Премиерот Димитар Ковачевски денеска се сретна со помошникот генерален секретар на НАТО за разузнавање и безбедност, Дејвид Катлер при што тема на разговор била воената агресија на Русија врз Украина и понатамошното влијание на овие случувања врз глобалната енергетска состојба и прехранбената индустрија, сооопштија од владиниот кабинет.
Ковачевски на средбата ја истакнал цврстата поддршка за територијалниот интегритет и суверенитет на Украина во нејзините меѓународно признати граници и посочил дека земјава ќе ја продолжи политичката и практичната поддршка за помош на Украина.
Оваа позиција била поздравена од Катлер, како исклучително важна за Алијансата, се посочува во соопштението.
Ковачевски и Катлер на средбата изразиле заемна благодарност за соработката на Северна Македонија со НАТО особено во делот на добивање навремени информации и соработката со македонските безбедносни служби.
„Ковачевски и Катлер на средбата разговараа за справувањето со хибридните закани, што е еден од главните приоритети на НАТО, посочувајќи дека Алијансата мора ефикасно да се бори против ваквите закани“, додаваат од владиниот кабинет.