Вести
Трамп го предлага Еспер за нов секретар за одбрана
Американскиот претседател Доналд Трамп соопшти дека го номинира Марк Еспер за секретар за одбрана.
Еспер ќе треба да ја преземе функцијата на 24 јуни по оставката на актуелниот шеф Патрик Шанахан кој го повлече своето име од оваа функција поради, како што рече, семејни причини.
Ако предлогот на Трамп го потврди Сенатот, Еспер ќе стане првиот постојан секретар за одбрана откако Џим Матис се повлече од оваа функција во почетокот на 2019 поради несогласувања околу надворешната политика.
Трамп соопшти дека планира да го номинира Дејвид Норквист, кој е дел од Пентагон, за функцијата заменик секретар.
види ги сите денешни вести
Македонец меѓу загинатите во пожарот во Кран-Монтана
Еден од 40-те жртви во пожарот во швајцарскиот луксузниот ски-центар Кран-Монтана во југозападна Швајцарија е Македонец. Македонската влада потврди дека е утврден идентитетот на Стивен Ивановски, кој се водеше како исчезнат во пожарот во Кран- Монтана.
Неговото тело е идентификувано врз основа на ДНК анализа.
„Има потврда од Берн, телото е идентификувано. За жал, станува збор за починато лице. Член на семејството потврдило согласно ДНК. Изразуваме длабоко жалење и сочувство“, велат од Владата.
Ивановски се водеше за исчезнат по пожарот во дискотеката во Кран Монтана, а неговото семејство преку социјалните мрежи бараше помош за негово пронаоѓање.
Во пожарот, според швајцарските медиуми, загинаа над 40 луѓе, а над 100 се повредени. Двајцата сопственици и менаџерите на ноќниот клуб во Кран-Монтана, во кој избувна пожар, се осомничени под кривична истрага поради сомнение за сторени кривични дела, вклучително и убиство од небрежност.
Првичните резултати од истрагата за пожарот на новогодишната ноќ укажуваат на тоа дека пената на таванот се запалила поради искри од „прскалки“ кои биле поставени на шишиња со пијалак. Пожарот се проширил за многу кратко време.
Сопствениците на барот, брачниот пар од Франција Жак и Џесика Морети, изјавија за медиумите дека се скршени од трагедијата и дека соработуваат со властите за расветлување на катастрофата.
И Македонија понуди помош за лекување на повредените во пожарот.
Отворена истрага против сопствениците и менаџерите на клубот во Кран-Монтана
Двајцата сопственици и менаџерите на ноќниот клуб во Кран-Монтана, во кој избувна пожар, се осомничени под кривична истрага поради сомнение за сторени кривични дела, вклучително и убиство од небрежност.
„Тие се обвинети за убиство од небрежност, предизвикување телесни повреди од небрежност и предизвикување пожар од небрежност“, соопшти полицијата на кантонот Вале, каде што се наоѓа Кран-Монтана.
Околу 40 лица загинаа, а стотина се повредени при пожарот кој избувна за време на новогодишната забава во преполн бар во луксузниот ски-центар Кран-Монтана во југозападна Швајцарија.
Првичните резултати од истрагата за пожарот на новогодишната ноќ укажуваат на тоа дека пената на таванот се запалила поради искри од „прскалки“ кои биле поставени на шишиња со пијалак. Пожарот се проширил за многу кратко време.
Сопствениците на барот, брачниот пар од Франција Жак и Џесика Морети, изјавија за медиумите дека се скршени од трагедијата и дека соработуваат со властите за расветлување на катастрофата.
Гутереш е „длабоко вознемирен“ од американските напади врз Венецуела
Генералниот секретар на ОН, Антонио Гутереш, е „длабоко вознемирен“ по нападите на Вашингтон врз Венецуела, изјави неговиот портпарол во саботата, велејќи дека тоа би можело да „претставува опасен преседан“.
Главниот секретар на ОН е „длабоко загрижен што правилата на меѓународното право не се почитувани“, соопшти портпаролот Стефан Дужарик.
Тој посочи дека Гутереш „ги повикува сите актери во Венецуела да се вклучат во инклузивен дијалог, со целосно почитување на човековите права и владеењето на правото“.
Претходно, американскиот претседател Доналд Трамп, објави на својот профил на социјалните мрежи Truth Social дека Соединетите Американски Држави извршиле „голем воен напад врз Венецуела“ и „го заробиле нејзиниот лидер, претседателот Николас Мадуро, и неговата сопруга“.
