Достапни линкови

Вести

Папата во божиќното обраќање го осуди страдањето на цивилите во Газа

Папата Франциско за време на неговото божиќно обраќање во Ватикан, 25 декември 2023 година.
Папата Франциско за време на неговото божиќно обраќање во Ватикан, 25 декември 2023 година.

Во својата божиќна порака, папата Франциско рече дека децата умираат во војни, вклучително и во Газа и дека израелските напади жнеат „страшна жетва“ на невини цивили.

Во своето божиќно обраќање, Папата го нарече „гнасен“ нападот на милитантите на Хамас врз Израел на 7 октомври и повторно апелираше за ослободување на околу 100 заложници кои се уште се наоѓаат во Газа.

Од балконот на базиликата Свети Петар, Папата повика на прекин на конфликтите, политички, социјални или воени, на многу места меѓу кои Украина, Сирија, Јемен, Либан, Ерменија и Азербејџан и ги бранеше правата на мигрантите ширум светот.

„Колку невини се колат во нашиот свет! Во утробите на нивните мајки, на патувања во очај и во потрага по надеж, во животите на сите оние мали чии детства биле уништени од војната“, рече Папата.

Папата се осврна конкретно на Газа, каде што според палестинските здравствени власти под контрола на Хамас, најмалку 70 лица загинаа во нападот претходната ноќ.

„Нека дојде (мир) во Израел и Палестина, каде војната ги уништува животите на тие народи. Ги прифаќам сите нив, особено христијанските заедници во Газа и целата Света земја“, рече Папата.

Тој додаде дека неговото „срце жали за жртвите од грозоморниот напад на 7 октомври“ и повторно повика на ослободување на заложниците.

Папата повика и на решение за „очајната хуманитарна ситуација“.

Претходно, телото поддржано од Обединетите нации соопшти дека сите 2,3 милиони жители на Газа се соочуваат со критични нивоа на глад и дека ризикот од глад се зголемува секој ден.

види ги сите денешни вести

Средба Вулин-Шојгу во Москва

Секретарот на Советот за безбедност на Руската Федерација Сергеј Шојгу и вицепремиерот на Србија Александар Вулин во Москва, 18 февруари 2025 година
Секретарот на Советот за безбедност на Руската Федерација Сергеј Шојгу и вицепремиерот на Србија Александар Вулин во Москва, 18 февруари 2025 година

Српскиот вицепремиер Александар Вулин и секретарот на Советот за безбедност на Руската Федерација Сергеј Шојгу најавија дека ќе го интензивираат дијалогот за да се спротистават на „обоените револуции“.

Во соопштението на српската влада, објавено по средбата меѓу Вулин и Шојгу во Москва на 18 февруари, се наведува дека „руската страна изразила подготвеност да продолжи да му дава поддршка на братскиот народ на Србија за одржување на стабилноста“.

„Потврдено е категоричното отфрлање на надворешното мешање во внатрешните работи на суверените држави“, се додава во соопштението.

Тврдењата на српските и руските функционери за „обоени револуции“ доаѓаат во време на масовни протести во Србија, каде демонстрантите повеќе од три месеци инсистираат на одговорност за смртта на 15 лица во уривањето на бетонската настрешница на Железничката станица во Нови Сад.

Српскиот претседател Александар Вучиќ на 15 февруари оцени дека е во тек обид за „обоена револуција“, обвинувајќи ги неименуваните центри на моќ дека „инвестиле три милијарди евра“ во рушење на државата.

„Обоена револуција“ е термин кој се користи за опишување на соборувањето на авторитарните режими во поранешниот Советски Сојуз, како што е Украинската портокалова револуција од 2004/2005 година.

По средбата меѓу Вулин и Шојгу во Москва, беше соопштено дека двете страни се договориле да продолжат контактите преку Советот за безбедност на Руската Федерација „во интерес на зајакнување на традиционално пријателските врски меѓу Србија и Русија, како и народите на двете земји“.

