Руските власти извршија „широк спектар“ на прекршувања на меѓународното право за човекови права и меѓународното хуманитарно право од почетокот на инвазијата на Москва врз Украина, од кои многу се воени злосторства, наведува Независната меѓународна истражна комисија за Украина, поддржана од ОН, во извештајот објавен на 16 март.

Прекршувањата на правата, вклучуваат убиства, незаконско затворање, тортура, силување и други форми на сексуално насилство, како и незаконска депортација на деца.

Во извештајот, исто така, се вели дека немилосрдните руски напади врз енергетската инфраструктура во Украина, кои започнаа во октомври, може да претставуваат злосторства против човештвото.

Доказите на Комисијата покажуваат дека во областите кои потпаднале под нивна контрола, руските власти извршиле намерни убиства на цивили или лица кои не се вклучени во борбите, што се смета за воени злосторства и прекршување на правото на живот.

Видете и ова:

Ќе има ли правда за жртвите на воено сексуално насилство во Украина

Комисијата била изненадена од обемот на уништувањ што го забележала за време на нејзините посети.

Комисијата, исто така, документира мал број прекршувања извршени од страна на украинските вооружени сили, вклучително и веројатни недискриминирачки напади и два инциденти кои се квалификуваат како воени злосторства, каде што руските воени заробеници биле застрелани, ранети и мачени.

Комисијата препорачува сите прекршувања и злосторства да се истражат и одговорните да бидат повикани на одговорност, било на национално или на меѓународно ниво.

За извештајот, Комисијата посети 56 локалитети и интервјуираше 348 жени и 247 мажи. Биле извршени и увиди во уништени места, гробници, места на притвор и тортура, како и остатоци од оружје, и биле консултирани голем број документи и извештаи.

Родителите на жртвите од пожарот во дискотеката „Пулс“ во Кочани на денешното судско рочиште изнесоа сознанија дека еден од обвинетите за „Пулс“, кој е во притвор во затворот во Скопје по телефон вршел притисок врз сведоците на Обвинителството, и побараа тие да се проверат.

На денешното рочиште во судницата во Идризово, беа сослушани четворица сведоци, двајца пожарникари кои учествувале во гаснењето на пожарот кобната ноќ, како и двајца сведоци кои биле гости во дискотеката кога избувнал пожарот.

Противпожарниот тим, како што посочија, дојавата за пожар во дискотеката Пулс во Кочани ја примил во 2:35 часот, а пожарот бил изгаснат околу 4 часот.

Трет сведок на денешното рочиште беше Сара Велинова, која кобната вечер била во дискотеката Пулс со друштво. Таа во диското влегла во 1:50 часот. На влезот купила карта, без да и биде издадена фискална, по што влегла во дискотеката без да и биде побарана лична карта од обезбедувањето.

„Бев излезена надвор на цигара, кога се вратив бев до тоалет, но имаше гужва и се вратив на маса. Тогаш дојде едно лице, ни рече да излеземе надвор зошто се запалил плафонот и дека за кратко ќе се вратиме назад. Кога ни кажаа, јас погледнав и плафонот веќе беше запален до средина. Тргнавме кон излезот, но се направи гужва и веќе пред вратата настана стампедо. Јас паднав доле и повеќе не се сеќавам. Кога се освестив, веќе бев надвор на паркинг и забележав полиција и пожарна како помагаат“, изјави сведокот.

Се стекнала со повреди на грбот, колкот и ногата, а следниот ден, кога станала имала модра уста и јазик и отежнато дишење, по што се упатила на лекување во Скопје. Преднајави оштетно побарување и се приклучи на кривичниот прогон.

Одбраната реагираше дека овој сведок презентира изјава со невообичаено добра меморија и во исказот се совпаѓа со претходните сведоци.

„Не може сите да се сеќаваат на спуштен плафон, над 500 гости, стампедо и други исти околности“, посочија од одбраната.

Одбраната, како што посочи адвокатката на сопственикот на дискотеката Дејан Јованов, има сознанија дека секој сведок пред сослушување се повикува во Обвинителството и му се предочува записникот да го зборува истото, а единствениот сведок што зборувал отворено, јавно го линчуваа.