„Соединетите Американски Држави успешно извршија голем напад врз Венецуела и нејзиниот лидер, претседателот Николас Мадуро, кој беше заробен и изнесен од земјата заедно со неговата сопруга. Оваа операција беше спроведена во соработка со американските органи за спроведување на законот“, напиша тој.
Деталите за настаните сè уште се појавуваат, но американскиот сенатор Мајк Ли изјави дека американскиот државен секретар Марко Рубио го информирал оти Мадуро бил уапсен од американски сили за да му се суди по кривични обвиненија во Соединетите Американски Држави.
На почетокот на 3 јануари, експлозии го потресоа главниот град Каракас по месеци закани од претседателот Доналд Трамп кон венецуелскиот претседател Николас Мадуро.
Владата на Венецуела соопшти дека нападите покрај Каракас се случиле и во Миранда, Арагуа и Ла Гваира, што го натерало Мадуро да прогласи вонредна состојба и да ги мобилизира одбранбените сили.
Трамп во понеделникот изјави дека би било „мудро“ Мадуро да се повлече. Соединетите Американски Држави извршија големо воено засилување во регионот, вклучувајќи носач на авиони, воени бродови и напредни борбени авиони стационирани во Карибите.
Верижна сообраќајна незгода со десет автомобили во тетовско
Од вкупно 200 собраќајни незгоди кои се случиле во текот на вчерашното деноноќие во тетовскиот реон имало четири сообраќајки, од кои една верижна со учество на 10 возила, а во Гостиварско имало 15 сообраќајни незгоди. Причините за дел од сообраќајните незгоди се во замрзнатите коловози.
Поради пад на температурите во текот на изминатото деноноќие дојде до замрзнување на коловозите во северозападниот регион на државата, што доведе до зголемен број на пријави од граѓани и возачи, информира денеска Центарот за управување со кризи (ЦУК).
Според ЦУК, примени се и бројни пријави од граѓани од градовите Тетово и Гостивар, како и од околните населени места за замрзнати споредни и локални улици.
Регионалниот центар за управување со кризи – Тетово стапи во контакт со надлежните од Општините Тетово, Гостивар и Желино, од каде е потврдено дека се ангажирани фирми за зимско одржување, како и дека на терен се врши посолување на патиштата по приоритети.
Калас повика на „воздржаност“ по американските напади врз Венецуела
Еврокомесарката за надворешна политика, Каја Калас, го повика Вашингтон да ги почитува „принципите на меѓународното право и Повелбата на ОН“ откако претседателот Доналд Трамп изјави дека САД ги „заробиле“ венецуелскиот претседател Николас Мадуро и неговата сопруга.
„ЕУ постојано изјавува дека г-дин Мадуро нема легитимитет и дека брани мирна транзиција. Под сите околности, принципите на меѓународното право и Повелбата на ОН мора да се почитуваат. Апелираме на воздржаност“,напиша Калас на X во саботата.
Калас рече дека разговарала со американскиот државен секретар Марко Рубио и амбасадорот на ЕУ во Каракас, додавајќи дека блокот „внимателно ја следи ситуацијата во Венецуела“.
По месеци растечки тензии, САД започнаа изненадувачки воздушни напади врз повеќе цели на венецуелска територија преку ноќ, а Трамп во саботата наутро објави дека авторитарниот владетел на земјата, Мадуро, и неговата сопруга се „протерани од земјата“.
„Соединетите Американски Држави успешно извршија голем напад врз Венецуела и нејзиниот лидер, претседателот Николас Мадуро, кој беше заробен и изнесен од земјата заедно со неговата сопруга. Оваа операција беше спроведена во соработка со американските органи за спроведување на законот“, напиша тој.
На почетокот на 3 јануари, експлозии го потресоа главниот град Каракас по месеци закани од претседателот Доналд Трамп кон венецуелскиот претседател Николас Мадуро.
Владата на Венецуела соопшти дека нападите покрај Каракас се случиле и во Миранда, Арагуа и Ла Гваира, при што е прогласена вонредна состојба и мобилизација на одбранбените сили.
Иранскиот ајатолах му возврати на Трамп
Додека протестите поради економската криза во Иран влегуваат во својата втора недела, највисоките ирански функционери и американскиот претседател Доналд Трамп разменија закани, во услови кога демонстрациите станаа смртоносни и продолжуваат да ескалираат.
