Достапни линкови

Вести

Русија започна воени вежби со Кина, Индија и други земји

Русија започна големи воени вежби на истокот на земјата

Русија започна големи воени вежби на истокот на земјата, во кои учествуваат сили од Кина - што е приказ на сè поблиски одбранбени врски меѓу Москва и Пекинг во услови на тензии со Западот поради војната во Украина. Вежбата „Восток 2022“ се одржува на различни локации на Далечниот Исток на Русија и Јапонското Море и во неа учествуваат повеќе од 50.000 војници, над 5.000 единици вооружување, вклучувајќи 140 авиони и 60 воени бродови, соопшти руското Министерство за одбрана. Вежбата ќе заврши на 7 септември. Во вежбите учествуваат и војници од Индија, Лаос, Монголија, Никарагва, Сирија и неколку поранешни советски земји. Индија продолжува да ја нагласува својата неутралност во својот став за руската војна во Украина, велејќи дека одржува добри односи и со Западот и со Москва.

Путин ги обвини САД дека го продолжуваат украинскиот конфликт и го дестабилизираат светот

Кина остро одби да ја критикува руската војна во Украина, обвинувајќи ги Соединетите држави и НАТО за провокација на Москва и ги осуди санкциите наметнати од Запад кон Москва. Русија, пак, силно ја поддржа Кина поради тензиите со Соединетите Држави кои уследија по неодамнешната посета на Тајван од страна на претседателката на Претставничкиот дом на САД, Ненси Пелоси. Рускиот претседател Владимир Путин неодамна повлече паралели меѓу американската поддршка за Украина и патувањето на Пелоси на Тајван, обвинувајќи дека тие биле дел од наводните американски напори за поттикнување глобална нестабилност.

види ги сите денешни вести

Ахмети: Во ДУИ има меѓучовечки односи кои не се добри

Архивска фотографија - лидерот на ДУИ Али Ахмети.

Лидерот на ДУИ Али Ахмети денеска одржа средба со членовите на партиските ограноци од Чаир и Сарај, кои на 24 септември изјарија незадоволство против вицепремиерот Артан Груби.

Тој рече дека во партијата има меѓучовечки односи кои не се добри, но дека тоа не во целина, туку дека станува збор за одредени луѓе. Ахмети рече дека овие работи треба да се поправат.

„Со овие пресметки се занимавам веќе 20 години. Извршната власт има други проблеми, органоците и општините имаат други проблеми и природно се појавуваат противречности меѓу овие институции, што е природно“, рече Ахмети.

Тој додаде дека средбата со ограноците од Сарај и Чаир поминала добро и дека ништо не е непоправливо, а според него средбите се конструктивни и треба да постои дебата.

„Со извршната власт, раководители на ограноци зборувавме да се средат тие нејаснотии, недоразбирања. Во спротивно, нема ништо загрижувачко. Нема ништо од тоа што се зборува дека ќе се создаде нова партија“, рече Ахмети.

Инаку, партиските функционери на ДУИ на 24 септември изразија незадоволство против вицепремиерот Артан Груби.

Тие тоа го направија во писмо, кое меѓу другите беше потпишано од пратениците Изет Меџити и Мерита Колчи Коџаџику, поранешниот вицепремиер Муса Џафери, поранешниот министер за правда Блерим Беџети, поранешниот градоначалник на Гостивар Невзат Бејта и уште десетина членови.

Во писмото беше наведно дека во последните две години партиските органи на ДУИ не биле активни, а дека одлучувањето станало индивидуална сопственост и дека не се веќе добро организирана и структурирана партија.

„Во ДУИ веќе нема дебата и консултација со партиската база. Кадровските решенија се привилегија само на Артан Груби. Речиси две години нема отчет за работата на Владата и политичката програма. Поради нефункционалноста на организираниот живот на ДУИ, констатираме дека има пад на поддршката за партијата (последните избори во Тетово). Арогантното и дилетантско однесување на извршната власт на чело со Артан Груби, предизвика незадоволство, револт и пасивност на структурите и гласачите“, пишува во писмото.

Ахмети денеска по средбата рече дека меѓучовечките односи се над се, а дека функциите доаѓаат и си одат.

„И во семејството имате кавги и никој не може да каже дека има идеални односи, но може да се случат и несогласувања. Но, да најдеме енергија да ги надминеме овие несогласувања бидејќи ни претстојат големи цели“, рече Ахмети.

