Вести
Мицкоски: Духот на ВМРО го чувал македонскиот идентитет во најтемните времиња
Секој народ се изроди низ борба, откажувања, безброј жртви и силна вера и копнеж за својата слобода. Нашиот, иако по бројност мал, веројатно ја има најживописната борба за слобода, која нè учи дека нема невозможни работи и дека борбата за слобода е еден трнлив пат, испишан со крв и страдања, една голема и долга низа на востанија, на човечки приказни за храброст, за мудрост, но и на предавства, завери, меѓусебни и надворешни борби, рече во обраќање премиерот Христијан Мицкоски, на свечената академија „Од идеја до држава“ по повод Денот на македонската револуционерна борба - 23 Октомври.
„На денешен ден се роди организацијата што потоа ги одбележа сите буни и востанија, која чекореше паралелно со Македонија низ нејзиното создавање. И тој сон за слобода, таа мајка на борбата на нашиот народ – ВМРО – му припаѓа на секој еден кој ја сака и почитува нашата борба, во чие срце пламти зборот Македонија. На 23 октомври 1893 година се создаде Внатрешната македонска револуционерна организација – идеја што ја надживеа својата епоха, луѓето и сите граници“, истакна Мицкоски.
Тој кажа дека од таа скромна соба, со само неколку раце и многу срца, започна големата приказна за македонската борба и, како што рече, тие млади револуционери не беа генерали, не беа владетели, туку обични луѓе кои одбраа нешто повисоко од животот – да ѝ дадат иднина на татковината.
Мицкоски посочи дека секојпат кога пред државата стоеле темни времиња, кога се чинело дека Македонија ќе биде избришана, токму духот на ВМРО го чувал името, верата и достоинството на овој народ.
Мицкоски посочи дека во денешно време државата се соочува со поинакви предизвици, но со подеднакво значење за иднината.
„Како премиер на државата, свесен сум за секој еден од нив, и покрај сите нив, еден од најважните е битката за стандардот и подобриот живот. Тоа е она што го бара и што му е потребно на народот. И битката за Европската Унија треба да се гледа низ поривот за подобар живот и стандарди, и затоа таа наша цел, и покрај сите удари и пречки, остана патот што сакаме да го изодиме. И овој пат е наше природно право, и иако многу пати откажувањата што ги направивме не беа фер, народот со разочарување и со кнедла во грлото ги прифаќаше. Не е едно, не се две, туку тоа полека станува непринципиелен начин на однесување, подвлече премиерот во своето обраќање на свечената академија „Од идеја до држава“ по повод Денот на македонската револуционерна борба - 23 Октомври.
види ги сите денешни вести
Ново обинение во Молдавија за наводните руски обуки во БиХ
Молдавското обвинителство ја заврши истрагата и подигна обвинение против уште пет лица кои наводно учествувале на обуки во Босна и Херцеговина (БиХ) со цел предизвикување немири во Молдавија, пред претседателските избори и референдумот за пристапување кон Европската унија во 2024 година.
Меѓу овие пет лица, од кои една е жена, на возраст меѓу 27 и 50 години, има државјани на Молдавија и еден обвинет од Украина со финско државјанство.
Двајца од обвинетите играле улога на коорганизатори, обучени за координирање на подгрупи на учесници во јавни манифестации од дестабилизирачка природа. Тие се во домашен притвор, иако обвинителите побараа продолжување на ефективен притвор, соопшти Обвинителството.
Во Молдавија веќе се води судска постапка за овие обуки против четири обвинети лица за организирање кампови во Босна и Херцеговина.
Сега обвинителството тврди дека тројца од новообвинетите биле поканети на обука од една од претходно обвинетите.
„Таа им пристапила и, бидејќи немале постојано вработување, им предложила да учествуваат на ’спортски тренинг‘ во Романија, за надомест од 400-500 долари неделно (плаќани преку електронски паричници во криптовалути). Другите двајца обвинети, жена и друг маж, биле убедени да патуваат од други лица кои веќе се испратени пред суд, користејќи ги истите мобилни апликации – Телеграм и Јандекс“, се вели во соопштението.
По пристигнувањето во Романија, петмината обвинети го продолжиле своето патување кон Босна и Херцеговина, каде што останале без пасоши и телефони.
Обвинителството тврди дека во БиХ биле транспортирани во камп во шума, каде што имало неколку шатори и маси со компјутери, додека другите учесници на обуката учеле како да управуваат со дронови.
„Тие биле обучувани од лица кои зборуваат руски јазик една или две недели, фокусирајќи се на контрола на дронови, тактики на предизвикување паника и хаос, пробивање на полициски кордони, подготовка на запаливи предмети, како и за елементи на психологија“, се наведува во обвинението.
Лицата биле уапсени по враќањето во Молдавија, а биле спроведени и претреси. Пронајдени се мини-дронови со камери и механизми за исфрлање, како и пиротехника, компоненти за дронови, VR очила за дронови и радиоопрема.
