Достапни линкови

Вести

Гир: Северна Македонија треба да го искористи позитивниот моментум и порешително да чекори кон ЕУ

Евроамбасадорот Дејвид Гир
Евроамбасадорот Дејвид Гир

Северна Македонија да го искористи позитивниот моментум и порешително да се движи кон евроинтегративниот пат, порача денеска од Виница евроамбасадорот Дејвид Гир, одговарајќи на новинарски прашања, дали резултатите од евроизборите ќе влијаат на процесот на проширување на ЕУ.

„Лидерите на владите на 27 земји-членки на Европската Унија после европските избори покажаа заложба дека нивната стратешка визија последните пет години ќе биде процесот на проширување, така што можам да кажам дека процесот на проширување останува врвен приоритет“, рече Гир, додавајќи дека не гледа промена и за следната структура на европските инстутиции.


Евроамбасадорот додаде дека во овој момент навистина постои огромна можност за Република Северна Македонија во контекст на проширувањето на Европската Унија.

„Така што јас навистина се надевам дека Северна Македонија, меѓутоа и цел Западен Балкан ќе може да го искористи овој позитивен моментум во контекст на проширувањето на ЕУ и ќе може да се движи порешително кон евроинтеративниот пат“, вели Гир.

На евроизборите во јуни годинава победија партиите од десничарскиот спектар, што доведе до распишување предвремени парламентарни избори во Франција.

И покрај зајакнувањето на десницата, Европската народна партија (ЕПП), предводена на изборите од претседателката на Европската комисија, Урсула фон дер Лајен, останува најсилната фракција во новиот состав на Европскиот парламент со 189 пратенички места.

Во новиот пратенички мандат во 720-члениот парламент, социјалдемократите освоија 133 места, либералите 82, конзервативците 70, Идентитет и демократија 60, а зелените 53 места.

види ги сите денешни вести

Најмалку 71 лице загинаа при израески напад врз камп со раселени Палестинци

Најмалку 71 лице загина во израелски воздушен напад врз камп за раселените Палестинци во јужниот дел на Појасот Газа, соопшти Министерството за здравство на територијата контролирана од Хамас, која САД и ЕУ ја сметаат за терористичка организација. Во меѓувреме Израел вели дека целта на нападот бил шефот на военото крило на таа организација.

Израелски официјален претставник изјави дека цел на нападот бил Мохамед Деиф, еден од организаторите на нападот на Хамас на 7 октомври врз јужен Израел што ја предизвика војната во Појасот Газа.

Уште 289 лица се повредени во нападот во областа Кан Јунис, соопшти Министерството под контрола на Хамас, кое САД и ЕУ го сметаат за терористичка организација. Се додава дека многу повредени и мртви се пренесени во блиската болница Насер.

Нападот се случил во кампот Муваси, кој се наоѓа во хуманитарната зона одредена од Израел, која се протега од северниот дел на Рафах до Кан Јунис.

Радиото на израелската армија во саботата соопшти дека цел на нападот на кампот бил шефот на военото крило на Хамас, Деиф, додавајќи дека не се знае дали е убиен.

Военото радио соопшти дека Деиф се крие во зграда во хуманитарната зона Маваси.

Израелски функционер изјави дека цел на нападот, покрај Деиф, бил и Рафа Салама, уште еден висок функционер на Хамас. Тој не кажа дали во нападот загинале двајца високи функционери на Хамас.

Деиф преживеа седум израелски обиди да го убијат, последниот во 2021 година, и со децении е на врвот на листата на најбарани во Израел.

Во нападот на Хамас на 7 октомври, според израелските податоци, загинале 1.200 луѓе, а биле земени повеќе од 250 заложници. Според здравствените власти во Газа, повеќе од 38.000 луѓе биле убиени во следните израелски офанзиви.

Поплави по силното невреме во јужна Германија

Илустрација
Илустрација

Поплави, сообраќаен хаос и блокирани патишта поради паднати дрвја предзивика големото невреме со град што ја погоди синоќа јужната германска покраина Баварија, јавува германската новинска агенција ДПА.

Во градот Кемптен, југозападно од Минхен, службите за итни случаи пријавиле околу 320 интервенции помеѓу 18 часот и полноќ.


