Вести
Зголемено ниво на подготвеност во БиХ поради заканата од „терористички напади“
Министерството за одбрана на Босна и Херцеговина нареди зголемување на нивото на безбедносна подготвеност со цел да се намали ризикот од потенцијални закани за безбедноста не само на воените објекти, туку и на граѓаните на БиХ, соопшти Министерството.
Како што наведуваат во денешното соопштение (21 октомври), тие реагираат „во согласност со неодамнешните закани за терористички напади врз воените локации на Вооружените сили (ОС) на Босна и Херцеговина“.
„Посебно внимание се посветува на можна употреба на беспилотни летала (дронови) при вакви напади“, наведуваат од Министерството и потсетуваат дека со закон се забранети летови со беспилотни летала над воени објекти и подрачја на Вооружените сили на Босна и Херцеговина без нивно одобрување.
Тие додаваат дека „во последно време е забележано зголемено присуство на беспилотни летала над воените локации на вооружените сили на Босна и Херцеговина, што дополнително го зголеми безбедносниот ризик“.
Посочуваат дека се во постојан контакт со агенциите за спроведување на законот, како и со меѓународните партнери, меѓу кои ЕУФОР и седиштето на НАТО во Сараево.
„За заштита на воените објекти се применуваат различни безбедносни мерки и процедури, меѓу кои и безбедносни протоколи за реагирање на неовластени упади, набљудување и снимање на воени локации“, соопшти Министерството.
Во соопштението заклучуваат дека „ќе продолжат да ги преземаат сите неопходни мерки и дејствија за да се обезбеди целосна заштита на воената инфраструктура и безбедноста на граѓаните на Босна и Херцеговина“.
Вооружените сили на Босна и Херцеговина на 2 октомври годинава го зголемија нивото на будност, откако добија заканувачки извештаи за бомби.
Министерот за одбрана, Зукан Хелез, тогаш најави дека мерките се од „превентивен карактер“, но дека ќе останат на сила до натамошно известување.
види ги сите денешни вести
Украински беспилотни летала го нападнаа Севастопол
Украински беспилотни летала го нападнаа Севастопол, окупираниот од Русија, град на Кримскиот полуостров, изјави во петок, 20 февруари, рускиот администратор на пристанишниот град во кој се наоѓа руската Црноморска флота, Михаил Развожаев. Како што пренесува АФП, еден маж бил убиен, а една жена повредена.
Не даде информации за можни напади, вклучително и дали биле нападнати воени цели, но рече дека воздушната одбрана на градот соборила 26 беспилотни летала, изјави градскиот администратор на Телеграм.
Нападот искршил прозорци и предизвикал помала штета на куќите, рече тој.
Русите нелегално го окупираа Крим во 2014 година и започнаа целосна инвазија на Украина пред речиси четири години.
Рускиот, но проукраински канал на Телеграм, Кримски Ветер, објави експлозии во близина на Џанкој во северен Крим, каде што има воен аеродром.
Поради опасноста од украинските воздушни и морски дронови, Црноморската флота одамна ги премести повеќето од своите бродови во пристаништето Новоросијск во јужна Русија, но сè уште има многу воени бази во и околу Севастопол.
Украина известува и за руски напади врз Никопол. Руски дронови и артилерија го погодија градот Никопол на фронтовската линија на југот од регионот Дњепропетровск, при што беа повредени тројца, објавија украинските власти во петок наутро. Тие додаваат дека ракета го погодила и Харкив.
Русинка призна дека лажела за врски со руското разузнавање
Русинката Нома Зарубина, обвинета дека го лажела Федералното истражно биро (ФБИ) на САД за нејзините врски со највисоката разузнавачка агенција на Русија - а потоа пијана му пишувала пораки на агент на ФБИ додека била ослободена со кауција - се изјасни за виновна пред американскиот суд.
Според поднесоците на федералниот суд, Зарубина го променила своето сведочење околу два месеци откако судијата ја поништи нејзината кауција за постојано испраќање пораки на агент на ФБИ и нареди да биде затворена.
Покрај тоа што се изјаснила за виновна по обвинението за лажно сведочење, таа се изјаснила и за друго обвинение поврзано со нејзиниот имиграциски статус, покажаа судските поднесоци.
„Намерното прикривање на Зарубина за нејзиното недолично однесување и нејзините лаги за нејзината поврзаност со руската разузнавачка служба се навреда за напорите на спроведувањето на законот за зачувување на националната безбедност“, соопшти Министерството за правда.