Еден ден откако Трамп во објава на платформата Truth Social на 2 јануари изјави дека Вашингтон е „подготвен и вооружен“ да одговори доколку иранските безбедносни сили убијат уште демонстранти, иранскиот врховен лидер, ајатолахот Али Хамнеи, упати пркосен одговор.
„Она што е важно е кога човек ќе сфати дека непријателот арогантно се обидува да ѝ наметне нешто на државата, на функционерите, на владата и на нацијата – тогаш мора цврсто да му се спротивстави на непријателот и храбро да му се излезе во пресрет“, изјави Хамнеи на 3 јануари. „Ние нема да се покориме на непријателот.“
Иранскиот амбасадор во Обединетите нации, Амир Саид Иравани, исто така на 2 јануари побара од ОН да ги осудат, како што ги нарече, „незаконските закани“ од американскиот претседател.
Иравани ги повика генералниот секретар на ОН, Антонио Гутереш, и членовите на Советот за безбедност „јасно и недвосмислено да ги осудат“ „непромислените и провокативни изјави“ на Трамп, опишувајќи ги како „сериозно кршење“ на Повелбата на ОН и на меѓународното право.
Иранското раководство претходно на 2 јануари остро реагираше, предупредувајќи дека американските трупи во регионот би можеле да бидат цел ако Вашингтон интервенира во услови на смртоносните протести, кои започнаа на 28 декември и претставуваат еден од најголемите предизвици за власта на Исламската Република во последните години.
Иранскиот министер за надворешни работи, Абас Арагчи, изјави дека вооружените сили на земјата се во состојба на подготвеност и дека „точно знаат каде да нишанат“ во случај на напад.
Поттикнати од гневот поради вртоглавиот раст на цените, инфлацијата и падот на валутата, демонстрациите се проширија низ Иран откако трговците во Техеран започнаа штрајк поради високите цени и економската стагнација.
Според извештаи, најмалку девет лица биле убиени, а 44 приведени во немирите што траат една недела. Државно контролирани медиуми и меѓународни организации за човекови права известија за повеќе жртви и десетици повредени во судири меѓу демонстрантите и безбедносните сили, иако медиуми блиски до владата ја обвинија, како што ја нарекоа, „разгневената толпа“ за насилството.
Иранските власти сè уште официјално не ги потврдиле овие извештаи, а Радио Фарда на РСЕ/РЛ не можеше независно да ги потврди.
Протестите се шират низ Иран
Протестите беа предизвикани од колапсот на курсот на иранската валута во однос на американскиот долар и инфлацијата која порасна на 52 проценти.
Иранскиот претседател Масуд Пезешкијан претходно се обиде да ги смири протестите, ветувајќи „нови одлуки“ за подобрување на економската состојба.
Сепак, тоа не направи многу за да го намали гневот на Иранците, кои се соочуваат со колапс на риалот што на неофицијалниот пазар се тргува за околу 1,4 милиони за еден долар, во споредба со околу 800.000 пред една година.
Економските проблеми се надоврзуваат на долгогодишни наталожени економски и политички кризи во Иран, вклучително и тешка суша во Техеран, град со околу 10 милиони жители.
Одговорот од Техеран кон Трамп, кој изјави дека доколку иранските власти убијат „мирни демонстранти, што им е навика, Соединетите Американски Држави ќе дојдат на помош“, беше особено остар.
„Трамп треба да знае дека американско мешање во ова внатрешно прашање би значело дестабилизација на целиот регион и уништување на американските интереси“, напиша на мрежата Икс Али Лариџани, секретар на Врховниот совет за национална безбедност на Иран.
„Американскиот народ треба да знае – Трамп ја започна оваа авантура. Треба да внимаваат на безбедноста на своите војници“, додаде тој.
По ова следеше објава од Али Шамхани, висок советник на врховниот лидер Хамнеи, кој напиша дека „Иранците добро ја познаваат историјата на американското ‘спасување’, од Ирак и Авганистан до Газа. Секоја рака што ќе интервенира… ќе биде отсечена.“
Саид Баширташ, ирански активист во егзил, за Радио Фарда изјави дека ваквите „закани за одговор повеќе личат на блеф“.
„Иранскиот народ ја поздравува опомената на Трамп, затоа што ќе чувствува помала закана кога излегува на улица. Тоа е многу позитивно, бидејќи Исламската Република ќе биде многу повнимателна кога станува збор за убивање луѓе“, рече тој.
Друг ирански дисидент во егзил, ветеранот Мехран Барати, за Радио Фарда изјави дека и покрај пркосниот јазик, постојат „пукнатини во режимот, вклучително и во Корпусот на Исламската револуционерна гарда, армијата и политичкото раководство“.
