Достапни линкови

Вести

Две лица загинаа во напад на автобуска станица во Ерусалим, повредени се уште шестмина

Пукање на автобуска во Ерусалим, 30 ноември, 2023 година
Пукање на автобуска во Ерусалим, 30 ноември, 2023 година

Две лица загинаа кога двајца напаѓачи отворија оган на автобуска станица во преградието на Ерусалим за време на утринскиот шпиц, пренесува Би-Би-Си.

Како последица на овој напад загина 24-годишна жена, како и маж на возраст од околу 70 години кој починал во болницата, соопшти израелската брза помош.

Во нападот исто така се повредени и шест лица. Израелскиот министер за надворешни работи рече дека двајцата „тешко вооружени“ напаѓачи се неутрализирани.

„Двајцата терористи пристигнаа на местото на настанот во возило вооружени со огнено оружје. Овие терористи пукаа кон цивили на автобуска станица, а потоа беа неутрализирани од силите на безбедност“, соопшти полицијата.

Овој напад пак доаѓа во време кога примирјето меѓу Израел и Хамас е продолжено за уште еден ден, како што соопшти катарското Министерство за надворешни работи.

Хамас ослободува по 10 израелски заложници дневно во замена за 30 палестински затвореници, а Израел дозволува дополнителна помош за Газа.

Продолжувањето на примирјето пак ќе им овозможи на преговарачите да продолжат да работат на договори за размена на заложници со затвореници.

види ги сите денешни вести

Џек Тешеира се изјасни за виновен за објавување доверливи американски документи

Џек Тешеира кој објави тајни воени документи на дискорд.
Џек Тешеира кој објави тајни воени документи на дискорд.

Припадникот на американската воздушна Национална гарда, Џек Тешеира, се изјасни за виновен и се согласи на 16-годишна затворска казна поради објавување информации од Пентагон.

22-годишниот Тешеира е обвинет за објавување доверливи документи на американската војска на социјалната мрежа Дискорд. Материјалот кој го објавил вклучуваше мапи, сателитски снимки и разузнавачки информации за сојузниците на САД.

Тој почнал да пристапува до доверливи документи од јануари 2022 година, а продолжил дури и откако бил предупреден од претпоставените во септември и октомври истата година.

Објавувањето на доверливи информации се смета за најсериозно нарушување на националната безбедност на САД откако Викиликс објави повеќе од 700.000 доверливи документи во 2010 година.

Во замена за признавањето на вина, обвинителите се согласија да не го обвинат за дополнителни прекршувања на Законот за шпионажа.

Тој е во притвор од април минатата година. Тешеира беше пилот од првата класа во Националната гарда на Масачусетс, задолжен за разузнавачката единица на воздухопловните сили.

Под корисничкото име „TheExcaliburEffect“, Тешеира сподели доверливи информации на Дискорд и се пофали дека има пристап до „информации за Израел, Палестина, Сирија, Иран и Кина“.

Објавените документи содржеле високо доверливи информации за сојузниците и противниците, со детали како што се детали за рутите на воените трупи во Украина до израелската шпионска агенција Мосад.

Министрите за надворешни работи на Италија и Австрија во посета на БиХ пред одлуката за отворање преговори со ЕУ

Министерот за надворешни работи на БиХ Елмедин Конаковиќ, италијанскиот министер за надворешни работи и меѓународна соработка Антонио Тајани и австрискиот министер за европски и меѓународни прашања Александар Шаленберг, Сараево, 4 март 2024 година.

Забрзување на патот на Босна и Херцеговина (БиХ) кон Европската унија, зајакнување на регионалната безбедност и економските односи се приоритетите на Австрија, Италија и Босна и Херцеговина.

Ова беше соопштено по средбата на министерот за надворешни работи на Босна и Херцеговина Елмедин Конаковиќ со италијанскиот министер за надворешни работи и меѓународна соработка Антонио Тајани и австрискиот министер за европски и меѓународни прашања Александар Шаленберг, денеска во Сараево.

Двајцата пристигнаа во главниот град на Босна и Херцеговина пред состанокот на лидерите на ЕУ во втората половина на март, кога Европската комисија треба да поднесе извештај за напредокот на БиХ во процесот на исполнување на условите.

Тој извештај ќе им служи на шефовите на државите и владите да одлучат за евентуално отворање на преговорите за членство на БиХ во ЕУ.

Министрите порачаа дека сега е време за зголемени напори за влез на БиХ во европското семејство, особено гледајќи ги глобалните безбедносни проблеми.

