Достапни линкови

Пред Кривичниот суд мирно, сообраќајот се одвива нормално


Околу 200 луѓе вчера се собраа на протест пред судот

Пред Кривичниот суд во Скопје утринава нема граѓани кои протестираат против приведувањата на лица за учество во настаните во Собранието од 27 април годинава. Сообраќајот, како што јавува МИА, се одвива нормално.

До доцна синоќа пред Кривичниот суд протестираа приврзаници на ВМРО-ДПМНЕ и членови на семејствата на приведените. Протестот почна вчера попладне на повик од лидерот на ВМРО-ДПМНЕ, Никола Груевски.

На протестот се обратија актуелни и поранешни пратеници, членови на опозициската партија, кои повикаа за итно ослободување на приведените лица.

Инаку, во Кривичниот суд заврши распитот на приведените за насилствата во Собранието на 27 април. Тие се осомничени за „терористичко загрозување на уставниот поредок и безбедноста на државата“.

Од Судот за МИА изјавија дека решенијата за сите приведени се подготвуваат и оти се очекува да бидат објавени во текот на денот.

Синоќа им е одредена мерка притвор во траење од 30 дена на пет лица меѓу кои на поранешниот министер за внатрешни работи и директор на Бирото за јавна безбедност Митко Чавков и на оперскиот пејач Игор Дурловски, кој беше дел од граѓанската иницијатива „За заедничка Македонија“.

На две лица им е одредена мерка куќен притвор.

Пратеници кои беа приведени вчера се пуштени и за нив се чека одговор од Собранието од кое Судот побара одземање на пратеничкиот имунитет. Вчера беа уапсени 36 луѓе, меѓу кои и пратеници од ВМРО-ДПМНЕ.

XS
SM
MD
LG