Иранскиот министер за надворешни работи Абас Арагчи изјави дека предложил „фер и избалансиран“ нуклеарен предлог до европските сили за да се спречи враќање на санкциите на ОН против Исламската република.

Иран „презентираше креативен, фер и избалансиран предлог кој ги адресира вистинските грижи и е заемно корисен“, рече Арагчи на платформата Х.

Тој додаде дека предлогот во четврток бил доставен до Британија, Франција и Германија, познати како Е3, како и до Европската Унија.

„Претворањето на оваа идеја во акција може брзо да ги реши суштинските прашања и да спречи криза“, изјави Арагчи, нагласувајќи дека „Иран не може да биде единствениот одговорен актер“.

Коментарите беа дадени во момент кога Советот за безбедност на Обединетите Нации треба да гласа за повторно воведување на строги економски санкции против Техеран поради неговата спорна нуклеарна програма.

Дипломатски извори очекуваат дека Иран нема да ги обезбеди потребните девет гласови за одржување на статус квото и спречување на повторното воведување на казнените мерки до крајот на месецот.

Е3, потписнички на историскиот нуклеарен договор од 2015 година со кој беа укинати меѓународните санкции врз Иран во замена за ограничувања на неговата нуклеарна програма, тврдат дека Техеран ги прекршил своите обврски од договорот.

Договорот, познат како Сеопфатен заеднички план на акција, имаше цел да спречи Иран да дојде до нуклеарно оружје- нешто за што западните сили и најголемиот непријател на Иран, Израел, одамна го обвинуваат, но што Техеран постојано го негира.

Видете и ова:

Иран размислува за одговор по активирање на механизмот за повторно воведување санкции

Договорот е во криза уште од 2018 година, кога САД се повлекоа за време на првиот мандат на Доналд Трамп и повторно воведоа санкции против Техеран.

Ова го поттикна Иран во 2019 година да почне да ги повлекува своите обврски, вклучително и ограничувањето на пристапот на инспекторите од нуклеарната агенција на ОН до неговите објекти.

Во јуни, Израел започна невиден напад врз Иран, таргетирајќи нуклеарни и воени објекти, како и станбени области, при што беа убиени повеќе од 1000 лица, вклучувајќи високи команданти и нуклеарни научници.

Иран возврати со ракетни и дрон напади во кои беа убиени десетици во Израел.

Видете и ова:

Конфликтот Иран-Израел го става на тест дипломатското балансирање на Пакистан

Соединетите Држави накратко се приклучија на израелската кампања со серија напади врз клучни нуклеарни објекти пред да биде постигнато примирје по 12 дена војна.

Минатата недела, Иран се согласи на нова рамка за соработка со Меѓународната агенција за атомска енергија (МААЕ) откако ја суспендираше таа соработка по израелските и американските напади.

МААЕ предупреди дека Иран е единствената држава без нуклеарно оружје која збогатува ураниум до 60 проценти, односно многу над лимитот од 3,67 проценти утврден со договорот од 2015 година.

Родители и блиски на загинатите во дискотеката „Пулс“ денеска на 6 декември повторно излегоа на марш на улиците во Кочани.

„Маршот за ангелите“ почна во 14 и 5 минути, а колоната тргна од Паркот на револуцијата, преку центарот на градот и продолжи покрај Управата за јавни приходи и полициската станица, за да заврши пред Основниот суд, каде родителите ги повторија своите барања.

Тие велат дека очекуваат правда и судење низ докази и одговорност, а не низ стихови и метафори.

„Дали судницата се претвори во Струшките вечери на поезијата? Дали таму се оди за рецитирање или за вистина? Дали зборовите треба да ја покријат смртта на нашите деца? Затоа што, од тоа го слуша јавноста, може да се помисли дека децата не загинале, дека пожар немало, дека никој не е виновен и дека трагедијата била случајна. Нашите деца изгореа живи, во чад и во паника, со крикови за помош што никој навреме не ги слушна. Обвинителството објави дека за предметот има повеќе од 200 гигабајти доказен материјал. Тоа не се празни зборови, тоа се факти. Тоа се трагите на одлуките и неодлуките, тоа е патот на одговорноста“, изјави Александар Наунов, родител на девојка почината во „Пулс“.

Родителите на загинатите велат дека маршевите ќе продолжат и во иднина, но и дека ќе го следат секое рочиште, се додека правдата не излезе на површина.