Најпогодени се регионот Алгау и областа Линдау, во близина на Боденското езеро и границата со Австрија. Во тек е расчистување и испумпување на водата од поплавените објекти.

Уште 230 интервенции се пријавени во Розенхајм. Службите за итни случаи интервенирале на поплавените визби и паднати дрва на патиштата и на пруги.

Нема информации за повредени.

При израелски напад врз воен началник на Хамас, загинаа најмалку 20 Палестинци

Илустрација, Појасот Газа
Илустрација, Појасот Газа

Израелската војска на 13 јули го нападнала воениот началник на Хамас која САД и ЕУ ја прогласија за терористичка организација, во нападот врз Кан Јунис во Газа. При нападот загинале најмалку 20 Палестинци, тврди палестинското Министерство за здравство.

Израелското армиското радио соопшти дека не е јасно дали воениот шеф на Хамас Мохамед Деиф е убиен.

Во соопштението на Министерството за здравство на Газа се вели дека болницата Насер во Кан Јунис примила 20 тела и 90 ранети. Во соопштението не е дадена конечна бројка за жртвите преместени во други медицински установи.

Од Хамас која САД и ЕУ ја прогласија за терористичка организација, за новинската агенција Ројтерс велат дека најмалку 100 луѓе се убиени и ранети, меѓу кои и членови на Цивилната служба за итни случаи.

Висок претставник на Хамас не потврди дали Деиф бил присутен.

„Израелските наводи се глупости и имаат за цел да го оправдаат застрашувачкиот масакр. Сите маченици се цивили и она што се случи беше тешка ескалација на војната за геноцид, поддржана од американската поддршка и светскиот молк“, изјави Абу Зухри од Хамас која САД и ЕУ ја прогласија за терористичка организација, за новинската агенција Ројтерс.

Според израелските податоци, милитантите предводени од Хамас убиле 1.200 луѓе и зеле повеќе од 250 заложници во прекуграничен напад во јужен Израел на 7 октомври.

Израел возврати со воена акција во Газа во која загинаа повеќе од 38.000 Палестинци, соопштија медицинските власти во Газа.

Таравари: Комисија ќе го разгледува случајот со тримесечното бебе

министерот за здравство Арбен Таравари
министерот за здравство Арбен Таравари

За случајот со траги на насилство на телото на три месечно бебе, министерот за здравство Арбен Тарвари најави дека веднаш ќе преземе мерки, меѓу кои и специјална комисија која детално ќе го анализира случајот. Станува збор за сторија на порталот „ИКС“ во која семејството на три месечното бебе тврди дека модринките на нивното бебе настале во детската клиника откако со него лошо се однесувала медицинска сестра затоа што не можела да се разбера со семејството на албански јазик.

Таравари вели дека семејството на бебето тврди дека тоа било тепано на педијатрија од медицинската сестра бидејќи мајката на детето не знаела македонски. Тој додаде дека ако се покаже нивното тврдење точно, медицинската сестра веднаш ќе биде отпуштена.

„Јас лично ќе се погрижам веднаш да биде упатена до правните органи. Каква и да е вистината, виновниците за овој грозен и болен чин ќе бидат пронајдени и казнети“, напиша Таравари на својот профил на социјалната мрежа Фејсбук.

Таравари синоќа заедно со директорот на Детската клиника отиде и лично да се сретне со семејството на детето, по што потврди дека бебето има повреди по телото и повтори дека ќе се преземат мерки.

„Родителите се жалеа дека можеби не е третирано како што треба на Клиниката. Заедно со директорот дојдовме одблизу да видиме што се случува. Сите пациенти се важни, но децата се посебно важни. Од утре треба специјална комисија на Клиниката да разгледа и да ја слушне и другата страна. Ви гарантирам дека веднаш ќе преземеме мерки против тие коишто постапиле лошо кон детето коешто дојдовме вечерва да го посетиме. Не смееме да се однесуваме лошо кон пациентите“, рече Таравари.

Мета ги отстрани ограничувањата за Трамп на Фејсбук и Инстаграм

Американскиот кандидат за претседател Доналд Трамп
Американскиот кандидат за претседател Доналд Трамп

Компанијата Мета на 12 јули објави дека ќе отстрани некои ограничувања на профилите на социјалните мрежи Фејсбук и Инстаграм на поранешниот американски претседател и кандидат за нов претседателски мандат, Доналд Трамп.


