Достапни линкови

Вести

Седумина приведени за нападот со нож во Париз

илустрација

Седум лица се приведени поради сомневање за вмеаност во нападот со нож вчера во Париз. Две лица се сериозно повредени во нападот, кој се третира како терористички акт, изјави францускиот министер за внатрешни работи Ералд Дарманин. Нападот се случи во близина на поранешната канцеларија на сатиричното списание „Шарли Ебдо“ , а според полицијата тој е „очигледно чин на исламистички тероризам“.

Еден човек со пакистанско потекло, опишан како првоосомничен, беше уапсен во близина на местото на настанот.

Жртвите, маж и жена кои работеле во телевизиската продукција, биле сериозно повредени со нож од типот мачета, соопшти полицијата. Премиерот Жан Кастекс пред новинарите изјави дека нивниот живот не е во опасност.

Истрага за тероризам по нападот со нож во Париз

Нападот се случи додека е во тек судењето на 14 лица обвинети за соучество во нападот врз просториите на Шарли Ебдо во јануари 2015 година, кога беа убиени 12 лица. Списанието оттогаш се пресели на тајна локација.

Во интервју за Франс 2, Дарман го опиша нападот со нож како „нов крвав напад врз француската земја и новинари.

"Тоа е улицата на која се наоѓаше Шарли Ебдо. Ова е начинот на кој дејствуваат исламистичките терористи", изјави шефот на француската полиција.

види ги сите денешни вести

Франција го продолжува периодот за ревакцинација против Ковид19

Франција- луѓе чекаат да бидат вакцинирани против Ковид19

Франција ќе го зголеми периодот меѓу првата и втората доза на вакцините против Ковид19 на Фајзер и Модерна за да ја забрза вакцинацијата во земјата. Министерот за здравство Оливие Веран денеска за медиумите рече дека мРНА вакцините против Ковид19 сега ќе бидат давани во временски период од шест недели, наместо на четири, како што беше досега.

Тој вели дека тоа ќе им овозможи да вакцинираат повеќе луѓе побрзо без да се намали заштитата. По бавниот почеток на вакцинацијата, Франција е блиску до дадени десет милиони први дози, бројка што се очекува да се достигне во средината на месецов.

Некои здравствени експерти сметаат дека треба да се зголеми времето меѓу двете дози за да може да се вакцинира што е можно повеќе население во услови во кои на светско ниво има недостиг од вакцини.

Инцидент во иранската нуклеарна централа Натанз

Иранската нуклеарна централа Натанз

Проблем со електричната енергија се случил денеска во иранската нуклеарна централа Натанз, ден откако Техеран пушти во употреба нови центрифуги за побрзо збогатување ураниум. Ова е последен инцидент што се случува во едно од најобезбедените ирански места и се случува додека траат преговорите на Техеран со светските сили за нуклеарниот договор од 2015 година.

Иранската агенција за атомска енергија соопшти дека нема последици или загадување од инцидентот. Мината година во капацитетот се случи пожар што спред иранските власти било обид за саботажа на иранската нуклерна програма.

Натанз е клучно место во Иран за збогатување ураниум и е набљудувано од инспекторите на Меѓунарондата агенција за атомска енергија.

ВМРО-ДПМНЕ прашува дали Трајче Заев избегал во Дубаи

Скопје- акција на македонската полиција за заплена на 200 килограни канабис,10.04.2021

ВМРО-ДПМНЕ денеска во партиско соопштение го обвинува министерот за внатрешни работи Оливер Спасовски дека цел ден молчел за акцијата на македонската полиција заедно со американската агенција ДЕА во која се заплени марихуана во вредност од околу 800 илјади евра, а шест лица се приведени. Од опозициската партија тврдат дека еден од приведени е Александар Ушликовски, личен возач на Трајче Заев, братучед на премиерот Зоран Заев.

„Пратката со марихуана тргнала од Фирмата Медика 420 од Битола. Патем оваа фирма се поврзува директно со фамилијата Заеви. Братучедите на Зоран Заев, Трајче и Вице. Оттука логично се поставува прашањето дали и кога братучедите на Заеви ќе бидат испитани за овој нарко криминал кој го прекина американската ДЕА? Исто така треба да одговорат дали Трајче Заев, братучедот на Зоран Заев е во Македонија или избегал во Дубаи?“, наведуваат од ВМРО-ДПМНЕ.

