Актуелниот претседател на Собранието Талат Џафери се заблагодари на номинацијата од ДУИ да биде премиер на техничката влада сто дена пред парламентарните избори што треба да се одржат следната година.

Тој вели дека ќе ја извршува функцијата со почит и одговорност.

„Ми претставува особена чест за доделената доверба од партиските органи и секако можам да кажам дека и оваа функција со должно почитување и соодветна одговорност ќе биде спроведена од моја страна како одговор од поддршката искажана од партиските органи, а пред сè од граѓаните на Република Северна Македонија“, изјави Џафери вечерта на 8 декември.

Одлуката на ДУИ, Џафери да биде премиер во техничката влада ја соопшти партискиот портпарол Бујар Османи по одржаниот состанок на Претседателството на интегративците попладнето на 8 декември.

Според договорот што беше постигнат на лидерската средба на 4 декември, парламентарните избори треба да се одржат на 8 мај 2024 година. Во ист ден ќе се гласа и во втор круг претседателски избори, додека првиот круг за избор на шеф на државата треба да се одржи на 24 април.

Со вака договорените датуми, техничката влада што ќе ја предводи Џафери треба да стапи на должност на 28 јануари, а еден месец подоцна Собранието ќе ги распише изборите.

Во владиниот кабинет на Џафери со министри за внатрешни и за труд и социјална политика, како и тројца заменици (за финансии, за земјоделство и за информатичко општество и администрација) предвидено е да биде застапена опозициската ВМРО-ДПМНЕ. Кои ќе бидат кадрите на опозициската партија сè уште не е познато.

Договорот сто дена пред избори да има премиер Албанец предложен од ДУИ беше постигнат помеѓу претседателот на оваа партија Али Ахмети и поранешниот лидер на СДСМ и премиер Зоран Заев по парламентарните избори 2020 година кога двете партии договорија коалиција за формирање влада. Наследникот на Заев во СДСМ и во Владата, актуелниот премиер Димитар Ковачевски, пак, неколку пати во својот досегашен мандат посочи дека ќе го испочитува договореното.

На 7 декември, судот во градот Хомел во југоисточна Белорусија ги означи налозите на белорускиот сервис на Радио Слободна Европа (РСЕ) на Телеграм, Јутјуб, Икс (поранешен Твитер) и Тик-ток, како екстремистички.

Претходно белоруските власти на списокот на екстремисти го додадоа логото на „Свабода“, профилите на социјалните мрежи Фејсбук, Инстаграм, ВКонтак и Однокласник, како и на Тик-ток налозите на руските и украинските сервиси на РСЕ.

Веб-страницата на Свобода е блокирана во Белорусија од август 2020 година, кога избувнаа невидени протести поради официјалните резултати од претседателските избори на кои авторитарниот владетел Александар Лукашенко беше прогласен за победник.

Во исто време, Ихар Лосик, познат блогер и новинар на Радио Свабода, повеќе од три години е во затвор во Белорусија.

И додека неговата сопруга Дарја е исто така зад решетки, нивната четиригодишна ќерка Паулинка живее во нивниот роден град Барановиќ со баба ѝ и дедо ѝ.

Во декември 2021 година, Ихар Лосик беше осуден на 15 години затвор по неколку точки од обвинението, вклучително и „организирање масовни немири, поттикнување општествена омраза“ и неколку други обвиненија кои остануваат нејасни. Лосик тврди дека е невин и обвинувањата ги нарекува политички мотивирани.

Во ноември минатата година белоруското Министерство за внатрешни работи го додаде Лосик и новинарот Радио Свабода Алех Хружџиловиќ на листата на екстремисти.

Во екот на напорите за сузбивање на независните медиуми, опозициските политичари, активистите за човекови права и демократските институции, белоруските власти додадоа дури 244 лица на списокот, меѓу кои и овие двајца новинари од Радио Свабода, како што е локално познат сервисот на РСЕ.

Актуелниот претседател на Собранието, Талат Џафери, ќе биде премиерот кој сто дена пред избори ќе ја предводи техничката влада.

Одлуката за тој да биде премиер ја донело Централното претседателство на Демократската унија за интеграции (ДУИ) на состанок одржан денеска (8 декември) во Тетово.

Актуелниот министер за финансии Фатмир Бесими, пак, со одлука на партиското раководство, ќе биде шеф на изборниот штаб за изборите во 2024 година.

