Достапни линкови

Сложни пратеници и во петок легализираат дивоградби


Владејачкото мнозинство и опозициската ВМРО-ДПМНЕ здружно го донесоа новиот закон за легализација на дивоградби, со кој ќе може да се легализираат вакви објекти и во национални паркови.

Тој што има дивоградба на Пелистер сега ќе може да си ја легализира, аџанак, баџанак. Со новиот закон за легализација на дивоградби, кој сложно го изгласаа пратениците од власта и од опозицијата, ќе може да се легализираат дивоградбите секаде – и во национални паркови и во заштитени подрачја, освен на охридското крајбрежје, а не може да се легализираат само згради. За разлика од претходниот закон со кој дивоградбите се легализираа за едно евро за квадратен метар, сега тоа ќе биде поскапо. Продолжува старата македонска традиција, ако не можеш да го спроведеш законот – промени го, коментираат граѓаните на социјалните мрежи.

Законот исто така отвора можност од судски процеси да се спасат обвинетите за бесправно градење, што многу им се погоди на сегашните и поранешни функционери. Сложни пратеници и во петок градат.

Антикорупциската комисија најави дека ќе го анализира законот, зашто има намера да поднесе иницијатива до Уставниот суд.

За законот не гласаше пратеникот Мирослав Богдановски од ДОМ, кој е дел од владејачкото мнозинство. Демократскиот сојуз, кој исто така е коалиционен партнер во власта, се противи на донесувањето на законот и побара од претседателот Стево Пендаровски да не го потпишува указот.

Вакво барање има и од аналитичари и граѓански активисти.

Дел од граѓаните коментираат дека ова само ги мотивира оние што градат на диво.

Други, пак, прашуваат дали се будали тие што ги почитуваат законите.

Некои иронично бараат повторно преименување на државата.

Други забележуваат дека борбата против дивоградбите се појавува само пред избори, после тоа се што е диво може да се припитоми.

Сопственикот на дивоградбата кај Мавровка не издржа, му го урнаа објектот пред да се донесе законот.

Претходниот закон за легализација на дивоградби го донесе претходната власт на Никола Груевски пред 10 години. Со тој се предвидуваше легализација на дивоградби за едно евро за квадратен метар. Со сегашниот се предвидува легализацијата да чини поскапо, отколку да се платени комуналии на време.

  • 16x9 Image

    Срѓан Стојанчов

    Новинарската кариера ја започна како новинар во внатрешно-политичката рубрика на дневниот весник Шпиц во 2008 година. Роден е на 27.10.1981г. во Скопје. Од февруари 2009 работи како постојан дописник за Радио Слободна Европа од Скопје.

Трендинг

Трендинг е седмична рубрика на Радио Слободна Европа на македонски јазик, во која автентично ви пренесуваме дел од највпечатливите коментари на социјалните мрежи за одредена тема. Пренесените коментари се мислења или ставови на авторите на коментарите и не се дел од уредувачката политика на РСЕ.

Повеќе
XS
SM
MD
LG