Достапни линкови

Вести

Талир: Силјан Мицевски тврди дека лично носел пари кај Груевски

Архивска фотографија - Бизнисменот Силјан Мицевски пред Суд во Скопје

Судењето за предметот „Талир”, за незаконско финансирање на ВМРО-ДПМНЕ, денеска продолжи со сведочење на бизнисменот Силјан Мицевски од Битола, на барање на Обвинителството.

„Да, лично сум однел 10.000 евра кај премиерот Никола Груевски. За ВМРО-ДПМНЕ и индиректно сме донирале, за избори. Сме дале и на кошаркарскиот клуб МЗТ околу 70.000 евра. Требаше да платат некоја котизација за да не ги избришат од лигата и јас платив. Плативме не по наша иницијатива, туку по барање на одредени луѓе од партијата”, сведочеше денеска Мицевски пред Судот, кој се јавува и како оштетен во случајот „Меѓународен сојуз“.

Обвинението за незаконското финансирање на ВМРО-ДПМНЕ го товари поранешниот премиер и партиски лидер Никола Груевски за „Злоупотреба на службената положба и овластување и за Перење пари и други приноси од казниво дело“. Покрај Груевски, кој е во бегство во Унгарија, обвинети се и Кирил Божиновски и екс-министерот Миле Јанакиески, кој е во куќен притвор.

Обвинителството денеска бараше Мицевски да опише, како што рече обвинителката Ленче Ристовска, „како му биле барани пари од првите луѓе на тогаш владејачката ВМРО-ДПМНЕ откако ќе добиел некој тендер“.

„По наредба на премиерот или генералниот секретар на Владата се случувало да ми кажат: ‘Земете го тој и тој подизведувач’. Кирил Божиновски ми дал таква сугестија. Ми кажал на пример да го вклучам ‘Трансмет’ за ископ во Битола”, одговори денеска Мицевски.

Поради овој случај, за кое судењето почна во март годинава, со судска одлука е замрзнат имотот на ВМРО-ДПМНЕ, вклучително и партиското седиште во центарот на Скопје.

види ги сите денешни вести

Филипче - ЕУ ги олесни правилата за патување, оти ковид-состојбата е стабилна

Министерот за здравство Венко Филипче вели дека одлуката на Европската унија за олеснување на патувањата на нашите државјани доаѓа по стабилизацијата на состојбата со вирусот во државата. Но на официјалниот Фејсбук профил предупредува дека пандемијата сè уште не е завршена и оти граѓаните треба да се придржуваат кон мерките за заштита.

Објавата на министерот доаѓа по денешната одлука на амбасадорите на ЕУ да се укинат рестрикциите за несуштински патувања за државјаните на неколку земји, меѓу кои и за Северна Македонија, Одлуката треба да биде формално објавена во Службениот весник на ЕУ со што ќе стапи на сила, најверојатно во петок, јави дописничката на МИА од Брисел.

Европската унија треба постепено да ги олесни корона ограничувањата за влез за патниците од САД и седум други земји по договорот од средата меѓу 27-те земји-членки.

Патниците од САД, Албанија, Хонг Конг, Либан, Макао, С.Македонија, Србија и Тајван треба полесно да влегуваат во Унијата, изјави португалското претседателство со ЕУ за германската агенција ДПА.

Османи реферираше пред пратениците за преговорите со Бугарија

Бујар Османи

Министерот за надворешни работи Бујар Османи денеска пред собраниската Комисија за надворешна политика, реферираше за преговорите што се водат со Бугарија за изнаоѓање решение за деблокирање на интеграцијата на Македонија во ЕУ. Опозицијата, пак, обраќањето на Османи го оцени како задоцнети и дека требало да се случи многу порано.

Претседателот на Комисијата, пратеникот од ВМРО-ДПМНЕ, Антонијо Милошоски, рече дека Комисијата би дала Предлог-заклучоци до Собранието, да донесе резолуција со која, што ќе се отфрли Декларацијата усвоена на 10 октомври 2019 година од страна на Собранието во Бугарија како спротивна на Договорот меѓу Бугарија и Македонија, потпишан на 1 август 2017 година.

Тој вели дека како втор заклучок, Собранието треба да утврди став за итно и безусловно отпочнување на преговорите со ЕУ со преговарачка рамка, која што нема да биде оптоварена од било какви билатерални спорови, кои што не припаѓаат во европските вредности и стандарди. Трета точка, како предлог-заклучок, Собранието да утврди општ став во кој прашањето за образованието, историографијата и културата се дефинираат како суверени права на секоја држава, а соодветно на тоа надвор од сите норми е да се преговара за посебноста и генезата на македонскиот народ и историскиот континуитет на нацијата, рече Милошоски.

Министерот Османи рече дека со внимание ги слушал излагањата и дека бил поканет да даде извештај за преговорите со Бугарија, но оти не бил информиран дека се предлагаат заклучоци.