Доколку САД планирале некаква акција, додаде тој, можеби би сметале дека сегашната состојба е најповолен момент.
Острата реторика доаѓа само шест месеци по 12-дневната војна во јуни, кога израелски и американски авиони ги бомбардираа иранските нуклеарни и воени објекти.
Трамп го прими израелскиот премиер Бенјамин Нетанјаху во својата резиденција Мар-а-Лаго во Флорида на 29 декември, кога сугерираше дека би поддржал нови израелски напади врз иранската програма за балистички ракети.
Во изјава доставена до Радио Фарда на 2 јануари, портпарол на Стејт департментот соопшти дека Вашингтон ќе продолжи да врши „максимален притисок врз режимот“.
Гнев на погребите
Во услови на континуираните немири, видеа што кружат на интернет на 2 јануари, наводно ги прикажуваат првите погреби на лица убиени во судирите со безбедносните сили.
Во едно видео, снимено на локација во пустински предел што одговара на теренот во Кухдашт, во западната иранска покраина Лорестан, се гледаат немири и судири, за кои се тврди дека се поврзани со обидите на ожалостените да ги избркаат безбедносните сили.
Друго видео, за кое се наведува дека е од погреб во Марвдашт, во покраината Фарс, прикажува толпа како извикува „Ќе го убијам оној што ми го уби братот“ и „Смрт за Хамнеи“.
Во соопштение од 3 јануари, Стејт департментот ја осуди репресијата за време на погребите на демонстрантите.
„Оваа суровост оди подалеку од репресија; тоа е намерен напад врз основното човечко достоинство. Светот гледа. Дозволете им да тагуваат“, се вели во соопштението на фарси јазик објавено на мрежата Икс.
Новинската агенција Фарс, блиска до Корпусот на Исламската револуционерна гарда, соопшти дека две лица биле убиени за време на протестите во градот Лордеган, на југозападот на земјата, наведувајќи дека имало судири со безбедносните сили за време на погреб. Во новинските извештаи е наведено дека три лица биле убиени, а 17 повредени во Азна, град со 48.000 жители во покраината Лорестан.
Организацијата за човекови права Хенгав, со седиште во Норвешка, исто така извести за смртни случаи во Лордеган, наведувајќи дека безбедносните сили отвориле оган врз демонстрантите, при што биле убиени две лица, а повеќе биле ранети. Организацијата додаде дека еден демонстрант бил убиен и во покраината Исфахан во централниот дел на Иран на 31 декември.
„Протести се одржаа на неколку локации во Лордеган, вклучително и на Плоштадот на општината и пред зградата на владата. Демонстрациите беа пречекани со насилна репресија, вклучително и употреба на солзавец и вистинска муниција од страна на полициските сили“, соопшти организацијата.
Подоцна, Хенгав додаде дека ги потврдила идентитетите на најмалку 10 лица убиени за време на протестите и дека има сознанија за најмалку 80 други лица кои биле уапсени во Иран во изминатите шест дена.
Новинската агенција Тасним, исто така поврзана со Револуционерната гарда, соопшти дека најмалку 30 лица биле уапсени во Техеран за „нарушување на јавниот ред“. Апсења беа пријавени и во други покраини.
Немирите се чини дека претставуваат најсериозен предизвик за власта во Иран од протестите „Жени, живот, слобода“, кои избувнаа по смртта на 22-годишната иранско-курдска студентка Махса Амини во септември 2022 година, додека беше во полициски притвор поради наводно прекршување на правилата за облекување.
Зеленски на разговори со сојузниците, Русија продолжува со нападите
Украинскиот претседател Володимир Зеленски ќе биде домаќин на безбедносни разговори во Киев на 3 јануари со западни партнери, додека Москва продолжи со воздушните напади врз Украина, вклучително и 95 дронски удари во текот на ноќта.
Украинските воздухопловни сили соопштија дека пресретнале 80 од дроновите и дека нема пријавени жртви, но во претходен напад на 2 јануари, кој погоди станбена област во североисточниот украински град Харков, беа повредени повеќе од 31 лице, а две лица загинаа, меѓу кои и тригодишно дете.
Нападите и безбедносните разговори се одвиваат во време на засилени напори поддржани од САД за ставање крај на речиси четиригодишната војна во Украина.
