Достапни линкови

Вести

Нови 98 случаи на коронавирус, двајца починати

Илустрација: Тестирање за антитела на коронавирус во Скопје

Во изминатото деноноќие се регистрирани 98 нови случаи на коронавирус во Македонија, а двајца луѓе починаа. Направени биле 1253 тестирања, информира Министерството за здравство. Најмногу нови случаи се регистрирани во Скопје – 17, а потоа следуваат Куманово 13, Прилеп 11, Тетово 10, Гевгелија и Гостивар по 7...

Денеска Институтот за јавно здравје регистрира 56 оздравени пациенти.

Досега во Македонија се направени вкупно 165.892 тестирања на ковид -19. Вкупната бројка на ковид дијагностицирани во земјава од почетокот на епидемијата изнесува 15791, бројката на оздравени пациенти е 13184, на починати е 648, а во моментов бројот на активни случаи во земјата изнесува 1959.

види ги сите денешни вести

Индија и Пакистан договорија примирје во Кашмир

Илустрација - Колона возила на индиската армија во „индискиот дел“ од Кашмир

Индиската и пакистанската армија, во заедничко соопштение, наведуваат дека постигнале договор за почитување на примирјето по спорната граница во Кашмир, пренесува Ројтерс. Индија и Пакистан потпишаа договор за прекин на огнот долж Контролната линија на Кашмир во 2003 година, но примирјето беше нарушено во последните неколку години и бројот на жртви меѓу локалното население во близина на границата се зголемува.

„Двете страни се согласуваат строго да ги почитуваат сите договори, разбирање и прекин на огнот долж Контролната линија и другите сектори, кои ќе стапат на сила на полноќ меѓу 24 и 25 февруари“, се вели во соопштението.

Почитување на примирјето беше договорено меѓу генералите на двете армии задолжени за воени операции. Извор од пакистанската армија изјави дека има значително кршење на договорот за прекин на огнот од 2014 година, што доведе до речиси 300 цивилни жртви. Од почетокот на годинава, Индија регистрира 591 повреда на прекин на огнот од Пакистан.

Кашмир одамна е камен на сопнување меѓу двете земји. Тензиите беа обновени откако Њу Делхи ја укина автономијата на Џаму и Кашмир во август 2019 година и ги подели на две територии.

Ковид-19 во Македонија: Зголемен бројот и на починати и на заразени

Илустрација

Институтот за јавно здравје (ИЈЗ) денеска информираше дека во периодот од 15 до 21 февруари 2021, тестирани се вкупно 15.849 материјали во лабораториите во кои се спроведува молекуларно тестирање и антигенско тестирање за присуство на САРС-ЦоВ-2, што помалку за 2,8% во однос на минатата недела. Регистрирани се 2.320 нови позитивни случаи од 33 градови во државата со зголемување од 3,9 отсто во однос на минатата недела.

„Најголем дел од регистрираните случаи се од Скопје, а највисока неделна инциденца е регистрирана во Неготино и Кавадарци. Процентот на позитивност се движи од 11,8 до 16,3%, просечно 14,7%, на исто ниво како минатата недела“, соопшти ИЈЗ.

Регистрирани се заболени лица во сите возрасни групи, а најзастапена е возрасната група на лица на возраст над 60 години. Голем број на заболени се регистрирани и кај возрасните групи од 30-39, 40-49, 50-59 и 20-29 години. Најмал број е регистриран кај децата од 0-9.

„По добиени 2 негативни теста за присуство на САРС-ЦоВ-2 или со употреба на новиот алгоритам, со статус „оздравени“ се стекнале 1.760 лица кои биле хоспитализирани или на домашно лекување, 30,1% помалку во споредба со минатата недела. Пријавени се 70 смртни случаи од 13 градови, со зголемување од 62,8% во однос на минатата недела. Во однос на возраста, 65 лица биле над 60 години, и 5 лица на возраст од 50-59 години“, инфомираше ИЈЗ.

Судот беше ажурен со одлуката за притвор на Мијалков, тврди Џолев

Иван Џолев

Претседателот на Основниот кривичен суд Скопје, Иван Џолев, денеска изјави дека предлогот за притвор на Сашо Мијалков, обвинет за масовно незаконско прислушување во предметот Таргет-Тврдина, стигнал во Судот во неделата во 15 часот, а одлуката била изготвена во 18.30 часот. Според него, како што рече, тоа е ажурно дејствување.

„Тоа се сè на сѐ три и пол часа, така што Судот постапи апсолутно ажурно. Сите познавачи на судството во Македонија ќе ви кажат дека Судот одлучувал во најбрз можен временски период. Согласно законските одредби рокот е 24 часа, што значи судот можел да одлучува до понеделник до 15 часот, но сметавме дека е итно да се постапи и така е постапено“, рече Џолев одговарајќи на новинарско прашање во врска со случувањата поврзани со поранешниот директор на Управата за безбедност и контраразузнавање, Сашо Мијалков.