Австрискиот министер за европски и меѓународни прашања Александар Шаленберг изјави дека ЕУ направила „грешка со тоа што го оставила Западен Балкан надвор од ЕУ“.

„Како ние во ЕУ дозволивме во изминатите децении Западен Балкан, кој географски, економски и културолошки е дел од Европа, да не е веќе во ЕУ, и сега имаме руско и кинеско влијание овде“, рече австрискиот министер. за европски и меѓународни прашања.

Италијанскиот министер за надворешни работи и меѓународна соработка Антонио Тајани, нагласи дека Западен Балкан е приоритет за неговата земја.

„БиХ и припаѓа на ЕУ и се надеваме дека ќе се приклучи во наредните години“, посочи Тајани.

Во декември 2022 година, Босна и Херцеговина доби статус на кандидат за полноправно членство во ЕУ.

Една година подоцна, на самитот на лидерите на земјите од ЕУ, беше најавено дека пристапните преговори ќе бидат отворени откако Босна и Херцеговина ќе ги исполни потребните услови.

Состанокот на лидерите на Европската Унија е најавен за 21 и 22 март.

Повеќе од 40 земји бараат независна истрага за смртта на Алексеј Навални

Луѓето положуваат цвеќе на гробот на рускиот опозициски политичар Алексеј Навални по неговиот погреб на гробиштата Борисовски во Москва на 1 март 2024 година.
Луѓето положуваат цвеќе на гробот на рускиот опозициски политичар Алексеј Навални по неговиот погреб на гробиштата Борисовски во Москва на 1 март 2024 година.

Повеќе од 40 земји повикаа на независна меѓународна истрага за смртта на рускиот опозициски лидер Алексеј Навални, со тврдења дека рускиот претседател Владимир Путин ја сноси крајната одговорност.

Членките на Европската унија, САД, Велика Британија, Украина, Австралија, Канада, Нов Зеланд и Норвешка се меѓу земјите кои изразија револт поради смртта на Навални во Советот за човекови права на Обединетите нации.

Четириесет и седумгодишниот Навални, кој почина во арктичкиот затвор под мистериозни околности, беше погребан на 1 март на гробиштата во Москва. Најмалку 120 лица се уапсени во Русија поради учество на собири на кои граѓаните му оддаваа почит.

„Ние сме огорчени од смртта на рускиот опозициски политичар Алексеј Навални, за која крајната одговорност е на претседателот Путин и руските власти“, изјави евроамбасадорката Лоте Кнудсен пред телото на ОН за човекови права во име на 43 земји.

„Русија мора да дозволи независна и транспарентна меѓународна истрага за околностите на неговата ненадејна смрт. Неочекуваната и шокантна смрт на господинот Навални е уште еден знак за забрзана и систематска репресија во Русија“.

Претставниците на овие земји нагласија дека се длабоко загрижени поради „систематското задушување на граѓанското општество“ и репресијата на политичката опозиција во Русија и во странство.

Тие ја повикаа Русија веднаш и безусловно да ги ослободи сите политички затвореници, бранители на човекови права, новинари и антивоени активисти приведени поради мирно остварување на нивните човекови права и противење на руската војна во Украина.

Ја повикуваме Руската Федерација да стави крај на оваа клима на неказнивост и да создаде безбедна средина за политичката опозиција и критичките гласови“, се вели во заедничкото сооштение на овие земји.

Тие, исто така, ја повикаа Русија „да го укине угнетувачкото законодавство и да стави крај на политичката злоупотреба на судството“.

Навални почина на 16 февруари по долгогодишно заробеништво во кое помина повеќе од 300 дена во самица, му беше одбиена медицинска помош, се пожали дека е подложен на лишување од сон и уште многу други работи. Руските судови отфрлија повеќе од 40 жалби што тој ги поднел за наводна злоупотреба.

Еден ден пред погребот, Европскиот парламент усвои резолуција со која се обвинуваат руската држава и претседателот Владимир Путин за смртта на Навални.

Во моментот на неговата смрт, овој истакнат критичар на Кремљ отслужуваше 19-годишна затворска казна под обвинение за екстремизам што тој, неговите поддржувачи, западните функционери, го негираа и ги сметаа за политички мотивирани обвинувања. Поддржувачите на Навални веруваат дека тој е убиен, а неговата вдовица Јулија Навалнаја вети дека ќе ја продолжи работата на нејзиниот сопруг.

