Вести
Сиљановска - Давкова именуваше тројца членови на Советот за безбедност
Претседателката Гордана Сиљановска -Давкова за членови на Советот за безбедност ги именува Малинка Ристевска Јорданова,експерт за евроинтеграции, Џевдет Хајредини, поранешен министер за финансии и Владимир Спиридонов, експерт за климатски промени. Со именувањето на тројцата членови, Советот за безбедност на Република Северна Македонија е во полн состав, информираа од Кабинетот на Сиљановска - Давкова.
Претседател на Советот за безбедност е претседателката на Северна Македонија, Гордана Сиљановска - Давкова. Членови се претседателот на Собранието, Африм Гаши, премиерот Христијан Мицкоски, министерот за внатрешни работи, Панче Тошковски, министерот за одбрана, Владо Мисајловски, како и министерот за надворешни работи и надворешна трговија, Тимчо Муцунски.
Советот за безбедност е највисокото советодавно тело во Република Северна Македонија, кое ги разгледува прашањата поврзани со безбедноста и одбраната на државата и дава предлози на Собранието и на Владата.
Начинот на работа на Советот за безбедност на Република Северна Македонија, начинот на остварување на правата и исполнувањето на должностите на членовите на Советот, свикување и одржување на седниците, спроведувањето на заземените ставови, поведените иницијативи и дадените мислења и предлози, информирањето за својата работа, како и други прашања во врска со организирањето и начинот на работа на Советот, се определени со Деловник за работа на Советот за безбедност на Република Северна Македонија.
Седниците на Советот за безбедност се затворени. Во одредени случаи седниците можат да бидат и јавни за тоа одлучува претседателот на Советот.
види ги сите денешни вести
Обвинителството истражува дали имало сериско убиство во кумановско
Основното јавно обвинителство во Куманово истражува дали во овој регион имало сериско убиство извршени од едно осомничено лице.
Ваквата информација надлежните ја соопштија објавувајќи дека 25-годишно момче од селото Челопек, Општина Старо Нагоричане, е осомничено дека со „умисла на свиреп и подмолен начин лишил од живот“ жена родена 1947 година.
„Ја искористил околноста дека оштетената живеела сама, била стара и немоќна. Кога влегол во нејзината куќа, таа спиела на креветот, па осомничениот физички ја нападнал, задавајќи и повеќе удари со кои и нанел тешки телесни повреди од кои жената починала“, соопштија од ОЈО Куманово.
Оттаму потенцираат дека изминатите денови истражниот центар заедно со МВР и екипи на Институтот за судска медицина обезбедиле докази кои „укажуваат на поврзаност на овој настан со неколку други слични случаи во кумановско“.
„Заради сличности во однос на изборот на жртвата и суровиот начин на извршување на делото се испитува дали и во тие случаи станува збор за убиства извршени од истиот сторител. За една од потенцијалните жртви вчера беше наредена ексхумација и обдукција, од телото на починатата жена се подигнати траги и ДНК кои се вештачат“, наведува обвинителството.
Освен дека се работат сложени вештачења и анализи, ОЈО Куманово посочува дека не може да открие повеќе детали во овој момент.
Осомниченото момче се наоѓа во притвор, а за него е наредено и психијатриско вештачење од страна на форензички психијатри од Институтот за психијатрија.
Извозот на челик од ЕУ во САД падна за 30% по царините на Трамп
Високите царини на челикот од страна на американскиот претседател Доналд Трамп предизвикаа пад на европскиот извоз во САД за една третина од јули 2025 година, соопшти европската група за челична индустрија „Еурофер“ повикувајќи се на „избалансираниот“ договор за царини меѓу САД и ЕУ.
Трамп минатата година воведе царини од 50 проценти на увозот на челик и алуминиум во САД, како дел од неговата примена на царини врз партнерите ширум светот.
Според договорот постигнат минатата година, САД се согласија да воведат царина од 15 проценти на повеќето стоки од ЕУ, но таа не ги вклучуваше челикот и алуминиумот.