На прашање од одбраната, дали во Обвинителството кажала дека во дискотеката чула "силна експлозија и густ чад", сведокот рече да.

„Само слушнав, не осетив од каде доаѓа. Почувствував црн густ чад и дури мислам дека од тоа се онесвестив после“, изјави сведокот.

Видете и ова:

Случај „Пулс“: Пиротехника се користела и претходно, имало и контроли, но забавата не била прекинувана

Последен денеска сведочеше Бранислав Веселинов, кој на критичната вечер бил во дискотеката заедно со друштво, рече дека пристигнал околу 1 часот, купил карта и влегол во дискотеката.

- Имавме резервирано маса, трета на самиот влез право. Групата ДНК започна околу 1 и 30. Кога започна пожарот околу 2:30 јас бев свртен со грб. Слушнав како еден од ДНК кажа да излегуваме надвор, ќе се вратиме. Јас го земав палтото од масото и се упатив кон влезот. Тогаш видов дека има пожар и црн чад. Настана стампедо од сите страни почнаа да доаѓаат кај вратата сите паднавме. Тука се заглавивме, јас паднав. Врз мене паѓаа и други лица. Потоа во еден момент ми се ослободи ногата, ми подаде река едно дете што ми беше потоа цимер во болница и станав. Излегов и застанав доле. Почнав да се тресам и слабо гледав од чадот и седнав подоле“, изјави сведокот.

Сведокот преднајави оштетно побарување и дека се приклучува на кривичен прогон.

Случајот го води судијката Дијана Груевска Илиевски и се наоѓа во доказна постапка со сослушување на сведоци предложени од Обвинителството.

Пред почетокот на денешното рочиште, родителите во изјава за медиумите реагираа дека имаат сознанија дека еден од обвинетите, кој се наоѓа на одржувања мерка притвор во затворот во Скопје му дава на користење телефон на лицето Тодор Јованов, кој преку вибер комуникација врши притисок врз сведоците на Обвинителството.

„Ги повикуваме надлежните служби да ја проверат оваа информација и детално да го проверат телефонот и комуникациите кои се остварени преку овој телефон. Ние родителите на овие млади убиени деца нема да дозволиме овојпат вистината да остане затскриена“, изјави една од мајките.

Адвокатот Еленко Миланов, на паузата на денешното рочиште, во изјава за медиумите повторно реагираше дека судењето продолжува без Обвинителството воопшто да се произнесе по она што се случуваше со правната квалификација којашто е применета за дел од полициските службеници и запирањето на постапката во однос на сите оние службеници за кои има застареност по член 353 за евентуално злоупотреба.

„Основното јавно обвинителство Кочани, треба да се обрати и да побара мислење за понатамошното постапување во врска со ваквата поставеност на нивниот обвинителен акт. Без оглед на тоа постои можност, ќе се обратиме до Републичкото јавно обвинителство“, изјави Миланов.

Адвокатката на обвинетиот сопственик на објектот, Гроздан Милковски, реагираше дека тој тешко го следи судењето и треба да му биде укажана медицинска помош.

„Уште од утрината се жали и не може да го следи судењето“, изјави адвокатката Лидија Ристовска.

Судот, даде кратка пауза, по што беше сослушан уште еден сведок и денешното рочиште беше прекинато, а последниот сведок беше префрлен за следното рочиште кое е закажано за 19 февруари, за кога се повикани и пет сведоци.

На 16 март 2025 година, за време на настап на групата „ДНК“ во дискотеката „Пулс“ во Кочани, избувна пожар во кој загинаа 63 лица, а над 200 беа повредени. Во објектот имало над дозволениот број посетители, меѓу кои и малолетници, а пиротехнички средства биле активирани без дозвола. Објектот работел незаконски повеќе од една деценија, без минимално-технички услови, со реконструкции без дозволи и без систем за противпожарна заштита.

