Достапни линкови

Вести

Норвешка, Шпанија и Ирска ќе ја признаат Палестина како држава на 28 мај

илустрација
илустрација

Шпанија, Ирска и Норвешка објавија дека ќе ја признаат Палестина како држава на 28 мај.

Норвешка ќе го признае постоењето на палестинска држава на 28 мај, објави во денеска (22 мај) норвешкиот премиер Јонас Гар Сторе и покрај предупредувањата од израелската влада.

„Ние веруваме дека решението со две држави е во најдобар интерес на Израел“, рече норвешкиот премиер на специјално свикана прес-конференција.

Тој додаде дека целта е „да се постигне палестинска држава која е политички кохезивна и која произлегува од палестинската самоуправа“.

И премиерот на Шпанија Педро Санчез на денешната седница на Конгресот најави дека Шпанија ќе ги следи чекорите на Норвешка и Ирска и ќе ја признае државата Палестина.

„Неопходно е да се одржи идејата за две држави. Нетанјаху останува глув и го казнува населението со глад и ужас. Нетанјаху нема мировен проект за Палестина“, рече Санчез.

Исто така денеска, ирскиот премиер Сајмон Харис ја даде својата изјава, велејќи дека тоа е потег координиран со Шпанија и Норвешка, „историски и важен ден за Ирска и Палестина“.

Неколку земји од Европската Унија во последните недели посочија дека планираат да ја признаат палестинската државност, тврдејќи дека решението со две држави е клучно за траен мир во регионот.

Норвешка, која не е членка на Европската Унија, но ги отсликува нејзините потези, беше жесток поддржувач на решението за две држави меѓу Израел и Палестина.

„Теророт беше извршен од Хамас и милитантни групи кои не се поддржувачи на решението за две држави и државата Израел“, изјави шефот на норвешката влада. Хамас е прогласена за терористичка организација од САД и ЕУ.

Тој исто така рече дека Палестинците имаат основно право на сопствена држава.

„Не може да има решение за две држави без палестинска држава. Со други зборови, потребна е палестинска држава за мир на Блискиот исток“, рече премиерот.

Брзиот развој на настаните наиде на осуда од Израел.

Израелскиот министер за надворешни работи, Израел Кац, им нареди на израелските амбасадори од Ирска и Норвешка веднаш да се вратат во Израел, бидејќи Норвешка соопшти дека ќе ја признае палестинската држава и се очекува Ирска да го стори истото.

„Ирска и Норвешка имаат намера денеска да испратат порака до Палестинците и до светот: тероризмот се исплаќа“, рече Кац.

Тој рече дека признавањето може да ги попречи напорите за враќање на израелските заложници држени во Газа и да направи прекин на огнот помалку веројатен со „наградување на џихадистите од Хамас и Иран“. Тој, исто така, се закани дека ќе го отповика амбасадорот на Израел во Шпанија доколку таа земја заземе сличен став.

Претходно овој месец, шпанскиот министер за надворешни работи Хозе Албарес рече дека го информирал американскиот државен секретар Ентони Блинкен за намерата на неговата влада да ја признае Палестина.

Палестинскиот претседател Махмуд Абас го поздрави признавањето на палестинската држава од страна на Норвешка и ги повика другите земји да го следат примерот.

Во изјавата пренесена од официјалната новинска агенција Вафа, тој рече дека одлуката на Норвешка, објавена во средата, ќе го зајакне „правото на палестинскиот народ на самоопределување“ и ќе ги поддржи напорите за постигнување решение за две држави со Израел.

види ги сите денешни вести

Хил: Признавањето на Косово не е услов за влез на Србија во ЕУ, туку нормализација

Архивска фотографија, американскиот амбасадор во Србија Кристофер Хил
Архивска фотографија, американскиот амбасадор во Србија Кристофер Хил

Американскиот амбасадор во Белград, Кристофер Хил, изрази уверување дека формалното признавање на Косово нема да биде услов за влез на Србија во Европската унија (ЕУ), туку нормализација на односите со Приштина.