Повикувајќи се на официјални податоци од ЕУ, „Еурофер“ соопшти дека извозот во САД се намалил за 30 проценти во втората половина од минатата година во споредба со истиот период во 2024 година, пад за кој ги обвини царините на Трамп.
Трамп подоцна ги прошири своите царини во август за да вклучи неколку стотици производи што содржат челик или алуминиум, што би можело да има дополнителни негативни ефекти за европските производители на машини и други стоки со висока содржина на метал.
„Бројките ја нагласуваат потребата секој трговски договор меѓу ЕУ и САД да биде фер, избалансиран и применлив“, се вели во соопштението на „Еурофер“.
Вашингтон одби да ги намали царините за метали и покрај апелите на ЕУ, но ѝ порача на ЕУ да го преиспита својот пристап кон дигиталната регулатива ако сака пониски давачки - зделка што е неприфатлива за Брисел.
ЕУ во октомври презеде чекори за да ја заштити својата индустрија во криза со удвојување на царините за странски челик, како дел од мерките за спасување што мора да се договорат до јуни 2026 година пред да истечат сегашните заштитни мерки.
Апелот на „Еурофер“ доаѓа во време кога се очекува трговскиот комитет на Европскиот парламент да гласа во вторник за спроведувањето на договорот меѓу ЕУ и САД.
Комитетот ја прекина својата работа по заканите на Трамп за анексија на Гренланд, но парламентот се чини дека е подготвен да го даде своето одобрение, иако со заштитни мерки и клаузула за преглед.
Шефот на ЕУ за трговија, Марош Шефковиќ, ги повика пратениците на ЕУ да го одобрат договорот „што е можно побрзо“, пред разговорите со министрите за трговија на ЕУ и на Кипар.
Шпанија ќе побара од ЕУ укинување на санкциите за лидерката на Венецуела
Шпанија ќе побара од Европската Унија да ги укине санкциите врз привремената лидерка на Венецуела, Делси Родригез, откако беше одобрен закон за амнестија што би можел да ослободи стотици политички затвореници, изјави министерката за надворешни работи во петокот.
Законот е значајна реформа што ја спроведе новото раководство на јужноамериканската земја откако САД го заробија социјалистичкиот моќник Николас Мадуро во смртоносен напад врз Каракас минатиот месец.
Поранешната потпретседателка на Мадуро е меѓу високите функционери на венецуелската влада на кои им е забранет влез на територијата на ЕУ според санкциите воведени во 2018 година.
Европската Унија соопшти дека таа одиграла улога во наводните изборни нерегуларности таа година, кршење на правата и поткопување на „демократијата и владеењето на правото“ во поранешната шпанска колонија.
Шпанскиот министер за надворешни работи, Хозе Мануел Албарес, им изјави на новинарите во Барселона дека „санкциите никогаш не се цел, тие се средство за постигнување цели, така што во Венецуела се одвива широк, мирен, демократски дијалог“.
„Европската Унија мора да испрати сигнал дека се движиме во вистинската насока во оваа нова фаза“, рече Албарес, поздравувајќи го законот за амнестија.
Албарес додаде дека Мадуро никогаш не бил предмет на санкции од ЕУ бидејќи таквите ограничувања „секогаш ги исклучуваат претседателите и министрите за надворешни работи“.
Законот за амнестија, едногласно одобрен од Националното собрание на Венецуела во четврток, не се однесува на оние кои биле гонети или осудени за промовирање воена акција против земјата.
Тоа би можело да ги исклучи опозициските лидери како добитничката на Нобелова награда за мир Марија Корина Мачадо, која е обвинета од владејачката партија дека повикува на меѓународна интервенција како онаа со која беше соборен Мадуро.
Критичарите, исто така, стравуваат дека законот би можел да го искористи владата за да ги помилува своите и селективно да им ја одземе слободата на затворениците.