Мета ги блокираше профилите на Трамп на неодредено време, откако тој ги пофали луѓето кои упаднаа насилно во Капитол на 6 јануари 2021 година.

Компанијата му ги врати профилите на поранешниот американски претседател на почетокот на 2023 година, наведувајќи дека ќе ги следи неговите објави за можни прекршувања, што може да доведе до нова забрана односно заклучување на профилот од еден месец до две години.

Трамп, кој треба да се соочи со актуелниот претседател Џо Бајден на претседателските избори во ноември, веќе нема да биде предмет на дополнителен надзор, соопшти компанијата Мета

Трамп од Пенсилванија ќе го најави потпретседателскиот кандидат

Поранешниот американски претседател Доналд Трамп
Поранешниот американски претседател Доналд Трамп

Поранешниот американски претседател Доналд Трамп ќе има шанса на 13 јули да го претстави својот потпретседателски избор на митингот пред да започне Националната конвенција на Републиканците во Милвоки следната недела.

Митингот на Трамп во Пенсилванија, на шоуто на фармата Батлер надвор од Питсбург, на поранешната реалити ТВ ѕвезда, има за цел да се привлече интересот на јавноста со максимално внимание.

Во изминатиот период Трамп се држеше подалеку од центарот на вниманието, затоа што телевизиските рефлектори беа насочени кон Демократската партија која беше зафарена со кампањата за реизбор на претседателот Џо Бајден но и со делумна криза поради лошата дебата што предизвика повици да се повлече.

Трамп во последниве денови јасно стави до знаење дека неговиот заменик односно кандидат за потпретседател сака и планира драматично да го открие во живо на конвенцијата - нешто што поранешниот претседател опседнат со рејтингот, рече дека ќе ја направи постапката по „интересна“ и „повозбудлива“.

Ер-тракторите ќе ги гаснат пожарите на планините Серта и Огражден

North Macedonia - Air tractor fighting a fire, August 2023
North Macedonia - Air tractor fighting a fire, August 2023

Пожарите во неготинско на планината Серта и штипско на планината Огражден во близина на бугарската граница се уште се активини, известуваат од Центарот за управување со кризи. Оттаму посочуваат дека се интервенира од земја и од воздух при што покрај ангажирањето на армиски и на хеликоптери на МВР, по неколку месеци повторно се ставени во функција и Ер тракторите на Дирекцијата за заштита и спасување, откако се надмина проблемот со пилотите, се вели во сопштението од ЦУК.

„Од рано утрово веќе се дејствува по активните пожари и како засилување на силите кои гаснат од земја, еден армиски хеликоптер започна со дејство врз пожарот на планината Серта додека полицискиот хеликоптер се подготвува да полета, а два авиона на ДЗС е планирано да полетаат кон Серта во 10,00 часот“, се вели во соопштението на ЦУК.

Кризниот штаб на Општина Неготино синоќа излезе со препораки до домаќинствата во селата и во градот, задолжително да ја расчистат трева околу своите дворови и имоти.

„Апелираме до месното население за поголема ажурност, следење на упатствата и насоките од страна на МВР, да нема поголеми движења кон критичните места. Исто така, побарана е повторно до ЦУК и до ДЗС воздухопловна поддршка за утрешниот ден, за да би можело да се изврши побрзо локализирање на пожарите“, информираа синоќа од Штабот за заштита и спасување при локалната самоуправа.

ЦУК информира дека имаше 26 пожари на отворено во последното деноноќие и од нив изутринава како активни се водат 5.

Во јули 2024 до сега, заклучно со 12.07.2024 година, имало вкупно 173 пожари на отворен простор од пошироки размери.

Само од почетокот на годинава до средина на јуни се запалиле над 1175 пожари на отворено во земјава. Во нив спаѓаат и оние на дивите депонии и ѓубришта, потоа ниви, ливади, стрништа и дел шуми.

Топло време со можност за краткотраен дожд

Топло време, илустрација
Топло време, илустрација

Денеска не очекува сончево и многу топло време со мала до умерена локална облачност. Ќе дува слаб до умерен северен ветер. Попладне во крајните западни делови ќе има услови за краткотраен пороен дожд. Минималната температура ќе бид во интервал од 14 до 22 степени, а максималната ќе достигне од 34 до 42 степени. УВ индексот ќе изнесува 10.


