дека ќе го покрене прашањето во Европската унија, јавува Агенцијата Франс Прес.

Тесла, кој е етнички Србин роден на територијата на денешна Хрватска во 1856 година кога земјата била дел од Австроунгарската империја, е причина за гордост на двете земји чии односи не се добри по крвавите војни кои доведоа до распадот на Југославија во деведесеттите години на минатиот век.

Загреб и Белград го прогласуваат Тесла за свој, а Хрватска неодамна објави дека планира да го пушти еврото со ликот на научникот во 2023 година.
Во соопштението испратено до агенцијата Франс прес Националната банка на Србија наведува дека ставањето на Тесла на монетите е несоодветно.

Toa би значело „узурпирање на културното и научното наследство на српскиот народ“ земајќи предвид дека Тесла се идентификуваше како Србин наведуваат од банката за АФП.

"Соодветните акции со институциите на ЕУ ќе бидат преземени ако тоа се случи“, се наведува во соопштението без да има дополнителни детали.

Загреб, пак, ги отфрла критиките нагласувајќи дека Тесла е роден во Хрватска. Хрватскиот премиер Андреј Пленковиќ минатата недела кажа дека Србија не може да влијае на нивната одлука. Инаку Тесла се декларирал како граѓанин на светот, а најголемиот дел од неговата кариера ја поминал во Соединетите Американски Држави.


Радев- Бугарија нема да дозволи во Македонија да се кршат правата на граѓаните со бугарска самосвест

Бугарскиот претседател Румен Радев

Бугарија е најсилниот поддржувач на проширувањето на ЕУ, но не може да дозволи кршење на правата на граѓаните на Република Северна Македонија со бугарска самосвест. Ова го изјави бугарскиот претседател Румен Радев на средбата со неговиот австриски колега Александар Ван дер Белен за време на денешната посета на австрискиот град Салцбург.

Како што јави дописникот на МИА во Софија Радев истакнал дека Бугарија принципиелно и доследно ја поддржува европската перспектива на регионот, која, сепак, вели, не треба да биде ограничена на формалните фази во процесот на пристапување и не може да им наштетува на интересите на земјите-членки на Унијата и нејзините вредности. Во врска со постигнувањето напредок во европската интеграција на Република Северна Македонија, шефот на бугарската држава изјавил дека очекуваат јасна политичка волја од соседната земја за спроведување на Договорот за пријателство, добрососедство и соработка меѓу двете држави, потпишан во 2017 година.

Радев истакнал дека „иако во Скопје тврдат дека ги исполнуваат критериумите за пристапување, сепак сме сведоци на систематско кршење на правата на граѓаните на Република Северна Македонија од бугарско потекло и нивна дискриминација, сè уште има говор на омраза кон Бугарија во учебниците и во јавниот простор“.

Според бугарскиот претседател, напредокот и решавањето на овие прашања зависат исклучиво од политиките на Република Северна Македонија, со која Бугарија повеќепати изразила подготвеност да води конструктивен и отворен дијалог. Според Радев, ова е начинот да се создаде клима на доверба и да се постигнат конкретни и неповратни резултати што ќе доведат до почеток на преговори за членство во ЕУ.

Бугарскиот претседател во Салцбург истакна дека во рамките на словенечкото претседателство со Советот на Европската унија, неговата земја е подготвена да работи на постигнување напредок на чувствителни теми и на решенија прифатливи за двете земји.

Натепан таџикистанскиот министер за здравство поради смртта на сестрата на претседателот

Министерот за здравство на Таџикистан Џамолидин Абдулозода

Тројца внуци на претседателот на Таџикистан Емомали Рахмон сериозно ги натепале таџикистанскиот министер за здравство и други официјални лица по смртта на нивната мајка, велат извори блиски до владата за Радио Слободна Европа. Изворите во министерството за внатрешни работи и во министерството за здравство кои инсистираа на анонимоност, за РСЕ денеска велат дека министерот за здравство Џамолидин Абдулозода, шефот на претседателскиот медицински центар Колмухамед Рахимзода и уште неколку здравствени работници и лекари биле нападнати на 20 јули, веднаш откако 64 годишната сестра на претседателот Рахмон починала од Ковид19.

Според истите извори таџикистанските власти повикале медицински експерти од Германија Русија и Узбекистан да ја лекуваат сестрата на претседателот, а по нејзината смрт министерот и другите биле сериозно повредени. Тие додаваат дека е почната првична истрага за нападот. Никој од владата, претседателството и другите служби јавно не ги коментираа овие наводи.