Поранешниот прв разузнавач се бараше со меѓународна потерница откако надлежните не можеа да го најдат за да му го достават решението за притвор. Покрената беше потрага, по која, по 48 часа, Мијалков сам се пријави во Обвинителството. Следуваа изјави од обвинителката Вилма Русковска и министерот за внатрешни работи кои, барајќи дали е направен пропуст, хронолошки ги редеа сите настани и преземени активности во врска со Мијалков. Премиерот Зоран Заев изјави дека е добро што на крајот Мијалков е „обезбеден“, а опозицискиот лидер Христијан Мицкоски рече дека „сето ова е циркус“.

Џафери: Локални избори на 3-ти, 10-ти или 17-ти октомври

Талат Џафери

Локалните избори во Македонија треба да се одржат на 3-ти, 10-ти или 17-ти октомври, соопшти денеска претседателот на Собранието, Талат Џафери, на средба со новинарите. Според процедурата, 20 дена претходно тој треба да ги распише изборите, а тоа е во јули, а најдоцна на 1 август, во зависност од датумот што ќе го договорат политичките партии.

Џафери предупредува дека доколку дојде до тоа паралелно да се одржуваат предвремени парламентарни избори, треба да се има предвид како тоа ќе се одрази на роковите за техничката влада, за кампањата и за увидот во избирачкиот список и како ќе се одрази врз работата на ДИК и соодветните институции.

Во врска со барањето на опозицијата за предвремени парламентарни избори заедно со локалните, Џафери рече дека „еден пратеник може да го поднесе предлогот и ако има соодветно мнозинство нека го изгласа“.

Опозициската ВМРО-ДПМНЕ пред една недела побара предвремени парламентарни изборипоради, како што рече нејзиниот лидер, Христијан Мицкоски, на македонија ѝ треба некоја „да ја спаси“. Премиерот Зоран Заев веднаш децидно одговори дека предвремени збори „нема да има“.

Захариева: ЕУ не е Југославија, а не можат ни САД да не притиснат

Министерката Екатерина Захариева

По вчерашната средба на министрите за надворешни работи на Македонија и Бугарија, Бујар Османи и Екатерина Захариева, на која, како што соопшти македонското Министерство за надворешни работи, се разговарало за Акцискиот план, за европската перспектива на Македонија и за ковид-19, денеска се огласи шефицата на бугарската дипломатија.

Захариева, во изјава за бугарската национална телевизија БНТ, потврди дека разговарале за претстојното свикување на меѓувладината конференција, но истакна дека датумот треба да биде објавен од двете страни , како и дека Софија нема да го смени ставот дека Македонија треба прво да ги исполни условите па да бара место во Европската унија (ЕУ).

„ЕУ не работи како Југославија, таа работи поинаку и ние ѝ зборуваме за тоа на Република Северна Македонија од 2019 година“, рече Захариева во изјавата за БНТ, потсетувајќи на почитување на Договорот за добрососедтсво и неопходноста од напредок во дијалогот.

Захариева додаде и дека „никој, вклучувајќи ги и САД, не може во иднина да ја притисне Бугарија да попушти и да дозволи пристапни преговори на Македонија со ЕУ, доколку не се исполнети условите“.

Филипче: Можни се нови рестрикции, но засега нема да има

Венко Филипче

По растот на бројот на ковид случаи во последните денови, министерот за здравство, Венко Филипче, денеска изјави дека „дефинитивно е можно воведување рестрикции, но засега не. Вчера 21 отсто од тестираните биле позитивни, односно 725 луѓе, а се полнат и болничките капацитети, поради што вчера имаше 410 слободни места во Ковид-центрите.

„Навистина има зголемување кај бројката на новозаболени. Во МАНУ траат испитувањата, но вчера разговарав со лабораторијата во ‘Жан Митрев’, и таму кај 70 отсто од примероците е детектиран британскиот сој на вирусот, за кој се покажа дека побрзо се шири. Што се однесува до болничките капацитети, има места и во секој момент е спремен персоналот и за ротации. Ја следиме ситуацијата да не дојде до степен да го загрози здравствениот систем“, рече министерот денеска на промовирањето на донација за Здравствен дом Скопје.

