Заврши трката за глас повеќе во 35-те општини во кои денеска се гласаше во вториот круг на локалните избори. Избирачките места беа отворени од 7 до 19 часот, а во текот на денот стигнаа извештаи од неколку организации за прекршувања на гласачките права и обвинување од опозициската ВМРО-ДПМНЕ за „недемократска атмосфера и системски закани и уцени врз граѓаните“.
На прес конференцијата доцна попладнево Државната изборна комисија сооошти дека излезноста до 17 часот била 43,83 отсто, што е помала од првиот изборен круг кога до истиот временски период изнесуваше 49,14 проценти. Портпаролката на ДИК Љупка Гугучевска информираше дека најголема излезност до 17 часот имало во општина Демир Капија, 76,59 отсто, а најмала во Шуто Оризари, 31,76 отсто.
Таа соопшти и дека поради проблеми со УВ ламбата гласањето било прекинато на половина час во избирачки места во Шуто Оризари и во Бутел, но потоа продолжило.
Случаи на семејно гласање, фотографирање ливчиња
Претходно министерството за внатрешни работи информираше дека регистрирале три случаи на фотографирање на гласачко ливче и тоа во општините Шуто Оризари, во Црниче и во Пробиштип.
„Забележано е и едно нарушување на јавниот ред и мир во општина Шуто Оризари каде што едно лице пријавило дека било нападнато од неколку други лица. Полицијата привела едно лице и работи на расчистување на случајот“ рече портпаролот на МВР Тони Ангеловски.
Граѓанската асоцијација Мост на неколку одделни прес-конференции информираше за нерегуларности. Во Демир Капија имало поголем број лица кои гласале со придружба, во Шуто Оризари имало случаи на семејно гласање и а и случај кога членови на избирачки одбори им помагале и им укажувале на гласачи како да гласаат. Случаи на семејно гласање тие нотираа и во гласачко место во општина Долнени. Во Чаир, пак, гласач фотографирал гласачко ливче по што била повикана полиција, а гласањето кратко прекинато. Се јавува за слично нарушување на изборниот процес и во Кисела Вода. Асоцијацијата која го следеше денешното гласање со 2.917 набљудувачи информира и за проблеми со мастило и УВ ламби на неколку гласачки места.
Од невладината организација Цивил која исто така имаше набљудувачи информираа за три случаи на притисок врз нивните тимови во општините Штип, Кавадарци и Сарај. Џабир Дерала на прес-конференција информира дека одлучиле да ги повлечат своите набљудувачи од село Ласкарци, општина Сарај, во кое и на првиот изборен круг се нотирани изборни нерегуларности. И тие нотираат семејно гласање во Студеничани и Липково, како и кршење на изборен молк во Пробиштип.
Фотогалерија: Локални избори 2017 - Втор круг гласање
Груевски- недемократска атмосфера и системски закани
Лидерот на ВМРО-ДПМНЕ Никола Груевски кој денеска гласаше во општината Кисела Вода обвини за, како што рече, недемократска атмосфера и системски закани и уцени врз граѓаните.
„Колку што имаше нерегуларности во првиот круг на гласањето, тие уште повеќе се зајакнаа во вториот круг. Претежно се манифестираат во две форми: масовен поткуп на граѓаните како никогаш досега во Македонија и закани, притисоци и уцени врз луѓето, претежно кон наши активисти од страна на СДСМ“, изјави Груевски по гласањето.
На секои избори, нагласи тој, имало поплаки од разни закани, притисоци, застрашувања, но овојпат тоа било многуструко зајакнато. Груевски тврди дека луѓето отворено се уценувале со губење работа, особено администрацијата, со кривични пријави, недобивање субвенции и друго.
Биљал Касами, претседател на движењето Беса кој е кандидат за градоначалник на Тетово по гласањето рече дека тие се залагаат овие избори да бидат фер и демократски за сите граѓани да имаат можност да го искажат својот револт за она што е ветено, а не е реализирано.
„Ние сме убедени дека во Тетово ќе дојдат промените и оти доаѓа нова власт што ќе работи во служба на сите тетовци без разлика на припадноста. Се надеваме дека веќе од вечерва, односно од утре, во локалната власт ќе дојдат нови луѓе кои пред да мислат за себе, повеќе ќе мислат за граѓаните и кои ќе реализираат проекти што се во служба на сите граѓани, изјави Касами.
Претседателот на СДСМ Зоран Заев, пак, денеска не гласаше оти во Струмица нема втор круг.
Претседателот на Собранието Талат Џафери по гласањето во Форино гостиварско рече дека го радувал фактот дека атмосферата била мирна и што граѓаните имале можност да гласаат европски.
„Тоа е придобивка на политичкиот систем во Република Македонија со која граѓаните слободно ја изразуваат нивната слободна волја. Во тој контекст сакам да им честитам на граѓаните за нивниот однос и на претендентите што ќе ја добијат нивната доверба“, изјави Џафери.
Во вториот круг од локалните избори за градоначалничката функција во 35 општини се натпреварува 70 кандидати. Од вкупно 10 скопски општини, втор круг имаше во шест и тоа во Кисела Вода, Гази Баба, Бутел, Чаир, Сарај и Шуто Оризари. Интересни битки за глас повеќе пред вториот круг се водеа за Штип, Струга, Тетово и Гостивар.