Врховниот суд на САД пресуди дека Трамп може да остане на гласачкото ливче

Поранешниот американски претседател Доналд Трамп за време на Конференцијата за политичко дејствување на конзервативците на 24 февруари 2024 година во Мериленд.
Поранешниот американски претседател Доналд Трамп за време на Конференцијата за политичко дејствување на конзервативците на 24 февруари 2024 година во Мериленд.

Врховниот суд на САД едногласно ја поништи одлуката на судот во сојузната држава Колорадо, со која Доналд Трамп беше спречен да учествува на внатрепартиски избори.

Врховниот суд во Колорадо го отстрани поранешниот американски претседател од гласачките ливчиња во декември, наведувајќи ја уставната забрана на бунтовниците да се кандидираат за претседателската функција. Судиите на Врховниот суд на САД прво ја обвинија федералната влада за пречекорување на нивните овластувања, а сега одлучија Трамп да остане на гласачкото ливче.

Според амандманите на американскиот Устав, на секој што „учествувал во бунт“ му е забрането да извршува функција. Пресудата во Колорадо се однесуваше на дејствијата на Трамп за време на нападот на зградата на американскиот Конгрес на 6 јануари 2021 година од страна на неговите поддржувачи.

Одлуката значи дека Трамп може да учествува на републиканските прелиминарни избори во вторник, 5 март, денот кога би можел да го запечати своето место како републикански претседателски кандидат.

Колорадо ќе гласа заедно со уште 15 држави на маратонското гласање наречено „Супер вторник“.

Трамп е фаворит како републикански кандидат да се бори за претседателската функција против демократскиот кандидат Џо Бајден, на претседателските избори на 5 ноември.

Неговиот единствен преостанат кандидат за номинација на неговата партија е поранешната гувернерка на Јужна Каролина, Ники Хејли.

На Трамп, исто така, му е забрането да биде на гласачкото ливче во Мејн и Илиноис, но тие одлуки се ставени во мирување во очекување на пресудата на Врховниот суд за случајот Колорадо.

Подобноста на Трамп беше оспорена на суд од група од шест гласачи во Колорадо кои го претставија како закана за американската демократија и побараа тој да биде одговорен за упадот во американскиот Капитол на 6 јануари 2021 година од страна на неговите поддржувачи.

ЕУ со парична казна од речиси две милијарди евра за технолошкиот гигант Епл

Луѓето чекаат пред продавницата на Епл во Минхен, 25 септември 2015 година.
Луѓето чекаат пред продавницата на Епл во Минхен, 25 септември 2015 година.

Европската унија го казни американската компанија Епл (Apple) со речиси 2 милијарди долари за кршење на законите за конкуренција, бидејќи платформата неправедно го фаворизирала сопствениот музички сервис.

„Епл им забрани на развивачите на апликации „целосно да ги информираат корисниците на системот iOS за алтернативни и поевтини услуги за претплата на музика“, соопшти Европската комисија.

„Ова е нелегално и влијаеше на милиони европски потрошувачи“, рече Маргрете Вестагер, комесар за конкуренција на ЕУ.

Од Комисијата констатираа и дека компанијата Епл ова го правела речиси една деценија, што значи дека „многу корисници плаќале значително поголема претплата за слушање на музика“.

Казната е речиси четири пати поголема од очекуваното, а според Вестагер, помала казна би била како „паркинг билет“, а посочи и дека казната е дизајнирана да делува за да ги стопира ваквите практики на Епл и останатите компании.

„Мислам дека е важно да се види дека ако сте доминантна компанија и правите нешто незаконско, ќе бидете казнети“, истакна Вестагер.

Трка со Гугл и Епл: Македонски паметни очила
please wait

No media source currently available

0:00 0:03:49 0:00

Казната од 1,8 милијарди евра следува по долгата истрага што беше започната пред пет години со жалба од Спотифај (Spotify), шведскиот музички сервис.

Истрагата се фокусирала на ограничувањата кои претставувале пречка за програмерите да ги информираат корисниците на Ајфон и Ајпод за други начини да се претплатат на услуги за стриминг на музика што го заобиколуваат Епл. Епл тврди дека ограничувањата ја фаворизираат конкурентската услуга за стриминг музика на Епл Мјузик..

Од Епл пак преку соопштение истакнаа дека ќе се поднесат жалба на оваа одлука.

„Одлуката е донесена и покрај неуспехот на Комисијата да открие какви било веродостојни докази за штета на потрошувачите и ја игнорира реалноста на конкурентен, прогресивен и брзо растечки пазар“, се вели во соопштението на компанијата.

