Вести
Протести против насилство во Србија пред стартот на школската година
Протести против насилството се одржаа на 18 август во повеќе градови во Србија, меѓу кои Нови Сад, Ниш, Зрењанин, Чачак, Горњи Милановац и Јагодина.
Фокусот е на почетокот на новата учебна година откако претходната заврши порано поради трагедијата во белградското основно училиште „Владислав Рибникар“ кога во масовно пукање беа убиени десет лица.
Во Нови Сад протест посветен на безбедноста на училиштата. Организаторите укажаа на состојбата во образовниот систем и го поставија прашањето во каква состојба ќе бидат примени учениците и како ќе се постапува со нив.
Учесниците на протестот носеа транспаренти на кои пишуваше: „Училиште без насилство“, „Просветни работници и психолози, а не полицајци“, „Поддршка, не репресија“ и „Сметајте на нас“.
„Не знаеме дали да купиме книги за деца или панцири и шлемови“, им порача воспитувачката Марија Васиќ на собраните пред споменикот на Јован Јовановиќ Змај на истоимената улица во центарот на градот.
Просветните работници во пресрет на почетокот на учебната година излегоа со барања до извршната власт, меѓу кои едно од главните барања е поголем број психолози, педагози и стручни соработници во училиштата.
види ги сите денешни вести
Зеленски: Ситуацијата во североисточниот регион Харкив е „исклучително тешка“
Украинскиот претседател Володимир Зеленски изјави дека воената ситуација во североисточниот регион Харкив е „исклучително тешка“, но сепак „под контрола“.
Изјавата ја даде по состанокот со неговите воени началници во близина на линијата на фронтот.
„Ситуацијата во регионот Харкив е генерално под контрола, а нашите војници му нанесуваат значителни загуби на окупаторот. Сепак, ситуацијата во областа останува исклучително тешка“, напиша тој во објавата на Телеграм, откако ги слушнал извештаите од неговите команданти во Харкив, регионален главен град на 30 километри од руската граница.
Претходно денеска, украинската армија објави дека го запрела руското напредување во некои области на североисточниот регион Харкив, каде Русија започна нова офанзива минатата недела.
„Ситуацијата во регионот Харкив сè уште е комплицирана, но се развива на динамичен начин. Нашите одбранбени сили делумно ја стабилизираа ситуацијата. Напредувањето на непријателот во одредени зони и локалитети е запрено“, рече портпаролот на армијата утрото на 16 мај.
Предупредување за воздушен напад беше прогласено рано во четвртокот и во Киев и во неколку украински региони, при што украинските воздухопловни сили предупредуваа на закана од балистички ракети истрелани од Русија.
На словачкиот премиер Фицо ќе му биде извршена уште една операција
Словачкиот премиер Роберт Фицо врз кого вчера (15 мај) беше извршен атентат во градот Хандлови, го чека уште една операција, пишува словачкиот портал Правда.
Абдоминалното крварење на Фицо е запрено, но тој се соочува со операција на колкот.
Во меѓувреме, полицијата го обвини напаѓачот на премиерот за убиство со предумисла и се соочува со казна од 25 години до доживотен затвор.
Како што пренесува порталот, напаѓачот, за кого медиумите пренесуваат дека е 71-годишниот писател Јурај Цинтула, рекол дека е горд на својот чин.
РТВС објави дека напаѓачот моментално се наоѓа во ќелијата на Националната агенција за криминал во Нитра.
Лекарите во текот на ноќта успеале да ја стабилизираат состојбата на словачкиот премиер по вчерашниот атентат во градот Хандлови, но таа се уште е тешка, соопшти претходно денеска директорката на болницата во Банска Бистрица, Миријам Лапуникова.
Два медицински тима го оперираа словачкиот премиер пет часа.
„Во моментов се преземаат дополнителни активности за подобрување на неговата состојба“, рече словачкиот министер за одбрана Роберт Калињак.
Словачкиот министер за внатрешни работи Матус Шутај Ешток денеска побара од вицепремиерот Томаш Тараба да го свика Советот за национална безбедност, а Владата ќе одржи седница.
Министерот за внатрешни работи информираше дека ќе ја зајакне заштитата на политичарите и одредени медиуми.
Напаѓачот пукал пет пати, по што полицијата веднаш го привела, а премиерот веднаш бил префрлен во болницата во Банска Бистрица.