„Овој марш е за државата да почне да функционира, за институциите да не бидат празна форма, за функциите да не бидат само плата, туку и обврска“,
рече Наунов.

Видете и ова:

Кочани доби Центар за ментална поддршка по пожарот во „Пулс“ на 16 март

Судската постапка за пожарот во „Пулс“, во кој загинаа 63 лица, а повеќе од 200 беа повредени е во тек.

Судењето почна на 19 ноември, а на рочиштето на 2 декември сите 35 обвинети физички лица се изјаснија дека не се чувствуваат виновни, а наводите во обвинението ги отфрлија и трите фирми кои се опфатени.

Следното рочиште за судењето за трагедијата во дискотеката „Пулс“ е закажано за 10 декември.

На обвинителна клупа седат сопственикот на дискотеката Пулс, управители, инспектори, членови на обезбедување, јавни службеници, па дури и поранешни градоначалници и функционери.

Христијан Мицкоски доби трет мандат од делегатите на 18. партиски конгрес што се одржа во Кавадарци и ќе ја води ВМРО-ДПМНЕ во наредните четири години што според статутот на партијата ќе биде негов последен мандат.

Како што соопшти Зоранчо Јованчев, претседател на Изборната комсија, од 817 присутни делегати, 804 гласале и дале поддршка за нов мандат на Мицкоски.

На конгресот во Кавадарци, Мицкоски беше и единствен кандидат за функцијата.

„Не добив само реизбор како претседател на ВМРО-ДПМНЕ туку денеска победи идејата“, изјави Мицкоски во обраќањето по соопштување на резултатите.

„Победи патот што го трасираме за Македонија. Честа е голема и обврската и долгот кон доделената задача уште поголема, рече тој.

На партискиот конгрес кој се одржа под мотото „Визија што гради држава - За генерацијата што доаѓа 2030“, беа усвоени и два политички документа Стратегијата 2025–2030 и Доктрина.

„Тоа не е обичен документ. Тоа е национален договор и рамката што ја става Македонија во европската иднина без да ја загуби својата историска вертикала. И јас ви ветувам – никој нема да го прекрши тој договор. Ниту јас, ниту Владата. Ниту кој било што ја носи одговорноста. Влегуваме во ново поглавје, со нови задачи каде што целта е да ги решиме најгорливите прашања за граѓаните. Ова е мандат во кој партијата мора да го вложи целиот свој потенцијал во изградба на систем кој е функционален и систем кој мора да им служи на граѓаните“, рече Мицкоски во обраќањето.

Од партискиот конгрес ги најави и процесите кои ќе се случуваат во идниот период во ВМРО-ДПМНЕ, велејќи дека во наредните шест месеци ќе има реформи и кадровски освежувања во сите структури на партијата - од Извршниот комитет се до општинските и месните комитети.

Видете и ова:

Мицкоски најави големи промени и во Владата и во ВМРО-ДПМНЕ

„На ВМРО-ДПМНЕ му е потребна новата генерација што треба да се роди во наредниот четиригодишен мандат. Генерација која ќе изгради од желбата и поривот да се гради татковината, која ќе ја следи и гради стратегијата што ќе обезбеди стабилно и победничко ВМРО-ДПМНЕ и силна иднина за нашата татковина Македонија.

За спорот со Бугарија

Старо-новиот претседател на ВМРО-ДПМНЕ, Христијан Мицкоски во својот говор по реизборот за лидер на партијата се осврна и на прашањето со Бугарија, велејќи дека има желба за фер решение, но оти во моментов нема соговорник од бугарска страна.

„Имаме желба да постигнеме фер решение, но за секој договор сакам да знам, за разлика од моите претходници во владата, што добива Македонија и граѓаните од сето тоа. Сакам да знам која е точната иднина која ќе ја обезбедиме за нашиот народ. Европската Унија се чини неподготвена да го фасцилитира овој процес, пред се, поради своите внатрешни проблеми. А, од друга страна, државава премногу даде на патот кон ЕУ која е и понатаму наша цел, но да бидеме реални дека ние мораме да посветиме внимание пред се на домашната задача, да обезбедиме иднина на сите граѓани“, рече Мицкоски.

