Вести
Русија им ги одзеде акредитациите на шест британски дипломати
Русија им ја укина акредитацијата на шестмина британски дипломати, обвинувајќи ги за шпионажа.
Како што соопшти Службата за државна безбедност (ФСБ), акредитацијата на дипломатите била одземена, бидејќи нивните активности ја загрозувале безбедноста на Русија.
„Врз основа на документите доставени од руската ФСБ, како одговор на бројните непријателски потези на Лондон, Министерството за надворешни работи на Русија ја укина акредитацијата на шестмина вработени во политичкиот оддел на британската амбасада во Москва, чии постапки открија знаци на разузнавање и субверзивна работа“, се вели во соопштението.
ФСБ не ги откри имињата на британските дипломати. Руската државна телевизија цитираше функционер на ФСБ кој рекол дека тие ќе бидат протерани.
Разузнавачката служба предупреди дека во иднина „доколку се откријат слични дејствија меѓу вработените во британската дипломатска мисија, руската ФСБ ќе бара предвремено прекинување на нивните службени патувања во Русија“.
Потегот доаѓа два дена откако Соединетите Држави и Велика Британија ветија речиси 1,5 милијарди долари дополнителна помош за Украина, и додека украинските власти ги обновија своите молби да користат ракети испорачани од Запад против цели подлабоко во Русија.
види ги сите денешни вести
Орбан: ЕУ води „економска студена војна“ со Кина
Економската стратегија на Европската Унија претставува „економска студена војна“ и Унгарија не сака да биде притисната во ниту еден блок и сака да продолжи да тргува со двете страни, изјави премиерот Виктор Орбан за државното радио во петокот.
Орбан додаде дека производите произведени во ЕУ ќе биде сè потешко да се продаваат ако светската економија се подели на два блока и дека е нејасно дали Унгарија може успешно да ја продолжи својата стратегија за „економска неутралност“.
Во контекст на домашната економија тој вели дека унгарската влада треба прво да го рестартира растот, а потоа да се фокусира на зголемувањето на платите, така што просечната месечна плата може да се зголеми на 1 милион форинти (2749 долари) во следните 2-3 години.
Орбан додаде дека ограничувањата на цените се неодржливи на долг рок и може да се применат само за многу краток период под екстремни околности.
Израел продолжува со нападите во Либан, експлозии во близина на аеродромот во Бејрут
Неколку експлозии ја потресоа областа во близина на аеродромот во Бејрут. Либанското Министерство за транспорт соопшти дека пошироката област на аеродромот била погодена.
Во последните 24 часа загинале најмалку 37 лица, а 151 е ранет, соопшти локалното Министерство за здравство, пренесува Ројтерс.
Израел го бомбардираше центарот на Бејрут претходно во четвртокот, откако израелските сили го претрпеа најсмртоносниот ден на либанскиот фронт во една година конфликт со Хезболах, милитантната група поддржана од Иран.
Израел соопшти дека извршил прецизен воздушен напад врз Бејрут. Очевидци на Ројтерс изјавија дека виделе голема експлозија, а безбедносните сили соопштија дека целта била зграда во централниот кварт Бахур во Бејрут, во близина на зградата на парламентот.
Три проектили го погодија и јужното предградие Дахија, каде минатата недела беше убиен лидерот на Хезболах Хасан Насрала.
Нападите на Израел во јужен Либан продолжија доцна вечерта на 3 октомври, откако девет лица беа убиени во напад на станбена зграда во центарот на Бејрут, додека во посебна операција на Западниот Брег бил елиминиран палестински милитант кој претходно бил вклучен во линч на израелските резервисти.
Израелската армија, исто така, повика на итна евакуација на повеќе од 20 градови во јужен Либан, вклучувајќи го и главниот град на провинцијата Набатие, очигледно укажувајќи дека израелската операција против Хезболах ќе биде проширена.
Хезболах е и вооружена група и политичка партија која го контролира поголемиот дел од јужен Либан. САД ја сметаат за терористичка организација, додека Европската Унија го стави на црната листа само неговото вооружено крило.
Либанското Министерство за здравство соопшти дека девет лица се убиени во нападот на Бејрут, што е прв напад врз центарот на либанската престолнина од 2006 година.
Израел соопшти дека неговиот воздушен напад врз Бејрут бил прецизна операција, додека извор од безбедносните сили рече дека целта била станбена зграда во централната населба Бачура во близина на либанскиот парламент.
Група за цивилна одбрана поврзана со Хезболах соопшти дека седум нејзини членови, вклучително и двајца здравствени работници, биле убиени во напад во Бејрут.