Кај еден од обвинетите се пронајдени речиси 300 летоци со јасна дискриминаторска содржина, кои промовирале идеи за нетолеранција и непријателство меѓу членовите на различни верски заедници, користејќи изрази и слики што поттикнуваат омраза, отфрлање и поделби.
Во моментов, според одлуките на истражниот судија, двајца од коорганизаторите се во домашен притвор, а другите се под судски надзор.
Според молдавскиот Кривичен законик, кривичното дело организирање или водење масовни немири, извршено во околностите што ги опишува Обвинителството во овој случај, се казнува со затвор од четири до осум години.
Информациите за „руските кампови“ во Босна и Херцеговина се појавија во октомври 2024 година. Во тоа време, молдавските безбедносни агенции изјавија дека идентификувале повеќе од сто млади луѓе кои наводно биле обучени во Русија, Босна и Херцеговина и Србија, за да ја дестабилизираат земјата.
Босанските агенции биле информирани, потврдија тогаш повеќе извори за РСЕ.
Едно од лицата кои беа доведувани во врска со овие кампови и обуки е рускиот државјанин Андреј Бекер, кој претходно бил поврзан со руската платеничка група Вагнер.
Покрај камповите и обуките во Босна и Херцеговина, молдавските агенции утврдиле дека камповите работеле и во Србија. Така, на 26 септември, полицијата во Србија уапси две лица обвинети за организирање борбено-тактичка обука за молдавски и романски државјани, чија цел била предизвикување немири во Молдавија.
Апсењата дојдоа откако властите во Кишињев јавно предупредија за постоењето на борбени кампови во Србија, наведувајќи дека тие се организирани од руската тајна служба со цел дестабилизација на Молдавија.
На почетокот на декември, Молдавија изврши околу 50 претреси на неколку локации во земјата и пронајде докази дека организирана група, која претходно се обучувала во камп во Србија, планирала да предизвика немири во Молдавија.
Руски војници осудени за смртта на Американец кој се борел за Кремљ во Украина
Суд во Украина, на територија контролирана од Русија, осуди четворица руски војници за смртта на Расел Бентли, американски државјанин кој стана познат како „Донбаскиот каубој“ откако се приклучи на силите поддржани од Русија во источна Украина.
Судот во градот Донецк, окупиран од Русија, осуди двајца војници, мајорот Виталиј Вањатски и поручникот Андреј Јорданов, на по 12 години затвор, додека наредникот Владислав Агалцев доби 11 години.
Четвртиот војник, Владимир Бажин, е осуден на година и пол затвор за помагање во прикривањето на смртта на Бентли. Четворицата беа прогласени за виновни за убиството на Бентли бидејќи верувале дека е американски саботер.
Руските власти соопштија дека истрагата покажала дека Американецот бил мачен пред да биде убиен. Потоа неговите киднапери се обиделе да ја прикријат неговата смрт со детонирање на автомобилот со кој се наоѓало неговото тело.
64-годишниот Бентли бил присутен за време на руската интервенција во Украина што започна во 2014 година. По потекло од Тексас, тој се нарекувал себеси „Донбаски каубој“ и станал популарен на руските пропагандни мрежи поради неговите критики кон американската влада.
Според истражителите, Вањацки и Јорданов го фатиле Бентли „како се подготвува да ги снима последиците од ракетен напад“ на 8 април 2024 година.
Тие барале Бентли да ги покаже своите документи и да ја објасни причината за неговото присуство таму, на што тој се претставил како новинар, бидејќи работел за руската државна новинска агенција Спутник. Потоа Вањацки „ја известил командата на воената единица дека го идентификувал диверзантот“.
Му било наредено да го однесе Бентли до командниот пункт, по што тој му наредил на Јорданов да го притвори Американецот.
Бентли бил ставен во автомобил, претепан и мачен, што резултирало со негова смрт.
Потоа Вањацки и Агалцев го ставиле неговото тело во багажникот на автомобил и го детонирале возилото, соопштија истражителите.
Следниот ден, Бажин и Јорданов отишле на местото на експлозијата на автомобилот и ги запалиле останките од жртвата.
Бентли, чиј воен повикувачки знак бил Тексас, исчезна во Донецк во април 2024 година.
Тој се борел за батаљонот Восток помеѓу 2014 и 2017 година и добил руско државјанство во 2021 година. Претходно, три години служел во американската армија и еднаш се кандидирал за американскиот Сенат додека живеел во Минесота.
Маргарита Симоњан, главната уредничка на руската државна телевизија РТ, позната по својата одбрана на Кремљ, на мрежата Икс тогаш напиша дека Бентли загинал за „нашите луѓе“ во Донецк.
Нема договор за Донбас, вели Зеленски кој разговараше со европските сојузници
Украинскиот претседател Володимир Зеленски се сретна со европски лидери кои сакаат да се осигурат дека напорите предводени од САД за ставање крај на војната на Русија против Украина нема да резултираат со едностран договор што би ја наградил Москва за агресијата против нејзиниот сосед и би го оставил Киев ранлив на идни напади.