Ураганот Ијан предизвика поплави во Флорида

Последици од ураганот Ијан во сојузната американска држава Флорида.

Повеќе од два и пол милиони домови и бизниси во Флорида се без струја, а градовите остануваат потопени откако ураганот Ијан стигна до четврта категоријата.

Гувернерот на Флорина изјави дека поплава предизвикана од ураган од вакви размери се случува еднаш во 500 години.

По првиот поглед на уништувањето, гувернерот на Флорида, Рон Де Сантис, рече дека одневремто биле „потопени и навистина уништени“ крајбрежниот град Форт Мајерс и соседниот Кејп Корал.

Тој рече дека има „две непотврдени жртви“ од ураганот.

Националниот центар за урагани (НХЦ) денеска го намали рејтингот на Ијан на тропска бура, но посочи дека ќе предизвикува „катастрофални поплави“ и прогнозираше понатамошни поплави „опасни по живот“, високи бранови и силни ветрови во централна и источна Флорида, како и во Џорџија и Јужна Каролина.

Исто така, како што објави Би-Би-Си, се очекува Ијан да биде надграден во ураган од четврта категорија, откако утре повторно ќе стигне на копно.

Американската гранична патрола соопшти дека брод со мигранти потонал во морето за време на ураганот, а 20 лица се водат како исчезнати.

Четворица Кубанци пливаа на брегот во Флорида Кис, а крајбрежната стража спаси уште тројца.

Американскиот претседател Џо Бајден прогласи „голема катастрофа“ на Флорида, потег со кој се ослободуваат федерални средства за помош од невремето.

Де Сантис предупреди дека големи делови од Флорида и натаму остануваат под закана.

„Количината на вода што расте, а ќе продолжи и денеска додека помина невремето, всушност е поплава од 500 години“, рече тој на прес-конференција.

Ураганот претходно го погоди крајниот запад на Куба, оставајќи ја целата островска држава без струја и уби две лица. Околу 2,5 милиони луѓе на југозападниот брег на Флорида добија наредба да се евакуираат.

Растат анти-владините протести во Иран поради смртта на притворената жена

Протести во Иран

Антивладините демонстрации предизвикани од смртта на младата Иранка, откако беше приведена од полицијата за морал поради наводно несоодветно носење хиџаб, продолжуваат да се прошируваат низ целата земја и покрај официјалните предупредувања дека веќе смртоносното задушување на немирите ќе биде заострено.

Видеата објавени на социјалните мрежи во текот на ноќта покажаа дека демонстрации и протестни собири биле одржани во најмалку шест градови во Иран, вклучително Табриз, Наџафабад, Исфахан, Техеран, Машхад, Санандај и Урмија.

Активистите и роднините велат дека 22-годишната Махса Амини бил убиена како резултат на удари во главата кои ги добила во притвор. Надлежните тврдат дека таа починала од срцев удар.

Зголемениот гнев поради смртта на Амини го зголеми незадоволството во земјата која веќе е погодена од немирите поради лошите животни услови и економските тешкотии од американските економски санкции како одговор на иранската нуклеарна програма.

Гневот, исто така, го разгоре деценискиот незадоволство од третманот на жените од страна на иранското религиозно раководство, вклучително и законите кои ги принудуваат жените да носат марами во јавност.

Многу Иранци кои живеат во странство исто така на социјалните мрежи објавија дека на 1 октомври ќе се соберат во повеќе од 70 градови низ светот, за поддршка на протестите во Иран.

Во недостиг на струја угасена печката во фабриката ФЕНИ, вработените на принуден одмор

„Еуроникел индустри“ (поранешно Фени) во Кавадарци

Компанијата „Еуроникел Индустри“, која управува со фабриката за преработка на никел во Кавадарци (ФЕНИ), соопшти дека поради недостиг на електрична енергија одлучила да ја угаси печката, а дека најголем дел од вработените во моментов се на принуден одмор.

Претседателот на Синдикалната организација во Еуроникел Индустри Миле Ѓорѓиев изјави дека одлуката била донесена плански со цел спречување на натамошно одлевање на огромни парични средства за струја кои се во милиони евра.

Тој додава дека парите ќе бидат пренаменети во енергетски проекти, за во најкраток рок да го решат снабдувањето на електрична енергија.

