Инфлацијата во мај достигна 12 отсто, а храната е поскапена за дури 17 отсто во однос на истиот месец минатата година. Тоа се случува додека сè уште се на сила владините мерки за ограничување на цените на основните животни производи. По укинувањето на мерките цените отидоа во небо.
Од почетокот на месецов, прекина намалувањето на акцизата и ДДВ за горивата и намалувањето на ДДВ и ограничување на маржите на основните прехранбени производи. Зејтинот веднаш поскапе за 25 денари, шеќерот за 8, брашното и млекото за по 9 денари, покажуваат податоците што ги објави ценометар.мк.
Некои производи се поскапени за дури 70 отсто. Граѓаните се жалат дека едвај врзуваат крај со крај, додека други посочуваат дека таква е ситуацијата во цела Европа.
може да ми се објасни некој зошто дивела макароне беа 50, а сега 72 ден.? како ова не е профитерство? па на пазар пола кило домашни јуфке и ќе се убиеш од јадење
— Тетоец (@Tetoevsky) June 6, 2022
Вицепремиерот за економски прашања Фатмир Битиќи рече дека има вртоглаво и вештачко зголемување на цените, а маржите за одредени производи скокнале над 70 отсто, но апелираше на етика и солидарност од трговците.
И? Што ќе направат инспекторите?
— Сеир Бег (@Seirbey) June 4, 2022
Само чоко бисквит-от пркоси на инфлацијата. 10 денари, фикс.
— Adam Smith Jr. (@kardelj_jr) June 6, 2022
Да ви кажам само, во Чаир уште е 15 ден ѓеврек, тука инфлацијата касни.
— Magneto (@magn3to0) June 6, 2022
Автобуска карта Куманово - Скопје чини 170 мкд.На зејтин ли почнаа да возат автобусите?
— Аууу Џониии (@AuuuDzoniii) June 6, 2022
Битиќи се закани дека по завршувањето на инспекциите, владата ќе излезе со список на компании кои енормно ги зголемиле цените, па граѓаните нека одлучат дали ќе купуваат од тие трговци.
Опозицијата веднаш реагираше. Трајко Славески од ВМРО-ДПМНЕ реагираше дека заканите кон компаниите се непримерни и дека ја деградираат пазарната економија. На Твитер реагираше и поранешниот пратеник Илија Димовски.
Вицепремиер се заканува на компании за зголемени цени,два дена откако неговата Влада ги зголеми даноците и акцизите..."Кој нема да полуди, тој не е здрав"
— Ilija Dimovski (@ilijadimovski) June 3, 2022
Дел од граѓаните бараат списокот да биде објавен веднаш, други прашуваат што се тоа фер маржи во капиталистичко општество каде што цените слободно се формираат, а на трети заканата од Битиќи им прозвучи како скеч од популарните К-15.
Немојте со тие куршуми, се шегуваат некои.
Дел од граѓаните потсетуваат дека во нормални држави тоа го прават Здруженијата на потрошувачи, кои вршат јавен притисок за компаниите да не профитираат енормно врз грбот на граѓаните, додека владата треба само да се грижи за спроведување на законите.
Во владата најавија дека се спрема нов пакет антикризни мерки, кој ќе биде донесен по изгласувањето на ребалансот на буџетот. Овој пат мерките ќе бидат насочени само кон најзагрозените групи граѓани.