Исто така, се вели дека Спотифај ќе има корист од оваа одлука, со тврдење дека шведскиот сервис, кој има 56 отсто удел од европскиот пазар и не му плаќа на Епл за користење на нивната продавница, се сретнал со Комисијата 65 пати во последните осум години.

Истрагата на Комисијата првично се фокусираше на две прашања. Едно од нив беше практиката на производителот на Ајфон да ги принудува сопствениците на апликации кои продаваат дигитална содржина да го користат неговиот внатрешен систем за плаќање, кој наплаќа провизија од 30 проценти за сите претплати.

Но, подоцна фокусот на истрагата се насочи кон тоа како Епл ги спречува креаторите на апликации да ги информираат корисниците за поевтините начини за плаќање на претплати кои не вклучуваат тоа да се направи преку апликација.

Истрагата откри и дека Епл ги забранил стриминг услугите да им кажуваат на корисниците колку чинат претплатите надвор од нивните апликации. Казната за Епл доаѓа истата недела кога во ЕУ треба да стапат на сила новите правила кои имаат за цел да ги спречат технолошките компании да доминираат на дигиталните пазари.

Законот за дигитални пазари, кој треба да стапи на сила в четврток, наметнува низа правила за компаниите, вклучувајќи ги Епл, Мета, Гугл Алфабет и БитДенс на Тик-Ток.

МОН подготвени за преговори со јавните универзитети ако има волја за колективен договор

Министерство за образование и наука (Илустрација)
Министерство за образование и наука (Илустрација)

Министерството за образование и наука (МОН) во изјава за МИА потврди дека ја поддржуваат секоја идеја за зголемување на платите на вработените во јавните Универзитети, а истакнуваат и доколку постои волја во Собранието за потпишување на колективен договор, тие како институција ќе учествуваат во преговорите.

„МОН и министерот Јетон Шаќири ја поддржуваат секоја идеја за зголемување на платите на вработените во образовните институции без разлика дали се во основното, средното или високото образование. Со оглед на тоа што основач на државните универзитети е Собранието, доколку таму постои волја за потпишување колективен договор и со другите универзитети, освен со УКИМ, како институција ќе учествуваме во преговорите, затоа што наставно – научниот кадар заслужува повисоки плати“, се вели во одговорот од МОН.

Инаку, одговорот од МОН следува откако денеска на мирен протест излегоа членовите на синдикатите на универзитетите во Битола, Тетово, Штип, Охрид и „Мајка Тереза“ во Скопје, на кој побараа потпишување на колективен договор и изедначување на правата, обврските и одговорностите со Универзитетот „Св. Кирил и Методиј“-Скопје.

На денешните протести, беше истакнато и дека доколку не бидат исполнети барањата на синдикатите на петте јавни универзитети, идните активности ќе ги дефинираат во консултации со поширокото членство. На овие универзитети има 1.500 вработени, додека УКИМ има вкупно 3.200 вработени лица.

Отворена нова база на НАТО во Албанија

Отворање на новата база на НАТО во Кучово, Албанија, 4 март 2024 година.
Отворање на новата база на НАТО во Кучово, Албанија, 4 март 2024 година.

Во Кучово, Албанија на 4 март официјално беше отворена воздухопловната база на Северноатлантскиот сојуз.

Албанија, членка на НАТО која нема свои борбени авиони, отвори реновирана воздухопловна база од времето на комунизмот за да им служи на авионите на НАТО поради зголемената закана од Русија, рече премиерот на земјата Еди Рама.

Албанскиот министер за одбрана, Нико Пелеши, изјави дека базата во Кучово ќе биде стратешка точка за операциите на НАТО и за одбраната на мирот.

„Од источниот фронт се очекува сè. И ние мораме да бидеме подготвени да се браниме со единствената победничка формула што е пред нас: обединување на нашите одбранбени сили и капацитети“, истакна Пелеши.

Активностите за реконструкција на базата започна во јануари 2022 година. НАТО инвестираше околу 50 милиони евра, а албанската влада повеќе од пет милиони евра.

„Ова е база која ќе додаде уште еден елемент на безбедноста за нашиот регион на Западен Балкан, за кој сите знаеме дека е регион загрозен од заканата и неоимперијалистичките амбиции на Руската Федерација“, рече Рама за време на инаугурацијата.

Како што порача албанскиот претседател Бајрама Бегаја, во глобалната состојба, за која оцени дека е нестабилна, земјата мора да биде подготвена да се брани и да придонесе за Алијансата.