Полицијата вчера соопшти дека во акцијата е запленета е 200 килограми марихуана, а дека до обвинителството поднеле кривични пријави против шест лица Д.Ј.(35) од Струмица, А.У.(45) од Скопје. М.З.(29) од Куманово, М.С.(36) од Битола, К.С.(46) од Прилеп, Г.К.(25) од Скопје.

Еден од приведените, велат од ВМРО-ДПМНЕ е командирот на прилепската полиција Кире Спиркоски кој наведуваат дека бил близок со министерот Спасовски.

Покрај претресите во нивните домови во кои се најдени пари, марихуана и оружје, од полицијата соопштија дека извршиле контрола и во две фабрики за производство на медицински канабис во Прилеп и во Битола.

Ердоган- случувањата во источна Украина се загрижувачки

Турскиот претседател Реџеп Таип Ердоган и украинскиот претседател Володимир Зеленски на средбата во Истанбул, 10.04.2021

Турскиот претседаетел Реџеп Таип Ердоган по средбата со украинскиот претседател Володимир Зеленски ги нарече случувањата во источниот украински регион Донбас загрижувачки.

Состанокот кој се одржа вчера во Истанбул и траеше повеќе од три часа е дел од претходно договорена посета, но се случи истовремено со тензиите меѓу Киев и Москва за долготрајниот конфликт во источна Украина.

Зборувајќи на заедничката прес конференција со Зеленски, Ердоган последните случувања го нарече загрижувачки и изрази надеж дека конфликтот ќе биде решен на мирен начин со дипломатски напори, врз основа на интегритетот на Украина и меѓународните закони. Турција и Украина имаат добри врски, а Анкара претходно ја осуди руската анексија на Крим во 2014 година.

Времето денеска- свежо утро, сончево попладне

Времето утрово ќе биде свежо, преку денот сончево со мала до умерена локална облачност и потопло. Ќе дува слаб до умерен ветер од јужен правец. Утринската температура ќе биде во интервал од -4 до 2, а максималната од 14 до 21 степен, информираат од Управата за хидрометеоролошки работи.

Во Скопје времето ќе биде сончево со мала до умерена облачност и со слаб до умерен југоисточен ветер. Утринската температура ќе се спушти до 0, а максималната ќе достигне 19 степени.

Според УХМР и во понеделник времето ќе се задржи стабилно со дополнителен пораст на дневната температура. Од вторник ќе има зголемување на облачноста со локални врнежи од дожд, на места поројни и проследени со грмежи. Од среда ќе дува и умерен до засилен северозападен ветер, што ќе услови повторно намалување на температурата.

Спасовски и Чулев давале исказ за софтверот на Рашковски

Актуелниот министер за внатрешни работи Оливер Спасовски и поранешниот технички министер за внатрешни работи Наќе Чулев на Седница на Советот за безбедност, 15.05.2020

Актуелниот министер за внатрешни работи Оливер Спасовски и поранешниот технички министер Наќе Чулев, кој ја извршуваше функцијата во првата половина на 2020 година, деновиве биле на распит како сведоци во Основното јавно обвинителство за гонење организиран криминал и корупција, јавува телевизија Телма. Двајцата биле повикани во различни денови, а исказот го дале пред обвинителката Вилма Русковска.

Поранешниот и актуелниот министер биле повикани за случајот поврзан со поранешниот генерален секретар на владата, а сегашен советник во владата Драги Рашковски кој набавил софтвер за сообраќајни прекршоци за Министерството за внатрешни работи за 81 000 евра, а не е во употреба осум месеци.

По наредба на Основното јавно обвинителството за гонење организиран криминал и корупција вчера се вршеше претрес во просторите на фирмата „Инвока гроуп“ од која е набавен софтверот, а се поврзува со Рашковски и во домот на сопственикот на фирмата.

Основното јавно обвинителство за гонење на организиран криминал и корупција на 18 март соопшти дека отвориле предмет по допрен глас во врска со набавката на софтверот за „определување на просечна брзина на возилата во сообраќајот и изрекување казни“.

Нови 1092 заразени со Ковид19, 32 починати

Пункт за тестирање за коронавирус во Скопје

Министерството за здравство согласно податоците од Институтот за јавно здравје информира дека во последните 24 часа се направени 5.569 тестирања, а регистрирани се 1.092 нови случаи на Ковид19.