„Ниту сме во состојба, ниту сметам дека е можно за 15 минути да се изгради став за вакви прашања. Барам да не се пристапи кон гласање на овие заклучоци и да се продолжи со коректниот пристап и дебатата“, рече Османи.

Заради немање кворум, Милошоски рече дека не може да се изјаснат по предложените заклучоци и ја прекина работата на Комисијата, посочувајќи дека ваквото напуштање на седницата, само дополнително ќе ја зголеми недовербата.

Министерот Османи, во своето обраќање пред Комисијата, посочи дека се подготвени на искрени разговори со добра волја за постигнување на взаемно прифатливо решение со соседот Бугарија, но не по секоја цена и не на штета на државните интереси.

Во меѓувреме Бугарската влада соопшти дека не се исполнети условите за Меѓувладината конференција на ЕУ со С. Македонија.

Претходно два дена ВМРО-ДПМНЕ протестираше пред МНР со барање Владата и МНР да објават за што конкретно се преговара за добивање на датум за почеток на преговорите со ЕУ.

Бугарска влада - Не се исполнети условите за Меѓувладината конференција на ЕУ со С. Македонија

Бугарскиот премиер Стефан Јанев

Бугарската влада ја одобри државната позиција за учество на заседанието на Советот за општи работи кое ќе се одржи на 22 јуни и позицијата за преговарачката рамка за Северна Македонија е непроменета. Ова попладнево го соопшти бугарското Министерство за надворешни работи, ден пред посетата на македонскиот премиер Зоран Заев и владини министри на Софија.

Заев, придружуван од министерот за надворешни работи Бујар Османи и вицепремиерот Никола Димитров утре во бугарскиот главен град ќе разговараат со службениот министер Стефан Јанев, претседателот Румен Радев и претставници на политичките партии за можноста Софија да ја деблокира македонската евроинтеграција.

Детално позицијата на бугарската влада за самитот идната недела во однос на Македонија е следнава:

„Во делот на политиката за проширување на Европската унија и европската перпсектива на Република Северна Македонија во прифатената од владата позиција се посочува дека Бугарија се придржува до Декларацијата на Народното собрание од 10 октомври 2019 година и до Рамковната позиција за европската перспектива на Република Северна Македонија прифатена од Владата на 9 октомври 2019 година и позицијата на Бугарија за преговарачката рамка и одржувањето на Првата меѓувладина конференција со Република Северна Македонија останува непроменета. Преговарачката рамка за присоединувањето на Република Северна Македонија кон ЕУ треба да ги содржи неопходните гаранции во однос на исполнувањето на Договорот од 2017 година кои во моментов не ги гледаме. Не се исполнети барањата за одржување на Меѓувадината конференција“, стои во објавата на бугарското министерство за надворешни работи.

Попладнево во интервју за БНТ и премиерот Јанев отфрли таква можност наведувајќи дека не ја поддржуваат сегашната преговарачка рамка со Република Северна Македонија.

„Не мислам дека Бугарија е во ситуација да отстапи или да прави компромиси со позицијата. Не само службената влада, но и парламентот со декларацијата од 2019 година даде јасни насоки каква е бугарската национална позиција“, рече Јанев.

Путин – Немаше непријателство, разговорот со Бајден беше конструктивен

Прес-конференција на рускиот претседател Владимир Путин по средбата со неговиот американски колега Џо Бајден

Немаше непријателство за време на состанокот и разговорот беше прилично конструктивен, изјави рускиот претседател Владимир Путин по средбата со американскиот претседател Џо Бајден во Женева.

„Нашата проценка за многу прашања се разликува, но според мене, двете страни покажаа желба да се разберат меѓусебно и бараат начини да се приближат“, рече Путин.

Рускиот претседател рече дека со Бајден се договориле да ги вратат своите амбасадори на нивните места, во обид да се намалат тензиите, но засега нема потврда за тоа од Белата куќа.

Рускиот амбасадор во САД, Анатолиј Антонов, беше повлечен од Вашингтон пред околу три месеци откако Бајден го опиша Путин како убиец.

Американскиот амбасадор во Русија, Џон Саливан ја напушти Москва пред речиси два месеци, откако Русија му предложи да се врати во Вашингтон на консултации.

Претседателите се сретнаа прво на еден помал состанок, а потоа им се приклучија и други претставници од двете земји.

Првата рунда разговори меѓу Бајден и Путин во Вила де ла Гранж во Женева траеше 90 минути и присуствуваа само претседателите, двајцата министри за надворешни работи Ентони Блинкен и Сергеј Лавров и двајца преведувачи. Средбата потоа продолжи во поширок формат со делегации од двете земји.

Средбата Путин- Бајден доаѓа во време кога односите меѓу двете земји се на најниско ниво од Студената војна.