Ден пред средбата Вулин-Шојгу, шефот на српската дипломатија Марко Ѓуриќ во Москва се сретна со рускиот министер за надворешни работи Сергеј Лавров.

По таа средба Лавров изјави дека Русија го осудува мешањето на други, пред се западни земји, во внатрешно-политичките процеси во Србија.

Европската Унија реагираше на средбата меѓу Ѓуриќ и Лавров во Москва.

Портпаролот на Европската комисија на 17 февруари изјави дека Србија, како земја кандидат за влез во Европската Унија, треба да се воздржи од акции и изјави кои се спротивни на надворешната политика на ЕУ.

Србија, заедно со Турција, е единствената земја кандидат за членство во ЕУ која не се приклучи на европските санкции против Русија.

Обвинителката Крстевска Цалева бара да не биде шефица на Вишото јавно обвинителство Скопје

илустрација
илустрација

Советот на јавни обвинители на следната седница ќе одлучува по барањето на јавната обвинителка Наташа Крстевска Цалева да биде ослободена од функцијата шефица на Вишото јавно обвинителство Скопје, додека трае оддалечувањето од функција на вишиот јавен обвинител Мустафа Хајрулахи.

Претседателката на Советот на јавни обвинители Душица Димитриевска, на денешната седница, информира дека во текот на вчерашниот ден (17 февруари) до Советот е поднесена молба или барање од страна на обвинителката Наташа Крстевска Цалева.

Како што посочи Димитриевска, обвинителката навела дека „бидејќи од скоро време е во Вишото јавно обвинителство и сака да се посвети на предметното работење, бара да биде ослободена од обврската за раководење со ова обвинителство и неа да ја преземе друг обвинител“.

Наташа Крстевска-Цалева за раководител на ова јавно обвинителство едногласно беше избрана од Советот на јавните обвинители на 10 февруари, на предлог на републичкиот јавен обвинител Љупчо Коцевски. Нејзиното назначување дојде по суспензијата на шефот на скопско јавно обвинителство Мустафа Хајрулахи, кој во моментов е суспендиран од функцијата и против кого се води кривична и дисциплинска постапка.

Еден ден по изборот на Крстевска-Цалева, владината портпаролка Марија Митева соопшти дека Владата го задолжила Министерството за правда да преземе активности за поведување постапка за разрешување на државниот јавен обвинител Љупчо Коцевски. Меѓу аргументите за донесената одлука, покрај последниот извештај на Транспаренси интернешнл за перцепцијата на корупција, Митева го наведе и, како што рече, последното именување на вршител на должноста шеф на Вишото јавно обвинителство, односно назначувањето на Крстевска-Цалева, одлука која според Владата била незаконска.

Предлогот за разрешување на државниот јавен обвинител Љупчо Коцевски денеска(18 февруари) ќе биде разгледан на седница на Влада, по што ќе биде доставен до Советот на јавни обвинители. Обвинителот Коцевски пак изјави дека доколку се утврди дека сторил тешка дисциплинска постапка, тој ќе го прифати разрешувањето, додавајќи дека „доколку не се исполнети условите од Законот за јавно обвинителство, јавноста ќе цени дали сум разрешен законски или незаконски“.

Песков: Нема да ја спречиме Украина да влезе во ЕУ, ама остануваме против да биде дел од НАТО

Портпаролот на Кремљ, Дмитриј Песков
Портпаролот на Кремљ, Дмитриј Песков

Трајно решение во Украина е „невозможно“ без решавање на поширокото прашање на европската безбедност, соопшти во вторник (18 февруари) Кремљ, додека САД и Русија ги одржаа првите разговори на високо ниво по офанзивата на Москва против Киев.

Пред да ја започне својата офанзива во февруари 2022 година, Москва побара од НАТО да се повлече од централна и источна Европа.

„Трајно и долгорочно одржливо решение е невозможно без сеопфатно разгледување на безбедносните прашања на континентот“, рече Песков, одговарајќи на прашање на АФП.