Руските и украинските претставници одржаа втор ден од разговорите, посредувани од САД, со цел да се стави крај на војната на Русија во Украина. Главните точки на спор беа украинската територија и безбедносните гаранции.

Сепак, двете страни успеаја да се договорат за нова размена на затвореници, што се случуваше повремено за време на речиси четиригодишната инвазија на Русија.

Стив Виткоф, претставникот на Белата куќа што ги предводи разговорите предводени од САД, на 5 февруари изјави дека вкупно 314 затвореници ќе бидат ослободени.

Пред состаноците во Абу Даби, и руските и украинските претставници наговестија надеж за крај на војната, која Русија ја започна на 24 февруари 2022 година, и во која сега загинаа или повредија речиси два милиони луѓе од двете страни.

Кирил Дмитриев, главниот преговарач на Кремљ, на 5 февруари изјави дека имало „напредок“ и позитивен развој на настаните.

Главниот преговарач на Украина, Рустем Умеров, рече дека првиот ден од разговорите бил „значаен и продуктивен, со фокус на конкретни чекори и практични решенија“.

И покрај знаците за напредок, Русија продолжи да ја бомбардира Украина со беспилотни летала и ракети.

• Серхи Нужненко

Странски дипломати беа во обиколка на термоцентралата „Дарница“ во Киев на 4 февруари, по последниот руски напад врз објектот. Истиот ден, се појавија фотографии од Русија кои покажуваат дека нејзиниот западен град Белгород се соочува со прекини на електричната енергија по украинските напади.

Денот пред разговорите, Русија изврши еден од најголемите воздушни напади во војната, насочен кон украинската енергетска инфраструктура, дополнително влошувајќи ја тешката положба на цивилите кои издржуваат една од најсуровите зими.

Портпаролот на Кремљ, Дмитриј Песков, им рече на новинарите дека ставот на Русија останува непроменет и е „апсолутно јасен и добро разбран и од Киев и од американските преговарачи“.

Маркус Цинер, поранешeн новинар од Москва, кој сега е соработник во Германскиот Маршалов фонд, рече дека размената на затвореници покажува одреден напредок.

„Но, доста сум скептичен дека разговорите ќе стигнат до поентата“, изјави тој за РСЕ/РЛ. „Досега, нема многу што ни дава надеж дека решението за војната е на дофат.“

По првичните директни разговори што траеја неколку месеци веднаш по февруари 2022 година, Москва и Киев не одржаа директни разговори до мај минатата година.

Претседателот на САД, Доналд Трамп, е фрустриран што војната сè уште трае, иако решавањето на конфликтот го направи клучен приоритет на надворешната политика.

Покрај Виткоф, кој се сретна со рускиот претседател Владимир Путин седум пати во текот на изминатата година, на разговорите присуствуваше и зетот на Трамп, Џаред Кушнер.

На состаноците учествуваат сегашни и поранешни разузнавачки службеници од двете земји и се фокусираат на тесни теми.

Разликата во ставовите меѓу двете страни е малку намалена, но главната точка на спорот останува прашањето за територијата во украинскиот регион Донбас што Киев ја контролира, но Москва тврди дека ја има.

Украинскиот претседател Володимир Зеленски предложи воспоставување демилитаризирана зона, можеби со присуство на европски мировници. Русија ја отфрли оваа опција.

Киев, исто така, бара обврзувачки безбедносни гаранции од Соединетите Американски Држави и другите западни сојузници, што би ги обврзало странските земји да ѝ помогнат на Украина доколку Русија повторно нападне во иднина.

Украинскиот политички аналитичар Ихор Рајтерович го повика Западот да понуди посилни гаранции за Украина и да избегне повторување на Меморандумот од Будимпешта од 1994 година.

Спогодбата, потпишана од САД, Русија и Велика Британија, го гарантираше територијалниот интегритет на Украина во замена за демонтирање на нуклеарниот арсенал на Киев.

Владата го прифати барањето на УПОЗ но не во целост, но важно е дека се прифати да се исплаќаат додатоците на плати за работниците во државната управа и правосудството, изјави претседателот на синдикатот Трпе Деаноски по денешната средба со премиерот Христијан Мицкоски и владини претставници.

