Достапни линкови

Вести

Помпео – Консултации со сојузниците за санкции кон Белорусија

Американскиот државен секретар Мајк Помпео

Американскиот државен секретар Мајк Помпео рече дека САД бараат итен прекин на насилните активности на белоруските власти против опозициските поддржувачи по оспорените избори на 9 август на кои долгогодишниот авторитарен лидер Александар Лукашенко освои нови шестгодишен мандат.

Помпео исто така денеска рече дека САД разгледуваат значителни таргетирани санкции за секој што е вклучен во кршење на човековите права во Белорусија во консултации со трансатлантските партнери на Вашингтон.

Тој рече дека заменик државниот секретар Стивен Бигун, според негови упатства, го посетил регионот минатата недела и го нагласил убедувањето на Вашингтон дека „народот на Белорусија заслужува право да ги избере своите лидери“.

Стотици илјади граѓани излегоа на улиците ширум Белорусија да протестираат против „наместените“ изборни резултати, според кои Лукашенко освои над 80 отсто од гласовите.

Многу земји во светот ги отфрлија изборните резултати и го критикуваа задушувањето на протестите и опозицијата од страна на Лукашенко, и пред и по изборите.

види ги сите денешни вести

Османи и Захариева разговарале за Акцискиот план и за ковид

Османи и Захариева во Софија.

Министерот за надворешни работи, Бујар Османи, денеска, на враќање од посетата на Париз се сретна со министерката за надворешни работи на Бугарија, Екатерина Захариева, во Софија.

На средбата беа разгледани актуелностите поврзани со кризата од ковид и начините на кои двете земји остваруваат соработка во справувањето со овие предизвици. Во оваа прилика Захариева потврди дека се прават напори за изнаоѓање начин за испорака на ветените вакцини за земјава, соопшти македонското МНР.

Министрите разговарале и за Акцискиот план за меѓусебна соработка, можноста за неговата финализација, а во функција на евентуално договарање на втората меѓувладина конференција меѓу двете влади, чии копретседавачи се токму министрите Османи и Захариева, стои во соопштението.

Министерот Османи за средбата информираше и на својот Фејсбук-профил.

Акциски план, според премиерот Зоран Заев, е добар и за двете страни и треба да оди во полза на разговорите и добрососедските односи. Сепак, неговата целосна содржина до сега не е јавно објавена.

Како што јави дописникот на МИА од Софија, бугарското Министерство за надворешни работи соопшти дека Захариева денеска на негово барање го примила министерот Османи, „кој патуваше транзитно низ Бугарија“.

Според бугарското МНР, Захариева на средбата ја потврдила принципиелната поддршка на Софија за европската интеграција на Северна Македонија, со исполнување на соодветни услови.

„Бугарската страна посочи дека според Договорот од 2017 година, на идниот состанок на Заедничката меѓувладина комисија треба да се направи целосен преглед на спроведувањето на Договорот“, се додава во соопштението.

Црногорскиот претседател отповика неколку амбасадори

Црногорскиот претседател Мило Ѓукановиќ

Црногорскиот претседател Мило Ѓукановиќ издаде декрет за отповикување на неколку амбасадори на резидентна и нерезидентна основа, вклучувајќи го и амбасадорот во Белград Тарзан Милошевиќ.

Иницијативата за повлекување ја покрена Владата.

Како што соопшти неговиот Кабинет, Ѓукановиќ ги отповикал амбасадорите на резидентна основа во Босна и Херцеговина, Србија, Италија, Кина, Германија, Полска, Светата Столица, Суверениот Малтешки Ред и Обединетите Арапски Емирати.

Тој исто така ги отповика амбасадорите на нерезидентна основа во Бахреин, Естонија, Индонезија, Кувајт, Летонија, Литванија, Малта, Република Кореја, Сан Марино и Саудиска Арабија.

Ѓукановиќ ги повика граѓаните врз оваа иницијатива на Владата за повлекување на амбасадорите да проценат дали новото мнозинство се фокусира на создавање професионална дипломатска служба или демонстрира моќ по изборите.

„Според мене, станува збор за реваншизам со кој новата Влада го покажува своето вистинско политичко лице, и на крајот одговорноста кон државата, изјави црногорскиот претседател.

РСЕ реагира на рускиот закон за казнување „странски агенти“

Претседателот на РСЕ, Џејми Флај,

Раководството на Радио Слободна Европа(РСЕ) реагира откако денеска рускиот претседател Владимир Путин ги потпиша законите со кои се изрекуваат казни за кршење на контроверзниот закон за „странски агенти“.

Измените на Законот за „странски агенти“ е насочени кон медиуми финансирани од странство, вклучително и Рускиот сервис на РСЕ, уште шест други сервиси на РСЕ на руски јазик, како и Current time, телевизиска мрежа на руски јазик, управувана од РСЕ / РЛ во соработка со Гласот на Америка.

„РСЕ нема да биде спречено независно да известува за нашата руска публика“, рече претседателот на РСЕ, Џејми Флај, во денешната изјава.