Тој, исто така, рече дека Москва нема да ја спречи Украина да се приклучи на Европската Унија, повторувајќи дека останува против Киев да биде дел од НАТО.

„Во однос на пристапувањето на Украина во ЕУ, тоа е суверено право на која било земја... Никој не може да диктира на друга земја и ние не планираме да диктираме“, рече Песков додавајќи:

„Но, тоа е сосема поинаку кога станува збор за безбедносни прашања и воени сојузи. Овде имаме поинаков пристап кој е добро познат“, рече тој.

Москва во 2014 година го анектира Крим и ги поддржа вооружените проруски сепаратисти на исток, откако про-ЕУ револуција го собори лидерот на Украина, a пријател на Москва.

Кремљ соопшти дека рускиот претседател Владимир Путин е „подготвен“ да разговара со украинскиот колега Володимир Зеленски.

„Самиот Путин рече дека ќе биде подготвен да преговара со Зеленски доколку е потребно, но потребна е дискусија за правната основа на договорите со оглед на реалноста дека легитимитетот на Зеленски може да се доведе во прашање“, рече Песков.

Петгодишниот мандат на Зеленски ќе истечеше минатата година, но украинскиот закон не налага претседателските избори да се одржат кога земјата е во воена состојба.

Москва го игнорира тоа и постојано нагласува дека не го гледа Зеленски како „легитимен“ претседател.

Зеленски рече дека би бил подготвен за „компромис“ и да се сретне со Путин, но само откако Украина и нејзините сојузници договорат заедничка позиција за тоа како да се стави крај на војната.

Фон дер Лајен: ЕУ сака да биде партнер на САД во обезбедувањето мир за Украина

Претседателката на Европската комисија, Урсула фон дер Лајен
Претседателката на Европската комисија, Урсула фон дер Лајен

Европската Унија сака да биде партнер со САД за да се обезбеди праведен и траен мир за Украина, порача претседателката на Европската комисија, Урсула фон дер Лајен по нејзината средба во Брисел со специјалниот американски пратеник за Украина и Русија, генералот Кит Келог.

„Финансиски и воено, Европа придонесува (за поддршка на Украина) повеќе од кого било друг. И ќе ја зајакнеме. Сега е критичниот момент“, наведе Фон дер Лајен во објава на Икс.

Европската комисија соопшти дека на средбата со Келог, Фон дер Лајен ја нагласила клучната улога на ЕУ во обезбедувањето на финансиската стабилност и одбрана на Украина, со вкупна поддршка од 135 милијарди евра (околу 145 милијарди долари), што е повеќе од кој било друг сојузник. Во соопштението се додава дека ова вклучува и 52 милијарди долари воена помош, што е на ниво на американската поддршка за Украина.

„Претседателката фон дер Лајен истакна дека ЕУ целосно го покрива својот дел од воената помош за Украина и е подготвена да направи уште повеќе. Таа ги истакна плановите на Европа за зголемување на производството и трошоците за одбрана, зајакнувајќи ги европските и украинските воени капацитети“, се наведува во соопштението.

Потврдувајќи ја посветеноста на ЕУ за праведен и траен мир во Украина, Фон дер Лајен повторила дека при тоа мора да се почитуваат украинските независност, суверенитет и територијален интегритет, поддржани со силни безбедносни гаранции.

„Таа, исто така, ја изрази подготвеноста на ЕУ да работи заедно со САД за да се стави крај на крвопролевањето и да помогне да се обезбеди праведен и траен мир, што Украина и нејзиниот народ со право го заслужуваат“, се додава во соопштението на Европската комисија.

Келог вчера(17 февруари)во Брисел се сретна и со еврокомесарот за одбрана и Вселената, Андриус Кубилиус, како и со генералниот секретар на НАТО, Марк Руте.