Родригез се залагаше за законот под притисок од Вашингтон, кој соработуваше со нејзината влада во замена за пристап до огромните нафтени резерви на Венецуела.
Обвинителство: Нема снимка од трамвајот што излета од шините во Сараево
Нема снимки од трамвајот што излета од шините минатата недела, потврди за Радио Слободна Европа, Обвинителството на кантонот Сараево.
На 12 февруари, трамвајот излета од шините и ја урна постојката, при што загина 23-годишно момче, а неколку други беа повредени.
„Форензичката обработка на хард дискот што беше изваден од кабината на возачот утврди дека нема снимен материјал од 29 ноември 2025 година. Обвинителството, меѓу другото, утврдува зошто системот за видео надзор не работел“, потврди Обвинителството на КС.
Ден претходно, Кантоналното обвинителство објави дека истражителите на Министерството за внатрешни работи на кантонот Сараево запленуваат документација од Градското транспортно претпријатие (GRAS) поврзана со користењето на трамвајот број 516 што беше вклучен во несреќата, техничката документација на сите чешки трамваи и одредени персонални досиеја на вработените.
Обвинителството на Сараевскиот кантон во среда објави дека се сослушани 30 сведоци како дел од истрагата за трамвајската несреќа, а запленети се 10 снимки од видео надзор од околните згради, како и снимка од трамвајската кабина.
Обвинителството претходно изјави дека утврдило дека „постои основано сомнение дека возачот сторил кривично дело загрозување на јавниот сообраќај од небрежност со смртни последици“, но дека ја почитува одлуката на Судот, кој го отфрли нивниот предлог за притворање на возачот на трамвајот и го ослободи.
Возачот се изјасни за невин и дека несреќата се случила поради техничка неисправност на трамвајот, што го тврдеше и синдикатот на GRAS.
Во деновите по несреќата, премиерот на Сараевскиот кантон, Нихад Ук, како и директорот на градскиот превозник GRAS, Сенад Мујакиќ, поднесоа оставка.
Стотици граѓани протестираат секој ден на местото на несреќата и пред владините и судските институции, барајќи одговорност за трагедијата.
Украински беспилотни летала го нападнаа Севастопол
Украински беспилотни летала го нападнаа Севастопол, окупираниот од Русија, град на Кримскиот полуостров, изјави во петок, 20 февруари, рускиот администратор на пристанишниот град во кој се наоѓа руската Црноморска флота, Михаил Развожаев. Како што пренесува АФП, еден маж бил убиен, а една жена повредена.
Не даде информации за можни напади, вклучително и дали биле нападнати воени цели, но рече дека воздушната одбрана на градот соборила 26 беспилотни летала, изјави градскиот администратор на Телеграм.
Нападот искршил прозорци и предизвикал помала штета на куќите, рече тој.
Русите нелегално го окупираа Крим во 2014 година и започнаа целосна инвазија на Украина пред речиси четири години.
Рускиот, но проукраински канал на Телеграм, Кримски Ветер, објави експлозии во близина на Џанкој во северен Крим, каде што има воен аеродром.
Поради опасноста од украинските воздушни и морски дронови, Црноморската флота одамна ги премести повеќето од своите бродови во пристаништето Новоросијск во јужна Русија, но сè уште има многу воени бази во и околу Севастопол.
Украина известува и за руски напади врз Никопол. Руски дронови и артилерија го погодија градот Никопол на фронтовската линија на југот од регионот Дњепропетровск, при што беа повредени тројца, објавија украинските власти во петок наутро. Тие додаваат дека ракета го погодила и Харкив.
Русинка призна дека лажела за врски со руското разузнавање
Русинката Нома Зарубина, обвинета дека го лажела Федералното истражно биро (ФБИ) на САД за нејзините врски со највисоката разузнавачка агенција на Русија - а потоа пијана му пишувала пораки на агент на ФБИ додека била ослободена со кауција - се изјасни за виновна пред американскиот суд.