Филипче информираше и дека на синоќешната владина седница е усвоен нацрт-договорот за набавка на 100.00 дози од руската вакцина „спутник“, a деновиве ќе се очекува да стигне одговор кога би стигнале кинеските вакцини и вакцините на „Фајзер“. На новинарско прашање на што се должи слабата заинтересираност кај повозрасната популација за вакцинација, Филипче кажа дека се регистрирани 180 илјади лица над 70 години и хронични болести, и дека од нив, 50 илјади се пријавиле преку Мој термин или преку матичните лекари, како и дека се планираат други механизми за промоција на ефектите од имунизацијата.

Ерменскиот премиер предупреди на обид за воен удар

Луѓе држат постери на ерменскиот премиер Никол Пашинијан за време на митингот против контроверзниот мировен договор со Азербејџан во Ереван, 5 декември 2020 година

Ерменскиот премиер Никол Пашинин денеска предупреди на обид за воен удар против него, откако армијата преку соопштение побара оставка од него и неговата влада. Пашинијан се соочи со протести и повици за оставка по, како што велат неговите критичари, погубното справување со шестнеделниот конфликт меѓу Азербејџан и етничките ерменски сили во регионот на Нагорно Карабах во минатата година. Пашијан ги отфрли повиците да се повлече. Тој денеска ги повика своите следбеници да се соберат во центарот на Ереван за да го поддржат и се огласи на Фејсбук за да ѝ се обрати на нацијата во живо. Тој исто така го разреши шефот на Генералштабот на вооружените сили.

Страв и омраза наспроти трговија на ерменско - азејберџанската граница

Не е јасно дали армијата е подготвена да употреби сила за да ја поддржи својата изјава. Етничките ерменски трупи се повлекоа од територијата во и околу енклавата Нагорно-Карабах пред силите на Азербејџан во конфликтот лани, кој однесе илјадници животи.

Израелскиот парламент одобри давање податоци за невакцинирани граѓани

Израелскиот парламент, Кнесетот

Израелскиот парламент, Кнесетот, усвои контроверзен закон што му овозможува на Министерството за здравство да им обезбеди на локалните власти информации за жители кои сè уште не биле вакцинирани против коронавирус. Врз основа на тој закон во период од три месеци, Министерството за здравство ќе може да им обезбеди на локалните власти и Министерството за образование лични информации, како и информации за тоа како може да се контактираат граѓаните за да се промовира имунизацијата.

Ефикасноста на вакцината на Фајзер во Израел е 95 проценти

Ова ќе вклучува податоци за оние кои ја примиле првата доза на вакцина, но не одговориле на повикот да ја примат втората три недели подоцна, како и за оние кои воопшто не биле вакцинирани. Законот наведува дека информациите можат да се користат само за поттикнување на вакцинацијата, а употребата за сите други намени е забранета. Противник на законот од левичарската партија Мерец, Тамар Зандберг изјави дека податоците сепак може да паднат во погрешни раце.

Бајден ја избриша забраната за влез на имигранти издадена од Трамп

Претседателот на САД Џо Бајден

Претседателот на САД Џо Бајден, го поништи прогласот издаден од поранешниот претседател Доналд Трамп, со кој се блокира влегувањето на многу апликанти за зелени картони во САД. Трамп ја издаде забраната во минатата година, велејќи дека е неопходно да се заштитат американските работници во услови на голема невработеност поради пандемијата на коронавирусот. Забраната првично требаше да трае до крајот на 2020 година, но Трамп ја продолжи до крајот на март во последните недели од неговиот мандат.

Ковид-19 и миграцијата во светот

Повеќето имигрантски визи беа блокирани со наредбата. Имигрантите не можеа да донесат членови на семејството освен ако тие самите не се државјани на САД кои аплицирале за визи за своите сопружници или деца на возраст под 21 година. Имигрантите со визи засновани врз вработувања исто така беа забранети освен ако тие немаа вештини во здравствената заштита и други слични професии, а илјадници добитници на лотарија за визи кои беа случајно избрани да добијат зелен картон беа блокирани. Во новиот проглас Бајден ги укина наредбите, велејќи дека затворањето на вратата на легалните имигранти „не ги унапредува интересите на Соединетите држави“.

Продолжување на блокадата во Атина

Пошироката област во Атина, каде што живее половина од грчкото население, е под строги ограничувања.

Грција нема да може да ги укине ограничувањата на движењето во пошироката област во Атина следниот понеделник, како што беше планирано по наглото зголемување на инфекциите со коронавирус, изјави премиерот Кирјакос Мицотакис. Пошироката област во Атина, каде што живее половина од грчкото население, е под строги ограничувања, што беше предвидено да истечат на крајот на месецот. „Вчера имаше огромен пораст на инфекциите, особено во Атина, што го расипува нашиот план за постепено повторно отворање на 1 март“, рече Мицотакис на состанокот на владата.