Според законските измени потпишани од Путин на 24 февруари, објавувањето информации за таканаречените „странски агенти“ и нивните материјали без назначување на нивниот статус може да резултира со казни до 2.500 рубљи (34 УСД) за физички лица и до 500.000 рубљи (6.720 УСД) ) за правни лица.

Новиот закон наметнува и административна одговорност за објавување на такви информации во масовните медиуми и се однесува и на правните лица на „странски агенти“ и на физички лица и на граѓански здруженија на „странски агенти“.

Руската владина Агенција за надзор на медиуми Роскомнадзор поднесе стотици жалби за веб-страниците на РСЕ. А откако ќе поминат низ судскиот систем вкупните казни што може да се наплатат ќе достигнат речиси еден милион долари.


Според РСЕ казните се државно спонзорирана кампања за принуда и заплашување, додека американскиот Стејт департмент ги опиша како „неподносливи“. Хјуман рајтс воч го опиша законот за „странски агенти“ како „ограничувачки“ и закон што има за цел „да ги демонизира независните групи“.

„Кремаљ цели кон РСЕ заради реакцијата на публиката за нашата работа и интересот за нашето известување за неодамнешните политички настани во Русија. Рускиот народ ќе биде крајната жртва на законите, како овој, што користат тактики на заплашување со кои се обидуваат да ги замолчат гласовите и да ја намалат различноста на медиумите “, додаде Флај.

Министерот Османи пристигна во Софија

Министрите Бујар Османи и Екатерина Захариева, архивска фотографија.

Министерот за надворешни работи Бујар Османи попладнево пристигна во Софија, јави дописникот на МИА. Според дипломатски извори на МИА во Софија, македонската делегација предводена од Османи веднаш по пристигнувањето се упатила на средба со бугарската вицепремиерка и министерка за надворешни работи Екатерина Захариева во владината резиденција во Бојана.

Бугарската национална телевизија (БНТ) јави дека се очекува централна тема на разговорите да биде Акцискиот план меѓу двете земји.

Владиниот портпарол Душко Арсовски на денешната прес-конференција, исто така, информира дека се очекува централна точка на разговорите меѓу Османи и Захариева да биде Акцискиот план и дека повеќе информации за договореното ќе има по враќањето на министерот од Софија.

Акциски план, според премиерот Зоран Заев, е добар и за двете страни и треба да оди во полза на разговорите и добрососедските односи. Сепак, неговата целосна содржина до сега не е јавно објавена.

Села и Гаши бараат судски тимови од ЕУ за граѓаните повторно да веруваат во правда

Лидерите на Алтернатива и Алијанса за Албанците, Африм Гаши и Зијадин Села, архивска фотографија.

Претседателот на Алијансата за Албанците, Зијадин Села на денешната прес-конференција ја повика ЕУ и членките на ЕУ, како Германија, Франција и Холандија, ургентно да донесат тим на судии и обвинители кои ќе ги отвораат уште еднаш „сите монтирани политички процеси“, бидејќи, како што рече граѓаните мораат да почнат да веруваат во институциите кои делат правда.

„Да се отворат сите монтирани политички случаи, почнувајќи од „Монструм“, „Алфа“, па се до „27 Април“. Но, и да се отворат сите предмети од осамостојувањето на Република Северна Македонија за кои има политичка амнестија, за сите корумпирани политичари да одговараат и да завршат таму каде што треба. Тоа е единствен начин како ние треба да почнеме да градиме правна држава“, рече Села.

Тој изјави дека премиерот Зоран Заев тврдел оти „невини луѓе лежат во затвор во врска со Монструм“ и дека вистината за „Монструм“ е многу болна.

Претседателот на Алтернатива, Африм Гаши, на истата прес-конференција, оцени дека има три причини зошто „Монструм“и сите други, како што рече, „монтирани процеси“ потфрлуваат и оставаат голема дамка и голем прашалник зошто ова ни се случува.

„Првата причина е затоа што овој процес во самиот почеток беше крајно политизиран. Целиот процес траеше со отсуство на транспарентност. И третата причина е затоа што целосно е изгубена довербата во судот и во одлуката“, рече Гаши.

Алијансата за Албанците и Алтернатива дека вчера поднеле иницијатива за интерпелација за министерот за внатрешни работи Оливер Спасовски, оценувајќи дека последните случувања со Сашо Мијалков претставуваат театар.

Иран повторува дека САД треба да го направат првиот чекор кон нуклеарниот договор

САД треба да го направат првиот чекор кон спасување на нуклеарниот договор од 2015 година меѓу Техеран и шесте светски сили, рече иранскиот амбасадор во Женева на денешната Конференција за разоружување поддржана од ОН која се одржа во Женева.

Амбасадорот Есмаил Багеи Хаманех ова го кажа еден ден откако Иран почна да ги ограничува меѓународните инспекции врз своите нуклеарни постројки во обид да изврши притисок врз САД и европските земји за укинување на економските санкции и враќање кон договорот.