Борел го претстави новиот пристап на ЕУ во односите со Русија

Шефот за заедничка надворешна политика на ЕУ Жозеп Борел

Високиот претставник на ЕУ, Жозеп Борел денеска го претстави предлогот за нов пристап на Унијата кон Русија, наведувајќи дека ЕУ во односите со Русија треба да биде спремна истовремено да „одговори, принуди и разговара“.

Новите насоки во односите кон Русија треба да бидат усвоени на Самитот на ЕУ на 24 и 25 јуни.

„Овие три глаголи претставуваат главни насоки на нашето делување. Ако земјите членки ги одобрат тие препораки треба да ги почитуваат, а не да ѝ препуштат на Русија да нè дели“, рече Борел.

Тој констатираше дека односите на ЕУ со руската влада се „на најниско ниво“.

Борел рече дека Русија не сака да разговара со ЕУ како целина, туку повеќе сака да разговара директно со некои од земјите-членки, со оние кои по нејзино мислење имаат одредена важност.

„ЕУ треба да се покаже единствена за да ја принуди Русија да разговара со неа“, рече тој.

Предложената стратегија вклучува детали за идните односи меѓу Брисел и шесте поранешни советски републики од Источното партнерство на ЕУ – Ерменија, Азербејџан, Белорусија, Грузија, Молдавија и Украина. Се наведува дека ЕУ „цврство го отфрла руското барање за привилегирана сфера на влијание“ врз тие земји.

Заврши Самитот Бајден - Путин

Белата куќа соопшти дека состанокот меѓу американскиот претседател Џо Бајден и неговиот руски колега Владимир Путин завршил по четиричасовни разговори.

Видео снимките по состанокот го прикажаа Бајден како излегува од вилата крај Женевското Езеро каде што се одржа состанокот.

Се очекува двајцата претседатели да одржат одвоени прес-конференции.
Претседателите се сретнаа прво на еден помал состанок, а потоа им се приклучија и други претставници од двете земји.

Самитот доаѓа во време кога односите меѓу Русија и САД се на најниско ниво од Студената војна и само неколку месеци откако Бајден рече оти верува дека неговиот руски колега е убиец.

Првата рунда разговори меѓу Бајден и Путин во Вила де ла Гранж во Женева траеше 90 минути и присуствуваа само претседателите, двајцата министри за надворешни работи Ентони Блинкен и Сергеј Лавров и двајца преведувачи. Средбата потоа продолжи во поширок формат со делегации од двете земји.

Бајден пред состанокот рече дека станува збор за дискусија меѓу „две големи сили“ и оти секогаш е подобро да се сретнат во живо. Путин изрази надеж дека разговорите ќе бидат продуктивни.

Бајден и Путин се состанаа во Женева
please wait

No media source currently available

0:00 0:01:15 0:00

Самитот доаѓа во време кога Путин продолжува да ја консолидира својата доминација на руската политичка сцена, вршејќи притисок врз опозициските активисти, како затворениот Алексеј навални и задушувајќи ги независните медиуми и невладини организации во пресрет на парламентарните избори во земјата во септември.

Портпаролката на Бајден, петтиот американски претседател кој се среќава со Путин, изјави дека Белата куќа „ниту сака да ги ресетира односите со Русија, ниту сака да ги заостри“.

Сепак, Бајден зазема поостар став отколку неговиот претходник Доналд Трамп. Од преземањето на функцијата во јануари, Бајден воведе две рунди економски санкции против Русија, но се согласи на продолжување на новиот договор СТАРТ за контрола на оружјето.

Разрешен директорот на Националното разузнавање во Бугарија

Техничкиот премиер на Бугарија Стефан Јанев

Бугарската техничка Влада го смени шефот на Државната агенција за разузнавање Атанас Атанасов и на негово место го назначи Антоан Гечев.
Портпаролот на привремената влада Бантон Кутев изјави дека тој потег е за да се обезбеди одржливост на системот за заштита на националната безбедност.

„Под раководство на Атанасов, Државната агенција за разузнавање спроведувала свои активности со кршење на објективност, непристрасност и политичка неутралност. Според законот, потребно е да се обезбедат информации од ист обем и содржина до претседателот на државата, претседателот на Националното собрание и премиерот. Постои повреда на овој принцип во однос на разузнавачките информации што му се дадени на претседателот. Поради тоа донесена е одлука за назначување на Антоан Гечев“, рече тој.

Бугарската Влада го смени и заменик-претседателот на таа агенција, Недалко Недиалков и на негово место да го назначи Станислав Станчев.

Завршена првата рунда разговори Бајден – Путин

Претседателите на САД и на Русија, Џо Бајден и Владимир Путин

Претседателите на САД и на Русија, Џозеф Бајден и Владимир Путин денеска ја завршија првата рунда разговори и го почнуваат првиот од двата пошироки состаноци со делегациите во Женева.

Во првата рунда од состанокот, Бајден и Путин разговараа во присуство на министрите за надворешни работи Ентони Блинкен и Сергеј Лавров, и двајца преведувачи.