Грција останува затворена, ќе мора да глумиме патриотизам

Иако има повеќе од 6.000 смртни случаи, Грција се покажа подобро од поголемиот дел од Европа во спречувањето на пандемијата и заштитата на својата здравствена услуга, сериозно оштетена од повеќегодишната финансиска криза. Сепак, државните болници се пренатрупани во последните денови со единици за интензивна нега кои работат со над 80% капацитет. Министерот за здравство Василис Кикилиас изјави дека пошироката област во Атина има најголем товар, со зафатени 90% од единиците за интензивна нега.

Вакцината со единечна доза на „Џонсон и Џонсон“ пред одобрување во САД

вакцината на „Џонсон и Џонсон“ е 85 проценти ефективна во спречување на тежок вид на ковид-19

Научниците од американската Администрација за храна и лекови ФДА потврдија дека вакцината на „Џонсон и Џонсон“ е 85 проценти ефективна во спречување на тежок вид на ковид-19. За ова неделава ќе расправаат независни советници, а потоа се очекува ФДА да донесе конечна одлука за доделување на долгоочекуваното овластување за употреба во итни случаи. Во таков случај таа би била трета вакцина во дистрибуција во САД. Вакцината на „Џонсон и Џонсон“ нуди погодност, бидејќи е потребна само една доза.

Почна поделбата на ковид вакцините преку Ковакс, прва доби Гана

За вакцините направени од Фајзер и БионТек, како и од Модерна кои во моментов се дистрибуираат во САД, се неопходни две дози. Овие вакцини исто така мора да се чуваат замрзнати, додека онаа на „Џонсон и Џонсон“ може да се чува во обичен ладилник. Вакцината на АстраЗенека која е широко користена во Европа - исто така, бара обично ладење, но е со две дози. „Џонсон и Џонсон“ ја тестираше својата вакцина кај 44.000 возрасни лица во САД, Латинска Америка и Јужна Африка. ФДА соопшти дека нема сериозни несакани ефекти поврзани со вакцината.

Почнува дводневен видео самит на ЕУ

Видео самит на Европската унија, архивска фотографија

Денеска и утре членовите на Европскиот совет ќе се состанат преку видео конференција за да разговараат за моменталната состојба на пандемијата со ковид-19, безбедноста и односите со Јужното соседство на Унијата. Лидерите на ЕУ ќе го координираат одговорот на пандемијата, фокусирајќи се особено врз одобрување, производство и дистрибуција на вакцини и движење на лица. Лидерите ќе имаат прва размена на ставови за научените лекции досега од пандемијата, со цел да се зајакне отпорноста на ЕУ кон здравствените закани. Има некои најави дека лидерите денеска ќе се договорат да работат на сертификати за вакцинација за граѓаните на ЕУ кои добиле анти-ковид вакцини.

Мицотакис повторно го покрена предлогот за сертификат за вакцинација

Тоа го бараат земјите од југот на ЕУ кои во голема мера зависат од туризам.
Заклучувањата за забавување на пандемијата предизвикаа досега најдлабока економска рецесија токму во овие земји. Лидерите исто така ќе разговараат за начините за зајакнување на меѓународната солидарност и идната меѓународна здравствена соработка. Претседателот на Европскиот совет Шарл Мишел изјави дека темата на вториот ден од самитот ќе бидат безбедноста и одбраната.

„Нови идеи за НАТО 2030“ - младински собир

Генералниот секретар на НАТО, Јенс Столтенберг, ќе се приклучи на видео конференција во размена на мислења за соработката меѓу ЕУ и НАТО. Тие ќе разговараат за зголемување на отпорноста на ЕУ, особено против сајбер напади и хибридни закани. На состанокот ќе стане збор за односите на ЕУ со Јужното соседство. Во декември 2020 година, Европскиот совет донесе заклучоци за ова партнерство. Водачите нагласија дека демократско, постабилно, поеколошко и попросперитетно Јужно соседство е стратешки приоритет за ЕУ.

Владата донесе одлука за финансиска поддршка на радиодифузерите

Седница на македонската влада, архивска фотографија

Владата донесе Одлука за одобрување на средства од Буџетот за 2021 година во износ од 50 милиони денари на Агенцијата за аудио и аудиовизуелни медиумски услуги (АВМУ), како поддршка за справување со кризата предизвикана од ковид-19. Како што соопшти владината Прес-служба, ваквата одлука е донесена заради реализација на мерката три од петтиот пакет економски мерки, со што ќе се обезбедат средства за финансиска поддршка на радиодифузерите за надомест на средства платени по основ на такси, давачки и надоместоци за вршење радиодифузна дејност и кои се документирани во финансиската евиденција на АВМУ.