Портпаролот на ДУИ, Бујар Османи, соопшти и дека интегративците го овластиле лидерот Али Ахмети да ги продолжи разговорите со политичките партии и да одлучува за евентуални коалиции за претседателските и парламентарни избори.

Договорот сто дена пред избори да има премиер Албанец од ДУИ го постигнаа Али Ахмети и поранешниот лидер на СДСМ Зоран Заев заедно со договорот за коалицирање по парламентарните избори во 2020 година. Наследникот на Заев, Димитар Ковачевски, пак, досега неколку пати посочи дека ќе го почитува договореното.

Парламентарните избори следната година, според договорот на лидерската средба одржана на 4 декември, ќе се одржат на 8 мај. Истиот ден ќе се гласа и во втор круг претседателски избори, откако првиот ќе се одржи на 24 април.

Ова значи дека техничката влада на чело со Џафери ќе стапи на должност на 28 јануари, а изборите ќе се распишат на 28 февруари.

Во техничката влада со министри за внатрешни и за труд и социјална политика, како и тројца заменици (за финансии, за земјоделство и за информатичко општество и администрација) предвидено е да биде застапена опозициската ВМРО-ДПМНЕ. Кои ќе бидат кадрите на опозициската партија сè уште не е познато.

Подготовките за изборите, освен ДУИ, ги започнаа и останатите политички партии. По лидерската средба на 4 декември, премиерот и лидер на СДСМ Димитар Ковачевски соопшти дека неговата партија ден претходно одржала седница на Извршниот одбор и започнала иницијатива за формирање широк европски фронт. Исто така, започната е и постапка за избор на претседателски кандидат.

Ковачевски тогаш ги повика во фронтот да се приклучат сите партии, општествени чинители, невладини итн. Но, кога зборуваше за широка коалиција не беше прецизен во одговорот дали мисли на условно помалите партии или на ДУИ и Алијанса за Албанците, туку порача дека во „неа е отворен просторот за сите партии“.

Извршниот комитет на ВМРО-ДПМНЕ, пак, на 5 декември одлучи да формира Републички изборен штаб со кој ќе раководи лидерот Христијан Мицкоски, а негова заменик ќе биде партискиот генерален секретар Ѓорѓија Сајкоски.

На 2 март 2024 година во Скопје, партијата ќе одржи изборна конвенција на која ќе го избере претседателскиот кандидат.

Опозициските партии од албанскиот блок, пак, најавија заеднички настап на изборите. Станува збор за Изет Меџити (Демократско движење), Билал Касами (Беса) и Африм Гаши (Алтернатива), кои се обединија во заеднички блок под називот Европски сојуз за промени.

Иницијативата „Поддршка на народот на Палестина – Србија“ на 8 декември објави дека од безбедносни причини полицијата забранила собир за поддршка на Палестинците во Газа кој беше планиран за 10 декември во Белград.

Во соопштението на Иницијативата се наведува дека собирот бил закажан пред Владата на Србија, со планиран марш до амбасадите на Израел и САД.

Организаторите претходно најавија дека меѓу другото ќе побараат од српската Влада да ги прекине сите дипломатски и економски односи меѓу Србија и Израел.

„Ова би бил трет митинг за поддршка на народот на Палестина што се одржува во Белград“, се наведува во соопштението, во кое се нагласува дека на претходните собири немало насилство или вандализам.

Во соопштението се наведува дека Иницијативата поднела жалба на решението на полицијата.

Од српското Министерство за внатрешни работи не одговорија на прашањата на РСЕ за забраната на овој собир.

Милитантната група Хамас, прогласена за терористичка организација од САД и ЕУ, ја започна војната со Израел со извршување на смртоносни напади во јужен Израел на 7 октомври, при што борците на палестинската група убија речиси 1 200 луѓе и зедоа 240 заложници.

Израел одговори со напади врз Газа, а претставници на Хамас во оваа енкалва тврдат дека Израел убил повеќе од 17 177 луѓе во својата одмазда.

На заеднички самит следната недела, Европската унија (ЕУ) јасно ќе побара од земјите од Западен Балкан целосно да се усогласат со политиката на санкции против Русија.

Во нацрт-декларацијата што треба да се усвои на крајот на самитот се наведува дека усогласувањето со политиките на ЕУ е јасен знак за стратешката ориентација на партнерите, сега повеќе од кога било, во контекст на руската агресивна војна против Украина и другите безбедносни предизвици.

