Американскиот претседател Доналд Трамп в понеделник, 29 декември треба да го пречека израелскиот премиер Бенјамин Нетанјаху во Флорида за да разговараат за следната фаза од мировниот план на Трамп за Газа.

Кревок прекин на огнот е во сила во Појасот Газа од 10 октомври, откако Израел и Хамас се согласија на план од 20 точки, поддржан од Вашингтон, за да се стави крај на повеќе од двегодишните борби.

Сега се очекува спроведувањето на втората фаза од планот, според која Хамас треба да го положи оружјето и да се распоредат меѓународни сили за стабилизација, да биде многу посложено.

Хамас, кое САД и ЕУ го прогласија за терористичка организација, досега ги отфрли сите повици за разоружување.

Видете и ова:

Израел вели дека Хамас ќе биде разоружан откако групата предложи „замрзнување“ на оружјето

Се очекува Трамп и Нетанјаху, кои треба да се сретнат во Мар-а-Лаго по шести пат оваа година, да разговараат и за Иран, за кој Израел вели дека ги надополнува своите ракетни залихи по размената на напади со земјата претходно оваа година. Двајцата лидери ќе разговараат и за Либан и Сирија, при што САД се клучен посредник во израелските напори за склучување безбедносни договори со своите северни соседи.

Нетанјаху ќе биде придружуван од родителите на последниот израелски заложник чии останки сè уште се чуваат во Газа. Како дел од договорот за прекин на огнот, Хамас се согласи да ги ослободи сите заложници киднапирани за време на нападите од 7 октомври 2023 година во замена за палестински затвореници.

Според договорот, втората фаза од мировниот договор ќе стапи на сила само откако сите заложници, живи и починати, ќе бидат вратени во Израел.

Рускиот министер за надворешни работи Сергеј Лавров тврди дека Украина нападнала една од резиденциите на претседателот, Владимир Путин. Лавров денеска (29 декември) изјави дека Москва ќе возврати и ќе го преиспита својот став во преговорите што се водат за ставање крај на руската инвазија врз Украина.

Украинскиот претседател, Володимир Зеленски за тврдењата дека Киев ја гаѓал резиденцијата во Новгородската област, северозападно од Москва, изјави дека станува збор за „лага“.

Тој рече дека Русија се обидува да ги поткопа разговорите меѓу САД и Украина за војната и дека „подготвува терен за изведување удари, најверојатно врз (украинската) престолнина и владините згради“.

Руското обвинување следува еден ден откако Зеленски и Трамп на состанок на Флорида претставија, како што наведоа, напредок. Американскиот претседател кој телефонски разговараше со Путин пред состанокот изјави дека мировниот договор за завршување на речиси четиригодишната инвазија би можел да биде „поблиску од кога било“.

Видете и ова:

Зеленски: Руските акции во Украина не се совпаѓаат со „мирната реторика“ на Путин во разговорите со Трамп

Москва наведе дека не е подготвена да направи значајни отстапки.

Русија тврди дека Украина извела „терористички напад“

Во соопштение објавено на Телеграм на 29 декември, Лавров тврди дека Украина употребила 91 дрон во, како што наведе, „терористички напад“, но дека сите биле соборени и дека засега нема извештаи за причинета штета.

Лавров изјави дека Русија нема да остане без одговор и дека ги избрала „целите и времето“ за одмазда.

Тој додаде дека, откако украинската влада, која ја нарече „криминален киевски режим“, прибегнала кон „политика на државен тероризам“, руската „преговарачка позиција ќе биде преиспитана“. Тој не даде подетални информации.

Руските официјални претставници и во минатото користеа слични зборови за да ја опишат украинската влада, а Путин повеќепати тврдеше дека Зеленски не е легитимен лидер бидејќи во 2024 година не беа одржани избори.

Изборите во Украина се забранети поради вонредната состојба, која е на сила откако Русија ја започна инвазијата во февруари 2022 година.

Лавров не ја именуваше резиденцијата, но локацијата во Новгородската област сугерира дека станува збор за добро обезбеден комплекс во Валдај, град чија шумска околина, Путин ја претпочита во однос на другите државни резиденции откако ја започна инвазијата врз Украина во 2022 година - откри истрага на „Система“, руската истражувачка единица на РСЕ.