За денеска попладне се планирани двапошироки состаноци, кога на двајцата лидери ќе им се придружат дополнителни помошници и преведувачи.

Бајден и Путин се состанаа во Женева
please wait

No media source currently available

0:00 0:01:15 0:00

Од американската страна, на проширениот состанок треба да присуствуваат Блинкен, советникот за национална безбедност Џејк Саливан, потпретседателката на државниот секретар за политички работи Викторија Нуланд, американскиот амбасадор во Русија Џон Саливан и стручњаците за Русија во Националниот совет за безбедност Ерик Грин и Стергос Калудис.

Во руската делегација се Лавров, советникот на Путин за надворешни работи Јури Ушаков, заменикот на Лавров Сергеј Рјабков, началникот на генералштабот на руската армија Валери Герасимов, рускиот амбасадор во Вашингтон Анатоли Антонов, како и пратениците на Кремљ за Украина и Сирија и портпаролот на Путин, Дмитри Песков.

Се предвидува дека Самитот вкупно ќе трае четири го пет часа, а потоа лидерите ќе одржат одвоени конференции за медиумите.

Боцвана објави дека е пронајден третиот најголем дијамант во светот

Претседателот на Боцвана, Моквици Масиси го држи новооткриениот дијамант

Во Боцвана е пронајден дијамант од 1098 карати, трет најголем дијамант по квалитет за накит, досега најден во светот, соопшти компанијата Дебсвана.

Каменот бил ископан на 1 јуни, изјави Линет Армстронг, директорка на компанијата Дебсвана, која е во заедничка сопственост на владата и јужноафриканската компанија Де Беерс, специјализирана за дијаманти.

Најголемиот познат дијамант е „Калинан“ со над 3100 карати, најден во Јужна Африка во 1905 година. Вториот со 1109 карати беше ископан во 2015 година во рудникот Карове во североисточна Боцвана, која е водечка земја во Африка по производство на дијаманти.

Арнаутовиќ суспендиран на наредниот натпревар поради навредите кон Алиоски

Арнаутовиќ го навредува Алиоски по постигнатиот гол

Австрискиот репрезентативец Марко Арнаутовиќ денеска е суспендиран на еден натпревар откако го навредуваше македонскиот репрезентативец Езџан Алиоски на меѓусебниот натпревар на Европското првенство. Како што соопшти Европската фудбалска унија (УЕФА), Аранаутовиќ е обвинет за „навреда на друг играч“, според дисциплинскиот правилник.

Фудбалската федерација на Македонија во вторникот побара од УЕФА да го казни Арнаутовиќ, кој, како што се тврди, откако постигна гол, на српски јазик, на национална основа го навредил Алиоски, кој е етнички Албанец.

Таткото на Арнаутовиќ е Србин, а мајката Австријка.

Тој можеше да заработи суспензија на 10 натпревари, ако УЕФА утврдеше дека навредите биле изречени на расна и етничка основа.

Арнаутовиќ се извини и рече дека не е расист, туку дека некој зборови биле изговорени поради емотивен набој.

Тој ќе го пропушти мечот против Холандија во второто коло на Групата Ц, кој се игра в четврток во Амстердам.

Нови 15 случаи на ковид-19, нема починати, оздравени 14 пациенти

Илустрација.

Министерството за здравство соопшти дека нови 15 случаи на ковид-19 се регистрирани во последните 24 часа, 14 пациенти оздравеле, а починати нема.
Направени се 2.802 тестирања, а од новите случаи пет се во Кичево, 4 од Скопје, 3 од Тетово и по еден од Прилеп, Охрид и Делчево.

Досега во земјата се направени вкупно 841.125 тестирања на ковид-19.
Вкупната бројка на ковид-дијагностицирани лица во нашата земја од почетокот на епидемијата изнесува 155.583, бројката на оздравени пациенти е 149.690, на починати е 5.472, а бројот на активни случаи изнесува 421.

САД купиле уште 200 милиони дози на вакцини Модерна

Вакцината Модерна. Илустрација.

Модерна соопшти денеска дека американската влада купила уште 200 милиони дози од нејзината вакцина за ковид-19. САД досега нарачаа вкупно 500 милиони дози на вакцини Модерна, при што 110 милиони за испорака во четвртиот квартал и 90 милиони за испорака во првиот квартал на 2022 година.

Модерна, која од понеделникот достави 217 милиони дози во САД, соопшти дека дополнителните дози се купени за да се обезбеди континуирано снабдување до првиот квартал од следната година.

Повеќе од 129 милиони дози на вакцината „Модерна“ досега се администрирани во САД, покажуваат најновите податоци на Центрите за контрола и превенција на болести.

Путин се надева на продуктивна средба со Бајден

Средба на рускиот и американскиот претседател Владимир Путин и Џо Бајден во Женева.

Рускиот претседател Владимир Путин изјави денеска дека се надева оти средбата со американскиот претседател Џо Бајден во Женева ќе биде продуктивна.