Нејзиниот адвокат не одговори веднаш на барањето за коментар.
Зарубина првично беше обвинета во декември 2024 година, откако беше постојано испрашувана од агенти на ФБИ почнувајќи од октомври 2020 година.
Родена во сибирскиот град Томск, Зарубина се преселила во САД во 2016 година и изгради мрежа од професионални и лични врски меѓу руските емигрантски групи, како и во американските тинк-тенкови и активистички организации.
Федералните агенти првпат ѝ пристапија неколку недели откако ФБИ го претресе станот на Менхетен на друга Русинка, Елена Бренсон, и заплени десетици компјутери и други електронски уреди.
Бренсон, која избега во Русија кратко време по операцијата, подоцна беше обвинета дека е нерегистриран странски агент.
Според изјавите на ФБИ, Зарубина наводно лажела за своите комуникации со двајца службеници на руската Федерална служба за безбедност (ФСБ) кои ја воделе нејзината мрежа, идентификувајќи луѓе и организации со кои требало да контактира.
По обвинението, Зарубина беше ослободена со кауција.
Сепак, во месеците што следеа, таа наводно испратила многу е-пошта и фотографии до агенти на ФБИ кои ја испрашувале - понекогаш и среде ноќ.
Обвинителите и нејзиниот адвокат му рекоа на федералниот суд дека Зарубина има проблем со пиењето и дека ѝ е наредено да побара советување за ментално здравје. Во ноември 2025 година, судијата ја поништи нејзината кауција и нареди таа да биде испратена во затвор до судењето.
Изрекувањето на пресудата е закажано за јуни.
Трамп: Сојузниците придонесоа со повеќе од 7 милијарди долари за Газа
Претседателот на САД, Доналд Трамп изјави дека сојузничките земји придонеле со 7 милијарди долари за помош на Газа, додека Косово се обврзало да помогне со испраќање воени трупи.
Говорејќи во четврток во Вашингтон на првиот состанок на Одрборот за мир, Трамп рече дека пет земји меѓу кои Косово и Албанија, се обврзале да испратат трупи во Меѓународните безбедносни сили за Газа.
На свечениот состанок учествуваше и претседателката на Косово, Вјоса Османи, бидејќи Косово е една од земјите-основачки на Одборот.
Одборот за мир, кој брои 27 членки, беше основан на 22 јануари во Давос, Швајцарија, во присуство на претседателот Трамп.
Советот за безбедност на Обединетите нации ја овласти оваа структура да го надгледува спроведувањето на примирјето во Газа и да се вклучи во прашања поврзани со управување и обновување на регионот.
Основaњето на Одборот е предвидено со планот на Трамп од 20 точки за мир во Газа.
Овој план го прифатија Израел и Хамас – организација што САД и други држави ја прогласија за терористичка во октомври минатата година, со цел да се стави крај на двегодишните судири.
Во меѓувреме, за време на својот говор во четврток, Трамп исто така рече дека помогнал во намалувањето на тензиите меѓу Косово и Србија. Тој ја пофали претседателката Вјоса Османи и порача дека двете земји треба да го контактираат „ако не оди добро“, на што Османи одговори: „Ќе ве повикаме“.
Придонесот на Косово
Претседателството на Косово претходно потврди за Радио Слободна Европа дека од државата не е побарано плаќање од милијарда долари.
Се наведува дека земјата, за да стане постојан член на Одборот, би требало да уплати износ од милијарда долари.
Претходно, косовските власти потврдија дека се разгледува формата и капацитетот во кои припадниците на Косовските безбедносни сили (ФСК) би можеле да придонесуваат во Меѓународните сили за стабилизација за Газа.
Премиерот на Косово, Албин Курти изјави дека учеството на ФСК во оваа мисија произлегува од учеството на конференција одржана во декември минатата година во Доха, Катар, која ја организираше Централната команда на американската армија.
Министерот за одбрана, Ејуп Македончи, изјави за Радио Слободна Европа дека конференцијата во Катар имала информативен карактер во врска со Меѓународните сили за стабилизација и дека Косово било повикано да учествува од страна на американската армија.
Во четврток, командантот на Меѓународните сили за стабилизација, американскиот генерал-мајор Џаспер Џеферс, на состанокот на Одборот даде дополнителни детали за оваа мисија.