Зеленски се сретна со британскиот премиер Кир Стармер, францускиот претседател Емануел Макрон и германскиот канцелар Фридрих Мерц на 8 декември во Лондон. Подоцна, тој треба да се сретне со генералниот секретар на НАТО Марк Руте во Брисел, а поканети се и високи претставници на Европската Унија, Урсула фон дер Лајен и Антонио Коста.
„Многу ми е мило што ве гледам тука на речиси четвртата годишнина од овој ужасен конфликт, кој сега е во критична фаза при напорите за постигнување мир“, рече Стармер откако ги пречека лидерите во неговата резиденција на Даунинг стрит број 10.
Разговорите предводени од САД за потенцијален договор за крај на војната на Русија со Украина сè уште не резултираа со договор за контрола на територијата во источниот украински регион познат како Донбас, изјави украинскиот претседател Володимир Зеленски за Блумберг њуз пред состаноците што денеска, 8 декември, ги има со европските лидери во Лондон и Брисел.
„Постојат визии на САД, Русија и Украина – и ние немаме унифициран став за Донбас“, изјави Зеленски во телефонско интервју за Блумберг.
Тој посочи дека тоа е едно од неколкуте „чувствителни прашања“, вклучувајќи ги и безбедносните гаранции за Украина, кои бараат понатамошна дискусија.
На почетокот на состанокот во Лондон, Мерц рече дека е „скептичен во врска со некои од деталите што ги гледаме во документите што доаѓаат од американската страна, но дека треба да разговараме за тоа“.
„Затоа сме тука“, рече германскиот канцелар.
Макрон посочи дека е важно да се најде „конвергенција“ помеѓу ставот на САД и ставовите што ги делат Европа и Украина.
Разговорите на Зеленски со европските лидери во Лондон и Брисел следуваат по тридневните преговори меѓу украинските и американските претставници во близина на Мајами, додека преговарачите се обидуваат да постигнат договор откако минатиот месец беше објавен американскиот нацрт-мировен предлог.
Планот од 28 точки беше оценет како исклучително поволен за Русија, а Киев отфрли некои од построгите, тврдокорни барања на кои рускиот претседател Владимир Путин инсистираше дури и пред да ја започне својата инвазија на Украина во февруари 2022 година.
„Во моментов започнуваме нова дипломатска недела – ќе има консултации со европските лидери. Прво и основно, безбедносни прашања, поддршка за нашата отпорност и пакети за поддршка за нашата одбрана“, рече Зеленски во своето вечерно обраќање, снимено во воз на 7 декември.
Во Лондон, Зеленски треба да се сретне со британскиот премиер Кир Стармер, францускиот претседател Емануел Макрон и германскиот канцелар Фридрих Мерц, најголемите поддржувачи на Киев во Европа.
Потоа, во Брисел тој ќе се сретне со генералниот секретар на НАТО, Марк Руте, и со високите претставници на Европската унија, Урсула фон дер Лајен и Антонио Коста, соопшти Алијансата.
„Важно е да се запомни дека овој конфликт е стар речиси четири години, дека Русија е агресор и затоа, ако има прекин на огнот, тој мора да биде фер, бидејќи Украина претрпе огромни, огромни загуби и плати многу висока цена за војна што не беше нејзин избор“, изјави Стармер за британски „Прес асосиејшн“ пред разговорите со Зеленски.
Тој додаде дека мирот „мора да биде траен, бидејќи знаеме дека Путин не ги почитува договорите зад кои нема силни безбедносни гаранции и дека на тоа ќе се фокусираме“.
Во меѓувреме, разговарајќи со новинарите, американскиот претседател Доналд Трамп го критикуваше својот украински колега, велејќи дека е „малку разочаран“.
„Разговаравме со [рускиот] претседател [Владимир] Путин и разговаравме со украинските лидери, вклучувајќи го и Зеленски, претседателот Зеленски, и морам да кажам дека сум малку разочаран што претседателот Зеленски сè уште не го прочитал предлогот, тоа беше пред неколку часа“, изјави Трамп пред новинарите на 7 декември.
Главниот преговарач на Украина, Рустем Умеров, изјави дека денеска (понеделник) ќе го информира Зеленски за последниот развој на настаните.
Една од главните цели на Киев во разговорите во Мајами беше да ги добие „сите нацрти на тековните предлози со цел детално да ги разгледа со украинскиот претседател“, напиша Умеров на социјалната мрежа Икс.
„Денес ќе му обезбедиме на украинскиот претседател целосни информации за сите аспекти на дијалогот со американската страна и сите документи“, наведе тој.
Деталите за предлогот по промените во планот од 28 точки не се објавени, а Трамп не кажа ништо за содржината.
Американските и украинските претставници во последните денови посочија дека клучните точки се спорната контрола на територијата – особено во Донбас – и безбедносните гаранции за Украина.
Зеленски за Блумберг изјави дека Киев инсистира на посебен договор за безбедносни гаранции од западните сојузници, првенствено од САД.