„Господине претседател, би сакал да ви се заблагодарам за иницијативата да се сретнеме денес“, рече Путин, седејќи покрај Бајден и придружуван од министрите за надворешни работи на двете земји.

Бајден рече дека двајцата лидери ќе се обидат да утврдат области на соработка и заемен интерес.

„Секогаш е подобро да се сретнуваме лице в лице“, рече Бајден.

Путин и Бајден се среќаваат за прв пат откако Бајден стана претседател и во момент кога билатералните односи се на најниско ниво во последните неколку години. Агендата - освен конечните соопштенија- е потврдена во телефонски повик меѓу советникот за национална безбедност на Белата куќа Џејк Саливан и советникот за надворешна политика на Путин Јуриј Ушаков.

„Самитот меѓу рускиот претседател Владимир Путин и неговиот американски колега Џо Бајден во Женева веројатно нема да донесе конкретни договори, но состанокот сепак ќе биде корисен“, изјави Ушаков, наведувајќи дека на дневен ред ќе бидат нуклеарната стабилност, климатските промени, сајбер безбедноста и судбината на американските и руските државјани кои се наоѓаат во затвор во едната или другата земја.

Заев: Ќе ја искористиме желбата за разговори со Бугарија

Премиерот Зоран Заев

Премиерот Зоран Заев во пресрет на утрешната посета на Софија изјави дека
за македонскиот јазик и идентитет не се разговара и тоа воопшто не е на маса. Според него, се разговара за португалскиот предлог кој води грижа за македонски јазик и македонски идентитет и истовремено води грижа и за бугарските позиции. Тој додава и дека португалскиот предлог е навистина инвентивно и креативно решение за кое што вреди да се потрудат.

За утрешната посета на Софија тој кажа дека е должен прво на граѓаните да им ги каже своите лични очекувања, бидејќи не сака ниту за себе ниту за народот да ги зголемува очекувањата од тоа што е реално.

„Зошто е реално? Заради тоа што во Бугарија нема ниту Парламент, ниту има политичка влада. Фала богу има желба за разговор и затоа ќе ја искористиме таа желба за разговори од страна на бугарската влада и ние ќе ја направиме утре посетата Бугарија каде што ќе се видиме и со лидершипот на повеќе политички партии, најголемите… Се надевам тие ќе го прифатат тоа, а ќе се видиме со премиерот и со претседателот на државата и сите важни носители на одговорните функции“, рече Заев.

Според него, двете страни сметаат дека португалскиот предлог е добра основа за постигнување на решение.

„Ова треба да го искористиме. Ако се постигне решение супер, ако не се постигне сигурно ќе е позитивен исчекор кон изнаоѓање на решение веднаш штом ќе се формира политичката влада,“ оцени премиерот Заев.

Првата шанса за датум за меѓувладина конференција е на 22 јуни односно 24 и 25 јуни кога се одржува Европскиот совет. На 6 октомври, посочи Заев, е закажан Европски совет за Западен Балкан во Словенија за време на словенечкото претседателство, што е следна шанса за земјата.

Заев, придружуван од заменик претседателот на Владата, Никола Димитров и од министерот за надворешни работи Бујар Османи на утре ќе остварат работна посета на Софија. Според соопштението на владината прес-служба, целта на посетата е интензивирање на напорите за наоѓање решенија за отворените прашања и за деблокада на европската интеграција на Северна Македонија.

Премиерот и владината делегација, според соопштението, ќе остварат работни средби со Претседателот на Бугарија, Румен Радев, со премиерот на Бугарија Стефан Јанев, како и со претставници на поголемите политички партии во земјата.

Вчера се аплицирани 5.611 вакцини

Вакцинација против ковид-19 во Спортски центар „Борис Трајковски“ во Скопје - 5 април 2021.

Министерството за здравство соопшти дека на вакциналните пунктови во државата заклучно со вчера вакцинирани се вкупно 263.083 граѓани. Прва доза вакцина вчера примиле 3.606 граѓани, а вчера вкупно се вакцинирале 5.611 граѓани. Во државата вкупно се аплицирани 458.131 дози вакцини, а ревакцинирани се 195.048 граѓани.

Со последните бројки, според соопштението, 48 проценти од населението над 70 години имаат примено барем една доза вакцина, 42 отсто од населението над 65 години е вакцинирано со барем една доза вакцина и 36 проценти од населението над 60 години е вакцинирано со барем една доза вакцина.

Вакцинацијата, како што се наведува, се одвива непречено на сите пунктови низ државата. Интересот за вакцинација секојдневно се зголемува, а досега бројот на лица кои изразиле желба за вакцинација преку веб платформата vakcinacija.mk е 452.093 граѓани.