„Во меѓувреме најголем дел од работниците и понатаму остануваат на принуден одмор, а дел остануваат на работа и се ангажиран на споменатите проекти. Се применува принципот на ротација на вработените“, вели Ѓорѓиев.

Еуроникел Индустри е најголем поединечен потрошувач на електрична енергија во државата, каде струјата има најголем удел во производниот трошок.

Од компанијата велат дека откако цената на струјата започнала вртглаво да расте од октомври 2021 година, преземале бројни активности за амортизирање на последиците и за продолжување на производниот процес, но дека со понатомошна ескалација на пазарот на струја, во јули оваа година застанале со производството.

„Застанавме со производството и во изминатите три месеци преземавме бројни неопходни ремонтни активности, а веќе во средината на септември, започнавме и со принуден платен одмор на работниците“, велат од компанијата.

Во соопштението се додава дека доколку во меѓувреме дојде до поволна промена на пазарот на електрична енергија, или ако државата обезбеди електрична енергија по субвенционирана цена, подготвени се во најкраток рок да го рестартираат процесот.

„Паралелно на ова, реализацијата на нашите планови за енергетска независност подразбираат и институционална подршка, која се надеваме соодветно ќе ја добиеме, а во интерес на компанијата, вработените, добавувачите и сите останати засегнати страни, и секако во интерес на националната економија, ако се земе во обзир дека Еуроникел е еден од најголемите работодавачи, втор најголем извозник, со значаен придонес кон бруто домашниот производ“, велат од компанијата.

Ѓорѓиев вели дека ги следат активностите на институциите и дека жалат што до денес се уште нема решение за големите потрошувачи на електрична енергија, за кои вели дека воедно се и најголеми работодавачи со најголем придонес во домашната економија.

„Апелираме што побрзо да се излезе со соодветна подршка, со цел да бидат заштитени работниците и да им се обезбеди соодветен социјален статус“, изјави Ѓорѓиев.

ЕУ преговара за оданочување на енергетските профити и ограничување на цените на гасот

Илустративна фотографија.

Земјите на ЕУ се подготвени да одобрат пакет итни мерки, вклучително даноци на неочекувани профити за енергетските компании. На истиот состанок, тие утре ќе разговараат и за тоа дали да биде воведено ограничување на цените на природниот гас.

Блокот од 27 земји преговара за мерките кои ги предложи Брисел минатата недела, во обид да го спречи растот на цените на енергијата што поттикнува рекордно висока инфлација и се заканува со рецесија.

Дипломатите од некои европски земји беа уверени дека министрите за енергетика на ЕУ ќе ги одобрат мерките на утрешниот состанок, иако со промени во првичните планови, за кои Брисел рече дека со нив може да се соберат 140 милијарди евра.

Овие пари ќе ги потрошат владите за да им помогнат на потрошувачите и компаниите да се справат со високите трошоци.

Договорот предвидува сите земји на ЕУ да им воведат данок на вишокот профит на компаниите за фосилни горива остварен во 2022 или 2023 година и да ги вратат приходите што евтините производители на електрична енергија ги остваруваат од огромните трошоци за електрична енергија.

Но, дури и пред одобрувањето на овие мерки, земјите го притискаат Брисел да преземе дополнителни чекори, особено ограничување на цените на природниот гас.

Петнаесет земји, вклучително и Франција, Италија и Полска, во вторникот на 27 септември ја повикаа ЕУ да предложи широко ограничување на цените за трансакции со гас на големо.

Европската комисија сподели со земјите анализа со различни опции за скротување на цените на гасот. Анализата предизвика скептицизам во однос на ограничувањата на големопродажната цена на гасот, предупредувајќи дека со тоа ќе има компликации и ќе се предизвика прекини во снабдувањето со гас.

Комисијата, сепак, рече дека ЕУ треба да воведе поограничени ценовни плафони за одредени испораки на гас.

Досега, Европската комисија, која ги подготвува политиките на ЕУ, официјално не предложи ограничувања на цените.

Германија, Холандија и Данска се меѓу оние кои се против ограничувањето на цените на бензинот.

По дискусијата за ова прашање која ќе се одржи во петок на 30 септември, се очекува Комисијата да сподели детали за можните нови мерки на ЕУ за намалување на цените на гасот.

