Достапни линкови

Заев и Брнабиќ го отворија едношалтерскиот граничен премин


Едношалтерски граничен премин на Македонија и Србија

Денеска започнува со работа концептот „One Stop Shop“ на граничниот премин Табановце – Прешево. Со него Македонија и Србија стартуваат заедничка гранично-царинска контрола при што во двете држави ќе се влегува и излегува со само едно запирање.

Граѓаните отсега ќе минуваат само со едно застанување на граничниот премин Табановце - Прешево на македонско-српската граница, наместо еднаш на македонска, еднаш на српска страна како досега. Премиерите на двете земји, Зоран Заев и Ана Брнабиќ на свеченоста на меѓуграничниот простор порачаа дека двете држави со новината го забрзуваат протокот на патници и стока и го намалуваат времето на чекање за двојно. За излез од Македонија, пасошката контрола и царинската управа од денеска ќе се спроведуваат на српската страна од границата, а македонските полицајци и цариници ќе се преселат во објектот на српските колеги. За влез од Србија во Македонија, пак, ќе се користат објектите од македонска страна на границата.

„One Stop Shop“ на граничниот премин Табановце – Прешево
please wait

No media source currently available

0:00 0:01:57 0:00

Премиерот Зоран Заев рече дека проектот за заедничко управување со граничниот премин Табановце – Прешево, со едно застанување значително ќе придонесе кон развивањето на регионалната економска соработка.

„Според нашите проекции и анализи очекуваме дека со One-stop-shop и со дигитализацијата на царинските услуги, превозниците и извозниците ќе имаат заштеда од околу 8 милиони евра, извозот добива потенцијал да порасне за 4 проценти, надворешно-трговската размена може да порасне за околу 5 отсто, а бројот на туристи да се зголеми за 8 проценти “, рече Заев.

Премиерот рече дека преку Табановце во 2018 година поминале околу 200 илјади камиони што претставува околу една четвртина од вкупниот промет на товарни возила во 2018 година. Се очекува овој број да биде зголемен за околу 30 отсто и оваа година да биде околу 260 илјади камиони.

Српската премиерка Ана Брнабиќ вели дека ги разбира потребите на луѓето од двете држави да патуваат послободно, но додава дека и е јасно оти досега стопанството се соочуваше со големи трошоши и проблеми заради бавните, неефикасни и прекумерно административни гранични премини.

„Регионалната соработка е најважна. Најважна за нашата домашна економија, малите, средните претпријатија, семејните фирми, затоа што покрај европскиот пазар која за сите нас е пазар број еден, регионалниот пазар е пазар број два. Значи без вакви работи нема да има економски просперитет. Без економски просперитет нема да има подобар живот за граѓаните на нашиот регион“, рече Бранбиќ.

Српската премиерка смета дека ова е пример како регионалната соработка им го менува животот на граѓаните. Таа изјави дека вкупната надворешно-трговска размена меѓу двете земји минатата година надминала 1 милијарда евра, од кои 856 милиони евра се однесуваат на трговија со стоки, а 198 милиони евра остануваат на секторот услуги.

Со пуштањето на граничниот премин стартуваше официјалната посета на српската премиерка на државава. По официјалниот пречек пред Владата со Заев ќе потпишат договори за соработка и ќе одржат заедничка прес-конференција.

  • 16x9 Image

    Пелагија Стојанчова

    Новинарската кариера ја започна како радио водител на музичка емисија во локалното радио во Кратово. Во 2008 година работеше како новинар за култура и образование во бесплатниот дневен весник Шпиц. Од јануари 2009 работи како дописник за Радио Слободна Европа.

XS
SM
MD
LG