Достапни линкови

Вести

Постапката за екстрадиција на Палевски може да трае со месеци

Љупчо Палевски, осомничен за убиството на Вања Ѓорчевска (14) од Скопје и на Панче Жежовски (74) од Велес
Љупчо Палевски, осомничен за убиството на Вања Ѓорчевска (14) од Скопје и на Панче Жежовски (74) од Велес

Неколку месеци може да трае постапката за екстрадиција на Љупчо Палевски од Турција, првоосомничен за убиствата на 14-годишната Вања Ѓорчевска од Скопје и 74-годишниот Панче Жежовски од Велес, кој е во 40-дневен екстрадициски притвор во Турција, информираа од Министерството за правда на брифингот со новинарите денеска(13.12).

Оттаму велат дека македонската страна во експресно краток рок завршила со подготовката за испараќање на барањето за екстрадиција и сега се зависи од турските власти.

„Од дента кога се апсеше бевме во координација со СМПС-Интерпол, како и со Основното јавно обвинителство - Скопје. Во 9:20 часот го добивме официјалното известување од МВР и отворивме предмет. Барањето за екстрадиција беше подготвено, министерот го потпиша и истиот ден беше преведено. Пред тоа да го направиме, побаравме веднаш да биде задржан во притвор за екстрадиција“, велат од Секторот за меѓународна правна помош во Министерството за правда.

Министерството за правда на Турција вчера потврдило дека го добило барањето за екстрадиција.

Од македонското Министерство за правда напоменуваат дека во Турција имаат и до 100 барања за екстрадиција дневно, заради големината на државата со популација од 80 милиони жители, која се граничи со држави како Сирија и Ирак. Не исклучуваат и дека Палевски ќе ги искористи сите средства што му се на располагање за да не биде испорачан и дека ќе се жали на притворот, дури и на „секоја точка и запирка“ на секоја одлука додека трае процедурата.

Министерството за правда апелира да не се политизира случајот, затоа што тоа може да му наштети на процесот. Апелираат политичките партии, политичарите и функционерите да се воздржат од коментирање и собирање на политички поени додека трае овој процес.

И претседателот на Северна Македонија, Стево Пендаровски, вчера испратил пораката до кабинетот на својот турски колега Реџеп Таип Ердоган во врска со екстрадицијата на Љупчо Палевски. Во врска со содржината на пораката, од кабинетот на Пендаровски не соопштуваат повеќе детали.

Вања Ѓорчевска беше киднапирана и убиена заради изнуда на пари, како што кажаа министерот Оливер Спасовски и јавниот обвинител Гаврил Бубевски на прес-конференција на 4 декември. Нејзиното тело беше пронајдено по седумдневна потрага, ден претходно, на 3 декември, во близина на скопското село Бразда.

Истиот ден (3 декември) беше пронајдено и безживотното тело на пензионерот Панче Жежовски од Велес. Според Спасовски, неговото убиство не е поврзано со убиството на Вања, туку неговото возило, кое подоцна беше запалено, било користено за грабнување на Вања.

Во случајот со двете убиства, првоосомничен е Љупчо Палевски кој првично беше во бегство. Во моментов тој се наоѓа во екстрадициски притвор и во тек е постапката за негова екстрадиција во земјава. Барањето за екстрадиција доаѓа по апсењето на Палевски на 5 декември во градот Баликесир во Турција, откако ден претходно беше распишана меѓународна потерница.


Палевски е осомничен за две кривични дела „грабнување“ и за две убиства на свиреп начин. Како соизвршители за истите дела се гонат уште три лица кои беа приведени на 3 декември. Петтиот осомничен е таткото на Вања од кого, според првичните сознанија од исказите на останатите осомничени, Палевски добил информации кога девојчето ќе биде само.

Вања беше пријавена за исчезната на 27 ноември. Нејзиното тело беше пронајдено 3 декември во близина на Скопје. Во близина на Велес, пак, истиот ден беше пронајдено телото на Жежовски кој исчезна на 22 ноември.

види ги сите денешни вести

Пакистанската полиција трага по киднапери на патници од автобус

Пакистан, погреб на патниците кои биле убиени од киднаперите
Пакистан, погреб на патниците кои биле убиени од киднаперите

Пакистанската полиција трага по вооружени напаѓачи кои убиле осум лица откако ги киднапирале од автобус на автопат во југозападниот дел на земјата.

Заменик-полицискиот комесар Хабибула Мосахаил изјави дека киднапирањето се случило на 12 април во провинцијата Балучистан. Тоа е област во која долго време трае бунт на сепаратистите кои се борат за независност. Според полицијата, потрагата по сторителите е во тек.

