Достапни линкови

Вести

Случај 27 април - Младеновски тврди дека добивал инструкции од Нинџа

Архивска фотографија- Обвинителката Вилма Русковска на судење за „27 април“

Во Кривичниот суд денешното рочиште за случувањата на 27 април минатата година во Собранието на Република Македонија, продолжи со исказот, во негова одбрана, на обвинетиот Стефан Младеновски, кој, тврди дека добивал наредби од обвинетиот Александар Василевски- Нинџа.

Тој рече дека од Василевски дознал дека на чело на Управата за безбедност и контраразузнавање бил назначен Владимир Атанасовски, кој тој го претставил како негов човек и затоа можел да прави што сака. Младеновски рече дека тој и негиовиот брат се среќавале со Нинџа во партиските простории, а дека на првиот ден од протестите пред Државната изборна комисија, тој ги викнал во кафуле заедно со извесно лице со прекар Прскач, за кој Младеновски рече дека во тоа време началник или заменик-началник во петта управа.

“Нинџа ни кажа дека ако ДИК ги одбие приговорите на ВМРО-ДПМНЕ ќе треба да се упадне во ДИК и да се фрли молотови коктели. Таму беа неговите луѓе, кои добар дел беа вработени во неговиот кафич или кладилницата”, раскажува Младеновски.

За протестите на За заедничка Македонија обвинетиот рече дека учествувал десетина пати со неговиот брат и тврдеше дека за нив имало логистичка поддршка од сите Комитети на ВМРО-ДПМНЕ.

Рече и дека оти ќе се влегува во Собрането кога СДСМ ќе формира Влада, дознал во февруари, кога ги викнал Нинџа. Таму имало луѓе од МВР и УБК.

“На таа средба Прскач ни кажа дека државата ни е загрозена и треба да си ја одбраниме, дека тие ќе стојат зад нас и дека сите насоки ќе ги добивам од Нинџа. Нинџа кажуваше дека на тие протести ќе се следи кој е присутен и дали ќе има провокатори”, рече Младеновски.

Посочи дека на 27 април околу 14.00 часот ги викнал во „Дион“ и им кажал дека тоа е денот, а како што посочи Младеновски, Нинџа добил насока од Атаноасовски да ги координира луѓето под партиски здруженија. Потоа објасни дека било договорено да се купат маски и Младеновски ги набавил. Од кога влегле во Собранието со маски, Младеновски рече дека пробиле во во прес-салата. но дека тој брзо заминал од таму и со брат му отишле во салата Длаборез.

види ги сите денешни вести

Уапсени деветмина Срби осомничени за воени злосторства во БиХ

Илустрација, Поточани, Меморијален центар Сребреница

Деветмина Срби, поранешни припадници на Војската на Република Српска, се уапсени денеска во БиХ под сомнение дека извршиле воени злосторства врз припадници на бошњачката и хрватската националност во 1992 година во областа Босански Нови.

Според Државната агенција за истраги и заштита (СИПА), сите уапсени сè уште живеат во областа Босански Нови и неговата околина, а се товарат за злосторства против човештвото.

Во соопштението на СИПА се наведува дека осомничените се уапсени за сторени повеќе убиства и незаконско заробување, како и за злосторства извршени над неколку стотини лица во кампот Огнен дом, со кој управувала воената полиција.
Апсењата се извршени по налог на Посебниот оддел за воени злосторства во Обвинителството на БиХ.

Приведени родители кои сексуално ја злоставувале и продале својата ќерка

На тројца осомничени за силување и трговија со дете им е одредена мерка притвор од 30 дена, соопшто јавното обвинителство. Татко на шест малолетни деца е првоосомничен дека извршувал „обљуба“ врз една од своите малолетни ќерки. Второосомничената е мајка која се товари дека ја подведувала својата малолетна ќерка за пари да има сексуслани односи со трето осомничениот.

Во полициска акција се приведени тројцата осомничени за кои постои основано сомнение дека првоосомничениот сторил две продолжени кривични дела и тоа кривично дело „родосквернавење“ и кривично дело „трговија со дете“, додека останатите двајца осомничени сториле продолжено кривично дело „трговија со дете“, велат од ЈО.