„Обврска на страната што прекршува е да се врати, да почне одново и да ги надомести штетите, како и да даде уверување дека нема да се повлече повторно“, рече тој, повторувајќи ја позицијата на Техеран.

Администрацијата на поранешниот американски претседател Доналд Трамп во 2018 година ги повлече САД од договорот, кој предвидуваше ограничување на иранската нуклеарна програма во замена за укинување на меѓународните санкции, по што Трамп воведе жестоки санкции против Техеран, кои силно влијаеа на иранската економија.

Новата администрација на претседателот Џо Бајден се обидува да ја смени таа одлука, но Иран бара Вашингтон прво да ги укине санкциите. Кина, која е потписничка на договорот, соопшти дека укинувањето на американските санкции е клучно за излегување од ќор-сокакот.

Пекинг, кој одржува блиски економски односи со Техеран, долго време се противи на санкциите. Кина, заедно со другите потписници на договорот, Велика Британија, Франција, Русија и Германија, работи на одржување на договорот во живот, откако Трамп се повлече во 2018 година.

Протест „свадба“ пред Влада

Импровизирана „свадба“ пред Владата на протестот на угостителите за владина помош поради економските последици од ковид пандемијата

Угостителите поставија маси и столчиња пред Владата во знак на протест оти веќе цела година не може да организираат поголеми свеченост, поради мерките за спречување на ширење на ковид-19. Поставија и бина за бенд, цветни аранжмани и средства за дезинфекција на масите.

Прв „гостин“ им беше вицепремиерот за економски прашања Фатмир Битиќи за да разговараат за загубите на угостителите кои имаат ресторани за свадби и другите од индустријата за организирање настани. Од оваа индустријата претходните денови протестираа на крстосниците во Автокоманда на влезот во Скопје, а денеска протестот го префрлија пред Влада.

Тие неодамна доставија предлози за организирање настани со нови здравствени протоколи, но владата не ги прифати. Угостителите велат дека веќе не можат да плаќаат вработени и да ги држат на работа, а немаат приходи, а, како што велат, веќе ни банките не им даваат кредити. Во разговорот со Битиќи тие посочија дека помошта што ја добиваат од државата не е доволна и дека бараат да им се дозволи работа по протоколи на а-ла-карт рестораните, бидејќи сметаат дека објектите се доволно безбедни за да почнат со работа.

Битиќи вели дека здравјето на луѓето е побитно од последиците кои може да ги имаат угостителите, оти како што вели загубите заедно ќе ги надокнаделе.

Вицепремиерот за економски прашања Битиќи претходно денеска рече дека Комисијата за спречување заразни болести е таа која носи одлуки за рестрикциите. Во последните денови расте бројот на заразени со ковид-19. Денеска се регистрирани нови 725 случаи на заразени со коронавирус.

Нови 725 случаи на ковид-19

Регистрирани се 725 нови случаи на ковид-19 од направени 3.342 тестирања, информираше Министерството за здравство, согласно податоците од Институтот за јавно здравје. Во Скопје се регистрирани 274, нови случаи, Прилеп – 79, Кавадарци – 55, Тетово – 39, Куманово – 34, Охрид – 29, Гевгелија – 26, Неготино – 25, Велес -24, Штип -20, Гостивар -18, Битола -16, Струмица – 13, Кочани – 12, Струга и Крива Паланка – по 11, Богданци – 6, Крушево – 5, Ресен – 4, Свети Николе, Делчево, Пробиштип, Виница, Валандово, Кратово и Демир Капија – по 3, Кичево – 2, Берово – 1.

Регистрирани се 215 оздравени пациенти. Пријавени се вкупно 13 починати лица. Починати се по 4 пациенти од Скопје (85г, 78г, 72г, 64г) и Куманово (70г, 63г, 57г, 50г) и по еден пациент од Тетово (66г), Прилеп (72г), Битола (71г), Велес (75г) и Пробиштип (83г). Од пријавените смртни случаи сите се починати во болнички услови.

Вкупната бројка на ковид-дијагностицирани лица во нашата земја од почетокот на епидемијата изнесува 100.632, бројката на оздравени пациенти е 90.311, на починати е 3.098, а бројот на активни случаи изнесува 7.223.


Министерот за здравство Венко Филипче изјави дека засега индиции дека треба да се препорачаат дополнителни анти-ковид мерки, иако, како што вели, не се исклучува можноста од некаква форма на дополнителни мерки на локално ниво или, пак, на територија на цела држава, но за тоа ќе се разговара во периодот што следи. Тој вели дека со членовите на Комисијата за заразни болести се прават анализи на што се должи зголемување на бројот на позитивни од вкупниот број на направени тестови во последните денови. Се анализира дали тоа се должи на британскиот сој на вирусот или на генерално непочитување на мерките во делот на собирите.