Тој додаде дека вооружените напаѓачи поставиле блокада, а потоа го запреле автобусот, им ги прегледале личните карти на патниците.

„Тие зедоа со себе осум лица, сите од источната провинција Пенџаб, бегајќи во планините“, рече тој.

Полицијата подоцна пронашла осум тела под мост на околу 5 километри (3 милји) од автопатот. Претходно во петокот, истите вооружени напаѓачи отворија оган кон возило кое не застана за нивната блокада, убивајќи двајца, а ранети шест.

Само еден пилот за три авиони за гасење пожар

North Macedonia - Air tractor fighting a fire, August 2023
North Macedonia - Air tractor fighting a fire, August 2023

Од вкупно тројца питалоти со кои располагала Дирекцијата за заштита и спасување (ДСЗ) за управување со авионите за гасење пожар, оваа година остана само еден. Причината за тоа е што двајца пилоти во јануари ги исполниле условите за пензија, па на ранота останал само еден пилот. Ова лето, справувањето со шумските пожари ќе биде сериозен предизвик, изјави директорот на ДЗС, Беким Максути за новинската агенција МИА.

Тој додаде дека во последните години Дирекцијата се соочува со критичен недостиг на квалификувани пилоти, ситуација која сериозно го загрозува функционирањето на институцијата и способноста да реагира во време на кризи.

„ Правиме напори, да видиме како може нив да ги задржиме, барем уште оваа година, сѐ со цел во меѓувреме да примиме нови пилоти, односно да распишеме нови огласи за пилоти, за кои веќе имаме согласност и чекаме да се завршат некои процедури за да може да го објавиме огласот“, вели Максути.

Доколку Владата не го сфати сериозно овој проблем, директорот вели дека се доведува до прашање и постоењето на авио-одделението во Дирекцијата за заштита и спасување. Максути посочува дека ако набрзо не вработат пилоти, може да им биде одземена лиценцата со што авионите ќе останат принудно приземјени.

Бајден со предупредување до Иран

архивска фотографија, американскиот претседател Џо Бајден
архивска фотографија, американскиот претседател Џо Бајден

Американскиот претседател Џо Бајден на 12 април изјави дека очекува Иран да го нападне Израел „порано, наместо подоцна“ и го предупреди Техеран да не го прави тоа.

Бајден на новинарско прашање за тоа која порака ќе ја испати до Иран, кусо само одговори „Немој“.

„Ние сме посветени на одбраната на Израел. Ќе го поддржиме Израел. Ќе помогнеме во одбраната на Израел и Иран нема да успее“, изјави Бајден.

Израел на 12 април се подготвуваше за напад од Иран или неговите полномошници, бидејќи се зголемија предупредувањата за одмазда за нападот врз комплексот на амбасадата на Иран минатата недела во Дамаск.

Израел не ја презеде одговорноста за воздушниот напад на 1 април. Но, врховниот водач на Иран, ајатолахот Али Хамнеи, рече дека Израел „мора да биде казнет и ќе биде казнет“ за операцијата за која рече дека е еквивалентна на напад на иранска територија. по минатонеделниот напад врз Конзулатот на Иран во Сирија, при што загинаа најмалку 13 лица, меѓу кои седуммина високи членови на Иранската револуционерна гарда, не престануваат обвинувањата и заканите од Техеран кон Израел.

Бајден на денешната средба со новинари во Белата Куќа изјави дека нема да открива повеќе безбедносни информации, но истакна дека дека неговите очекувања се дека нападот од Иран може да дојде „порано, отколку подоцна“. Тој зборуваше со новинарите во Белата куќа по виртуелниот говор на конференцијата за граѓански права.

Летни температури до среда, потоа ќе залади

Илустрација, прошетка низ парк
Илустрација, прошетка низ парк

Денеска не очекува сончево и топло време со мала до умерена облачност. Ќе дува слаб до умерен ветер, а во некои делови долж Повардарието и во источните делови повремено засилен ветер од северен правец, велат од Управата за хидрометеоролошки работи.

Минималната температура ќе биде во интервал од 3 до 13, а максималната ќе достигне од 24 до 30 степени.

Во Скопје ќе биде сончево и топло со мала облачност. Ќе дува слаб до умерен ветер од северен правец. Минималната температура ќе се спушти до 11, а максималната ќе достигне 29 степени. Слично време не очекува и во текот на утрешниот ден и в понеделник.