Министерот Абдулозода не беше присутен на денешната прес конференција во Душанбе за пратката вакцини против Ковид19 од Соединетите Американски Држави за Таџикистан. Земјата ден претходно доби донација од Вашингтон од еден и пол милион вакцини Модерна. На новинарско прашање дали неприсуството на министерот може да ги потврди гласини за тепањето, заменикот министер за здравство Шодикон Jeмшед одби да одговори.

Сестрата на претседателот беше погребана на 21 јули, а иако официјално причината за смртта не беше објавена, лекарите од болницата во главниот град на Таџикистан за РСЕ рекоа дека починала од Ковид19.

Рахмон со години е критикуван од меѓународните организации за човекови права за непочитување на слободата на вероисповест, граѓанското општество и политичкиот плурализам во таа поранешна советска република.

Возачот на косовскиот автобус се бранел со молчење

Во Косово 26 јули е прогласен за ден на жалост, а државните знамиња се спуштени на половина копје

Возачот на косовскиот автобус кој е осомничен дека вчера утрото направил тешка сообраќајна несреќа во близина на Славонски брод во Хрватска е изведен на распит во тамошното општинско обвинителство, но се бранел со молчење.

Како што јавува дописникот на Радио Слободна Европа на возачот му бил доделен адвокат по службена должност. Зааменикот на државниот обвинител во Славонски брод Фрањо Копуниќ за медимите рече дека не ја слушнале одбраната на возачот и дека ќе биде донесена одлука за спроведување истрага, по што ќе биде предложен и истражен затвор за што ќе се одлучува утре.

Како што соопшти полицијата возачот ќе биде кривично гонет по член 227 од кривичниот законик, односно предизвикување сообраќајна несреќа во патнички сообраќај за што највисоката казна е 15 години затвор.

Во несреќата која се случи во раните утрински часови загинаа десет луѓе, а повеќе од 40 се повредени откако автобусот кој сообраќаше на редовната линија Франкфурт-Приштина падна од патот од се уште не утврдени причини. 26 јули е прогласен за ден на жалост во Косово.

Ребаланс на буџетот- за власта развоен, за опозицијата предизборен поткуп

Собранието денеска трет ден одржува општа расправа за дополнетиот ребаланс на Буџетот во кој се вметнати и осумте амандмани усвоени на матичната Комисијата за финансирање и буџет. Општата расправа може да трае пет дена.

Во текот на расправата пратениците од власта нагласија дека ребалансот е развоен и дека со него се зголемуваат средствата за инвестиции и за справување со последиците од пандемијата со Ковид-19, а нивните колеги од опозицијата сметаат дека ребалансот претставува предизборен поткуп и одраз на неодговорното работење на Владата.

Пратеникот од ВМРО-ДПМНЕ Бране Петрушевски рече дека ребалансот пред се е изборен, а воопшто не е развоен.

„Ребалансот апсолутно е во насока на предизборен институционален поткуп… Го уништувате и го упропастувате бизнисот и стануваме предмет на потсмев од економски бизнис аспект на соседните држави. Владата воопшто нема антиинфлациски мерки туку, напротив, се труди да ја поттикне инфлацијата преку воведување нови такси за горивата и нови даноци“, рече Петрушевски.

Лолита Ристова од СДСМ, пак, нагласи дека и ребалансот исто како и претходно Буџетот се движи во насока на справување со последиците од корона кризата преку зголемување на обемот на инвестиции за компаниите, отворање работни места.

„Се води сметка на расходната страна да бидат ограничени определени непродуктивни трошења, односно тие се сведени на минимум. Имаме план како да се менаџира буџетскиот дефицит и да се овозможи заздравување на економијата“, рече Ристова.

Скендер Реџепи од Алтернатива смета дека државата е во лоша состојба поради лошото менаџирање на кадрите од ДУИ.

„Затворени се илјадници бизниси заради не добивање помош за време на пандемијата, особено во угостителството, а во исто време некои компании бележат екстра профити. Играта со ребалансот на Буџетот треба да престане. Не му личи на Собранието толку ниско да паднат граѓаните“, рече Реџепи.

Инаку приоритетите на Владата во предлог ребалансот се подобро да се справи со пандемијата, па затоа одвојува повеќе пари за здравството, за вакцини и повеќе пари во програмите за поддршка во справување со последиците од ковид-19. Со предлогот за прекројување на државната каса се кратат пари за нови училишта, се кратат пари од Министерството за одбрана, се крати од парите за екологија.