Владата денеска ќе одобри набавка на 100.000 руски вакцини

Венко Филипче

Министерот за здравство, Венко Филипче, денеска информираше дека Владата го добила драфт договорот за набавка на најавените 100.000 вакцини од Русија, за што веќе во текот на денот ќе има затворена седница на која Владата треба истиот да го усвои.

„Се уште траат преговорите со Фајзер во однос на некои технички детали, за што секојдневно се слушаме со претставничката на претставништвото на Фајзер во Белград и го очекуваме драфтот на договорот. Во делот на кинеските вакцини постои интензивна комуникација и уште една размена на писма и преку МНР, така што очекувам дека за кратко време ќе го добиеме и дефинитивниот датум во кој што ќе стигнат и оваа количина на вакцини. По потпишувањето на анекси со Астра Зенека на барање на компанијата преку КОВАКС механизмот најавите се дека 20-30.000 вакцини треба да пристигнат до почетокот на март. И во делот на руските вакцини, како што најави премиерот Заев ќе набавиме количина од 100.000 вакцини, за што веќе го добивме драфт договорот, за што веќе во текот на денот ќе има затворена седница на која Владата треба да го усвои“, одговори Филипче на новинарско прашање до каде е набавката на ковид вакцини преку повеќе системи и од повеќе производители.

Тој денеска на граничниот премин Табановце, од неговиот српски колега Златибор Лончар, ја прими втората пратка ковид вакцини од Фајзер, отстапени од Србија. Тој изјави дека со вакцините од Србија ќе се вакцинираат сите здравствени работници од приоритетната група за имунизација против ковид-19.

Согласно најавата од страна на компанијата Фајзер, Филипче потврди дека првата пратка требаше да стигне во фервуари, но дека укажувањето сега од последните разговори е дека доцнењето е заради тоа што вкупното производство на компанијата е намалено со цел да ги надгради капацитетите за во текот на 2021 година.

На новинарско прашање за изјавата на екс-шефот на УБК, Сашо Мијалков, дека имал сипмтоми на ковид-19 па не знаел дека полицијата го бара, Филипче рече дека немаат информации дали Мијалков контактирал со епидемиолог.

Утре нов ЕУ самит за ковид-19

Илустрација - Претседателката на Европската комисија, Урсула фон дер Лајен со заштитна маска

Шефовите на држави и влади на Европската унија (ЕУ), утре и задутре, ќе одржат нов самит за состојбата со коронавирусот во Европа, ќе се разговара меѓу другото за вакцинацијата и за сертификатите за Ковид-19 за патување, јави МИА од Брисел. Лидерите на ЕУ се состануваат секој месец речиси откако започна кризата со Ковид-19 за да се обидат да воведат подобра меѓусебна координација во однос на слободата на движење, вакцинацијата и подготовките за олеснување на рестрикциите на пролет и лето.

Состанокот ќе биде преку видеоконференција. В четврток, лидерите ќе разговараат за епидемиолошката состојба во нивните земји, и ќе дебатираат за мерките кои ги донеле. Европската Комисија веќе изрази незадоволство со некои од мерките во земјите членки како затворањето на границите, и дипломатите очекуваат остри дебати и на утрешниот самит на оваа тема.

На крајот на состанокот се очекува шефовите на држави и влади да испратат ново предупредување до фармацевтските компании за почитување на преземените обврски за испорака на вакцини до земјите членки на ЕУ и барање да се забрза производството. Ќе стане збор и за солидарноста со третите земји.

АИ нема веќе да го нарекува Навални „затвореник на совеста“

Алексеј Навални

Амнести Интернешнл (АИ) го повлече неодамна усвоениот статус за рускиот опозициски политичар Алексеј Навални – „затвореник на совеста“ поради неговото наводно застапување во минатото на насилство и дискриминација и коментари кои вклучуваа говор на омраза, но дека и натаму ќе продолжи да се бори за негово ослободување.

Заменик директорот на Амнести Интернешнл за Европа и Централна Азија, Денис Кривошев, за Радио Слободна Европа изјави дека организацијата и натаму ќе продолжи да се бори за негово ослободување.

„Амнести Интернешнл донесе интерна одлука да престане да го нарекува Алексеј Навални затвореник на совеста заради коментарите што ги даваше во минатото“, рече Кривошев, додавајќи дека некои од неговите коментари доаѓаат и до границата да заговараат омраза, што е во спротивност со дефиницијата за затвореници на совеста на Амнести интернешенл.

Кривошев додаде дека Навални јавно не се откажал од своите коментари од минатото, но додаде дека и не давал слични изјави во последните години.

Влада: Пописот дефинитивно ќе се спроведе во април

Илустрација

Пописот дефинитивно ќе се спроведе во месец април. Тој е неопходен на државата и секој граѓанин треба да придонесе да се спроведе оваа значајна статистика операција која ќе даде податоци важни за проектирање стратешки планови за натамошен развој на државата, изјави денеска на прес-конференција портпаролот на Владата Душко Арсовски.