Според поднесоците на федералниот суд, Зарубина го променила своето сведочење околу два месеци откако судијата ја поништи нејзината кауција за постојано испраќање пораки на агент на ФБИ и нареди да биде затворена.
Покрај тоа што се изјаснила за виновна по обвинението за лажно сведочење, таа се изјаснила и за друго обвинение поврзано со нејзиниот имиграциски статус, покажаа судските поднесоци.
„Намерното прикривање на Зарубина за нејзиното недолично однесување и нејзините лаги за нејзината поврзаност со руската разузнавачка служба се навреда за напорите на спроведувањето на законот за зачувување на националната безбедност“, соопшти Министерството за правда.
Нејзиниот адвокат не одговори веднаш на барањето за коментар.
Зарубина првично беше обвинета во декември 2024 година, откако беше постојано испрашувана од агенти на ФБИ почнувајќи од октомври 2020 година.
Родена во сибирскиот град Томск, Зарубина се преселила во САД во 2016 година и изгради мрежа од професионални и лични врски меѓу руските емигрантски групи, како и во американските тинк-тенкови и активистички организации.
Федералните агенти првпат ѝ пристапија неколку недели откако ФБИ го претресе станот на Менхетен на друга Русинка, Елена Бренсон, и заплени десетици компјутери и други електронски уреди.
Бренсон, која избега во Русија кратко време по операцијата, подоцна беше обвинета дека е нерегистриран странски агент.
Според изјавите на ФБИ, Зарубина наводно лажела за своите комуникации со двајца службеници на руската Федерална служба за безбедност (ФСБ) кои ја воделе нејзината мрежа, идентификувајќи луѓе и организации со кои требало да контактира.
По обвинението, Зарубина беше ослободена со кауција.
Сепак, во месеците што следеа, таа наводно испратила многу е-пошта и фотографии до агенти на ФБИ кои ја испрашувале - понекогаш и среде ноќ.
Обвинителите и нејзиниот адвокат му рекоа на федералниот суд дека Зарубина има проблем со пиењето и дека ѝ е наредено да побара советување за ментално здравје. Во ноември 2025 година, судијата ја поништи нејзината кауција и нареди таа да биде испратена во затвор до судењето.
Изрекувањето на пресудата е закажано за јуни.
Трамп: Сојузниците придонесоа со повеќе од 7 милијарди долари за Газа
Претседателот на САД, Доналд Трамп изјави дека сојузничките земји придонеле со 7 милијарди долари за помош на Газа, додека Косово се обврзало да помогне со испраќање воени трупи.
Говорејќи во четврток во Вашингтон на првиот состанок на Одрборот за мир, Трамп рече дека пет земји меѓу кои Косово и Албанија, се обврзале да испратат трупи во Меѓународните безбедносни сили за Газа.
На свечениот состанок учествуваше и претседателката на Косово, Вјоса Османи, бидејќи Косово е една од земјите-основачки на Одборот.
Одборот за мир, кој брои 27 членки, беше основан на 22 јануари во Давос, Швајцарија, во присуство на претседателот Трамп.
Советот за безбедност на Обединетите нации ја овласти оваа структура да го надгледува спроведувањето на примирјето во Газа и да се вклучи во прашања поврзани со управување и обновување на регионот.
Основaњето на Одборот е предвидено со планот на Трамп од 20 точки за мир во Газа.
Овој план го прифатија Израел и Хамас – организација што САД и други држави ја прогласија за терористичка во октомври минатата година, со цел да се стави крај на двегодишните судири.
Во меѓувреме, за време на својот говор во четврток, Трамп исто така рече дека помогнал во намалувањето на тензиите меѓу Косово и Србија. Тој ја пофали претседателката Вјоса Османи и порача дека двете земји треба да го контактираат „ако не оди добро“, на што Османи одговори: „Ќе ве повикаме“.
Придонесот на Косово
Претседателството на Косово претходно потврди за Радио Слободна Европа дека од државата не е побарано плаќање од милијарда долари.