Според либанските безбедносни претставници, во посебен ракетен напад врз зграда во јужниот либански град Бинт Џбеил загинале 15 членови на Хезболах, додека друг напад беше насочен кон јужното предградие Дахије, каде што минатата недела беше убиен лидерот на Хезболах Хасан Насрала.
Израелската армија во четвртокот (3 октомври) објави дека е убиен високиот оперативец на Хамас Равхи Муштаха, шеф на владата на Хамас во појасот Газа.
Претходно, во израелски напад врз сириската престолнина Дамаск загинаа четири лица, меѓу кои и Хасан Џафар ал-Касир, зетот на Насралах, соопшти Сириската опсерваторија за човекови права со седиште во Велика Британија.
Последните израелски напади след еден ден откако Израел објави дека осум негови војници биле убиени за време на неговиот упад во јужен Либан, што е најголем број на израелски воени жртви во еден ден откако беше започната прекугранична офанзива оваа недела.
Македонската армија ќе одржи методско-показна вежба на Криволак
Премиерот Христијан Мицкоски, амбасадорката на Соединетите Држави во Република Северна Македонија, Анџела Агелер, министерот за одбрана Владо Мисајловски и началникот на Генералштабот на Армијата, генерал-мајор Сашко Лафчиски ќе присуствуваат на денешната методско-показна вежба на армискиот полигон „Криволак“.
„По реализација на вежбата ќе биде одржан и тактичко-технички збор, каде ќе биде претставена дел од новопримената опрема, како дел од процесот за модернизација и опремување на Армијата“, се наведува во соопштението на Министерството за одбрана.
Како што информираа од Министерството за одбрана, припадниците на Армијата од лесната пешадиска борбена група ќе реализираат вежба со боеви гаѓања - демонстрација на капацитетите и способностите.
Хрватска следната недела ќе биде домаќин на Балкански самит за Украина
Хрватска, следната недела ќе биде домаќин на Самитот на балканските лидери посветен на Украина. На Самитот ќе присуствува и украинскиот претседател Володимир Зеленски, изјави на 3 октомври хрватскиот премиер Андреј Пленковиќ.
„Целта на состанокот, кој ќе се одржи во јужното јадранско одморалиште Дубровник, е целиот регион да се обедини во поддршката за Украина и украинскиот народ во борбата за слобода“, изјави хрватскиот премиер Пленковиќ на редовната владина седница.
Претходниот самит „Украина-Југоисточна Европа“ се одржа во февруари во главниот град на Албанија, Тирана.
Зеленски присуствуваше на тој собир и повика на поголема поддршка за да се помогне да се одвратат руските сили, при што неговите трупи од првата линија страдаат од недостиг на муниција.
Во четвртокот, зборувајќи заедно со новиот шеф на НАТО Марк Руте во Киев, Зеленски рече дека неговата земја се обидува да ги убеди своите западни поддржувачи да му помогнат со модерна воена опрема со која ќе можат да ги соборат руските ракети и беспилотни летала испукани врз Украина.
Самитот во Хрватска ќе се одржи во услови на внатрешен спор меѓу владата и претседателот Зоран Милановиќ околу Украина.
Милановиќ во вторникот одби да го поддржи предлогот на владата за испраќање хрватски офицери во мисијата на НАТО во Германија за обука на украински војници.
Милановиќ, чии овластувања се ограничени, но е врховен командант на вооружените сили на земјата, на социјаната мрежа Фејсбук напиша дека нема да дозволи хрватските војници да „учествуваат во активности што ја туркаат Хрватска во војна“.
Премиерот го обвини Милановиќ дека дејствува против националните интереси.
Тој ги повика пратениците да ја поништат одлуката на претседателот, за што е потребно двотретинско мнозинство гласови во парламентот.
Притвор од осум дена за осомничен за полово вознемирување
Основниот суд во Тетово му изрече мерка притвор од 8 дена на осомничен 29 годишен жител на тетовското село Церево по предлог на јавниот обвинител. 29 годишниот маж е осомничен за полово вознемирување и злоупотреба на лични податоци на 17 годишно девојче.
Обвинителството посочува дека сомничениот преку социјалните мрежи во неколку наврати објавувал фотографии од девојчето со вулгарна и недолична содржина.
„Тој упатувал непристојни пораки со што ја нарушувал нејзината чест и углед и предизвикувал чувство на непријатност, навреденост, понижување и страв“, се вели во соопштението на Обвинителството.
Демнењето и сексуалното вознемирување станаа кривични дела во февруари минатата година со измените на кривичниот законик. Откако измените стапија во сила, работата на обвинителите се зголеми.