Но, од УХМР предупредуваат дека во вторник во текот на ноќта, а особено во среда под влијание на влажна и нестабилна воздушна маса ќе има врнежи од дожд кои локално ќе бидат обилни во форма на невреме проследени со грмежи и силен ветер. Температурите од среда ќе бидат во опаѓање.

Германија ги олабавува правилата за промена на полот

Германскиот канцелар Олаф Шолц
Германскиот канцелар Олаф Шолц

Германскиот парламент усвои закон со кој ја олеснува законската промена на полот.

Исто така, воведува тешки казни - во одредени околности - за откривање на нечие претходно регистрирано име или пол без согласност на тоа лице.

Претходно, за промена на регистрираниот пол беше потребно лекарско уверение и одобрение од семејниот суд.

Сега, лицата над над 18 години може да го променат полот во машки, женски или во „различен“, што е опција за трет пол што веќе постои според германскиот закон.

Три месеци по поднесувањето на барањето за ваква промена, апликантите ќе треба лично да се појават во матична служба. Но, можат да побараат и податоците за полот воопшто да не се запишуваат.

„Намерно и злонамерно откривање на нечие претходно име или легален пол може да доведе до казна до 10.000 евра“, пренесе Би-Би-Си.


Сепак, постојат исклучоци - на пример ако тоа е законска обврска поради судска постапка или полициска истрага.

Имињата ќе треба да го претставуваат новиот правен род - така што машкиот запис бара признаено машко име, додека женскиот запис бара признаено женско име.

За деца на возраст меѓу 14 и 18 години потребна е согласност од нивните родители или законски старатели, додека на оние под 14 години е потребно нивните родители или законски старатели да дадат изјава.

Не може да се направат дополнителни промени или откажувања во рок од 12 месеци од одобрувањето на барањето.

Новите правила ќе стапат на сила од 1 ноември.

Германскиот канцелар Олаф Шолц рече: „Покажуваме почит кон транс, интерсексуалните и небинарните луѓе - без да одземаме ништо од другите. На овој начин, продолжуваме да ја водиме модернизацијата на нашата земја. Ова вклучува препознавање на реалноста на животот и овозможување помош преку законска регулатива“.

Конзервативците и екстремната десница АфД беа меѓу оние кои се изјаснија против, предупредувајќи дека законот може да биде злоупотребен. Беше изразена загриженост и за влијанието врз младите.

Законот за самоопределување беше усвоен со 374 гласа „за“, 251 „против“ и 11 воздржани.

ДИК го утврди редоследот на кандидатските листи за изборите

Гласачо ливче (архивска фотографија)
Гласачо ливче (архивска фотографија)

Државната изборна комисија (ДИК) на седница на 12 април го утврди редоследот на кандидатските листи за изборите.

Број 1 е Коалицијата за европска иднина предводена од СДСМ, број 2 - Коалицијата „Твоја Македонија“ предводена од ВМРО- ДПМНЕ, број 3 - Коалицијата „Храбро за Македонија“ предводена од ГРОМ, број 4 - Коалицијата Европски форнт, број 5 - Левица, број 6 - Коалицијата „Вреди“, број 7 - Движењето ЗНАМ - За наша Македонија, број 8 - Единствена Македонија.

Понатаму, број 9 е Нова алтернатива, број 10 - Аваја, број 11 - Европско граѓанско движење, број 12 - Македонска ера трета/Македонски независни листи, број 13 - Твоја партија, број 14 - Родина Македонија, број 15 - Десна, број 16 - Демократи и број 17 - Работничка партија.

По жрепката, како што соопшти претседателот на ДИК, Александар Даштевски, ќе се изготви записник и согласно член 69 став 2, утврдената листа ќе биде објавена во дневниот печат, најдоцна 23 дена пред денот определен за одржување на изборите.

Едногласно беа прифатени листите за пратеници на Демократи - Скопје за ИЕ 6, на Единствена Македонија за ИЕ 1, 2, 3, 4 и 5, на Нова алтернатива и Десна за ИЕ 1, 2 3 и 4, на Работничка партија за ИЕ 1 и 5, како и на Родина Македонија за ИЕ 3.

Поради некомплетна документација едногласно беа отфрлени листите на кандидати за пратеници во ИЕ 2, 3, 4 и 6 на Работничка партија, листата на Едниствена Македонија за ИЕ 6 и листите на кандидати на Десна за ИЕ 5 и 6.

За листата на Работничка партија за ИЕ 6, членот на ДИК, Борис Кондарко, информира дека се воочени специфични неправилности за кои се известени надлежните институции.

За парламентарни избори, Северна Македонија е поделена на шест изборни единици и од секоја од нив во Собранието влегуваат по 20 пратеници, при што според таканаречениот Донтов модел се пресметува која партија колку пратенички места ќе добие.