„Првите пет земји ангажираа трупи за служба во Меѓународните сили за стабилизација (ISF) – Индонезија, Мароко, Казахстан, Косово и Албанија. Две земји ја презедоа обврската за обука на полицијата – Египет и Јордан“, рече Џеферс.
Тој додаде дека ISF ќе започне распоредување во Рафах, на југот на Газа, каде ќе ја обучува локалната полиција, а потоа ќе се „шири сектор по сектор“.
Според Џеферс, долгорочниот план предвидува ангажирање на 20.000 војници од ISF и обука на 12.000 полицајци.
Војната меѓу Израел и Хамас почна во октомври 2023 година, откако Хамас уби повеќе од 1.200 луѓе во Израел и зема стотици заложници.
Израелските напади врз Газа како одмазда предизвикаа смрт на повеќе од 60.000 луѓе, криза со глад и огромни штети на инфраструктурата.
Иран и Русија изведуваат поморски вежби додека САД го засилуваат военото присуство во Арапско Море
Иран и Русија во четврток започнаа заеднички поморски вежби во јужните води на Иран, додека САД продолжуваат да го прошируваат своето воено присуство во Арапско Море.
Вежбите се одвиваат првенствено во Ормуски Теснец, Омански Залив и северниот дел на Индиски Океан.
Познати како „Поморски безбедносен појас“, вежбите се одржуваат од 2019 година и обично ја вклучуваат и Кина, иако Пекинг, како што изгледа, не учествува во актуелните вежби.
Контраадмиралот на иранската морнарица, Хасан Максудлу, им изјави на новинарите дека една од целите на вежбите е „да се спречи каква било еднострана акција во регионот“, што изгледаше како имплицитна референца на засилувањето на присуството на американската војска.
Иранско-руски вежби
Иранската и руската морнарица изведоа вежби на воздушно извидување и практикуваа тактички формации и маневрирање, пренесоа иранските медиуми.
Вежбите, исто така, опфатија сценарија на офанзивни формации насочени кон подобрување на тактичката координација, зајакнување на заедничката команда и контрола и увежбување на брза реакција во оперативни услови, при што единиците практикуваа комбинирано распоредување и техники на маневрирање.
Меѓу силите што учествуваа беа единици на иранската морнарица и морнарицата на Корпусот на исламската револуционерна гарда - воени бродови, ракетни чамци, хеликоптери, тимови за специјални операции и летала за брзи напади, заедно со руската корвета „Стојкиј“ и авиони на иранската воена авијација.
Се очекува Европска Унија оваа недела да го означи Корпусот на исламската револуционерна гарда, кој одржа свои поморски вежби во Ормуски Теснец на 16 и 17 февруари, како терористичка организација. Одлуката за ставање на IRGC на „црна листа“ беше донесена минатиот месец.
Од руската страна, се чини дека во вежбите учествува само еден воен брод.
„Мали“ и „симболични“
Укажувајќи на слабото присуство на Русија, поранешниот ирански морнарички офицер Мохамед Парси ја опиша вежбата како „мала“ и „симболична“.
„Не можам да замислам дека Русија би понудила вистинска поддршка во директен судир меѓу Иран и САД“, изјави тој за Радио Фарда (ирански сервис на РСЕ), додавајќи дека Москва веројатно го користи Техеран во својот поширок судир со Западот, наместо да се обврзе на заемна одбрана.
Вежбите се одржуваат додека САД и Иран ги продолжуваат разговорите за можен договор што би го ограничил иранскиот нуклеарен програм и би спречил војна.
„Иран би бил многу мудар доколку постигне договор“, изјави во средата портпаролката на Белата куќа, Керолин Левит, откако втората рунда разговори меѓу САД и Иран во Женева заврши без напредок.
Вашингтон во последните недели го засилуваше своето воено присуство на Блискиот Исток и неодамна распореди втор носач на авиони во Арапско Море.
Според некои извештаи, американската воздушна моќ во регионот сега го достигнала своето најсилно ниво од инвазијата на Ирак во 2003 година.
Истражителите одземаат документација за трамвајот што учествуваше во несреќата во Сараево
Истражителите од Министерството за внатрешни работи на Сараевскиот кантон одземаат документација од Кантоналното јавно комунално претпријатие ГРАС, која се однесува на употребата на трамвајот број 516 што учествуваше во несреќата во која едно лице загина, а повеќе лица беа повредени, како и техничката документација за сите чешки трамваи и одредени персонални досиеја на вработените, соопшти во четвртокот Сараевското кантонално обвинителство.