„Додатоците ќе бидат на неколку години, на 3 рати, по 8 проценти за жал, не по 10. Пак ќе повторам за жал, не ги добивме минатата година, меѓутоа еве Владата прифати да ги исплаќа од сега со почеток од месец март, преку начин што сите институции од државната управа и правосуството, значи судовите, обвинителства ќе треба да потпишат поединечни колективни договори за да го добијат ова право“, рече Деаноски.

Појасни дека за ова да се реализира треба се подготви текстот на овие колективни договори заедно со претставниците на Владата и синдикатот. Потоа договорите треба да бидат ставени на гласање пред органите и телата на синдикатот.

Тој нагласи дека ако членовите ги прифатат договорите, ќе може веднаш да се продолжи со нивно потпишување.

„Доколку не прифатат, Владата ќе добие наш одговор дека веќе е изгубена една година, а работниците можеби ќе бараат и повисоки износи од тоа што сега е понудено, и да видиме дали ќе има условување од Владата за откажување од нешто друго“, изјави Деаноски.

Во меѓувреме УПОЗ преку соопштение информира дека денеска во 15.30 часот ќе биде свикан состанок на органите и телата, за да бидат информирани за новата состојба.

„Зголемувањето на платите за сите вработени во управата и правосудството е поголемо од веќе обезбеденото зголемување со Општиот колективен договор за јавниот сектор како поповолно право за рабниците. Дополнително, во пресметката на платите на вработените како компонента на плата останува минималната плата, а борбата за зголемување на минималната плата за сите работници продолжува се до нејзино зголемување, а со тоа и зголемување на платите на сите работници кои во својата пресметка на плата ја имаат минималната плата. Платата во единиците на локалните самоуправи може да се зголемува преку склучување на поединечни колективни договори“, стои во соопштението од УПОЗ.

Видете и ова:

ССМ најави блокади на Собранието, Стопанската комора и Владата поради минималната плата

Денешната средба следуваше откако премиерот даде понуда за раст на платите за која УПОЗ потврди дека е прифатлива и дополнително ќе се разговара во рамките на синдикалните организации.

Мицкоски, одговарајќи вчера на новинарски прашања во врска со актуелните разговори за покачувањата на минималната плата и зголемувањето на платите за вработените во јавната администрација со синдикалните претставници, рече дека Владата има своја формула за пресметување на платите на вработените во администрацијата.

„Формулата што ја нуди Владата во врска со тоа е како ќе следува покачувањето на платите на административците, етапно ќе значи и повисоки примања за нив, а не само за онолку средства колку што ќе расте минималната плата “, рече Мицкоски.

Барањето за минимална плата од 600 евра доби и улична димензија на 28 јануари, кога синдикатите одржаа протест и предупредија дека, доколку не дојде до зголемување на платите, ќе иницираат законски измени за намалување на функционерските плати до 80 проценти.

Минималната плата во Северна Македонија е 397 евра, трипати помала од потрошувачката кошница со која едно семејство може да го помине месецот и во регионот е повисока само од Косово.

НАТО повика на „одговорност и воздржаност“ откако истече договорот „Нов СТАРТ“ меѓу САД и Русија, со кој се наметнуваат ограничувања на нивните нуклеарни арсенали, зголемувајќи ги стравувањата од нова трка во вооружување.

„Воздржаноста и одговорноста во нуклеарната сфера се клучни за глобалната безбедност“, изјави за АФП официјален претставник од воената алијанса предводена од САД, под услов да остане анонимен.

Официјалниот претставник рече дека Русија и Кина ги зголемуваат своите нуклеарни капацитети и дека НАТО „ќе продолжи да презема неопходни чекори“ за да ја обезбеди сопствената одбрана.

„Неодговорната нуклеарна реторика на Русија и принудното нуклеарно сигнализирање покажуваат став на стратешко заплашување“, рече официјален претставник.