Видете и ова:

Партиски промени, но со исти лидери

Лидерот на ВМРО-ДПМНЕ го повтори ставот дека не е проблем внесувањето на Бугарите во Уставот, туку новите условувања кои, вели, ќе следат на патот на евроинтеграцијата на земјава. Решението кое би се постигнало, додаде Мицкоски, мора да осигура дека македонскиот идентитет е зачуван.

„Многумина ми велат, еден ден ќе дојде СДС и се ќе смени, ќе прифати и нов Устав и смена на идентитет и се живо, затоа дај да се бориме сега да направиме најдобро можно решение, како што впрочем правеше СДС во историјата, коцкајќи се со државата на сметка на тоа да добијат поддршка од надвор за да дојдат на власт. Затоа, сметам дека Македонија мора да направи решение кое ќе спречи идни предавства и кое ќе ги исцрта црвените линии, но на начин на кој нема да може некој нов трговец од Горни Милановац или хирург од Дубаи“ порача Мицкоски.

Честитки за ВМРО-ДПМНЕ од сестринските партии

На почетокот на Конгресот, се емитуваа и обраќања на лидери на неколку сестрински европски партии со пофалби за партијата ВМРО-ДПМНЕ.

Унгарскиот премиер и лидер на партијата Фидес, Виктор Орбан им честиташе на партиските членови и на активистите за „неверојатните достигнувања на партијата во изминатите две години“.

„Убедлива победа на парламентарните, локалните и претседателските избори. Исто така, ја поставивте вашата татковина на патот на стабилен, предвидлив и безбеден развој. По долги години опозиција, ВМРО-ДПМНЕ сега стана една од, или можеби, најуспешните политички сили во Европа“, кажа Орбан.

Честитки и желби за понатамошни успеси на партијата испрати и Андреј Пленковиќ, претседател на ХДЗ и премиер на Хрватска.

„Сакам да ви посакам успех во одржување на Конгресот по толку одлични изборни победи на парламентарните, претседателските и сега локалните избори. Повторно и да му дадам поддршка на мојот пријател Мицкоски. Се радувам на унапредување на соработката помеѓу ХДЗ и ВМРО-ДПМНЕ и меѓу Хрватска и Македонија. Голема поддршка на патот за кон ЕУ“, посочува Пленковиќ.

Антонио Тајани, потпретседател на Европската народна партија, претседател на Форца Италија и вицепремиер и министер за надворешни на Италија во својот говор укажува дека Европската народна партија силно ја поддржува Македонија на патот кон ЕУ.

„ВМРО-ДПМНЕ е почитуван член на семејството на ЕНП, делиме исти вредности, посветеност на демократија, владеење на право, борба против корупција, слободен пазар“, рече Тајани.

Американските и украинските претставници ќе го започнат третиот ден од разговорите во Мајами на 6 декември, откако Русија започна голем напад со ракети и беспилотни летала врз украинската инфраструктура и електрани.

Нападите во текот на ноќта дојдоа откако врвните украински и американски преговарачи заеднички изјавија во петокот по дводневните разговори во Флорида дека „вистинскиот напредок“ зависи од подготвеноста на Москва да ја заврши војната.

„Двете страни се согласија дека вистинскиот напредок кон каков било договор зависи од подготвеноста на Русија да демонстрира сериозна посветеност на долгорочен мир, вклучително и чекори кон деескалација и прекин на убивањето“, се вели во американскиот резиме од разговорите објавено доцна во петокот.

Соопштението го издадоа специјалниот претставник на САД, Стив Виткоф, и секретарот на Советот за национална безбедност на Украина и главен преговарач, Рустем Умеров, кратко пред големиот руски напад со беспилотни летала и ракети што ги оштети електраните во осум украински региони.

Видете и ова:

Може ли Европа да ја притисне Кина да помогне да се заврши војната во Украина?

Нападот предизвика прекин на електричната енергија и ги принуди нуклеарните централи, вклучувајќи ја и нуклеарната централа Запорожје во Украина, која е под руска контрола, да го намалат производството на електрична енергија, соопштија во саботата украинските власти и Меѓународната агенција за атомска енергија (МААЕ). Агенцијата соопшти дека централата Запорожје е без струја оттогаш.

Руското Министерство за одбрана соопшти дека нејзините сили започнале „масовен напад“ преку ноќ како одговор на, како што наведува, украинските напади врз цивилни цели.

Нападот следеше по дводневните разговори што американските и украинските власти ги опишаа како „конструктивни дискусии“ во услови на обновени напори на САД за постигнување мировен договор за ставање крај на речиси четиригодишната војна.