„Постои едно прашање на кое јас, и сите Украинци, сакаме да добиеме одговор: Ако Русија повторно започне војна, што ќе прават нашите партнери“, рече тој.
Украинскиот политички аналитичар Володимир Фесенко рече дека иако „не знаеме точно што предлагаат САД“, главна пречка за договор би можела да биде клаузулата во планот од 28 точки што ја обврзува Украина да ги повлече своите сили од територијата што сè уште ја контролира во регионот Донецк.
„Мнозинството Украинци, и покрај сите тековни тешкотии, веројатно нема да ја прифатат идејата Украина доброволно да го напушти Донбас без да добие ништо за возврат, дури ни реални гаранции за прекин на огнот“, изјави за „Курент тајм“ Фесенко, кој е раководител на Центарот за политички студии Пента, во Киев.
Во бескомпромисна изјава минатата недела, Путин рече дека Русија ќе ја преземе контролата врз Донбас „со воени или други средства“, сугерирајќи дека Москва нема да се согласи на договор што ќе остави кој било дел од регионот во украински раце.
Тој го кажа истото и за делот од Украина некогаш познат во Русија како „Новорусија“, сугерирајќи дека Москва би можела да бара целосна контрола врз регионите Запорожје и Херсон. Украина сè уште држи под контрола големи делови од двата јужни региони, вклучувајќи ги и нивните главни градови.
По преговорите во Мајами, Зеленски рече дека разговарал со американските преговарачи, Стив Виткоф и Џаред Кушнер.
„Американските претставници се свесни за основните позиции на Украина, а разговорот беше конструктивен, иако не беше лесен“, рече Зеленски.
Во меѓувреме, Русија ги продолжи своите воздушни напади врз клучната украинска инфраструктура додека зимските температури продолжуваат да паѓаат.
Според регионалните власти, руските сили ја нападнале Ахтирка во Сумиската област ноќта на 8 декември.
Гувернерот Олег Григоров изјави дека седум лица се повредени во напад врз деветкатна станбена зграда и сите се префрлени во болница.
Според соопштението на Службата за итни случаи на Украина, пожарникарите изгаснале пожар кој бил од вториот до петтиот кат и евакуирале 35 жители, спасувајќи седум лица, меѓу кои и едно дете, од погодените станови.
Во Чернигов, пак, е оштетена станбена зграда како резултат на пад на руски дрон. Три лица се повредени, од кои едно е хоспитализирано, објави Службата за итни случаи на мрежата Телеграм на 8 декември.
Пред планираните посети на Зеленски на Лондон, Брисел и Рим, на кои тој ќе разговара за мировниот процес, италијанската премиерка Џорџија Мелони разговараше телефонски со него.
Според соопштението од нејзиниот кабинет, таа ја потврди солидарноста на Рим со Киев и вети дека ќе обезбеди итна помош за поддршка на енергетската инфраструктура на Украина и нејзиното население.
Од нејзиниот кабинетот додадоа дека Италија ќе достави дополнителни резерви, вклучително и генератори, за поддршка на енергетската инфраструктура и на украинското население, и оти целта останува траен и праведен мир.
Заем за репарација за Украина
Во меѓувреме, лидерите на неколку земји-членки на ЕУ повикаа на брза акција за предлогот за користење на десетици милијарди долари од замрзнатиот руски имот за да се обезбедат заеми за репарација на Украина, која е во криза со финансиски средства.
„Поддршката на Украина во нејзината борба за слобода и независност не е само морална обврска – туку е и во наш сопствен интерес“, рекоа лидерите на Естонија, Финска, Ирска, Латвија, Литванија, Полска и Шведска во писмо до претседателите на Европскиот совет и Европската комисија, Антонио Коста и Урсула фон дер Лајен.
„Времето е од суштинско значење“, напишаа тие, нагласувајќи дека постигнувањето договор за долго дискутираниот предлог на состанокот на Европскиот совет на 18 декември ќе ја стави „Украина во посилна позиција да се брани и во подобра позиција да преговара за праведен и траен мир“.
Тајланд започна воздушни напади врз Камбоџа по граничниот судир
Тајланд започна воздушни напади врз соседна Камбоџа на 8 декември, соопшти тајландската војска. Ова доаѓа додека двете страни разменуваат обвинувања за најновото разгорување на конфликтот во спорната гранична област во кој загина еден тајландски војник.
Откако камбоџанските војници отворија оган врз тајландските сили во понеделник наутро во покраината Убон Рачатани, „војската доби извештаи дека тајландските војници биле нападнати со боева муниција, што резултирало со смрт на еден војник и ранување на четворица други“, наведува во соопштението портпаролот на тајландската војска, Винтаи Суваре.
Винтаи додаде дека Тајланд почнал „да користи авиони за да нападне воени цели во неколку области“ со цел да ги одбие нападите на камбоџанските сили.