Во Обвинителствата (ОЈО) од февруари минатата година до март годинава се примени 51 кривична пријава за ова кривично дело. Најголем дел се пристигнати во скопското Обвинителство, вкупно 13, по што следува Струмица со 6 и во другите по три.
Со новите измени на законот се предвидува дека со парична казна или затворска до три години ќе се казни човекот за кој судот ќе утврди дека ве следи, прогонува, психички ве вознемирува, злоставува или застрашува, лично или преку пишана комуникација, како и ви ги злоупотребува личните податоци.
Казната е поголема ако ова дело го стори близок човек, односно сегашен или поранешен интимен партнер, како и доколку делото е сторено кон дете, тогаш казната може да достигне и до пет години затвор.
Мицкоски: Очекувам предизвикувачка зима
Македонскиот премиер Христијан Мицкоски очекува предизвикувачка грејна сезона. Тој во изјава на 3 октомври посочи дека очекува цената на електричната енергија на светските берзи да се зголеми поради војната во Украина.
„Имам чувство дека оваа зима ќе биде прилично предизвикувачка, не поради температурите, туку поради состојбата што се случува во Украина, каде што комплетно е уништен електроенергетскиот систем и Украина влече енергија од Европа, што значи дека тоа ќе ја зголеми цената на електричната енергија на берзите во Европа и ќе ја намали количината, така што ние мораме да бидеме подготвени, изјави Мицкоски.
Тој додаде дека очекува нова енергетска криза во Европа. Мицкоски уверува дека работењето во АД ЕСМ е нормализирано, иако, како што вели, компанијата наследила долг од над 80 милиони евра.
„Бидете сигурни дека е нормализирано работењето на компанијата и ќе има одговорност за тоа што се случувало, но нема да правиме естрада и театар од тоа. Многу скоро од денеска, ќе бидат посочени лицата што се виновни за состојбата во која е оставена компанијата,“ изјави Мицкоски.
Во меѓувреме раководството ЕСМ и РЕК Битола соопшти дека пред стартот на грејната сезона, , РЕК Битола, е оставен без доволни количини јаглен, а затекнатата руда на депонијата е со исклучително лош квалитет. Директор на производството во АД ЕСМ Зоран Коњановски изјави дека состојбата во рудниците Суводоол и Брод-Гнеотино состојбата е лоша. Тој објасни дека од Суводол може дневно да се експлоатираат околу 4.000 тони јаглен и 2.500 до 3.000 тони од Брод-Гнеотино.
„Тоа значи околу 7.000 тони јаглен, што е доволно за работата на еден блок и нешто малку да остане. Другото ќе го увезуваме за да има доволно РЕК да работи со два блока. За да работат трите блока потребни се 18.000 тони јаглен дневно. Доколку успееме да набавиме јаглен со соодветен квалитет во текот на зимата, ќе го ставиме во функција и третиот блок“, изјави Коњановски.
Со цел да се излезе од кризата со јаглен, новото раководство најави реорганизација во однос на капацитетите во рудниците, за да може, како што велат, да се обезбеди фронт за ископ на квалитетен јаглен.
СЗО: Во еден ден најмалку 28 медицински работни загинале во Либан
Најмалку 28 дежурни медицински лица се убиени во изминатите 24 часа во Либан, каде Израел започна воздушни напади и испрати војници да се борат против Хезболах во ескалирачкиот конфликт, изјави во четвртокот генералниот директор на Светската здравствена организација, Тедрос Аданом Гебрејесус.
„Многу (други) здравствени работници не се пријавуваат на должност и побегнаа од областите каде што работат поради бомбардирањето“, изјави тој повикувајќи на посилна заштита за здравствените работници.
„Ова сериозно го ограничува обезбедувањето на управување со масовната траума и континуитетот на здравствените услуги“, рече Гебрејесус.
Претставникот на СЗО во Либан, д-р Абдинасир Абубакар, на брифингот изјави дека сите здравствени работници кои загинаа во изминатиот ден биле на должност, помагајќи им на повредените.
„Болниците се веќе евакуирани. Мислам дека засега можам да кажам дека постои капацитет за масовно управување со жртвите, но прашање на време е додека системот навистина не ја достигне својата граница“, рече Абубакар од СЗО.
„Светската здравствена организација не може да ја испорача големата планирана пратка со лекови за траума и медицински материјали во земјата во петок поради ограничувањата на летовите, рече Тедрос.
Зголемените тензии на Блискиот Исток доведоа до хаос во воздушниот сообраќај, при што светски авиокомпании ги пренасочуваат или откажуваат летовите, а пријавени се долги доцнења на регионалните аеродроми.