Видете и ова:

Договорот за ограничување на нуклеарното оружје на Русија и САД е пред истекување. Што ќе се случи потоа?

Тој додаде дека во меѓувреме, „Кина продолжува брзо да го проширува и диверзифицира својот нуклеарен арсенал со повеќе боеви глави и поголем број софистицирани системи за испорака“.

Кремљ во четврток изјави дека жали за истекот на последниот договор што ги регулира нуклеарните арсенали на Русија и САД и го нарече негативен чекор.

Вашингтон изјави дека секој нов нуклеарен договор ќе мора да ја вклучи Кина, но меѓународните напори да се охрабри Пекинг да се приклучи на нови разговори досега не успеаја.

Украина и Русија денеска, 5 февруари го започнаа вториот ден од разговорите со посредство на Соединетите Држави во Абу Даби, насочени кон ставање крај на војната предизвикана од инвазијата на Москва врз нејзиниот прозападен сосед во 2022 година.

Преговорите се најновиот обид во дипломатските напори за запирање на борбите - најсмртоносните во Европа од Втората светска војна, со стотици илјади убиени, милиони принудени да ги напуштат своите домови и голем дел од источна и јужна Украина останаа уништени.

„Вториот ден од разговорите во Абу Даби започна. Работиме во истите формати како и вчера: трилатерални консултации, групна работа и последователно усогласување на позициите“, рече водечкиот преговарач на Украина, Рустем Умеров.

Првиот ден од разговорите во главниот град на Емиратите заврши со тоа што Киев ги опиша преговорите како „суштински и продуктивни“, иако немаше очигледен пробив.

„Дефинитивно има напредок, работите се движат напред во добра, позитивна насока“, изјави рускиот преговарач Кирил Дмитриев за државните медиуми.

Дмитриев го критикуваше она што го нарече обиди од европските земји да го „нарушат напредокот“.

Видете и ова:

Украина чека нова рунда разговори додека нападите се зголемуваат

Украинскиот претседател Володимир Зеленски во средата изјави дека 55.000 војници на неговата земја се убиени, што е ретка проценка на загубите на бојното поле од двете страни.

Русија, исто така, ги засили нападите врз енергетската инфраструктура на Украина, оставајќи многу луѓе, вклучително и жители на главниот град Киев, без струја на температури до минус 20 степени Целзиусови во последните денови.

Ноќта Русија нападнала со две ракети и 183 беспилотни летала, соопштија воздухопловните сили. Нападите повредија две лица во Киев.

Главниот преговарач на Украина, Умеров, рече дека на првиот ден од разговорите биле дискутирани „конкретни чекори и практични решенија“.

Но, портпаролот на Кремљ, Дмитриј Песков, им рече на новинарите дека борбите ќе продолжат „сè додека режимот во Киев не донесе соодветни одлуки“.

Видете и ова:

Русија продолжува со нападите на Киев пред разговорите во Абу Даби

Главната точка на сопнување во преговорите е долгорочната судбина на територијата во источна Украина.

Москва бара Киев да ги повлече своите војници од делови од Донбас, вклучувајќи ги и силно утврдените градови на огромни природни ресурси, пред да се постигне каков било договор.

Исто така, сака меѓународно признание дека земјата запленета во инвазијата ѝ припаѓа на Русија.

Киев изјави дека конфликтот треба да биде замрзнат по сегашната линија на фронтот и отфрли повлекување на силите.

Трилатералните преговори, кои првпат се одржаа на 23 и 24 јануари во Абу Даби, се најјавниот знак за напредок досега во напорите на американскиот претседател Доналд Трамп да преговара за крај на војната.

Неговиот претставник Стив Виткоф и зет Џаред Кушнер се испратени да се обидат да ги убедат страните на договор.

Во Украина, портпаролот на Министерството за надворешни работи, Георгиј Тики, Киев беше „заинтересиран да открие што навистина сакаат Русите и Американците“.

Зеленски рече дека улогата на американскиот претседател ќе биде клучна, изјавувајќи за француската телевизија во интервју емитувано во среда дека „Путин се плаши само од Трамп“.