Од нив најмногу во Скопје – 452, а потоа следуваат Битола – 85, Куманово – 80, Прилеп – 49, Кавадарци – 45, Велес – 41, Струмица – 36, Охрид – 33, Тетово – 30, Штип – 27, Кичево - 22, Гостивар и Кочани – по 21, Гевгелија – 18, Струга – 15, Ресен – 13, Радовиш – 11 и Делчево – 10. Неколку други градови имаат по едноцифрена бројка новозаразени.

Пријавени се вкупно 32 починати лица од кои најмногу од Скопје- десет, а по двајца починати има од Куманово, Прилеп, Тетово, Гостивар, Кавадарци, Гевгелија и Виница, а по еден починат од Битола, Берово, Велес, Крива Паланка, Неготино, Охрид, Свети Николе и Штип. Најмладиот починат е на возраст од 46 години, а најврозрасниот на 91 година. Сите се починати во болнички услови.

Регистрирани се 2003 оздравени пациенти. Со ова вкупната бројка на КОВИД-дијагностицирани лица во нашата земја од почетокот на епидемијата изнесува 141.157, бројката на оздравени пациенти е 115.433, на починати е 4.182, а бројот на активни случаи изнесува 21.542.

Иран пушти нови центрифуги за збогатување на ураниум

Иранскиот претседател Хасан Рохани

Иран денеска објави дека пушти во работа нови модернизирани центрифуги кои овозможуваат брзо збогатување ураниум иако нивната употреба е забранета со одредбите од нуклеарниот договор кој го постигна Техеран со светските сили во 2015 година.
Иранскиот претседател Хасан Рохани официјално ја отвори линијата за производство од 164 центрифуги поставена во комплексот Натанз во централниот дел на земјата.

Ова се случува во момент кога се водат преговори во Виена меѓу Иран и останатите држави потписнички на договорот од 2015 година за тоа како повторно во него да се вклучат и Соединетите Американски Држави. Поранешниот американски претседател Доналд Трамп во 2018 година одлучи да ја повлече својата земја од договорот кој го потпишаа Германија, Кина, Франција, Велика Британија и Русија.

Трамп еднострано ги повлече САД од догоорот и повторно воведе економски и финанисиски сакнции за Иран, на што Техеран одговори со тоа од 2019 година почна да ги крши обврските преземени со него.

Во Србија досега 755 несакани реакции од вакцинацијата

Белград- вакцинација на возрасни граѓани

Во Србија досега се пријавени 755 несакани реакции на вакцини против коронавирус, што значи дека има само една пријавена реакција на 3.973 имунизирани граѓани, изјави претставникот на Агенцијата за лекови и медицински помагала (АЛИМС), Павле Зелиќ, јави дописникот на МИА од Белград.

Зелиќ на РТС изјави дека сите реакции се благи, дека се однесуваат на појава на оток, црвенило, високи температури, болки во мускулите и поминуваат за неколку дена.

Во Србија е достапна имунизацијата со вакцините „Синофарм“, „Фајзер/БиоНТек“, „АстраЗенека“ и „Спутник Ве“, а Зелиќ изјави дека Модерна се уште не поднела барање за регистрација, дека се водат преговори и дека очекува и таа да се најде во понуда.
Тој изјави дека во Србија има сосема доволно вакцини, затоа што досега се пристигнати над 3,5 милиони дози.

Во Индија нов рекорд заразени со ковид19, недостигаат вакцини

Мумбаи- луѓе со заштитни маски чекаат на железиничка станица, 09.04.2021

Во Индија е забележан нов рекорд во бројот на новозаразени со Ковид19, а бројот на смртни случаи е највисок во последниве пет месеци. Според извештаите во земјата има недостиг на вакцини, а Мумбаи е во викенд локдаун.

Втората најбројна земја во светот има над милион нови случаи од крајот на март и повеќе од 500 починати на ден, иако се верува дека реалните бројки се многу повисоки.

Централната власт во обид да ја зачува економијата не презема драстични рестриктивни мерки, но тоа го прават локалните влади. Во меѓувреме земјата која има 1,3 милијарди луѓе се соочува и со недостиг на вакцини, а досега се обезбедени 94 милиони дози.