Самит на лидерите од регионот и ЕУ: „Секој треба да ја заврши својата работа“
Планот за раст на Западен Балкан претставува јасен сигнал за посветеноста на Европската Унија за економска и демократска трансформација на Западен Балкан, изјави црногорскиот премиер Милојко Спајиќ на Самитот на лидерите на Западен Балкан и Европската Унија во Котор.
Советот на ЕУ одобри план од шест милијарди евра за поддршка на земјите од Западен Балкан со цел да се забрзаат реформите и економскиот раст, од кои две милијарди грантови и четири поволни заеми гарантирани од ЕУ.
На самитот чиј домаќин е Спајиќ, покрај лидерите од регионот, учествуваат и европскиот комесар за соседство и проширување, Оливер Вархеји и помошникот државен секретар на САД за Европа и Евроазија, Џејмс О'Брајан.
О'Брајан рече дека приоритет на Планот за раст за Западен Балкан е да се создаде единствен пазар на циркулација на пари, да се намалат трошоците, да се олесни движењето на пазарот и да се отворат повеќе работни места.
„Пораките на Планот се дека за секој учесник пораката е јасна - работете ја вашата работа и не барајте некој друг да направи нешто прво, за вие да го направите вашето“.
Вархеји рече дека Планот за раст повеќе не е нацрт, туку патоказ, кој е корисен за регионот пред влезот во ЕУ.
„Поради планот за раст и интензитетот на помошта од економскиот и инвестицискиот план, реформската агенда и дополнителната финансиска помош до 2027 година, Балканот ќе биде подготвен или би можел да биде подготвен, или би можел сам да се подготви за влез во ЕУ“.
Самитот се организира под слоганот „Еден регион, заедничка визија“.
На самитот присуствуваат претставници на Советот за регионална соработка, Европската банка за обнова и развој, Европската инвестициска банка, Светската банка, Атлантската алијанса, енергетската и транспортната заедница, Фондацијата Отворено општество...
Ден пред Самитот, на 15 мај, се одржа состанок на министрите за европски прашања и финансии на земјите од Западен Балкан, претставници на Европската комисија и партнерските организации.
„Министрите разговараа и за пристапот до единствената платежна зона за евро (SEPA), за олеснување на трговијата и транспортот меѓу земјите од регионот и членките на ЕУ, за подобрување на снабдувањето со критични лекови, Центарот за дигитални иновации и други теми“, соопштија од Министерството за европски прашања од Црна Гора.
Претходните месеци министерски состаноци и регионални самити на лидерите од Западен Балкан се одржаа во Скопје и Тирана.
Западните претставници на протестите против спорниот закон во Грузија
Илјадници луѓе повторно излегоа на улиците на грузискиот главен град Тбилиси за да протестираат против контроверзниот закон за „странски агенти“ усвоен од парламентот и покрај повеќенеделните демонстрации и предупредувањата на Западот дека законот ја загрозува евроатлантската интеграција на Грузија.
На демонстрантите во Тбилиси им се придружија и министрите за надворешни работи на Естонија, Летонија, Литванија и Исланд во маршот кон зградата на парламентот во средата во знак на солидарност со западните аспирации на Грузијците, објави грузискиот сервис на Радио Слободна Европа.
Демонстрантите се собраа и на плоштадот на хероите, главната раскрсница во главниот град на Грузија, јавија дописниците на РСЕ од теренот.
Законот, кој го усвои парламентот под контрола на владејачката партија Грузиски сон на 14 мај, беше осуден од САД, Европската Унија и групите за права поради неговата сличност со рускиот закон што претседателот Владимир Путин го користи за да ја замолчи опозицијата и да ги задуши независните институции.
„Заедно го започнавме ова патување и нашите народи знаат што значи да се биде под притисок од Москва. Никогаш нема да ве оставиме, но сите треба да ја обликуваме судбината на нашите народи“, рече литванскиот министер за надворешни работи Габриелиус Ландсбергис, чија земја, како Грузија и Естонија, беше дел од поранешниот Советски Сојуз.
„Вие како народ го одлучивте вашиот пат кон Европа. Ние сите заедно ќе направиме сè за да продолжиме по овој пат“, изјави естонскиот министер за надворешни работи Маргус Кахна.