Во рамки на истрагата за несреќата од 12 февруари, од Министерството за сообраќај на Сараевскиот кантон се одзема документација поврзана со стручниот надзор над трамвајскиот сообраќај што се спроведувал во ГРАС, јавното комунално претпријатие задолжено за градскиот превоз во Сараево.
Во рамки на проверката на наводите од пријавата што се однесува на јавните набавки на магнетни сопирачки, се вршат претреси во просториите на фирмата „Виклер-Промет“ на две локации, се наведува во соопштението на Обвинителството на Кантонот Сараево.
Откако трамвајот со број 516 излета од шините и урна трамвајска постојка, загина едно 23-годишно момче, додека повеќе лица се повредени.
Обвинителството на Кантонот Сараево во средата соопшти дека во рамки на истрагата за трамвајската несреќа се сослушани 30 сведоци, а одземени се 10 снимки од видеонадзор од околните објекти, како и снимка од кабината на трамвајот.
Од кантоналното Министерство за сообраќај веќе е одземена „обемна документација што се однесува на реконструкцијата на целосната трамвајска пруга и сигналните планови на сите релевантни раскрсници, кои ќе бидат предмет на вештачење“.
Обвинителството претходно наведе дека утврдило оти „постои основано сомнение дека возачот сторил кривично дело „загрозување на јавниот сообраќај од небрежност со смртна последица“, но дека ја почитува одлуката на Судот кој го одби нивниот предлог за притвор за возачот на трамвајот и го пуштил на слобода.
Возачот се изјасни дека не е виновен и дека несреќата се случила поради техничка неисправност на трамвајот, што го тврди и Синдикатот на КЈКП ГРАС.
Во деновите по несреќата на 12 февруари, оставки поднесоа премиерот на Кантонот Сараево, Нихад Ук, како и директорот на КЈКП ГРАС, Сенад Мујакиќ.
Стотици граѓани секој ден протестираат на местото на несреќата, како и пред зградите на владините и правосудните институции, барајќи одговорност за трагедијата.
Усвоени законските измени за продолжување на рокот за легализација на дивоградбите
Собранието денеска (19 февруари) во рамки на 85. седница по скратена постапка го донесе Закон за изменување на Законот за постапување со бесправно изградени објекти. Со овие измени, рокот за легализација на дивоградбите се продолжува за уште пет години, односно до 2031 година.
Дополнителните пет години се дадени за да се завршат постапките за објектите изградени до 2011 година и формално измените не отвораат нова врата за нови барања, туку се однесуваат исклучиво на оние граѓани кои веќе поднеле документација и со години чекаат разрешница.
Барање од Управниот одбор на ЗЕЛС
Законот беше донесе со 67 гласови „за“, пет „против“ и без ниту еден воздржан.
Управниот одбор на ЗЕЛС на почетокот на месецов до Собранието, Владата и Министерството за транспорт достави барање со цел да се овозмои продолжување на рокот на Законот за постапување со бесправно изградени објекти заклучно со 2031 година.
Во самото барање од Управниот одбор на ЗЕЛС е образложено дека голем дел од постапките не биле завршени поради водење на судски спорови поврзани со правата врз изградените објекти, судски постапки поведени во рамките на постапката која се води пред општината, одложување на донесување на управни акти во постапката поради наследни и други имотно-правни околности кои требало да се решат како претходно прашање во постапка, како и други непредвидени околности.
При тоа, продложувањето на рокот има за цел само довршување на постапките кои се веќе отпочнати, а не и доставување на нови барања и оформување на нови предмети за постапување.
Првично ваков закон беше донесен во 2011 година, а со денеска усвоените измени во членот 5 зборовите „петнаесет години“ се заменуваат со зборовите „дваесет години“, со што се означува времетраењето на процесот на озаконување.
Од парламентарното мнозинство во текот на општата расправа посочија дека станува збор за техничко продолжување, со цел да не се прекинат илјадници предмети кои се наоѓаат во различни фази на постапка.
Пратеничката Бисерка Златеска од ВМРО-ДПМНЕ истакна дека Предлог-законот е предложен по скратена постапка, бидејќи станува збор за закон со кој им се дава можност на граѓаните кои имаат покренато процес за легализација на дивоградбите, а досега не добиле разрешница поради тоа што надлежните институции не ги завршиле своите обврски.