Портпаролката на Министерството за одбрана на Камбоџа, Мали Сочеата, изјави дека тајландските сили започнале напад врз камбоџанските трупи во пограничните покраини Преах Вихер и Одар Минчи во понеделникот наутро, обвинувајќи го Тајланд за „пукање со тенкови кон храмот Тамоне Том“ и областите во близина на Преах Вихер.
Таа додаде дека Камбоџа не возвратила на нападите.
Мет Миасфикдеј, портпарол на покраинската администрација Одар Минчи, изјави дека е пријавено пукање во областите на храмовите Тамоне Том и Та Крабеи, додавајќи дека „голем број жители што живеат во близина на границата бегаат од своите домови“.
Тајландската војска соопшти дека околу 35.000 луѓе во Тајланд се евакуирани од областите долж границата со Камбоџа.
Исто така, тајландската војска ги обвини камбоџанските сили дека лансираат ракети врз цивилни области во покраината Бури Рам, додавајќи дека нема пријавени жртви.
Двете страни објавија за судири во неделата, а тајландската војска објави дека двајца војници се ранети.
Петдневните борби меѓу Тајланд и Камбоџа ова лето резултираа со 43 мртви и околу 300.000 раселени пред да стапи во сила прекинот на огнот.
Прекинот на огнот беше делумно посредуван од САД, Кина и Малезија.
Во октомври, американскиот претседател Доналд Трамп потпиша заедничка декларација меѓу Тајланд и Камбоџа, промовирајќи нови трговски договори со двете земји откако тие се согласија да го продолжат прекинот на огнот.
Сепак, Тајланд го суспендираше договорот минатиот месец откако во сомнителен инцидент со нагазна мина беа повредени неколку војници.
Оттогаш, двете страни разменуваат обвинувања за нови судири.
Споровите меѓу двете земји се фокусираа на децениски несогласувања околу границите нацртани за време на колонијалното владеење на Франција во регионот, при што двете земји тврдат дека имаат неколку храмови долж граничната линија.
Грчките земјоделци со нови блокади го засилуваат притисок врз власта
Земјоделците од Грција од денеска, 8 декември, ги засилуваат своите активности со дополнителни блокади откако веќе една седмица со трактори на различни локации низ земјата го стопираат сообраќајот.
Во моментов има над 20 локации со блокади, а меѓу нив се и граничните премини како кон Северна Македонија, така и кон Бугарија и Турција. Со стотици трактори, изминативе денови тие повремено ги затвораат граничните премини, секој ден во различен период.
Блокадата на најфреквентниот граничен премин кон Северна Македонија, „Евзони“ („Богородица од македонска страна, кај Гевгелија) ја спроведуваат земјоделци од областа Пеонија и градот Јаница со повеќе од 300 трактори. Тие се наоѓаат таму од минатиот понеделник, а граничниот премин периодично се затвора на неколку часа еднаш во попладневните часови по 12 часот, и потоа уште еднаш во вечерните часови по 18 часот по локално време.
Како што јави дописничката на МИА од Грција, се очекува оваа пракса да продолжи и денеска, иако одлуките, земјоделците ги носат на дневна база, по состаноци на надлежните комисии.
Протестите на земјоделците започнаа на 30 ноември поради зголемените трошоци за производство и ниските цени за продажба на нивните производи. Едно од нивните барања е исплата и на заостанатите субвенции со кои се им се помага да ги покријат производствените трошоци.
На повеќе локации каде што се одвиваат блокадите, земјоделците поставија и новогодишни елки, што во Грција се толкува како порака дека нема да отстапат и ако треба на улица ќе останат и за време на празниците.
Премиерот на Грција, Кирјакос Мицотакис, на 7 декември го повтори повикот за дијалог кон земјоделците порачувајќи дека вратата на Министерството за земјоделство е и секогаш ќе биде отворена за дискусија. Тој посочи дека „радикалните форми на протест, како што се блокадите, може да изразуваат притисок, но на крајот од денот го отежнуваат секојдневието на сите“.
Главната блокада што ја спроведуваат земјоделците е во централна Грција, кај Никеа односно во близина на Лариза на автопатот Солун – Атина. Таму сообраќајот досега се одвиваше по споредни патишта, но за 8 декември земјоделците најавија дека ќе ги блокираат и споредните премини од 17 до 19 часот со цел да извршат дополнителен притисок врз власта.
Во Солун, исто така, активни се уште неколку блокади – на патот кон аеродромот и кон Халкидики, но и на патарините на излез од градот.
Во обид да ги зголемат блокадите, за среда е најавено дека земјоделци од областа Тесалија, ќе се упатат кон градот Волос и ќе го блокираат тамошното пристаниште.
Блокади има и на автопатот Е65 што ги поврзува градовите Ламиа, Кардица и Трикала со автопатот „Егнатија“. Протестите се проширија и на Пелопонез и островот Крит.
По критиките од Трамп, Зеленски на разговор со европските сојузници во Лондон
Украинскиот претседател Володимир Зеленски ќе се сретне со своите клучни европски сојузници во Лондон на 8 декември, откако американскиот претседател Доналд Трамп го обвини дека не го прочитал најновиот мировен предлог.