Видете и ова:

Трамп по средбата со Зеленски изјави дека разговорите за мир во Украина одат во „вистинската насока“

Зеленски во соопштение, тврдењата на Лавров ги нарече „уште една лага на Руската Федерација“.

„Силни“ безбедносни гаранции

Неколку часа пред објавата на Лавров, Зеленски изјави дека САД ѝ понудиле на Украина „силни“ безбедносни гаранции во траење од 15 години во рамки на договор за ставање крај на војната со Русија, но дека Киев бара подолго ветување од Вашингтон за држење на Москва под контрола.

„Му реков (на Трамп) дека веќе имаме војна и дека таа трае речиси 15 години. И затоа навистина сакав гаранциите да бидат подолготрајни“, им изјави Зеленски на новинарите во разговор преку WhatsApp, ден по состанокот со Трамп на Флорида.

Тој зборуваше за руската анексија на Крим во 2014 година, која ѝ претходеше на целосната инвазија на Москва во февруари 2022 година.

„Му реков дека навистина сакаме да ја разгледаме можноста за 30, 40, 50 години. Претседателот рече дека ќе размисли за тоа“, додаде Зеленски.

„Без безбедносни гаранции, оваа војна навистина не е завршена. Не можеме да признаеме дека е завршена, бидејќи може да постои ризик од обновување на агресијата од таков сосед“, изјави тој.

Двајцата лидери се сретнаа во неделата во одморалиштето на Трамп,
Мар-а-Лаго, во Палм Бич, Флорида, на разговори за договор за ставање крај на најдолгиот и најсмртоносен конфликт во Европа од Втората светска војна. Двајцата ја оценија средбата како „продуктивна“, иако не беше постигнат конкретен напредок.

Зеленски во разговор со новинарите изјави дека некои прашања од мировниот план од 20 точки остануваат нерешени и повика на состанок на советниците за национална безбедност од двете земји, како и од Европа, во „наредните денови“.

Видете и ова:

Илјадници се смрзнуваат во Киев по рускиот напад со дронови во пресрет на разговорите Зеленски - Трамп

По двочасовните разговори, Трамп изјави дека мировните преговори „се движат во вистинска насока“.

Тој не ја спомена можноста да биде домаќин на лидерите во Вашингтон во јануари.

Трамп и Зеленски исто така остварија телефонски разговор со европски лидери, меѓу кои францускиот претседател Емануел Макрон, британскиот премиер Кир Стармер, германскиот канцелар Фридрих Мерц и генералниот секретар на НАТО, Марк Руте.

Зеленски им изјави на новинарите дека секој мировен план мора да биде потпишан од Украина, Европа, САД и Русија, додавајќи дека Киев се надева на „брз напредок“ и дека е „отворен“ за секој формат на средби.

Киев останува непоколеблив во барањето безбедносни гаранции особено од САД, но и од Европа и се спротивставува на тврдите барања на Кремљ, кои вклучуваат отстапување украинска територија на Русија.

Едно од клучните прашања во сржта на тековните преговори е судбината на источниот регион Донбас.

Поголем дел од таа територија е под руска контрола, а Москва бара Киев да ги предаде и деловите што Русија не ги контролира. Тоа вклучува два големи града – Краматорск и Славјанск, кои се клучни за украинската одбрана во тој регион.

Трамп им изјави на новинарите на Флорида, за време на заедничката прес-конференција, дека територијалните прашања вклучително и иднината на регионот Донбас остануваат нерешени и дека се покажале како „многу тешко прашање“.

Додека траат дипломатските активности и преговорите, Русија покажа мала подготвеност за компромис, дури и одбивајќи да го разгледа божиќното примирје што го предложи Зеленски.

Портпаролот на Кремљ, Дмитриј Песков, им изјави на новинарите во Москва во понеделникот дека се согласува со оценката оти разговорите се во завршна фаза, но истовремено го повтори ставот на Путин дека Украина треба да ги повлече своите трупи од Донбас за процесот да напредува.

Непосредно пред почетокот на разговорите на Флорида, Трамп и Путин ненадејно разговараа телефонски, за што Кремљ соопшти дека разговорот траел повеќе од еден час и дека бил остварен на барање на Трамп. Во објава на социјалните мрежи, Трамп го опиша разговорот како „добар и многу продуктивен“.