Новиот владин пакет е тука, но компаниите имаат проблеми при отплата на кредитите

Од Владата информираат дека при евентуално утврдени неправилности и ненаменско користење на средствата потребно е Агенцијата за аудио и аудиовизуелни медиумски услуги средствата да ги врати во Буџетот.

Времето денеска: сончево и топло

Ќе биде сончево и топло со мала локална облачност. Ќе дува слаб северен ветер. Дневната температура ќе биде од 14 до 20 степени. Во Скопје и околината слично време. Дневната температура ќе биде 19 степени.

Османи и Захариева разговарале за Акцискиот план и за ковид

Османи и Захариева во Софија.

Министерот за надворешни работи, Бујар Османи, денеска, на враќање од посетата на Париз се сретна со министерката за надворешни работи на Бугарија, Екатерина Захариева, во Софија.

На средбата беа разгледани актуелностите поврзани со кризата од ковид и начините на кои двете земји остваруваат соработка во справувањето со овие предизвици. Во оваа прилика Захариева потврди дека се прават напори за изнаоѓање начин за испорака на ветените вакцини за земјава, соопшти македонското МНР.

Министрите разговарале и за Акцискиот план за меѓусебна соработка, можноста за неговата финализација, а во функција на евентуално договарање на втората меѓувладина конференција меѓу двете влади, чии копретседавачи се токму министрите Османи и Захариева, стои во соопштението.

Министерот Османи за средбата информираше и на својот Фејсбук-профил.

Акциски план, според премиерот Зоран Заев, е добар и за двете страни и треба да оди во полза на разговорите и добрососедските односи. Сепак, неговата целосна содржина до сега не е јавно објавена.

Како што јави дописникот на МИА од Софија, бугарското Министерство за надворешни работи соопшти дека Захариева денеска на негово барање го примила министерот Османи, „кој патуваше транзитно низ Бугарија“.

Според бугарското МНР, Захариева на средбата ја потврдила принципиелната поддршка на Софија за европската интеграција на Северна Македонија, со исполнување на соодветни услови.

„Бугарската страна посочи дека според Договорот од 2017 година, на идниот состанок на Заедничката меѓувладина комисија треба да се направи целосен преглед на спроведувањето на Договорот“, се додава во соопштението.

Црногорскиот претседател отповика неколку амбасадори

Црногорскиот претседател Мило Ѓукановиќ

Црногорскиот претседател Мило Ѓукановиќ издаде декрет за отповикување на неколку амбасадори на резидентна и нерезидентна основа, вклучувајќи го и амбасадорот во Белград Тарзан Милошевиќ.

Иницијативата за повлекување ја покрена Владата.

Како што соопшти неговиот Кабинет, Ѓукановиќ ги отповикал амбасадорите на резидентна основа во Босна и Херцеговина, Србија, Италија, Кина, Германија, Полска, Светата Столица, Суверениот Малтешки Ред и Обединетите Арапски Емирати.

Тој исто така ги отповика амбасадорите на нерезидентна основа во Бахреин, Естонија, Индонезија, Кувајт, Летонија, Литванија, Малта, Република Кореја, Сан Марино и Саудиска Арабија.

Ѓукановиќ ги повика граѓаните врз оваа иницијатива на Владата за повлекување на амбасадорите да проценат дали новото мнозинство се фокусира на создавање професионална дипломатска служба или демонстрира моќ по изборите.

„Според мене, станува збор за реваншизам со кој новата Влада го покажува своето вистинско политичко лице, и на крајот одговорноста кон државата, изјави црногорскиот претседател.

РСЕ реагира на рускиот закон за казнување „странски агенти“

Претседателот на РСЕ, Џејми Флај,

Раководството на Радио Слободна Европа(РСЕ) реагира откако денеска рускиот претседател Владимир Путин ги потпиша законите со кои се изрекуваат казни за кршење на контроверзниот закон за „странски агенти“.

Измените на Законот за „странски агенти“ е насочени кон медиуми финансирани од странство, вклучително и Рускиот сервис на РСЕ, уште шест други сервиси на РСЕ на руски јазик, како и Current time, телевизиска мрежа на руски јазик, управувана од РСЕ / РЛ во соработка со Гласот на Америка.

„РСЕ нема да биде спречено независно да известува за нашата руска публика“, рече претседателот на РСЕ, Џејми Флај, во денешната изјава.

Според законските измени потпишани од Путин на 24 февруари, објавувањето информации за таканаречените „странски агенти“ и нивните материјали без назначување на нивниот статус може да резултира со казни до 2.500 рубљи (34 УСД) за физички лица и до 500.000 рубљи (6.720 УСД) ) за правни лица.