Во интервју за неделникот НИН од 13 јуни, Хил рече дека Европејците го прашуваат Белград „токму тоа што велат дека го бараат, а тоа е нормализација“ и додаде дека ЕУ сака мир и безбедност во регионот и секако меѓу Косово и Србија.

„Мислам дека тие многу јасно кажаа дека има членки на ЕУ кои не го признаваат Косово, така што вистинското прашање е да се обидеме да дојдеме до нормализација каде што тие граници нема да бидат граници што ги делат, туку граници што обединуваат, граници што навистина ги обединуваат“, изјави Хил.

Хил рече дека САД ги поддржуваат аспирациите на Србија да стане членка на ЕУ и се обидуваат да и помогнат „во тој потфат, бидејќи е сосема јасно дека Србија во иднина ќе биде дел од Европската унија“.

Тој додаде дека САД „многу јасно ставиле до знаење“ дека би сакале Србија да се приклучи на санкциите против Русија, но додаде дека Србија „исто така презела некои важни чекори за да и стави јасно до знаење на Русија дека не се согласува со агресијата што земја извршена против својот сосед“.

„Имаме многу добар дијалог со Србија. И, да, Србија презеде некои многу конкретни мерки за да и даде до знаење на Русија дека она што го направи во Украина не може да се одржи. И порано или подоцна Русија ќе мора да постигне мировен договор и да се повлече од Украина, па мислам дека добро се разбираме со Србија“, изјави Хил.

САД се „многу разочарани“ што во Владата на Србија повторно има две лица кои се под американски санкции - вицепремиерот Александар Вулин и министерот без ресор Ненад Поповиќ, посочи Хил во интервјуто.

УНХЦР:Присилното раселување се искачи на највисоко ниво во светот

Илустрација, Бегалци од Демократската Република Конго
Илустрација, Бегалци од Демократската Република Конго

Присилното раселување се искачи на највисоко ново ниво во светот минатата и оваа година, покажува извештајот на Агенцијата на ОН за бегалци, УНХЦР. Вкупната бројка на раселени граѓани достигна 120 милиони до крајот на мај годинава.

Тоа е 12-то последователно годишно зголемување на раселувањето. Причината за високите бројки се новите конфликти како и неуспехот да се изнајде решение за кризите, се вели во извештајот.

Бројката на светската раселена популација е еднаква на дванаесеттата најголема држава во светот, околу големината на Јапонија.

Она што драстично ја зголеми бројката на раселеното население е конфликт во Судан, од каде до крајот на минатата година вкупно 10,8 милиони Суданци беа раселени.

Во Демократската Република Конго и Мјанмар, милиони луѓе беа внатрешно раселени минатата година заради брутални борби.

Според проценките во извештајот до крајот на минатата година, до 1,7 милиони лица (75 отсто од популацијата) беше раселена во Појасот Газа како резултат на израелската офанзива, од кои најголемиот број беа палестински бегалци.

Сирија останува најголемата криза на раселување во светот, со 13,8 милиони присилно раселени лица внатре и надор од државата.

„Зад овие страшни и растечки бројки се кријат безброј човечки трагедии. Тоа страдање мора да ја поттикне меѓународната заедница да делува итно за да ги отстрани причините на присилното раселување“, изјави Високиот комесар на ОН за бегалци,Филипо Гранди.

Најголемото зголемување во бројките на раселување доаѓа од луѓето кои бегаат од конфликт, а остануваат во сопствената држава, број кој се искачи на 68,3 милиони лица, се вели во извештајот на Центарот за мониторинг на внатрешното раселување.

Бројот на бегалци и други на кои им е потребна меѓународна заштита се искачи на 43,4 милиони, вклучувајќи ги лицата под мандатите на УНХЦР и УНРВА.