НАТО: Инцидентите на „Северен тек“ се намерна непромислена саботажа

Истекување гас во Северен тек 2 како што се гледа од данскиот пресретнувач Ф-16 на Борнхолм, Данска, 27 септември 2022 година

НАТО изрази „длабока загриженост“ за штетата од гасоводите „Северен тек“ во Балтичкото Море, нарекувајќи ги инцидентите „намерни, непромислени и неодговорни акти на саботажа“.

Три истекувања, две во данската зона и едно во шведската зона, беа откриени претходно оваа недела во двата главни руски подводни цевководи дизајнирани за транспорт на природен гас во Германија, додека Шведска денеска соопшти дека нејзината крајбрежна стража пронашла и четврто истекување.

Европската унија соопшти дека протекувањето било предизвикано од „саботажа“, но се воздржа директно да ја префрли вината на Русија.

„Сите моментално достапни информации покажуваат дека ова е резултат на намерни, непромислени и неодговорни акти на саботажа“, се вели во денешното соопштение на Алијансата.

„Овие протекувања предизвикуваат ризици за превозот и значителна еколошка штета“, се вели во извештајот.

Кремљ на 29 септември соопшти дека се чини оти протекувањето е резултат на државно спонзориран „тероризам“.

Операторот на гасоводот „Северен тек А.Г.“, за Ројтерс денеска соопшти дека истекувањето на гас од Северен тек 1 најверојатно ќе биде запрено на 3 октомври.

Советот за безбедност на ОН ќе се состане на 30 септември за да разговара за инцидентот.

Нови 105 ковид позитивни, нема починати

Илустративна фотографија.

Во последните 24 часа регистрирани се 105 нови случаи на ковид-19 од направени 735 тестови, соопшти Министерството за здравство.

Од вкупниот број на позитивни, регистрирани се 22 реинфекции.

Во Скопје се регистрирани 78 нови ковид-позитивни, потоа следат Битола – 9, Прилеп – 3, Куманово, Тетово, Кавадарци, Охрид, Струмица и Штип – по 2, Кичево, Берово и Кратово – по 1. Регистрирани сe 49 оздравени пациенти.

Во текот на изминатите 24 часа, не е регистрирано починато лице, а нема починати ниту од Регистарот на умрени лица со дијагноза ковид-19 од Мој Термин.

Вкупната бројка на ковид-дијагностицирани лица во земјава од почетокот на епидемијата изнесува 342.880, бројот на оздравени пациенти е 332.855, на починати е 9.534 а бројот на активни случаи изнесува 491.

Финска ги затвора границите за руските туристи

Финско-руска граница, 23 септември 2022 година.

Финска од петок ги затвора своите граници за руските туристи. Таа е последната земја-членка на ЕУ која граничи со Русија што донесе ваква одлука.

Претходно овој месец, Полска, Естонија, Летонија и Литванија исто така ги затворија своите граници за руските туристи.

Но, на Русите сепак ќе им биде дозволено да ги посетуваат семејствата или да работат и да студираат во Финска, изјави министерот за надворешни работи на земјата.

Одлуката доаѓа откако бројот на Руси кои пристигнуваат на границата се зголеми, откако претседателот Владимир Путин повика 300.000 воени резервисти.

На граничните премини има редици луѓе кои се обидуваат да избегаат, вклучително и на безвизната граница на Русија со Грузија.

Финска, која дели 1.300 километри граница со Русија и бара виза за влез, исто така пријави зголемување на бројот на луѓе кои се обидуваат да ја преминат границата, по објавувањето на делумната мобилизација.

Финскиот министер за надворешни работи Пека Хаависто на денешна прес-конференција рече дека наредбата за мобилизација има „значително влијание“ врз неговата одлука.

„Одлуката има за цел целосно да ја спречи моменталната ситуација на рускиот туризам во Финска и поврзаниот транзит низ Финска“, рече тој.

Овој потег стапува на сила на полноќ и исто така им забранува влез и на Русите со шенген туристички визи.

Хаависто рече дека протокот на Руси се смета за закана за меѓународните односи на Финска.

На почетокот на овој месец, Европската унија одлучи да го поскапи и отежни процесот на издавање визи за руските граѓани спреку суспендирање на визниот договор меѓу ЕУ и Русија.

Повеќе од еден милион Руси отпатувале во земјите на ЕУ од почетокот на инвазијата врз Украина во февруари.