„Првоосомничениот, татко на шест деца, од кои на три малолетни девојчиња, искористувајќи исти прилики во подолг временски период извршувал обљуба со една од своите малолетни ќерка. Во исто време второосомничената злоупотребувајќи ја својата положба, како мајка на детето кое не наполнило 14 години, го подведувала девојчето да врши полови дејствија за паричен надомест со третоосомничениот. Таа му го носела девојчето на третоосомничениот, во неговата куќа и за паричен надомест од по 2.000 денари, а понекогаш од по 500 денари, ја принудувала да се соблекува и да има сексуални односи со него. Доколку детето одбиело, мајката употребувала физичка сила“, објаснуваат од Обвинителство.

Во соопштението е наведено дека таткото ја продал својата ќерка, на маж од Косово кој го пронашол преку интернет.

„Откако бил исплатен паричен надомест од 3.000 евра, девојчето било однесено во Косово заради склучување на присилен брак. По два месеци тоа дошло на гости кај нејзините родители, а првоосомничениот со оправдување дека било многу далеку не ја вратил во Косово и продолжил да врши обљуба врз својата малолетна ќерка“, додаваат од Обвинителство.

Семејно насилство - „Нема каде да одам“
please wait

No media source currently available

0:00 0:07:52 0:00

Малолетничките се згрижени во Меѓуопштински центар за социјални работи – Скопје. За кривичните дела за кои се товарат осомничените е предвидена казна затвор во траење од најмалку 10 години, односно 12 години за дејствијата за кои се товари третоосомничениот.

Бугарија очекува јасни гаранции од Македонија

Бугарскиот министер за надворешни работи Светлан Стоев на билатерални средби со еврокомесарот за соседство и проширување Оливер Вархеји

Софија очекува јасни гаранции од Скопје по однос на правата на граѓаните со бугарско национално чувство и исполнувањето на Договорот за пријателство од 2017 година. Ова го изјавил бугарскиот министер за надворешни работи Светлан Стоев на билатерални средби со еврокомесарот за соседство и проширување Оливер Вархеји и со шпанскиот министер за надворешни работи, ЕУ и соработка Хозе Мануел Албарез Буено, јавува новинската агенција БГНЕС.

Средбите, на кои станало збор за перспективите за почеток на преговори на Северна Македонија за членство во ЕУ, се одржале во Барселона во рамките на Шестиот регионален форум на Унијата за Медитеранот и министерскиот состанок на ЕУ и земјите партнери од јужното соседство, јавува БГНЕС.

„Бугарската страна ги истакна своите проактивни напори во последните месеци за решавање на отворените прашања со Скопје, со цел да се гарантираат правата на граѓаните со бугарски идентитет и спроведувањето на Договорот за пријателство, добрососедство и соработка од 2017 година. Очекуваме јасни гаранции од Република Северна Македонија за ова“, соопшти бугарското МНР.

Стоев денеска и утре престојува во Рига каде учествува на состанокот на министрите за надворешни работи на земјите членки на НАТО, на кои учествува и шефот на македонската дипломатија Бујар Османи.

Во рамки на министерскиот состанок на НАТО, како што соопшти бугарското МНР, ќе се одржи и средба со високиот претставник на ЕУ за надворешна политика и безбедност Жосеп Борел и партнерите Шведска и Финска за актуелните случувања на Западен Балкан.

Претходно бугарскиот претседател Румен Радев при телефонски разговор со со еврокомесарот за проширување Оливер Вархеји, изјавил дека Софија очекува дијалогот со Северна Македонија да доведе до конкретни резултати. Радев посочил дека главен акцент во тој дијалог е ставен на почитувањето на правата на Бугарите во Северна Македонија, трајно искоренување на јазикот на омразата и почитување на бугарската историја и културно наследство во Македонија.
Бугарија една година го блокира почетокот на преговори на Македонија со ЕУ.

Словенија месецов забележа највисока инфлација во последниве 13 години

Илустрација, пазар

Словенија овој месец ја регистрираше највисоката инфлација во изминативе 13 години. Потрошувачките цени во Словенија во ноември 2021 година се зголемени за 4,6 отсто во однос на истиот месец лани. Тоа е највисока инфлација од октомври 2008 година, кога изнесуваше 4,9 отсто, објави денеска словенечкиот државен завод за статистика.