Шумски пожари на Сардинија, Франција и Грција испратија помош

Поради шумските пожари во центаралниот дел на италијанскиот остров Сардинија евакуирани се повеќе од 900 луѓе. Огнот, како што јавува агенцијата Асошиејтед прес се заканува и на населените места. Засега нема информации за загинати или повредени.

Франција и Грција испратија авиони да помогнат во гасењето на шумските пожари кои зафатија околу 20 000 хектари во провинцијата Ористано.

Пожарникарите цела ноќ се обидуваа да го стават под контрола пожарот блиску до градот Монтиферо од кое викендов беа евакуирано 400 жители. Шумските пожари кои почнаа викендов се шират забрзано поради јужните ветрови.

САД и 20 земји, меѓу кои и С. Македонија, со осуда на масовните апсења во Куба

Хавана- полицијата притвора антивладини демонстранти, 11.07.2021

Соединетите Американски Држави и 20 други земји, меѓу кои и Северна Македонија, ги осудија масовните апсења во Куба и побараa целосно враќање на пристапот до интернет на островот.

"Демократиите ширум светот заедно ги поддржуваат Кубанците и ја повикуваат владата на Куба да ги почитува барањата за универзалните човекови права“, наведе денеска американскиот државен секретар Ентони Блинкен во заедничката декларација.

Зад декларацијата стојат владите на Северна Македонија, Австрија, Бразил, Колумбија, Хрватска, Кипар, Чешка, Еквадор, Естонија, Гватемала, Грција, Хондурас, Израел, Латвија, Литванија, Косово, Црна Гора, Полска, Република Кореја и Украина.

Вашингтон минатата недела воведе санкции за против министерот за одбрана на Куба и единицата на специјалните сили за наводни кршења на човековите права во акцијата против антивладините протести претходно месецов.

Илјадници Кубанци на 11 јули излегоа на улиците низ повеќе градови во земјата поради длабоката економска криза, постојаниот недостиг на струја, храна и лекови зголемени и поради пандемијата со коронавирусот. Претседателот Мигуел Диаз-Канел брзо ги растури уличните протести што резултираше со еден починат, десетици повредени и стотици уапсени.

"Соединетите Американски Држави и меѓународната заедница ќе продолжат со поддршката на кубанските граѓани додека се обидуваат да ги искористат универзалните човекови права и слободи на кои имаат право сите поединци“, се наведува во соопштението зад кое стојат САД и 20 држави.

Во него се додава и дека САД ќе продолжат со поддршката на желбата на кубанскиот народ за слобода и за одредување на сопствената иднина, а дека заедничкото соопштение покажува дека не се сами во нивните аспирации.

Роскомнадзор ги блокираше интернет страниците на Навални

Интернер страницата navalny.com

Рускиот регулатор на медиуми Роскомнадзор ги блокираше интернет страниците на затворениот руски опозициски активист Алексеј Навални во рамки на проширената акција на властите против медиумите и граѓанското општество, а во пресрет на парламентарните избори што треба да се одржат на 19 септември.

Антикорупциската фондација на Навални денеска на социјалната мрежа Твитер напиша дека властите исто така ја блокирале и интернет страницата Паметно гласање што ја направи тимот на Навални пред парламентарните избори во таа земја.

Роскомнадзор соопшти дека интернет страницата е блокирана на 15 јули на барање на јавниот обвинител поради тоа што сајтот navalny.com содржел повици за масовни нарушувања, спроведувања на екстремистички активности и учество во масовни јавни настани спротивни на постоечките закони.

Дуџак- дадениот рок од УНЕСКО за Охрид да се искористи за итно делување

Багер отстранува нелагално изграден објект на брегот на Охридското Езеро кај туристичкото место Лагадин

Дадениот рок треба да се искористи за итно делување и подобро менаџирање, вели постојаниот координатор на Обединетите нации во Македонија, Росана Дуџак, по одлуката на УНЕСКО за Охридскиот регион. Меѓународното тело одлучи Охрид да не биде ставен на Листата светски културни и природни богатства во опасност, а следните две години треба да ги исполни зададените обврски.

Дуџак вели дека одлуката не ја намалува итноста да се делува и покрај дополнителните две години што се дадени за да се избегне таа судбина.