ВМРО-ДПМНЕ и СДСМ повторно во расправија за аферата со пасошите

Македонски пасоши

Генералниот секретар на ВМРО-ДПМНЕ Ѓорѓија Сајкоски денеска на прес конференција во партиското седиште рече дека аферата „Мафија“ покажува силна вмешаност на највисоките структури од државата во давање на логистика, поддршка и заштита на најсилните мафии и нарко картели во Европа и пошироко. Тој вели дека целата афера се свела на апсење на неколку државни службеници, а дека „пипците на мафијата одат погоре“.

Сајкоски покажувајќи фотографии тврди дека уапсените полициски службеници биле фотографиеани на приватни дружења со министерот Оливер Спасовски.

„Значи само кога ќе гребнете по површината сомневањата недвосмислено одат до врвот на власта каде се Зоран Заев и Оливер Спасовски“, рече Сајкоски.

Пратеникот од СДСМ Мартин Костовски, пак, на прес конференција рече дека „ниеден обид на ВМРО-ДПМНЕ за извртување на вистината не може да го сокрие фактот дека токму Мицкоски се обиде да саботира сложена полициска акција преку јавно објавување на информации“.

„Заради лични интереси Мицкоски се обиде да загрози полициска акција и соработка на нашата полиција со стратешките партнери. Мотивите и целите за ваквите постапки треба да ги даде независна и професионална истрага пред надлежните инситуции“, рече Костовски.

Инаку за случајот македонски пасоши за познати криминалци од регионот прво објави ВМРО-ДПМНЕ на брифинг со новинари, па потоа и партискиот лидер Мицкоски одржа прес конференција. Од Министерството за внатрешни работи тврдат дека опозициската партија се обидела да направи саботажа на акцијата која тие заедно со Интерпол и Регионалната канцеларија за безбедност и истраги при амбасадата на САД ја спроведувале од 2019 година.

Од кога се обелодени акцијата МВР приведе девет полициски службеници, а едно лице, кое не било полициски службеник туку надворешен посредник, е во бегство и за него е распишана меѓународна потерница.

Од амбасадата за Радио Слободна Европа вчера наведоа дека не коментираaт за активни истраги, но дека работат одблиску со Министерството за внатрешни работи, како и со други владини министерства и институции во Северна Македонија.

Мицотакис бара расчистување на убиството на новинарот, фон дер Лајен го нарече одвратен и кукавички чин

Атина- Грчката полиција врши увид на местото каде што беше убиен новинарот Јоргос Карајваз,09.04.2021

Ладнокрвното убиство на новинарот Јоргос Карајваз го шокираше целото општество. Се сретнав со министерот за цивилна заштита Михалис Хрисохоидис за да побарам брзо расчистување на случајот. Ме увери дека грчката полиција вложува максимални напори да ги пронајде виновниците, напиша грчкиот премиер Кирјакос Мицотакис на социјалните мрежи по средбата со надлежниот министер, јави дописничката на МИА од Атина.

Средбата на Мицотакис со Хрисохоидис е по вчерашното убиство на 52-годишниот грчки новинар, кој кусо по 14 часот беше застрелан пред неговиот дом од две лица, кои откако испукале најмалку десет куршуми, со мотор побегнале во непознат правец.

Првичните процени на полицијата, според грчките медиуми, се дека станува збор за добро смислено и веројатно нарачано убиство, додека пак балистичката анализа покажала дека оружјето било „чисто“, односно не е поврзан со друго криминално дело во минатото.

Карајваз беше познат и искусен новинар, кој долги години следеше црна хроника и покриваше теми поврзани со полицијата, за истите теми имаше информативен портал, а паралелно работеше во претпладневна емисија на телевизијата „Стар“.

За убиството на новинарот, преку Твитер, синоќа реагираше и претседателката на Европската Комисија Урсула фон дер Лајен, која рече дека е одвратен и кукавички чин, истакна дека новинарите мора да можат безбедно да работат и изрази надеж дека криминалците набргу ќе бидат изведени пред лицето на правдата.

Ѓурѓај- се очекува Македонците масовно да гласаат на изборите во Албанија

Никола Ѓурѓај, претседател на македонско друштво Илинден

„Во Албанија историски е докажано дека никогаш немамо ниту има бугарско малцинство. Со притисоци врз албанските власти Бугарија се обидува во Албанија да создаде бугарско малцинство и покрај тоа што се знае дека во Република Албанија живеат Македонци“. Ова за Радио Слободна Европа го изјави политичкиот аналитичар од Тирана Никола Ѓурѓај, кој воедно е и главниот уредник на македонскиот весник ,„Илинден“ кој излегува во албанскиот главен град Тирана.