Израел потврди дека војниците ќе останат на „пет позиции“ во јужен Либан

Конвој на привремените сили на Обединетите нации во Либан (УНИФИЛ) во близина на јужното либанско село Блида, на 17 февруари 2025 година
Конвој на привремените сили на Обединетите нации во Либан (УНИФИЛ) во близина на јужното либанско село Блида, на 17 февруари 2025 година

Израелскиот министер за одбрана Израел Кац потврди дека војниците ќе останат на пет позиции во јужен Либан по истекот на крајниот рок за повлекување. Тој вети дека ќе биде преземена акција против секое прекршување на примирјето од страна на милитантната група Хезболах.

Израелската војска „ќе остане во тампон зона во Либан со пет контролни позиции и ќе продолжи да дејствува силно и бескомпромисно против секое прекршување на Хезболах“, рече Кац кратко по истекот на продолжениот рок за повлекување на Израел од Либан, според договорот за примирје од 27 ноември.

Израел неколку часа пред крајниот рок за повлекување најави дека ќе ги задржи војниците во „пет стратешки точки“ во близина на границата.

Либански безбедносен извор претходно за АФП потврди дека „израелската армија се повлече од сите погранични села освен од пет точки“.

Прекинот на огнот меѓу Израел и милитантната група поддржана од Иран е на сила од крајот на ноември, по повеќе од една година непријателства, вклучително и двомесечната сеопфатна војна во која Израел започна копнени операции.

Кац рече дека одлуката да се остане на либанска територија е донесена „во согласност со одлуката на политичкиот ешалон, за да се обезбеди заштита на сите израелски заедници и одвраќање од заканите од Либан“.

Министерот исто така рече дека силите се засилени на израелската страна на границата.

„Хезболах мора целосно да се повлече надвор од реката Литани, а либанската армија мора да го спроведе и разоружа под надзор на механизмот воспоставен од САД. Ние сме решени да обезбедиме целосна безбедност на сите заедници на северот“, рече Кац, мислејќи на условите од договорот за прекин на огнот.

Хезболах е и вооружена група и политичка партија која контролира голем дел од јужен Либан. ЕУ не го стави на црната листа неговото политичко крило, туку само вооруженото. Политичката партија Хезболах има места во либанскиот парламент.

Според прекинот на огнот, со посредство на Вашингтон и Париз, либанската војска требаше да се распореди заедно со мировниците на Обединетите Нации, бидејќи израелската армија се повлече во период од 60 дена, кој беше продолжен до 18 февруари.

Хезболах требаше да се повлече северно од реката Литани, на околу 30 километри од границата и да ја размонтира преостанатата воена инфраструктура таму.

Инаугурација на хрватскиот претседател Милановиќ за втор мандат

Претседателот на Република Хрватска Зоран Милановиќ
Претседателот на Република Хрватска Зоран Милановиќ

Претседателот на Република Хрватска Зоран Милановиќ денеска (18 февруари) ќе положи заклетва за својот втор петгодишен мандат. На инаугурацијата во Претседателската палата на Пантовчак ќе присуствуваат околу сто гости, меѓу кои и четворица потпретседатели на Саборот, но никој од Владата.

Милановиќ повторно беше избран за претседател на 12 јануари, кога во вториот круг го победи својот противкандидат Драган Приморац, поддржан од ХДЗ.

Инаугурацијата, која ќе започне на пладне, ќе ја следат поранешни претседатели на државата, претставници на институции и здруженија, припадници на вооружените сили, верски лидери, лидерите на партиите што го поддржаа Милановиќ, како и неговото семејство и пријатели.

Свеченоста ќе започне со постројување на Почесната гарда пред Претседателската палата, а потоа претседателот Милановиќ со сопругата Сања ќе влезе во свечената сала, каде што ќе бидат поканетите гости и судиите на Уставниот суд.

На оваа инаугурација ќе има повеќе гости отколку пред пет години, кога присуствуваа околу 40 лица. Меѓу гостите ќе бидат и тројца поранешни претседатели – Стипе Месиќ, Иво Јосиповиќ и Колинда Грабар-Китаровиќ.