„Во моментов започнуваме нова дипломатска недела – ќе има консултации со европските лидери. Прво и основно, безбедносни прашања, поддршка за нашата отпорност и пакети за поддршка за нашата одбрана“, рече Зеленски во своето вечерно обраќање, снимено во воз на 7 декември.
Во Лондон, Зеленски треба да се сретне со британскиот премиер Кир Стармер, францускиот претседател Емануел Макрон и германскиот канцелар Фридрих Мерц, најголемите поддржувачи на Киев во Европа.
Во меѓувреме, разговарајќи со новинарите, американскиот претседател Доналд Трамп го критикуваше својот украински колега, велејќи дека е „малку разочаран“.
„Разговаравме со [рускиот] претседател [Владимир] Путин и разговаравме со украинските лидери, вклучувајќи го и Зеленски, претседателот Зеленски, и морам да кажам дека сум малку разочаран што претседателот Зеленски сè уште не го прочитал предлогот, тоа беше пред неколку часа“, изјави Трамп пред новинарите на 7 декември.
Разговорите во Лондон следат по тридневните преговори меѓу украинските и американските претставници во близина на Мајами. Овие разговори завршија со позитивен тон, но не донесоа јасен напредок.
Администрацијата на американскиот претседател Доналд Трамп врши притисок врз Киев да го прифати мировниот предлог за кој многу критичари велат дека во голема мерка е во корист на Русија.
По преговорите во Мајами, Зеленски рече дека разговарал со американските преговарачи, Стив Виткоф и Џаред Кушнер.
„Американските претставници се свесни за основните позиции на Украина, а разговорот беше конструктивен, иако не беше лесен“, рече Зеленски.
„Очекувам детални информации за сè што беше кажано на американските претставници во Москва и за нијансите што Американците се подготвени да ги изменат во преговорите со нас и со Русите“, рече Зеленски, алудирајќи на украинските главни преговарачи Рустем Умеров и Андриј Хнатов, кои ја претставуваа Украина на преговорите во Мајами.
Во меѓувреме, Русија ги продолжи своите воздушни напади врз клучната украинска инфраструктура додека зимските температури продолжуваат да паѓаат.
Според регионалните власти, руските сили ја нападнале Ахтирка во Сумиската област ноќта на 8 декември.
Гувернерот Олег Григоров изјави дека седум лица се повредени во напад врз деветкатна станбена зграда и сите се префрлени во болница.
Според соопштението на Службата за итни случаи на Украина, пожарникарите изгаснале пожар кој бил од вториот до петтиот кат и евакуирале 35 жители, спасувајќи седум лица, меѓу кои и едно дете, од погодените станови.
Во Чернигов, пак, е оштетена станбена зграда како резултат на пад на руски дрон. Три лица се повредени, од кои едно е хоспитализирано, објави Службата за итни случаи на мрежата Телеграм на 8 декември.
Пред планираните посети на Зеленски на Лондон, Брисел и Рим, на кои тој ќе разговара за мировниот процес, италијанската премиерка Џорџија Мелони разговараше телефонски со него.
Според соопштението од нејзиниот кабинет, таа ја потврди солидарноста на Рим со Киев и вети дека ќе обезбеди итна помош за поддршка на енергетската инфраструктура на Украина и нејзиното население.
Од нејзиниот кабинетот додадоа дека Италија ќе достави дополнителни резерви, вклучително и генератори, за поддршка на енергетската инфраструктура и на украинското население, и оти целта останува траен и праведен мир.
СДСМ бара истрага за Ивица Томовски, тој најави тужба за клевета
Опозицискиот СДСМ денеска изнесе како што наведе „нови докази и документи“ за фирмата „Сити аутсорсинг“ за која велат дека е семејно поврзана со директорот на Службата за општи и заеднички работи Ивица Томовски.
Како што објавија од СДСМ, компанијата првично се викала „Сити логистик“ – основана од Витомир Томовски од Струга, татко на Ивица, со управител Слободан Кутановски, нивен близок роднина – пред да стане „Сити аутсорсинг“. Според објавените податоци од опозициската партија, компанијата добила 161 тендер во вредност од 5,3 милиони евра.
Во денешната прес - конференција, портпаролката на СДСМ, Богданка Кузеска, изјави дека компанијата „Сити аутсорсинг“ меѓу контактните телефонски броеви има наведено и број кој при проверка води до фотографија на Ивица Томовски.
„Во документите на ‘Сити аутсорсинг’ стои број кој по проверка, се појавува слика на Ивица Томовски. Ова дополнително ги потврдува семејните врски со татко му Витомир и роднинот Кутановски. Затоа, ДКСК и Јавното обвинителство мора да истражат за конфликт на интереси и корупција во врвот на владата на Мицкоски. Кој сега ќе бара извинување од Томовски?“, изјави Кузеска.
Таа рече дека не планираат да се извинат како што вчера побара директорот на СОЗР, Ивица Томовски. По денешната прес-конференција, Томовски најави тужба за клевета. За телефонскиот број кој јавно го објави опозицијата, не негираше дека е негов.