„Базата Кучов има мисија на заштита и одвраќање, таа е важен центар за операциите на НАТО за справување со денешните и утрешните закани“, рече албанскиот претседател.

На инаугурацијата присуствуваа претставници на НАТО, министрите за одбрана на Турција и Италија, претставници на американската амбасада во Тирана и претставници на албанските институции.

Претставникот на НАТО, генерал Хуан Пабло Санчез Де Лара, за време на церемонијата рече дека Албанија е поподготвена од кога било да преземе одговорност за заштита на безбедноста и мирот.

Отворањето на оваа база го поздрави и претседателот на Косово, Вјоса Османи, која рече дека оваа база на НАТО ќе придонесе за зголемување на безбедноста на Западен Балкан.

Воздухопловната база Кучово е изградена во 1950-тите. Неколку дена пред инаугурацијата, во оваа база беа испратени три беспилотни летала „Бајрактар“, кои Албанија ги купи од Турција.

Вработените на петте јавни универзитети на протест, побараа изедначување на платите со оние на УКИМ

Протест на вработените во петте јавни Универзитети, 4 март, 2023 година.
Протест на вработените во петте јавни Универзитети, 4 март, 2023 година.

Потпишување на колективен договор на петте јавни универзитети и изедначување на правата, обврските и одговорностите со Универзитетот „Св. Кирил и Методиј“-Скопје побараа на денешниот мирен протест членовите на синдикатите на универзитетите во Битола, Тетово, Штип, Охрид и „Мајка Тереза“ во Скопје.

Тие го поздравија потпишувањето и спроведувањето на колективниот договор на Универзитетот „Свети Кирил и Методиј“ од Скопје, но истовремено укажаа на нееднаквиот статус на останатите пет јавни универзитети во земјата. Вработените сметаат дека се игнорирани и дискриминирани од Владата и Собранието во однос на УКИМ, чии вработени со потпишаниот колективен договор од овој месец ќе добијат зголемување на платите за околу 22 отсто.

Вработените во Универзитетот за информатички науки и технологии „Свети Апостол Павле“ од Охрид упатија порака до надлежните институции дека спроведуваат дискриминација кон нив и останатите четири јавни високообразовни институции.

„Ние имаме ист статус и извршуваме идентична општествена дејност. Со овој протест сакаме да го искажеме нашето незадоволство и воедно бараме потпишување и на нашите колективни договори или изнаоѓање законска рамка за пристапување кон колективниот договор од УКИМ. Во спротивно, во координација со останатите четири јавни универзитети во државата ќе ги дефинираме следните чекори за продолжување на овој штрајк, се до исполнување на нашите барања“, рече Игор Јовески, претседател на синдикатот на вработени на Универзитетот „Свети Апостол Павле“ од Охрид.

Поддршка на синдикатот на битолскиот Универзитет „Свети Климетн Охридски“ му даде ректорот Игор Неделковски, кој нагласи дека денеска во посета бил техничкиот премиер Талат Џафери, на кој му предочил дека ваквата ситуација, без разлика кои се причините, значи не само правен акт на дискриминација, туку и девалвација.

„Професорите, вработнеите и студентите на сите јавни универзитети се вработуваат под еднакви услови и извршуваат еднакви работни задачи. Оваа состојба значи дека нашите професори и вработени се 22 проценти помалку вредни од професорите на УКИМ. Но, што е уште пострашно тоа води кон тоа дека нашите студенти посетуваат 22 отсто понеквалитетна настава, бидејќи добиваат знаење од професори и вработени, кои се за 22 проценти помалку платени од своите колеги“, рече Неделковски.

И вработените во Државниот Универзитетот во Тетово, меѓу кои и тројца актуелни пратеници, пред зградата на Ректоратот го изразија незадоволството за непотпишувањето на колективните договори и побараа од Собранието, пред да се распушти да се потпише колективниот договор.

Порака дека надлежните спроведуваат двојни стандарди, дискриминација и нееднаквост беше испратена и од протестот пред Универзитетот „Мајка Тереза“ во Скопје, чиј претседател Авни Авдиу во изјава за МИА посочи дека го изразуваат својот став и негодување дека се игнорирани и дискриминирани од Собранието и на Владата, откако колективен договор е потпишан само со Универзитетот „Свети Кирил и Методиј'.