„Јас сум овде денес, вие не сте сами и ја имате нашата почит“, рече министерот за надворешни работи на Исланд, Тордис Колбрун Гилфадотир.
На протестниот марш се приклучи и министерка за надворешни работи на Летонија, Баиба Бразе.
Четворицата западни претставници претходно се сретнаа со грузиската претседателка Саломе Зурабишвили и одржаа заедничка прес-конференција.
Зурабишвили на конференцијата предупреди дека опстанокот на Грузија како држава е во опасност откако парламентот го одобри контроверзниот закон за „странски агенти“ и повтори дека ќе стави вето на законот затоа што владата „не го послуша гласот на својот народ ниту советите на нејзините пријатели, ниту ничие предупредување и тргна по својот пат“.
Според законот, медиумските куќи, невладините и другите непрофитни организации ќе мора да се регистрираат дека „работат за интересите на странска сила“ доколку повеќе од 20 проценти од нивното финансирање доаѓа од странство.
Зурабишвили, која е во судир со владејачката партија Грузиски сон која го протурка законот во парламентот, има 10 дена да стави вето, но Грузиски сон и неговите партнери во парламентот имаат доволно пратеници за да го отфрлат ветото на претседателот.
Американскиот помошник државен секретар Џејмс О'Брајан, кој беше во Тбилиси на 14 мај, рече дека односите на Вашингтон со земјата ќе бидат загрозени и дека американската помош за Грузија ќе биде предмет на ревизија доколку нацрт-законот биде усвоен.
Постигнат договор за коалициска влада во Холандија
Речиси шест месеци по изборната победа на неговата партија, холандскиот политичар Герт Вилдерс објави дека е постигнат договор за формирање на десничарска коалициска влада. Тој исто така објави дека нема да биде премиер.
„Имаме договор меѓу преговарачите“, рече Вилдерс, кој уште во март се откажа од намерата да биде премиер, наведувајќи ги наводите дека е „исламофоб и противник на ЕУ“.
Договорот е постигнат меѓу четири партии - Партијата за слобода (ПВВ) на Герт Вилдерс, про-земјоделската партија БББ, либералната партија ВВД и новата партија против корупцијата НСЦ.
Сè уште не е познато кој ќе ја предводи десничарската владејачка коалиција која ќе го замени Марк Руте. Руте е кандидат за функцијата генерален секретар на НАТО.
Крајнодесничарската Партија за слобода, која победи на изборите во Холандија, а чиј лидер е Вилдерс е позната и по тоа што меѓудругото, повикува на забрана на џамиите, Куранот и шамиите, како и референдум за напуштање на Европската Унија.
Косово го информирал Советот на Европа дека подготвува нацрт-статут за формирање на ЗСО
Министерката за надворешни работи и дијаспора на Косово, Доника Гервала, изјави дека преку писмо го информирала Советот на Европа дека Косово подготвува нацрт статут за формирање „механизам за самоуправување, координација и соработка на општините со српско мнозинство на Косово (ЗСО)“.
Овој нацрт ќе биде испратен на толкување до Уставниот суд до крајот на мај.
Владата претходно призна дека формирањето на Заедницата на општини со српско мнозинство е поставено како услов за прием на Косово во Советот на Европа.
Според Гервала, нацрт-статутот ги задоволува потребите на граѓаните на српската заедница и истовремено ги почитува Уставот на Косово и принципите на Советот на Европа.
„Нацртот обезбедува не само целосно почитување на Уставот и законите на Република Косово, туку во исто време спречува неовластени интервенции однадвор, како во општините на Косово, така и низ целата земја“, напиша Гервала на Фејсбук.
Гервала изјави дека заедно со конкретизирање на напорите за формирање Заедница на општини со српско мнозинство, Косово очекува Советот на Европа да го исполни својот дел од обврската и да го покани Косово да се приклучи во Советот на Европа без одлагање, бидејќи Приштина ги исполнила сите услови.
Комитетот на министри на Советот на Европа заседава на 16 и 17 мај во Стразбур. Ова тело го дава последниот збор за прифаќање на една земја во членство.
Заменик министерот за надворешни работи Крешник Ахмети на 14 мај изјави дека прашањето за прием на Косово во оваа организација за човекови права не е на дневен ред на Комитетот на министри.