„Досега не чув каков криминал сум направил, ниту пак видов докази за тоа. Во тоа нивно растурање пердуви, вчера жигосаа уште една домашна компанија која не е моја, а денес јавно го објавија мојот телефонски број – број кој е познат на сите кои ме познаваат, кој го имам со години и кој е единствениот број што го поседувам, доделен пред многу години од мојот татко. На истиот тој број можеа да се јават и да се извинат, но тие одбраа да одиме по судски пат. Затоа уште еднаш повторувам: ќе одговараат и следува тужба“, вели Томовски.
На вчерашните обвинувања од СДСМ реагираше и компанијата „Сити аутсорсинг“, од каде рекоа дека објавените информации се политичка пресметка врз нивен грб.
Судии, обвинители и адвокати протестираат во Белград поради „политички притисок врз судството“
Судии, обвинители и адвокати протестираат пред Уставниот суд на Србија и Правниот факултет во Белград во недела поради, како што велат, политички притисок врз судството.
Протестот беше организиран поради најавата за можни измени на законот за Обвинителството за организиран криминал (ТОК) и затоа што на обвинителот од Првото основно јавно обвинителство во Белград не му беше дозволено да изврши увид на лице место во шаторскиот град пред српскиот Парламент каде што престојуваат поддржувачи на владата.
„Правдата е слепа, судството не е“, пишува на централниот транспарент на учесниците на протестот, кои бројат неколку стотици.
Судијата на Апелациониот суд Милимир Лукиќ изјави дека најавената промена на законот дефинитивно ќе предизвика Обвинителството за организиран криминал да ја изгуби својата автономија и независност.
Тој оцени дека кога ТОК ќе стане дел од Вишото јавно обвинителство во Белград, резултатот ќе биде прво слабеење, а потоа и исчезнување на судските органи одговорни за организираниот криминал.
„Она што најмногу загрижува е што со овој амандман на законот, државата недвосмислено се откажува од институционалната борба против организираниот криминал“, рече тој.
Судијата Александар Трешњев рече дека од Обвинителството за организиран криминал се плашат оние што сториле кривични дела.
„Но, тие нема да кажат дека се плашат од него, ќе кажат дека има криминалци во тоа обвинителство. Не дојдовме тука да браниме некого по име и презиме, дојдовме да го браниме правото и обврската на обвинителот да напише обвинение кога има докази за тоа“, рече тој.
Претседателот на парламентарниот судски комитет, Угљеша Мрдиќ од владејачката Српска напредна партија (СНС), во ноември објави измени во низа судски закони, наведувајќи дека очекува Јавното обвинителство за организиран криминал да биде префрлено под надлежност на Вишото јавно обвинителство во Белград.
Колегиумот на ТОК во неколку наврати изјави дека во последните месеци обвинителите на тоа тело биле изложени на континуиран притисок преку јавни изјави од претседателот на Србија, претставници на законодавната и извршната власт, како и други актери од политичкиот живот и одредени медиуми.
Претставниците на властите ги отфрлаат ваквите обвинувања.
Зеленски се свртува кон Европа откако разговорите меѓу САД и Украина не донесоа јасен напредок
По тридневните разговори меѓу украинските и американските претставници во Мајами, кои завршија со позитивна нота, иако без јасен напредок, украинскиот претседател Володимир Зеленски треба да се сретне со европските лидери во понеделник за понатамошни мировни разговори.
Неколку часа откако Зеленски изјави дека имал „многу конструктивен“ телефонски разговор со американскиот преговарачки тим - предводен од специјалниот претставник Стив Виткоф и зетот на американскиот претседател Доналд Трамп, Џаред Кушнер - Русија ги продолжи ноќните воздушни напади врз клучната украинска инфраструктура, бидејќи температурите продолжуваат да паѓаат со доаѓањето на зимата.
Градоначалникот на централниот украински град Кременчук, клучен индустриски центар и дом на една од најголемите рафинерии за нафта во Украина, рече дека неговиот град претрпел „масовен“ напад што ја оштетил електричната и водоводната инфраструктура. Немаше непосредни извештаи за жртви. Руските воздушни напади го погодија источниот украински град Славјанск, при што беа ранети седум лица и оштетени неколку згради.
Ноќните напади продолжија додека напорите за преговори за крај на војната се интензивираа. Русија соопшти дека соборила 77 украински беспилотни летала на неколку локации преку ноќ.
По разговорите во Флорида, Зеленски изјави на Телеграм дека „Украина е посветена на продолжување на искрената соработка со американската страна за постигнување вистински мир“, додавајќи дека двете страни се согласиле за следните чекори и форматот на разговорите, без да даде дополнителни детали.
Зеленски ќе разговара со европските сојузници кога ќе го посети Лондон во понеделник за да разговара за мировниот процес со британскиот премиер Кир Стармер, францускиот претседател Емануел Макрон и германскиот канцелар Фридрих Мерц.