Во посебен потег, четири земји од ЕУ кои се граничат со Русија: Полска, Естонија, Латвија и Литванија, воведоа нови ограничувања и почнаа да ги одвраќаат руските туристи.

Норвешка има кратка граница со Русија, но не е земја членка на ЕУ. Сепак, земјата е вклучена во Шенген зоната за патување, што значи слободно движење меѓу шенген-зоните без гранични контроли.

Мицкоски го повика Ковачевски на дебата за енергетската криза

Лидерот на ВМРО-ДПМНЕ Христијан Мицкоски и премиерот Димитар Ковачевски.


Лидерот на ВМРО-ДПМНЕ Христијан Мицкоски денеска изјави дека Владата вчера имала панична реакција како резултат на предлогот на опозициската партија за тоа како да се ублажат последиците од енергетската криза, која како што рече постепено се трансформира во економска криза. Според него, со планот на ВМРО-ДПМНЕ за обезбедување на дополнителни количини на електрична енергија и топлина за граѓаните и индустријата без да има затворање на фирмите и отпуштање на работници. Владата, како што рече Мицкоски не покажала конструктивност за предлогот, туку премиерот Димитар Ковачевски организирал вонредна прес-конференција за ништо да не каже.

„Дополнителни количини на електрична енергија од домашно производство добиени со користење на евтин ресурс за стопанството и економијата да може бизнисот да се развива, а работниците да ги задржат своите работни места. Дополнителни количини на топлина за да може скопјани и сите корисници ан централното греење во главниот град Скопје да не плаќаат повисоки сметки за затоплување на нивните институции и домови. Заштеда од минимум 300 милиони евра, пари кои што оваа Влада ќе ги потроши во периодот кој што следи, кои што ги нема, а ќе ги земе преку скапи кредити“, рече Мицкоски.

Тој го повика Ковачевски на дебата и да избере, ден, време и медиум за да зборуваат што нуди ВМРО-ДПМНЕ, а што Владата. Мицкоски рече дека не е време за политиканство, туку е време за одговорност и како да им се помогне на граѓаните и стопанството.

„На дебата се зборува за концепти, Ние немаме што да криеме македонските граѓани заслужуваат да слушнат и да изберат“, рече Мицкоски на прашањето зошто не го повика Ковачевски на лидерска средба за да разговараат за енегетската криза.

На вонредна прес-конференција премиерот Димитар Ковачевски синоќа изјави дека грејната сезона во Скопје ќе почне на 15 октомври и дека има пари за производство на топлина, а се очекува Електрани на Северна Македонија (ЕСМ) наскоро да добие лиценца за управување со топланите во Скопје.

Според премиерот, ќе има и струја за домаќинствата и малите фирми кои се на регулиран пазар. Тој посочи дека тие добиваат сувенционирана струја која е пониска од берзанската.


Средба на Вучиќ и Хил за билатералната соработка и Западен Балкан

Кристофер Хил и Александар Вучиќ, Белград

Српскиот претседател Александар Вучиќ денеска разговараше со американскиот амбасадор во Белград Кристофер Хил за билатералните односи и зајакнувањето на соработката во сите области, вклучително и енергијата и клучните проблеми во регионот на Западен Балкан. Како што соопштија од кабинетот на српскиот претседател, Вучиќ истакнал дека Србија е посветена на зајакнување на економските и билатералните односи со САД. Во разговорот била констатирана заедничка потреба од интензивирање на соработката меѓу Србија и САД во сите области, но и на полето на енергетиката, која дополнително треба да се продлабочува и зајакне преку заедничка реализација на конкретни проекти од суштинско значење за напредокот на Србија.

Хил- САД очекува Србија да објасни што договорила со Русија

Зборувајќи за состојбите во регионот, соговорниците, како што е соопштено, заклучиле дека зачувувањето на мирот и стабилноста на Западен Балкан е од клучно значење и оти економскиот просперитет и фокусирањето на решавање на економските проблеми може да биде од голема помош за отстранување на политичките несогласувања.

Русија соопшти дека утре ќе ги припои четирите украински региони

Владимир Путин

Кремљ најави дека утре формално ќе анектира четири региони на Украина, додека Западот ги интензивира подготовките за нови санкции кон Русија во пресрет на, како што меѓународната заедница ги нарече „лажни“ референдуми. Портпаролот на Кремљ Дмитриј Песков изјави дека на церемонијата на потпишување ќе учествуваат претседателот Владимир Путин и лидерите наметнати од Москва во украинските региони Луганск, Доњецк, Керсон и Запорожје.