За време на разговорите, на кои присуствуваа и зетот на американскиот претседател Доналд Трамп, Џаред Кушнер, и началникот на Генералштабот на украинските вооружени сили, Андриј Хнатов, украинскиот преговарачки тим беше информиран за разговорите што Виткоф и Кушнер ги водеа со рускиот претседател Владимир Путин во Москва претходно оваа недела.

Специјалниот американски претставник наводно разговарал со Путин речиси пет часа на 2 декември во Кремљ, но руските претставници рекоа дека „не е постигнат компромис“.

Состојба на мировните преговори

Неодамнешната наплив на дипломатски активности за завршување на војната беше предизвикана кога американскиот мировен план од 28 точки беше објавен во медиумите во ноември. Првичниот предлог се чинеше дека е во голема мера проруски, иако оттогаш претрпе неколку измени за подобро да се прилагодат на загриженоста на Киев.

Конечната верзија на предлогот не е објавена.

По разговорите во Русија, Путин рече дека е подготвен да продолжи да се среќава со Американците „колку пати е потребно“.

Подоцна, рускиот претседател зазеде попркостен тон, кажувајќи им на индиските медиуми во петокот за време на посетата на Њу Делхи дека украинските трупи треба целосно да се повлечат од регионот Донбас во источна Украина оваа недела или Русија ќе „ги ослободи овие територии со сила“.

Украина и нејзините сојузници во Европа ја доведоа во прашање посветеноста на Кремљ за завршување на војната, а неодамнешната изјава на САД се чинеше дека го префрла акцентот на подготвеноста на Русија за компромис.

Видете и ова:

Макрон: Единството меѓу Европа и САД е клучно во поддршката за Украина

Главните точки на спор меѓу двете страни остануваат, вклучително и оние околу обезбедувањето безбедносни гаранции за Украина во случај на мировен договор и територијални отстапки.

Русија моментално контролира околу една петтина од територијата на Украина, вклучувајќи големи делови од регионот Донбас, кој се состои од регионите Донецк и Луганск.

Напади врз украинските градови и железници

Русија ги интензивираше своите напади врз енергетскиот сектор и инфраструктурата на Украина во последните недели, таргетирајќи електрани и железнички центри додека температурите паѓаат пред зимата.

Украинската војска соопшти во саботата дека Русија лансирала 653 беспилотни летала и 51 ракета преку ноќ, соборувајќи 585 беспилотни летала и 30 ракети.

Постројките за производство на електрична енергија и топлина во регионите Чернигов, Запорожје, Лвов и Дњепропетровск беа главните цели, соопшти Министерството за заедница и територијален развој на Украина, додавајќи дека 9.500 клиенти биле без греење, а 34.000 без водоснабдување во јужниот регион Одеса во саботата наутро.

Железничка раскрсница во близина на Киев, исто така, беше цел на нападот, каде што беа оштетени депо и вагони, соопшти украинската државна железничка компанија „Укрзализниција“.

Железницата не пријави жртви во нападот.

Руското Министерство за одбрана соопшти дека воздушната одбрана соборила 116 украински дронови над руска територија преку ноќ, додека снимките што кружеа на руските канали на Телеграм се чини дека прикажуваат украински напад врз руска рафинерија за нафта во Рјазан.

РСЕ/РЛ не беше во можност независно да ја потврди снимката.

Украина сè уште не го коментираше наводниот напад.

Павел Малков, регионалниот гувернер на Рјазан, рече дека станбена зграда е оштетена во напад со беспилотно летало и дека остатоците од дронот паднале на земјиштето на „индустриски објект“, но не ја спомена рафинеријата.

Шефицата за надворешна политика на Европската Унија, Каја Калас, во саботата изјави дека САД остануваат најголем сојузник на Европа, откако администрацијата на претседателот Доналд Трамп во голем стратешки документ изјави дека Европа се соочува со „цивилизациско бришење“ и дека еден ден би можела да го изгуби статусот на сигурен сојузник.

Новата стратегија за национална безбедност на САД, објавена на веб-страницата на Белата куќа рано во петокот, ја критикува Европската Унија како антидемократска, велејќи дека на Европа ѝ недостасува самодоверба и дека целта на САД треба да биде „да ѝ помогне на Европа да ја поправи својата сегашна траекторија“.