Новиот закон наметнува и административна одговорност за објавување на такви информации во масовните медиуми и се однесува и на правните лица на „странски агенти“ и на физички лица и на граѓански здруженија на „странски агенти“.

Руската владина Агенција за надзор на медиуми Роскомнадзор поднесе стотици жалби за веб-страниците на РСЕ. А откако ќе поминат низ судскиот систем вкупните казни што може да се наплатат ќе достигнат речиси еден милион долари.


Според РСЕ казните се државно спонзорирана кампања за принуда и заплашување, додека американскиот Стејт департмент ги опиша како „неподносливи“. Хјуман рајтс воч го опиша законот за „странски агенти“ како „ограничувачки“ и закон што има за цел „да ги демонизира независните групи“.

„Кремаљ цели кон РСЕ заради реакцијата на публиката за нашата работа и интересот за нашето известување за неодамнешните политички настани во Русија. Рускиот народ ќе биде крајната жртва на законите, како овој, што користат тактики на заплашување со кои се обидуваат да ги замолчат гласовите и да ја намалат различноста на медиумите “, додаде Флај.

Министерот Османи пристигна во Софија

Министрите Бујар Османи и Екатерина Захариева, архивска фотографија.

Министерот за надворешни работи Бујар Османи попладнево пристигна во Софија, јави дописникот на МИА. Според дипломатски извори на МИА во Софија, македонската делегација предводена од Османи веднаш по пристигнувањето се упатила на средба со бугарската вицепремиерка и министерка за надворешни работи Екатерина Захариева во владината резиденција во Бојана.

Бугарската национална телевизија (БНТ) јави дека се очекува централна тема на разговорите да биде Акцискиот план меѓу двете земји.

Владиниот портпарол Душко Арсовски на денешната прес-конференција, исто така, информира дека се очекува централна точка на разговорите меѓу Османи и Захариева да биде Акцискиот план и дека повеќе информации за договореното ќе има по враќањето на министерот од Софија.

Акциски план, според премиерот Зоран Заев, е добар и за двете страни и треба да оди во полза на разговорите и добрососедските односи. Сепак, неговата целосна содржина до сега не е јавно објавена.

Села и Гаши бараат судски тимови од ЕУ за граѓаните повторно да веруваат во правда

Лидерите на Алтернатива и Алијанса за Албанците, Африм Гаши и Зијадин Села, архивска фотографија.

Претседателот на Алијансата за Албанците, Зијадин Села на денешната прес-конференција ја повика ЕУ и членките на ЕУ, како Германија, Франција и Холандија, ургентно да донесат тим на судии и обвинители кои ќе ги отвораат уште еднаш „сите монтирани политички процеси“, бидејќи, како што рече граѓаните мораат да почнат да веруваат во институциите кои делат правда.

„Да се отворат сите монтирани политички случаи, почнувајќи од „Монструм“, „Алфа“, па се до „27 Април“. Но, и да се отворат сите предмети од осамостојувањето на Република Северна Македонија за кои има политичка амнестија, за сите корумпирани политичари да одговараат и да завршат таму каде што треба. Тоа е единствен начин како ние треба да почнеме да градиме правна држава“, рече Села.

Тој изјави дека премиерот Зоран Заев тврдел оти „невини луѓе лежат во затвор во врска со Монструм“ и дека вистината за „Монструм“ е многу болна.

Претседателот на Алтернатива, Африм Гаши, на истата прес-конференција, оцени дека има три причини зошто „Монструм“и сите други, како што рече, „монтирани процеси“ потфрлуваат и оставаат голема дамка и голем прашалник зошто ова ни се случува.

„Првата причина е затоа што овој процес во самиот почеток беше крајно политизиран. Целиот процес траеше со отсуство на транспарентност. И третата причина е затоа што целосно е изгубена довербата во судот и во одлуката“, рече Гаши.

Алијансата за Албанците и Алтернатива дека вчера поднеле иницијатива за интерпелација за министерот за внатрешни работи Оливер Спасовски, оценувајќи дека последните случувања со Сашо Мијалков претставуваат театар.

Иран повторува дека САД треба да го направат првиот чекор кон нуклеарниот договор

САД треба да го направат првиот чекор кон спасување на нуклеарниот договор од 2015 година меѓу Техеран и шесте светски сили, рече иранскиот амбасадор во Женева на денешната Конференција за разоружување поддржана од ОН која се одржа во Женева.

Амбасадорот Есмаил Багеи Хаманех ова го кажа еден ден откако Иран почна да ги ограничува меѓународните инспекции врз своите нуклеарни постројки во обид да изврши притисок врз САД и европските земји за укинување на економските санкции и враќање кон договорот.