Парламентарните избори во Северна Македонија ќе се одржат на 8 мај. Тогаш ќе се гласа и во втор круг претседателски избори. Првиот круг претседателски избори ќе се одржи на 24 април.

МНР:Граѓаните да избегнуваат патувања во Израел, Иран, Либан и Палестинските територии

Министерство за надворешни работи на Република Северна Македонија
Министерство за надворешни работи на Република Северна Македонија

Министерството за надворешни работи (МНР) апелира до државјаните на Република Северна Македонија да избегнуваат патувања кои не се неопходни, во Израел, Иран, Либан и Палестинските територии, сопштија од МНР на 12 април.

Причина се информациите за можно влошување на безбедносните состојби во Израел и во регионот, се вели во соопштението од МНР.

Претходно во петокот, 12 април, Соединетите Држави им забранија на своите вработени во Израел и на членовите на нивните семејства да патуваат надвор од поголемите области на Тел Авив, Ерусалим и Бер Шева, поради потенцијален одмазднички напад на Иран врз Израел по смртта на командантот на Револуционерната гарда во Сирија.

„Поради голема претпазливост, на вработените во американската Влада и на членовите на нивните семејства им е забрането приватно патување надвор од пошироката област Тел Авив, Ерусалим и Бир Шева до натамошно известување“, соопштија од американската Амбасада во Израел.

Американскиот претседател Џо Бајден пред два дена изјави дека Иран се заканува дека ќе изврши „значаен напад врз Израел“ и дека САД остануваат посветени на безбедноста на својот сојузник.

Во нападот на иранскиот конзулат во Дамаск на 1 април загинаа командантот на Револуционерната гарда во Сирија и Либан, Мохамад Реза Захеди и неговиот заменик, како и пет офицери кои ги придружуваа.

Израел тврди дека не стои зад нападот, додека неколку официјални лица од Техеран, исто така, претходно се заканија со одмазда за нападот, вклучувајќи го и иранскиот врховен водач, ајатолахот Али Хамнеи, кој кажа дека „злобниот режим мора да биде казнет и ќе биде казнет“.

Вучиќ побара поддршка од Кина во „борбата за вистината“ пред ОН

Претседателот на Србија, Александар Вучиќ и Ли Минг, амбасадорот на Кина во Србија, Белград, септември 2023 година
Претседателот на Србија, Александар Вучиќ и Ли Минг, амбасадорот на Кина во Србија, Белград, септември 2023 година

Претседателот на Србија, Александар Вучиќ, побара од кинескиот амбасадор во Србија, Ли Минг поддршка од Кина „во борбата за вистината пред Обединетите нации“.

На затворен состанок во Обединетите нации (ОН) на 17 април ќе биде претставена нацрт-резолуцијата со која 11 јули се прогласува за Меѓународен ден на сеќавање на геноцидот во Сребреница, како што претходно објави Гласот на Америка.

Властите во Белград, и покрај меѓународните пресуди, негираат дека во 1995 година во Сребреница бил извршен геноцид врз Бошњаците.

По средбата со кинескиот амбасадор на 12 април, Вучиќ на Инстаграм напиша дека е благодарен за „цврстата и непоколеблива поддршка на Кина за Србија на глобалните форуми“.

„Истакнав дека Србија во овие тешки моменти ги цени принципиелните партнерства и челичното пријателство, што се покажа со акции во најтешките моменти“, додаде тој.

За конечната резолуција, на која се уште се работи, земјите членки на ОН би можеле да се изјаснат на седницата на Генералното собрание на ОН на почетокот на мај.

Во нацрт-резолуцијата, во која Радио Слободна Европа (РСЕ) имаше увид, меѓу другото, се бара без резерва да се осуди секое негирање на геноцидот во Сребреница и да се охрабрат членките на ОН да ги зачуваат утврдените факти и да развијат соодветни програми преку нивните образовни системи, со цел да се спречи геноцидот во иднина.

Иницијатори на резолуцијата се Германија и Руанда, но како што објави Гласот на Америка повикувајќи се на неофицијални извори, во создавањето на текстот учествувале и САД, Албанија, Босна и Херцеговина, Чиле, Финска, Јордан, Нов Зеланд, Турција и други земји.

Пресудите на меѓународните судови и судовите во Босна и Херцеговина утврдија дека е извршен геноцид врз околу 8.000 бошњачки цивили во јули 1995 година, кога војската на Република Српска ја окупираше Сребреница.