Видете и ова:

Макрон: Единството меѓу Европа и САД е клучно во поддршката за Украина

„Постојат многу критики, но мислам дека некои од нив се точни, ако ја погледнете Европа, таа ја потцени сопствената моќ во однос на Русија“, изјави Калас на панел на Форумот во Доха во Катар.

Наведувајќи дека Европа треба да биде посигурна, таа рече дека „САД остануваат наш најголем сојузник“.

„Мислам дека не секогаш сме се согласувале за различни прашања, но мислам дека општиот принцип е сè уште присутен. Ние сме најголемите сојузници и треба да се држиме заедно“, рече Калас.

Новата стратегија за национална безбедност на Вашингтон ја критикува Европа, велејќи дека е премногу регулирана и се соочува со „цивилизациско бришење“ поради имиграцијата.

Документот ефикасно го става на хартија свртувањето на администрацијата на Трамп кон Европа, која САД ја обвинуваат за злоупотреба на американската дарежливост, во радикално отстапување од претходната политика на САД.

Вкупно 161 тендер во вредност од 5,3 милиони евра добила семејна фирма на директорот на Службата за општи и заеднички работи (СОЗР), Ивица Томовски од државни институции и општини водени од ВМРО-ДПМНЕ, обвини на прес конференција членот на Централниот одбор на СДСМ, Александар Саша Димитријевиќ.

Како што соопшти Димитријевиќ, се работи за компанијата „Сити логистик“, која е основана од таткото на директорот на СОЗР, Витомир Томовски.

„Сопственик на „Сити логистик“ во моментот кога е основана е Витомир Томовски од Струга, татко на Ивица Томовски, а управител Слободан Кутановски, нивни близок роднина. Потоа се менува името на фирмата – Сити аутсорсинг. Иста адреса, ист единствен матичен број на субјект, само со друго име. „Потоа се менува името на фирмата – „Сити аутсорсинг“. Иста адреса, ист единствен матичен број на субјект, само со друго име“, изјави Димитријевиќ.

Тој рече дека со доаѓањето на власт на ВМРО-ДПМНЕ, „бизнисот на фамилијата Томовски експлодирал“.

„За што е Томовски во ВМРО-ДПМНЕ и во Владата мислам дека на народот му е кристално јасно после ова. Важно фамилијарните бизниси течат.“ потенцираше Димитријевиќ.

На обвинувањата одговори директорот на СОЗР, Ивица Томовски, кој посочи дека посочената компанија од СДСМ не е негова, ниту пак има било каков удел во нејзе, иако обвинувањата за добивањето на тендерите опозициската партија ги поврзува со неговиот татко и близок роднина.

„Јас во моментов немам никака приватна компанија и единствено сум насочен кон мојата работа како директор на Службата за општи и заеднички работи. Целиот мој живот работам чесно, одговорно и посветено, така и ќе продолжам. СДС ќе мора да се извини поради изнесените клевети, во спротивно ќе поднесам тужба пред надлежните органи“, напиша Томовски на Фејсбук.

Томовски ги повика „сите можни институции да ги истражат случајот“.

Од СДСМ возвратија дека заканите од Томовски не ги плашат, туку дека ги мотивираат. Од партијата наведуваат дека утре на нова нова прес-конференција ќе објават нови детали за семејната фирма на Томовски.

На обвинувањата од СДСМ реагираше и компанијата „Сити аутсорсинг“, од каде рекоа дека посоченото лице нема врска со нивната компанија и дека објавените информации се политичка пресметка врз нивен грб.

„Без да навлегуваме во политички пресметки или дневно-политички наративи, категорично ги демантираме сите изнесени наводи со кои се поврзува споменато лице со нашата компанија. Истото лице нема никаква деловна, кадровска или друга поврзаност со „Сити Аутсорсинг“. Компанијата од своето основање до денес бележи континуиран и стабилен раст, резултат на професионално, одговорно и законито работење. Дополнително, дел од овој раст произлегува од затворањето на две други компании на пазарот, што создаде можност за преземање дел од нивните претходни обврски и клиенти“, се вели во реакцијата на компанијата на обвинувањата од СДСМ.

Антокорупциска ја запре постапката за друг тендер поврзан со Томовски

Ова не е единствен случај на тендер во кој се поврзуваат роднински врски и добивањето на тендери со директорот на СОЗР, Ивица Томовски.