Шефовите на држави и влади на земјите-членки на ЕУ на 13 декември ќе се сретнат со колеги од шесте земји од регионот на редовниот годишен самит ЕУ-Западен Балкан.

„Заедничката визија за иднината вклучува заеднички вредности и заедничка одговорност. Додека ја продлабочуваме нашата соработка со партнерите, ги повикуваме да направат брз и одржлив напредок кон целосно усогласување со заедничката надворешна и безбедносна политика на ЕУ, вклучително и рестриктивните мерки на ЕУ, како и да се постапат во согласност со тоа“, се наведува во нацрт-декларацијата во која Радио Слободна Европа (РСЕ) имаше увид.

Во декларацијата ќе се пофалат земјите од Западен Балкан кои веќе ја покажуваат својата стратешка определба со целосно усогласување со надворешната и безбедносната политика на ЕУ и ќе се охрабрат „оние кои сè уште не го сториле тоа“ да го следат нивниот пример.

„Исто така, охрабруваме и подобрување на спроведувањето на рестриктивните мерки и спречување на нивно заобиколување“, велат лидерите на ЕУ во завршната декларација.

Со овој документ треба да се согласат и учесниците на самитот од регионот.

Повик за Косово и Србија

Посебен дел во завршната декларација се однесува на процесот на нормализација на односите меѓу Србија и Косово. Како што е наведено во нацртот, се нагласува дека ЕУ очекува Приштина и Белград да се ангажираат конструктивно со цел брз напредок во нормализацијата на односите. Се констатира дека тоа е клучно за безбедноста и стабилноста на целиот регион и за да се осигури дека двете страни можат да напредуваат на европскиот пат.

Двете страни ќе бидат повикани, без дополнителни одложувања или предуслови, целосно да го имплементираат Договорот за патот на нормализација и неговиот анекс за имплементација, договорени во февруари и март оваа година, како и сите претходни договори.

„Исто така, очекуваме страните да продолжат со континуираните напори за деескалација во согласност со барањата на ЕУ и да се воздржат од унилатерални и некоординирани дејствија кои би можеле да доведат до дополнителни тензии и насилство, како и од реторика која не води кон нормализација на односите“, ќе предупредат лидерите на ЕУ преку декларацијата што треба да биде усвоена на крајот од самитот.

Трајни решенија за билатерални спорови

Во завршната декларација ќе се нагласи потребата од посветеност на партнерите од Западен Балкан за инклузивна регионална соработка и зајакнување на добрососедските односи, вклучително и со земјите-членки на ЕУ.

Во овој контекст, ЕУ ја нагласува важноста од постигнување дефинитивни и трајни решенија за билатералните спорови и прашања на партнерите кои се вкоренети од минатото, се наведува во нацрт-декларацијата, во која се повикуваат земјите од регионот да гарантираат правата и еднаквиот третман на малцинствата.

Реформи кои ќе го забрзаат пристапувањето во Унијата

Со оваа декларација, ЕУ повторно ќе ја потврди својата целосна и недвосмислена посветеност на перспективата за членство на Западен Балкан во Унијата и ќе ги повика земјите од регионот да го забрзаат процесот на пристапување, заснован на кредибилни реформи, фер и ригорозни условувања и на принципот на сопствените заслуги.

„Проширувањето е геостратешка инвестиција во мирот, безбедноста, стабилноста и просперитетот“, се наведува во нацрт-декларацијата.

Во документот, исто така, се поздравува и определбата на земјите од регионот да ги почитуваат и да се посветат на клучните европски вредности и принципи. Нагласена е и потребата од одржливи и неповратни реформски достигнувања во областите на владеење на правото, функционирањето на демократските институции, економијата и реформата на јавната администрација.

ЕУ ќе ја потврди својата посветеност за забрзување и натамошно продлабочување на својот политички ангажман со Западен Балкан, меѓу другото, преку одржување на редовни самити ЕУ-Западен Балкан, учество на партнерите од Западен Балкан на настани на високо ниво на ЕУ и редовни дијалози за заедничките надворешни и безбедносни политики во мултилатерални форуми.

Дваесет и седум лидери од земјите на ЕУ и шест нивни колеги од Западен Балкан усвоија заедничка декларација во Тирана на 6 декември минатата година, со која се потврди целосната и недвосмислена посветеност на ЕУ за перспективата за членство на Западен Балкан во Унијата.