„Обврска на страната што прекршува е да се врати, да почне одново и да ги надомести штетите, како и да даде уверување дека нема да се повлече повторно“, рече тој, повторувајќи ја позицијата на Техеран.

Администрацијата на поранешниот американски претседател Доналд Трамп во 2018 година ги повлече САД од договорот, кој предвидуваше ограничување на иранската нуклеарна програма во замена за укинување на меѓународните санкции, по што Трамп воведе жестоки санкции против Техеран, кои силно влијаеа на иранската економија.

Новата администрација на претседателот Џо Бајден се обидува да ја смени таа одлука, но Иран бара Вашингтон прво да ги укине санкциите. Кина, која е потписничка на договорот, соопшти дека укинувањето на американските санкции е клучно за излегување од ќор-сокакот.

Пекинг, кој одржува блиски економски односи со Техеран, долго време се противи на санкциите. Кина, заедно со другите потписници на договорот, Велика Британија, Франција, Русија и Германија, работи на одржување на договорот во живот, откако Трамп се повлече во 2018 година.

Протест „свадба“ пред Влада

Импровизирана „свадба“ пред Владата на протестот на угостителите за владина помош поради економските последици од ковид пандемијата

Угостителите поставија маси и столчиња пред Владата во знак на протест оти веќе цела година не може да организираат поголеми свеченост, поради мерките за спречување на ширење на ковид-19. Поставија и бина за бенд, цветни аранжмани и средства за дезинфекција на масите.

Прв „гостин“ им беше вицепремиерот за економски прашања Фатмир Битиќи за да разговараат за загубите на угостителите кои имаат ресторани за свадби и другите од индустријата за организирање настани. Од оваа индустријата претходните денови протестираа на крстосниците во Автокоманда на влезот во Скопје, а денеска протестот го префрлија пред Влада.

Тие неодамна доставија предлози за организирање настани со нови здравствени протоколи, но владата не ги прифати. Угостителите велат дека веќе не можат да плаќаат вработени и да ги држат на работа, а немаат приходи, а, како што велат, веќе ни банките не им даваат кредити. Во разговорот со Битиќи тие посочија дека помошта што ја добиваат од државата не е доволна и дека бараат да им се дозволи работа по протоколи на а-ла-карт рестораните, бидејќи сметаат дека објектите се доволно безбедни за да почнат со работа.

Битиќи вели дека здравјето на луѓето е побитно од последиците кои може да ги имаат угостителите, оти како што вели загубите заедно ќе ги надокнаделе.

Вицепремиерот за економски прашања Битиќи претходно денеска рече дека Комисијата за спречување заразни болести е таа која носи одлуки за рестрикциите. Во последните денови расте бројот на заразени со ковид-19. Денеска се регистрирани нови 725 случаи на заразени со коронавирус.

Нови 725 случаи на ковид-19

Регистрирани се 725 нови случаи на ковид-19 од направени 3.342 тестирања, информираше Министерството за здравство, согласно податоците од Институтот за јавно здравје. Во Скопје се регистрирани 274, нови случаи, Прилеп – 79, Кавадарци – 55, Тетово – 39, Куманово – 34, Охрид – 29, Гевгелија – 26, Неготино – 25, Велес -24, Штип -20, Гостивар -18, Битола -16, Струмица – 13, Кочани – 12, Струга и Крива Паланка – по 11, Богданци – 6, Крушево – 5, Ресен – 4, Свети Николе, Делчево, Пробиштип, Виница, Валандово, Кратово и Демир Капија – по 3, Кичево – 2, Берово – 1.

Регистрирани се 215 оздравени пациенти. Пријавени се вкупно 13 починати лица. Починати се по 4 пациенти од Скопје (85г, 78г, 72г, 64г) и Куманово (70г, 63г, 57г, 50г) и по еден пациент од Тетово (66г), Прилеп (72г), Битола (71г), Велес (75г) и Пробиштип (83г). Од пријавените смртни случаи сите се починати во болнички услови.

Вкупната бројка на ковид-дијагностицирани лица во нашата земја од почетокот на епидемијата изнесува 100.632, бројката на оздравени пациенти е 90.311, на починати е 3.098, а бројот на активни случаи изнесува 7.223.


Министерот за здравство Венко Филипче изјави дека засега индиции дека треба да се препорачаат дополнителни анти-ковид мерки, иако, како што вели, не се исклучува можноста од некаква форма на дополнителни мерки на локално ниво или, пак, на територија на цела држава, но за тоа ќе се разговара во периодот што следи. Тој вели дека со членовите на Комисијата за заразни болести се прават анализи на што се должи зголемување на бројот на позитивни од вкупниот број на направени тестови во последните денови. Се анализира дали тоа се должи на британскиот сој на вирусот или на генерално непочитување на мерките во делот на собирите.