Се наведува дека земјата, за да стане постојан член на Одборот, би требало да уплати износ од милијарда долари.
Претходно, косовските власти потврдија дека се разгледува формата и капацитетот во кои припадниците на Косовските безбедносни сили (ФСК) би можеле да придонесуваат во Меѓународните сили за стабилизација за Газа.
Премиерот на Косово, Албин Курти изјави дека учеството на ФСК во оваа мисија произлегува од учеството на конференција одржана во декември минатата година во Доха, Катар, која ја организираше Централната команда на американската армија.
Министерот за одбрана, Ејуп Македончи, изјави за Радио Слободна Европа дека конференцијата во Катар имала информативен карактер во врска со Меѓународните сили за стабилизација и дека Косово било повикано да учествува од страна на американската армија.
Во четврток, командантот на Меѓународните сили за стабилизација, американскиот генерал-мајор Џаспер Џеферс, на состанокот на Одборот даде дополнителни детали за оваа мисија.
„Првите пет земји ангажираа трупи за служба во Меѓународните сили за стабилизација (ISF) – Индонезија, Мароко, Казахстан, Косово и Албанија. Две земји ја презедоа обврската за обука на полицијата – Египет и Јордан“, рече Џеферс.
Тој додаде дека ISF ќе започне распоредување во Рафах, на југот на Газа, каде ќе ја обучува локалната полиција, а потоа ќе се „шири сектор по сектор“.
Според Џеферс, долгорочниот план предвидува ангажирање на 20.000 војници од ISF и обука на 12.000 полицајци.
Војната меѓу Израел и Хамас почна во октомври 2023 година, откако Хамас уби повеќе од 1.200 луѓе во Израел и зема стотици заложници.
Израелските напади врз Газа како одмазда предизвикаа смрт на повеќе од 60.000 луѓе, криза со глад и огромни штети на инфраструктурата.
Иран и Русија изведуваат поморски вежби додека САД го засилуваат военото присуство во Арапско Море
Иран и Русија во четврток започнаа заеднички поморски вежби во јужните води на Иран, додека САД продолжуваат да го прошируваат своето воено присуство во Арапско Море.
Вежбите се одвиваат првенствено во Ормуски Теснец, Омански Залив и северниот дел на Индиски Океан.
Познати како „Поморски безбедносен појас“, вежбите се одржуваат од 2019 година и обично ја вклучуваат и Кина, иако Пекинг, како што изгледа, не учествува во актуелните вежби.
Контраадмиралот на иранската морнарица, Хасан Максудлу, им изјави на новинарите дека една од целите на вежбите е „да се спречи каква било еднострана акција во регионот“, што изгледаше како имплицитна референца на засилувањето на присуството на американската војска.
Иранско-руски вежби
Иранската и руската морнарица изведоа вежби на воздушно извидување и практикуваа тактички формации и маневрирање, пренесоа иранските медиуми.
Вежбите, исто така, опфатија сценарија на офанзивни формации насочени кон подобрување на тактичката координација, зајакнување на заедничката команда и контрола и увежбување на брза реакција во оперативни услови, при што единиците практикуваа комбинирано распоредување и техники на маневрирање.
Меѓу силите што учествуваа беа единици на иранската морнарица и морнарицата на Корпусот на исламската револуционерна гарда - воени бродови, ракетни чамци, хеликоптери, тимови за специјални операции и летала за брзи напади, заедно со руската корвета „Стојкиј“ и авиони на иранската воена авијација.
Се очекува Европска Унија оваа недела да го означи Корпусот на исламската револуционерна гарда, кој одржа свои поморски вежби во Ормуски Теснец на 16 и 17 февруари, како терористичка организација. Одлуката за ставање на IRGC на „црна листа“ беше донесена минатиот месец.
Од руската страна, се чини дека во вежбите учествува само еден воен брод.
„Мали“ и „симболични“
Укажувајќи на слабото присуство на Русија, поранешниот ирански морнарички офицер Мохамед Парси ја опиша вежбата како „мала“ и „симболична“.