Одржувањето редовни годишни самити меѓу ЕУ и земјите од регионот стана практика од 2020 година. ЕУ, исто така, редовно ги поканува претставниците на овие земји на различни состаноци на министерско ниво.

Поранешната обвинителка и шефица на Основното јавно обвинителство за гонење организиран криминал и корупција (ОЈО ГОКК) Вилма Русковска смета дека случајот со свирепите убиства на 14-годишната Вања Ѓорчевска од Скопје и 74-годишниот велешки фризер Панче Жежовски, не смее да добие политичка конотација.

„Не мислам дека сето ова може да добие политичка конотација и не би смеело да добие, затоа што се работи за две грозоморни убиства, особено ако се има предвид дека едно од жртвите е 14-годишно дете“, изјави Русковска денеска (8 декември) по настанот за доделување на државната награда „Св. Климент Охридски“.

Таа додава и дека истрагата допрва треба да утврди која е вистинската заднина на случајот.

Нејзините очекувања се и сето ова предвид да го имаат и турските власти кои се очекува да го екстрадираат првоосомничениот Љупчо Палевски – Палчо кој беше уапсен на 5 декември кај градот Баликесир.

„Сметам дека и колегите во Турција, односно судиите, кои ќе ги разгледуваат доказите и ќе одлучуваат по екстрадицијата, ќе го имаат сето ова предвид“, вели Русковска.

Барањето за екстрадиција на Палчо беше експресно подготвено и испратено вчера до турските власти.

Палевски во истрагата е осомничен за по две кривични дела грабнување и убиство, а како соизвршнители со него се гонат уште три лица кои се наоѓаат во притвор во затворот „Скопје“ во Шуто Оризари. Во Шутка се наоѓа и таткото на Вања, кој според првичните сознанија, на Палевски му давал информации кога девојчето ќе биде само.

Исчезнувањето на велешкиот фризер беше пријавено на 22 ноември, а на девојчето Вања на 27 ноември. Денот на грабнување, според првичните искази на осомничените, се смета и за денот кога таа била убиена.

Палевски државата ја напушти на 30 ноември патувајќи со неговиот адвокат кон Белград. Адвокатот, кој во изјава за медиумите кажа дека осомничениот му рекол дека треба да оди на преглед во Србија, беше задржан во полиција, но засега тој не е осомничен бидејќи обвинителството оценило дека во моментов не постојат законски основи за тоа и за барање мерки за негово обезбедување. Сепак, рекоа од обвинителството, проверките за неговата евентуална инволвираност ќе продолжат.

Во меѓувреме, вториот возач на Палевски, кој го возеше од Србија, преку Бугарија кон Турција, доби 30-дневен притвор. За него вчера скопското обвинителство соопшти дека отворило истрага за „помагање на сторител по извршено кривично дело“.

„Осомничениот, по претходна комуникација и договор со сторителот кој се наоѓал во Србија, со возило ’ланд ровер‘ со струмички регистарски ознаки, сопственост на правно лице, се упатил кон Белград. Таму се сретнал со сторителот и заедно со возилото се упатиле кон границата на Србија со Бугарија – граничен премин ’Калотина‘. Границата ја поминале на 02.12.2023 година, па движејќи се низ територијата на Бугарија истиот ден пристигнале на границата со Турција, граничен премин ’Капитан Андреево‘, и влегле во Турција“, соопшти обвинителство на 7 декември.

Возачот го оставил Палевски во Турција, и преку Грција се вратил во земјава каде беше приведен при влез на граничниот премин ’Стар Дојран‘.

Обвинителка од Основното јавно обвинителство (ОЈО) Прилеп заедно со нејзиното семејство била мета на закани и демнење на интернет поради што е поведена постапка против едно лице за три кривични дела.
Осомничениот се гони за полово вознемирување, загрозување на сигурноста и демнење.

„Во текот на ноември, осомничениот на својот Фејсбук профил во повеќе наврати поставувал текстуални објави и вклучувања во живо со кои се заканувал дека ќе нападне врз животот на основната јавна обвинителка на ОЈО Прилеп и членови на нејзиното најблиско семејство. Намерата му била да ја вознемири и да ја исплаши, а врз основа на пол, личен, семеен и општествен статус на оштетената како јавен обвинител“, велат од ОЈО Прилеп.