Според него, методологијата е дефинирана, а сите подготовки се во тек и од први март почнува попишувањето на нерезидентното население.

Дека попис ќе има и дека првата фаза почнува за една недела, денеска потврди и министерот за правда, Бојан Марчиќ и побара „да престанат сите деструктивни обиди за саботирање на пописот“.

„За помалку од една недела започнува првата фаза од попишувањето на населението. Од Државниот завод за статистика утрово не информираа дека подготовките за пописот одат во најдобар ред. За помалку од една недела започнува првата фаза од попишувањето на населението. Тоа што е многу важно е дека „Евростат“ и директно потврди дека Законот за попис и методологијата се во согласност со ЕУ законодавството, односно највисоките стандарди за спроведување на ваква статистичка операција“, напиша на Фејсбук министерот Маричиќ.

Партиски функционери на ВМРО-ДПМНЕ, пак, веќе со недели тврдат дека пописот не е во согласност со стандардите на Евростат. Тоа последно го повтори партискиот потпретседател Александар Николоски, кој на еден од пунктовите на кој се собираат граѓанските потписи против пописот рече дека прогнозира дека ќе добијат над 100 000 потписи.

Пристигна втората пратка вакцини отстапени од Србија

Втората пратка ковид вакцини од Фајзер, од пакетот од 8000 вакцини отстапени од Србија, пристигна во Македонија (Табановце, 24 февруари 2021)

Министерот за здравство, Венко Филипче, денеска на граничниот премин „Табановце“ ја прими втората пратка од вкупно 8-те илјади дози вакцини на Фајзер, отстапени од Србија по набавна цена. Пратката со автомобил до Табановце ја донесе делегација предводена од српскиот министер за здравство, Златибор Лончар.

„Денеска донесовме 3.510 дози на вакцини за граѓаните на Северна Македонија што заедно со првата пратка изнесува вкупно 8.190 дози. Исклучително ми е драго што сме во можност да им помогнеме на нашите соседи и пријатели. Ова е поздрав од сите граѓани на Србија од
претседателот Вучиќ“, рече српскиот министер Лончар.

Неговиот македоски колега, Филипче, изјави дека „оваа количина вакцини ќе биде доволна да се вакцинираат сите здравствени работници во нашата земја кои се во приоритетната група за имунизација, а тоа се здравствените работници кои од почетокот на кризата работат со пациенти заболени од Ковид“.

Првата пратка од 4680 дози вакцини Фајзер, отстапени од Србија, пристигна во Македонија на 14 февруари и со таа пратка кај нас официјално почна процесот на имунизација против Ковид-19.

Според досегашните најави од Владата, до крајот на месецов се очекува да пристигнат 200 илјади ковид вакцини од кинескиот производител Синофарм, а пријавувањето за вакцини преку сајтот vakcinacija.mk се одвива веќе неколку недели. Во меѓувреме се чекаат и договорот со Фајзер и вакцините преку системот Ковакс.

Галовеј: Почитување на правото, повеќе доверба на граѓаните

Рејчел Галовеј, амбасадорка на Обединетото кралство во Македонија

Мислам дека треба да се почитува правото и треба да се има поголема доверба на граѓаните во институциите во земјата и затоа мислам дека е важно да се обрне посебно внимание на решавање на овој тип на случаи за граѓаните да стекнат поголема доверба во институциите.

Ова денеска го изјави британската амбасадорка во Македонија, Рејчел Галовеј, одговарајќи на новинарско прашање „како го коментира случајот со Сашо Мијалков - дали е тоа слабост на институциите или како што изјави премиерот Зоран Заев дека системот покажал способност за решавање и на вакви случаи?“.

„Ќе продолжиме да работиме да видат граѓаните дека правдата треба да излезе на виделина и сите овие случаи да бидат решени. Мислам дека реформите коишто се направени и оние закони коишто се донесени сега се во добра состојба. Меѓутоа, треба да се види како ќе бидат тие имплементирани“, изјави Галовеј при денешната посета на Штип.

Мијалков, поранешниот шеф на Управата за безбедност и контраразузнавање (УБК), од вчера е во домашен притвор, откако по два дена недостапност за органите, сам се пријави во Обвинителството. Тој во притвор ја чека пресудата за случајот Таргет-Тврдина, односно за незаконското прислушување на илјадници граѓани кога беше на чело на УБК.

Путин го потпиша законот за казнување „странски агенти“

Илустрација

Рускиот претседател Владимир Путин ги потпиша законите со кои се изрекуваат казни за кршење на контроверзниот закон за „странски агенти“, како и други закони поврзани со протести, како што се финансирање митинзи и непочитување на законот. Според законите потпишани од Путин на 24 февруари, објавувањето информации за таканаречените „странски агенти“ и нивните материјали без назначување на нивниот статус може да резултира со казни до 2.500 рубљи (34 УСД) за физички лица и до 500.000 рубљи (6.720 УСД) ) за правни лица.