Во Скопје сончево и многу топло со мала локална облачност. Минималната темепратура ќе се спушти до 19, а максималната ќе достигне до 40степени.

Во наредните денови, според УХМР, ќе продолжи периодот на сончево и многу топло време со дневна температура која насекаде ќе биде над 30 степени Целзиусови, а наместа ќе надминува 40 степени поради што до крајот на следната работна седмица ќе биде активирано портокалово ниво за опасност од високи температури. Во недела во попладневните часови во западните делови ќе има локална појава на пороен дожд и грмежи.

Се урна руски авион, загинаа тројца членови на екипажот

Авион Сухој Суперџет 100
Авион Сухој Суперџет 100

Службениците за вонредни состојби во Московската област на 12 јули објавија дека патнички авион Сухој Суперџет 100 се урна во близина на градот Коломна, во близина на главниот град на Русија, при што загинаа сите тројца членови на екипажот, јави руската служба на Радио Слободна Европа.

Авионот бил на пат кон московскиот аеродром Внуково по редовна техничка проценка и поправка. Произведен во 2014 година, авионот и припаѓал на Гаспром Авиа.

Градоначалникот на Коломна, Александар Гречишчов, кој го посети местото на несреќата, изјави дека нема жртви освен тројца членови на екипажот.

Покрената е истрага за „прекршување на безбедносните прописи во авионот, што доведе до смрт“.

Цивилниот авион Сухој Суперџет 100 го разви руската компанија Сухој Цивил Авион со учество на западни компании.

Од 2011 година, авионот успеа да најде само двајца странски купувачи - мексикански Интерџет (Interjet) и Ајриш Ситиџет (Irish Cityjet), но и двете авиокомпании се откажаа од авионот поради проблеми во работењето и одржувањето.

По почетокот на руската воена инвазија на Украина, САД, Европската Унија и многу други земји воведоа економски санкции кон Русија.

Тие вклучуваат, меѓу другото, забрана за испорака на западни авијациски компоненти за Русија, вклучително и цивилни авиони, и одржување на руски патнички авиони во земјите кои се приклучија на санкциите.

ОН: До крајот на 21 век, светот ќе има 200 милиони луѓе помалку

Илустрација
Илустрација

Светот на крајот на 21 век ќе има 200 милиони луѓе помалку отколку што се очекуваше претходно, според извештај на Обединетите Нации (ОН) во кој се истакнува драматичното влијание на намалувањето на стапката на наталитетот врз глобалната популација.

Во новото издание на извештајот „Перспективите на светската популација“, кој ОН го објавуваат на секои две години, се наведува дека светското население ќе порасне од 8,2 милијарди во 2024 година на максимумот од околу 10,3 милијарди во 2080 година, за потоа да се намали на околу 10,2 милијарди на крајот на векот.

Во претходното издание на извештајот, од 2022 година, се предвидуваше дека глобалната популација ќе достигне максимум 10,4 милијарди во 2080 година и ќе остане на тоа ниво до 2100 година.

„Демографскиот пејзаж еволуираше во голема мера“, рече заменик-секретарот на ОН за економски и социјални прашања Ли Џунхуа, додавајќи дека нешто побрзо опаѓање на стапката на наталитетот е забележано во некои региони со висока плодност, објави денеска Фајненшл тајмс.

Во повеќе од половина од земјите, просечниот број на живородени по жена е веќе под 2,1, што е нивото на кое популацијата е стабилна.

До 2100 година, населението на Европа ќе се намали за 21 отсто од максимумот во 2020 година, што е најголем пад на некој континент, се вели во извештајот.

Понатаму се сугерира дека намалувањето на бројот на населението може да помогне во ублажувањето на климатските промени со намалување на побарувачката за јаглеродни-интензивни активности, а некои економисти укажуваат на намалениот притисок врз домувањето, инфраструктурата и услугите.

Сепак, намалувањето на работоспособното население и поголемиот удел на постари лица ќе биде дополнителен притисок врз јавните финансии.

Вчитај повеќе

XS
SM
MD
LG