„Не можам да замислам дека Русија би понудила вистинска поддршка во директен судир меѓу Иран и САД“, изјави тој за Радио Фарда (ирански сервис на РСЕ), додавајќи дека Москва веројатно го користи Техеран во својот поширок судир со Западот, наместо да се обврзе на заемна одбрана.
Вежбите се одржуваат додека САД и Иран ги продолжуваат разговорите за можен договор што би го ограничил иранскиот нуклеарен програм и би спречил војна.
„Иран би бил многу мудар доколку постигне договор“, изјави во средата портпаролката на Белата куќа, Керолин Левит, откако втората рунда разговори меѓу САД и Иран во Женева заврши без напредок.
Вашингтон во последните недели го засилуваше своето воено присуство на Блискиот Исток и неодамна распореди втор носач на авиони во Арапско Море.
Според некои извештаи, американската воздушна моќ во регионот сега го достигнала своето најсилно ниво од инвазијата на Ирак во 2003 година.
Истражителите одземаат документација за трамвајот што учествуваше во несреќата во Сараево
Истражителите од Министерството за внатрешни работи на Сараевскиот кантон одземаат документација од Кантоналното јавно комунално претпријатие ГРАС, која се однесува на употребата на трамвајот број 516 што учествуваше во несреќата во која едно лице загина, а повеќе лица беа повредени, како и техничката документација за сите чешки трамваи и одредени персонални досиеја на вработените, соопшти во четвртокот Сараевското кантонално обвинителство.
Во рамки на истрагата за несреќата од 12 февруари, од Министерството за сообраќај на Сараевскиот кантон се одзема документација поврзана со стручниот надзор над трамвајскиот сообраќај што се спроведувал во ГРАС, јавното комунално претпријатие задолжено за градскиот превоз во Сараево.
Во рамки на проверката на наводите од пријавата што се однесува на јавните набавки на магнетни сопирачки, се вршат претреси во просториите на фирмата „Виклер-Промет“ на две локации, се наведува во соопштението на Обвинителството на Кантонот Сараево.
Откако трамвајот со број 516 излета од шините и урна трамвајска постојка, загина едно 23-годишно момче, додека повеќе лица се повредени.
Обвинителството на Кантонот Сараево во средата соопшти дека во рамки на истрагата за трамвајската несреќа се сослушани 30 сведоци, а одземени се 10 снимки од видеонадзор од околните објекти, како и снимка од кабината на трамвајот.
Од кантоналното Министерство за сообраќај веќе е одземена „обемна документација што се однесува на реконструкцијата на целосната трамвајска пруга и сигналните планови на сите релевантни раскрсници, кои ќе бидат предмет на вештачење“.
Обвинителството претходно наведе дека утврдило оти „постои основано сомнение дека возачот сторил кривично дело „загрозување на јавниот сообраќај од небрежност со смртна последица“, но дека ја почитува одлуката на Судот кој го одби нивниот предлог за притвор за возачот на трамвајот и го пуштил на слобода.
Возачот се изјасни дека не е виновен и дека несреќата се случила поради техничка неисправност на трамвајот, што го тврди и Синдикатот на КЈКП ГРАС.
Во деновите по несреќата на 12 февруари, оставки поднесоа премиерот на Кантонот Сараево, Нихад Ук, како и директорот на КЈКП ГРАС, Сенад Мујакиќ.
Стотици граѓани секој ден протестираат на местото на несреќата, како и пред зградите на владините и правосудните институции, барајќи одговорност за трагедијата.
Усвоени законските измени за продолжување на рокот за легализација на дивоградбите
Собранието денеска (19 февруари) во рамки на 85. седница по скратена постапка го донесе Закон за изменување на Законот за постапување со бесправно изградени објекти. Со овие измени, рокот за легализација на дивоградбите се продолжува за уште пет години, односно до 2031 година.