„Со децении, Охрид е оптоварен со несоодветно и често нелегално градење, со слаб менаџмент на рибниот фонд и недостаток на заштитни механизми за животот под вода. Долго време гледавме апатија кон природните и културните богатства. Проблемите со кои се соочува Охрид сега бараат сеопфатен пристап не само во надминувањето на акумулираната штета, туку и за сето понатамошно планирање и менаџирање на областа. Времето да се делува е сега“, вели таа.

Комитетот за Светско наследство при Организацијата на ОН за образование, наука и култура на 44-тата пленарна сесија што се одржува во Кина на вчерашната седница донесе одлука на Северна Македонија и на Албанија да им се даде дополнителен рок да постапуваат согласно препораките на Реактивните мисии на УНЕСКО, со што Охридскиот регион не е поместен на Листата Светски културни и природни богатства во опасност.

ВМРО-ДПМНЕ за пресудата за „27 април“-власта се изживува врз судбини

Изрекување на пресудите за организаторите за упадот и насилствата во Собранието на 27 април 2017 година. Поранешниот претседател на Собранието Трајко Вељаноски, поранешниот министер за труд и социјала Спиро Ристовски, поранешниот министер за транспорт и в

Додека е Зоран Заев на власт, дотогаш правдата нема да живее во Република Македонија, рече денеска Димче Арсовски, портпарол на ВМРО-ДПМНЕ. Реакцијата на опозициската партија следува по денешната пресуда за случајот „Организатори на 27 април“ во кој осудени се поранешните државни функционери од ВМРО-ДПМНЕ Трајко Вељаноски, Спиро Ристовски и Миле Јанакиески и поранешниот директор на УБК Владимир Атанасовски на затворски казни од шест до шест и пол години.

„Денешната одлука на судот е темпирана и планирана прeсуда која има за цел да создава страв кај политичките непријатели на Зоран Заев и целосно ја руши демократијата во државата“, рече Арсовски.

Според него додека политичките непријатели се казнуваат со, како што рече, неосновани пресуди власта на Заев ја дефокусирала јавноста од сопствените криминали и корупција.

„Ваквата пресуда не е ништо друго туку продолжување на праксата на власта да се изживува со судбини, во случајот со лица кои во постапката покажаа дека се невини, а судот пресудителната одлука ја темели само на исказ на човек со дебело криминално досие кој што според вештачењето се докажа дека воопшто и не бил присутен на местото за кое што сведочи“, вели Арсовски кој тврди дека целата пресуда се темели на исказот на Александар Василевски – Нинџа, човек, со како што рече дебело криминално досие.

Портпаролот на ВМРО-ДПМНЕ им порача на судиите, кои како што рече, му слугуваат на Заев дека требало да знаат дека брзо ќе дошло време кога ќе требало да дадат одговор за сите вакви одлуки.

Инаку осудените до правосилноста на одлуката остануваат во домашен притвор. Тие се осудени за загрозување на уставниот поредок и безбедноста. Судијата Илија Трпков рече дека случувањата на 27 април 2017 година во Собранието се напад врз сржта на демократијата.

Десет нови случаи на ковид-19 и двајца починати

Вакцинација против ковид

Во последните 24 часа регистрирани се 10 нови случаи на ковид-19 од направени 2.473 тестирања, соопшти Министерството за здравство.

Во Скопје има 7 новозаразени и по еден во Прилеп , Тетово и Струга.
Регистрирани сe 16 оздравени пациенти. Пријавени се две починати лица од:Гостивар (67г) и Тетово (62г) починати во болнички услови.

Вкупната бројка на ковид-дијагностицирани лица во Македонија од почетокот на епидемијата изнесува 156.086 бројката на оздравени пациенти е 150.295, на починати е 5.491, а бројот на активни случаи изнесува 300.

Ослободени од затвор двајца дописници на РСЕ од Белорусија

Белорусија - Новинарите Алеш Дашчински, Ина Стуџинскаја и Алег Хружџилович

Двајца дописници на Белорускиот сервис на РСЕ се ослободени откако поминаа 10 дена во затвор. Тие беа уапсени како дел од казните врз медиумите и граѓанскиот сектор што ги спроведува авторитарниот лидер на Белорусија Александар Лукашенко.

Денеска беа ослободени Ина Стуџинскаја и Алег Хружзилович. На нив им било соопштено дека сепак остануваат осомничени за неодредено кривично дело.

