Училишното ѕвонче годинава се одлогира, наместо да заѕвони за крај на школската година. Учениците од март, кога поради пандемијата на коронавирус, беа затворени училиштата, следеа онлајн настава. Според реакциите на социјалните мрежи, се чини дека најрадосни поради крајот на учебната година се родителите на основците, кои во изминативе три месеци имаа време повторно да пишуваат домашни и да повторат за дропки, вадење пред заграда, подмети и прироци. Изгледа дека им е доста.
Дел од родителите се чувствуваат како да ја работеле работата на наставниците.
Од друга стана, пак, наставниците се истовремено и родители, па во исто време додека држат онлајн настава по македонски за 30 деца, треба да им ја објаснуваат и Талесовата теорема на сопствените две.
Родителите, кои повторно „завршија“ трето одделение се надеваат дека од септември нема да мора да учат четврто. Други, пак, иронизираат со вториот бран заразени со коронавирус.
На професорите, пак, им недостига џагорот за крај на годината.
Во меѓувреме, трудница-лекарка, што всушност не била лекарка, отишла да се пораѓа на ГАК, но не кажала дека свекор ѝ е заболен од коронавирус. Кога вработените дознале, таа не дозволила да ја тестираат и отишла да са породи во Ремедика. Сега во изолација се вработени и во државната и во приватната болница.
Големо внимание предизвика информацијата дека турбо-фолк ѕвездата Цеца Ражњатовиќ е заболена од коронавирус. Со оглед дека на прославата за раѓањето на нејзиниот внук пред неколку дена присуствуваше речиси целата српска естрада, Пинк во наредниот период веројатно ќе остане без ѕвезди.