Видете и ова:

Трамп: Путин се согласи да не напаѓа украински градови една недела поради студот

Трамп би можел да употреби економски санкции против Русија или да префрли оружје во Украина за да го „одржи овој притисок врз Путин“, рече Зеленски, но додаде дека Киев нема да прави компромис со суверенитетот.

Русија окупира околу 20 проценти од Украина. Таа ги смета регионите Луганск, Херсон и Запорожје за свои, а држи и делови од територијата во најмалку три други украински региони на исток.

Киев сè уште контролира околу една петтина од регионот Донецк. Предупреди дека отстапувањето територија ќе ја охрабри Москва и дека нема да потпише договор што нема да ја одврати Русија од повторна инвазија.

На доживотен затвор е осуден маж кој заговарал атентат врз американскиот претседател Доналд Трамп на неговото игралиште за голф во Флорида во септември 2024 година, два месеци пред претседателските избори во Соединетите Американски Држави (САД).

Рајан Рут, 59, беше прогласен за виновен во септември по пет обвиненија, вклучително и обид за атентат врз претседателски кандидат, јави агенцијата АФП.

Рут е градежен работник кој според јавно достапните податоци има долга историја на судири со полицијата. Тој се преселил на Хаваи пред неколку години од Северна Каролина и изрази поддршка за демократите и Украина на неговите страници на социјалните мрежи.

Видете и ова:

Пукање во близина на Трамп, Тајната служба соопшти дека тој е безбеден

Агенти на Тајната служба отвориле оган откако забележале лице со огнено оружје во близина на голф-клубот на поранешниот претседател во Вест Палм Бич, додека тој играл голф.

Лицето со џип побегнало од местото, но подоцна било уапсено во соседниот округ.

Два месеци претходно, во јули, Трамп преживеа уште еден обид за атентат откако беше застрелан на митинг во Пенсилванија, а куршумот му го погоди увото.

По овој обид Трамп беше под засилено обезбедување. На митинзите на отворено за време на изборната кампања за претседателските избори во САД во 2024 година , тој зборуваше зад стаклена ограда отпорна на куршуми.

На овие избори Трамп ја победи противкандидатката Камала Харис, кандидатка на демократите во САД.

Земјите од Европската Унија (ЕУ) се согласија за условите за нов пакет заем за Киев во вредност од 90 милијарди евра (106,3 милијарди долари) за 2026 и 2027 година, за поддршка на воените и економските потреби на Украина, јави агенцијата ДПА.

Според плановите, 60 милијарди евра се наменети за расходи поврзани со одбраната. Сепак, Киев може да ги користи парите само за купување воена опрема од компании со седиште надвор од Украина и европската економска зона, како и од Соединетите Американски Држави(САД), доколку потребните производи не се достапни.

Договорот доаѓа по интензивна дискусија меѓу земјите од ЕУ за тоа како да се поврзат новите средства со одредби за купување оружје по можност произведено во Европа. Франција се залага за строги упатства за промовирање на европската индустрија за оружје, додека други земји предупредуваат дека премногу ограничувања би можеле негативно да влијаат врз одбранбените способности на Украина.

Според договорот, Украина ќе може да ги користи средствата за одредено американско оружје, вклучувајќи ги и системите за ракетна одбрана „Патриот“.

Видете и ова:

Дали војната на Русија против Украина ќе заврши во 2026 година?

Генералниот секретар на НАТО, Марк Руте, претходно предупреди против наметнување премногу строги услови, бидејќи тие би можеле да имаат негативно влијание врз капацитетите за воздушна одбрана на Украина.

Процедурата за заемот уште треба да се финализира со Европскиот парламент.

Првата исплата за Киев е предвидена во вториот квартал од 2026 година.

„Новото финансирање ќе помогне да се обезбеди жестока отпорност на земјата во услови на руска агресија“, рече кипарскиот министер за финансии Макис Керавнос, чија земја претседаваше со преговорите. „Во исто време, испраќаме силен сигнал дека суверенитетот и територијалниот интегритет на државите мора целосно да се почитуваат, во согласност со меѓународното право“, рече Керавнос.