Против нивното апсење Стуџинскаја штрајкуваше со глад девет дена, а Хружзилович три дена. Претходно од затвор беше ослободен уште еден дописник на РСЕ, Алеш Дашчински.

Тројцата новинари на РСЕ беа уапсени на 16 јули, кога беа уапсени и други новинари, откако полицијата и безбедносните сили извршија претрес во нивните станови и канцеларии, вклучувајќи ги и канцелариите на РСЕ во Минск.

Белоруските власти по масовните протести по спорните избори минатата години затворија неколку независните медиуми и повеќе од 50 невладини организации.

РСЕ ги осуди апсењата на новинарите.

Премиерот тврди дека нема корупција во највисокиот ешалон на власта

Корупција, илустрација.

Во највисокиот ешалон на власта, па дури и во вториот ешалон не е препознаена корупција, вели премиерот Зоран Заев, како одговор на тоа дали ќе побара одговорност од вицепремиерот за борба против корупцијата, по објавениот Извештај на Стејт департментот за инвестициска клима за 2021. Во извештајот меѓудругото се нотира и дека корупцијата е постојан проблем за водење бизнис во Македонија.

Заев вели дека кај министрите и кај директорите не е пронајдена корупција, туку таа е пронајдена во делот на административното функционирање на јавните институции.

Коментирајќи го извештајот на Стејт департментот, премиерот вели дека тоа треба да биде „ветар во грб“ за да се отстрани корупцијата, како девијантна појава што ја има насекаде во светот.

„Нам ни е јасно од страна на Владата по сите анализи заедно со Транспаренси интернешенл, со Стејт департментот, со Европската делегација овде и со многу други граѓански организации го утврдивме нивото на корупција што се случува на трето ниво. Таму каде што граѓаните шалтерски допираат, имотен лист, одобрение за градба, решенија, согласност или слично и ќе го промениме“, рече Заев.

Во извештајот на Стејт департментот се наведува дека големите странски компании кои работат во технолошките индустриски развојни зони (ТИРЗ) имаат генерално позитивни искуства и добро соработуваат со властите. Но, сепак, целокупното регулаторно опкружување на земјата останува сложено и честите регулаторни и законски измени, заедно со неконзистентно толкување на правилата, создаваат непредвидливо деловно опкружување погодно за корупција, стои во извештајот. Во него се наведува дека Владата генерално ги спроведува закони, но има бројни извештаи дека некои службеници остануваат ангажирани во коруптивни активности.

Неделава нов топол бран

Скопје во лето.

Од денеска до крајот на оваа недела времето ќе биде многу топло со натпросечни температури за овој период од годината, соопшти УХМР.

Под влијание на топла воздушна маса од југ, во следните денови на повеќе места температурите ќе бидат над 35 степени. Најтопло ќе биде од среда до недела кога ќе биде активирано портокалово ниво на опасност од високи температури, а вредноста на УВ-индексот ќе изнесува 9. Наместа долж Повардарието температурата ќе го надмине и 40-тиот степен, соопшти УХМР.

Кон крајот на јуни Македонија беше во портокалофа фаза, кога беа активирани препораките за заштита на здравјето, како што се: ослободување од работните обврски на најранливите групи на населението, вклучувајќи ги бремените жени и лицата на возраст над 60 години.

Заев – Вметнување на Бугарите во Уставот пред пристапување во ЕУ

Премиерот Зоран Заев денеска изјави дека Бугарите ќе бидат вметнати во македонскиот Устав, но пред самото пристапување во ЕУ. Тога се отвора Уставот со цел да се смени заедничкиот дел со земјите членки на ЕУ, и тогаш се вградуваат и помалку бројните етнички заедници кои се присутни и живеат во земјава, а не се вградени во него, рече Заев одговарајќи на новинарски прашања.

„Ние немаме никакви предрасуди. Ако некој бара утре тоа да го направиме и да сакаме не можеме. Две третини немаме, ниту треба, но јавно го кажуваме заради тоа што и Бугарите и Хрватите, и Црногорците и Египќаните и многу други етнички заедници ќе бидат вградени во нашиот Устав во очи на пристапувањето“, истакна Заев.

На новинарско прашање дека доколку бидат внесени Бугарите во македонскиот Устав, дали ќе се бара реципроцитет односно вметнување на Македонците во бугарскиот Устав, со оглед на тоа дека има и Македонци во Бугарија, Заев рече дека тоа е право на Бугарија и оти мешање во внатрешни работи на соседна земја не е порака на пријателство.