Новиот закон наметнува и административна одговорност за објавување на такви информации во масовните медиуми и се однесува и на правните лица на „странски агенти“ и на физички лица и на граѓански здруженија на „странски агенти“.

Руското законодавство за „странски агенти“ беше усвоено во 2012 година и беше модифицирано неколку пати. Потребна е регистрација на невладини организации кои добиваат странска помош и дека владата смета дека се занимава со политички активности, да се идентификува како „странски агенти“ и да биде предмет на ревизија. Последователните измени и дополнувања на законот беа насочени кон медиуми финансирани од странство, вклучително и рускиот сервис на Радио Слободна Европа (РСЕ), уште шест нови руски јазични сервиси РСЕ / РЛ и Current time, телевизиска мрежа на руски јазик, управувана од РСЕ / РЛ во соработка со Гласот на Америка.

Другите закони потпишани од Путин на 24 февруари предвидуваат казни за лица прогласени за виновни за незаконско финансирање собири до 15.000 рубљи (200 американски долари), додека на службените лица и организациите ќе им биде наредено да плаќаат до 30.000 рубљи (400 американски долари) за ваквите постапки. 100.000 рубљи (1.345 американски долари).

Сведоци на Јанакиески за „27 април“: Партијата одлучи да ги осуди насилствата

Архивска фотографија - Обвинетите Миле Јанакиески, Спиро Ристовски, Трајко Вељаноски и Владимир Атанасовски на судење за „27 април“

Со сослушување на сведоци на одбраната на поранешниот министер за транспорт и врски, Миле Јанакиески , денеска во Кривичниот суд продолжи судењето за „Организаторите на случувањата во Собранието на 27 април 2017 година“.

Сведокот Оливер Деркоски пред Судот изјави дека во периодот 2016-2017 година немал функција, а бил член на Централен комитет на ВМРО-ДПМНЕ, но дека, иако бил член на повеќе вибер групи, не членувал во група поврзана со случувањата пред Собранието. Тој тврдеше дека немало никаква комуникација во врска со протестите на „За заедничка Македонија" со Миле Јанакиески и Спиро Ристовски.

Сведокот Владимир Неловски рече дека на 27 април 2017 година, по завршување на работното време бил о ресторан со Диме Спасов и Владимир Стојковски, па откако виделе што се случува, отишле пред Собранието. После тоа, бидејќи требало да присуствува на седница на Извршен комитет на ВМРО-ДПМНЕ, отишол во штаббот каде се сретнал со Спиро Ристовски, Миле Јанакиески, Зоран Ставревски и повеќе тогашни функционери на партијата. На таа седница, како што сведочеше Неловски, „бил донесен заклучок дека насилствата треба да се осудат и дека најголем губитник од случувањата е партијата ВМРО-ДПМНЕ“.

Обвинети во овој предмет се поранешниот претседател на Собранието, Трајко Вељаноски, ексминистрите за транспорт и врски и за образование, Миле Јанакиевски и Спиро Ристовски, како и поранешниот директор на УБК, Владимир Атанасовски. Тие се товарат дека сториле кривично дело „терористичко загрозување на уставниот поредок и безбедноста".

Почна поделбата на ковид вакцините преку Ковакс, прва доби Гана

Фотографија од доставувањето на ковид-19 вакцините во Акра, главниот град на Гана

Африканската држава Гана стана првата земја која доби вакцини против ковид-19 преку програмата на Светската здравствена организација (СЗО) - Ковакс - која треба да обезбеди рамномерна распределба на вакцини меѓу државите. Денска во главниот град на Гана, Акра, пристигнале вкупно 600.000 дози од вакцината развиена од Оксфорд и „АстраЗенека“.

„Ова е исклучителен момент. Пристигнувањето на вакцините против ковид-19 во Гана е клучно за да се стави крај на пандемијата“, се вели во заедничкото соопштение на СЗО и УНИЦЕФ, кои додаваат дека пратката е дел од првиот бран испораки на вакцини во неколку земји со ниски и среднониски примања.

Оваа иницијатива беше воспоставена за да се спречи посиромашните земји да не останат без вакцини. Преку неа, вакцини треба да стигнат во 190 држави, а главната цел е 92 сиромашни земји да добијат вакцини во исто време кога и 98 побогати нации. Ковакс досега собра шест милијарди долари, а за да се исполнат целите за оваа година, потребни се уште најмалку две милијарди. До крајот на годината, преку Ковакс, треба да бидат поделени две милијарди дози низ цел свет, вклучувајќи ја и Македонија.

И покрај пандемијата, стотици албански државјани секојдневно на пазар во Дебар

Граничен премин „Блато“ на македонско-албанската граница

И покрај ковид пандемијата голем број албански државјани секојдневно ја поминуваат македонско-албанската граница преку премините Блато и Џепчиште-Требиште и престојуваат во Дебар каде доаѓаат во набавка на голем број основни артикли и гориво, бидејќи во Албанија цените на тие производи се повисоки.