Според проценките на Меѓународниот монетарен фонд, пакетот за поддршка што го претстави Европската комисија покрива околу две третини од вкупните финансиски потреби на Украина во наредните две години.

Сите земји - членки на Европската унија (ЕУ) ќе мора да го воведат системот за влез/излез (ЕЕС) на сите свои гранични премини од 10 април и да ги регистрираат сите државјани на трети земји што ја преминуваат границата, објави Европската комисија(ЕК).

ЕЕС е автоматизиран систем што го заменува рачното ставање печати на пасошите за државјани кои не се членки на ЕУ и влегуваат во шенген зоната. Системот евидентира биометриски податоци - отпечатоци од прсти и фотографија од лице - како и лични податоци и датуми на патување, со цел подобрување на граничната безбедност, откривање лица кои го пречекориле дозволениот престој и спречување на кражба на идентитет.

Системот ЕЕС беше делумно воведен во октомври 2025 година и ќе биде целосно оперативен во април оваа година.

Видете и ова:

Што треба да знаат граѓаните на Западен Балкан за новите правила за влез во ЕУ?

Службениците на Европската комисија велат дека на земјите-членки ќе им биде дозволено постепено да го воведат системот до 9 април, а тој ќе стане целосно оперативен следниот ден.

Сепак, Европската комисија им остава на земјите-членки одредена флексибилност во неговото постепено воведување, особено за време на таканаречената „шпиц сезона“ во лето.

„Со оглед на загриженоста за претстојната летна сезона, вградена е дополнителна флексибилност за летниот период. Земјите-членки, доколку е потребно, можат да го продолжат периодот на постепено воведување до септември“, потврди портпаролот на Европската комисија, Маркус Ламерт.

Системот ЕЕС ќе се применува на граѓаните кои поседуваат биометриски пасоши, без оглед на тоа дали им е потребна виза за влез во ЕУ или не.

Според регулативата на Европската комисија, одлуките за враќање во некои случаи ќе бидат придружени со забрана за влез (кога периодот за доброволно заминување не е одобрен или кога обврската за враќање не е исполнета), додека во други случаи може да се изрече и забрана за влез.

И забраните за влез и одлуките за враќање ќе бидат евидентирани во ЕЕС. Времетраењето на забраната за влез ќе се утврди земајќи ги предвид сите релевантни околности на поединечниот случај и нема да надминува пет години.

Доколку лицето на кое се однесува забраната се обиде повторно да ја премине шенген границата, влезот ќе му биде одбиен на границата, а податоците за одбивањето ќе бидат регистрирани во системот.

Во одредени случаи, се предвидува и можност за поништување на пасошот при обид за влез.

Новиот ЕЕС систем е воспоставен за да ги направи базите на членките на ЕУ поповрзани за да се олесни следењето на времето и местото на престој и да се осигура дека патниците не престојуваат повеќе од 90 дена во период од шест месеци.

Слични системи веќе се воведени од САД, Канада и Австралија.

Иранска новинска агенција Фарс објави слики без коментар од американските бази на Блискиот Исток, додека тензиите меѓу Техеран и Вашингтон остануваат високи и покрај можноста за директни разговори.

Американскиот претседател Доналд Трамп се закани со воена акција против Иран - по смртоносното задушување на протестите - ако Техеран не успее да постигне договор за ограничување на неговата контроверзна нуклеарна програма.

Иранските официјални лица постојано се закануваат со непосредна одмазда доколку има напад, посочувајќи ги американските воени бази во Заливот како потенцијални цели.

Со оглед на тоа што разговорите меѓу иранскиот министер за надворешни работи, Абас Арагчи и американскиот претставник Стив Виткоф се очекуваат оваа недела, но не се потврдени, иранската новинска агенција Фарс, која се смета за блиска до безбедносните сили, два дена по ред објавува слики од американските бази во регионот.

Сликите немаат коментар туку само денот од неделата и датумот според персискиот календар.