Таа додаде дека не станува збор за решение со кое се отвора нов процес на легализација.
„Ако не се донесе ваков закон ќе се казнат граѓаните кои навреме поднеле барања, а не ги исполниле роковите за легализација не по нивна вина, туку поради процесни причини“, рече Златеска.
Таа истакна дека овој предлог не отвора можност за нови дивоградби, туку се однесува на довршување на започнати објекти без дозвола, без нови барања.
Појасни дека рокот се продолжува до март 2031, наместо март 2026. Додаде дека продолжувањето нема финансиски импликации врз буџетот, не создава нови предмети и ги затвора старите.
Пратеникот Малиша Станковиќ од СПМ нагласи дека во 2011 е донесено првичното законско решение, кое, како што рече, во тој период било контроверзно. Додаде дека и самото име на предлогот е таков бидејќи се бара легализирање на нешто што е бесправно.
„Но, и тогаш и сега, треба да се решат проблемите на овие граѓани, кои не по своја вина, не го завршиле процесот“, рече Станковиќ кој го поддржа предлогот.
Потсети дека во 2011 година на пример, во Кисела Вода околу 4600 до 4700 објекти биле дивогради.
Пратеникот Беким Ќоку од БЕСА нагласи дека ќе го поддржат законското решение, бидејќи како што се надоврза, овозможува завршување на сите постапки за легализација на објекти, кои се изградени без дозвола.
Според пратеникот Сашко Јанчев од Левица, предлогот има погрешно име и треба да се нарече „закон за стимулирање изградба на дивоградби“. Тој рече дека првично закон бил донесен во 2011 година и требал еднократно да го реши проблемот, но владите кои се менувале го продолжиле периодот за легализација на 15 години, а со новиот предлог се оди на вкупно 20 години.
Основната идеја на законот беше да се постави ред во урбанизмот кој беше во хаос поради ненавременото носење на урбанистичките планови. Петнаесет години подоцна, сѐ уште илјадници граѓани чекаат локалните власти да им ги решат проблемите и да им дадат документ за сопственост на имот.
Уапсен принцот Ендру, брат на кралот Чарлс
Помладиот брат на кралот Чарлс, Ендру е уапсен во четврток, 19 февруари под сомнение за злоупотреба на јавна функција поради наводи дека му испратил доверливи владини документи на Џефри Епстин, објави Би-Би-Си.
Полицијата претходно овој месец соопшти дека полицајците ги разгледуваат наводите дека принцот Ендру му доставил документи на починатиот осуден сексуален престапник, според досиејата објавени од американската влада.
„Полицијата отвори истрага за кривично дело злоупотреба на јавна функција. Маж во шеесеттите години од Норфолк е уапсен и останува во полициски притвор. Според националните правила, нема да го именуваме уапсениот човек“, се вели во соопштението на полицијата на платформата X.
Претходно весници објавија дека шест необележани полициски автомобили и околу осум полицајци во цивил пристигнале во Вуд Фарм на имотот Сандрингам во источна Англија, каде што сега живее принцот Ендру, кој денеска полни 66 години.
Поранешниот принц, вториот син на покојната кралица Елизабета, отсекогаш негирал какво било кривично дело во врска со Епстин и изјавил дека жали за нивното пријателство. Но, тој не одговорил на барањата за коментар по последното објавување на документите.
Засега нема коментар од Бакингемската палата.
Принцот Ендру бил пријавен во полиција од страна на антимонархистичката кампања „Република“ по објавувањето на повеќе од 3 милиони страници документи поврзани со Епштајн, кој беше осуден за барање проституција од малолетник во 2008 година.
Овие досиеја сугерираат дека во 2010 година принцот Ендру му проследил на Епстин извештаи за Виетнам, Сингапур и други места што ги посетил на службени патувања.
Полицијата и Службата за обвинителство на Британската круна претходно изјавија дека разговарале за случајот. Полицијата соопшти дека обвинувањата за злоупотреба на јавна функција, што е кривично дело од „општото право“ и затоа не е опфатено со пишано законско законодавство, вклучуваат „посебни сложености“.
Дали санкциите на ЕУ кон Русија ќе бидат во застој додека Унгарија и Словачка ги користат ветата за нафта?