Најголемиот дел од бегалците се згрижени во држави од нивното соседство, а 75 отсто од нив живеат во држави со низок и среден приход кои заедно произведуваат помалку од 20 отсто од светскиот приход.

Извештајот покажа дека низ светот повеќе од 5 милиони внатрешно раселени лица и 1 милион бегалци се вратиле дома во 2023г. Овие бројки покажуваат некој напредок кон подолготрајни решенија,се вели во соопштението на УНХЦР.

„На бегалците – и на заедниците кои се нивни домаќини – потребни им се солидарност и подадена рака. Тие можат и придонесуваат кон општествата каде што се вклучени,“ додаде Гранди.

Израелската војска навлезе длабоко во Рафа

Илустрација, израелски војници во Појасот Газа, 4 јуни 2024
Илустрација, израелски војници во Појасот Газа, 4 јуни 2024

Израелските тенкови напредуваа подлабоко во западната област Рафа, среде една од најлошите ноќи на бомбардирање од воздух, земја и море, принудувајќи многу семејства да ги напуштат своите домови и шатори под темнина, изјавија жителите во четвртокот на 13 јуни за новинската агенција Ројтерс.

Жителите на Рафа тврдат дека израелските сили извршуваат напади врз областа Ал-Маваси во Рафа во близина на плажата, која е означена како хуманитарна област во сите мапи објавени досега од израелската армија откако ја започна офанзивата Рафа во мај годинава.

Израелската војска во соопштение негираше дека извршила какви било напади врз хуманитарната зона Ал-Маваси.

Во нивното соопштенеие е наведено дека израелскиот напад имал за цел да ги избрише последните недопрени борбени единици на Хамас во Рафа, град во кој се засололнија над еден милион луѓе пред да започне израелската офанзива.

Во соопштението на израелската војска се вели дека продолжуваат со „разузнавачки, насочени операции“ на Рафа, велејќи дека силите во изминатиот ден пронашле оружје и убиле палестински вооружени лица во борби од близок дострел.

Израел ја отфрли можноста за мир додека Хамас не биде искорен, а голем дел од Газа е во урнатини. Но, Хамас се покажа отпорен, а милитантите повторно се појавија за да се борат во областите каде што израелските сили претходно изјавија дека ги поразиле и се повлекле, јавува Ројтерс.

Уште три дена училиште по скратена настава

Основно училиште Кочо Рацин - Скопје
Основно училиште Кочо Рацин - Скопје

Учениците во основните училишта денеска и утре имаат скратени часови, бидејќи наставата се одржува во услови на топлотен бран невообичаен за овој дел од годината.

До крајот на учебната година им останаа уште три работни дена.

Скратената настава е одговор на барањето на родителите кои реагираа дека во училиштата нема услови за работа и повикаа годинава порано да се заврши со наставата.

Од Министерството за образование и наука претходно информираа дека не може да се стави крај на учебната година бидејќи со закон е пропишано таа да трае 180 дена и повикаа граѓаните да се придржуваат до препораките за заштита од топлото време кои се согласни со оние на Центрите за јавно здравје.

Оваа учебна година основците и средношколците за прв пат имаа пролетен распуст кој траеше од 26-ти април до 6-ти мај.

Поради тоа и крајот на учебната година се пролонгира до 17-ти јуни.

САД се свесни дека Русија дава украински деца на посвојување

Американскиот советник за национална безбедност Џејк Саливан рече дека САД се свесни за „новите и веродостојни извештаи“ дека Русија ги ставила имињата на киднапираните украински деца на веб-страниците за посвојување.

Во изјавата од 12 јуни, Саливан го опиша развојот на ситуацијата како „одвратен и застрашувачки“.

Тој призна дека од почетокот на целосната инвазија на Украина, руските власти депортирале стотици илјади украински цивили во Русија, „вклучувајќи ги и децата кои биле насилно одвоени од нивните семејства“.