Централната банка во Словенија посочува дека ова е еднократен ефект врз инфлацијата во Словенија, главно поради порастот на цените на енергијата на меѓународните пазари, каде што се очекува смирување следната година. Централната банка очекува раст на инфлацијата во Словенија во наредните месеци, додека не се смири ситуацијата во светските синџири на снабдување и на енергетските пазари.

Сегашниот раст е последица на високите цени на нафтата и природниот гас на меѓународните пазари, а растат и цените на купоните за емисија.

Според официјалната статистика, во ноември цените на стоките во Словенија биле во просек за 6,2 отсто повисоки од претходната година, додека цените на услугите се повисоки за 1,5 отсто.

Најмалку 14 загинати и двајца повредени при пад на хеликоптер во Азербејџан

Илустрација, урнат хеликоптер

Воен хеликоптер на Државната гранична служба на Азербејџан се урна, при што загинаа 14 членови на екипажот, а две воени лица се повредени. Двајца полковници, пет мајори, тројца капетани, еден капетан од воената медицинска служба, двајца поручници и еден изведувач загинаа во несреќата, се вели во соопштението на граничната служба. Во него е посочено дека еден полковник и еден капетан ја преживеале несреќата и дека тие се хоспитализирани.

Граничната служба и Канцеларијата на генералниот обвинител во јужнокавкаскиот регион соопштија во заедничко соопштение дека хеликоптер се урнал денеска за време на воени маневри во близина на аеродромот Карахејбат во источната област Ксизи.

Двете надлежни институции во претходно соопштение посочија дека е започната заедничка истрага за несреќата.

Група од 43 Авганистанци замина од Македонија

Илустација, пристигнување на дел од бегалците од Авганистан на скопскиот аеродром, архивска фотографија

Нова група од 43 авганистански граѓани замина од Македонија откако за нив беше подготвена потребната документација за влез во трета земја како нивно трајно прибежиште, соопшти владината прес служба.

Во соопштението е наведено дека согласно планираната спасувачка мисија, македонските институции, во текот на нивниот привремен престој во земјава им ја овозможиле потребната поддршка, а трошоците биле покриени од меѓународните организации.

„Овие цивили беа спасени во големата меѓународна операција за помош на вработени во хуманитарните, демократски и миротворни меѓународни мисии, активисти од организациите за човекови права, преведувачи, студенти и стипендисти и нивни семејства, а се под закана на новиот талибански режим во Авганистан“ се вели во владиното соопштение.

Засега во земјава престојуваат 505 авганистански граѓани, а досега од Северна Македонија заминаа 128-мина на кои траен престој им обезбедија Франција, Грција, Ирска, Португалија, Бразил и САД.

Седум починати и нови 460 случаи со ковид-19

Во изминатото деноноќие евидентиратни се нови 460 заболени со ковид-19 од направени 2.424 тестирања. Во изминативе 24 часа седум пациенти ја загубиле битката со ковид-19. Институтот за јавно здравје регистрирал и 543 оздравени пациенти. Најголем број од новозаболените доаѓаат од Скопје - 185, потоа Прилеп – 54 и Битола – 45.

Од седумте починати лица три се од Скопје (63г, 67г и 83г), две од Битола ( 66г и 83г), и по едно починато лице од Куманово (79г), и Берово (69г). Сите пријавени лица се починати во болнички услови. Дополнително, согласно регистарот на умрени лица со дијагноза Ковид-19 од „Мој Термин“, се пријавени пет починати лица со датум на смрт од 02.10.2021 до 27.11.2021 и сите пријавени лица се починати во домашни услови.

Досега во земјата се направени вкупно 1.471.420 тестирања на Ковид-19. Вкупниот број Ковид-дијагностицирани лица во земјава од почетокот на епидемијата изнесува 215.585, бројот на оздравени пациенти е 200.003, на починати е 7.581, а на активни случаи изнесува 8.001.