Џералд Кнаус, од Европската иницијатива за стабилност, го објави на интернет Х, целото писмо кое Гервала го испратила до претседателот на Парламентарното собрание на Советот на Европа, грчкиот пратеник Теодорос Русопулос.
Во писмото, чија автентичност за РСЕ ја потврдија од Владата на Косово, се наведува дека нацрт-статутот што Косово го подготвува ќе биде испратен на толкување до Уставниот суд на Косово до крајот на мај.
Франција го обвини Азербејџан за вмешаност во немирите на Нова Каледонија
Францускиот министер за внатрешни работи Жералд Дарманин денеска го обвини Азербејџан за мешање во политиката на пацифичката територија Нова Каледонија.
„Ова не е фантазија … Жалам што некои од сепаратистите се договорија со Азербејџан … дури и ако има обиди за мешање … Франција е суверена на својот сопствена територија“, истакна Дарман.
Немирите на Нова Каледонија почнаа на 13 мај поради уставната реформа, која предвидува промени на изборниот закон на француската територија.
Националното собрание во Париз ја усвои реформата со 351 глас „за“ и 153 „против“, со која на илјадници француски граѓани на јужниот пацифички архипелаг ќе им се даде право на глас, а со тоа и поголемо политичко влијание.
Во немирите во Нова Каледонија едно лице е застрелано, а повредени се стотици луѓе, вклучувајќи околу 100 полицајци и жандарми. Десетици домови и деловни објекти биле запалени за време на немирите, а повеќе од 130 лица се приведени.
Премиерот на Франција, Габриел Атал вчера изјави дека на Нова Каледонија ќе бидат распоредени дополнителни полициски сили.
Путин и Си ги фалат односите како „стабилизирачка“ сила на меѓународната сцена
Лидерите на Кина и Русија, Си Џинпинг и Владимир Путин, ги претставија односите на нивните земји како стабилизирачка сила во еден хаотичен свет на состанокот во Пекинг, каде што рускиот претседател бара поголема кинеска поддршка за неговите воени напори во Украина и изолираната економија.
Си и Путин потпишаа и заедничка изјава за продлабочување на сеопфатното стратешко партнерство меѓу Кина и Русија, објавија кинеските државни медиуми.
На прес-конференција Путин рече дека му е „благодарен“ на Пекинг што се обидел да најде решение за војната во Украина и дека ги поздравил растечките економски врски со Кина.
„Ќе го информирам претседателот на Народна Република Кина за ситуацијата околу украинската криза. Ние сме им благодарни на нашите кинески пријатели и колеги за иницијативите што ги даваат за решавање на овој проблем“, рече Путин.
Кинескиот лидер Си Џинпинг изјави дека тој и рускиот колега Владимир Путин се согласиле за потребата од „политичко решение“ за војната во Украина, по разговорите меѓу двајцата претседатели во Пекинг.
„Двете страни се согласуваат дека политичкото решение за украинската криза е правилна насока“, изјави Си за медиумите заедно со Путин на заедничката прес-конференција што ја емитуваше Руската телевизија.
Москва тврди дека е отворена за разговори со Украина за завршување на војната, но инсистира дека Киев мора да ја прифати ситуацијата на терен, односно да се согласи со тврдењата на Русија дека ги анектирала регионите Доњецк, Херсон, Луганск и Запорожје.
Кина се позиционира како неутрална страна во конфликтот, кој никогаш не го осуди и во кој се обиде да се претстави како посредник. Западните земји велат дека нејасните мировни предлози објавени од Пекинг минатата година ќе и овозможат на Русија да задржи голем дел од територијата што ја зазеде во Украина.
Во Пекинг меѓудругото, Путин ги критикуваше и безбедносните сојузи предводени од Западот во азиско-пацифичкиот регион, што е заедничка грижа и за Москва и за Пекинг.
Тој рече дека „затворените воено-политички сојузи“ во регионот се „многу штетни“ и „контрапродуктивни“.
Претходно, Си го поздрави Путин на свечената церемонија за добредојде со воени почести пред Големата куќа на народот во Пекинг, на почетокот на дводневната посета на рускиот претседател, која се очекува да ги продлабочи односите меѓу Москва и Пекинг, за кои претходно рекоа дека „ без граници“.
Си му рекол на својот „стар пријател“ Путин дека односите меѓу Кина и Русија „водат кон мир“, се вели во соопштението на Министерството за надворешни работи на Пекинг.