Видете и ова:

Кремљ ги намали шансите за договор за Украина за време на Божиќ

Песков изјави дека двајцата лидери ќе одржат уште еден разговор „многу скоро“.

Главниот помошник на Путин за надворешна политика, Јуриј Ушаков, изјави дека Путин и Трамп се согласиле да не ја поддржат иницијативата за привремен прекин на огнот пред да се постигне решение, за што Зеленски повторно се заложи во разговор со новинарите во понеделникот.

Зеленски изјави дека е потребен прекин на огнот од 60 дена за да се овозможи одржување референдум во Украина за мировниот план.

Русија не е заинтересирана за каков било вид прекин на огнот, „засега“, додаде Зеленски.

Минатиот месец, Белата куќа предложи план од 28 точки кој беше оценет како многу поволен за Русија.

Државната изборна комисија (ДИК) денеска (29 декември) едногласно ги донесе одлуките за подготовките за одржување на повторените локални избори закажани на 11 јануари 2026-та година во четири општини Гостивар, Врапчиште, Центар Жупа и Маврово Ростуше.

На денешната седница, ДИК го усвои и конечниот извештај за одржаните локални избори 2025 којшто треба да го достави до Собранието.

„Овој извештај го доставуваме како и секогаш, после сите избори согласно Изборниот законик до Собранието и извештајот јавно се објавува, ги содржи потребните податоци за спроведените изборни дејствија од страна на Државната изборна комисија, преземените активности хронолошки се подредени, надлежностите и сè она што беше преземено од наша страна за време на изборниот процес“, рече претседателот на ДИК, Борис Кондарко.

Тој додаде дека извештајот ги содржи и сите финансиски аспекти во врска со спроведувањето на изборите, трошоците кои ги имала Комисијата, а кои се наменети за целокупното работење и целокупните трошоци за сите изборни дејствија во врска со спроведените Локални избори.

Видете и ова:

Во четири општини почна изборната кампања за градоначалник

На денешната седница беа усвоени и предлог одлука за формирање на работна група задолжена за подготовка, проверка на доверливиот и недоверливиот изборен материјал и неговата достава до општинските изборни комисии за изборите кои ќе се одржат на 11 јануари.

Работната група има овластувања, како и работните групи за локалните избори, но е во помал формат, наменета за изборите во четирите општини.

„Ние донесовме ваква одлука и во пресрет на локалните избори 2025 година. Со оглед дека важноста на оваа одлука е до 31.12, годинава, а поради повторените локални избори во јануари 2026-та, мораме да ги ангажираме овие лица кои ќе ги извршуваат истите функции, ќе ги имаат истите надлежности како и за локалните избори и на овие повторени избори“, рече Кондарко.

Тој додаде дека ангажманот на овие лица ќе биде ограничен само на еден месец за време на спроведувањето на повторените избори.

На денешната седница беше донесена и одлука за формирање на работна група за меѓуинституционално координативно тело за ИКТ и безбедносни прашања.

И оваа работна група ангажира стручни лица, експерти од ИТ сферата и безбедност за непречено одржување на изборите, чиишто овластувања и надлежности не се менуваат туку наменски се определени за потребниот временски период за потребите на претстојните избори.

Изборите за градоначалник во овие четири општини се повторуваат бидејќи на Локалните избори 2025 таму немаше доволен број граѓани излезени на гласање.

Според податоците од Државната изборна комисија (ДИК), во овие општини во првиот круг на 19 октомври не беше постигната законската излезност од најмалку една третина (33,33 проценти) од запишаните гласачи, што е услов за изборите да се сметаат за успешни.

Во Гостивар одзивот беше 33,31 процент, во Врапчиште – 25,18 проценти, во Маврово и Ростуше – 30,31 процент и во Центар Жупа – 21,49 проценти.

Собранието денеска во рамки на 79. пленарна седница со 73 гласа „за“и еден „воздржан“ го донесе Законот за Судски совет.

Главната цел на законските измени е да ги отстранат досега утврдените слабости во постојната правна рамка и да обезбедат пофункционален, транспарентен и отчетен Судски совет.

Клучни новини кои се предвидени со Законот се: јавност во постапката за разрешување на претседател на Судскиот совет, прецизирање на критериумите за избор на „истакнат правник“ и воведување јавна расправа при избор на кандидатите за не-судски членови со цел поголема транспарентност и одговорност.