Милановиќ испратил покани до премиерот Андреј Пленковиќ и потпретседателите на Владата, но тие нема да присуствуваат. На свеченоста нема да дојдат ниту претседателот на Саборот, Гордан Јандроковиќ, и потпретседателот Жељко Рајнер од ХДЗ.

Во Ријад ќе преговараат високи претставници на САД и на Русија

Државниот секретар Марко Рубио во Ријад, Саудиска Арабија, 17 февруари 2025 година
Државниот секретар Марко Рубио во Ријад, Саудиска Арабија, 17 февруари 2025 година

Високи американски и руски претставници, вклучително и министрите за надворешни работи на двете земји, денеска ќе разговараат за подобрување на билатералните односи и преговори за ставање крај на војната во Украина. Тоа ќе биде најзначајната средба меѓу САД и Русија од целосната инвазија на руските трупи во соседната земја пред речиси три години.

Разговорите во Саудиска Арабија означуваат уште еден важен чекор на администрацијата на Трамп за промена на американската политика на изолација на Русија и имаат за цел да го отворат патот за средба меѓу американскиот претседател Доналд Трамп и рускиот претседател Владимир Путин, јавија светските агенции.

Франција синоќа (17 февруари) свика итен состанок на земјите од Европската Унија и Велика Британија за да одлучат како треба да реагираат Европејците.

Рускиот министер за надворешни работи Сергеј Лавров и советникот на Путин за надворешни работи Јуриј Ушаков вчера пристигнаа во главниот град на Саудиска Арабија. Ушаков рече дека разговорите ќе бидат „чисто билатерални“ и нема да вклучуваат украински претставници.

Според него, делегацијата на САД е составена од „сериозни луѓе“, но наведе дека Русија „исто така дојде со сериозен пристап“.

„Важно е да се започне вистинска нормализација на односите меѓу Русија и САД“, рече тој.

Американскиот државен секретар Марко Рубио, советникот за национална безбедност Мајк Волц и специјалниот пратеник Стив Виткоф ќе се сретнат со руската делегација, изјави портпаролката на Стејт департментот Тами Брус.

Портпаролот на Кремљ Дмитриј Песков изјави дека разговорите ќе бидат насочени првенствено кон „обновување на целиот спектар на руско-американски односи, како и подготовка за можни преговори за украинското решение и организирање средба на двајцата претседатели“.

Осумнаесет повредени кога се превртел авион при слетувањето во Торонто

илустрација
илустрација

Службите за итни случаи го истражуваат инцидентот на меѓународниот аеродром Пирсон во Торонто, Канада, кој се случил за време на слетувањето на авион на „Делта ерлајнс“ кој доаѓал од Минеаполис.

Сите 80 патници и членови на екипажот во авионот, кој летал од Минеаполис, ја преживеале несреќата, но се уште не е јасно како се превртел авионот. Патниците, кои носеле појаси, останале да висат на седиштата.

Регионалната болница во Торонто Пил соопшти дека во инцидентот биле повредени 18 лица. Од нив едно дете и двајца возрасни биле тешко повредени.

Американската федерална управа за авијација (FAA) извести дека сите 80 лица во авионот се евакуирани.

ФАА соопшти дека Одборот за безбедност на транспортот на Канада ќе биде одговорен за истрагата.

Од полицијата велат дека се уште не знаат како дошло до несреќата.

Летот „Делта“ 4819 тргна од Минеаполис и се приближи до својата дестинација на меѓународниот аеродром во Торонто Пирсон непосредно пред 15 часот по локално време, соопшти авиокомпанијата.

Шолц: ЕУ и САД не смеат да се поделат во мировните преговори за Украина

Францускиот претседател Емануел Макрон се поздравува со германскиот канцелар Олаф Шолц
Францускиот претседател Емануел Макрон се поздравува со германскиот канцелар Олаф Шолц

Германскиот канцелар Олаф Шолц повика на единство меѓу Европа и САД за одговорноста за безбедноста на Украина.

„Не смее да има поделба во однос на безбедноста и одговорноста меѓу Европа и САД“, изјави Шолц за новинарите по европскиот самит во Париз.