Без потреба од негативни ПЦР тестови, најчести гости во Дебар се жителите на албанските погранични градови и села. Само во јануари фрекфенцијата на патници била речиси 40 илјади.

Портпаролката на Граничниот Регионалниот Центар – Запад, со седиште во Охрид , Мерлина Ислами, за Радио Слободна Европа изјави дека „во јануари оваа година, на граничниот премин Блато, на македонско–албанската граница кај Дебар, фрекфенцијата на патници била 39.865, од кои македонски државијани биле 8.473, а странски државијани 31.392. Од нив, во Македонија влегле 20.720 лица од Албанија, а од Македонија во Албанија - 19.150“.

Според портпаролката Ислами, во јануари фрекфенцијата на преминот Џепчиште-Требиште изнесувала 3.195 патници, од кои 230 македонски државијани и 2.965 албански државијани.

Кенан Мимидиноски

Платформа за родова еднаквост до ОЈО: Да се расчисти „Јавна соба“

Протест на „Платформа за родова еднаквост“ пред Основното јавно обвинителство за случајот „Јавна соба“

Активистите од Платформа родова еднаквост, денеска, му пренесоа на Основното јавно обвинителство (ОЈО) десетина нивни барања во врска со случајот „Јавна соба“ и како што рекоа на прес-конференцијата, потребен е кривичен прогон на сторителите од случајот „Јавна соба“ и за полнолетните жртви во случајот, а не само за делото „производство и дистрибуција на детска порнографија“.

„Обвинение против сторителите на делата „злоупотреба на лични податоци“, „посредување во вршење проституција“, „загрозување на безбедноста“ или „ширење на расистички и ксенофобичен материјал по пат на компјутерски систем“, зависно од околностите на случајот, навремено и квалитетно спроведување на предистражни и истражни постапки во случаите врз насилство на жени, засилена котрола врз работата на обвинителите“, ги објавија своите барања активистите.

„На ваков начин, се праќа порака дека насилството врз жените не е казниво, насилниците се охрабруваат да продолжат со своето однесување, а жртвите остануваат заплашени, засрамени и неми. Иако „Јавна соба“ е случај кој го привлече вниманието на целата јавност, сепак, после една година случајот сѐ уште нема завршница, а сторителите се гонат само за кривичното дело „производство и дистрибуција на детска порнографија“, изјави Јана Коцевска од Платформата за родова еднаквост.

Тие реагираат дека и по една година нема обвинение за насилниците, а тоа, како што рекоа, дополнително ги охрабрува да продолжат со своето однесување. Тие се надеваат дека надлежните ќе ги прифатат нивните барања најдоца до 8ми март, во спротивно, најавија деќа ќе ги радикализираат своите чекори.

Арсовски: Османи појде на средба со Захариева, тема Акцискиот план

Владиниот портпарол Душко Арсовски

Министерот за надворешни работи, Бујар Османи, е на пат за Бугарија. Таму ќе има средба со неговата колешка Екатерина Захариева, а централна точка на преговорите ќе биде Акцискиот план, информираше денес портпаролот на Владата, Душко Арсовски.

Повеќе детали, како што рече Арсовски, ќе има кога Османи ќе се врати од оваа посета.

Средбата на шефовите на дипломатиите на Македонија и Бугарија, Османи и Захариева, беше најавена пред десетина дена, кога од македонската Влада информираа дека е при крај и т.н. Акциски план, кој, како што рече премиерот Зоран Заев, е добар и за двете страни и треба да оди во полза на разговорите и добрососедските односи. Сепак, неговата целосна содржина до сега не е јавно објавена.

Студентските домови ќе се прават енергетски ефикасни

Реконструкциите ќе почнат од студентски дом „Стив Наумов“ во скопска Автокоманда

Владата на вчерашната седница ја усвои информацијата за проектот енергетска рехабилитација на студентските домови, информираа на денешната прес конференција портпаролите на Владата Душко Арсковски и Муамет Хоџа.

Според владината одлука, се работи за реконструкција на студентските домови кои ќе станат енергетски ефикасни и ќе овозможат студентски комфор и подобри услови за сите студенти.

„Со програмата предвидено е да се стартува со студентскиот дом Стив Наумов во Скопје, а освен во Скопје ќе бидат опфатени и студентските домови во Прилеп, Битола, Охрид и Штип“, изјави Хоџа на денешната прес-конференција.

Спасовски: Ако Мијалков не се предадеше, за неколку часа ќе беше сосема поинаку

Министерот за внатрешни работи, Оливер Спасовски

Обвинетиот во Таргет-Тврдина, Сашо Мијалков, цело време бил во Скопје и во моментов се води целосна истрага, информираше утрово министерот за внатрешни работи, Оливер Спасовски, по вчерашното појавување и притворање на поранешниот директор на Управата за безбедност и контраразузнавање (УБК).

Спасовски, во гостување во „Утрински брифинг“ изјави дека работеле со дежурните обвинители од Основното јавно обвинителство, а од вчера е назначен јавен обвинител кој што директно ќе раководи со овој случај.