На разговорите во Киев, на Зеленски ќе му се придружат претставници од 15 земји членки на Европската Унија и НАТО, вклучително и американска делегација која ќе се вклучи преку видео-врска.
Разговорите следуваат по неколкунеделни засилени иницијативи и притисок од Вашингтон за посредување во мировен договор меѓу Русија и Украина.
Американскиот претседател Доналд Трамп изјави дека е постигнат значителен напредок, но дека „едно или две многу трнливи, многу тешки прашања“ сè уште остануваат пред двете страни да бидат подготвени да го одобрат планот од 20 точки што го турка Вашингтон.
Две од клучните прашања се распределбата на територијата во источна Украина и судбината на најголемата нуклеарна централа во Европа – Запорожје, која во моментов е под руска окупација.
Зеленски треба да се сретне со европски лидери во Франција на 6 јануари, каде што ќе се разговара за можен мировен договор и за најновите случувања на бојното поле во Украина.
Зеленски во меѓувреме прави реконструкција на врвот на власта пред клучните разговори. Во тој контекст, украинскиот претседател на 2 јануари го назначи шефот на военото разузнавање Кирило Буданов за свој нов главен советник.
Откако формално ќе биде назначен, тој ќе го замени Андриј Јермак, близок соработник на Зеленски и влијателен политички фактор, кој поднесе оставка во ноември, откако истражителите извршија претрес во неговиот дом во рамки на обемна антикорупциска истрага.
Буданов ужива силна репутација во Украина и се смета за заслужен за серија смели операции против Русија.
Аналитичарите велат дека Зеленски со ова назначување се обидува да ја врати довербата во своето лидерство и во државните институции, како и да ја зајакне одбраната на Украина и нејзината позиција во мировните разговори поддржани од САД.
„Кирило има специјализирано искуство во овие области и доволна сила за да испорача резултати“, напиша Зеленски на социјалната платформа „Х“ .
Во изјава, Буданов рече дека ја прифатил понудата и дека ќе се фокусира на „стратешката безбедност на нашата држава“.
Зеленски, исто така, најави дека има намера да го замени Денис Шмигал како министер за одбрана со Михајло Федоров, актуелниот министер за дигитална трансформација.
„Михајло е длабоко вклучен во прашањата поврзани со дроновите и е многу ефикасен во дигитализацијата на државните услуги и процеси“, изјави украинскиот претседател.
Иако напредувањето на руските сили на бојното поле е ограничено и тешко изборено уште од првата година на целосната војна во Украина, анализа од 2 јануари на Институтот за проучување на војната, тинк-тенк со седиште во Вашингтон, покажа дека територијалните добивки на Москва во 2025 година биле најголеми од 2022 година наваму.
Руската армија зазела повеќе од 5.600 квадратни километри, што е вкупно повеќе од територијата освоена во претходните две години заедно. Сепак, таа бројка е далеку помала од повеќе од 60.000 квадратни километри што Русија ги зазеде во 2022 година по почетокот на целосната инвазија.
Врховниот командант на украинската армија, Олександр Сирски, изјави дека тие напредувања резултирале со речиси 420.000 загинати и ранети руски војници во 2025 година, според украинските проценки.
Венецуела ги обвини САД за нападите врз Каракас
Венецуелската влада на 3 јануари ги обвини САД за напади врз цивилни и воени цели во земјата, по неколкуте експлозии во главниот град Каракас,јавува германската новинска агенција ДПА.
„Венецуела ја отфрла и осудува пред меѓународната заедница исклучително сериозната воена агресија извршена од сегашната влада на Соединетите Американски Држави против територијата и народот на Венецуела“, соопшти владата предводена од Николас Мадуро.
Венецуелскиот лидер, исто така, прогласи вонредна состојба.
Белата куќа и Пентагон не дадоа коментари за наводните напади.
Серија експлозии го погодија главниот град на Венецуела, Каракас, според претходно објавените извештаи на локалните медиуми. Експлозии се слушнале и во Ла Гваира, северно од главниот град, каде што се наоѓаат аеродромот и пристаништето во Каракас.
Сликите објавени од телевизиската станица NTN24 покажаа експлозии и облаци од чад.
Претседателот на Колумбија, Густаво Петро, рече дека Каракас е нападнат и повика на итен состанок на Организацијата на американските држави и Обединетите нации.
САД ја засилија својата воена кампања во последните месеци против наводниот шверц со дрога поврзан со Венецуела, која е управувана од авторитарниот претседател Николас Мадуро.
Десетици луѓе се убиени досега во напади врз бродови од страна на американската војска.