Белоруски новинар осуден на 10 дена затвор

Белорускиот новинар Андреј Кузнечик кој хонорарно работи како дописник за белорускиот сервис на Радио Слободна Европа

Белорускиот новинар Андреј Кузнечик кој хонорарно работи како дописник за белорускиот сервис на Радио Слободна Европа е осуден на 10 дена затвор поради обвинение за нарушување на јавен ред и мир, додека властите на авториратниот лидер Александар Лукашенко и натаму ја спроведуваат хајката и акцијата против независните медиуми во земјата.

Роднините на Кузнечик за РСЕ изјавија дека денеска дознале дека пред четири дена била донесена пресудата против него. Тие посочија дека Кузнечик тврдел дека е невин и дека засега сенаоѓа во озлогласениот притвор во Минск Акрештина. Жителите на озогласениот притвор во Минск честопати се жалат на тортура од властите во притворот.

Сопругата на Кузнечик, Алексија Рак изјавила дека тој на 25 ноември излегол од дома за да вози велосипед, но набрзо се вратил во придружба на четворица мажи облечени во цивилна облека кои не приложиле никаква идентификација , но извршиле претрес во нивниот дом. Потоа Кузнечик бил изнесен од домот од четворицата цивили кои не и соопштиле која е причината за неговиот протвор.

Тензиите во Белорусија растат откако Лукашенко, кој е на власт од 1994 година, беше прогласен за победник на претседателските избори во август 2020 година, за кои белоруската опозиција и Западот тврдат дека се наместени.

По августовските избори многу западни земји одбија да го признаат Лукашенко како легитимен лидер на Белорусија, оставајќи го белорускиот моќник позависен од кога било од Русија. Многу аналитичарите сметаат дека Русија ја користи неговата ослабена позиција за да ја зајакне својата контрола над својот помал сосед.

Десетици илјади луѓе се приведени, а активистите за човекови права тврдат дека повеќе од 800 луѓе сега се во затвор како политички затвореници. Мета беа и независните медиуми и опозициските социјални медиуми. Претседателот на РСЕ Џејми Флај на денот на приведувањето на Кузнечик изјави дека режимот на Лукашенко продолжува со напорите да ги уништи сите независни медиуми во Белорусија.

„Андреј беше киднапиран од агенти на режимот за ништо повеќе од тоа што е новинар. Режимот исто така таргетираше една од нашите профили на социјалните мрежи, обидувајќи се да пресече повеќе канали за информации за белорускиот народ. Андреј треба веднаш да биде ослободен и да му се дозволи да се врати на сопругата и малите деца.Не сторил кривично дело“, изјави претседателот на РСЕ Флај.

За шест проценти намален бројот на заболени од ковид-19 на неделно ниво

Помалку тестирања за ковид, но и помал број за нови случаи регистрира Институтот за јавно здравје во периодот од 22 ноември до 28 ноември. Бројот на тестирања во однос на неделата претходно е намален за 5,1 отсто, а бројот на нови случаи за 6,1 проценти.

Процентот на позитивност се движи од 9,5 до 17,5 отсто или просечно 14,3 проценти. Најголем дел од регистрираните случаи се од Скопје. Највисока неделна инциденца е регистрирана во Берово, се наведува во Извештајот објавен на веб страницата на Институтот за јавно здравје.

Се забележува намалување на бројот на заболени кај сите возрасни групи, освен кај возрасната група до девет години, каде има за 14,4 отсто повеќе случаи. Најзабележително е намалувањето кај возрасната група на лица од 10 до 19 години (-10,7 отсто).

Нејаснотии со Омикрон сојот на коронавирусот
please wait

No media source currently available

0:00 0:02:31 0:00

Минатата недела има повеќе заболени женски лица, отколку машки. Во текот на мината недела вкупно се пријавени 44 реинфекции, што е за 10,2 отсто помалку во однос на претходната недела.

Пријавени се 98 смртни случаи во 24 градови во текот на изминатата недела, во однос на 91 смртни завршетоци во 21 град во претходната недела. Во однос на возраста, најголем број од починатите припаѓаат на возрасната група над 60 години, а регистрирани се починати лица и кај возрасната група од 50 до 59 години (шест), од 40 до 49 години (три) и 30 до 39 години (три).