Ѓурѓај нагласува дека „во сите пописи кои се реализирани во времето на кралот, никој не се изјаснил како Бугарин , туку дека имало Македонци . Има лица кои имаат земано бугарски пасоши од областите Гора, Мала Преспа и Голо Брдо, но тоа е поради економски причини, нагласува тој.

Во врска со местото и улогата на Македонците во Албанија на престојуните парламентарни избори во Албанија кои се закажани за 25 април, Ѓурѓај за РСЕ вели дека ,, Македонците се очекува масовно да излезат на гласање во округот Корча и повторно за пратеник да го изберат Васил Стерјовски, лидерот на партијата на Македонците - Македонска Алијанса за европска иднина.
Македонската партија е во колиција со Социјалистичката партија на премиерот Еди Рама која според Ѓурѓај повторно ќе ја предводи власта.

Првиот човек на македонскиот весник ,,Илинден,, исто така смета дека Стерјовски и досега во актуелниот состав на Собранието на Албанија достојно ги бранел интересите на Македонците во Албанија. Ѓурѓај додава дека со македонски пратеник во Собранието се докажува дека Македонците во Албанија постојат.
Покрај Стерјовски на парламантарните избори во Албанија има уште ден Македонец на листата на партијата – Движење за Социјалистичка интеграција на сопругата на претседателот на државата Илир Мета, Моника Криемади.

Протест на ВМРО-ДПМНЕ пред Министерството за здравство, побарана оставка од Филипче

Скопје- ВМРО-ДПМНЕ на протест пред зградата на Министерството за здравство побара оставка од министерот Венко Филипче поради лошо снаоѓање со Ковид пандемијата

ВМРО-ДПМНЕ денеска на протест пред Министерство за здравство побара оставка од министерот Венко Филипче обвинувајќи го за лошо снаоѓање и менаџирање со епидемијата со Ковид19 .

Пратеничката од ВМРО-ДПМНЕ Ели Панова рече дека во моментов земјава била полоша од Италија која минатата година беше силно погодена од ковид пандемијата.

„Вашата неспособност за менаџирање го загрозува здравјето на обичниот граѓанин, па денес во Македонија имаме рекордна смртност од 4.108 луѓе како последица на Ковид, според вчерашниот извештај на Економист, Македонија са наоѓа на трето место по смртност во светот. Општите болници низ Македонија се полни, истите немаат основни медицински средства, се сликате позерски на донирани вакцини и опрема бидејќи не сте способни да набавите, а преживуваат само оние граѓани кои имаат да платат“, рече Панова.

Владимир Нелоски, претседател на Градскиот комитет на ВМРО-ДПМНЕ ги повика насобраните повторно со балоните со вода да фрлаат кон зградата на министерство за, како што рече, да им го измијат срамот.

„Минатата сабота се обидовме да го измиеме срамот и стигнаа пораки зошто со толку малку балони вода сме го миеле срамот, па велам ако они прават симулација на вакцинирање ние можеме да пробаме симулација на миење на срамот“, рече Нелоски.

Инаку оваа е четврта сабота по ред како опозициската партија протестира пред зградата на Министерството за здравство.

Амбасада на САД - работевме со МВР и дадовме техничка поддршка за заплената на дрога

Амбасадата на Соединетите Американски Држави во Скопје

Американската амбасада во Скопје работеше заедно со Министерството за внатрешни работи и даде техничка поддршка за вчерашната акција во која полицијата пресретна камион со марихуана во вредност од 800.000 евра, што транзитирал низ Македонија. Ова за порталот СДК.МК го навеле од американската амбасада во Скопје.

„Во овој случај, како и во случајот со пасошите, работевме заедно со МВР и дадовме техничка поддршка“, велат од амбасадата на САД.

Според вчерашната куса информација која ја објави министерот за внатрешни работи Оливер Спасовски на својот профил на социјалната мрежа Фејсбук македонската полиција извршила голема акција заедно со американската Агенција за борба против наркотици (ДЕА), во акцијата била запленета дрога во вредност од над 800.000 евра и бил привиден висок полициски службеник.

Некои медиуми, пак, јавија дека уапсениот е командир на Полициската станица во Прилеп. МВР најави повеќе детали за акцијата за денеска.

Од ВМРО-ДПМНЕ велат дека „очигледно е дека целата акција ја водат служби кои се борат против наркотици од странство“.

