Достапни линкови

Во Дебар се почитува споменот на НОБ


Споменик на херои од Народно ослободителната војна, поставен во центарот на Дебар.

Во Дебар не се уништуваат спомениците на хериоите од НОБ, како што е случај во многу други граодви, велат од организацијата на борците во градот. Според нив почитувањето на Народно ослободителната борба е добра основа за соживот.

Жителите на општина Дебар се коректни во однос на почитувањето на придобивките од Народно ослободителната војна и одржувањето на спомениците од Втората светска војна. Оваа оценка ја изнесуваат претставници на раководството на организацијата на борците и почитувачите на НОВ во Дебар. И покрај тоа што во некои градови во Македонија има оштетувања на спомениците, тоа во Дебар не се случува, вели претседателот на оваа здружение Ирфан Уштеленца. Според него Дебар е примерен град кога е во прашање одржувањето на спомениците од НОВ.

„Дебар е примерен град и ги почитува сите придобивки на НОВ. Сите спомен обележја се чуваат и се одржуваат. Во Дебар нема, ниту пак верувам дека ќе има оштетувања на спомениците од луѓе. Можно е да има оштетувања од временски прилики, но не и од луѓе“, вели Уштеленца.

Споменикот на Ибе Паликуќа.
Споменикот на Ибе Паликуќа.

Членовите на организацијата на борците од НОВ во Дебар го осудуваат актот на симнување и исчезнување на бистата на народниот херој дебарчанката Ибе Паликуќа која беше поставена и во Спомен паркот на борците во Кичево, каде таа беше убиена од окупаторот во Втората светска војна.

„Бистата на народниот херој, дебарчанката Ибе Паликуќа, која покрај во Дебар беше поставена и во Кичево во спомен паркот, во Кичево е симната и не се знае каде е. Подолг период ние баравме од страна на сите институции, како што се полицијата, Владата и други, но сепак нема одговор каде е бистата на Паликуќа и кој ја симнал. Сега со промената на власта веруваме дека ќе се најде виновникот кој ја симнал и каде е таа биста. Истата ние ќе ја поставиме повторно во Кичево. Името на оваа хероина која е Албанка го носат две училишта во Скопје, едно културно уметничко друштво исто така во Скопје, и ние се гордееме со нејзиното име. Таа треба да се почитува како од Албанците, така и од Македонците“, вели претседателот на здружението на борците од НОВ во Дебар, Ирфан Уштеленца.

​Според дебарското здружение на борците од НОВ почитувањето на Народно ослободителната борба на Македонија е добра основа за соживот не само во Дебар туку и пошироко во цела Македонија.

  • 16x9 Image

    Кенан Мимидиновски

    Кенан Мимидиновски, роден 1954 во Дебар. Завршил Правен факултет во Скопје, а со новинарство професионално се занимава 30 години. Најпрвин во Радио Дебар како новинар, а подоцна 12 години и како главен и одговорен уредник . Дописник на Радио Слободна Европа од Дебар е од 2001 година.

XS
SM
MD
LG