Видете и ова:

Раскрсница во Техеран во служба на воинствена пропаганда

Слика од 3 февруари покажува поглед од воздух на воздухопловната база Ал Дафра надвор од Абу Даби, која ја користат американските и француските сили.

Во меѓувреме, во среда, 4 февруари Фарс ја покажа воздухопловната база Иса во сојузникот на САД, Бахреин, каде што се распоредени и американски авиони.

Но, сликите предизвикаа загриженост во Франција поради нејзините трупи стационирани во ОАЕ, а претседателот Емануел Макрон во вторникот изјави дека Париз внимателно ја следи ситуацијата.

„Очигледно сме многу внимателни во врска со оваа ситуација. Презедовме сите потребни мерки за да се осигураме дека нашите војници таму се распоредени во оптимални безбедносни услови“, рече Макрон.

Видете и ова:

Пезешкијан нареди разговори со САД, Трамп се надева на договор

Во вторникот, американски борбен авион собори ирански дрон што се приближи до американскиот носач на авиони УСС Абрахам Линколн, кој беше распореден на Блискиот Исток минатиот месец, додека САД го засилуваат притисокот од Техеран.

Сепак, немаше непосредни сугестии дека сликите објавени од Фарс претставуваат нови разузнавачки информации.

АФП потврди дека сликите од воздухопловната база Иса се стари. Исто така, според сателитските слики прегледани од АФП, од 3 февруари немало масовно распоредување на авиони во базата Ал Дафра.

Додека тензиите сè уште не се намалуваат, во Техеран се појави нов билборд на кој се прикажани американски авиони урнати во рид, а Иранци го веат знамето на Исламската република над него.

Рускиот лидер Владимир Путин ги пофали економските, политичките и безбедносните односи на Москва со Пекинг како „стабилизирачки“ фактор во турбулентните времиња ширум светот, во видео разговор со кинескиот претседател Си Џинпинг во среда, 4 февруари.

Москва и Пекинг се обидоа да презентираат обединет фронт против Западот, а односите се продлабочуваат по руската офанзива во Украина во 2022 година.

Разговорот доаѓа неколку дена откако високи функционери од двете земји се согласија дека односите би можеле да „се подигнат на нов степен“ оваа година, бидејќи Москва и Пекинг ја зајакнуваат економската соработка.

„Во услови на растечки турбуленции, надворешнополитичкиот сојуз меѓу Москва и Пекинг останува важен стабилизирачки фактор“, му рече Путин на Си во видео емитувано на руската државна телевизија.

„Руско-кинеското сеопфатно партнерство и стратешката соработка се примерни“, рече Путин, обраќајќи му се на Си како „драг пријател“.

Путин ги пофали трговските односи, при што Москва го пренасочи својот извоз кон Азија откако западните земји воведоа огромни санкции врз Русија поради офанзивата на Кремљ во Украина.

Видете и ова:

Може ли Европа да ја притисне Кина да помогне да се заврши војната во Украина?

Кина никогаш не ја осуди војната на Русија, ниту побара од неа да повлече трупи, а многу од сојузниците на Украина веруваат дека Пекинг ѝ дал поддршка на Москва.

Видеоповикот се одржа додека руските, украинските и американските преговарачи се состанаа во Абу Даби на уште една рунда разговори за ставање крај на речиси четиригодишната војна.

Но, Путин не ја споменал Украина за време на разговорот со Си.

Двајцата лидери последен пат се сретнаа лично во септември, кога рускиот лидер присуствуваше на масовната воена парада во Пекинг.

Си ја посети и Москва минатата година, во мај, за прославите на Русија за победата над нацистите во Втората светска војна.

Минатиот викенд, кинескиот министер за надворешни работи Ванг Ји се сретна со шефот за безбедност на Русија Сергеј Шојгу во Пекинг.

Според кинеското Министерство за надворешни работи, Ванг му рекол на Шојгу дека Кина и Русија мора да работат заедно за да го одржат мултилатерализмот во време на „превирања“ и „да се залагаат за рамноправен и уреден мултиполарен свет“.