„Но, она кое што стигна до нас како информации за кое што, уште еднаш повторно сакам да упатам прашања до власта и конкретно до премиерот Зоран Заев, а тоа е дека возачот на Трајче Заев, првиот братучед на Зоран Заев е еден од уапсените, кој што бил пратечко возило на пратката со дрога? Вториот уапсен е Кире Спиркоски викан „Чипси“ командир од полициската станица Прилеп кој што пак може да се види дека е преблизок со Оливер Спасовски и со локалните структури на СДСМ во Прилеп, како што е градоначалникот Јованоски“, рече портпаролот на ВМРО-ДПМНЕ Димче Арсовски.

Инаку и во претходната акција „Двојник“ која се реализираше неделава и во која е откриено дека вкупно 215 лица се стекнале со македонски пасош со туѓ идентитет, а приведени беа девет лица вработени во МВР, а едно е во бегство, македонската полиција соработуваше со Регионалната канцеларија за безбедност и истраги при амбасадата на САД.

Од амбасадата за Радио Слободна Европа вчера наведоа дека не коментираaт за активни истраги, но дека работат одблиску со Министерството за внатрешни работи, како и со други владини министерства и институции во Северна Македонија.

Над 1600 пациенти со ковид19 се лекуваат во болниците во земјава

Ковид-19 центар во Скопје

Во изминатите 24 часа во ковид центрите во болниците низ земјава е пријавено дека се лекуваат вкупно 1.000 пациенти позитивни и суспектни на коронавирусот.

Како што соопшти Министерството за здравство, вкупната бројка на пациенти позитивни и суспектни на коронавирусот кои се лекуваат на инфективните оддели во главниот град и во болниците низ земјава е 1.687 и има околу 340 празни болнички кревети во ковид центрите.

Во изминатите 24 часа во ковид-центрите во Скопје се хоспитализрани 73 нови пациенти поради компликации од коронавирусот. Од Министерството за здравство напоменуваат дека бројките се менуваат од час во час, според направените приеми и исписи на пациенти. Во тек на денот се прават и исписи на оздравени пациенти со што ќе се ослободат дополнителни легла.

Сите одделенија на клиничките болници располагаат со болнички места до кои има довод на кислород. Министерството има увид во состојбата со капацитети и доколку има потреба одделенијата ќе бидат дополнително проширени.

Пад на бројот на новозаразени во Албанија, вакцинирани над 250 илјади лица

Албанија- вакцинација против Ковид19 со кинеската вакцина Синовак,28.03.2021

Вакцинацијата против коронавирус во Албанија продолжува со несмалена динамика и до сега имунизирани се 250.676 лица, објави министерката за здравство Огерта Манастирлиу преку видеозапис на Фејсбук.

Меѓудругото таа споменува бројка колку вкупно постари лица се вакцинирани и ветува дека во текот на месец мај се очекува имунизација на вкупно 500 илјади лица со што „ќе се создаде можност за полесна туристичка сезона“.

Во меѓувреме во земјата овој месец бројот на новозразени бележи голем пад. Во просек дневно се регистрираат по околу 300 нови случаи, наспроти минатиот месец кога бројката беше над 1.200.

Претрес во стан на познат руски истражувачки новинар

Рускиот истражувачки новинар Роман Анин

Руските безбедносни служби вршеле претрес во домот на еден од најпознатите руски истражувачки новинари и го привеле на распит, поврзан со како што наведуваат од неговиот адвокатски тим и уредништвото текстовите за руските најмоќни луѓе. По претресот кој го извршиле агентите на Федералната безбедноста служба уредникот Роман Анин бил на распит поради „повреда на приватноста и злоупотреба на професионалните функции“, соопшти неговата адвокатка.

Според уредништвото можно е претресот да е поврзан и со претходниот случај против Анин во 2016 година поврзан со текс во весникот Новаја Газета за шефот на државниот нафтен гигант Роснефт Игор Сечин кој имал јахта вредна сто милиони американски долари. Тогаш весникот беше осуден за клевета откако Сечин поведе постапка.

Претресот кај Анин доаѓа и неколки недели откако тој објави истражувачка приказна во која се наведува дека новиот прв човек на Федералната безбедносна служба Сергеј Королев има врски со лидерите на неколку руски групи за организиран криминал.