Тој нагласи дека овие деца им припаѓаат на нивните семејства, додавајќи дека Русија „војува не само против украинската армија, туку и против украинскиот народ“ и „врши воени злосторства и злосторства против човештвото во Украина“.

Според официјалните украински податоци, повеќе од 19.500 деца биле незаконски однесени и испратени во Русија откако Москва ја започна својата инвазија пред речиси две години. Зеленска предупреди дека Русија го забрзува процесот на посвојување и дека има двојно влијание врз нивните животи бидејќи тие се уште се таму.

Првата дама на Украина, Олена Зеленска, во февруари ги повика граѓаните на Киев брзо да започнат заеднички напори за да ја принудат Москва да ги врати украинските деца одведени во Русија од СССР, велејќи дека тоа не треба да се прави.

Во интервју за Радио Слободна Европа, Зеленска рече дека Украина работи со западните земји врз механизмот за развој и правилна имплементација и ја притискаат Москва да ги ослободи нивните куќи.

Почнува самитот на Г7 - согласност за планот за финансирање на Украина поддржан од замрзнати руски средства

G 7 самит
G 7 самит

Самитот на Г 7 започнува денеска во Италија со претходно постигнат договор за предлогот на САД за поддршка на заемот од 50 милијарди долари за Украина со користење на замрзнати руски средства. Целта, како шо јавува Асошиетед прес е да се покаже силна подршка за Киев кога европската политичка сцена по изборите за ЕУ парламентот се префрла надесно.

Џејмс О'Брајан: САД имаат за цел да „изградат мост“ за Украина во НАТО
please wait

No media source currently available

0:00 0:01:54 0:00

Дипломатите потврдија дека е постигнат договор пред лидерите да слетаат во јужна Италија на тридневниот самит. Украинскиот претседател Володимир Зеленски ќе биде присутен и се очекува да потпише посебен билатерален безбедносен договор со американскиот претседател Џо Бајден.

САД и Франција бараат Северна Македонија да се придржува до своите меѓународни обврски

Илустрација
Илустрација

Соединетите Американски Држави и Франција бараат новата Влада во Северна Македонија да ги почитува меѓународните обврски и договори.

На брифинг Белата куќа денеска објави патоказ кој го утврдиле претседателите на двете држави, Џо Бајден и Емануел Макрон на средбата во Франција.

Во делот за меѓународните теми на Вашингтон и Париз, дел има и за Западниот Балкан во кој се поздравува континуирана блиска соработка за интеграција на регионот каде поконкретно Северна Македонија се споменува во една реченица.

„Тие ја повикуваат новата влада во Северна Македонија да остане фокусирана на патот кон ЕУ и да се придржува до своите меѓународни обврски“, брифираат од Белата куќа за француско американскиот патоказ.

Ова доаѓа откако Северна Македонија беше критикувана од своите соседи, но и набљудувана од меѓународната заедница бидејќи Претседателката Гордана Сиљановска Дафкова, при својата заклетва во Собранието на РСМ не го изговори уставното име Северна Македонија.

Таа и во својата програма се обврза дека нема да ја користи придавката „северна“, која во името ја доби Македонија токму со Преспанскиот договор потпишан со Грција.

Во изјава која денеска ја даде денеска мандатарот, Христијан Мицкоски, уште еднаш порача дека договорот се почитува во Северна Македонија, но дека тоа мора да го стори и другата страна.

„Треба и двете страни да го почитуваат. Ако конкретно мислите на Преспанскиот договор, ние како идна влада го почитуваме во датели. Се што е дел од нашето законодавство, Устав, се почитува во детали, точка, запирка. И тука не треба да има никаква дилема, затоа што вие не можете да барате од граѓаните да ги почитуваат законите и Уставот, а вие да ги прекршувате. Но истовремено очекувам и вториот потписник, нашиот јужен сосед, да ги почитува“, изјави мандатарот, Христијан Мицкоски.

