Достапни линкови

Најмногу коментари за постојаните протести во Скопје


Анти-владините што се одржуваат деновиве и за денеска најавениот провладин собир во Скопје се најкоментираните теми од нашите читатели.

По големиот сеграѓански протест во организација на невладини организации и опозицијата предводена од СДСМ во Скопје, Цеца од Скопје на веб-страницата на Радио Слободна Европа кратко и јасно го искажала својот став: „Овој народ е за пофалба, без закани доброволно се собира, Грујо треба да падне“. На Твитер, Фендета напишала: „Непроценлива глетка“. На нашата Фејсбук страница, пак, Мефаил Адили напишал: „ВМРО дојде на власт со бугарска политика, а ќе си замине со српска пропаганда“.

Овој народ е за пофалба, без закани доброволно се собира, Грујо треба да падне.
Коментар од читател.

Има повеќе пораки, главно подбивачки, во врска со бројноста на протестантите, а Далибор Андреевски порачува за тие што по протестот останаа да ноќеваат пред Владата: „Пратете им цистерна и намокрете им го тревникот убаво“. Звеки Сабја смета дека тие што протестирале не знаеле зошто протестират и дека сите требало да се испратат дома „со по една клоца“, како што напишал.

По нашата информација за осмиот протест на граѓаните, не пред Владата, зашто не им е дозволен пристап, туку по улиците на Скопје и пред Собранието и по најавениот контра-протест на владејачката партија за понеделник вечер, Незабеган коментира дека само кај нас во Македонија се организира (контра) протест за искажување задоволство. Но, додава истиот посетител на нашата веб-страница, едни одат на протест зашто сакаат, а други на друг протест зашто мораат (ѝ должат на партијата).

Нема власт со тие стари фаци и со тој претседател кого Бог го испратил од нива да ги пуни своите сметки.
Коментар од читател.

Анонимен во коментарот се обраќа на СДСМ, коментирајќи дека од 2006 се испразнило „она што е крадено, па сега мора по улица да се земе власта пак за да може да се пуни нормата“ и предвидува дека никогаш немало да дојде на власт со тие, вели, „стари фаци и со тој претседател кого Бог го испратил од нива да ги пуни своите сметки“. Дејан од Скопје цинично го коментира слоганот на антивладините протести, „ЗБОГУМ НИКОЛА“: „Колку што разбирам, пораката значи дека демонстрантите ќе се иселуваат некаде, бидејќи Груевски не изгледа дека има намера да оди никаде?“ Драге од Преовце, пак, како да се надоврзува и напишал: „Сас здравје ви пут“.

Љупчо од Скопје својот протест го упатува до Радио Слободна Европа: „Протестирам што ова радио, инаку гласило на ЦИА, ми врши пропаганда и ми соборува влада за која сум гласал“.

Незабеган ја коментира информацијата дека ВМРО-ДПМНЕ бара оставка од Заев по објавувањето на снимката на Јутјуб на која се слуша дека Заев наводно бара мито од некој соговорник: „Иста моронштина и инфантилност како од оние клонови/кловнови од 'граѓанското' здружение ГДОМ кои го повикуваат граѓанството за заштита од опозицијата која дури не е во парламентот“. Па извикува дека ова го нема ни во Северна Кореја ниту го имало во Србија на Милошевиќ.

  • 16x9 Image

    Горица Попова

    Родена е во Кочани, дипломирала во 1976 год. на Филозофскиот факултет во Скопје. Како новинар работи над 30 години. Почнала во Македонско радио- Радио Скопје во 1978 год. Од јуни 2009 год. е соработник на Радио Слободна Европа.

XS
SM
MD
LG