Што ќе се случува по таканаречените референдуми во Украина?

Официјални лица поддржани од Русија во четирите региони рекоа дека гласачите со големо мнозинство го поддржаа приклучувањето кон Русија, но гласањето беше отфрлено од Украина, западните влади и Обединетите нации бидејќи тие се нелегални според меѓународното право. Четирите региони формираат клучна копнена врска за Кремљ меѓу Русија и полуостровот Крим, кој Москва илегално го анектираше од Украина во 2014 година, а инаку е поврзан со копното само со мост. Потегот на Кремљ беше објавен само неколку часа откако претседателката на Европската комисија Урсула фон дер Лајен рече дека се работи на нов пакет мерки дизајнирани „Кремљ да плати“ за ескалација на конфликтот во Украина.

Рускиот план за анексија на делови од Украина

„Не прифаќаме лажни референдуми, ниту каков било вид анексија во Украина и решени сме да го натераме Кремљ да ја плати цената за оваа понатамошна ескалација“, изјави таа во Брисел. Предложениот осми пакет санкции вклучува дополнителни забрани за увоз на руски производи кои треба да ја лишат Москва од дополнителни 7 милијарди евра приходи. Во меѓувреме, Белата куќа соопшти дека Соединетите држави „никогаш“ нема да ги признаат руските обиди за анексија на делови од Украина и подготвуваат нови економски санкции кон Москва кои ќе наметнат „тешка економска цена за Русија“.

Во Црна Гора е во тек потрага по руски шпиони

илустрација

Во Подгорица се водат истраги по барање на Специјалното обвинителство за кривично дело шпионажа, потврди за Радио Слободна Европа специјалниот обвинител Вукас Радоњиќ. „По барање на Специјалното државно обвинителство, а по наредба на Вишиот суд во Подгорица, полицијата врши претрес на станови и други простории на повеќе граѓани, поради постоење основано сомнение дека се сторени кривичните дела создавање криминална организација и шпионажа. Досега никој не е лишен од слобода“, изјави портпаролот Радоњиќ.

САД: Русија потрошила над 300 милиони долари за тајно влијание врз светската политика

Премиерот во технички мандат Дритан Абазовиќ на седницата на Владата ја поздрави акцијата на Специјалното државно обвинителство: „Тоа е меѓународна акција што се спроведува со нашите партнери и која има за цел да ги зачува националните интереси на Црна Гора. Претходно „Вијести“ од Подгорица, повикувајќи се на податоци на Националната агенција за безбедност (АНБ), објави дека во Подгорица се уапсени неколку црногорски државјани под сомнение дека работеле за руската разузнавачка служба. „Според податоците на АНБ, едно од уапсените работи за руската служба повеќе од една деценија и е дел од поширока група чии членови познати на АНБ. Наводно се работи за вработен во државната администрација“. „Вијести, повикувајќи се на неименуван извор додаде дека акцијата на АНБ и Специјалното обвинителство е „само почеток на активностите за откривање соработници на странски разузнавачки служби“.

Столтенберг: нападите против критичната инфраструктура ќе наидат на решителен одговор

Генералниот секретар на НАТО Јенс Столтенберг

Генералниот секретар на НАТО Јенс Столтенберг денеска изјави дека намерен напад врз инфраструктурата на сојузниците ќе биде одговорен со решителен одговор, по, како што ги нарече, актите на „саботажа“ на гасоводите „Северен тек“. „Сите моментално достапни информации укажуваат дека ова е резултат на намерни, непромислени и неодговорни акти на саботажа“, се вели во соопштението на НАТО. „Ние, како сојузници, се обврзавме да се подготвиме, одвраќаме и да се браниме од други хибридни тактики од страна на државните и другите актери. Секој намерен напад против критичната инфраструктура на сојузниците би бил дочекан со обединет и решителен одговор“, се додава во соопштението.