МВР- 36 луѓе го прекршиле полицискиот час, 434 не носеле маска

Полициски час во Скопје

Министерството за внатрешни работи (МВР) соопшти дека од 20:00 часот синоќа до 05:00 часот утрово 36 лица не ја почитувале забраната за движење, додека во изминатото деноноќие, 09/10.04.2021, на територијата на државата за неносење заштита на лице се регистрирани 434 прекршоци. МВР апелира до граѓаните да ги почитуваат мерките и протоколите донесени од Владата за спречување на ширењето на Ковид19.

Новото бугарско собрание на прва седница на 15 април

Бугарскиот претседател Румен Радев треба да го свика Собранието

Претседателот на Бугарија, Румен Радев ќе го свика новоизбраниот бугарски парламент на 15 април, пишува весникот „Труд“. Како што јави дописникот на МИА од Софија пред неколку дена, бугарскиот претседател јасно стави до знаење дека нема намера да ја одложува постапката за свикување на новоизбраниот парламент.

Според бугарскиот Устав, претседателот мора да го свика новоизбраното Национално собрание до 4 мај. Сепак, поради велигденските празници, Радев сакаше новиот парламент да започне со работа што е можно поскоро. На првото заседание, новите пратеници полагаат заклетва и официјално ја преземаат функцијата.

На истиот состанок, владата на Бојко Борисов мора да поднесе оставка, но таа ќе продолжи да ги извршува своите овластувања се додека не биде избрана новата влада од новиот парламент или привремена влада биде назначена од претседателот Радев.

Вакцинирани над 18 000 граѓани, идната недела завршува вакцинацијата на „критичната инфраструктура“

Вакцинација против ковид-19 во Спортски центар „Борис Трајковски“ во Скопје - 5 април 2021

Идната недела се очекува да заврши вакцинацијата на останатите приоритетни групи од т.н. критична инфраструктура – луѓе кои имаат многу контакти во работата. Во најголемиот пункт, салата „Борис Трајковски“, од понеделникот со вакцини „Спутник“ се имунизираат припадници на војската и полицијата, здравствени работници, наставници од прво до трето одделение и воспитувачи во градинките.

Следната недела ќе бидат вакцинирани вработени во обвинителството, судовите, инспекциските служби, новинарите и медиумските работници, најави вчера министерот Венко Филипче, соопштувајќи дека досега се вакцинирани 18 261 граѓанин.

Паралелно тече и вакцинацијата на лица над 77 години со вакцината „Астра Зенека“ во пунктовите во здравствените домови низ земјава. Како ќе стигнуваат нови дози, ќе се спушта и старосната граница за да бидат имунизирани што поголем број граѓани и да се достигне опфат од 60 до 70 отсто за колективен имунитет.

Во гостување во „Само интервју“ на ТВ Канал 5, Филипче рече дека според најавите, овој месец се очекуваат околу 300 000 дози: 200 000 на „Синофарм“ од Кина, околу 11 000 од директниот договор со „Фајзер“, 25 илјади вакцини преку трипартитните договори со земјите членки на ЕУ, нова количина од руските „Спутник“ и останатите дози на „Астра Зенека“ преку Ковакс-системот.

Времето денеска- сончево со температура до 19 степени

Времето утрово е студено, од -6 до 2 степена, а преку ден се очекува да биде сончево со мала до умерена облачност, слаб претежно јужен ветер и температура од 12 до 19 степени.

Во Скопје ќе биде сончево со мала до умерена облачност и слаб променлив ветер. Утринската температура ќе се спушти до -3, а максималната ќе достигне до 17 степени.

Според УХМР, во следниве денови времето ќе биде стабилно со пораст на дневните температури. Утринските температури уште денеска на повеќе места ќе бидат негативни и под просекот за овој период од годината, а потоа и тие ќе се покачуваат. Од вторник ќе има повеќе облачност, понестабилно време со појава на повремен врнежи од дожд.

Меѓународна потерница за осомничен во аферата фалсификувани пасоши

Илустрација - Пасоши.

Меѓународна потерница е распишана за Раиф Мифтари за сомнение за сторено кривично дело злоупотреба на службена положба и овластувања според членот 353 од Кривичниот законик, според објавеното на интернет страницата на Министерството за внатрешни работи.

Меѓународната потерница за Мифтари е распишана како осомничен во случајот „Двојник“, според медиумските извештаи. Како што претходно соопшти МВР, во акцијата „Двојник“ досега се приведени девет лица вработени во МВР, а дека едно лице е во бегство и дека тоа не било полициски службеник, туку надворешен посредник.