Владата денеска ќе одобри набавка на 100.000 руски вакцини

Венко Филипче

Министерот за здравство, Венко Филипче, денеска информираше дека Владата го добила драфт договорот за набавка на најавените 100.000 вакцини од Русија, за што веќе во текот на денот ќе има затворена седница на која Владата треба истиот да го усвои.

„Се уште траат преговорите со Фајзер во однос на некои технички детали, за што секојдневно се слушаме со претставничката на претставништвото на Фајзер во Белград и го очекуваме драфтот на договорот. Во делот на кинеските вакцини постои интензивна комуникација и уште една размена на писма и преку МНР, така што очекувам дека за кратко време ќе го добиеме и дефинитивниот датум во кој што ќе стигнат и оваа количина на вакцини. По потпишувањето на анекси со Астра Зенека на барање на компанијата преку КОВАКС механизмот најавите се дека 20-30.000 вакцини треба да пристигнат до почетокот на март. И во делот на руските вакцини, како што најави премиерот Заев ќе набавиме количина од 100.000 вакцини, за што веќе го добивме драфт договорот, за што веќе во текот на денот ќе има затворена седница на која Владата треба да го усвои“, одговори Филипче на новинарско прашање до каде е набавката на ковид вакцини преку повеќе системи и од повеќе производители.

Тој денеска на граничниот премин Табановце, од неговиот српски колега Златибор Лончар, ја прими втората пратка ковид вакцини од Фајзер, отстапени од Србија. Тој изјави дека со вакцините од Србија ќе се вакцинираат сите здравствени работници од приоритетната група за имунизација против ковид-19.

Согласно најавата од страна на компанијата Фајзер, Филипче потврди дека првата пратка требаше да стигне во фервуари, но дека укажувањето сега од последните разговори е дека доцнењето е заради тоа што вкупното производство на компанијата е намалено со цел да ги надгради капацитетите за во текот на 2021 година.

На новинарско прашање за изјавата на екс-шефот на УБК, Сашо Мијалков, дека имал сипмтоми на ковид-19 па не знаел дека полицијата го бара, Филипче рече дека немаат информации дали Мијалков контактирал со епидемиолог.

Утре нов ЕУ самит за ковид-19

Илустрација - Претседателката на Европската комисија, Урсула фон дер Лајен со заштитна маска

Шефовите на држави и влади на Европската унија (ЕУ), утре и задутре, ќе одржат нов самит за состојбата со коронавирусот во Европа, ќе се разговара меѓу другото за вакцинацијата и за сертификатите за Ковид-19 за патување, јави МИА од Брисел. Лидерите на ЕУ се состануваат секој месец речиси откако започна кризата со Ковид-19 за да се обидат да воведат подобра меѓусебна координација во однос на слободата на движење, вакцинацијата и подготовките за олеснување на рестрикциите на пролет и лето.

Состанокот ќе биде преку видеоконференција. В четврток, лидерите ќе разговараат за епидемиолошката состојба во нивните земји, и ќе дебатираат за мерките кои ги донеле. Европската Комисија веќе изрази незадоволство со некои од мерките во земјите членки како затворањето на границите, и дипломатите очекуваат остри дебати и на утрешниот самит на оваа тема.

На крајот на состанокот се очекува шефовите на држави и влади да испратат ново предупредување до фармацевтските компании за почитување на преземените обврски за испорака на вакцини до земјите членки на ЕУ и барање да се забрза производството. Ќе стане збор и за солидарноста со третите земји.

АИ нема веќе да го нарекува Навални „затвореник на совеста“

Алексеј Навални

Амнести Интернешнл (АИ) го повлече неодамна усвоениот статус за рускиот опозициски политичар Алексеј Навални – „затвореник на совеста“ поради неговото наводно застапување во минатото на насилство и дискриминација и коментари кои вклучуваа говор на омраза, но дека и натаму ќе продолжи да се бори за негово ослободување.

Заменик директорот на Амнести Интернешнл за Европа и Централна Азија, Денис Кривошев, за Радио Слободна Европа изјави дека организацијата и натаму ќе продолжи да се бори за негово ослободување.

„Амнести Интернешнл донесе интерна одлука да престане да го нарекува Алексеј Навални затвореник на совеста заради коментарите што ги даваше во минатото“, рече Кривошев, додавајќи дека некои од неговите коментари доаѓаат и до границата да заговараат омраза, што е во спротивност со дефиницијата за затвореници на совеста на Амнести интернешенл.

Кривошев додаде дека Навални јавно не се откажал од своите коментари од минатото, но додаде дека и не давал слични изјави во последните години.

Вчитај повеќе

XS
SM
MD
LG