Додека Европската Унија брза да го одобри новиот пакет санкции кон Русија до четвртата годишнина од целосната инвазија на Москва врз Украина следната недела, можеби се појави нова пречка.
Блокот веќе се мачеше да се согласи за поморска забрана за руска нафта, но сега Унгарија и Словачка ги користат своите вета на 20-тиот пакет санкции на ЕУ за да се осигурат дека руската нафта сè уште тече кон нив, или преку оштетениот нафтовод „Дружба“ или преку Хрватска.
Неколку европски дипломати со кои Радио Слободна Европа беше во контакт под услов на анонимност потврдија дека Унгарија и Словачка сигнализирале дека ставиле таканаречена „општа резерва“ во пакетот санкции.
Ова значи дека Будимпешта и Братислава ќе бараат дополнителни информации или гаранции дека нивните барања за протокот на нафта ќе бидат почитувани пред да дадат зелено светло за пакетот.
Додека Европската Унија воведе забрана за увоз на руска нафта преку цевководи поради војната на Кремљ во Украина, Унгарија и Словачка обезбедија исклучоци од тие санкции користејќи го нафтоводот „Дружба“, кој носи руска нафта до Централна Европа преку Украина.
Сепак, испораките од овој гасовод се запрени од 27 јануари, а Киев изјави дека руски дрон е одговорен за оштетувањето на енергетската инфраструктура.
И Унгарија и Словачка сепак ја обвинија Украина за бавност во повторното започнување на протокот, а словачкиот премиер Роберт Фицо дури го обвини Киев дека го прави ова за да изврши притисок врз Унгарија да го отфрли долгорочното вето врз идното членство на Украина во Европската Унија.
На 18 февруари, тие исто така изјавија дека го запираат извозот на дизел во Украина сè додека не се рестартира протокот на нафта.
Во меѓувреме, Европската комисија го контактираше Киев во врска со ситуацијата, а Унгарија официјално побара од Хрватска да пумпа руска нафта, користејќи ја нејзината цевководна мрежа.
Хрватска изјави дека ќе го исполни барањето, под услов тоа да е компатибилно со законот за санкции на ЕУ и САД.
Амбасадорите на ЕУ ќе се состанат на 20 февруари со надеж дека ќе дадат потребно едногласно зелено светло за пакетот санкции, но европските дипломати за РСЕ изјавија дека не ја исклучуваат можноста дека можеби ќе треба повторно да се состанат во текот на викендот за да ги имаат санкциите подготвени за политичко одобрување кога министрите за надворешни работи на блокот ќе се состанат во Брисел на 23 февруари.
Освен последната резерва на Унгарија и Словачка, претставниците на земјите-членки сè уште не се согласиле за тоа каква форма треба да има потенцијалната поморска забрана за руска нафта.
Идејата на Европската комисија е да им се забрани на економските оператори на ЕУ да обезбедуваат услуги за кој било брод што транспортира нафта од руските пристаништа. Таквата мерка би отишла подалеку од сегашното ограничување на цената на нафтата - наметнато од водечките индустриски земји на Групата седум (Г7) и моментално поставено на 47,60 долари за барел - бидејќи би ги спречило бродовите со знаме на ЕУ целосно да транспортираат руска нафта.
Бродовите што не се од ЕУ би биле ослободени, но нема да можат да се потпрат на пристанишните услуги и осигурување на ЕУ.
Морските земји на ЕУ, како што се Кипар, Грција и Малта, сепак инсистираат мерката прво да биде одобрена од Г7. Но, малкумина во Брисел веруваат дека Г7 некогаш ќе се согласи на таков потег, а главното прашање сега е обезбедување договор што ќе ѝ овозможи на ЕУ да се одлучи за поморска забрана во соработка со други истомислечки трети земји.
Бугарија: Привремената влада на Ѓуров стапи на должност
Привремената влада со премиерот Андреј Ѓуров официјално ја презеде функцијата во среда, 19 февруари, откако положи заклетва пред Народното собрание.
Порано во текот на денот, Илијана Јотова потпиша указ за назначување на привремената влада, како и втор указ за закажување на нови парламентарни избори што ќе се одржат на 19 април 2026 година.
Веста доаѓа еден ден откако Ѓуров ѝ ја претстави привремената влада на Јотова во среда. Претседателот ги одобри предложените министри и рече дека таа ќе го назначи кабинетот.
