Достапни линкови

Брнс до граѓаните - Вирусот може да се запре само со заедничка работа


Американската амбасадорка во Скопје, Кејт Мери Брнс

Амбасадорката на САД во Македонија, Кејт Мари Брнс во отворено писмо до граѓаните порача дека само со заедничка работа може да се надеваме на успешно запирање на вирусот и евентуално пронаоѓање на вакцина. А за тоа да се оствари таа вели дека треба да се надминат националните граници, партиските и други поделби и да има соработка меѓу приватниот, невладиниот и јавниот сектор.

Во писмото, амбасадорката Брнс наведува дека ова е нова ситуација за сите нас и оддава признание за работата на Владата и за начинот на кој се справува со кризата. Без разлика на предизвиците што ни ги донесоа изминатите денови, амбасадорката посочува дека постојано гледа знаци на надеж и добрина.

„Ме охрабруваат секојдневните изрази на емпатија насекаде околу нас: на соседот кој им помага на постарите; на итните служби и на здравствените работници кои со сочуство се грижат за заболените; на продавачите; на возачите на камиони, на аптекарите и на многу други, кои продолжуваат да работат за нашите животи да продолжат колку што е можно понормално во овие неизвесни времиња; и многу други примери на човечка хуманост“, пишува Брнс.

САД и даваат поддршка на Македонија и во справувањето со оваа криза. Амбасадорката вели дека САД ќе останат партнер на земјата и по завршувањето на кризата за работите да се вратат во нормала.

„Уверена сум дека од ова искуство ќе излеземе посилни, нашето партнерство ќе биде подлабоко, и заедно ќе можеме да градиме нови можности за да помогнеме да ги реализирате вашите аспирации за силна, динамична и отпорна иднина, стои во отвореното писмо на американската амбасадорка Брнс.

XS
SM
MD
LG