Во петокот вршителот на должност шеф на бугарската дипломатија Светлан Стоев изјави дека Министерството за надворешни работи би сакало Бугарите во Северна Македонија да бидат впишани во Уставот на земјата заедно со останатите наброени народи во него.

Претседателот на парламентот на Тунис седи пред собраниската зграда блокирана од војската

Тунис - Поддржувачи на претседателот на државата Каис Сајед

Претседателот на Парламентот на Тунис Рашед Гануши денеска седна пред собраниската зграда откако војската му забрани влез во објектот по одлуката на претседателот на државата Каис Сајед за замрзнување на работата на парламентот.

Неколку стотици приврзаници на Сајед се собраа пред парламентот, извикувајќи непријателски слогани против Енахде, главната партија во парламентот предводена од Гануши.

Поддржувачите на претседателот ги спречија поддржувачите на Гануши да се приближат до Парламентот. Гануши и неколкумина пратеници тргнаа кон Парламентот утринава во 3 часот, но не можеа да влезат во зградата која е блокирана од војската. Гануши и пратениците потоа седнаа пред Парламентот.

Претседателот на Тунис синоќа ги замрзна активностите на Парламентот на 30 дена, а таа одлука би можела да биде продолжена на неколку месеци. Сајед го смени премиерот Ишем Мешиши и рече дека тој ќе ја преземе неговата функција до именувањето на нов премиер.

Организаторите на 27 април добија казни затвор од шест до шест ипол години

Судење за 27 април.

Виновни за организирање на настаните на 27 април 2017 година се поранешните функционери Трајко Вељаноски, Миле Јанакиески, Спиро Ристовски и поранешниот директор на УБК Владимир Атанасовски. Тие го загрозиле уставниот поредок и безбедноста и ја повредиле сржта на демократијата, рече судијата Илија Трпков, изрекувајќи ги пресудите. Вељаноски доби казна затвор од шест ипол години затвор, Јанакиески и Ристовски добија шест години и три месеци затвор, а Атанасовски е осуден на шест години затвор.

Овој настан бил планиран за да се задржи власта, рече судијата. Тој е убеден дека со овие казни доволно ќе се влијае врз обвинетите во иднина да не прават вакви дела.

Вељаноски, како поранешниот претседател на Собранието, поранешните министри Јанакиески и Ристовски, како и поранешниот директор на УБК, Владимир Атанасовски се виновни зошто во 2017 изготвиле план да го загрозат уставниот предок, организирале протести, материјално ги помагале, го намалувале бројот на полицајци и презеле мерки за да може луѓе да влезат во Собранието и да извршат насилство.

„Настанот од 2017 е без преседан и се одвиваше пред очите на јавноста и на целиот свет. Тоа е голем удар врз демократијата“, рече судијата Трпков.

За овој случај недостапни за судот останаа некогашниот премиер и лидер на ВМРО-ДПМНЕ, Никола Груевски, кој, како што рече судот ги повикал преку медиумите граѓаните да излезат на улица и поранешниот вработен во УБК Никола Бошковски. За нив постапката е запрена до нивно наоѓање, односно апсење.

Антикорупциска го оспори пред Уставен Законот за автопати без тендер

Антикорупциска комисија / ДКСК

Државната комисија за спречување на корупцијата (ДКСК) денеска ја достави до Уставниот суд Иницијатива за оценување на уставноста на законот за изградба на автопати без тендер од страна на американско-турскиот конзорциум Бехтел и Енка. Воедно, антикорупциската побарала времено стопирање на примената на законот додека судот не се произнесе.

Законот за утврдување јавен интерес и номинирање стратешки партнер за имплементација на проектот за изградба на инфраструктурниот коридор 8 (делница: Тетово – Гостивар – Букојчани и проектот за автопатот Требеништа – Струга – Ќафасан) и коридорот 10 Д (делница на автопатот Прилеп – Битола) веќе е објавен во Службен весник.

ДКСК смета дека законот е со висок ризик за корупција и судир на интереси и во суштина го суспендира правниот систем во државата, исклучувајќи примена на други закони во целост или делумно.

Тие сметаат дека донесениот закон и примената на одредбите на законот во пракса, ќе значи кршење на начелата врз кои се темели борбата против корупцијата и судирот на интереси.

Антикорупциска смета дека во законот постојат правни празнини кои оставаат отворен простор за субјективизам, арбитрарност, политичко влијание, тргување со моќ и дискреција при конституирањето на Комитетот за преговори, а на сметка на стручноста, компетентноста и професионализмот.