Доколку не бидат исполнети барањата на синдикатите на петте јавни универзитети идните активности ќе ги дефинираат во консултации со поширокото членство. На овие универзитети има 1.500 вработени, додека УКИМ има вкупно 3.200 вработени лица.

Орбан и Трамп ќе се сретнат на 8 март во Флорида

Поранешниот американски претседател Доналд Трамп и унгарскиот премиер Виктор Орбан за време на состанокот во Белата куќа на 13 мај 2019 година.
Поранешниот американски претседател Доналд Трамп и унгарскиот премиер Виктор Орбан за време на состанокот во Белата куќа на 13 мај 2019 година.

Унгарскиот премиер Виктор Орбан на 8 март во Флорида ќе се сретне со поранешниот претседател на САД, Доналд Трамп, откако претходно тој ги поддржа напорите на Трамп да се врати на претседателската функција оваа година.

Трамп го опиша десничарот Орбан, кој често е во судир со ЕУ и кој е критикуван за неговата антиимиграциска кампања и потезите да ги стави судството, медиумите и невладините организации под поголема државна контрола, како „голем лидер “.

Конзервативната политика на Орбан кон семејството беше пофалена и од популистичките фигури во Соединетите Држави, а Унгарија беше домаќин на состаноците на CPAC, Конференција за конзервативни политички акции. Следниот месец Унгарија повторно ќе биде домаќин на оваа конференција.

Унгарскиот премиер, кој одби да испрати оружје во Украина и одржува блиски економски врски со Русија од инвазијата во 2022 година, постојано повторува дека само враќањето на Трамп во Белата куќа може да донесе мир во Украина.

„Не е коцкање, туку всушност обложување на единствената разумна шанса, ние во Унгарија да се обложиме на враќање на претседателот Трамп“, рече Орбан на економскиот форум.

„Единствената шанса во светот за релативно брз мировен договор е политичката промена во САД, а тоа е поврзано со тоа кој е претседател.

Трамп, кој се обидува повторно да се кандидира за претседател, предизвика бес кај западните сојузници минатиот месец, откако посочи дека САД можеби нема да ги заштитат сојузниците од НАТО кои не трошат доволно за одбрана од потенцијална руска инвазија.

Орбан вели дека претседателските избори во САД оваа година и гласањето за Европскиот парламент во јуни, ќе бидат клучни затоа што конзервативците во Европа и САД мораат заедно да се борат за „повторно освојување“ на институциите во Вашингтон и Брисел од либералите кои, според него, и се закануваат на западната цивилизација.

Унгарскиот премиер, кој е на власт од 2010 година, се соочи со тензии со администрацијата на претседателот Џо Бајден, главно поради доцнењето на Будимпешта да го ратификува членството на Шведска во НАТО.

По долго одложување, унгарскиот парламент минатата недела ја одобри кандидатурата на Шведска за членство во Алијансата.

ДИК предлага преодна одредба во Изборниот законик со која ќе може да се гласа со старите важечки документи

Александар Даштевски, претседател на Државната изборна комисија (Илустративна фотографија)
Александар Даштевски, претседател на Државната изборна комисија (Илустративна фотографија)

Претседателот на Државната изборна комисија (ДИК), Александар Даштевски, денеска изјави дека ДИК предлага во Изборниот законик да се внесе преодна одредба со која ќе се овозможи на овие избори да се гласа и со старите важечки документи.

„Како ДИК до Собранието дадовме еден предлог – во Изборниот законик да се направи измена во која ќе има преодна одредба само за овие избори, да важат и старите важечки документи за да можат да гласаат сите граѓани. Дали тоа ќе се усвои или не, зависи од Собранието“, истакна Даштевски.

Што се однесува до лицата кои навршуваат 18 години, Даштевски рече дека тие ќе можат да се пријават за да бидат внесени во Избирачкиот список.

„За полнолетните е изнајдено решение и точно се знае според закон до кога ќе можат да се запишуваат. Тоа што е во законот, тоа е“, додаде Даштевски.

Инаку, со денешната свечена изјава на Абдуш Демири се комплетира седумчлениот состав на Државната изборна комисија, откако повеќе месеци беше испразнето едно место по заминувањето на Кренар Лога кој стана министер за правда. Новиот член на ДИК беше предлог на албанската опозициска коалиција.

Инаку, за потсетување, оваа пролет во Северна Македонија ќе се одржат двојни избори, со тоа што претседателските избори се закажани за 24 април, а вториот круг е на 8 мај, кога треба да се одржат и парламентарните избори.

Вчитај повеќе

XS
SM
MD
LG