Тој го изјави ова откако САД се обидоа да започнат преговори со Русија без консултација со Европската унија, пренесува Ројтерс.

„НАТО се заснова на тоа секогаш да дејствуваме заедно и да споделуваме ризици, а со тоа да ја осигураме нашата безбедност. Ова не смее да се доведува во прашање“, нагласи Шолц.

Лидерите на неколку европски земји се собраа во Елисејската палата во Париз на итен Самит свикан од францускиот претседател Емануел Макрон за да се договорат за заеднички став за Украина пред администрацијата на американскиот претседател Доналд Трамп да преземе дополнителни чекори.

Состанокот доаѓа во време кога администрацијата на Трамп остро ја критикува Европската унија и планира директно да преговара со Русија за ставање крај на војната во Украина.

На средбата присуствуваа и лидерите на Италија, Полска, Шпанија, Холандија и Данска, како и претседателот на Европската комисија и генералниот секретар на НАТО Марк Руте.

„Целта е да се утврди што можат Европејците да направат за себе, со оглед на забрзувањето на настаните во Украина по иницијативите на претседателот Трамп“, рече советникот на Макрон.

Тој истакна дека Европа мора да преземе поголема одговорност за сопствената безбедност.

Трамп неодамна телефонски разговараше со рускиот претседател Владимир Путин, при што беше спомената можноста за преговори за Украина, што предизвика загриженост кај европските лидери.

Во исто време, на Минхенската безбедносна конференција, американскиот потпретседател Џеј-Ди Венс ја критикуваше ЕУ, обвинувајќи ја за непочитување на слободата на говорот.

Тој потврди дека САД размислуваат за преговори за Украина без учество на Европејците.

Украинскиот претседател Зеленски ги повика сојузниците да останат цврсти и да спречат договор што ќе биде направен зад грбот на Украина и Европа.

Францускиот министер за надворешни работи Жан-Ноел Баро изјави дека Европа, вака или онака, ќе биде дел од преговорите за Украина.

Тој, исто така, ја опиша идејата за враќање на Русија во Г7 како незамислива, реагирајќи на изјавата на Доналд Трамп за таа цел.

Министерството за здравство со превентивни мерки против ширење на грипот

Зграда на Министерството за здравство
Зграда на Министерството за здравство

Се забрануваат посети на хоспитализирани пациенти за да се спречи ширење на грипот во болнички услови и строго да се почитува куќниот ред во здравствените установи, особено во однос на користењето лична заштита - носење заштитни маски, дезинфекција на раце и одржување физичка дистанца, каде е возможно.

Ова се превентивните мерки за спречување на ширење на грипот по препорака на Комисијата за заразни болести, а Министерството за здравство ги задолжува јавните здравствени установи да ги почитуиваат.

„Мерките се од исклучителна важност за здравјето на пациентите и здравствените работници, согласно актуелните епидемиолошки податоци кои укажуваат на пик на сезонскиот грип. Комисијата за заразни болести продолжува да ја следи епидемиолошката состојба во државата“, се вели во соопштението од Министерството за здравство.

Како што е објавено на веб-страницата на Институтот за јавно здравје - Скопје, од трети до деветти февруари 2025 година во земјава се пријавени 2.880 случаи на групни пријави за заболени од грип/заболувања слични на грип, што е за 5,1 отсто помалку во споредба со претходната недела.

Од пријавените, 1.552 лица се на возраст од 15-64 години, 685 кај деца на возраст од пет до 14 години, 371 кај деца на возраст од 0-4 години и 272 се регистрирани кај лица на возраст над 65 години. Највисока инциденца се регистрира кај децата на возраст од 0-4 години.

Во Скопје се пријавени 692 заболени, во Струмица – 333, во Битола – 304, во Свети Николе – 158, во Охрид – 141, во Велес – 140, во Радовиш – 122, а во Кавадарци и во Куманово по 109 заболени.

Вчитај повеќе

XS
SM
MD
LG