Воедно, предвидено е и зајакнување на критериумите за избор, одговорност и разрешување на членови на Советот од редот на судиите, јасно прецизирање на постапката за дисциплинска одговорност на судиите, но и на членовите на Судскиот совет.

Видете и ова:

Интерпелации во судството: тенка граница помеѓу контрола и влијание

Значајна новина е и воспоставување обврска Судскиот совет да ги прецизира, индивидуализира и образложи одлуките за избор и утврдување одговорност на судиите, утврдување на рокови за преземање дејствија за дисциплинска одговорност на судиите, како и прецизирање на основите и постапката за жалба против одлуката на Судскиот совет и бројни други решенија за унапредување на целокупната правна рамка согласно препораките на Европската Унија.

Овој закон, заедно со другите правосудни закони е дел од целите на ЕУ за зајакнување на владеењето на правото. ЕУ во своите извештаи често укажува на: политички влијанија, слаба одговорност и недоволна транспарентност на оваа институција.

Унијата нагласува дека непристрасен, независен и транспарентен Судски совет е клучен за довербата во правосудството и за напредок во пристапните преговори на земјата во ЕУ.

Судскиот совет е составен од 15 члена, од кои тројца ги избира Собранието со Бадентерово мнозинство. Други двајца предлага претседателот на државата, но изборот го врши Собранието. Еден од овие два члена треба да биде припадник на помалите етнички заедници.

Осум члена, пак, ги избираат судиите од своите редови на непосредни избори, со тоа што тројца од нив се припадници на заедниците кои не се мнозинство во државава.

Останатите двајца членови се дел од Советот само по функција – може да присуствуваат на седници, но немаат право на глас, а тоа се претседателот на Врховниот суд и министерот за правда.

Претседателот на Украина, Володимир Зеленски, денеска, 29 декември изјави дека руските напади врз Украина и домашните пораки на Владимир Путин за војната не одговараат на неговата „мирна реторика“ кон американскиот лидер Доналд Трамп.

„Од една страна, тој му кажува на претседателот на Соединетите Држави дека сака да ја заврши војната и дека тоа е негова желба“, им рече Зеленски на новинарите, додавајќи:

„А од друга страна, тој отворено ги споделува во медиумите сите свои пораки за тоа дека е подготвен и сака да ја продолжи војната - нè напаѓа со ракети, отворено зборува за тоа, го слави уништувањето на цивилната инфраструктура, им дава инструкции на своите генерали каде да напредуваат и што да заземат и така натаму. Според мене, овие акции не одговараат на наводно мирната реторика што ја користи во дијалозите со претседателот на Соединетите Држави“, рече Зеленски.

Видете и ова:

Трамп по средбата со Зеленски изјави дека разговорите за мир во Украина одат во „вистинската насока“

Зеленски, меѓудругото изјави дека смета дека присуството на странски трупи во Украина е неопходен дел од безбедносните гаранции за Киев, како дел од секој договор за завршување на војната со Русија.

„Верувам дека присуството на меѓународни трупи е вистинска безбедносна гаранција, тоа е зајакнување на безбедносните гаранции што нашите партнери веќе ни ги нудат“, изјави Зеленски.

Украинскиот претседател вели дека територијалните прашања и иднината на нуклеарната централа Запорожје, која е окупирана од Русија, се последните нерешени делови од разговорите за завршување на војната меѓу Украина и Русија.

„Остануваат две прашања: нуклеарната централа Запорожје - како ќе функционира - и прашањето за териториите. Затоа реков дека овој план од 20 точки е 90 проценти готов“, потенцираше Зеленски.

Американскиот претседател Доналд Трамп по двочасовната клучна средба со украинскиот претседател Володимир Зеленски и телефонските разговори со европските лидери изјави дека разговорите за завршување на војната на Русија против Украина „одат во вистинската насока“.

Средбата со Зеленски во Флорида беше кулминација на недели телефонска и шатл-дипломатија, но и најопипливиот знак за напредок во преговорите за прекин на борбите, во кои, по речиси четири години, се убиени или ранети повеќе од 1,5 милиони луѓе на двете страни.