Шестмина осомничени се во истражниот затвор во Шуто Оризари со мерка 30 дневен притвор, а истата мерка е одредена и за лицето што е во бегство, соопшти МВР. Останатите тројца треба редовно да се јавуваат во судот, а како мерка на претпазливост им биле одземени патните исправи.

Инаку според МВР, во случајот досега е откриено дека вкупно 215 лица, од кои еден македонски државјанин, а другите странски, се стекнале со македонска патна исправа со туѓ идентитет.

За оваа акција власта и опозицијата употребуваат два различни термини. МВР ја нарекува акција „Двојник“ и вели дека таа е водена сериозно и со години, а за ВМРО-ДПМНЕ е афера „Мафија“ во која главни се токму министерот Спасовски и премиерот Зоран Заев.

Од опозицијата како што велат познати криминалци од регионот добиле македонски пасоши во 2019 година за време на министерувањето на Спасовски.

Филипче - Верските лидери да упатат апел до верниците да седат дома за празниците

Архива - Прес-конференција: министерот за здравство Венко Филипче и претседателот на Комисијата за заразни болести Жарко Караџовски.

Доколку се случи нов кластер во верски објекти, притисокот врз здравствените установи ќе биде толку голем што ќе се доводе во прашање дали ќе може да се изменаџира, изјави министерот за здравство Венко Филипче.

Тој апелираше до верските лидери дека ситуацијата е сериозна и дека епидемиолошката слика може дополнително да ја искомплицира состојбата во болниците.

„Би сакал да ги повикам следната недела двајцата лидери, и на МПЦ и на ИВЗ и да ги замолам да упатат апел кон верниците да останат дома оваа година, да не се групираат во цркви и џамии, да нема служби, изјави Филипче за Канал 5 телевизија.

Во изминатиов период земјата беше зафатена од силен бран на коронавирусот, со голем број на заболени и смртни случаи на дневно ниво.

Според денешните информации на Министерството за здравство, на инфективните оддели во Скопје и во болниците во другите градови се лекуваат 1.699 пациенти со Ковид-19, а има околу 300 празни болнички кревети во ковид – центрите. Исто така во моментов во Македонија има над 22 илјади активни случаи на коронавирусот.

Филипче додаде дека во зависност од ситуацијата со бројките и проценката на ризикот што може да се случи, во следните две недели ќе донесат одлука како да ги димензионираат мерките за време на празниците.

Во однос на барањето за негова оставка од страна на опозицијата која смета дека министерот за здравство лошо ја менаџира ковид-кризата, Филипче вели дека барањата се темелат на „нешто што е неиздржано.“

СЗО: Шокантна нерамнотежа во дистрибуцијата на вакцини

Директорот на Светската здравствена организација Тедрос Аданом Гебреизус.

Директорот на Светската здравствена организација Тедрос Аданом Гебрејезус денеска изјави дека од вкупно 700 милиони дози на вакцини против Ковид-19 што се употребени ширум светот, повеќе од 87 проценти се дадени во побогатите земји.

Тој рече дека во просек секое четврто лице во богатите земји примало барем една доза од вакцината против Ковид-19, во споредба со само едно од 500 лица во земјите со ниски примања.

„Сè уште постои шокантна нерамнотежа во глобалната дистрибуција на вакцини“, изјави Тедрос на прес-конференција.

Тој посочи дека програмата Ковакс за фер дистрибуција на вакцините поддржана од ООН, е „моќен механизам што може да доставува вакцини побрзо и поефикасно од кој било друг механизам.“

Тој изјави дека досега преку Ковакс се испорачани околу 38 милиони дози вакцини ширум светот, што е доволно за да се опфатат само околу 0,25 проценти од светската популација.

Тедрос ги критикуваше земјите кои планираат на други земји да им донираат вакцини директно, наместо преку Ковакс системот.

Тој оцени дека билатералните аранжмани ризикуваат понатамошно зголемување на нееднаквоста во дистрибуцијата на вакцините, без да објасни зошто се проблематични донациите што го заобиколуваат Ковакс.

„Овие билатерални аранжмани ризикуваат да ги разгорат нееднаквостите во дистрибуцијата на вакцините“, рече Тедрос.

Вчитај повеќе

XS
SM
MD
LG