„Кина е подготвена да соработува со Русија за да ги зачува правичноста и правдата во светот“, додаде Си.
Путин, пак, му рекол на Си дека односите на двете земји се „стабилизирачки фактори на меѓународната сцена“.
„Односите меѓу Русија и Кина не се опортунистички и не се насочени против никого“, рече Путин, според соопштението на Кремљ.
Ова е прво патување на Путин во странство откако тој беше реизбран во март и негово второ за нешто повеќе од шест месеци во Кина, која обезбеди економски спас за Русија откако беше санкционирана од Западот поради нејзината агресија во Украина.
Се очекува Путин да разговара за Украина, Азија, енергијата и трговијата со Си - неговиот најмоќен политички поддржувач и колега во геополитичкото ривалство со САД.
Украина тврди дека го запрела напредувањето на Русија во некои области кај Харкив
Украинската армија денеска (16 мај) објави дека го запрела руското напредување во некои области на североисточниот регион Харкив, каде Русија започна нова офанзива минатата недела.
„Ситуацијата во регионот Харкив сè уште е комплицирана, но се развива на динамичен начин. Нашите одбранбени сили делумно ја стабилизираа ситуацијата. Напредувањето на непријателот во одредени зони и локалитети е запрено“, рече портпаролот на армијата.
Портпаролот на армијата рече дека руските сили „секогаш се обидуваат да создадат услови за нов напредок“ и додаде дека украинските војници „се обидуваат да ја стабилизираат ситуацијата, да нанесат штета и да го спречат непријателот да ја окупира територијата“.
Предупредување за воздушен напад беше прогласено рано во четвртокот во Киев и неколку украински региони, при што украинските воздухопловни сили предупредуваа на закана од балистички ракети истрелани од Русија.
Руските сили редовно напаѓаат цивили во регионите на Украина, со бројни фатални жртви, меѓу кои и деца, како и огромни штети на цивилната и енергетската инфраструктура, јави украинскиот сервис на Радио Слободна Европа.
Во средата две лица загинаа во руски артилериски напад во Днепар, соопштија локалните власти.
Заседание на Воениот комитет на НАТО- во фокусот Украина и одбранбените планови на Алијансата
Поддршката за Украина, имплементацијата на концептот за операции и на одбранбените планови, подготовките за јулскиот Самит на НАТО, како и прашања од стратешко значење за сојузниците, ќе бидат темите на денешното заседание на Воениот комитет на Алијансата на ниво на началници за генералштабови на земјите членки на Пактот во Брисел.
Со заседанието ќе претседава претседателот на Воениот комитет, адмирал Роб Бауер, а на почетокот на собирот ќе се обрати и генералниот секретар на НАТО Јенс Столтенберг, кој, според најавите, ќе се осврне на клучните приоритети и предизвици на Алијансата.
Во рамките на првата сесија на заседанието, началниците ќе се фокусираат на имплементација на концептот за операции во повеќе домени и на Агендата за развој на војувањето, која го надополнува Планот за воената трансформација на НАТО за следните дваесет години.
Предвидени се и поопсежни дискусии во врска со усогласувањето на операциите и планирањето на одбраната во рамките на Процесот на одбранбено планирање на НАТО.
Како дел од заседанието ќе се одржи и состанок на Советот НАТО-Украина на ниво на началници на генералштабови, на кој е предвидено присуството и на началникот на Генералштабот на украинските Вооружени сили. Советот ќе расправа за ситуацијата на теренот поврзана со руската агресија врз Украина, како и за поддршката на државата од страна на НАТО и неговите земји членки.
На посебна сесија, врховниот командант на Силите на НАТО во Европа, генерал Кристофер Каволи ќе ги информира началниците за напредокот постигнат во имплементацијата на плановите од Концептот за одвраќање и одбрана на евроатлантската област (ДДА), што беа усвоени на ланскиот Самит на Алијансата во Вилнус, а во рамки на подготовките за претстојната средба на врвот во Вашингтон.
Во рамките на оваа сесија предвидено е да се одржат и дискусии за воената способност, интегрирана воздушна и ракетна одбрана, капацитетите на одбранбената индустрија и за општествената отпорност.
Мултимедија
Најпосетени
Што треба да знаете