Досега повеќе од 50 лица се осудени на повеќе од 700 години затвор за геноцид и злосторства во Сребреница.

Одбележана годишнината од убиството на 105 Бошњаци во Сребреница

Комеморација за Бошњаците убиени во 1993 година, Сребреница, 12 април 2024 година
Комеморација за Бошњаците убиени во 1993 година, Сребреница, 12 април 2024 година

Во петокот, на 12 април, Сребреница ја одбележа 31-годишнината од страдањата на 105 Бошњаци, убиени од гранати истрелани од позициите на војската на Република Српска на спортските терени на Основното училиште во Сребреница.

Настанот се случи за време на фудбалски турнир на 12 април 1993 година, кога 74 лица загинаа веднаш од експлозии на гранати, а повеќе од сто цивили беа ранети. Уште 31 лице починало на пат кон болницата и во болница.

На трибините во близина на спомен плочата беа положени венци, а на оградата на спортското игралиште мајки и членови на семејствата на загинатите положија 105 цвеќиња во спомен на жртвите.


Во јули 1995 година, во Сребреница беше извршен геноцид врз Бошњаците, што се смета за едно од најтешките злосторства извршени во Европа од Втората светска војна.Се проценува дека силите на Армијата на Република Српска убиле повеќе од 8.000 бошњачки мажи и момчиња во и околу градот за само неколку дена. Повеќе од 40.000 луѓе беа протерани.

Досега во Меморијалниот центар Сребреница-Поточари се погребани над 6.650 жртви, а на други локации над 230 жртви. Според податоците на Институтот за исчезнати лица на БиХ, уште се трага по околу 1.200 жртви.

Повеќе од 50 лица беа осудени на вкупно повеќе од 700 години затвор за геноцид и злосторства во Сребреница пред меѓународните, регионалните судови и судовите во БиХ.

Судот во Хаг, исто така, го осуди Ратко Младиќ, водачот на војската на босанските Срби за време на војната 1992-1995 година, на доживотен затвор. година, како и Радован Караџиќ, поранешниот претседател на Република Српска.

Уште 44 случаи на голема кашлица, вкупно 443 заболени

Северна Македонија - Вакцинален пункт „Идадија“ во Скопје, вакцинација против голема кашлица, 12.2.2024 година
Северна Македонија - Вакцинален пункт „Идадија“ во Скопје, вакцинација против голема кашлица, 12.2.2024 година

Нови 44 случаи на голема кашлица се пријавени од 5 до 11 април, најголем дел од нив се во Скопје, соопшти Институтот за јавно здравје (ИЈЗ).

Тоа е намалување на бројот на случаи од 10 отсто во споредба со претходниот седумдневен период.

Според последниот извештајот на ИЈЗ, освен во Скопје, случаи се регистрирани и во Битола, Куманово, Кратово и во Крива Паланка. Возраста на заболените е од еден месец до 75 години. Најмногу случаи се во возрасната група од 10 до 14 години. Од новите 44 случаи, два се хоспитализирани.

Заклучно со 11 април, во Северна Македонија се регистрирани вкупно 443 случаи на голема кашлица. Од нив, 263 лица (59,4 отсто) не биле вакцинирани, не се комплетно вакцинирани согласно возраста или нема доказ за вакцинација.

Од заболените, хоспитализирани се 60 лица и тоа 49 од нив на возраст до четири години.

Доц. д-р Валентина Цвејоска-Чолаковска, директорка на Клиниката за детски болести, денеска на брифинг со новинарите рече дека Се намалува бројот на заболени деца од голема кашлица во земјава, а тоа се должи на зголемувањето на имунитетот со порастот на вакцинацијата.

„На нашата Клиника болнички беа лекувани шест деца, доминантно мали доенчиња. Сите деца беа испишани во добра здравствена состојба. Подолго време немаме хоспитализации на деца со голема кашлица Детска клиника. Изразуваме задоволство што се зголеми вакцинацијата со вакцини кои содржат пертусис, со што се подигна имунитетот кај децата. Исто така погодуваше и тоа што и сезоната на респираторните заболувања е на крај, што резултираше со намалување на бројот на болни“, рече Цвејоска-Чолаковска.


Во периодот од 18 јануари до 11 април се дадени вкупно 39.031 доза вакцина што содржи компонента против голема кашлица.

Големата кашлица е едно од најзаразните заболувања. Кашлањето е често, силно, трае и до 100 дена. Силната бактериска инфеција може да предизвика дополнителни компликации.

Во Северна Македонија, епидемија на голема кашлица е прогласена во Скопје и во Куманово.

Вчитај повеќе

XS
SM
MD
LG