Во понеделник, претседателот Доналд Трамп потврди воен напад врз венецуелски пристанишен објект, наводно користен за операции за шверц со дрога.
Администрацијата на Трамп го обвини Мадуро дека предводи нарко-картел, но левичарскиот лидер негира каква било вмешаност во трговијата со наркотици, велејќи дека Вашингтон се обидува да го собори од власт затоа што Венецуела има најголеми познати резерви на нафта на Земјата, јавува новинската агенција Франс Прес.
Следната недела ќе се анализира дали трговците имале зголемени цени пред празниците
Министерството за економија и труд идната недела ќе прави анализа на цените на производите на крајот на минатиот месец и почетокот на месецов за да утврди дали имало поскапување и девијантно однесување од страна на трговците.
„Идната недела ќе ги анализираме податоците за цените од крајните денови на декември и првите денови од јануари и ќе бидете известени дали има девијантно однесување од трговците или зголемување на цените. Ќе бидете известени како ќе постапиме“, рече денеска министерот за економија и труд Бесар Дурмиши.
На прес-конференција по повод стартот на примената на Законот за работно ангажирање на лица министерот посочи дека со овој закон ќе се намали невработеноста и оти пензионерите, студентите, корисниците на социјална помош, ќе можат да бидат вработени во текот на годината не повеќе од шест месеци.
Прашан дали ќе има прочистување на списокот во Агенцијата за вработување каде има невработени кои земаат социјална помош а неприфаќаат вработување, наведе дека со новиот закон што е во сила тие нема да ги губат правата како невработени, но ќе имаат можност да бидат вработени во дејностите земјоделство, рибарство, шумарство, угостителство.
Според направените анализи на Министерството за економија, со примената на законот се очекува формализација на 12 000 сезонски работници во земјоделството и околу 5.400 непријавени работници во туризмот, угостителството и услугите.
Осомничениот за убиството во старата скопска чаршија е уапсен во Косово, почнува постапка за екстрадиција
Осомничениот за убиството на 22-годишниот турски државјанин Ахмет Мерт Доган пред угостителски објект во Старата скопска чаршија за време на новогодишната ноќ е уапсен во Косово и е почната постапка за негова екстрадиција.
Министерството за внатрешни работи соопшти дека врз основа на обезбедени докази, денеска поднело кривична пријава против М.Т. (25) од Република Турција со престојувалиште во Тетово осомничен за две кривични дела – „убиство“ и „убиство во обид“.
Тој е осомничен дека, во расправија, со нож го убил Ахмет Мерт Доган и го повредил и сонародникот Ч.Е. (23) и потоа избегал. Убиениот бил со престојувалиште во Скопје, а повредениот бил жител на германскиот град Есен.
Настанот е расчистен со докази обезбедени од Единицата за насилен криминал, Одделение за крвни деликти при СВР Скопје, врз основа на наредби од јавен обвинител.
„М.Т. на критичната ноќ во кафе-бар во чаршијата започнал расправија со А.М.Д. и Ч.Е., по што двајцата оштетени заедно со други лица заминале кон плоштадот. Меѓутоа, бидејќи не успеале да најдат такси, повторно се вратиле кон чаршијата и поминале во близина на истиот кафе-бар. При повторна средба со осомничениот, расправијата продолжила, а М.Т. извадил нож со кој му нанел четири удари во градниот кош и срцето на оштетениот А.М.Д., кој починал на лице место. Со еден удар му нанел телесна повреда – убодна рана во грбот и на Ч.Е., со намера и него да го лиши од живот, по што побегнал од местото на настанот“, соопштија МВР и државното Јавно обвинителство.
Вчера јавен обвинител наредил обдукција на починатиот, биле подигнати траги за вештачење, извршени разговори со повеќе лица и обезбедени снимки од видеонадзорот со што бил идентификуван осомничениот.
По преземени оперативно-тактички мерки од страна на органите на прогонот, биле добиени сознанија дека осомничениот М.Т. се наоѓа во Косово, каде што од косовските власти е лишен од слобода.
Основното јавно обвинителство Скопје наредило да се спроведе истражна постапка против турскиот државјанин осомничен за двете кривични дела.
„Јавниот обвинител до Основниот кривичен суд Скопје достави предлог за определување мерка притвор во отсуство врз основа на кој веднаш ќе биде иницирана постапка за екстрадиција“, соопшти државното Обвинителство.
Мултимедија
Најпосетени
Што треба да знаете