Пред Домот на Народното собрание во центарот на Белград, доцна синоќа (28 декември) беа отстранети шаторите каде што повеќе од осум месеци престојуваа поддржувачите на властите.
Претседателот на Србија, Александар Вучиќ, во обраќање пред приврзаници на властите собрани синоќа пред парламентот, најави дека во следните неколку дена, таму ќе биде отворено божиќно село за сите граѓани, по што сообраќајот во тој дел од градот ќе биде нормализиран.

Вучиќ, исто така, најави дека во следниот месец ќе бидат отстранети шаторите од паркот Пионирски, што се наоѓа спроти српскиот Парламент, поставени во март оваа година.
Претходно, дел од шаторите беа отстранети од Пионирски.

Вучиќ, синоќа објави дека следната година ќе се одржат избори, на кои, како што рече, актуелните власти ќе постигнат убедлива победа и со тоа „дефинитивно ќе се потврди довербата на граѓаните“.

„Го прифативме нивното главно барање, ќе одиме на избори следната година. Нема да бидат толку среќни кога ќе ги пребројуваат гласовите. Ќе ги победиме на секое место во Србија“, рече Вучиќ, обраќајќи се пред насобраните пред Народното собрание.

Видете и ова:

Вучиќ најави отстранување на „Ќациленд“

Вучиќ рече дека „обидите за преземање на власта на улица се завршени“, тврдејќи дека граѓаните собрани околу Пионирски парк и платото пред Собранието „ја спасиле државата“.

„Мојот предлог е да се ослободи овој простор за некое време, бидејќи нивните обиди за преземање на власта се завршени“, рече српскиот претседател.

Тој додаде дека негова иницијатива е да се отстрани шаторската населба позната коликвијално како „Ќациленд“ од Пионирски парк и од платото пред Народното собрание, бидејќи верува дека, како што изјави, „обидот за преземање на власта со сила е пробан и завршен“.

Лидерот на Движењето Самоопределување, Албин Курти, во неделата прогласи победа на изборите, наведувајќи дека станува збор за „најголемата победа во историјата на земјата“, откако Централната изборна комисија (ЦИК) соопшти дека таа партија, врз основа на 96,13 отсто преброени гласови, освоила 49,80 отсто од гласовите.

На второто место е Демократската партија на Косово (ДПК) со 21,18 отсто, а следуваат Демократскиот сојуз на Косово (ДСК) со 13,77 отсто и Алијансата за иднината на Косово со 5,74 отсто.

Српската листа, најголемата партија на косовските Срби која има поддршка од Белград, освои 3,86 отсто од гласовите.

Курти, во обраќањето по изборите, изјави дека на изборите на 9 февруари „Движењето Самоопределување победи со партнерите, а на 28 декември победија народот на Косово и Републиката“.

Видете и ова:

Косово гласа на предвремени избори по месеци политички ќорсокак

Тој рече дека неговата партија е на добар пат да го надмине резултатот од 14 февруари 2021 година, кога освои 50,2 отсто од гласовите.

Според него, резултатите од неделните избори бараат веднаш да се продолжи напред, без одлагање.

„Колку побрзо (резултатите) бидат потврдени, толку побрзо ќе мора да ги воспоставиме институциите и да продолжиме со добрата работа“, рече Курти.

Тој додаде дека новиот состав на законодавната власт го очекува Планот за раст на ЕУ вреден 880 милиони евра, како и три договори со Светската банка, кои, како што рече, вкупно изнесуваат повеќе од една милијарда евра.

„Ги повикувам опозициските партии да соработуваат во Собранието околу меѓународните договори и другите законски предлози“, изјави Курти.

На прашањето за изборот на претседател на Косово, Курти рече дека е прерано да се зборува за тоа, нагласувајќи дека Самоопределување „вечерва ќе слави“, но додаде дека тоа прашање треба да се реши со опозицијата, како и со актуелната претседателка Вјоса Османи, чиј мандат истекува во март.

Претседателот на ЦИК, Крешник Радониќи, изјави дека преостанатите гласови ќе бидат обработени и објавени на онлајн-платформата на ЦИК.

Вонредните избори беа одржани откако, по редовните избори во февруари, на кои Самоопределување исто така освои најмногу гласови, партиите не успеаја да се договорат околу формирањето влада.

На изборите во февруари, Самоопределување освои 42,3 отсто, ДПК 20,95 отсто, ДСК 18,27 отсто, Алијансата за иднината на Косово 7,06 отсто, а Српската листа 4,26 отсто.