Бислимоски – Струјата може да поевтини од април, но повторно ќе биде поскапа од досегашната

Електрична централа

Намалување на цените на електричната енергија на светските пазари може да се очекува од втората половина на април следната година, но тоа намалување е во однос на денешните, поскапени цени, а не во однос на цените од минатата година, вели во разговор со дописничката на МИА од Атина претседателот на Регулаторната комисија за енергетика и водни услуги (РКЕ) Марко Бислимоски.

Тој е во Атина прусуствува на 50-тиот Борд на регулатори на Енергетската заедница, на кој по втор пат беше избран за претседател на Бордот.

Бислимоски посочува дека тоа подразбира цени за најмалку два пати повисоки отколку што ги имавме во првиот дел од годинава.

„Тоа намалување е, да не биде 220-230 евра, туку да падне на 110 -120 евра. За такво намалување станува збор, но тоа 110-120 евра за мегават час што го нарекуваме намалување, всушност претставува зголемување во однос на минатата година за повеќе од два пати, за жал. Но, верувам дека сега ќе ги чуеме и искуствата од другите земји, а во некои од нив, сигурно ќе бидат вклучени и Владите со цел да се стабилизира колку што може ситуацијата во енергетскиот сектор“, истакнува Бислимоски.

Анализирајќи ја ситуацијата во регионот, тој вели дека особено е лоша ситуацијата кај земјите што се увознички на електрична енергија и природен гас, а тоа се Македонија, Молдавија, Косово, во одреден дел и Црна Гора зашто цените се драстично зголемени.

Дел од Енергетската заедница, освен Македонија, се и Србија, Косово, Црна Гора, Босна и Херцеговина, Молдавија, Грузија, Украина и Албанија.

Блинкен -Сериозни последици за Русија ако има нова агресија кон Украина

Американскиот државен секретар Ентони Блинкен

Американскиот државен секретар Ентони Блинкен ја предупреди Москва дека секоја повторна агресија на Украина ќе предизвика „сериозни последици“, во услови на зголемена загриженост на Западот поради трупањето руски војници на границата со Украина.

Зборувајќи на прес-конференција во Рига, каде што учествува на состанок на министрите за надворешни работи од НАТО, Блинкен денеска оцени дека трупањето на руски војници е „необично“ и дека „секоја ескалациска постапка од страна на Русија ќе биде од голема загриженост за САД“.

Дополнителната поддршка за украинската војска и потенцијалот на НАТО за зајакнување на силите распоредени долж источната граница се очекува да бидат темите на дневниот ред на дводневниот состанок во главниот град на Летонија.

Алијансата се обидува да му покаже на Кремљ дека ќе се соочи со сериозни последици ако ѝ и се заканува на Украина.

Русија, која го анектираше Крум од Украина во 2014 и ги поддржува проруските сепаратисти во конфликтот во источна Украина, негира дека планира напад и го обвини НАТО дека ги подгрева тензиите.

Британската министерка за надворешни работи Лиз Трус рече дека секоја сугестија дека НАТО ја провоцира Русија е лажна.

Украина, која претендира да стане членка на НАТО, го испрати шефот на дипломатијата Дмитро Кулеба на разговорите во Рига. Тој вчера рече дека Русија распоредила 115 илјади војници и тешко вооружување во близина на границата со Украина, во окупираниот Крим и во делови од источна Украина кои се под контрола на проруските бунтовници.


Комитова - Автопатот „Струма“ имал мани, но причина за големиот број жртви е пожарот

Бугарската министерка Виолета Комитова, во средината.

Автопатот „Струма“ каде се случи автобуската несреќа на 23 ноември, имал мани, но тие не се причина за несреќата во која загинаа 45 луѓе, беше кажано на денешната прес-конференција на министерката за регионален развој и јавни работи на Бугарија Виолета Комитова.

Министерство денеска ги објави резултатите од увидот на патниот правец каде што се случи автобуската несреќа на македонски превозник.

Патот не бил ниту автопат, ниту магистрала, ограничувањето прво било 9о километри на час, потоа сменето во 120 на час, но Комитова вели дека брзината на оваа делница треба да е 90 километри на час.

Бугарските власти велат дека брзината не била причина за несреќата. Според Комитова пожарот е главна причина што има толку загинати. Таа вели дека не се знае како настанал пожарот.
По несреќата бугарските обвинители наредија проверка на патот каде што се случи несреќата.