Истекувањето на гасот во Балтичко Море носи безбедносни и климатски последици

Претходно, шведската крајбрежна стража денеска извести за четврто истекување гас во Балтичкото Море над гасоводот Северен тек. Сега има „две истекувања на шведска и две на данска страна“, изјави претставник на шведската крајбрежна стража. Тој додаде дека двете протекувања на шведска страна се „блиску едно до друго“. Досега властите на двете земји пријавиле едно истекување гас на шведска и две на данска страна. Европа оцени дека тоа е „саботажа“, а Москва го отфрли ова тврдење како „глупаво и апсурдно“. Гасоводите Северен тек 1 и 2 во моментов не работат, но во цевките има гас.

Џафери: Патните трошоци на пратениците ќе се пренаменат за плаќање сметки за струја

Талат Џафери, претседател на Собранието на РСМ

Дел од средствата наменети за патни трошоци ќе бидат пренаменети за да се покријат високите сметки за електрична енергија, најави претседателот на Собранието, Талат Џафери на редовниот брифинг со новинарите. Споредувајќи ги цените од претходната година тој укажа на тоа дека годинашните сметки за струја на законодавниот дом се зголемиле неколку пати повеќе во однос на ланските сметки, иако нема големи отстапувања во количествата на потрошена енергија.

„Ако во август претходната година сме плаќале 3, 61 денар по киловат час, цената за киловат час овој август изнесува 35. 31 денар или десет пати повеќе. Затоа пред да ни дојде фактурата за септември, се обратив до Министерството за финансии со барање дел од патните трошоци, дел од други работи во нашиот внатрешен буџет да го пренамениме за комуналии, за да може да излеземе на крај до крајот од годината. А во наредниот буџет ќе треба да видиме како ќе се движат работите и така да ги планираме средствата, вели Џафери.

Џафери истакна дека ги земале предвид укажувањата на Владата за штедење на струјата и дека веќе преземале мерки .

„Исклучен е системот за ладење во сите сали, освен во пленарната сала бидејќи таа нема пристап до природен воздух. По работното време проверуваме по канцеларии да не е заборавено нешто да се исклучи, минимално се користи осветлувањето, да може да се работи. Направивме процедура што и колку и како да се користи, извештајот е дека се почитува таа процедура која е пропишана во Собранието“, уверува првиот човек на Собранието.

Спикерот Џафери рече дека утре ќе биде закажана седницата на која најдоцна до полноќ треба да се гласа за владините одлуки за кризната состојба.

„Заклучно со утре треба да се изгласаат одлуките за продолжување на рокот за постоење на кризна состојба. Утре сигурно ќе биде свикано продолжението, треба да видам со координаторите кога да ја закажам седницата. Дебата може да трае до полноќ но може да се случи и да истече денот без да имаме одлуки“, вели Џафери.

Тој ги повика сите пратеници да се однесуваат одговорно и да не ја злоупотребуваат својата функција, забележувајќи дека неколку комисии одржуваат расправи по десетина продолженија на кои се разправа само за една точка од дневниот ред. Џафери тврди дека парламентарното мнозинство е стабилно и дека во моментот брои 64 пратеници. Тој информираше дека иницијативата на партијата Левица за референдум за францускиот предлог уште не е доставена во Собранието.

Седница на Советот за безбедност на бугарската влада

Вршителот на должноста премиер на Бугарија Гулаб Донев

Вршителот на должноста премиер на Бугарија, Гулаб Донев, за БНР изјави дека за денеска го свикал Советот за безбедност на Владата за да донесе конкретни одлуки и мерки и дека неговата земја е подготвена за реакција за новата ситуација во Украина по гласањето за приспојување на таа земја во Русија. Според Донев делумната мобилизација што ја најави претседателот на Русија доведува до ескалација на тензиите и до фактот дека земјите во Европа и оние кои се блиску до конфликтот помеѓу Русија и Украина, да не знаат до кога ќе продолжат воените дејствија и со каков интензитет.

Бугарија ги осуди референдумите во делови на Украина

Тој додаде дека Бугарија не ги признава таканаречените референдуми во четирите региони во јужна и источна Украина, наведувајќи дека постои ризик за националната безбедност на Бугарија, но оти „до овој момент нема директна воена закана“. Со Советот претседава премиерот на земјата и вклучува претставници на безбедносните служби. Во минатата недела претседателот на Бугарија, Румен Радев, одржа консултативен состанок на тема Украина, на кој учествуваше премиерот Донев и на кој се разговараше за ризиците со кои се соочува земјата и системите кои би можеле да бидат погодени од ескалација на руската инвазија врз Украина.

Вчитај повеќе

XS
SM
MD
LG