Собранието на Косово има 120 пратенички места, а за обезбедување парламентарно мнозинство и формирање Влада потребни се 61 мандат.

Претседателката на Косово, Османи, по гласањето во Приштина изјави дека очекува резултатите да овозможат брзо формирање на Собранието и избор на нова Влада на Косово.

Формирањето на овие институции, според неа, е неопходно за важни внатрешни и меѓународни процеси за Косово.

Видете и ова:

Рокови за избегнување на потенцијална блокада на Косово по изборите на 28 декември

Ова се втори парламентарни избори што се одржуваат во рок од една година во Косово, бидејќи на партиите им беа потребни повеќе од шест месеци за да формираат парламент со неколку интервенции од страна на Уставниот суд, но на крајот не успеаја да се договорат за извршната власт.

Поради политичката блокада и неможноста за постигнување договор, Собранието беше распуштено и беа распишани предвремени избори.

Мал број гласачки места имале проблеми со камерите и поставувањето на кабините, додека 16 проценти од местата немале соодветна инфраструктура за лицата со попреченост.

Набљудувачите, исто така, пријавиле присуство на пропаганден материјал во рамките на сто метри од центрите во три проценти од случаите и недостаток на шалтери за помош во 18 проценти од местата, главно во Урошевац, Гњилане и Пеќ.

Во повеќе од сто општини и градови, на повеќе од 500 штандови, се одржува кампањата „Објави победа“ на покана на студентите во блокадата во Србија.

На 28 декември, граѓаните потпишаа барање за вонредни парламентарни избори, што студентите во блокадата го бараат во последните осум месеци.

„Да дојдеме до конечниот резултат, а тоа се избори и промена на власта“, вака Жељко Петровиќ од Белград го објасни својот потпис за Радио Слободна Европа (РСЕ).

Видете и ова:

Протести во Србија: Поддршка за студентите и професорите во Нови Пазар

Поради падот на бетонската настрешница на реконструираната Железничка станица во Нови Сад на 1 ноември 2024 година, при што загинаа 16 лица а една млада жена беше сериозно повредена, низ цела Србија беа започнати масовни протести.

Студентите во блокадата, кои ги предводеа протестите, на своите барања на почетокот на мај го додадоа и распишувањето вонредни избори.

Потоа тие објавија дека влегуваат во „нова фаза на борба“ бидејќи владата не ги исполнила нивните барања.

Функционерите тврдат дека барањата се исполнети, наведувајќи дека документацијата за падот на настрешницата е објавена и дека против осомничените се покренати правни процеси.

Тие не го прифаќаат барањето за вонредни избори, а претседателот на Србија, Александар Вучиќ, најавува дека изборите ќе се одржат во мај или декември 2026 година.

Во врска со акцијата на студентите во која собираат потписи за изборите, тој рече дека тоа е нормална и дозволена политичка активност, која ја поздравува.

„А кога ќе дојдат изборите, ќе видиме кој се справил подобро“, изјави Вучиќ на 27 декември.

Видете и ова:

Една година по трагедијата, Србија се сеќава на жртвите во Нови Сад

Студентите во блокадата ги повикаа граѓаните да ја потпишат одлуката со која се бара Владата да испрати образложен предлог до претседателот на Србија за распуштање на парламентот и распишување вонредни парламентарни избори.

„Оваа одлука е чин на граѓаните во одбрана на Уставот и правото на секој од нас да одлучува за својата земја“, се вели во одлуката потпишана од граѓаните.

Во претходните месеци, студентите протестираа низ цела Србија барајќи избори и одговорност за падот на настрешницата во Нови Сад.

Сега тие повикаа на поинаков тек на дејствување. Потписите собрани во кампањата „Прогласи победа“ нема да бидат испратени до ниедна институција како формално барање за распишување избори.

Ова исто така не се, како што објаснија студентите, потписи за поддршка на студентскиот список.

Како што наведоа, покрај вмрежување со граѓаните, тоа ќе им даде можност да видат колку поддршка имаат граѓаните за вонредни избори.

Видете и ова:

Уапсениот студент од Нови Сад присуствуваше на погребот на својот татко врзан со синџир

Една година по трагедијата во Нови Сад, никој не е осуден.