Исто така во четврток, Ѓуров ја поднесе својата оставка од функцијата заменик-гувернер на Бугарската национална банка (БНБ) до Народното собрание, изјави претседателката на парламентот Раја Назарјан.
„Денес не се обраќам само на оваа сала. Се обраќам на секој бугарски граѓанин кој очекува одговорност од државата, а не ветувања“, им рече Ѓуров на пратениците по положувањето заклетва.
„Лично, јас и привремената влада преземаме одговорност да подготвиме и одржиме фер избори. Во време на внатрешна тензија и глобална несигурност, немаме право да ги избираме нашите задачи. Ние го преземаме предизвикот да управуваме со земјата додека не се формира редовен кабинет - без хистерија, со разум и цврсто заснован на реалноста“, додаде новиот привремен премиер.
Тој ги наведе некои од задачите со кои се соочува владата. Покрај одржувањето фер избори, тие вклучуваат обезбедување финансиска стабилност и подготовка на нов проширен буџет, фер распределба на средствата до општините, враќање на законитоста во управувањето со обвинителството, обезбедување на безбедноста на граѓаните итн.
По положувањето заклетва пред пратениците во парламентот, привремените министри се упатија кон Советот на министри, каде што се одржа церемонија на предавање и прифаќање на власта.
„Вие сте разумен и мудар човек и сигурен сум дека вие и вашите колеги ќе можете да го разликувате доброто што е направено од она што не е направено, а може да се направи“, му рече поранешниот премиер Жељазков на Ѓуров.
Жељазков и уште 11 министри од претходниот редовен кабинет се враќаат во Народното собрание како заменици.
Според ГЕРБ и ДПС – Нов почеток, кабинетот е „лична одговорност“ на Јотова. ГЕРБ навести за поврзаност со Радев, кој поднесе оставка во јануари за да се кандидира на изборите, додека ДПС рече дека владата е поврзана со ПП-ДБ.
В среда, Ѓуров им рече на пратениците дека „преодната влада нема коалициски математички податоци и нема скриени услови и договори“.
ДКСК го запре предметот против Блерим Беџети – не морал да ја пријави градежната фирма на неговите деца
Откако првично го казни пратеникот Блерим Беџети од ДУИ поради непријавување промена на интереси, Државната комисија за спречување на корупцијата (ДКСК) донесе поинаква одлука - дека законски немал никаква обврска за тоа што не ја пријавил градежната компанија „Ве Инвест Холдинг “ на своите две деца, за која пишуваше РСЕ.
На последната седница, Антикорупциска соопшти дека констатирала прекршок и го казнила Беџети бидејќи не пријавил промена во анкетниот лист во рок од 30 дена од основањето на фирмата во септември 2025 година.
Но, како што соопшти членот на Комисијата, Сервет Демири, Беџети поднел приговор и доставил докази – копии од лични карти дека синот и ќерката не живеат во заедничко домаќинство со нивниот татко.
„ДКСК утврди дека лицето немало обврска да пријави на интересите согласно закон бидејќи неговите блиски лица не се членови во семејство. Семејство се подразбира брачен другар, вонбраче другар, деца, со кој лицето живее во заедничко домаќинство“, рече Демири.
Од Антикорупциска велат дека е утврдена „нова фактичка состојба“, додека издадениот платен налог го поништиле.
Државната комисија за спречување на корупцијата отвори предмет против пратеникот Блерим Беџети за непријавен имот по написот на РСЕ дека неговиот 19-годишен син и 21 годишната ќерка отвориле градежна компанија „Ве Инвест Холдинг“, со седиште во стан во сопственост на таткото на Блерим, Беџет Беџети.
Во тогаш јавно достапниот анкетен лист на Блерим Беџети, како имот на деца беа наведени автомобил Голф фолксфаген, произведен во 2021 година, а купен на 26 јуни 2024 година за сума од 23.000 евра, како и заштеда од плата, стекната на 27 јуни 2023 година од 2.000 евра. Но, не и компанијата.
Беџети тогаш изјави дека фирмата нема да гради згради, туку дека тоа е општа дејност под која е регистрирана во Централниот регистар.
Во ноември 2025 година, Управата за финансиска полиција поднесе кривична пријава против поранешниот градоначалник на Сарај, Блерим Беџети и уште осум лица вработени во општина Сарај и Град Скопје поради сомнение за злоупотреба на службената положба. Случајот се однесува на нерегуларности при издавање градежни дозволи за објект во Сарај.