Осомничениот на социјалната мрежа објавувал приватни и семејни фотографии на обвинителката, директно праќал пораки со вознемирувачка содржина кај нејзината ќерка со што, смета обвинителството, предизвикал непријатност, навреденост и страв.

Станува збор за лице кое веќе е осудувано за загрозување на сигурноста, а против него последниот период се поднесени и повеќе кривични пријави.

Поради тоа обвинителството смета дека тој може да го повтори делото, но и да избега, па побарало, а прилепскиот суд прифатил и му одредил мерка притвор во траење од осум дена.

Рускиот претседател Владимир Путин објави дека повторно ќе се кандидира за функцијата на изборите закажани за 17 март 2024 година.

Државната новинска агенција ТАСС денеска (8 декември) го цитираше Путин кој откако присуствувал на церемонија во Кремљ кажал дека ќе се кандидира повторно.

На церемонијата по која произлезе објавата, на војниците кои се бореле во Украина им беше доделена највисоката воена почест на Русија – Златната ѕвезда на херојот на Русија.

Путин, кому Борис Елцин му ја предаде должноста претседател на последниот ден од 1999 година, веќе беше претседател подолго од кој било друг руски владетел од времето Јосиф Сталин, го надмина дури и 18-годишниот мандат на Леонид Брежњев.

Рускиот претседател Владимир Путин на 5 април потпиша закон кој му дозволува потенцијално да остане на власт до 2036 година.

Законот, кој неодамна беше усвоен од двата дома на парламентот, ги усогласува националните изборни закони со уставните измени кои беа изгласани од граѓаните минатата година.

Една од уставните измени му овозможува на Путин да биде реизбран кога ќе му истече сегашниот мандат во 2024 година, како и во 2030 година, доколку тој тоа го сака.

Путин е инаку обвинет од Меѓународниот кривичен суд и е лице од највисок профил што овој суд го барало во својата, повеќе од дводецениска, историја.

Обвинението против него се однесува на едно од најстрашните злосторства на руската окупација на Украина. Правните експерти сметаат дека налогот за апсење на Владимир Путин е многу повеќе од симболичен.

Во Собранието на Северна Македонија денеска (8 декември) беше доделена државната наградата „Св. Климент Охридиски“. За остварување во областа на воспитанието и образованието наградата ѝ беше доделена на универзитетската професорка Рабије Мурати, додека за остварување во областа на културата и уметноста наградата ја доби филмскиот режисер Антонио Митриќески.

Тие беа свечено доделени од Томислав Османли кој беше претседател на Одборот за државната наградата „Св. Климент Охридски.

„Силно верувам дека образованието, науката и уметноста може да инспирираат и да ги поттикнат луѓето да прават големи работи, заради тоа, се надевам дека еден ден во нашата земја ќе се отвори подлабока релација за вклучување на образованието, науката и уметноста“, рече Митриќески, заблагодарувајќи се за наградата.

Тој истакна дека е длабоко убеден дека оваа награда ги обврзува нив како добитници да дадат уште поголем придонес и да ги поттикнат идните генерации да останат во земјава.

Покрај со доделувањето на државата наградата во Собранието, денешниот празник „Св. Климент Охридски“ беше одбележан и од страна на државниот и политичкиот врв во државата.

„Со силна вера, дисциплина и посветеност, Св. Климент ги надминуваше пречките коишто му стоеја на патот, неуморно ширејќи ја својата пастирска љубов. Споделувајќи ги светогледот, духовноста, културата и хуманизмот на големиот учител и ние да даруваме љубов, да бидеме внимателни и грижливи, придонесувајќи за мирот, хармонијата, просперитетот и благосостојбата во македонското општество“, рече претседателот Стево Пендаровски во неговата честитка за празникот.

Премиерот Димитар Ковачевски рече дека Свети Климент Охридски е еден од најзначајните личности за македонската писменост и афирматор на просветителската дејност на сесловенските просветители Кирил и Методиј.

„Го продолжуваме безвременското просветителско, обединувачко и духовно дело на Свети Климент Охридски, со активната заштита, промоција и афирмација на македонскиот јазик, литература и култура во Европа и светот и со интеграциските определби“, порача Ковачевски.

И партиски делегации го одбележаа денот со положување свежи цвеќиња, а лидерот на најголемата опозициска партија Христијан Мицкоски во честитката порача дека „делото на Климент Охридски својот никулец го имало во македонската земја, и затоа Македонија мора да биде и да остане најголемиот чувар на тие свети вредности“.