Меѓу другото рече дека подготвил документ кој покажува како секоја од страните го имплементирала Преспанскиот договор.

Досегашниот министерот за надворешни работи, Бујар Османи има спротивен став и вели дека секое користење на друго име а не Република Северна Македонија, е спротивно на Уставот.

„Еве бесплатен совет до владата. Може да сте биле против, може да сте против, но тоа е реалност, тоа е дел од нашиот уставен поредок, дел од Уставот и мора да се почитува“, изјави Бујар Османи, досегашен шеф на дипломатијата.

Инаку по победата на Европската народна партија на европските избори Мицкоски очекува идниот состав на Европската комисја интензивно да работи на проширувањето а спроведените реформи да бидат единствен критериум на патот кон неа.

Лебот поскапе, пекарите очекуваат стабилизација на цената

Илустрација
Илустрација

Одредени компании го поскапеа лебот за 10 отсто, велат мелничарите. Тоа, според нив, е поради зголемените цени на пченицата на светските берзи и регионалните пазари во мај за исто толку проценти.

Како што вели за МИА претседателот на Групацијата на мелничко-пекарската индустрија при Стопанската комора Горан Малишиќ, во наредниот период, со почетокот на жетвата, се очекува цената да се стабилизира и да се намали, односно да се врати на истото ниво како што беше досега.

„Одредени компании го поскапеа лебот за 10 отсто зашто цените на брашното се зголемија за десетина проценти. Останатие пекарски производи остануваат на истото ниво. Очекуваме цената на лебот да се стабилизира со почетокот на жетвата, изјави Малишиќ.

Минатиот месец некои од пекарите тврдеа дека лебот нема да поскапи следните два месеца, како и дека неговата цена е стабилна. Но според мелничарите има промени во цените на житото на светските берзи. Засега, велат дека најмалку 1,5 до два месеца, цената на лебот и на останатите основни прехрабени производи во земјава нема да се промени.

„По месец-два повторно ќе се прави анализа со оглед на руско-украинскиот конфликт и турбуленциите на Блискиот Исток, како и поради поскапувањето на нафтата кое може да значи потенцијална повисока цена на суровините во прехранбената и општо, во целата индустрија. Стигнаа информации од големите производители како Украина и Русија дека таму не се знае како ќе се одвиваат жетвите поради воените дејства, што влијае врз берзата“, рече тогаш рече тогаш Горан Ѓорѓиевски од Агро-бизнис комората на Сојузот на стопански комори

Претходно од агробизнис коморта, тврдеа дека во наредниот период ќе има стабилност на цената на прехранбените производи, барем во сегментот на основни производи како житото и пекарските производи.

Сега напоменуваат дека се уште не се знае каков ќе биде квалитетот и квантитетот на пченицата, а тоа ќе се дознае со почетокот на жетвата.

Очекуваат владата да остане на ланските мерки за субвенционирање на земјоделците во однос на пченицата и јачменот - три денари за килограм предадена пченица и 100 евра по хектар за принос од најмалку три тона јачмен.

Азербејџан тврди дека сите руски војници го напуштиле Нагорно Карабах

Ерменија - Автомобилите на руските мировници го напуштаат Нагорно Карабах, 22 април 2024 година
Ерменија - Автомобилите на руските мировници го напуштаат Нагорно Карабах, 22 април 2024 година

Министерството за одбрана на Азербејџан на 12 јуни соопшти дека процесот на повлекување на руските трупи од Нагорно Карабах е целосно завршен.

Повлекувањето започна во средината на април. Ерменија ги критикуваше руските мировници распоредени во Нагорно-Карабах, некогаш претежно населен со етнички Ерменци, за неуспехот да ја спречат молскавична офанзива на Азербејџан во септември 2023 година, која заврши со враќање на контролата на Баку врз регионот кој три децении беше под контрола на етничките Ерменци.