На 20 јануари 2025 година, РСЕ објави дека компанијата „Праеториан“ која го добила тендерот на СОЗР за обезбедување на државни објекти формирала подружница по објавување на тендерот која води до роднински врски на Томовски.

СОЗР го распиша огласот на 10 октомври 2024 година. До тој момент, компанијата „Праеториан ДООЕЛ“ е во сопственост на Тадеуш Јарчев, а како управител е заведена Анета Јарчева.

Сепак, документите кои ги обезбеди РСЕ покажуваат дека само осум дена подоцна, во ек на огласот, односно на 18 октомври, Власе Танаскоски влегува во „Праеториан ДООЕЛ Скопје“.

Адресата на која беше регистрирана подружницата на „Праеториан ДООЕЛ“ е на улица 7-ми ноември бр. 262 во Охрид. Тоа беше истата адреса на која се наоѓа седиштето на компанијата „Гашо Пласт“, чиј сопственик e Дарко Гашиќ, кој пак е прв братучед на директорот на СОЗР Ивица Томовски.

Видете и ова:

Цената или роднински врски пресудни за тендерот за обезбедување државни објекти?

Тогаш, Томовски за РСЕ вели дека нема информации за тоа дека Власе Танаскоски е дел од „Праеториан ДООЕЛ“ и дека подружницата на која тој е раководител е регистирана на фирмата на неговиот прв братучед Дарко Гашиќ.

За Власе Танаскоски рече дека не му е прв братучед. На прашањето во каква роднинска врска се, Томовски кажа „може да му биде некој многу далечен роднина, а можеби и ништо“, додека за Дарко Гашиќ потврди дека му е братучед. Меѓутоа, директорот негираше потенцијален непотизам и судир на интереси.

За случајот, предмет отвори и Државната комисија за спречување на корупцијата. Речиси 10 месеци подоцна, на 25 седница, одржана на 14 ноември, антокорупционерите донесоа решение постапката да се запре.

Образложението е дека Комисијата „не утврди повреда на одредбите за спречување судир на интереси од Законот за спречување на корупцијата и судирот на интереси, поради што нема елементи понатамошно постапување“.

Одлуката на антикорупционерите за запирање на постапката следува откако Томовски им доставил два документа.

Едниот документ е изјава заведена кај нотар дека Власе Танаскоски не е негово блиско лице. Другата изјава е за непостоење на судир на интереси, во која „под целосна морална, материјална и кривична одговорност изјавил дека не е во состојба на судир на интереси и нема приватен интерес при реализација на гореспоменатата јавна набавка, односно нема било каква друга материјална и нематеријална корист за него или за негови блиски лица, како резултат на неговото учество во постапката“.

Илјадници ученици во Германија протестираа против плановите на владата за нова доброволна воена служба. Многу од нив излегоа од училиште за да учествуваат во протестите откако организаторите повикаа на „штрајк во училиштата против регрутација“, јави агенцијата ДПА.

Полицијата процени дека околу 3.000 демонстранти се собрале во Берлин, а 1.700 луѓе излегле на улиците во Хамбург напладне на 5 декември.

Организаторите зборуваа за бројка од 5.000 учесници.

Видете и ова:

Ќе го вратат ли војните задолжителниот воен рок?

Демонстрации се одржаа и во најнаселената покраина во Германија, Северна Рајна-Вестфалија, во Дортмунд, Келн, Дизелдорф, Есен и Бохум.

Во јужна Германија, демонстрациите привлекоа неколку илјади луѓе во Минхен, Штутгарт, Фрајбург и Хајделберг.

Долниот дом на Германија го поддржа законот на 5 декември, кој сега мора да биде одобрен од Горниот дом пред да стапи на сила во јануари.

Младите мажи потоа ќе мора да поминат лекарски прегледи и да бидат регистрирани на список, додека активната служба останува доброволна. Плановите предвидуваат парламентот да одлучи за регрутација врз основа на потребите доколку целите за проширување на вооружените сили не се постигнат само преку доброволни мерки.

Владата, синдикатите и организациите на работодавачи постигнаа договор за главните точки од нацрт-буџетот на Бугарија за 2026 година, што предизвика илјадници луѓе да протестираат низ целата земја оваа недела.