Вакцинацијата се спроведува согласно Националниот план за имунизација. Се вакцинираат возрасни лица, граѓани кои искажале интерес за вакцинација на веб страницата vakcinacija.mk а се вакцинираат и лица вработени во критична инфраструктура. Масовна вакцинација се одвива во неколку градови во државата и тоа во А1 СЦ Борис Трајковски во Скопје, во спортските сали во Кавадарци, Куманово, Тетово, Штип, Битола, Струмица, Охрид, Велес и Прилеп.

Во Москва задолжителна вакцинација за 60 проценти од вработените во услужниот сектор

Жена прима вакцина „Спутник В“ во Москва.

Московските власти донесоа одлука вакцинацијата против ковид-19 да ја направат задолжителна за 60 проценти од вработените во услужниот сектор, бидејќи новите случаи продолжуваат да го брануваат рускиот главен град.

Градоначалникот на Москва, Сергеј Собјанин изјави дека ситуацијата во градот драматично се развива и ги повика луѓето да се вакцинираат во обид да се намалат хоспитализациите и смртните случаи. Собјанин на 12 јуни објави неработна недела помеѓу 15-19 јуни како одговор на скокот на случаите на ковид-19.

Бројот на потврдени случаи во Москва порасна за 5.782 во изминатите 24 часа. Вкупно 75 жртви се регистрирани во главниот град во изминатите 24 часа, што е највисока бројка од 19 јануари. Вкупниот број на смртни случаи во Москва достигна 21.125, соопшти кризниот центар. Повеќе од 125.000 смртни случаи од коронавирус се регистрирани од страна на властите во Русија од почетокот на пандемијата.

Османи– Логар: Западен Балкан важно прашање за претстојното претседателство на Словенија со ЕУ

Министерот Бујар Османи

Министерот за надворешни работи, Бујар Османи денеска имаше средба со министерот за надворешни работи на Словенија, Анже Логар на маргините на Глобалниот безбедносен форум „ГЛОБСЕК 2021“ во Братислава. Тој на средбата, според соопштението, добил уверување дека Западниот Балкан ќе биде многу важно прашање за претстојното претседателство на Словенија со ЕУ.

Логар, како што се наведува, потенцирал дека клучното прашање на неформалните и највисоките можни политички дискусии ќе биде Самитот за Западен Балкан, со што прашањето за земјите од Западен Балкан ќе биде на врвот на дневниот ред во ЕУ. Соговорниците заклучиле дека оваа тема е од стратешко значење за ЕУ, не само за Словенија, туку и за регионот.

„Во разговорот со словенечкиот соговорник, поради фактот што Словенија ќе го преземе кормилото со Советот на ЕУ наредниот месец, доминираше темата за приоритетите на словенечкото претседателство, особено проширувањето на ЕУ кое што е високо на нивната агенда“, се посочува во соопштението на МНР.

Како што информираат од МНР, на средбата се зборувало и за развојот и потенцијалите на билатералните односи, но доминираа темите поврзани со европската агенда на Северна Македонија, тековните дискусии за преговарачката рамка за земјата, како и за нашите очекувањата за одржување на првата Меѓувладина конференција во рамките на протугалското претседателство со Советот на ЕУ.

Премиерот Зоран Заев, придружуван од заменик претседателот на Владата, Никола Димитров и од министерот за надворешни работи Бујар Османи на утре ќе остварат работна посета на Софија.

С.Македонија, Србија и Албанија на листата на ЕУ за „безбедни држави“ од ковид-19

Илустрација

Амбасадорите на земјите членки на ЕУ донесоа одлука Северна Македонија, Србија и Албанија да бидат ставени на листата на безбедни земји за ковид-19. Препораката би требало да биде усвоена во петок кога и официјално ќе стапи на сила и тоа ќе значи дека жителите на трите земји ќе можат слободно да патуваат во ЕУ.

ЕУ секои две недели расправа за епидемиолошката ситуација во секоја од таканаречените трети земји и се ажурира листата со оние држави за кои се смета дека се безбедни за нивните жители да патуваат во ЕУ. За да се добие статус на безбедна држава, мора да се евидентираат максимум 75 позитивни случаи на коронавирус на 100.000 жители во последните 14 дена во земјата.

Имено, претседателството на ЕУ, Португалија, состави список на земји чии податоци покажуваат можност за вклучување на овие земји во категоријата „безбедни земји“ во врска со пандемијата на ковид-19. Покрај трите земји од Западен Балкан, на списокот се и САД, Хонг Конг, Макао, Саудиска Арабија и Тајван.

Денешното гласање и претстојното во петок не е правно обврзувачко, меѓутоа со него формално се укинува забраната за патување од трети земји кои влегуваат во листата на безбедни држави. Патувањето за граѓаните на безбедната листа е слободно, но тоа не ја исклучува можноста земјите членки на ЕУ индивидуално да одлучуваат и да побараат мерки од патниците на овие земји како што се тестирање и карантин. Здравствените мерки се во надлежност на секоја земја членка на ЕУ, така што и правилата се одредуваат без координација на ниво на ЕУ. Но, од почетокот на пандемијата на ковид-19 за укинувањето на рестрикциите за патувањата на граѓани од трети земји се одлучуваше координирано.