„Ако не се предадеше, за неколку часа ќе беше сосема поинаку“, изјави Спасовски и нагласи дека немало никакви договори со Мијалков и дека „пресудата во петок ќе ги расчистела сите дилеми“.

По два дена „бегство“, Мијалков вчера сам се пријави во Обвинителството, каде му беше дадено решението за домашен притвор. Тој изјави дека бил болен, не знаел што се случува и се извини на „сите за непријатностите што ги предизвикал“.

Поранешниот шеф на УБК, Мијалков, е обвинет за незаконското прислушување на илјадници граѓани, случај познат како Таргет-Тврдина, за кој пресудата треба да биде изречена во петок. Минатата недела, надлежните служби не можеле да го најдат за да му врачат решение за притвор, по што беше организирана потрага по него и беше распишана меѓународна потерница. За власта, појавувањето на Мијалков е резултат на координирана акција и обезбедување на правдата, а за опозицијата, како што рече нејзиниот лидер Христијан Мицкоски, е „циркус со скапа влезница“.

САД воведоа санкции против воените претставници на Мјанмар

Католички приврзаници на Аунг Сан Су Ќи за време на протестот против воениот удар пред кинеската амбасада во Јангон, Мјанмар, 21 февруари 2021 година.

Министерството за финансии на САД воведе санкции против двајца воени претставници на Мјанмар, како одговор на убиството на мирни демонстранти во таа земја. Во соопштението од Секретаријатот за финансии се повикува војската на Мјанмар повторно да воспостави демократски избрана влада во земјата или да се соочи со понатамошни активности.

ОН повикаа да се стави крај на репресијата во Мјанмар

„Соединетите држави ќе продолжат да работат со партнери од целиот регион и од светот за да извршат притисок врз бурманската војска и полицијата да запрат какво било насилство врз мирни демонстранти, поддржувајќи ја обновата на демократијата и владеењето на правото во Бурма, повикувајќи на итно ослободување на политичките затвореници, вклучително и премиерот; Аунг Сан Су Ќи и претседателот Вин Минта“, се вели во соопштението. Претходно овој месец, Министерството за финансии воведе санкции против 10 поранешни воени службеници.

Лондон, Париз и Берлин го осудија иранското ограничување на нуклеарната контрола

Натанц, нуклеарна постројка во јужен Иран

Лондон, Париз и Берлин изразија „длабоко жалење“ за „опасното“ ограничување на инспекциите на нуклеарните постројки во Иран. „Ние, министрите за надворешни работи на Франција, Германија и Велика Британија, изразуваме длабоко жалење што Иран започна да ја суспендира мерката за транспарентност и протоколот на меѓународниот договор за иранската нуклеарна програма“, се вели во заедничкото соопштение. Од вчера, Иран формално ги ограничи контролите на своите нуклеарни постројки на агенцијата на ОН, објави иранската државна телевизија. Со ограничување на пристапот до инспекторите на Меѓународната агенција за атомска енергија Техеран сака да изврши притисок врз европските земји и САД да ги укинат санкциите и да го оживеат меѓународниот нуклеарен договор од 2015 година.

МААЕ: Иран почна да произведува метал ураниум за реактори

Во 2018 година, со одлука на поранешниот претседател Доналд Трамп, САД еднострано се откажаа од меѓународниот нуклеарен договор, со кој Иран се обврза да го ограничи збогатувањето на ураниум во замена за укинување на економските санкции. Американските власти повторно воведоа санкции кон Иран, додека по повлекувањето на Соединетите држави, Иран започна да ги занемарува своите обврски од тој договор. Договорот за иранската нуклеарна програма, официјално наречен Заеднички сеопфатен план за акција беше потпишан во јули 2015 година во Виена од Иран и „Групата 5 плус 1“, која се состоеше од пет постојани членки на Советот за безбедност на ООН (Кина, Франција, Русија, Британија, САД) и Германија, како потписничка во име на ЕУ.

Германскиот кабинет ќе ја продолжи мисијата во Авганистан до 2022 година

Во Авганистан има околу 1.300 германски војници

Кабинетот во Берлин денеска се очекува да даде зелено светло за продолжување на воената мисија на Германија во Авганистан до 31 јануари 2022 година. Германската министерка за одбрана Анегрет Крамп-Каренбауер изјави дека тековниот мандат за германската операција со 1.300 војници истекува на крајот на март, додека новата американска влада го разгледува договорот со талибанците од 2020 година, според кој странските трупи треба да се повлечат до 1 мај.

Обновени мировните преговори на талибанците и авганистанската влада

Предвременото повлекување на трупите на НАТО може да ги загрози мировните разговори меѓу авганистанската влада и талибанците, предупреди Крамп-Каренбауер, додавајќи дека трупите на НАТО треба да се подготват за можни насилства на талибанците.

Вчитај повеќе

XS
SM
MD
LG