Министерката за финансии Теменужка Петкова на брифинг за медиумите на 5 декември изјави дека се согласиле Владата да ги отфрли спорните буџетски ставки што предизвикаа протести, а тоа се зголемување на платите во јавниот сектор на сметка на повисоки даноци и придонеси за социјално осигурување за приватниот сектор.

Веста доаѓа откако Петкова одржа уште еден состанок со претставници на големите бизнис организации и синдикати претходно на 5 декември. Потоа таа објави дека е постигната согласност за неколку точки.

Беше договорено данокот на дивиденда да остане на 5 проценти наместо 10 проценти во претходниот нацрт, да се укине зголемувањето на придонесите за социјално осигурување за 2 процентни поени и да се укине и обврската компаниите да користат софтвер за управување со продажба одобрен од институциите.

Видете и ова:

Оставка од владата е побарано на едни од најголемите протести во Бугарија

Тие исто така се согласија да го укинат автоматскиот механизам за одредување на износот на бенефиции во сектори како што се „одбрана“ и „безбедност“, со што тие повторно ќе се зголемат. Овој автоматски механизам ги фиксираше платите во неколку области со просечната плата во Бугарија.

Новиот нацрт-буџет треба да биде доставен до Народното собрание на разгледување на 8 ноември.

Ова доаѓа откако земјата беше зафатена од рекордни протести што започнаа поради буџетот, но се претворија во демонстрации против владејачките партии ГЕРБ, ДПС, БСП и ИТН.

Владата ја повлече претходната верзија на буџетот за 2026 година и рече дека ќе подготви нова. Сепак, одбива да поднесе оставка, како што бараа демонстрантите, претседателот Румен Радев и опозицијата.

Затоа, на 5 декември, опозициската коалиција ПП-ДБ, со помош на партиите АПС и МЕХ, поднесе предлог за недоверба на Владата.

Молдавската полиција на 4 декември објави дека извршила околу 50 претреси на неколку локации во земјата и пронашла докази дека организирана група, која претходно била обучена во камп во Србија, планирала да предизвика немири во Молдавија.

„Организираната група наводно дејствувала со директна намера да изврши нелегални активности од големи размери и во замена за финансиска корист“, се вели во соопштението на молдавската полиција.

Во соопштението се наведува дека групата претходно била обучена во камп во Бања Ковиљача, на западот од Србија, и дека целта била „да се создаде социјална тензија, по што би следело иницирање на насилни протести со намера да се наруши јавниот ред и безбедноста на граѓаните на Молдавија“.

На 26 септември, полицијата во Србија уапси две лица кои се обвинети за организирање борбено-тактичка обука на граѓани на Молдавија и Романија, која имала за цел да предизвика нереди во Молдавија.

Апсењата дојдоа откако властите во Кишињев јавно предупредија за постоењето на борбени кампови во Србија, велејќи дека тие биле организирани од руската тајна служба со цел дестабилизација на Молдавија за време на неодамнешните избори во земјата.

Москва ги отфрли овие обвинувања.

Видете и ова:

Знаеле ли службите за рускиот паравоен камп во Србија?

Полицијата во Србија објави дека обуката била спроведена од 16 јули до 12 септември во угостителски објект во близина на Лозница, на западот од Србија, и дека помеѓу 150 и 170 граѓани на Молдавија и Романија поминале низ неа.

Српскиот претседател Александар Вучиќ во октомври изјави дека не може да тврди дека руската служба стои зад кампот, но дека полицијата привела лица од српска националност „кои биле достапни“.

Видете и ова:

Вучиќ: Во борбено-тактичкиот камп во Србија имало и тројца руски државјани

На 4 декември, молдавската полиција изјави дека за време на претресот, меѓу другото, запленила банкарски картички, од кои некои биле издадени од финансиски институции од Руската Федерација, над 20 биометриски пасоши со печати за преминување на границата со Србија, радиостаници, двогледи, куршуми од различен калибар за смртоносно и несмртоносно оружје.

Министерството за внатрешни работи и Министерството за надворешни работи на Србија не одговорија веднаш на барањето на Радио Слободна Европа за повеќе информации за овој случај.

Од 1 јануари 2026 година надоместокот за користење на електродистрибутивниот систем Електродистрибуција ДООЕЛ се намалува за 3,64% , надоместокот за користење на преносниот систем МЕПСО се намалува за 2,67%, а намалување ќе има и кај цената на МЕМО од 3,40 % . Одлуката на Регулаторната комисија за енергетика, водни услуги и услуги за управување со комунален отпад (РКЕ), денеска ја соопшти претседателот на Комисијата, Марко Билсимоски.