Специјалното обвинителство на Република Косово соопшти дека досега поднело вкупно 33 обвиненија, против 89 лица, за воени злосторства на Косово.

„Ниту една националност, било да е српска, албанска, бошњачка, црногорска, не се истакнува на кој било начин. Правдата ќе ја направиме еднаква за сите. Имаме и случаи на кои им даваме приоритет, меѓу нив беа затворот Дубрава, Меја … Но, приоритет е и убиството на српски новинар, кое интензивно го истражуваме“, рече главниот обвинител Блерим Исуфај на прес-конференција на 8 декември во Приштина.

Исуфај како некои од проблемите во работата ги наведува малиот број обвинители и недостатокот на соработка на Србија во гонењето на случаите со воени злосторства.

Обвинителството на оваа конференција изнесе детали за масакрот во селото Меја кај Ѓаковица и оној во затворот Дубрава, кај градот Исток на Косово.

Според обвинителката Дрита Хајдари, случајот од Меја е наследен од Мисијата на Европската унија за владеење на правото на Косово – ЕУЛЕКС, која отвори истрага против 18 лица во 2013 година.

Таа посочи дека со преземањето на случајот на крајот на 2018 година, локалните обвинители ја продолжиле истрагата, проширувајќи ја на уште 35 лица, со што вкупниот број обвинети во овој случај се зголеми на 53.

Во врска со масакрот во Дубрава, за кој судењето почна на 7 декември во Приштина, обвинителот Илир Морина рече дека во овој предмет, додека истрагата продолжува, има 88 обвинети. А овој случај, како што рече, е наследен од Еулекс.

Морина наведе дека само еден обвинет е во притвор, додека за останатите истрагата продолжува.

„Три групи вклучени во масакрот во Меја“

Дрита Хајдари од Одделот за воени злосторства на Специјалното обвинителство на Косово изјави дека во првиот дел од случајот за масакрот во селото Меја биле вклучени пет лица кои, според обвинителството, го планирале масакрот.

Хајдари изјави дека има уште единаесет лица од втората група, кои според обвинителството во соработка со првата група го реализирале планот за масакрот. Таа рече дека третата група од 37 обвинети ја сочинуваат „директни извршители кои го извршиле масакрот или на друг начин придонеле“.

„Истрагата утврди дека во периодот од 27 до 29 април 1999 година била спроведена заедничка и добро организирана систематска операција на Југословенската армија и Министерството за внатрешни работи (МВР) на Србија, со соучесништво на паравоена група, во која имало 370 цивили, кои не учествувале во борбите за време на убиството.Жртвите биле од село во регионот на Река е Кеќе (меѓу Ѓаковица и Јуник – област во близина на границата со Албанија)“, изјави Хајдари.

Таа, меѓу другото, рече дека операцијата вклучувала иселување цивили и палење на нивните куќи.

Телата на убиените беа погребани во Брекоч во Ѓаковица, а подоцна беа ексхумирани и пренесени во масовните гробници во Батајница, Србија, за да се скријат злосторствата, рече Хајдари.

„Истрагата за масакрот во Дубрава продолжува“

Судското испитување на случајот со масакрот во Дубрава започна на 7 декември во Приштина.

Обвинителот Илир Морина рече дека во истрагата има 88 обвинети и дека „оваа истрага трае подолго време бидејќи е предмет наследен од мисијата на ЕУЛЕКС“. Само еден обвинет е во притвор.

Морина рече дека истрагата за останатите обвинети продолжува и оти, според него, со ова обвинение не завршува случајот со масакрот во Дубрава.

„Прибираме докази и кога ќе бидеме подготвени согласно законските услови дефинирани со Законот за кривична постапка, ќе постапиме и против останатите обвинети“, рече тој.

Од 19 до 24 мај 1999 година во затворот Дубрава беа убиени 160 албански затвореници, а повеќе од 300 беа ранети. Овој масакр траеше неколку дена.

Масакрот во затворот Дубрава политичките претставници во Косово го опишаа како едно од најмонструозните злосторства.

Се верува дека повеќе од 13. 00 цивили биле убиени во војната во Косово во периодот 1998-1999 година, додека илјадници други исчезнале. До денес, повеќе од 1 600 лица се водат како исчезнати – главно Албанци.