Пратениците овој Закон го донесоа во скратена постапка.

Претседателот на државата Стево Пендаровски, по изгласувањето на законот во Собранието, го потпиша указот за негово прогласување, и покрај забелешките на Антикорупциската комисија.

Кон очекува ситуацијата со ковид-19 во Србија да се влошува

Вакцинација против ковид-19 во Србија.

Епидемиолошката состојба со ковид-19 во Србија е влошена и уште повеќе ќе се влошува, изјави денеска српскиот епидемиолог и член на Кризниот штаб, Предраг Кон.

Тој очекува оваа недела бројот на новозаболени да надмине 300 лица.

Кон вели дека во следниот период сигурно ќе има четирицифрен број на нови инфекции на дневна основа. Во Србија во моментов во болница има околу 300 лица, но не се очекува притисок врз здравствениот систем, како што беше кога имаше повеќе од 9.000 хоспитализирани, вели доктор Кон.

Тој очекува бројките да растат како луѓето ќе се враќаат од одмор и во септември, на почетокот на учебната година.

На Олимпијадата регистрирани 153 лица со ковид

Тестирање за ковид

Од почетокот на месецов се регистрирани 153 случаи на коронавирус кај луѓето акредитирани за Олимпијадата, а 16 нови случаи биле регистрирани само во изминатото деноноќие, соопштија организаторите на Олимписките игри во Токио.

Од вкупната бројка позитивни 19 се спортисти, а дел од нив се жители на Олимпиското село. Позитивните се сместени во карантин во хотели.

Олимпијадата која требаше да се одржи лани, се одложи поради пандемијата. Игрите започна на 23 јули и покрај вонредна состојба во Токио и во уште три соседни префектури.

На Олимпијадата нема публика ниту од Јапонија, ниту од странство.

Кина ги обвинува САД за „ќор-сокакот“ во меѓусебните односи

Венди Шерман

Кинескиот заменик министер за надворешни работи Кие Фенг ѝ кажал на соопштил на високата претставничка на американскиот Стејт департмент Венди Шерман дека главната причина за тензиите во односите меѓу САД и Кина е тоа што некои Американци ја третираат Кина како „замислен непријател“. Фенг исто така, ѝ рече на Шерман дека САД ја „демонизираат“ Кина и треба да го сменат својот пристап. „Ги повикуваме Соединетите држави да го променат својот многу погрешен начин на размислување и опасната политика“, се вели во соопштението на Министерството за надворешни работи на Кина по разговорите меѓу Шерман и Кие. Министерството наведе дека односите се во „ќор-сокак“ и се соочуваат со „сериозни тешкотии“.

Кина обвинета за сајбер нападите на Мајкрософт

Претставници на американскиот Стејт департмент пред патувањето на Шерман изјавија дека таа има за цел да постави „заштитни огради“ и да бара еднакви услови за конкуренција за да се обезбеди врските да не влегуваат во конфликт. Предвидено е Шерман, дипломатот број 2 во Стејт департментот, да се сретне и со кинескиот министер за надворешни работи Ванг Ји за време на нејзината посета на Тијанџин, југоисточно од Пекинг. Таа е највисок американски функционер што ја посети Кина откако претседателот Џо Бајден ја презеде должноста во јануари.

Во Вашингтон разговори меѓу Бајден и Ал-Кадими

американскиот претседател Џо Бајден

Денеска во Белата куќа ќе се одржи состанок меѓу американскиот претседател Џо Бајден и ирачкиот премиер Мустафа ал-Кадими за американското воено присуство во Ирак. До ова доаѓа по неколкудневните разговори во Вашингтон меѓу ирачката делегација и претставници на американската администрација Портпаролот на Пентагон, Џон Кирби изјави дека разговорите се посветени на „долгорочната воена соработка“ меѓу Ирак и Соединетите држави.

Напад со дрон врз американска воена база во Ирак

Американскиот министер за одбрана Лојд Остин кој се приклучи на разговорите изјави дека целта е да се „потврди посветеноста“ за продолжување на борбата против екстремистите на Исламската држава. Стратешкиот дијалог меѓу Соединетите држави и Ирак треба да резултира и со временски распоред за повлекување на меѓународната коалиција која се бори против Исламска држава од 2014 година.