СЗО преговара со земјите за да ја олесни испораката на итни резерви во Либан и да истражува други опции за транспорт на хуманитарна помош по море или копнен пат.
Уапсена организирана група на криумчари на мигранти во Србија
Приведени се 12 членови на две организирани криминални групи за криумчарење на 178 мигранти во Србија, изјави на 3 октомври српскиот министер за внатрешни работи на Србија, Ивица Дачиќ.
Според него, по неколку месечна меѓународна истрага, се приведени 12, а по уште две лица полицијата се уште трага. Осомничените се товарат дека од мај до август годинава „го олесниле нелегалниот транзит“ на најмалку 178 мигранти преку територијата на Србија и илегалниот премин на државната граница на Србија и Босна и Херцеговина, „со цел на нивното натамошно нелегално пренесување во земјите на Европската унија (ЕУ)“.
Според досегашната истрага, едната организиран група за одредена сума на пари пренесувала мигранти од Србија преку БиХ до ЕУ, додека втората била задолжена за нивниот „шверц“ во земјите членки на ЕУ.
Осомничените добиле мерка притвор во времетраење од 48 часа, по што ќе бидат изведени пред надлежното обвинителство.
Србија се наоѓа на миграциската рута низ Балканот, низ која луѓето минуваат во движење, бегајќи од војна и сиромаштија, во обид да стигнат до земјите на ЕУ.
Тројца лекари загинаа во сообраќајна несреќа, Таравари изрази сочувство
Тројца доктори загинале утрово во сообраќајна несреќа, а едно лице е тешко повредено. Сообраќајната несреќа се случила при судир на патничко возило и камион на магистралниот пат Прилеп-Битола, на излезот од градот, кај селото Лагово.
„При несреќата патничкото возило се запалило и на местото починале тројцата патници. Смртта ја констатирал лекар од Итната медицинска помош Прилеп, информираат од СВР Битола.
Министерот за здравство Арбен Таравари на својот профил на социјалната мрежа Фејсбук изрази сочуство семејствата на загинатите лекари.
„Прим. Др. радиолог Александар Ристески, спец. гинеколог Др. Никола Василевски и технологот за радиологија Фанче Јованоска ги загубија животите додека одеа да ја извршуваат својата благородна мисија, како што е докторската работа“, се вели во неговата порака.
Повреден бил возачот на камионот, кој со итна помош е пренесен во прилепската болница. Повеќе од час и половина екипите на прилепската противпожарна единица интервенирале за да го изгаснат пожарот.
„Кога дојдовме на местото видовме дека не гори само камион, туку и патничко моторно возило, односно се случила сообраќајна несреќа. За да го изгаснеме пожарот интервениравме со пет возила и 12 пожарникари“, изјави Виктор Стојчески, заменик- момандир на ТППЕ- Прилеп.
Со порака за сочувство се огласи и битолската болница „Плодност“, каде што загинатите лекари биле вработени.
„Изразуваме длабоко сочувство до семејства на нашите колеги, за прераната загуба на нивните членови на семејствата. Секој од нив имаше свое посебно место во нашата болница и во нашите срца“, се вели во нивното соопштение.
Рачна бомба и над 180 куршуми пронајдени во дом на пензинер од скопската населба Козле
Рачна бомба со 100 грама ТНТ екпслозив, 181 куршуми боева муниција со различен калибар наменети за автоматски пушки и тешки митралези, шест тегли со сачми со различна големина. тешки речиси 3 килoграми и четири најлонски ќеси со барут, запленило Основното јавно обвинителство при претрес со полицијата во дом на 66 годишен пензионер во скопската населба Козле.
Обвинителството покренало исстрага против скопскиот пензионер за кривичноте дело „ Неовластено изработување, држење, посредување и тргување со оружје“.
Во соопштението е наведено дека поради опасност од бегство и можност да го повтори делото, јавниот обвинител до судијата на претходна постапка од Основниот кривичен суд Скопје достави предлог за определување мерка куќен притвор за осомничениот.
Според податоците на МВР за 2023 година, во земјава, во областа недозвoлена трговија со оружје се откриени 180 кривични дела. Полицијата при претреси во домовите на 204 осомничени сторители на делото „недозволена трговија со оружје“ запленила 170 парчиња оружје, од кои 16 полуавтоматски пушки, 77 пиштоли, 38 ловни пушки и 4 револвери. Претходната година, МВР зпаленила 139 парчиња оружје.
Мултимедија
Најпосетени
Што треба да знаете