Достапни линкови

Ќе се истресе ли Сваровски накитот од судските гаќи?


Војната меѓу обвинителката Вилма Русковска, која им се заканила на судиите дека ако ја пуштат поранешната специјална обвинителка Катица Јанева во домашен притвор „ќе ги истресе од гаќи“ и поплаките на судиите дека тоа е напад врз нивната независност предизвика жестоки реакции во јавноста. Многу реакции на социјалните мрежи предизвика и средбата меѓу лидерот на ВМРО-ДПМНЕ Христијан Мицкоски со бугарскиот премиер Бојко Борисов во Загреб.

Викторија сикрет, боксерки, килоти или ѕиври? Прашањето од какви гаќи ќе биде истресено судството се наметнува по заканата на обвинителката Вилма Русковска до судиите дека „ќе ги истресе од гаќи“ со финансиски истраги по пуштањето на поранешната специјална јавна обвинителка Катица Јанева од Шутка во домашен притвор.

По заканите од Русковска, судиите го стегнаа учкурот и се пожалија дека ова претставува „директен притисок врз независноста и самостојноста при одлучувањето и правораздавањето“.

Граѓаните на социјалните мрежи прашуваат дали при тресењето може да испадне Сваровски накитот. Во таков случај, сигурно нема да биде тресење од танга, туку од домаќински синдикални гаќи. Судството го доби прекарот Сваровски, по бомбите што ги објавуваше премиерот Зоран Заев во 2015 година, тогаш како лидер на опозицијата, каде што се слушаше како наводно се избираат подобни судии.

Оние, пак, што се изгореa на СЈО сега дуваат и на Вилма.

Дел од луѓето коментираат дека, ако почне, ќе има многу за тресење. Други, пак, се згрозени од речникот на обвинителката.

Трети, пак, зајадливо прашуваат од каде знае обвинителката дали судиите носат гаќи.

Многу реакции на социјалните мрежи предизвика и средбата меѓу лидерот на ВМРО-ДПМНЕ Христијан Мицкоски со бугарскиот премиер Бојко Борисов. Тие се сретнаа во Загреб, каде што се одржа Конгрес на Европската народна партија.

Најголем дел од коментарите се дека Борисов го „истресол од гаќи“ Мицкоски.

  • 16x9 Image

    Срѓан Стојанчов

    Новинарската кариера ја започна како новинар во внатрешно-политичката рубрика на дневниот весник Шпиц во 2008 година. Роден е на 27.10.1981г. во Скопје. Од февруари 2009 работи како постојан дописник за Радио Слободна Европа од Скопје.

Трендинг е седмична рубрика на Радио Слободна Европа на македонски јазик, во која автентично ви пренесуваме дел од највпечатливите коментари на социјалните мрежи за одредена тема. Пренесените коментари се мислења или ставови на авторите на коментарите и не се дел од уредувачката политика на РСЕ.

Повеќе
XS
SM
MD
LG