Состанок на српските парламентарни партии од РС по повод одлуката на Инцко

Парламентот на Република Српска

Претседателите на сите парламентарни партии од Република Српска денеска ќе одржат состанок, за, како што наведе претседателот на тоа собрание Недељко Чубриловиќ, да ги усогласат своите позиции во врска со одлуката на високиот претставник во БиХ Валентин Инцко да наметне закон за забрана за негирање и казнување на геноцид и воени злосторства“.

„Српски свет“ закана по безбедноста на Балканот?

Сите политички партии од РС оценија дека оваа одлука на Инцко е лоша и дека тоа дополнително ќе ја влоши политичката состојба и тензиите во БиХ, како и дека нема да придонесе за помирување на народот. Најостра беше реакцијата на српскиот член на Претседателството на БиХ, Милорад Додик, повторувајќи дека не се случил геноцид во Сребреница и најавувајќи дека РС е „принуден да го започне процесот на распуштање“.

Русија и Кина предлагаат укинување на високиот претставник во БиХ


Канцеларијата на високиот претставник изјави дека наметнатиот закон ќе стапи на сила осум дена по објавувањето на одлуката, односно в сабота, на 31 јули, на привремена основа, сè додека не биде усвоен од Парламентарното собрание на Босна и Херцеговина во истиот форма, без измени и дополнувања и без дополнителни услови. Наметнатиот закон се заканува до пет години затвор за негирање геноцид и величање на обвинетите за воени злосторства.

Бугарија ги затвора границите за патниците од Холандија, Малта, Андора и Грузија

Бугарија, сертификат за ковид-19

Бугарија од денеска се затвора за патниците-странци кои ќе пристигнуваат од Холандија, Малта, Андора и Грузија. Бугарските државјани кои пристигнуваат од овие земји, како и на лицата со постојано жителство во нив и членовите на нивните семејства, дозволен ќе им биде влез во земјата само со негативен тест за ковид-19, без разлика дали биле вакцинирани или не, се предвидува во новата наредба на бугарскиот министер за здравство. Во Црвената зона од минатата недела се и Велика Британија, Шпанија, Кипар и Кувајт. Влегувањето во црвената зона значи дека Бугарија не дозволува посети од овие земји, освен доколку не станува збор за бугарски државјани и лица со статус на постојан, долгорочен или продолжен престој во земјата и на членовите на нивните семејства.

Секој трет заразен во Бугарија е од делта сојот

Во овие случаи, не е важно дали некое лице е вакцинирано – мора да покаже негативен PCR за влез во Бугарија. Можно е тестот да се замени со 10-дневен карантин и да се откаже доколку се прикаже негативен тест за PCR во рок од 24 часа по собирањето. Бугарија им дозволува на туристите од Русија да влезат со негативен PCR тест, без разлика дали биле вакцинирани, иако, како што забележаа тамошните медиуми, приморскиот град Бургас пред неколку дена се врати во жолтата зона поради зголемувањето на новите случаи со зарази.

Францускиот парламент ја усвои проширената употреба на санитарната пропусница

протест против новите мерки за борба против епидемијата на коронавирус во Париз, Франција, 17 јули 2021 година.

Францускиот парламент ја усвои продолжената употреба на санитарната пропусница доцна синоќа по викендот за време на кој се одржаа протести против таа обврска низ целата земја. Долниот дом на парламентот со 156 гласа „за“, 60 „против“ и 14 воздржани го усвои текстот за задолжителна санитарна пропусница за влез во ресторани и во јавниот превоз, како и за задолжителна вакцинација на здравствените работници. Претходно, Горниот дом, Сенатот, веќе го усвои законот за кој многумина сметаат дека ја ограничува слободата. Според усвоениот текст, нема да има отпуштања на лица кои не се согласуваат на задолжителна вакцинација против коронавирусот. Но, на овие вработени им се заканува суспензија на плата.

СЗО ги повика богатите земји наместо да вакцинираат деца, да ги донираат вакцините

Вакцината е задолжителна за медицинските работници, пожарникарите и оние кои работат со стари лица, додека санитарната пропусница, односно доказот за вакцинација, прележан ковид-19 или негативен тест за коронавирус, ќе биде задолжителна за кафулиња, ресторани, саеми и патувања со авион и воз. За тој текст сè уште треба да расправа Уставниот совет на Франција. Во исто време, властите продолжуваат да промовираат вакцинација. Скоро 60 проценти од населението примило една доза на вакцината.

Вчитај повеќе

XS
SM
MD
LG