На 24 декември, Вишиот суд во Нови Сад ја прекина кривичната постапка против поранешниот министер за градежништво Горан Весиќ, неговата поранешна помошничка Анита Димоски и поранешната директорка на Железничката инфраструктура на Србија, Јелена Танасковиќ, во случајот со падот на настрешницата на железничката станица.

Тие беа обвинети за тешко кривично дело предизвикување општа опасност.

Судот објави дека обвинението е потврдено против седум лица.

Обвинителството има право да поднесе жалба против таа одлука.

Обвинителството за организиран криминал во Белград истражува можна корупција за време на реконструкцијата на железничката линија Белград-Будимпешта, која ја вклучува и железничката станица Нови Сад.

Во истрагата беа вклучени и двајца поранешни министри за градежништво, транспорт и инфраструктура, Горан Весиќ и Томислав Момировиќ, како и одговорни лица на приватни компании како подизведувачи.

Признавањето на отцепениот регион Сомалиленд од страна на Израел „претставува закана за безбедноста и стабилноста на светот и регионот“, рече сомалискиот претседател Хасан Шеик Мохамуд на вонредна парламентарна седница на 28 декември, јави агенцијата АФП.

Соопштението на израелскиот премиер Бенјамин Нетанјаху во петокот, 26 декември, со кое неговата земја стана прва што ја призна Сомалиленд, „е еднакво на отворена агресија против суверенитетот, независноста, територијалниот интегритет и единството на народот на Сомалиската Република“, рече Мохамуд.

Сомалиленд прогласи независност од Сомалија во 1991 година и со децении се залага да добие меѓународно признавање.

Самопрогласена република, Сомалиленд ужива стратешка позиција на Аденскиот Залив и има свои пари, пасоши и армија.
Но, таа е дипломатски изолирана откако еднострано прогласи независност.

Владата на Сомалија и Африканската унија реагираа луто по објавата на Израел дека ја признава Сомалиленд како независна и суверена држава.

Сомалиленд го осуди „намерниот напад“ врз нејзиниот суверенитет, додека Египет, Турција, Советот за соработка во Персискиот Залив од шест земји и Организацијата за исламска соработка со седиште во Саудиска Арабија ја осудија одлуката.

Видете и ова:

Израел стана првата земја што ја призна Сомалиленд како независна држава

Израелскиот премиер Бенјамин Нетанјаху изјави дека Израел ќе побара итна соработка со Сомалиленд во земјоделството, здравството, технологијата и економијата.

Во соопштението, тој му честиташе на претседателот на Сомалиленд, Абдирахман Мохамед Абдулахи, го пофали неговото лидерство и го покани во официјална посета на Израел.

Нетанјаху рече дека изјавата е „во духот на Авраамовите договори, потпишани на иницијатива на претседателот Трамп“. Договорите од 2020 година, посредувани од првата администрација на Доналд Трамп, ги формализираа дипломатските односи на Израел со Обединетите Арапски Емирати и Бахреин, а подоцна им се придружија и други земји.

Сомалиленд ужива автономија, како и релативен мир и стабилност, од 1991 година, кога Сомалија беше зафатена од граѓанска војна, но регионот не успеа да обезбеди меѓународно признавање.

Со текот на годините, Сомалија соработуваше со меѓународни актери за да спречи признавање на Сомалиленд.

Поранешниот британски протекторат се надева дека признавањето од страна на Израел ќе ги охрабри другите држави да го следат примерот, со што ќе се зголеми неговото дипломатско влијание и пристапот до меѓународните пазари.

Велика Британија во неделата соопшти дека потпишала договор за заедничка набавка од 52 милиони фунти (70 милиони долари) со Германија за набавка на напредна артилерија монтирана на оклопни возила што можат да пукаат додека се движат и да погодуваат цели на растојание од повеќе од 70 километри, јави агенцијата Ројтерс.

Видете и ова:

Зошто толку многу лидери предупредуваат на војна со Русија?

Во соопштението на Министерството за одбрана се вели дека договорот ќе ѝ обезбеди на британската армија ран демонстратор на способности на системот РЦХ 155 и две единици што Германија ќе ги тестира.

Системот е произведен од француско-германската одбранбена група КНДС и германскиот „Рајнметал“ (Rheinmetall).

Системот може да испука осум куршуми во минута во движење, да работи со двајца членови на екипажот и да патува 700 километри без да полни гориво, соопшти британското Министерство за одбрана.