„Украина може да смета на нашата непоколеблива поддршка. Тоа е целата поента на напорите што ги презедовме како дел од Коалицијата на волјата“, рече Макрон на X во саботата.
Продолжување на разговорите за напорите предводени од САД за завршување на војната
Францускиот претседател рече дека групата ќе „разгледа“ мировни преговори. Европа се спротивстави на раните верзии на мировниот план подготвен од САД и се обиде да ја добие поддршката на Вашингтон за своите предлози.
Макрон, Мерц, Стармер и Зеленски учествуваа на виртуелен состанок на „коалицијата на добронамерните“ пред околу две недели, каде што разговараа за плановите за испраќање европски мировни сили во Украина во случај на прекин на огнот.
Неодамнешната наплив на дипломатски активности за завршување на војната беше предизвикана кога американскиот мировен план од 28 точки беше објавен во медиумите во ноември. Тој почетен предлог се чинеше дека е во голема мера проруски, иако оттогаш претрпе неколку измени за подобро да се прилагодат на загриженоста на Киев. Конечната верзија на предлогот не е објавена.
Белата куќа врши притисок врз Киев и Москва да се согласат за план за завршување на војната, но досега има малку знаци на напредок, и покрај тоа што двете страни се вклучени во процесот предводен од САД.
„Ќе ги продолжиме овие напори заедно со Американците за да ѝ обезбедиме на Украина безбедносни гаранции, без кои не може да има цврст и траен мир“, продолжи Макрон во својот пост.
„Русија е заглавена во ескалациски пристап и не бара мир“, напиша Макрон, додавајќи: „Мора да продолжиме да вршиме притисок врз Русија за да ја принудиме да склучи мир“.
Во американскиот резиме на разговорите меѓу Украина и САД во Мајами, објавено доцна во петокот, се вели дека „двете страни се согласиле дека вистинскиот напредок кон каков било договор зависи од подготвеноста на Русија да демонстрира сериозна посветеност на долгорочен мир, вклучително и чекори кон деескалација и крај на убивањето“.
Територијалните и безбедносните гаранции долго време беа камен на сопнување во разговорите за договор за завршување на војната.
Украина тврди дека праведниот крај на војната би вклучувал сигурни безбедносни гаранции и нема да ја принуди да ѝ предаде повеќе територија на Русија.
На разговорите во Мајами им претходеше посетата на Кушнер и Виткоф на Москва.
Трамп на 3 декември изјави дека американската делегација имала „многу добар состанок“ со рускиот претседател Владимир Путин и дека тие веруваат дека тој „би сакал да види крај на војната“, иако разговорите не доведоа до никаков пробив.
Нов „Марш на ангелите“ во Кочани - родителите со порака „Не бараме одмазда, туку правда“
Родители и блиски на загинатите во дискотеката „Пулс“ денеска на 6 декември повторно излегоа на марш на улиците во Кочани.
„Маршот за ангелите“ почна во 14 и 5 минути, а колоната тргна од Паркот на револуцијата, преку центарот на градот и продолжи покрај Управата за јавни приходи и полициската станица, за да заврши пред Основниот суд, каде родителите ги повторија своите барања.
Тие велат дека очекуваат правда и судење низ докази и одговорност, а не низ стихови и метафори.
„Дали судницата се претвори во Струшките вечери на поезијата? Дали таму се оди за рецитирање или за вистина? Дали зборовите треба да ја покријат смртта на нашите деца? Затоа што, од тоа го слуша јавноста, може да се помисли дека децата не загинале, дека пожар немало, дека никој не е виновен и дека трагедијата била случајна. Нашите деца изгореа живи, во чад и во паника, со крикови за помош што никој навреме не ги слушна. Обвинителството објави дека за предметот има повеќе од 200 гигабајти доказен материјал. Тоа не се празни зборови, тоа се факти. Тоа се трагите на одлуките и неодлуките, тоа е патот на одговорноста“, изјави Александар Наунов, родител на девојка почината во „Пулс“.
Родителите на загинатите велат дека маршевите ќе продолжат и во иднина, но и дека ќе го следат секое рочиште, се додека правдата не излезе на површина.
„Овој марш е за државата да почне да функционира, за институциите да не бидат празна форма, за функциите да не бидат само плата, туку и обврска“,
рече Наунов.
Судската постапка за пожарот во „Пулс“, во кој загинаа 63 лица, а повеќе од 200 беа повредени е во тек.
Судењето почна на 19 ноември, а на рочиштето на 2 декември сите 35 обвинети физички лица се изјаснија дека не се чувствуваат виновни, а наводите во обвинението ги отфрлија и трите фирми кои се опфатени.
Следното рочиште за судењето за трагедијата во дискотеката „Пулс“ е закажано за 10 декември.
На обвинителна клупа седат сопственикот на дискотеката Пулс, управители, инспектори, членови на обезбедување, јавни службеници, па дури и поранешни градоначалници и функционери.
Мултимедија
Најпосетени
Што треба да знаете