Москва допрва треба да ја потврди изјавата на Министерството за одбрана на Азербејџан.

Претходно претседателот Владимир Путин се согласи да ги повлече руските сили и граничарите од различни делови на Ерменија на барање на Ереван.

Заминаа речиси 2000 руски мировници од регионот Нагорно-Карабах и околината, кои Азербејџан насилно ги врати во септември минатата година. Нивното излегување стави крај на долгогодишното распоредување што и даде на Москва воено упориште во стратешкиот регион на Јужен Кавказ.

Ерменија и Азербејџан со децении се расправаат за сепаратистичкиот регион Нагорно-Карабах, кој е дел од Азербејџан. Откако силите на Баку го вратија овој планински регион кој со години беше под контрола на етничките Ерменци, повеќето жители побегнаа во Ерменија.

Официјален Ереван го обвинува Азербејџан за етничко чистење, како и величење на антиерменскиот расизам, дозволување на антиерменски говор на омраза и уништување ерменски културни објекти. Баку ги негира овие обвинувања.

Ким: Северна Кореја и Русија се непобедливи сојузници, можна е посета на Путин

Ким Џонг Ун, Сверна Кореја и Владимир Путин, Русија
Ким Џонг Ун, Сверна Кореја и Владимир Путин, Русија

Севернокорејскиот лидер Ким Џонг Ун во средата ги поздрави врските на неговата земја со Русија, велејќи дека двете земји се „непобедливи сојузници“, пред можната посета на претседателот Владимир Путин на Пјонгјанг.

Минатата година, во ретко патување во странство, Ким се сретна со Путин на рускиот Далечен Исток.

Сеул и Вашингтон подоцна тврдеа дека Пјонгјанг и доставувал оружје на Москва за употреба во Украина, што ги прекршува санкциите на ОН, во замена за техничка помош за сателитската програма.
Се очекува Путин во наредните денови да оствари возвратна посета на Северна Кореја, откако во мај Кремљ соопшти дека патувањето „се подготвува“.

Јужнокорејската новинска агенција Јонхап објави дека посетата би можела да се случи „уште следната недела“, како дел од турнејата на Путин, за време на која тој би можел да го посети и Виетнам.

Врските меѓу Северна Кореја и Русија „се развија во нераскинлива врска на другари“, напиша Ким во пораката до Путин објавена од севернокорејската новинска агенција КЦНА во средата.

Јонхап соопшти дека сателитски снимки покажале можни знаци за поставена „голема структура“ на плоштадот Ким Ил Сунг во Пјонгјанг.

Ваквата активност претходно беше забележана кога Северна Кореја се подготвуваше за големи настани во главниот град, како што се воени паради или посети на високи странски државници, според Јонхап.

Кога го посети Путин минатата година, Ким рече дека врските на Северот со Москва се „приоритет број еден“.

Аналитичарите предупредија дека зголеменото тестирање и производство на артилерија и крстаречки ракети од страна на Северна Кореја би можело да биде подготовка за испорака во Русија за употреба во Украина.

На Северна Кореја ѝ е забрането со санкциите на Обединетите нации да тестира со балистичка технологија, но Москва го искористи ветото на Советот за безбедност на ОН во март за ефикасно да го прекине мониторингот на ОН, за што Пјонгјанг конкретно и се заблагодари на Русија.
Северна Кореја ги отфрли обвинувањата дека и испорачува оружје на Русија, нарекувајќи го тврдењето „апсурдно“.

Во извештајот на Пентагон минатиот месец се вели дека Русија користи севернокорејски балистички ракети во Украина, цитирајќи анализа на остатоци од проектили пронајдени во Украина.

Експертите велат дека за време на посетата на Путин на Пјонгјанг, Северна Кореја најверојатно ќе понуди пратки со повеќе воен материјал за војната во Украина, во замена за увоз на храна и енергија од Русија.

Вчитај повеќе

XS
SM
MD
LG