Во мај, Советот на ЕУ формално ги укина ограничувањата за несуштински патувања за државјани на трети земји кои биле вакцинирани со сите дози на вакцината против ковид-19, која вклучува граѓани на Западен Балкан. Сепак, на граѓаните на оние земји кои не се на безбедната листа им е потребна согласност од земјата домаќин, додека дозвола не е потребна во случај да доаѓа од земја што се смета за безбедна. Прашањето за здравјето е во национална надлежност на секоја земја-членка, затоа, дури и во случај некои земји да бидат прогласени за безбедни, секоја земја на ЕУ има право да воведе мерки за борба против коронавирусот.

Заев, Димитров и Османи утре на средби во Софија

Никола Димитров, Бујар Османи и Зоран Заев

Премиерот Зоран Заев, придружуван од заменик претседателот на Владата, Никола Димитров и од министерот за надворешни работи Бујар Османи утре ќе остварат работна посета на Софија. Според соопштението на владината прес-служба, целта на посетата е интензивирање на напорите за наоѓање решенија за отворените прашања и за деблокада на европската интеграција на Северна Македонија.

Премиерот и владината делегација, според соопштението, ќе остварат работни средби со бугарскиот претседател и премиер, Румен Радев и Стефан Јанев, како и со претставници на поголемите политички партии во земјата.

Заев на НАТО Самитот 2021 во Брисел пред два дена оствари средба со Радев, на која во фокусот беше „перспективата за постигнување на реален исчекор во процесот на европската интеграција на Северна Македонија. На средбата беше договорена и посетата на Софија.

На 23 јуни треба да се одржи самит на ЕУ на кој ќе се разгледува можноста за почеток на преговорите на Северна Македонија и Албанија, во услови кога членката на блокот Бугарија го блокира почнувањето на процесот со Северна Македонија.

Над 2600 апликации за туристички ваучери

Охрид

Министерството за економија соопшти дека на јавниот повик за издавање ваучер за организиран одмор на работници со ниски приходи досега се пристигнати над 2600 апликации. На јавниот повик кој се затвора денеска право на учество имаа работници чии месечни примања во семејството не го надминуваат нето износот од 30.000 денари.

Ваучерите се со вредност од 12.000 денари и може да се користат во категоризираните угостителските објекти за сместување (хотели) лоцирани во туристичките центри во земјава кои претходно се пријавени во Министерство за економија. Предвидени се 15 милиони денари за вкупно 1.250 ваучери.

Оваа мерка, според министерството, има за цел да им овозможи на семејствата со ниски приходи, со поддршка на државата да го искористат правото на годишен одмор и истовремено, да им се даде поддршка на хотелиерите и угостителите да работат со исполнети капацитети и надвор од туристичката сезона, со што се стимулира развојот на домашниот туризам.

Ваучерот може да се искористи најдоцна до 30 ноември 2021 година. Потврдата за користење на средства за организиран одмор се издава по принципот “прв дојден прв услужен“.

Потврдата за користење на средства за организиран одмор може да се користи само од работникот на кого му е издадена заедно со членовите на неговото потесно семејство кои се наведени во барањето.

Владата преку програмата на Министерството за економија, во 2017 година почна да ја спороведува мерката со цел да даде поддршка на домашниот туризам, но во исто време на семејствата со ниски месечни примања да користат одмор во туристичките центри во земјата.

Повредени гледачи на натпревар на ЕУРО 2020 од демонстрант со падобран

илустрација

Демонстрант од Гринпис, кој скокна со падобран на стадионот пред мечот на шампионатот на ЕУРО 2020 меѓу Франција и Германија во Минхен, повреди неколку лица кога удри во жици на висечки камери. Остатоци паднаа на теренот и на главната трибина кога падобранот се заплетка во каблите. „Неколку лица“ беа на третман во болницата поради повреди предизвикани од инцидентот, соопшти УЕФА, додавајќи дека „властите ќе преземат неопходни активности“ за, како што го нарече, ова „несовесно и опасно“ дело.

УЕФА ќе поведе истрага за наводните навреди на Арнаутовиќ спрема Алиоски

Гринпис на Твитер соопшти дека организацијата „никогаш немала намера да повреди никого или да ја наруши играта“, додавајќи дека се надева оти „никој не е сериозно повреден“.

Руски фонд: Спутник V е поефикасен против индискиот вид отколку другите вакцини

Руската вакцина Спутник V

Руската вакцина Спутник V е поефикасна во заштитата од индиски вид на коронавирус отколку вакцините од други производители, објави Рускиот инвестициски фонд (РДИФ). Кон крајот на април, раководителот на Рускиот национален институт за епидемиологија и микробиологија „Гамалеја“, кој ја разви вакцината, Александар Гинтсбург, рече дека Спутник V произведува доволно антитела за борба против индискиот вирус на корона. Русија беше прва во светот што регистрираше вакцина против коронавирусот на 11 август минатата година.