Паѓа индустриското производство, а намален е и број на работници

Годинава има зголемување на индустриското производство во споредба со лани, но во последните месеци од годината има пад на индустриското производство, соопшти Државниот завод за статистика (ДЗС). Индустриското производство во октомври годинава, во однос на октомври лани е намалено за 6,5 отсто. Во периодот јануари – октомври, пак, во споредба со минатата година е поголемо за 1,8 проценти, соопшти ДЗС.

Гледано по сектори, овој октомври во споредба со истиот месец лани најголем пад од над 10 отсто има во Преработувачката индустрија и минимален пад во секторот Рударство и вадење на камен, додека во секторот Снабдување со електрична енергија, гас, пареа и климатизација има пораст од 18.6 отсто.

Намалувањето во секторот Преработувачка индустрија е резултат, пред сѐ, на намаленото производство во следните оддели: Производство на прехранбени производи, Производство на текстил, Производство на облека, Производство на метали, Производство на машини и уреди, неспомeнати на друго место и Производство на моторни возила, приколки и полуприколки.

Бројот на работниците во индустријата, во октомври 2021 во однос на октомври лани е намален за 2,5 проценти, а од јануари до октомври во споредба со истиот период минатата година намален е за 2,2 отсто, соопшти Државниот завод за статистика.

Во санкциите на ЕУ кон Белорусија опфатен и авиопревозникот Белавија

Авион на ационалниот авиопревозник Белавија

Европската унија треба да го усвои петтиот пакет санкции против Белорусија, кој ќе опфати 17 лица и 12 компании. Со новите санкции ќе бидат таргетирани они кои учествувале во оркестирањето на мигрантската криза на границите на Белорусија со ЕУ.

Се очекува новите санкции да бидат усвоени утре, на 1 декември. Радио Слободна Европа имаше увид во списокот на оние кои ќе бидат санкционирани, меѓу нив се националниот авиопревозник Белавија и туристички компании кои се обвинети дека им помагале на мигрантите, главно од Блискиот Исток, да дојдат до границите на Белорусија со Унијата.

Дополнително, на списокот се ставени и неколку судии и функционери од правосудниот систем, кои, како што се наведува, му помогнале на режимот на авторитарниот лидер Александар Лукашенко да го сузбие несогласувањето од неговите противници по спорните избори во август минатата година.

ЕУ го обвинува Лукашенко дека води „хибридна војна“ дозволувајќи им на мигрантите да пристигнат во земјата, а потоа да се насочат во границите со Унијата. Според ЕУ, Лукашено тоа го прави за да се одмазди за санкциите што Унијата ги воведе против неговиот режим.

Членките на ЕУ - Полска, Латвија и Литванија поставија огради и распоредија илјадници граничари, војници и полицајци за да ја запечатат границата, откако на граничните линии почнаа да кампуваат илјадници мигранти. Според хуманитарните групи, во последните месеци загинале најмалку 11 мигранти.

Белоруските власти неодамна ги расчистија импровизираните мигрантски кампови на границата и префрлија околу 2.000 луѓе во магацин претворен во засолниште, а истовремено дозволија и летови за враќање на луѓето од таму од каде што дошле.

Осум синдикати во Сараево најавија генерален штрајк

Протест на синдикати во Сараево

Стотина претставници на осум синдикати во Кантонот Сараево денеска одржаа едночасовен предупредувачки протест пред зградата на кантоналната влада, незадоволни од висината на платите. Тие земаат плата од буџетот на Кантонот Сараево, Фондот на Заводот за здравствено осигурување на Кантонот Сараево и комуналната економија на Кантонот Сараево. Во федерацијата Босна и Хецеговина има 10 синдикати.

Станува збор за претставници на синдикатот на здравствени работници, основно, средно и високо образование, државни службеници, полицајци и комунални работници. Тие бараат повисоки плати, почитување на законските процедури и колективните договори и социјален дијалог со синдикатите. Во осумте синдикати има повеќе од 25 илјади работници.

Доколку денешниот протест не ги даде очекуваните резултати, тие најавија дека ќе стапат во генерален штрајк.

Вчитај повеќе

XS
SM
MD
LG