„Со денешната одлука, сите елементи кои ја сочинуваат крајната цена се познати: цена и количина по која е набавена електричната енергија, услугите на мрежните оператори, затворени се и набавките за загуби. Сега останува универзалниот снабдувач – ЕВН ХОМЕ, под наш надзор да направи пресметка и да се објават финалните цени по блокови. Делот што РКЕ го регулира во крајната цена има влијание од околу 36 %,“ изјави Бислимоски.

Видете и ова:

Наместо кај граѓаните, пари од ЕУ за сметките за струја се слевале во ЕСМ

Надоместокот за користење на електродистрибутивниот систем во крајната цена учествува со околу 33%, додека надоместокот за користење за преносниот систем учествува со околу 4% во крајна цена, а цената на МЕМО е со незначително учество од околу 0,19 % во крајната цена.

Инаку, надоместот за пренос и дистрибуција на струја, односно таканаречената мрежарина, се плаќа за изградба и одржување на преносната и дистрибутивната мрежа, трошоци за отчитување и одржување на мерните места, за помошни системски услуги и балансирање на мрежата, а со тие пари се покриваат и загубите на електрична енергија во мрежата.

Во дел од сметките се гледа дека за дистрибуција се плаќа повеќе отколку за самата струјата.

Сметките за струја на граѓаните сега се поделени во четири блокови за скапа струја, евтината не се дели во блокови. Тие што трошат повеќе скапа струја, плаќаат повеќе.

Блоковите беа воведени за тие што трошат помалку да плаќаат поевтино, но со воведувањето на надомест за пристап до мрежа, токму тие што трошат малку, плаќаат нешто повисоки сметки во споредба со сега.

Францускиот претседател Емануел Макрон изјави дека единството меѓу Европа и Соединетите Држави е клучно во поддршката на Украина, додавајќи дека „нема недоверба“. Тој исто така го негираше извештајот во кој тој рекол дека постои ризик Вашингтон да ја предаде Украина.

„Единството меѓу Американците и Европејците по украинското прашање е од суштинско значење. И го повторувам тоа одново и одново, треба да работиме заедно“, изјави Макрон пред новинарите за време на посетата на Кина, на 5 декември.

„Ги поздравуваме и поддржуваме мировните напори што ги преземаат Соединетите Држави. На САД им се потребни Европејци да ги водат овие мировни напори“, додаде тој.

Германското списание „Шпигел“ во четвртокот цитираше транскрипт од доверлив повик што покажува дека францускиот претседател и германската канцеларка изразиле сериозен скептицизам во врска со напорите на владата на САД и нејзините претставници да преговараат за мир меѓу Украина и Русија.

„Негирам сè“, рече Макрон, кога беше прашан за извештајот на „Шпигел“.

„Ни требаат Соединетите Држави за мир. На Соединетите Држави им требаме ние за овој мир да биде траен и робустен“, рече францускиот претседател додавајќи дека „нема сценарио каде што траен мир во Украина е постигнат без заеднички напори меѓу Европејците, Американците, Канаѓаните, Австралијанците и Јапонците“.

Видете и ова:

Мировните напори за Украина сѐ уште во застој, откако разговорите меѓу САД и Кремљ постигнаа мал напредок

Во меѓувреме, разговорите во Соединетите Држави меѓу претставниците од Киев и Вашингтон за прекин на војната во Украина се завршени, објави украинскиот јавен радиодифузен сервис „Суспилне“ рано во петокот, повикувајќи се на извори во делегацијата на Киев.

На разговорите во Мајами, Украина ја претставуваше Рустем Умеров, секретар на Советот за национална безбедност и началникот на Генералштабот Андриј Хнатов.

Во видео порака, претседателот Володимир Зеленски рече дека украинската делегација во САД се обидува да разјасни што било дискутирано во Москва меѓу рускиот претседател Владимир Путин и претставниците на САД Стив Виткоф и Џаред Кушнер.

Виткоф, чија шеста средба беше со Путин, го презентираше најновиот став на САД за напорите за прекин на војната на Русија против Украина по повеќе од три и пол години. Минатиот викенд, тим предводен од Умеров во Флорида разговараше за можните чекори за прекин на војната со американскиот државен секретар Марко Рубио, Виткоф и Кушнер.