Дополнителните пет години се дадени за да се завршат постапките за објектите изградени до 2011 година и формално измените не отвораат нова врата за нови барања, туку се однесуваат исклучиво на оние граѓани кои веќе поднеле документација и со години чекаат разрешница.
Барање од Управниот одбор на ЗЕЛС
Законот беше донесе со 67 гласови „за“, пет „против“ и без ниту еден воздржан.
Управниот одбор на ЗЕЛС на почетокот на месецов до Собранието, Владата и Министерството за транспорт достави барање со цел да се овозмои продолжување на рокот на Законот за постапување со бесправно изградени објекти заклучно со 2031 година.
Во самото барање од Управниот одбор на ЗЕЛС е образложено дека голем дел од постапките не биле завршени поради водење на судски спорови поврзани со правата врз изградените објекти, судски постапки поведени во рамките на постапката која се води пред општината, одложување на донесување на управни акти во постапката поради наследни и други имотно-правни околности кои требало да се решат како претходно прашање во постапка, како и други непредвидени околности.
При тоа, продложувањето на рокот има за цел само довршување на постапките кои се веќе отпочнати, а не и доставување на нови барања и оформување на нови предмети за постапување.
Првично ваков закон беше донесен во 2011 година, а со денеска усвоените измени во членот 5 зборовите „петнаесет години“ се заменуваат со зборовите „дваесет години“, со што се означува времетраењето на процесот на озаконување.
Од парламентарното мнозинство во текот на општата расправа посочија дека станува збор за техничко продолжување, со цел да не се прекинат илјадници предмети кои се наоѓаат во различни фази на постапка.
Пратеничката Бисерка Златеска од ВМРО-ДПМНЕ истакна дека Предлог-законот е предложен по скратена постапка, бидејќи станува збор за закон со кој им се дава можност на граѓаните кои имаат покренато процес за легализација на дивоградбите, а досега не добиле разрешница поради тоа што надлежните институции не ги завршиле своите обврски.
Таа додаде дека не станува збор за решение со кое се отвора нов процес на легализација.
„Ако не се донесе ваков закон ќе се казнат граѓаните кои навреме поднеле барања, а не ги исполниле роковите за легализација не по нивна вина, туку поради процесни причини“, рече Златеска.
Таа истакна дека овој предлог не отвора можност за нови дивоградби, туку се однесува на довршување на започнати објекти без дозвола, без нови барања.
Појасни дека рокот се продолжува до март 2031, наместо март 2026. Додаде дека продолжувањето нема финансиски импликации врз буџетот, не создава нови предмети и ги затвора старите.
Пратеникот Малиша Станковиќ од СПМ нагласи дека во 2011 е донесено првичното законско решение, кое, како што рече, во тој период било контроверзно. Додаде дека и самото име на предлогот е таков бидејќи се бара легализирање на нешто што е бесправно.
„Но, и тогаш и сега, треба да се решат проблемите на овие граѓани, кои не по своја вина, не го завршиле процесот“, рече Станковиќ кој го поддржа предлогот.
Потсети дека во 2011 година на пример, во Кисела Вода околу 4600 до 4700 објекти биле дивогради.
Пратеникот Беким Ќоку од БЕСА нагласи дека ќе го поддржат законското решение, бидејќи како што се надоврза, овозможува завршување на сите постапки за легализација на објекти, кои се изградени без дозвола.
Според пратеникот Сашко Јанчев од Левица, предлогот има погрешно име и треба да се нарече „закон за стимулирање изградба на дивоградби“. Тој рече дека првично закон бил донесен во 2011 година и требал еднократно да го реши проблемот, но владите кои се менувале го продолжиле периодот за легализација на 15 години, а со новиот предлог се оди на вкупно 20 години.
Основната идеја на законот беше да се постави ред во урбанизмот кој беше во хаос поради ненавременото носење на урбанистичките планови. Петнаесет години подоцна, сѐ уште илјадници граѓани чекаат локалните власти да им ги решат проблемите и да им дадат документ за сопственост на имот.