Пристигнаа 20.000 вакцини „Астра Зенека“ од Грција

Спутник V досега е одобрен во 60 земји. Во февруари, медицинското списание „Лансет“ објави студија која покажува дека руската вакцина е ефикасна 90 проценти. Сè уште не е одобрена за употреба од Европската агенција за лекови.

Унгарските законодавци гласаа да донираат државно земјиште за кинески универзитет

Едно лице држи играчка мечка Вини Пу со знаме додека учествува на протест против планираниот кампус на кинескиот универзитет Фудан во Будимпешта, Унгарија, 5 јуни 2021 година.

Унгарскиот парламент го одобри предлогот да се донира државно земјиште за изградба на контроверзен кинески универзитет во Будимпешта и покрај бурата од локални протести и критики дека владата станува премногу наклонета кон Пекинг. Пратениците на владејачката партија Фидес на премиерот Виктор Орбан на 15 јуни со огромно мнозинство гласаа за донирање на неколку парцели долж реката Дунав на Фондацијата на Универзитетот Фудан. Таа група ќе биде надлежна за кампусот, кој треба да биде изграден по цена од околу 1,8 милијарди американски долари на место каде претходно биле планирани поволни станови за унгарски студенти.

Референдум во Унгарија за кинескиот универзитет

Според законот, владата треба да ги претстави конечните планови на проектот до парламентот до крајот на 2022 година, по општите избори. Орбан минатата недела изјави дека проектот ќе биде ставен на референдум. Планот е непопуларен во Будимпешта и на национално ниво, со илјадници демонстранти кои излегоа на улиците на главниот град овој месец да протестираат против него.

ЕУ со нова стратегија кон Русија

шефот на европската дипломатија Жозеп Борел з

Европската комисија денеска ќе објави нов извештај за Русија по консултациите со американскиот претседател Џо Бајден, кој исто така денеска ќе се состане со неговиот руски колега Владимир Путин во Женева. Новата стратегија на Европската унија за нејзиниот полн однос со Русија ќе се заснова истовремено врз одвраќање, ограничување и ангажирање со Москва, изјави во шефот на европската дипломатија Жозеп Борел за новата стратегија за која лидерите на ЕУ ќе разговараат во следната недела. ЕУ и Москва се длабоко во расчекор околу човековите права, Украина и Белорусија, безбедноста на Блискиот исток и сајбер нападите.

ЕУ ги повика руските власти да го ослободат активистот Пивоваров

Борел рече дека врските на ЕУ со Русија се „на најниско ниво“.
„Ќе биде тешко да се подобрат ... Изгледите не се светли дека работите ќе се подобрат наскоро“, додаде тој, наведувајќи дека ЕУ ќе биде подготвена да ги подобри врските со Русија доколку Кремљ ја смени својата политика.

РСЕ: ЕУ ќе ги прогласи С. Македонија, Србија, и Албанија за „безбедни држави“ од ковид-19

Северна Македонија, Србија и Албанија се земји во регионот кои имаат потенцијал да бидат прогласени за безбедни земји за слободно патување во Европската унија

Северна Македонија, Србија и Албанија се земји во регионот кои имаат потенцијал да бидат прогласени за безбедни земји за слободно патување во Европската унија, дознава Радио Слободна Европа од дипломатски извори. Имено, претседателството на ЕУ, Португалија, состави список на земји чии податоци покажуваат можност за вклучување на овие земји во категоријата „безбедни земји“ во врска со пандемијата на ковид-19. Покрај трите земји од Западен Балкан, на списокот се и САД, Хонг Конг, Макао, Саудиска Арабија и Тајван.

Нема веќе полициски час, прославите може да бидат помасовни, ќе има концерти и забави

Амбасадорите на земјите-членки на ЕУ ќе разговараат за секоја од овие земји на денешниот состанок и ќе одлучат во согласност со епидемиолошката состојба во секоја земја поединечно. За да се добие статус на безбедна држава, мора да се евидентираат максимум 75 позитивни случаи на коронавирус на 100.000 жители во последните 14 дена во земјата.

Падна бројката на ковид пациенти, но расте на оние со пост-ковид последици

Во мај, Советот на ЕУ формално ги укина ограничувањата за несуштински патувања за државјани на трети земји кои биле вакцинирани со сите дози на вакцината против ковид-19, која вклучува граѓани на Западен Балкан. Сепак, на граѓаните на оние земји кои не се на безбедната листа им е потребна согласност од земјата домаќин, додека дозвола не е потребна во случај да доаѓа од земја што се смета за безбедна. Прашањето за здравјето е во национална надлежност на секоја земја-членка, затоа, дури и во случај некои земји да бидат прогласени за безбедни, секоја земја на ЕУ има право да воведе мерки за борба против коронавирусот.

Вчитај повеќе

XS
SM
MD
LG